Buku 1 Raja-Raja

1 Raja-raja ᯒᯐᯒᯐ 1

1:1 Jadi dung sarimatua raja Daud, ndang olo las dagingna, atik pe diborhos ibana dohot angka ulos. ᯐᯑᯪ ᯑᯮᯰ ᯘᯒᯪᯔᯖᯮᯀ ᯒᯐ ᯑᯀᯑᯮ᯲ ᯑᯰ ᯀᯬᯞᯬ ᯞᯘ᯲ ᯑᯝᯰᯪᯉ ᯀᯖᯄ᯦ᯪ᯲ ᯇᯩ ᯑᯪᯅᯒᯬ᯲ᯂᯘᯬ᯲ ᯤᯅᯉ ᯑᯬᯂᯖᯬ᯲ ᯀᯰᯄ᯦ ᯦᯦ᯥᯞᯘᯬ᯲

1:2 Jadi ro ma hata ni angka naposona mandok tu ibana: Denggan nian niluluan di tuanku sada boruboru namarbaju na tongtong jongjong di adopan ni rajai, marhaladoi, jala modom di abinganmu, asa las tuanku. ᯐᯑᯪ ᯒᯬ ᯔ ᯄᯖ ᯊᯪ ᯀᯊ᯲ᯎ᯲ᯄ᯦ ᯊᯇᯬᯚᯬᯊ ᯔᯊ᯲ᯑᯬᯄ᯦᯲ ᯖᯮ ᯤᯅᯊ: ᯑᯩᯊ᯲ᯎ᯲ᯎᯊ᯲ ᯊᯪᯀᯊ᯲ ᯊᯪᯞᯮᯞᯮᯀᯊ᯲ ᯑᯪ ᯖᯮᯀᯊ᯲ᯄ᯦ᯮ ᯚᯑ ᯅᯬᯒᯮᯅᯬᯒᯮ ᯊᯔᯒ᯲ᯅᯐᯮ ᯊ ᯖᯬᯊ᯲ᯎ᯲ᯖᯬᯊ᯲ᯎ᯲ ᯐᯬᯊ᯲ᯎ᯲ᯐᯬᯊ᯲ᯎ᯲ ᯑᯪ ᯀᯑᯬᯇᯊ᯲ ᯊᯪ ᯒᯐᯤ, ᯔᯒ᯲ᯄᯞᯑᯬᯤ, ᯐᯞ ᯔᯬᯑᯬᯔ᯲ ᯑᯪ ᯀᯅᯪᯊ᯲ᯎᯊ᯲ᯔᯮ, ᯀᯚ ᯞᯚ᯲ ᯖᯮᯀᯊ᯲ᯄ᯦ᯮ

1:3 Jadi dilului nasida ma sada boruboru namarbaju na uli di sandok gomgoman Israel, gabe jumpang nasida ma si Abisag sian Sunem, jala diboan boruboru i tu jolo ni rajai.

1:4 Alai na uli situtu do boruboru namarbaju i, gabe parhalado di rajai jala pauliuli ibana; alai ndatung ditopot rajai nasida.

1:5 Alai ro ma si Adonia, tubu ni Nai Haggit, patimbotimbo dirina, ninna ma: Ahu do patut gabe raja! Gabe didokkon ma paulihon di ibana hureta dohot angka jolma parsihundul dohot limapulu halak angka na mardalan di jolona.

1:6 Alai ndang dung marsak ibana dibahen amana, saleleng mangolu ibana, tung pola dohononna: Boasa tung songon i bahenonmu? Angkup ni na uli situtu do rupana; jala ditubuhon inana ibana umpudi sian si Absalom.

1:7 Dung i marsatahi ma ibana dohot si Joab, anak ni Nai Seruia, rap dohot malim Abiatar, angka na mangurupi paihuthon tahi ni si Adonia.

1:8 Alai anggo malim Sadok dohot si Benaia, anak ni si Joiada dohot panurirang Natan dohot si Simei dohot si Rei, ro di angka ulubalang ni si Daud, ndang marsatahi dohot si Adonia.

1:9 Dung i dipelehon si Adonia ma angka birubiru dohot lombu dohot pinahan na pinamokmok di lambung batu Sohelet, mardonokkon sumur Enrogel, jala dipio saluhut anggina, angka anak ni rajai, ro di sude halak Juda, angka naposo ni rajai.

1:10 Alai anggo panurirang Natan dohot si Benaia dohot angka ulubalang, dohot si Salomo anggina i, ndang dipio.

1:11 Dung i ninna si Natan ma mandok si Batseba, ina ni si Salomo: Atehe, ndang dibege ho naung bangkit raja si Adonia, tubu ni Nai Haggit? Jala tuanta si Daud ndang umbotosa.

1:12 On pe ro ma ho, naeng ahu marsipaingot tu ho, asa malua hosam dohot hosa ni anakmu si Salomo.

1:13 Laho ma ho manopot raja Daud, jala dok ma tu ibana: Nda nunga disumpahon ho, ale rajanami tu naposom boruboru, pola nimmu: Ingkon si Salomo, anakmu gabe raja singkathu, jala ingkon ibana hundul di atas habangsangku? Boasa ia nuaeng si Adonia bangkit raja?

1:14 Ida ma, tagan mangkatai dope ho disi dohot rajai, ro ma ahu masuk sian pudim paujungkon angka hatam.

1:15 Jadi masuk ma si Batseba manopot rajai tu bilut. Alai nunga matua situtu anggo rajai, jala si Abisag sian Sunem marhaladoi di adopan rajai.

1:16 Dung i dipaunduk si Batseba ibana marsomba tu rajai. Alai ninna rajai ma: Aha di ho huroha?

1:17 Jadi ninna nasida ma mandok ibana: Ale tuanku, nunga pola disumpahon ho tu Jahowa, Debatam, marbagahon tu naposom boruboru: Ingkon si Salomo, anakmi gabe raja singkathu, jala ingkon ibana juguk di atas habangsangku.

1:18 Hape ia nuaeng, ida ma, nunga ro si Adonia, bangkit raja, ia ho ale rajanami, ndang parbinoto disi!

1:19 Nunga pola dipelehon ibana angka jonggi dohot pinahan na pinamokmok dohot birubiru mansai deak, jala dipio saluhut anak ni rajai, dohot malim Abiatar dohot si Joab, partogi ni angka parangan; alai anggo si Salomo naposom, ndang dipio.

1:20 Alai sai tu ho do, ale rajanami, nolnol mata ni sandok Israel, asa dipabotohon ho tu nasida manang ise ingkon juguk di atas habangsa ni tuanku, gantina.

1:21 Alai ia dung monding tuanku, gabe top dohot angka ompuna, ingkon ahu dohot anakmu si Salomo gabe pardosa, pola marutang hosa.

1:22 Alai ida ma, tagan mangkatai dope nasida dohot rajai, ro ma panurirang Natan.

1:23 Jadi marboaboa ma halak tu rajai songon on: Ida ma, disi do panurirang Natan. Jadi dung sahat ibana tu jolo ni rajai, manungkap ma ibana tu tano di jolo ni rajai.

1:24 Dung i ninna si Natan ma: Atehe ale rajanami, nunga didok ho huroha: Ingkon si Adonia gabe raja singkathu, jala ingkon ibana juguk di atas habangsangku?

1:25 Ai nunga pola tuat ibana sadarion, jala nunga dipelehon angka jonggi dohot birubiru na pinamokmok mansai deak, jala nunga dipio saluhut anak ni rajai, ro di angka partogi ni parangan dohot malim Abiatar; jala ida ma, mangan minum do nasida di jolona, huhut didok nasida: Horas ma raja Adonia!

1:26 Alai anggo ahu naposomon dohot malim Sadok dohot si Benaia, anak ni si Joiada dohot naposom si Salomo, ndang dipio.

1:27 Aturan sian ho do i ulaning, ale rajanami, alai tahe so adong dipabotohon ho tu naposomon, manang ise ingkon juguk di atas habangsa ni tuanku, bahen gantina?

1:28 Dung i ninna raja Daud ma mangalusi: Gora hamu si Batseba ro tu ahu. Jadi ro ma nasida tu jolo ni rajai, laos tindang di adopan ni rajai.

1:29 Dung i marsumpa ma rajai, ninna ma: Songon sintongna mangolu Jahowa, naung palua hosangku sian nasa hagogotan.

1:30 Ingkon hombar tu naung husumpahon tu Jahowa, Debata ni Israel marbagahon tu ho: Ingkon si Salomo, anakmi gabe raja singkathu, jala ingkon ibana juguk di atas habangsangku, gontingku, ingkon songon i bahenonku sadarion.

1:31 Jadi marsomba ma si Batseba, pola manungkap tu tano di jolo ni rajai mandok mauliate: Sai horas ma tuanku, raja Daud ro di salelenglelengna!

1:32 Dung i ninna raja Daud ma: Gora hamu ro tu ahu malim Sadok dohot panurirang Natan dohot si Benaia, anak ni si Joiada. Jadi dung sahat nasida tu jolo ni rajai.

1:33 Ninna rajai ma mandok nasida: Arahon hamu ma angka naposo ni tuanmuna, jala pahundul hamu ma anakku si Salomo tu halodengku na marsahe, jala togihon hamu ibana tuat tu Gihon.

1:34 Ingkon dimiahi malim Sadok dohot panurirang Natan ibana disi bahen raja gumomgom Israel, jala palu hamu sarune, huhut dohononmu ma mangolophon: Horas ma raja Salomo!

1:35 Dung i nangkok hamu muse mangihuthon ibana, asa ro ibana jala hundul di atas habangsangku, jala ibana gabe raja singkathu; ai nunga hutodo ibana hian bahen partogi manguluhon anak Israel dohot Juda.

1:36 Dung i ninna si Benaia, anak ni si Joiada ma mangalusi rajai: Amen! Boti ma dohonon ni Jahowa, Debata ni tuanku!

1:37 Songon na nidonganan ni Jahowa tuanku na sai laon, suang songon i ma nian dongananna dohot si Salomo, tumimbul dope tahe dibahen habangsana, sian habangsa ni tuanku raja Daud.

1:38 Jadi tuat ma malim Sadok dohot panurirang Natan dohot si Benaia, anak ni si Joiada dohot angka hupas dohot rundo, jala dipahundul nasida si Salomo tu halode ni raja Daud, asa manogihon ibana tu Gihon.

1:39 Dung i dibuat malim Sadok ma sahan parmiahan sian undungundung i, laos dimiahi ma si Salomo. Dung i dipalu nasida ma sarune, jala sahata sandok na torop i mangolophon: Horas ma raja Salomo!

1:40 Dung i nangkok ma sandok na torop i mangihuthon ibana laos umpalui angka parhinaloan jala marlas ni roha godang, pola mardorom tano i dibahen suraknasida.

1:41 Jadi dibege si Adonia dohot sude angka na piniona i, angka na rap dohot ibana, jala ipe sun nasida mangan. Alai dung dibege si Joab soara ni sarune, ninna ma: Na marhua do soara hagunturon di huta i?

1:42 Alai mangkatai dope ibana ida ma, nunga ro si Jonatan, anak ni malim Abiatar. Jadi ninna si Adonia ma: Masuk ma ho, ai jolma haposan do ho, jala barita na uli do tagamon na binoanmi.

1:43 Alai ninna si Jonatan ma mangalusi si Adonia: Tongon do nian, alai tahe nunga dipabangkit tuanta raja Daud si Salomo gabe raja!

1:44 Jala nunga disuru rajai bahen donganna malim Sadok dohot panurirang Natan dohot si Benaia, anak ni si Joiada ro di angka hupas dohot rundo, angka na pahundul ibana tu halode na marsahe hinundulan ni rajai.

1:45 Angkup ni nunga dimiahi malim Sadok dohot panurirang Natan ibana di Gihon bahen raja, jala marlas ni roha nasida nangkok sian i, pola tung guntur huta i. I ma soara surak na binegemuna i.

1:46 Angkup ni nunga hundul si Salomo di atas habangsa harajaon.

1:47 Nunga masuk huhut angka naposo ni rajai laho mamasumasu tuanta raja Daud, angka didok do: Dumenggan muse dope nian barita ni si Salomo sian baritam, tumpahon ni Debatam, jala tumimbul habangsana sian habangsami! Nunga pola martangiang rajai di atas podomanna.

1:48 Angkup ni nunga pola songon on hata ni rajai: Pinuji ma Jahowa, Debata ni Israel, na marbasabasahon sadarion sahalak na juguk di atas habangsangku, sanga dope matangkon marnidasa.

1:49 Jadi godoron jala hehe be sude jolma na pinio, angka na rap dohot si Adonia, laho be nasida masitondong tondongonna.

1:50 Alai tahuton ma si Adonia mida si Salomo, dibahen i hehe ma ibana laos laho mangkaol angka tanduk ni langgatan.

1:51 Dung i tarbortik ma tu si Salomo didok halak: Ida ma, tahuton do si Adonia mida raja Salomo, jala ida ma, dihaol ibana do angka tanduk ni langgatan, ninna do: Aut olo ma nian raja Salomo marsumpahon tu ahu sadarion, paboa na so bunuonna ahu naposona marhitehite podang.

1:52 Dung i ninna si Salomo ma: Molo tung lidang rohana, na so tupa marurus obukna nanggo sada tu tano; alai molo tung jumpang tahi jahat di bagasan ibana, ingkon marutang hosa ibana!

1:53 Dung i disuru raja Salomo ma suruanna mangalapi ibana mijur sian langgatan i. Jadi dung ro marsinggang ma ibana tu jolo ni raja Salomo. Alai ninna si Salomo ma mandok ibana: Laho ma ho muli tu jabum!

1 Raja-raja 2

2:1 Jadi dung lam jonok ajal ni si Daud laho mate, martona ma ibana tu anakna si Salomo, ninna ma:

2:2 Na laho ma anggo ahu tumopot dalan ni saluhut manisia isi ni tano on. Antong marsihohot ma roham jala pir tondim.

2:3 Jala radoti pangoloion tu Jahowa Debatam, asa marparange ho di angka dalanna laho mangaradoti angka patikna, angka tonana, angka uhumna dohot angka panindangionna, hombar tu na tarsurat di bagasan patik ni si Musa, asa marbisuk ho di sude sibahenonmu dohot di sude na tinembak ni roham disi.

2:4 Asa dipahot Jahowa hatana, na pinarbagabagana tu ahu, uju nidokna: Molo diramoti angka anakmu angka dalannasida, marparange nasida di jolongku di bagasan hasintongan sian nasa rohanasida dohot sian nasa ateatenasida, na so tupa tos sian ho baoa na hundul di habangsa ni Israel, ninna.

2:5 Angkup ni tangkas do diboto ho na binahen ni si Joab, anak ni Nai Seruia tu ahu, na binahenna tu na dua partogi ni parangan ni Israel, tu si Abner tahe, anak ni si Ner, dohot tu si Amasa, anak ni si Jeter, na binununa, jala mandurushon mudar parporangan di demak ni tahi, jala marsapu mudar parporangan dibahen hohosna na di gontingna, dohot sipatuna na di patna!

2:6 Antong bahen ma hombar tu hapistaranmu, unang loas ubanna marsonangsonang tuat tu parbeguan.

2:7 Alai anggo tu angka anak ni si Barsilai, halak Gilead i, ingkon bahenonmu ma asi ni roha, loas ma nasida saor tu angka jolma sisada panganan dohot ho, ai songon i do panomunomunasida tu ahu, uju na maporus ahu maradophon si Absalom hahami.

2:8 Jala ida ma, di lambungmi do si Simei, anak ni si Gera, halak Benjamin, sian Bahurim, ibana mambuburahon tu ahu bura na sogir uju di ari hapoporushu tu Mahanaim. Hape tuat ibana muse manjumpangkon ahu tu topi ni Jordan, pola husumpahon uju i tu Jahowa marbagahon tu ibana: Ndang bunuonku ho marhitehite podang.

2:9 Alai anggo nuaeng, unang lias ibana bahen sian uhum, ai baoa na pistar do ho, jala botoonmu do manang aha sibahenonmu tu ibana, ingkon marabul mudar ubanna tuat tu parbeguan bahenonmu.

2:10 Dung i monding ma si Daud, gabe top dohot angka ompuna, jala tartanom di huta ni si Daud.

2:11 Alai anggo lelengna mangarajai si Daud di Israel, opatpulu taon do. Pitu taon lelengna ibana mangarajai di Hebron, jala tolupulu tolu taon lelengna ibana mangarajai di Jerusalem.

2:12 Jadi si Salomo i saut juguk di atas habangsa ni si Daud, amana i, jala lam hot situtu do harajaonna i.

2:13 Dung i ro ma si Adonia, anak ni Nai Haggit, mandapothon si Batseba, ina ni si Salomo. Jadi didok si Batseba ma: Beha dame do na hinarohonmi? Dame ma tutu ninna!

2:14 Dung i ninna ma: Adong hata sidohononku tu ho. Antong dok ma! ninna nasida.

2:15 Jadi didok ibana ma: Diboto ho do patut tu ahu do harajaon i, jala nolnol tu ahu do bohi ni sandok Israel, parajahon ahu nian; hape anggo nuaeng nunga bali harajaon i jala sahat tu anggingki; Jahowa do tutu patongonhon tu ibana.

2:16 Nuaeng pe, sada sambing pangidoan na hupangido sian ho, unang tung tarila bohingku bahen. Jadi didok nasida ma mandok ibana: Antong paboa ma!

2:17 Dung i ninna ibana ma: Ua pangkulingi jolo raja Salomo i, ai ndang tagamon pailaonna bohim, asa dilehon tu ahu nian si Abisag sian Sunem bahen jolmangku.

2:18 Jadi ninna si Batseba ma: Denggan, hupangkulingi pe rajai taringot tu ho.

2:19 Dung i ditopot si Batseba ma raja Salomo, naeng mangkatai dohot ibana taringot tu si Adonia. Jadi hehe ma rajai manjumpangkon laos marsomba dompak nasida, laos hundul ibana tu habangsana. Didokkon huhut boanon sada habangsa di ina ni rajai, asa hundul di siamunna.

2:20 Dung i ninna si Batseba ma: Adong do pangidoan sada na metmet na hupangido tu ho, unang tung paila ahu. Jadi ninna raja ma mandok nasida: Pangido ma, ale inang, ai ndang pailaonku bohim.

2:21 Jadi ninna si Batseba ma: Nilehon nian si Abisag sian Sunem tu hahami si Adonia bahen jolmana.

2:22 Dung i ninna raja Salomo ma mangalusi inana i: Boasa tung ho mangidohon si Abisag sian Sunem di si Adonia? Pangido tagonan huhut harajaon i di ibana, ai dahahang hian do ibana, jala dingkan ibana do malim Abiatar dohot si Joab, anak ni Nai Seruia.

2:23 Dung i marsumpa ma raja Salomo tu Jahowa, ninna ma: Ingkon songon i bahenon ni Debata tu ahu, jala patambaonna dope songon i! Ingkon marutang hosa si Adonia ala ni hatana on!

2:24 On pe, songon sintongna mangolu Jahowa, na pahot ahu, jala pahundul ahu tu atas habangsa ni damang si Daud, jala na pauli di ahu sada bagas, songon na pinarbagabagana i: Ingkon sadarion dope mate si Adonia!

2:25 Dung i disuru raja Salomo ma si Benaia, anak ni si Joiada na maniham ibana, asa mate.

2:26 Anggo tu malim Abiatar, didok rajai ho: Laho ma ho tu Anatot, topot ma ladangmu, ai baoa na marutang hosa do ho nian; alai ndang dope bunuonku ho anggo sadarion, ala naung niusungmu poti ni Tuhan Jahowa di adopan ni damang si Daud, jala ala naung sapardangolan ho dohot damang na jolo.

2:27 Jadi dibuangkon si Salomo ma anggo si Abiatar i, asa unang be malim ni Jahowa ibana, jadi sintong ma hata ni Jahowa, naung nilumbahonna hian taringot tu pinompar ni si Eli di Silo.

2:28 Dung i sahat ma barita i tu si Joab (ai nunga marbalik si Joab mangihuthon si Adonia, ndang nian marbalik ibana anggo mangihuthon si Absalom na jolo). Jadi maporus ma si Joab tu undungundung ni Jahowa, jala dihaol angka tanduk ni langgatan.

2:29 Dung i adong ma na paboahon tu raja Salomo, naung maporus si Joab tu undungundung ni Jahowa, jala ida ma, di lambung ni langgatan i do ibana. Jadi disuru si Salomo ma si Benaia, anak ni si Joiada, ninna ma: Laho ma ho, tiham ibana tusi! ninna.

2:30 Jadi dung sahat si Benaia tu undungundung ni Jahowa, ninna ma mandok ibana: Songon on do hata ni rajai: Ruar ma ho! Gabe ninna ibana: Ndang, ai tagonan dison ahu mate. Jadi dipaboa si Benaia muse hata i tu rajai: Songon on do hata ni si Joab, jala songon on do alusna tu ahu.

2:31 Dung i didok rajai ma tu ibana: Bahen ma songon na nidokna i, tiham ma ibana jala tanom, asa dipurpurhon ho sian ahu dohot sian pinompar ni damang sapata ni mudar na so marpipot, na nidurushon ni si Joab.

2:32 Asa manginona tu uluna bahenon ni Jahowa mudarna, ala tinihamna dua halak na ubanon jala na dumenggan marroha sian ibana, laos dibunu nasida marhitehite podang, so pamotoan ni damang si Daud, i ma si Abner, anak ni si Ner, partogi ni parangan ni Israel dohot si Amasa, anak ni si Jeter, partogi ni parangan ni Juda.

2:33 Asa marsibalik sapata ni mudarnasida manginona tu ulu ni si Joab dohot tu ulu ni pinomparna ro di salelenglelengna; alai anggo si Daud, dohot pinomparna ro di isi ni bagasna dohot habangsana, ingkon maruli dame sian Jahowa ro di salelenglelengna.

2:34 Jadi nangkok ma si Benaia, anak ni si Joiada, ditiham ma ibana laos mate; gabe tartanom ibana di bagasan jabuna di halongonan.

2:35 Dung i dipabangkit rajai ma si Benaia, anak ni si Joiada bahen singkatna, manguluhon angka parangan i, huhut dipabangkit rajai malim Sadok, singkat ni si Abiatar.

2:36 Dung i disuru rajai ma mangalapi si Simei, ninna ma mandok ibana: Pauli ma di ho sada bagas di Jerusalem, asa maringan ho disi, jala unang ruar ho sian i laho manang dompak dia.

2:37 Ai sadari ho ruar jala manaripari batang aek Kidron, ingkon boto hian, sai na mate do ho; manginona tu ulum ma sapata ni mudarmu!

2:38 Dung i ninna si Simei ma mandok rajai: Denggan do hata i, songon na nidok ni tuanku, ingkon songon i bahenon ni naposomon. Jadi maringan ma si Simei di Jerusalem, pola na nia lelengna.

2:39 Hape dung salpu tolu taon lintun ma dua naposo ni si Simei tu si Akis, anak ni si Maaka, raja sian Gat. Jadi adong ma na paboahon tu si Simei songon on: Ida ma, di Gat do angka naposom.

2:40 Jadi laho ma si Simei, dipalanoi ma halodena, asa laho ibana tu Gat manopot si Akis naeng mangalului naposona. Jadi dung sahat si Simei, diboan ma angka naposona mulak sian Gat.

2:41 Dung i adong ma na paboahon tu si Salomo naung laho si Simei sian Jerusalem tu Gat, jala mulak muse.

2:42 Jadi disuru rajai ma mangalapi si Simei, ninna ma mandok ibana: Nda nunga pola hupatolon ho tu Jahowa, jala huhatindangkon tu ho songon on: Sadari ruar ho jala laho manang dompak dia, boto hian ma, ingkon mate ho! Pola didok ho uju i tu ahu: Denggan hata i hubege.

2:43 Boasa tung so ingotonmu uari tu Jahowa dohot tona na hutonahon i tu ho?

2:44 Angkup ni, ninna rajai mandok si Simei: Ho pe, diboto ho do sandok hajahaton na niingot ni roham, na binahenmi tu damang si Daud. Ala ni nunga manginona hajahatonmu tu ulum, dibahen Jahowa.

2:45 Alai dapotan pasupasu anggo raja Salomo, jala hot do ia habangsa ni si Daud di adopan ni Jahowa ro di saleleng ni lelengna.

2:46 Dung i didokkon rajai ma si Benaia, anak ni si Joiada, asa ruar maniham ibana, laos mate. Jadi hot ma harajaon i dipegang tangan ni si Salomo.

1 Raja-raja 3

3:1 Dung i martondong ma si Salomo tu si Firaun, raja sian Misir, dibuat ma boru ni si Firaun, jala diboan tu huta ni si Daud, paima sun pinaulina jabuna dohot joro ni Jahowa ro di parik ni Jerusalem humaliang.

3:2 Alai mamele dope uju i situan na torop i di atas robean, ai ndang dope dipajongjong joro di Goar ni Jahowa rasirasa sadarina i.

3:3 Alai holong do roha ni si Salomo mida Jahowa, marparange do ibana di angka aturan ni amana si Daud, asal mamele dope ibana di atas ni angka tambak jala manutung daupa disi.

3:4 Dung i laho ma rajai tu Gibeon, asa mamele disi, ai tambak bolon do disi; saribu pelean situtungon dipelehon si Salomo di atas langgatan i.

3:5 Apala di Gibeon ma patar Jahowa tu si Salomo di bagasan nipina bornginna i, didok Debata ma: Pangido ma manang aha silehononku tu ho.

3:6 Dung i ninna si Salomo ma: Nunga dibahen Ho asi ni roha godang tu naposom, damang si Daud, hombar tu parangena di jolomi di bagasan hasintongan, hatigoran dohot habonaron ni roha maradophon ho, jala nunga dipahot Ho di ibana asi ni roha na godangon, dilehon Ho di ibana sada anak na juguk di atas habangsana, songon na masa nuaeng.

3:7 On pe, ale Jahowa, Debatangku, nunga dipabangkit Ho naposom gabe raja singkat ni damang raja Daud; alai bajar dope ahu, ndang huboto ruhut tu balian manang di bagasan huta.

3:8 Ia naposomon di tongatonga ni bangsom do, naung pinillitmi, bangso na bolon, na so taretong jala na so habilangan dibahen deakna.

3:9 Dibahen i, lehon ma tu naposomon roha na pantas laho manguhum bangsomi, asa huboto manirang na denggan sian na roa; ai tung ise ma na tuk manguhum bangsom na marmulia on?

3:10 Dung i lomo ma roha ni Jahowa, ala songon i pangidoan ni si Salomo.

3:11 Jadi ninna Debata ma tu ibana: Ala na songon i pangidoanmi, jala ndang dipangido ho ginjang ni umur, jala ndang dipangido ho hamoraon, jala ndang dipangido ho hosa ni angka musum, roha tahe pinangidom asa tumimbang uhum.

3:12 Ida ma, bahenonku ma hombar tu hatam. Ida ma! Lehononku ma tu ho roha na bisuk jala na pantas, asa unang adong tudoshon ho sian na robi angka naung salpu i, nang na tubu muse.

3:13 Angkup ni na so pinangidom pe, lehononku do tu ho, nang hamoraon, nang hamuliaon, asa unang adong tudoshon ho nanggo sahalak di tongatonga ni angka raja saleleng ho mangolu.

3:14 Dung i molo sai tong marparange ho di angka dalanku laho mangaradoti angka patikku dohot tonangku, songon parange ni amangmu si Daud, tumpahonku ho huhut sarimatua.

3:15 Jadi dung ngot si Salomo, ida ma, nipina do hapengani. Jadi dung sahat ibana tu Jerusalem, jongjong ma ibana di jolo ni poti parpadanan ni Jahowa, jala dipelehon angka pelean situtungon, dibahen huhut angka pelean hamauliateon, jala dilehon mangan saluhut naposona.

3:16 Uju i ro ma dua parompuan sibabijalang mangalualu tu rajai, laos jongjong di jolona.

3:17 Ninna parompuan na sada ma: Santabi, ale tuanku, ia ahu dohot parompuan on maringan di sada jabu, jadi mangintubu ahu di lambungna di jabu i.

3:18 Dung i patoluarihon dung mangintubu ahu, mangintubu huhut parompuan on; jala rap hami na dua, ndang adong halak na asing di jabu i, dungkon ni hami na dua.

3:19 Dung i mate ma anak ni parompuan on borngin i, ditipa ibana uju modom.

3:20 Jadi hehe ma ibana tonga borngin, dihindat ma anakku sian lambungku, uju modom naposom boruburu, jala dipeakkon ibana tu ampuanna, ia anakna na mate dipeakkon tu ampuanku.

3:21 Jadi dung hehe ahu manogotna i laho pasusuhon anakki, gabe ida ma, nunga mate ibana. Alai hupamanatmanat ma ibana manogotna i, gabe ida ma, ndada ibana anakku na hutubuhon i.

3:22 Alai ninna parompuan na sadanari ma: Ndang songon i, ai anakku do na mangolu i, jala anakmu do na mate. Alai ninna parjolo i ma: Ndada! Ai anakmu do na mate, jala anakku do na mangolu i. Songon i nasida marbada masialusan di jolo ni rajai.

3:23 Dung i ninna rajai ma: Sadaon mandok: On do anakku na mangolu i, jala anakmu do na mate. Alai sadaan mandok: Ndada, ai anakmu do na mate, jala anakku do na mangolu i.

3:24 Jadi ninna rajai ma: Antong boan hamu ma tu ahu sada podang. Jadi dung sahat podang i tu jolo ni rajai.

3:25 Ninna rajai ma: Ponggol dua hamu ma posoposo na mangolu i, jala lehon hamu samponggol tu sadaon, jala samponggol tu sadaan.

3:26 Jadi ninna parompuan, paranak na mangolu i ma tu rajai (ai tarsunggul do holong ni rohana mida anakna i): Sombangku di ho, ale tuanku, lehon hamu ma tu nasida posoposo na mangolu i, unang tung bunu hamu ibana. Alai ninna parompuan na sadanari ma: Unang di ahu, unang di ho, ponggol hamu ma i!

3:27 Dung i ninna rajai ma mangalusi: Lehon hamu ma posoposo na mangolu i tu parompuan on, unang be bunu hamu, on do inana.

3:28 Dung i sar ma uhum na nidabu ni rajai tu sandok Israel, gabe mabiar ma nasida mida rajai, ai diida nasida do habisuhon sian Debata di bagasan ibana laho madabu uhum.

1 Raja-raja 4

4:1 Jadi raja Salomo i ma gabe raja gumomgom sandok Israel.

4:2 Jala on do induk angka na pinabangkitna i: Si Azaria, anak ni malim Sadok.

4:3 Si Elihorep dohot si Ahia, anak ni si Sisa, i ma jurutulis; si Josapat, anak ni si Ahilud do panuturina.

4:4 Jala si Benaia, anak ni si Joiada, partogi ni parangan, jala si Sadok dohot si Abiatar malim.

4:5 Ia si Azaria, anak ni si Natan, induk ni angka parhalado, jala si Sabud, anak ni si Natan, aleale hasudungan ni rajai.

4:6 Jala si Ahisar induk ni angka siramoti bagas, jala si Adoniram, anak ni si Abda, induk ni halak parrodi.

4:7 Angkup ni dipabangkit si Salomo sampulu dua halak siparenta sandok Israel, angka na pasingkop sipanganon tu rajai dohot tu isi ni bagasna, sasabulan lelengna di na sataon, gonop nasida pasingkophon.

4:8 On do goargoar nasida: Anak ni si Hur di dolok Epraim.

4:9 Anak ni si Bendeker di Makas dohot di Salabim dohot di Betsemes dohot di Elon sahat ro di Betharan.

4:10 Anak ni si Benhesed di Arubot, masuk tu ibana huhut Soko ro di sandok tano Heper.

4:11 Anak ni si Amminadab di sandok banua Dor; si Tafat, boru ni si Salomo do jolmana.

4:12 Si Baana, anak ni si Ahilud di Taanak dohot Megiddo ro di sandok Betsean, marbalokkon Zaretan, tungkan toruan sian Jisreel, olat ni Betsean sahat ro di Abel Mehola, sahat ro di bariba ni Jokmeam.

4:13 Anak ni si Geber di Ramot di Gilead, masuk tu ibana do angka huta ni si Jair, anak ni si Manasse, angka na di Gilead, masuk tu ibana muse luat Argob, na di Basan; onompulu huta na bolon marparik jala marransangransang tombaga.

4:14 Si Ahinadab, anak ni si Ido di Mahanaim.

4:15 Si Ahimas di Naptali, ibana pe mambuat si Basemat, boru ni si Salomo bahen jolmana.

4:16 Si Baana, anak ni si Husai, di Aser dohot di Alot;

4:17 Si Josapat, anak ni si Parua, di Isasar.

4:18 Si Simei, anak ni si Ela, di Benjamin.

4:19 Si Geber, anak ni si Uri, di tano Gilead, di tano ni si Sihon, raja ni halak Amori dohot si Og, raja sian Basan. Sasadasa do siparenta tano i.

4:20 Mansai deak do halak Juda dohot Israel, songon horsik di pasir ni laut hinadeakna, angka na mangan minum jala marlas ni roha nasida.

1 Raja-raja 5

5:1 Asa si Salomo panggomgomi di sandok harajaon, olat ni batang aek sahat ro di tano ni halak Palistim jala sahat ro di parbalohan Misir, angka na mamboan sohe jala mangoloi rodi ni si Salomo, saleleng mangolu ibana.

5:2 Alai ingkon adong bahen bohal ni si Salomo sasadari tolupulu pingkul itak na lamot dohot onompulu pingkul itak hian.

5:3 Sampulu lombu na pinamokmok dohot duapulu lombu sian jampalan dohot saratus birubiru, so padohot angka ursa dohot bedu dohot hije dohot pahanpahanan marragamragam na pinamokmok.

5:4 Ai digomgomi ibana do sandok tano di bariba ni batang aek Euprat, olat ni Tirza sahat ro di Gasa, digomgomi saluhut raja na di baribaon ni batang aek i, jala marhademahon ibana sian na humaliang.

5:5 Jadi marhasonangan ma Juda dohot Israel maringan ganup di toru ni hau anggurna be dohot di toru ni hau arana, olat ni Dan sahat ro di Berseba, saleleng mangolu raja Salomo.

5:6 Angkup ni adong di raja Salomo opatpulu ribu hajongjongan ni hoda angka sitait huretana dohot sampulu dua ribu hoda hundulan ni parangan parsihundul.

5:7 Dung i angka siparenta ondeng marbohalhon raja Salomo ro di sude angka na mangan sian meja ni raja Salomo, ganup di bulanna be, ndang adong hurang agia aha.

5:8 Tole eme dohot durame di angka hoda sitait hureta dohot hoda hundulan, diboan nasida do i tu inganan parmianan ni rajai ganup di gansina be.

5:9 Dung i dibasabasahon Debata ma tu si Salomo habisuhon dohot roha panimbangon mansai godang dohot parbinotoan godang, tudoshon horsik na di topi ni laut godangna.

5:10 Jala gumodang do habisuhon ni si Salomo sian habisuhon ni saluhut anak angka na di habinsaran dohot sian saluhut habisuhon ni halak Misir.

5:11 Umbisuk ibana tahe sian sude manisia, umbisuk sian si Etan, halak Esrahi dohot si Heman dohot si Kalkol, dohot si Darda, angka anak ni si Mahol, gabe sar baritana tu saluhut bangso parbegu humaliang.

5:12 Jala dihatahon ibana tolu ribu umpama, ia torop ni endena saribu lima do.

5:13 Diboto huhut torsahononna taringot tu angka hau, sian hau Ares na di Libanon ro di Ysop (limutlimut) na tubu di dorpi; ditorsahon huhut taringot tu angka pahanpahanan, taringot tu angka pidong, taringot tu angka gulokgulok dohot taringot tu angka dengke.

5:14 Jadi marroan ma halak sian saluhut bangso naeng umbege habisuhon ni si Salomo, sian saluhut angka raja di tano on, angka na umbege barita ni habisukonna.

5:15 Dung i disuru raja Hiram, sian Tirus ma angka naposona manopot si Salomo, ala naung binegena naung miniahan ibana bahen raja singkat ni amana; ai holong roha ni si Hiram mida si Daud saleleng mangolu ibana.

5:16 Jadi ditongoshon si Salomo ma hatana tu si Hiram, ninna ma:

5:17 Diboto ho do, na so tarbahen si Daud damang i pajongjong sada joro di Goar ni Jahowa Debatana, ala ni hamusuon angka na humaliang ibana, paima dipatunduk Jahowa nasida tu toru ni palak ni patna.

5:18 Alai anggo nuaeng nunga marhasonangan ahu humaliang dibahen Jahowa, Debatangku, ndang adong be alo nanggo sahalak, manang masa hinamago.

5:19 Dibahen i, ninna rohangku, denggan pinajongjong sada joro di Goar ni Jahowa Debatangku songon na pinorbagabaga ni Jahowa tu damang si Daud, uju nidokna: Anakmu, sipahundulonku di atas habangsamu bahen gantim, ingkon ibana pajongjong sada joro di Goarhu.

5:20 Antong dokkon ma halak angka na manaba di ahu hau Ares sian Libanon, asa tampak angka naposongku dohot angka naposom, ia upa ni angka naposom lehononku do tu ho, guru pandokmu; ai diboto ho do ndang adong anggo di tongatonganami manang ise na umboto manaba hau, songon halak Sidon i.

5:21 Jadi dung dibege si Hiram angka hata ni si Salomo i, las situtu ma rohana, ninna ma: Pinuji ma Jahowa sadarion, ala naung nilehonna tu si Daud anak sada na bisuk gumomgom bangso na bolon on.

5:22 Dung i disuru si Hiram ma suruanna manopot si Salomo mandok: Nunga hubege alana umbahen disuru ho manopot ahu; sai bahenonku do sude hombar tu lomo ni roham taringot tu hau Ares dohot taringot tu hau sampinur.

5:23 Ingkon angka naposongku patuathon hau i sian Libanon tu laut; dung i ahu mambahen angka i marrakitrakit di laut sahat ro di inganan sitonahononmu tu ahu, asa pinarade disi, jadi ripe mangalap ho. Alai ho pe ingkon bahenonmu huhut pinangido ni rohangku mangalehon bohal tu isi ni bagashu.

5:24 Jadi dilehon si Hiram ma tu si Salomo hau Ares dohot hau sampinur guru lomo ni rohana.

5:25 Alai anggo raja Salomo mangalehon tu si Hiram duapulu ribu pingkul dahanon bahen bohal ni isi ni bagasna dohot duapulu pingkul miak dahan. Songon i dilehon raja Salomo ganup taon tu si Hiram.

5:26 Dung i dibasabasahon Jahowa ma hapistaran tu raja Salomo, songon na pinarbagabagana i hian tu ibana; jadi mardame ma si Hiram dohot raja Salomo, laos umpungka parjanjian nasida na dua.

5:27 Dung i dipillit raja Salomo ma angka parrodi sian sandok Israel, ia torop ni parrodi i tolupulu ribu halak do.

5:28 Jadi disuru rajai ma nasida tu Libanon, sampulu ribu halak sagansi sasabulan lelengna, gabe sabulan nasida di atas Libanon jala dua bulan di jabuna. Jadi si Adoniram do induk ni angka parrodi i.

5:29 Angkup ni pitupulu ribu halak parhuli di raja Salomo, jala ualupulu ribu halak pandakdak batu di dolok.

5:30 So padohot induk angka na pinabangkit ni raja Salomo angka na parenta ulaon i, tolu ribu tolu ratus halak, angka na mandasdas situan na torop i mangula ulaon.

5:31 Didokkon rajai huhut nasida mangkali batu angka na bolon dohot batu angka na arga, angka na nidakdak bahen ojahan ni joro i.

5:32 Jadi rap tole ma angka pande ni raja Salomo dohot pande ni raja Hiram ro di halak Gebal i mambarbar hau dohot mandakdak batu laho marhobas bagas joro i.

1 Raja-raja 6

6:1 Boho opat ratus ualupulu taon, dung ruar halak Israel sian tano Misir, jala paopattaonhon hinarajahon ni raja Salomo gumomgom Israel, di bulan Siw, i ma bulan paidua, dipungka rajai palolo joro ni Jahowa.

6:2 Ia joro na pinalolo ni raja Salomo di Jahowa, onompulu asta unjurna, jala duapulu asta bohangna, jala tolupulu asta timbona.

6:3 Ianggo emper na di adopan ni bagas joro i, duapulu asta do unjurna, mangihuthon bohang ni joro i, sampulu asta ia bohangna di adopan ni joro i.

6:4 Dipambahen huhut di joro i pandiloan angka na marhandanghandang na sosot.

6:5 Dipauli huhut di lambung dorpi ni joro i sada emper humaliang, i ma humaliang dorpi ni joro i, boti humaliang pamurnanganna dohot pudina, jala dibahen angka bilut humaliang marlampislampis.

6:6 Ia emper partoru lima asta bohangna, ai partonga onom asta bohangna, ia paitolu pitu asta bohangna; ai dipambahen do bagas joro i martagahambing humaliang, asa unang masijaloan angka i tu dorpi ni joro i.

6:7 Tole laho palolohon joro i, nunga tipak hian didakdak angka batu i, asa unang tarbege be soara ni nanggar manang tangke manang dia ulaula bosi di bagasan joro i laho palolohon.

6:8 Alai anggo pintu laho tu emper partonga dingkan siamun ni joro i do, asa marhite sian tangga na marlegotlegot manaek halak tu emper partonga, jala sian emper partonga tu emper paitolu.

6:9 Songon i ma parpaulina di joro i jala dipasidung jala dilangitlangit i joro i margulanggulang jala marpapan sian hau Ares.

6:10 Dipauli huhut sada emper di sandok haliang bagas i, lima asta timbona, jala hau Ares dipangke padomuhon tu joro i.

6:11 Dung i ro ma hata ni Jahowa tu si Salomo songon on:

6:12 Taringot tu joro on na pinalolomon: Molo marparange ho di bagasan angka patikku, jala dipatupa ho angka uhumhu, jala diradoti ho angka tonangku, jala marparange ho hombar tu angka i, jadi pahotonku ma tu ho bagabagangku, na huparbagabaga tu amangmu si Daud.

6:13 Jadi maringan ma Ahu di tongatonga ni halak Israel, jala ndang be tadingkononku bangsongku Israel.

6:14 Songon i ma parpauli ni raja Salomo di joro i, jala dipasidung.

6:15 Ia dorpi ni joro i dilampis do sian bagasan dohot papan na sian hau Ares, sian pantar ni joro i sahat ro di gulanggulang ni langitlangit di lampis do dohot hau sian bagasan, ia pantar ni joro i dilampis do dohot hau sampinur.

6:16 Ia na duapulu asta na di pudi ni joro i dilampis do dohot papan sian hau Ares, olat ni pantar tolhas ro di gulanggulang, jala dipauli ibana huhut sian bagasan sada bilut bahen partangiangan, i ma na songkal sahali.

6:17 Jala opatpulu asta unjur ni joro parbagasan i, i ma adopan ni joro i.

6:18 Dung i hau Ares tungkan bagasan ni joro i, maruhiran mutikmutik dohot bungabunga angka na mangerbang, luhutna i sian hau Ares do, ndang adong tarida batu nanggo sada.

6:19 Ia bilut partangiangan na di tongatonga ni joro i, dipauli do bahen hajongjongan ni poti parpadanan ni Jahowa.

6:20 Ia ungkuran ni bilut partangiangan i, duapulu asta unjurna, jala duapulu asta bohangna, jala duapulu asta timbona, jala dilampis do i dohot sere palangki; dibahen huhut sada langgatan sian hau Ares di jolona.

6:21 Dung i dilampis raja Salomo joro parbagasan i dohot sere palangki, jala dipagistang angka ranterante sere di jolo ni bilut partangiangan i, na nilampisanna i dohot sere.

6:22 Jadi sandok joro i dilampis do dohot sere; nang sandok langgatan na di jolo ni bilut partangiangan i dilampis do dohot sere.

6:23 Dibahen huhut di bagasan bilut partangiangan i dua kerubim sian hau jetun, sampulu asta timbona.

6:24 Jala lima asta ganjang ni habong ni kerubim na sada, jala lima asta ganjang ni habong ni kerubim na sadanari, gabe sampulu asta sian ujung ni habongna na sambariba sahat tu ujung ni habongna na sambariba nari.

6:25 Laos sampulu asta do nang kerubim na sadanari, sisada ungkuran dohot sisada rupa tahe kerubim na dua i.

6:26 Asa sampulu asta do timbo ni kerubim i sadasada.

6:27 Dung i dibahen ma angka kerubim i tu tongatonga ni joro parbagasan. Jadi dipaherbang angka kerubim i ma habongna, asa dolos habong ni na sada tu dorpi sambariba, jala habong ni kerubim na sadanari dolos tu dorpi na sambariba nari; alai masidolosan habongnasida anggo di tongatonga ni joro i.

6:28 Dung i dilampis ma angka kerubim i dohot sere.

6:29 Jala tu saluhut dorpi ni joro i humaliang diuhirhon sumansuman ni angka kerubim dohot harambir dohot bungabunga angka na mangerbang, sian bagasan dohot sian balian.

6:30 Nang pantar ni joro i dilampis do dohot sere songon i bilut parbagasan, songon i bilut parbalian.

6:31 Jala pintu haroroan tu bilut partangiangan i dibahen do marhinsuhinsu sian hau Jetun, jala tohang dohot angka tiangna i ma saparlima ni dorpi i.

6:32 Jadi dipauli ma na dua hinsuhinsu sian hau Jetun, jala diuhirhon do tusi sumansuman ni angka kerubim dohot harambir dohot bungabunga angka na mangerbang, jala dilampis do i dohot sere; dilampis huhut angka kerubim nang harambir i dohot sere.

6:33 Laos songon i dibahen di haroroan ni joro i tiang sian hau Jetun angka na pinaropat suhi.

6:34 Jala dua hinsuhinsu sian hau sampinur, jadi mordong na dua hinsuhinsu ni pintu na sada, mordong ma dohot na dua hinsuhinsu ni pintu na sadanari.

6:35 Diuhirhon huhut tusi sumansuman ni angka kerubim, harambir dohot bungabunga angka na mangerbang, jala dilampis do i dohot sere, mangihuthon une ni uhirani.

6:36 Dipauli muse alaman parbagasan, tolu rinte batu angka na nidakdak jala sarinte tiang sian hau Ares angka na niotom.

6:37 Paopattaonhon, di bulan Siw dibahen haojahan ni joro ni Jahowa.

6:38 Jala pasampulusadataonhon, di bulan Bul, i ma bulan paiualu sun ma joro i, hombar tu sandok hata ni rajai dohot sandok lomo ni rohana, asa pola pitu taon lelengna dipauli.

1 Raja-raja 7

7:1 Alai anggo bagasna sandiri pola sampulu tolu taon lelengna, asa sun dipauli raja Salomo tung sandok bagasna.

7:2 Dipauli huhut bagas tombak Libanon saratus asta unjurna, limapulu asta bohangna, jala tolupulu asta timbona, ojak di atas ni opat rinte tiang sian hau Ares, jala di atas ni angka tiang i peak angka gulanggulang sian hau Ares.

7:3 Jala ditarup dohot hau Ares di ginjang ni bilut, angka na jinujung ni angka tiang, opatpulu lima bilanganna, sasampulu lima sarinte.

7:4 Jala tolu rinte angka tiang, jala pajojor angka pandiloan, tolu rinte patondong be.

7:5 Saluhut angka pintu dohot tiang pinaropat suhi do nang gulanggulang jala patondong be angka jandela tolutolu rinte.

7:6 Dipauli huhut sada emper sian tiang, limapulu asta unjurna, jala tolupulu asta bohangna, maremper muse di jolona, martiang jala marlobulobu di jolona.

7:7 Angkup ni dibahen do panisioan ni habangsa paruhuman, i ma parrapotan, pantarna dohot dorpina dilampis do dohot hau Ares.

7:8 Bagasna pe na niingananna i, marpulik alaman do tungkan bagasan sian panisioan i, suang songon i do parpaulina. Angkup ni dipauli raja Salomo muse sada bagas di boru ni raja Firaun, na binuatna bahen jolmana, suang songon i parpaulina.

7:9 Luhutna i dipauli sian batu angka na arga, angka na nidakdak marungkuran jala ginargajian sian bagasan dohot sian ruar, sian ojahan sahat ro di sumban, jala sian balian sahat ro di alaman godang.

7:10 Ojahanna pe sian batu angka na arga, jala na bolon, batu sisampulu asta dohot siualu asta unjurna.

7:11 Di atas ni muse batu angka na arga, angka na nidakdak marungkuran, dohot hau Ares.

7:12 Alai anggo di alaman godang humaliang tolu rinte batu angka na nidakdak, jala sarinte tiang sian hau Ares; suang songon i alaman parbagasan di adopan ni joro ni Jahowa, dohot emper ni bagas i.

7:13 Dung i disuru raja Salomo ma mangalapi si Hiram sian Tirus.

7:14 Anak ni parompuan na mabalu do ibana sian marga Naptali, alai anggo amana halak Tirus do, jolma pande tombaga, gok hapistaran, parbinotoan dohot marhapandean, mamandei luhut ulaula sian tombaga; jadi dung ro ibana manopot raja Salomo, tole ma dipauli saluhut ulaulana.

7:15 Dung i dijadihon ma dua tiang sian tombaga, sampulu ualu elak be timbona, jala sampulu dua elak be ganjang ni tali lilitna i humaliang.

7:16 Dipauli huhut dua uluna angka na tinuang sian tombaga, jala dibahen tu pasi ni tiang i; lima elak timbo ni ulu ni tiang i sadasada.

7:17 Dibahen huhut pinartaraoang jala, tole ranterante tu ulu ni tiang na di atas tiang i, pitu tu uluna na sada, laos pitu tu uluna na sadanari.

7:18 Dibahen huhut angka parbue ni hau dalimo, pola dua rinte humaliang gantung tu taraoangna i bahen pangkuphupi ni uluna i angka na di ginjang ni tiang i, laos songon i do parpaulina dohot di na paduahon i.

7:19 Ia ulu na di atas ni tiang i tudos do tu bunga pansur na mangerbang, opat asta tumimbo sian emper i.

7:20 Jala uluna angka na di atas ni tiang na dua i di ginjangna dope mardonokkon badanna mardonokkon pinartaraoang, adong huhut dua ratus parbue ni hau dalimo, dua rinte humaliang di ganup uluna.

7:21 Dung i dipajongjong ibana ma na dua tiang i, jonok tu adopan ni joro i; jumolo dipajongjong tiang pangiamunan, dibahen ma goarna Jakin, dipajongjong muse tiang pangambirangan, dibahen ma goarna Boas.

7:22 Ia di atas ni ulu ni tiang i adong hapandean bunga pansur na mangerbang; sun disi ma pinauli ulaon taringot tu angka tiang i.

7:23 Dung i dibahen ma sada tobat tuangan, sampulu asta bidangna sian topi na sada tu baribana tuk humaliang, jala lima asta bagasna, jala tolupulu asta lilitna humaliang.

7:24 Jala di toru ni topina adong angka mutik ni bungabunga tuk humaliang sampulu kibung di bagasan saasta humaliang tobat i; dua rinte mutik ni bungabunga tartuang di panuanganna.

7:25 Ojak do i di atas ni sampulu dua lombu, tolu uluna mandompakkon utara, tolu uluna mandompakkon pastima, tolu uluna mandompakkon dangsina, jala tolu uluna mandompakkon habinsaran, jala tobat i di atas nasida; jala ihur ni angka lombu i dompak bagasan do.

7:26 Ia hapalna santopap, jala topina hira songon topi ni panginuman songon bunga pansur na mangerbang siatsiat dua ribu bat.

7:27 Dibahen huhut sampulu tong pamurian sian tombaga, ganup pamurian i opat asta ganjangna, opat asta bidangna jala tolu asta timbona.

7:28 Alai songon on do parpaulina di pamurian i: Marbibir humaliang, jala pantarna di holangholang ni bibirna.

7:29 Ia di pantarna angka na di holangholang ni bibirna adong do sumansuman ni singa dohot lombu dohot kerubim; suang songon i di tiangna parsuhi tungkan ginjang dohot tungkan toru ni angka singa dohot lombu, adong muse hapandean ramerame.

7:30 Jala opat galapang sian tombaga di ganup pamurian, botohonna pe sian tombaga do; jala suhina na opat i marabara do; di toru ni pamurian i do angka ramerame sadasada.

7:31 Ia babana tungkan bagasan ni bibirna do saasta do tu ginjang, jala tingko do babana suman tu pat ni tiang tonga dua asta bidangna; adong do huhut di babanai hapandean na niuhir; alai anggo pantarna i pinaropat suhi do, ndada tingko.

7:32 Anggo na opat galapang i di toru ni pantarna i do jala angka botohon ni galapang i mardomu do tu pamurian i; ganup galapang tonga dua asta timbona.

7:33 Ia parpaulina di angka galapang i suman do tu galapang ni hureta hian; luhutna i na tinuang do pangordonganna, botohonna, rangarangana dohot anakanakna.

7:34 Opat abara huhut di na opat suhi ni ganup pamurian i, jala sisada tuangan do abara dohot pamurian i:

7:35 Tungkan ulu ni pamurian i tingko do humaliang arga satonga asta timbona, jala di atas ulu ni parburian i angka sitioponna, sisada tuangan dohot pantarna.

7:36 Jala diuhirhon tu papan ni sitiopanna i dohot tu papanna humaliang sumansuman ni angka kerubim, singa dohot harambir marguru tu siatna di ganup papan, jala angka ramerame humaliang.

7:37 Songon i ma parpaulina di na sampulu pamurian i, dos tuanganna, suhatna dohot rupana di na saluhutna.

7:38 Angkup ni dipauli sampulu hudon sian tombaga, siatsiat opatpulu bat di ganup hudon; opat asta do ruak ni ganup hudon i, jala di atas ni ganup pamurian na sampulu i adong hudon sada be.

7:39 Dung i dibahen do lima pamurian i tungkan siamun ni joro i, na lima nari tungkan hambirangna; alai anggo tobat i dibahen do tungkan siamun ni joro i dingkan anggoni na.

7:40 Songon i ma parpauli ni si Hiram di angka hudon, siuksiuk dohot mangkuk. Jadi sun ma dipauli si Hiram sandok ulaon na pinandeanna di raja Salomo tu joro ni Jahowa.

7:41 Na dua tiang i ro di pinarninggor ni ulu angka na di atas ni tiang na dua i dohot taraoang na dua i bahen pangkuphupi ni na pinarninggor na dua i na di atas ni ulu ni tiang i.

7:42 Tole muse na opat ratus parbue ni hau dalimo na lohot tu taraoang i duadua rinte parbue ni hau dalimo i di sada taraoang bahen pangkuphupi ni na dua pinarninggor ni ulu di atas ni tiang na dua i.

7:43 Tole muse na sampulu pamurian i dohot na sampulu hudon na di atas ni pamurian i.

7:44 Tole muse tobat i ro di na sampulu dua lombu na di toru ni tobat i.

7:45 Tole angka hudon, siuksiuk dohot mangkuk Saluhut ulaula angka na pinandean ni si Hiram di raja Salomo tu joro ni Jahowa, sian tombaga mamolin do.

7:46 Di tano tobing mardonokkon Jordan di holangholang ni Sukot dohot Zaretan; didokkon rajai tuangon luhutna i di bagasan tuangan sian tano liat.

7:47 Jala dipasombu raja Salomo saluhut angka ulaula i, ai ndang dapot dasingon borat ni tombaga i dibahen hinagodangna situtu.

7:48 Didokkon raja Salomo huhut paulion sude ulaula angka na masuk tu joro ni Jahowa, i ma langgatan sere dohot meja sere hapeahan ni sagusagu na marhadohoan.

7:49 Tole angka parpalitoan, lima tungkan siamun jala lima tungkan hambirang di adopan ni bilut partangiangan, sian sere na pita do luhut na i.

7:50 Ro di angka mangkuk dohot raut dohot saoan dohot balanga dohot pardaupaan sian sere na pita do; nang angka pangordongordongan ni pintu ni joro parbagasan, di na songkal sahali dohot pangordongordongan ni pintu ni joro i sian sere do.

7:51 Jadi sun ma sandok hapandean ni raja Salomo tu joro ni Jahowa. Dung i diboan si Salomo ma tu bagasan saluhut arta na niuras ni amana si Daud ro di perak dohot sere dohot ulaula, jala dipeakkon tu bilut parpeopan arta di joro ni Jahowa.

1 Raja-raja 8

8:1 Dung i dipaluhut raja Salomo ma angka sintua ni Israel dohot sude induk ni halak Israel marmargamarga dohot marompuompu ro tu jolo ni raja Salomo di Jerusalem, naeng boanonna nangkok poti parpadanan ni Jahowa sian huta ni si Daud i ma Sion.

8:2 Jadi marluhut ma tu jolo ni raja Salomo nasa baoa di Israel di ari raya bulan Etanim, i ma bulan sipaha pitu.

8:3 Jadi dung marluhut sude sintua ni Israel, dihindat angka malim i ma poti i.

8:4 Dung i diboan nasida ma poti ni Jahowa nangkok, angkup ni undungundung parluhutan dohot sude ulaula ni habadiaon, angka na di undungundung i na sai laon, laos diboan angka malim dohot halak Lepi do i nangkok.

8:5 Jadi marudur ma raja Salomo dohot sandok luhutan ni Israel, angka na marluhut di lambungna mardalan rap dohot ibana di adopan ni poti i, huhut mamelehon angka birubiru dohot lombu, angka na so tarbilang manang taretong dibahen godangna.

8:6 Jadi sahat ma diboan angka malim poti parpadanan ni Jahowa tu hajongjonganna, tu bilut partangiangan di joro i, tu bagasan bilut na songkal sahali di toru ni habong ni kerubim na dua i.

8:7 Ai dipaherbang kerubim na dua i do habongna na dua i tu atas hajongjongan ni poti i, laos dihungkupi kerubim na dua i do poti i ro di haluhaluna sian ginjang.

8:8 Juruk do angka haluhalu i, pola dapot idaon uluna sian bilut na badia i di adopan ni bilut partangiangan, alai ndang dapot idaon anggo sian ruar, laos disi do angka i rasirasa sadarion.

8:9 Ndang adong agia aha di bagasan poti i, nda holan na dua lei batu, angka naung pineakkon ni si Musa tusi uju di Horeb, uju na binahen ni Jahowa parjanjian tu halak Israel, dung diparuar nasida sian tano Misir.

8:10 Jadi dung ruar angka malim sian bilut na badia i, ro sada ombun manggohi joro ni Jahowa.

8:11 Pola ndang manahan angka malim i jongjong marulaon na badia maradophon ombun i, ai hamuliaon ni Jahowa manggohi joro ni Jahowa.

8:12 Dung i didok raja Salomo ma: Nunga marboaboa hian Jahowa ingkon maringanan ibana di bagasan haholomon.

8:13 Antong nunga hupauli sada joro bahen parmiananmu, bahen ojahan ni habangsam ro di saleleng ni lelengna.

8:14 Dung i dipahusor rajai ma bohina asa pasupasuonna sandok luhutan Israel, jala jongjong be do sandok luhutan Israel i.

8:15 Dung i ninna rajai ma: Pinuji ma Jahowa, Debata ni Israel, naung marboaboa hian marhite sian pamanganna sandiri tu damang si Daud i, jala nunga dipasintong nuaeng marhite sian tanganna, uju na nidokna:

8:16 Olat ni ari uju Ahu manogihon bangsongku Israel ruar sian Misir, ndang dung hupillit sada huta sian sandok marga ni Israel, paulionna sada joro bahen inganan ni Goarhu; alai nunga hupillit anggo si Daud, asa ibana manggomgomi bangsongku Israel.

8:17 Nunga nian disangkap roha ni damang si Daud naeng paulionna sada joro di Goar ni Jahowa, Debata ni Israel.

8:18 Alai ninna Jahowa ma mandok damang si Daud i: Ala naung ditahi roham naeng pajongjongonmu sada joro di Goarhu, denggan do nian anggo sangkap ni roham.

8:19 Alai ndada jadi anggo ho pajongjong joro i, ingkon anakmu na ruar sian butuham, ingkon ibana pe pajongjong sada joro di Goarhu.

8:20 Nunga tung dipasintong Jahowa hatana naung pinaboana hian, jala nunga ahu dipahot singkat ni damang si Daud i, jala nunga hundul ahu di habangsa ni harajaon Israel, songon na pinaboa ni Jahowa hian, jala nunga ahu pajongjong sada joro di Goar ni Jahowa, Debata ni Israel.

8:21 Jala nunga hupadiri disi sada hajongjongan di poti i, parpeopan ni parjanjian ni Jahowa, na binahenna tu angka ompunta, uju tinogihonna nasida ruar sian tano Misir.

8:22 Dung i jongjong ma raja Salomo di adopan ni langgatan ni Jahowa mandompakkon sandok luhutan Israel, jala dipaherbang tanganna dompak langit.

8:23 Dung i ninna ma: Ale Jahowa, Debata ni Israel! Ndang adong Debata na tudoshon Ho di banua ginjang dohot di banua tonga on; Ho do tutu pahothon parjanjian dohot asi ni roha tu naposom, angka na marparange di jolom sian nasa rohana.

8:24 Ho do naung pasintongkon tu damang, naposom si Daud i hata na pinorbagabagam tu ibana; pamanganmu tutu marbagabagahon, jala tanganmu pasintongkon apala sadarion.

8:25 On pe, ale Jahowa, Debata ni Israel! Sai pasintong ma tu naposom si Daud, damang i hata naung pinorbagabagam hian tu ibana, uju na nidokmu: Ndang jadi hurangan di ho sada baoa di jolongku na hundul di atas habangsa ni harajaon Israel, asal diramoti angka anakmu dalanna, marparange nasida di jolongku songon ho naung marparange di jolongku.

8:26 On pe, ale Debata ni Israel, sai pasintong ma hatami naung pinorbagabagam tu naposom si Daud, damang i.

8:27 Alai tahe, tung tarbahen Debata ma tutu maringan di atas tano on? Ida ma, gari langit ni langitan ndang hahaliangansa Ho, baliksa apala joro on na hupauli on?

8:28 Alai sai manatap ma Ho tu tangiang ni naposom dohot tu parhurajaonna i, ale Jahowa Debatangku! Sai tangihon ma joujou dohot tangiang na tinangiangkon ni naposom di adopanmon sadarion.

8:29 Sai tonggor ma matam manatap tu joro on borngin dohot arian, tu inganan naung nidokmu: Ingkon disi do Goarhu! Antong sai tangihon ma tangiang na tinangiangkon ni naposom di inganan on.

8:30 Sai tangihon ma tutu parhurajaon ni naposomon dohot bangsom Israel, na tinangiangkonnasida di inganan on; sai tangihon ma i tutu di inganan parhabangsaanmu di banua ginjang; tangihon ma tutu jala marpamuati roham!

8:31 Tung sura mardosa sada baoa dompak donganna pola dipatolon halak ibana ala ni, sanga ibana jala saut manolon di adopan ni langgatanmon di bagasan joro on.

8:32 Sai manangi ma Ho di banua ginjang huhut marlulu asa maruli uhum angka naposom, laho manorui anggo halak parjahat, asa manginona pambahenanna tu uluna laho mamintori anggo halak parpintor mangalehon tu ibana hombar tu hatigoranna i.

8:33 Tung sura talu bangsom Israel maradophon musuna, ala naung mardosa nasida dompak Ho; alai molo mulak nasida tu Ho jala dihatindangkon Goarmu, jala martangiang nasida huhut marhuraja tu Ho di bagasan joro on.

8:34 Sai manangi ma Ho di banua ginjang jala marpamuati roham mida dosa ni bangsom Israel, jala boan nasida mulak tu tano naung nilehonmu tu ompunasida i.

8:35 Tung sura tarhinsu langit i, gabe ndang ro udan, ala naung mardosa nasida dompak Ho, dung i martangiang nasida di inganan on, jala dihatindangkon nasida Goarmu, jala mulak nasida sian dosanasida i, ala naung tarjepol nasida binahenmu:

8:36 Sai manangi ma Ho di banua ginjang, jala marpamuati roham mida dosa ni angka naposom dohot bangsom Israel, ala naung niajarhonmu tu nasida dalan na denggan i na tama sidalananna, jala lehon udan tu tanom, naung nilehonmu tu bangsom bahen partalianna.

8:37 Tung sura masa haleon di tano i manang begu antuk, manang siraraon hauma manang antinganoon manang masa sihapor manang tamponok; molo tung disosak musuna nasida di tano i pola dirongom pargumbanganna, manang tung masa begu antuk manang sahit na asing.

8:38 Nasa tangiang dohot pangidoan, manang marsasahalak, manang tung sandok bangsom Israel manangiangkonsa, ala naung mananda be di jea ni harohaonna, gabe dipaherbang tanganna dompak joro on.

8:39 Sai manangi ma Ho di banua ginjang, ojahan ni habangsam, jala marpangulahi roham, huhut marlulu dohot mangalehon tu ganup hombar tu saluhut dalanna marguru tu panandam di harohaonna, ai sasada ho do tumanda roha ni jolma manisia luhutna.

8:40 Asa tung dihabiari nasida Ho tongtong, saleleng mangolu nasida di tano naung nilehonmu tu ompunasida i.

8:41 Nang halak sileban, na so sian bangsom Israel, na ro tahe sian luat na dao ala Goarmu.

8:42 Ai begeonnasida ma barita ni Goarmu na timbul i dohot tanganmu na gogo i, dohot botohonmu na toltoli, molo ro ibana martangiang di bagasan joro on:

8:43 Sai manangi ma Ho di banua ginjang, ojahan ni habangsam, jala bahen ma hombar tu saluhut na pinangido ni halak dagang i tu Ho, asa tung saluhut bangso di tano on mananda di Goarmu jala marhabiaran tu Ho songon bangsom Israel, asa tung diboto naung sahat jinou Goarmu tu atas joro na hupauli on.

8:44 Tung sura ruar bangsom laho marporang dompak musuna di dalan sinurum nasida, jala martangiang nasida tu Jahowa dompak huta on naung pinillitmu dohot dompak joro on naung hupajongjong di Goarmu.

8:45 Sai tangihon ma tangiang dohot pangidoannasida di banua ginjang, jala pasintong uhum tu nasida.

8:46 Tung sura mardosa nasida dompak Ho (ai ndang adong jolma nanggo sada na so mardosa), gabe tarrimas Ho mida nasida, jala dipasahat Ho nasida tu musuna, asa tung tarbuang nasida tu tano ni musuna, na dao manang na jonok.

8:47 Dung i dipasuang nasida ma rohanasida tu bagasan di tano habuangannasida i, laos dipauba nasida rohanasida i, jala martangiang tu Ho di tano habuangannasida i songon on: Nunga mardosa hami, jala nunga huulahon hami hajahaton jala nunga manggunturi hami.

8:48 Molo mulak nasida tu Ho sian nasa rohanasida dohot sian nasa ateatenasida di tano ni musuna angka na mambuangkon nasida, jala martangiang nasida tu Ho mandompakkon tanonasida naung nilehonmu tu ompunasida, mandompakkon huta naung pinillitmu dohot mandompakkon joro na hupauli on di Goarmu:

8:49 Sai manangi ma Ho di banua ginjang, di ojahan ni habangsam mangalusi tangiang dohot pangidoannasida, huhut pasintong uhum tu nasida.

8:50 Jala marpamuati roham mida dosa angka naung niulahon ni bangsom dompak Ho dohot mida saluhut hajahaton angka naung binahennasida dompak Ho, jala lehon tu nasida asa maruli asi ni roha nasida maradophon halak angka na mambuangkon nasida, jala asianna nasida.

8:51 Ai bangsom do nasida jala partalianmu, angka naung tinogihonmu ruar sian Misir, sian parsitongaan ni liang pamurunan bosi.

8:52 Jala patonggor matam manatap parhurajaon ni naposom, manatap dohot parhurajaon ni bangsom Israel laho manangihon nasida taringot tu saluhut na pinangidonasida sian Ho.

8:53 Ai nunga sapala dipapulik Ho nasida sian saluhut bangso ni tano on bahen partalianmu sandiri, hombar tu naung pinorbagabagam marhite sian si Musa naposom, uju na tinogihonmu angka ompunami ruar sian Misir, ale Tuhan Jahowa.

8:54 Jadi dung sun ditangiangkon raja Salomo tu Jahowa saluhut tangiang dohot pangidoan ondeng, hehe ma ibana sian adopan ni langgatan ni Jahowa dohot sian na marsinggang i dohot sian na pinaherbangna i tanganna dompak banua ginjang.

8:55 Laos jongjong ma rajai, huhut mamasumasu sandok luhutan Israel, pola dipagogo soarana mandok songon on:

8:56 Pinuji ma Jahowa, naung mangalehon hasonangan tu bangsona Israel, hombar tu sandok naung pinarbagana i! Ndang adong tartinggal nanggo sada hata sian saluhut hatana na denggan i, naung pinaboana hian marhite sian si Musa naposona i.

8:57 Sai didongani Jahowa, Debatanta i ma hita, songon naung nidongananna angka ompunta na jolo; sai unang ma ditadingkon Ibana hita manang mambolongkon hita.

8:58 Sai ditaiti ma rohanta tu Ibana, asa marparange hita di saluhut dalanna huhut mangaradoti angka tonana dohot patikna dohot uhumna, angka naung tinonahonna tu angka ompunta i.

8:59 Jala saluhut hata pangidoan on, angka naung husombahon di adopan ni Jahowa, sai ngomngom ma i di jolo ni Jahowa, Debatanta i borngin dohot arian, asa pasintongonna uhum tu naposona dohot tu bangsona Israel, singkop ariari!

8:60 Asa tung saluhut bangso ni tano on mananda, paboa Jahowa do Debata, jala dungkon ni Ibana ndang adong.

8:61 Jala ingkon sun daulat rohamuna tu Jahowa, Debatanta i, asa marparange di bagasan angka patikna jala mangaradoti angka tonana suman songon sadarion.

8:62 Dung i dipelehon rajai rap dohot sandok bangso i ma angka pelean di adopan ni Jahowa.

8:63 Pelean hamauliateon angka na pinelehon ni raja Salomo tu Jahowa, i ma duapulu dua ribu lombu dohot saratus duapulu ribu birubiru. Songon i ma parturena dibahen rajai dohot sandok halak Israel pasahathon joro i tu Jahowa.

8:64 Laos di ari na sasada i diuras rajai parsitongaan ni alaman na di adopan ni joro ni Jahowa, ai disi do dipelehon ibana pelean situtungon dohot pelean sipanganon dohot tabotabo ni pelean hamauliateon, ai langgatan tombaga na di adopan ni Jahowa, mametmethu do i ndang siat bahen pamelean ni pelean situtungon dohot sipanganon ro di tabotabo ni angka pelean hamauliateon.

8:65 Dung i marari raya ma raja Salomo uju i rap dohot sandok Israel, luhutan na bolon, angka na ro sian Hamat sahat ro di sunge Misir marpungu di adopan ni Jahowa, Debatanta i, pitu ari jumolo, pitu ari muse gabe sampulu opat ari luhutna.

8:66 Tole paualuarihon dipamuli rajai ma halak situan na torop i laos dipasupasu nasida rajai, gabe laho nasida masitopot undungundungna be marhasonangan, jala marlas ni roha ala saluhut na denggan i, na binahen ni Jahowa tu raja Daud naposona i dohot tu Israel bangsona i.

1 Raja-raja 9

9:1 Asa dung sun dipajongjong raja Salomo joro ni Jahowa dohot bagas ni rajai, ro di nasa esehesek ni raja Salomo, na hinalomohon ni rohana naeng paulionna.

9:2 Ro muse Jahowa pataridahon dirina tu raja Salomo paduahalihon, suang songon uju na niidana Ibana di Gibeon.

9:3 Dung i ninna Jahowa ma tu rajai: Nunga hutangihon tangiangmu dohot parhurajaonmu, na sinombahonmi di jolongku; jala nunga huparbadiai joro on, naung pinaulim bahen parmianan ni Goarhu ro di saleleng ni lelengna, jala ingkon disi do tongtong ariari matangku dohot rohangku marpanatap.

9:4 Molo tung marparange ho di jolongku, suang songon amam si Daud i marparange marrohahon roha hadaulaton dohot hatigoran laho patupahon sude na hutonahon i tu ho, tole angka patikku dohot uhumhu diradoti ho:

9:5 Jadi pahotonku ma habangsa ni harajaonmi gumomgom Israel ro di salelenglelengna, hombar tu naung huparbagabaga hian tu amam si Daud, mandok songon on: Ndang jadi hurang di ho sada baoa hundul di atas habangsa ni harajaon Israel.

9:6 Alai molo tung marbalik hamu manang anakmuna sogot sian Ahu, jala ndang diradoti hamu angka tonangku dohot patikku, angka naung hupeakhon di jolomuna, pola laho hamu mangoloi angka debata sileban dohot marsomba tusi:

9:7 Jadi ripashononku ma Israel sian tano naung hulehon i tu nasida, jala joro on naung huparbadiai di Goarhu, padaoongku ma i sian jolo ni bohingku, jala bahenonku halak Israel gabe pambuatan umpama dohot bahen alingalingan di tongatonga ni saluhut bangso.

9:8 Ia joro on naung timbul sahali, pola longang roha ni ganup na mamolus sian i, huhut mangarehe mandok songon on: Boasa ulaning bahenon ni Jahowa songon i tu tano on dohot tu joro on?

9:9 Dung i dohonon ni halak ma mangalusi: Ala na tinadingkonnasida i Jahowa, Debatanasida i, na manogihon ompunasida ruar sian tano Misir, gabe marparsigantungan nasida tu angka debata sileban, jala marsomba tusi, jala mangoloi disi, ala ni do umbahen diparo Jahowa luhut jea on tu nasida.

9:10 Jadi dung salpu na duapulu taon i lelengna raja Salomo i paulihon na dua bagas i, i ma joro ni Jahowa dohot bagas ni rajai.

9:11 Tinumpak ni si Hiram, raja sian Tirus mangalehon tu raja Salomo hau Ares dohot sampinur dohot sere, marguru tu sandok lomo ni rohana, gabe dilehon raja Salomo tu raja Hiram duapulu huta di laut Galilea.

9:12 Dung i borhat ma raja Hiram sian Tirus laho maningkir huta i, angka naung nilehon ni raja Salomo tu ibana, hape ndang tongon angka i tu rohana.

9:13 Pola didok: Ba apala dia ma huta on, angka naung nilehonmu tu ahu, ale anggia? Gabe digoar ma angka huta i luat Kabul rasirasa sadarion.

9:14 Ala na ditongoshon raja Hiram tu raja Salomo saratus duapulu talenta sere.

9:15 Jala songon on do parture ni parrodi on, na niampehon ni raja Salomo laho paulihon joro ni Jahowa dohot bagasna sandiri dohot Milo dohot parik ni Jerusalem ro di Hazor, Megiddo dohot Gezer.

9:16 Ai nangkok do na jolo Firaun, raja sian Misir papatu Gezer, laos disurbu dohot api, jala dibunui halak Kanaan angka na maringan di huta i, jala dilehon huta i panseang tu boruna, jolma ni raja Salomo.

9:17 Dung i dipauli raja Salomo muse huta Gezer dohot Bethoron parjae.

9:18 Dohot Baalat dohot Tamar di halongonan na di luat i.

9:19 Angkup ni saluhut huta parpeopan bohal na di raja Salomo, ro di angka huta parpunguan ni hureta porang dohot jolma parsihundul, tung guru esehesek ni roha ni raja Salomo laho paulihon di Jerusalem dohot di atas Libanon dohot di sandok tano ginomgomanna i.

9:20 Saluhut halak angka na teba sian halak Amori, Het i, Perisi, Hevi dohot Jebusi, angka na so sian halak Israel.

9:21 Ro di pinomparnasida, angka na teba i sian nasida di tano i, angka na so dapot halak Israel rendephononna, tu nasida ma diampehon raja Salomo ulaon rodi rasirasa sadarion.

9:22 Alai anggo tu halak Israel ndang diampehon raja Salomo ulaon rodi, bahen jolma parmusu do nasida, parhaladona, angka induk, angka ulubalangna dohot induk panahatan ni huretana dohot jolma parsihundulna.

9:23 On ma induk, angka na pinabangkit mamatamatahon ulaon na nidokkon ni raja Salomo, lima ratus limapulu halak toropna, angka na mandasdas halak situan na torop i mangula ulaonna be.

9:24 Jadi dung nangkok boru ni raja Firaun sian huta ni raja Daud, bongot tu jabuna naung pinauli ni rajai di nasida, pintor dipauli rajai ma dohot Milo.

9:25 Dung i tolu hali di bagasan sataon raja Salomo mamelehon angka pelean situtungon dohot hamauliateon di atas langgatan, naung pinaulina di Jahowa, huhut manutung daupa disi di adopan ni Jahowa, asa tung sun tipak joro i.

9:26 Huhut disuru raja Salomo paulihon angka kopal di Esion Geber, mardonokkon Elat, di pasir ni laut arung di tano Edom.

9:27 Dung i disuru raja Hiram ma angka naposona bahen halak parhalado di kopal, angka na somal di laut, rap dohot naposo ni raja Salomo.

9:28 Jadi sahat ma nasida tu Opir, jala diboan sian i sere opat ratus duapulu talenta, na binoanna tu raja Salomo.

1 Raja-raja 10

10:1 Ia raja boruboru sian Saba, dung dibege barita ni raja Salomo taringot tu Goar ni Jahowa, ro ma nasida naeng masiujian dohot rajai marundangundang.

10:2 Jadi sahat ma nasida tu Jerusalem mardongan parangan mansai torop, tole unto, angka na mangusung na hushus marragamragam dohot sere mansai godang dohot mata intan na arga. Jadi dung ro nasida tu jolo ni raja Salomo dipaboaboa ma tu ibana saluhut na di bagasan rohana i.

10:3 Jadi dipatorang raja Salomo ma tu nasida sude sungkunsungkunna, ndang adong na buni nanggo sada sian roha ni rajai, na so pinatorangna tu nasida.

10:4 Jadi dung diida raja boruboru sian Saba luhut hapistaran ni raja Salomo dohot bagas na pinaulina i.

10:5 Tole sipanganon di mejana, tole partordingna hundul angka naposona, tole panagam ni angka parhaladona dohot pangkeannasida, tole angka sitahu anggurna, tole partanggaonna laho nangkok tu joro ni Jahowa, jadi hira na tarmali tondinasida.

10:6 Laos didok ma mandok rajai: Sintong do hape barita i na hubege di luathu taringot tu aturan binahenmi dohot taringot tu hapistaranmu.

10:7 Ndang nian diparhatongon rohangku jolo barita i paima ro ahu tuson, gabe diida matangku; hape ida ma, nanggo satongana ndang dibaritahon halak tu ahu; dilompoi hapistaranmu dohot artam do tahe barita na hubage i.

10:8 Martua ma halak naposom, martua ma halak parhaladomon, angka na tongtong jongjong di adopanmu pabegebege hapistaranmu.

10:9 Pinuji ma Jahowa, Debatam, na marlomo ni roha mida ho, na pabangkithon ho tu atas habangsa ni harajaon Israel! Ala ni holong ni roha ni Jahowa mida Israel salelenglelengna, umbahen dipabangkit Ibana ho gabe raja mangulahon uhum dohot hatigoran.

10:10 Dung i dilehon boruboru i ma tu rajai saratus duapulu talenta sere dohot pamurpuri mansai godang dohot mata intan; ndang dung ro be pamurpuri na sai godang, songon na nilehon ni raja boruboru sian Saba tu raja Salomo.

10:11 Tole kopal ni raja Hiram, angka na mamboan sere sian Opir, diboan huhut sian Opir hau jati mansai godang dohot mata intan.

10:12 Dung i didokkon rajai paulion sian hau jati angka handanghandang di joro ni Jahowa dohot di jabu ni rajai, tole angka hasapi dohot tulila di halak parende; ndang dung ro songon i mansam ni hau jati, diboan halak manang didia pe rasirasa sadarion.

10:13 Raja Salomo i pe dilehon do tu raja boruboru sian Saba sandok guru lomo ni rohana dohot pangidoanna, so padohot silehonlehon na sian tangan ni raja Salomo sandiri. Dung i mulak ma nasida tu tanona rap dohot angka naposona.

10:14 Ianggo dokdok ni sere na ro tu raja Salomo di bagasan sataon, arga onom ratus onompulu onom talenta sere do.

10:15 So padohot sere na dapotsa sian halak pangallung dohot sian partigatiga pansar dohot sian saluhut raja ni Arab dohot sian halak na mora di tano i.

10:16 Dung i didokkon raja Salomo i ma paulion dua ratus lombulombu sian sere na pinapita; pola onom ratus sekkel sere dilampishon tu sada lombulombu.

10:17 Dipauli huhut tolu ratus lombulombu parinse sian sere na pinapita, pola tolu hati sere dilampishon tu sada parinse; tu bagasan jabu na di tombak Libanon angka i dipambahen rajai.

10:18 Dung i didokkon rajai ma paulion sada habangsa na bolon sian gading, jala lampisanna do i dohot sere palangki.

10:19 Onom do talha ni habangsa i, jala ulu ni pangunsandean di habangsa i tingko do dingkan pudi, adong huhut siradeon ni tangan angkupangkup be humaliang hundulani, jala dua suman ni singa jongjong di lambung siradeon i.

10:20 Jongjong huhut disi sampulu dua suman ni singa di atas ni na onom talha i angkupangkup be. Ndang dung adong dope songon i hapandean ni halak manang di harajaon dia.

10:21 Nang saluhut mangkuk panginuman ni raja Salomo sian sere do jala saluhut ulaula ni jabuna di tombak Libanon sian sere na pinapita do, ndang adong anggo sian perak, ai hira na so marguna do anggo perak di roha ni halak uju di tingki ni raja Salomo.

10:22 Ai adong do huhut kopal sian Tarsis di rajai angka na di laut rap dohot kopal ni raja Hiram; sahali di bagasan tolu taon ro angka kopal Tarsis mamboan sere dohot perak dohot gading dohot bodat dohot angka pidong uo.

10:23 Dung i tumimbul ma raja Salomo sian saluhut raja ni tano on taringot tu hamoraon dohot hapistaran.

10:24 Nasa isi ni tano on tahe marsangkap naeng idaonna bohi ni raja Salomo huhut naeng begeonna hapistaranna, naung nilehon ni Debata tu bagasan rohana.

10:25 Jadi angka diboan be siluana ganup taon, i ma angka ulaula perak dohot sere dohot pangkean dohot sinjata marragamragam dohot pamurpuri, tole angka hoda dohot hoda na marsahe.

10:26 Dipapungupungu raja Salomo huhut angka hureta dohot jolma parsihundul, pola saribu opat ratus hureta di ibana, jala sampulu dua ribu jolma parsihundul, angka na sinagihonna di bagasan angka huta hajongjongan ni hureta dohot di Jerusalem di lambung ni rajai.

10:27 Dung i dipagodang rajai ma perak i di Jerusalem, hira doshon batu godangna ro di hau Ares hira antajau na tubu di tano pea godangna.

10:28 Ianggo haroroan ni hoda angka na tu raja Salomo sian Misir do, marrongkanrongkan angka saudagar ni rajai mangalap hoda i marhabanhaban, pajak hian ia argana.

10:29 Mararga onom ratus sekkel perak sada hureta diboan halak nangkok sian Misir, jala saratus limapulu sekkel arga ni sada hoda; laos songon i diboan nasida tu sude raja ni halak Het dohot halak Ram.

1 Raja-raja 11

11:1 Dung i dihasolohon roha ni raja Salomo torop parompuan sian bangso sileban di balik ni boru ni raja Firaun, angka boru Moab, Amon, Edom, Sidon dohot Het.

11:2 Sian bangso parbegu, pola naung didok Jahowa tu halak Israel taringot tusi: Ndang jadi hamu manopot nasida, nasida pe ndang jadi ro tu tongatongamuna, ai sai na elaonnasida do rohamuna mangihuthon tu debatanasida; hape tu parompuan sisongon i marsilohot roha ni raja Salomo mangkaholongi.

11:3 Dung i adong ma di rajai pitu ratus parompuan tuan laenna angka boru ni na raja dohot tolu ratus radingna, angka na paeleng roha ni rajai.

11:4 Jadi dung sarimatua raja Salomo dielaela angka jolmana i ma rohana mangihuthon tu debata sileban, gabe ndang be sun denggan rohana tu Jahowa, Debatana, songon roha ni si Daud amana i.

11:5 Dung i diihuthon raja Salomo ma marsomba tu sombaon Astarte, ajiajian ni halak Sidon dohot tu Milkom, ajiajian ni halak Amon.

11:6 Jadi diulahon raja Salomo ma sogo ni roha ni Jahowa, jala ndang marsihohot rohana mangihuthon tu Jahowa, songon si Daud amana i.

11:7 Dipauli raja Salomo huhut uju i sada tambak di Kamos, ajiajian ni halak Moab, di atas dolok tondong ni Jerusalem dohot di Molok, ajiajian ni halak Amon.

11:8 Laos songon i binahenna di saluhut jolmana sian bangso sileban, angka na manutung daupa dohot mamele tu ajiajiannasida be.

11:9 Dung i tarrimas ma Jahowa mida raja Salomo, ala marbalik rohana sian Jahowa, Debata ni Israel, naung niida ni rajai pola dua hali.

11:10 Nunga pola marlumba Ibana tu rajai taringot tu hata on, na so tupa ihuthononhon angka debata sileban; alai ndang diradoti ibana tona ni Jahowa.

11:11 Dibahen i ninna Jahowa ma tu raja Salomo: Ala na binahenmi songon i, jala ndang diradoti ho padan na hubahen i dohot patikku angka na hutonahon i tu ho, rampasonku ma harajaon i sian ho, jala lehononku do i tu naposom.

11:12 Alai tahe saleleng mangolu ho ndang dope bahenonku songon i, ala ni si Daud amangmu; sian tangan ni anakmu pe rampasonku.

11:13 Alai ndada sandok harajaon i rampasonku; sada marga lehononku tu anakmu, ala ni si Daud naposongku dohot ala ni Jerusalem na hupilliti.

11:14 Dung i dipahehe Jahowa ma sahalak alo ni raja Salomo, i ma si Hadad, halak Edom i, sian pinompar ni raja di Edom do ibana.

11:15 Ai uju marporang raja Daud di Edom, uju nangkok si Joab, partogi ni angka parangan laho mananom angka na mate tongtang, laos dibunu saluhut baoa di Edom.

11:16 Ai onom bulan lelengna tinggal disi si Joab rap dohot sandok Israel, paima disiaphon sude baoa di Edom.

11:17 Alai maporus ma anggo si Hadad, ibana rap dohot deba baoa halak Edom sian angka naposo ni amana, naeng laho tu Misir; bajar dope si Hadad uju i.

11:18 Dung i borhat ma nasida sian Midian, gabe sahat tu Elaparan laos diarahon nasida deba baoa sian Elaparan bahen donganna gabe sahat nasida tu Misir tu Firaun, raja sian Misir, na mangalehon tu ibana sada bagas, jala diparbaga parbohalanna jala dilehon tu ibana tano ulaonna.

11:19 Jadi maruli asi ni roha godang si Hadad sian raja Firaun, pola dilehon tu ibana anggi ni jolmana sandiri, i ma anggi ni si Tahpenes bahen jolmana.

11:20 Dung i ditubuhon anggi ni si Tahpenes ma di ibana sada anak na margoar si Genubat na pinagodanggodang ni si Tahpenes di bagasan jabu ni raja Firaun, gabe di jabu ni raja Firaun si Genubat di tongatonga ni angka anak ni raja Firaun.

11:21 Jadi dung tarbortik tu si Hadad di Misir naung monding si Daud rap dohot angka ompuna naung mate dohot si Joab, partogi ni angka parangan, ninna si Hadad ma tu raja Firaun: Loas ma ahu mulak tu tanongku.

11:22 Dung i ninna raja Firaun ma tu ibana: Aha na hurang di ho di lambungkon, umbahen disangkap roham naeng mulak tu tanom? Jadi ninna ibana ma: Ndang adong nian, alai sai loas ma ahu laho!

11:23 Dung i dipahehe Debata muse sahalak alona, i ma si Reson, anak ni si Eliada, na maporus na jolo tumadingkon tuanna, i ma si Hadadeser, raja sian Seba.

11:24 Jala dipapungupungu deba halak tu lambungna, asa ibana partogi ni parangan sahoron, uju raja Daud mambunu i isi ni Zoba; dung i laho nasida tu Damaskus, laos maringan disi jala mangarajai di Damaskus.

11:25 Ibana pe sai alo ni Israel do saleleng mangolu raja Salomo; jala on do jea na binahen ni si Hadad, nunga marbiasbias rohana masuk tu gomgoman ni Israel, gabe ibana mangarajai Ram.

11:26 Tole muse si Jerobeam, anak ni si Nebat, marga Epraim sian Zaretan, naposo ni raja Salomo (boruboru na mabalu anggo inana na margoar si Seruia), ibana manggunturi do dompak rajai.

11:27 Jala on do alana umbahen manggunturi ibana dompak rajai: Uju raja Salomo paulihon Milo dohot manggohi lombang ni huta ni si Daud amana i.

11:28 Jolma na marhuaso situtu si Jerobeam i; jadi dung diida raja Salomo ringgas ni dolidoli i mulaulaon, gabe dipabangkit ma ibana bahen induk ni sude halak pangula sian pinompar ni si Josep.

11:29 Dung i uju ruar sahali si Jerobeam sian Jerusalem, gabe pajumpang ibana di tongan dalan dohot panurirang Ahia sian Silo na marsampesampe na imbaru, jala holan nasida na dua di ladang i.

11:30 Dung i ditiop si Ahia sampesampena na imbaru i laos diparribakkon sampulu dua ribak.

11:31 Dung i didok ma tu si Jerobeam: Buat di ho sampulu ribak! Ai songon on do hata ni Jahowa, Debata ni Israel: Ida ma, rampasonku ma harajaon i sian pinompar ni raja Salomo marbasabasahon tu ho sampulu marga.

11:32 Holan samarga nama tinggal di ibana, ala naposongku si Daud dohot ala huta Jerusalem na hupilliti sian saluhut marga ni Israel.

11:33 Ala naung tinadingkonnasida Ahu jala marsomba tu sombaon Astarte, ajiajian ni halak Sidon dohot tu Kamos, ajiajian ni halak Moab dohot tu Milkom, ajiajian ni halak Amon, jala ndang marparange nasida di angka dalanku mangulahon na tigor, idaon ni matangku dohot mangaradoti angka patikku dohot uhumhu, songon si Daud amana i.

11:34 Alai ndang rampasonku sandok harajaon i anggo sian tanganna, raja ibana pasombuonku, saleleng mangolu ibana, ala si Daud naposongki, na hupilliti, na mangaradoti tonangku dohot patikku na sai laon.

11:35 Alai unsatonku do harajaon i anggo sian tangan ni anakna marbasabasahon tu ho sampulu marga.

11:36 Samarga sambing lehononku tu anakna, asa tongtong adong sada palito di si Daud naposongki di adopan ni bohingku di Jerusalem, huta na hupilliti di Ahu bahen hajongjongan ni Goarhu.

11:37 Antong Ahu ma pabangkithon ho, asa mangarajai ho sandok hombar tu pinangido ni roham, jala ho gabe raja gumomgom Israel.

11:38 Molo ditangihon ho sude na hutonahon tu ho, jala marparange ho di angka dalanku huhut mangulahon na tigor, idaon ni matangku laho mangaradoti angka patikku dohot tonangku, songon na binahen ni si Daud naposongku, jadi dongananku ma ho jala paulionku di ho sada bagas na hot tongtong, songon na hubahen i tu si Daud jala pasahatonku tu ho Israel.

11:39 Jala pajepolonku ma ala ni anggo pinompar ni si Daud, alai nda tung salelenglelengna.

11:40 Dung i diondam raja Salomo naeng bunuonna si Jerobeam; jadi borhat ma si Jerobeam maporus tu Misir mandapothon raja Sisak sian Misir, laos tinggal di Misir ibana paima mate raja Salomo.

11:41 Jamita na tinggal i dope sian raja Salomo ro di sude na binahenna dohot hapistaranna, nda tarsurat do angka i di bagasan buku jamita ni raja Salomo?

11:42 Alai anggo lelengna mangarajai raja Salomo di Jerusalem gumomgom sandok Israel opatpulu taon do.

11:43 Dung i monding ma raja Salomo, gabe top dohot angka ompuna, gabe tartanom ibana di huta ni si Daud amana i, jadi anakna si Rehabeam bangkit raja singkatna.

1 Raja-raja 12

12:1 Dung i laho ma si Rehabeam tu Sikem; ai nunga marpungu sandok Israel di Sikem naeng parajahon ibana.

12:2 Jadi dung dibege si Jerobeam anak ni si Nebat barita i, uju di Misir dope ibana, ai maporus tusi ibana maradophon raja Salomo, gabe mulak Jerobeam sian Misir.

12:3 Ai nunga disuru nasida hian suruanna manjou ibana. Dung i ro ma si Jerobeam rap dohot sandok luhutan Israel, asa mandok hatana tu si Rehabeam songon on:

12:4 Ianggo amanta nahinan dokdok do auganami dibahen, alai anggo ho sai paneang ma parrodi on na pora binahen ni amanta dohot auga na dokdok na niampehonna tu hami, asa marunduk tu ho hami.

12:5 Dung i ninna rajai ma tu nasida: Muli ma hamu jolo, tolu ari nari ulahi hamu ro tu ahu. Jadi muli ma bangso i.

12:6 Dung i martuptup ma raja Rehabeam dohot sintua, angka dongan satuptupan ni raja Salomo amana i, andorang di ngoluna, ninna ma: Songon dia panuturimuna patut alusta tu bangso on?

12:7 Jadi didok nasida ma tu ibana: Molo olo ho marunduk ni roha sadarion tu bangso on dohot mangoloi nasida dohot mangalusi nasida mandok hata na lambok tu nasida, jadi marunduk tu ho ma nasida saleleng ho mangolu.

12:8 Alai ditadingkon rajai do panuturion tinuturhon ni angka sintua, laho ibana martuptup dohot halak na umposo, angka donganna magodang, angka na jongjong di jolona.

12:9 Dung i didok ma tu nasida: Ia hamu, dia do panuturimuna patut alusta tu bangso on angka na mandok tu ahu songon on: Sai paneang auga, na niampehon ni amanta nahinan tu hami?

12:10 Dung i ninna halak na umposo i, angka donganna magodang ma tu ibana, ingkon songon on dohononmu tu bangso on na mandok tu ho hata on: Ianggo amanta nahinan dokdok do auganami dibahen, alai anggo ho sai paneang ma auganami; songon on ma tama dohononmu tu nasida: Umbolon do anak ni tanganku sian haehae ni damang.

12:11 On pe, dokdok pe auga na niampehon ni damang nahinan tu hamu, alai anggo ahu lam dumokdok dope bahenonku augamuna; ia damang linsinglinsing hian do dibahen maminsang hamu, alai anggo ahu hala do bahenonku maminsang hamu.

12:12 Tole patoluarihon ro ma si Jerobeam rap dohot sandok bangso i mandapothon si Rehabeam, marningot janji ni rajai: Ulahi hamu patoluarihon ro tu jolongku.

12:13 Jadi horas ma alus ni rajai tu bangso i, ai nunga ditadingkon rohana panuturion niaturhon ni angka sintua i tu ibana.

12:14 Jadi ninna rajai ma tu nasida, hombar tu panuturion ni halak na umposo i, songon on: Dokdok pe auga na niampehon ni damang nahinan tu hamu, alai anggo ahu lam dumokdok dope bahenonku augamuna: Ia damang linsinglinsing hian do dibahen maminsang hamu, alai anggo ahu hala do bahenonku maminsang hamu.

12:15 Asa ndang dioloi rajai pangidoan ni bangso i, ai marharoroan sian Jahowa do hata i, asa mangkajongjongkon hatana naung nilumbahon ni Jahowa hian marhitehite si Ahia sian Silo tu si Jerobeam, anak ni si Nebat.

12:16 Jadi dung diida sandok Israel, na so nioloan ni rajai pangidoannasida i, ro ma alus ni bangso i mandok tu rajai: Aha do parjambaranta dibahen si Daud? Ndang adong partalianta dibahen anak ni si Isai. Beta hita, ale Israel mulak ganup tu undungundungmu be! On pe, paingotingot angka isi ni bagasmu sandiri, ale Daud! Jadi muli ma Israel tu undungundungna be.

12:17 Alai anggo halak Israel, angka na maringan di angka huta ni Juda, angka nasida ma dirajai si Rehabeam.

12:18 Dung i disuru raja Rehabeam ma si Adoniram, sintua papungu guguan, hape sandok halak Israel mandangguri ibana dohot batu, pola mate ibana. Dung i hapogan ma raja Rehabeam manaek tu huretana laho maporus tu Jerusalem.

12:19 Jadi bali ma Israel sian pinompar ni si Daud rasirasa sadarion.

12:20 Jadi dung tarbortik tu sandok Israel naung mulak i si Jerobeam, disuru nasida ma suruanna mangalapi ibana tu parluhutan i, jala dipabangkit nasida ibana bahen raja gumomgom sandok Israel; ndang adong nanggo sahalak na mangihuthon tu pinompar ni si Daud, dungkon ni marga Juda sambing.

12:21 Alai dung sahat si Rehabeam tu Jerusalem, dipaluhut ma sandok pinompar ni Juda dohot marga Benjamin, saratus ualupulu ribu halak sialo musu, angka na pinillit, naeng marmusu dompak pinompar ni Israel, asa pasuangkon harajaon i nian tu si Rehabeam, anak ni si Salomo.

12:22 Alai ro ma hata ni Debata tu si Semaya, halak ni Debata, songon on.

12:23 Dok ma tu si Rehabeam, anak ni si Salomo, raja sian Juda, dohot tu sandok pinompar ni Juda dohot Benjamin dohot pasipasi ni bangso na teba i songon on:

12:24 Boti hata ni Jahowa: Ndang jadi hamu nangkok, jala ndang jadi hamu marmusu garembong, dompak hahaanggimuna, i ma halak Israel i; mulak ma hamu ganup tu jabuna be, ai marharoroan sian Ahu do hata on. Jadi ditangihon nasida ma hata ni Jahowa, laho ma nasida muli hombar tu hata ni Jahowa.

12:25 Dung i dipauli si Jerobeam ma huta Sikem di dolok Epraim, laos maringan disi; dung i borhat ibana sian i jala dipajongjong huta Peniel.

12:26 Alai ninna si Jerobeam ma di bagasan rohana: Atik tung beha mulak harajaon i maon muse tu pinompar ni si Daud.

12:27 Molo sai nangkok bangso on laho mamelehon angka pelean di bagasan joro ni Jahowa di Jerusalem, sai na mulak do roha ni bangso on tu tuannasida hian, tu si Rehabeam, raja sian Juda, jala todosonnasida ma ahu, asa mulak nasida tu si Rehabeam, raja sian Juda.

12:28 Dung i martuptup ma rajai jala dibahen dua lombu sere, jala didok ma tu situan na torop i: Nunga sae lelengna hamu nangkok tu Jerusalem Ida ma, indi debatamu, ale Israel, na manogihon ho nangkok sian tano Misir!

12:29 Dung i dipajongjong ma na sada di Betel, jala na sadanari ditaruhon tu Dan.

12:30 Hape parbingkasan tu dosa do pambahenanna i, ai mardalan do bangso i di jolo ni ganaganaan na sada sahat ro di Dan.

12:31 Dipauli ibana huhut sada joro parsantian, jala dipabangkit angka malim sian sandok bangso i, angka na so sian halak Lepi.

12:32 Angkup ni dipajadi si Jerobeam sada ari raya di bulan sipaha ualu di ari sampulu lima di bulan i, manuman ari raya di Juda laos mamele ibana di atas langgatan i. Suang songon i dibahen di Betel laho mamele tu lombu angka na binahenna i, jala dipabangkit di Betel angka malim di joro parsantian angka na binahenna i.

12:33 Dung i mamele ibana di atas langgatan, na binahenna i di Betel, di ari sampulu lima bulan sipaha ualu, tung guru lomo ni rohana sandiri mamillitsa, jala dipajadi sada ari raya di halak Israel, laos ibana mamele di atas langgatan i huhut manutung daupa.

1 Raja-raja 13

13:1 Dung i ida ma, ro sada halak ni Debata sian Juda tu Betel nidokkon ni Jahowa, tongon jongjong si Jerobeam di lambung langgatan i laho manutung daupa.

13:2 Dung i joujou ma panurirang i dompak langgatan i patolhas hata ni Jahowa, ninna ma: Oale langgatan, langgatan! Songon on do hata ni Jahowa: Ida ma, na tubu do sogot sada anak, pinompar ni si Daud, na margoar si Josia, ibana ma mamelehon di atasmu angka malim ni joro parsantian, angka na manutung daupa di atasmu, jala holiholi ni jolma tutungon ni halak sogot di atasmu.

13:3 Dilehon ibana huhut di ari na sasada i sada tanda halongangan, ninna ma: On ma tanda halongangan, paboa nunga Jahowa mandok hata on: Ida ma, marigat ma langgatanon, pola sabur dohot sirabun na di atasna.

13:4 Alai dung dibege rajai hata ni halak ni Debata, na joujou dompak langgatan i di Betel, disurdukkon si Jerobeam ma tanganna sian atas langgatan i huhut didok: Tangkup hamu ibana! Hape malos ma tanganna sinurdukkonna i dompak ibana, jala ndang tarbahensa be palendukkon tu ibana.

13:5 Marigat ma ia langgatan i, jala sabur sirabun sian langgatan i, hombar tu tanda halongangan naung nilehon ni halak ni Debata marhite sian hata ni Jahowa.

13:6 Dung i ro ma alus ni rajai, jala didok tu halak ni Debata: Ua martangiang ma ho marsomba tu Bohi ni Jahowa, Debatam, mangondihon ahu, asa anggiat sumuang tangankon tu ahu. Jadi mombun ma Bohi ni Jahowa dibahen halak ni Debata, gabe sumuang ma tangan ni rajai tu ibana, suang songon na sai laon.

13:7 Dung i didok rajai ma tu halak ni Debata: Beta hita muli tu jabu pahosahon satongkin, asa hulehon huhut silehonlehon tu ho.

13:8 Alai ninna halak ni Debata ma mandok rajai: Tung sura pe lehononmu tu ahu sambariba jabum, ndang olo ahu muli rap dohot ho, jala ndang olo ahu mangan sagusagu manang minum aek di huta on.

13:9 Ai songon on do hata ni Jahowa manonahon tu ahu: Ndang jadi panganonmu sagusagu manang inumonmu aek, jala ndang jadi ho mulak sian dalan naung nidalananmu.

13:10 Jadi mardalan ma ibana sian dalan na asing, ndang mulak sian dalanna hian laho tu Betel.

13:11 Alai maringan do di Betel sada panurirang na matua, gabe ro anakna pajojorhon tu ibana sandok pambahenan na binahen ni halak ni Debata sadarina i di Betel, tole hata angka na pinaboana tu rajai, dipajojor nasida tu amanasida i.

13:12 Dung i didok amanasida ma tu nasida: Sian dalan dia ibana mardalan? Gabe dipatuduhon angka anakna i tu ibana dalan na binolus ni halak ni Debata, na ro sian Juda.

13:13 Dung i didok ibana ma tu angka anakna i: Palanoi hamu halode i di ahu. Jadi dung sun dipalanoi nasida halode i di ibana, marsihundul ma ibana tusi.

13:14 Dung i diihuthon ibana ma halak ni Debata, jala jumpangsa ibana mangunsande di bona ni hariara, jala didok mandok ibana: Atehe, ho do halak ni Debata, na ro sian Juda? Ahu ma tutu ninna.

13:15 Dung i ninna ma mandok ibana: Beta hita muli tu jabu, asa mangan sagusagu.

13:16 Alai ninna ibana ma: Ndang tarbahen ahu muli rap dohot ho manang udur dohot ho, jala ndang tarbahen ahu mangan sagusagu manang minum aek rap dohot ho di huta on.

13:17 Ai nunga ro hata ni Jahowa mandok tu ahu: Ndang jadi panganonmu sagusagu disi manang inumonmu aek, ndang jadi ho mulak sian dalanmu hian.

13:18 Dung i ninna jolma i tu ibana: Ahu pe panurirang do suang songon ho, jala nunga ro hata ni sada surusuruan tu ahu marhite sian hata ni Jahowa mandok: Togihon ibana mulak tu jabum, asa mangan sagusagu ibana dohot minum aek. Hape gabusna do i.

13:19 Jadi saut ma ibana ditogihon muli, asa mangan sagusagu di bagasan jabuna dohot minum aek.

13:20 Hape dung hundul nasida di lambung meja, ro ma hata ni Jahowa tu panurirang na manogihon ibana mulak.

13:21 Laos joujou ibana mandok tu halak ni Debata, na ro sian Juda, ninna ma: Songon on do hata ni Jahowa: Ala naung manggunturi ho dompak hata ni Jahowa, jala ndang diradoti ho tona, na tinonahon ni Jahowa Debatam.

13:22 Nunga pola mulak ho jala mangan sagusagu dohot minum aek di huta na nidokna i nian tu ho: Ndang jadi ho mangan sagusagu manang minum aek disi dibahen i ndang jadi sahat bangkem tu tanoman ni angka ompum.

13:23 Jadi dung sun ibana mangan sagusagu dohot minum, dipalanoi ma di ibana halode ni panurirang, na manogihon ibana mulak.

13:24 Jadi mardalan ma ibana, gabe pajumpang ibana dohot singa di tongan dalan, laos dibunu ibana, ia bangkena ambolong do di dalan, jongjong di lambungna halode i, singa i pe jongjong do di lambung bangke i.

13:25 Dung i ida ma, ro ma halak pamolus, gabe diida bangke i ambolong di tongan dalan, jala singa i jongjong di lambung bangke i, laos ro nasida paboahon barita i tu huta, na niinganan ni panurirang na matua i.

13:26 Dung dibege panurirang, na manogihon ibana mulak sian dalan, barita i, ninna ma: Halak ni Debata do ibana, na manggunturi dompak hata ni Jahowa, ala ni umbahen dipasahat Jahowa ibana tu singa na manoro dohot mambunu ibana, hombar tu hata ni Jahowa naung nilumbahonna hian tu ibana.

13:27 Dung i didok panurirang i ma tu angka anakna: Palanoi hamu di ahu halode i; jadi dung dipalanoi nasida.

13:28 Mardalan ma ibana, gabe jumpangsa bangkena i ambolong di dalan, jala halode dohot singa i jongjong di lambung bangke i, ndang dipangan singa i bangke i jala ndang disoro ia halode i.

13:29 Dung i dihindat panurirang i ma bangke ni halak ni Debata jala diampehon tu halode i, jala diboan ibana mulak; jadi dung sahat panurirang na matua i tu huta, diandungi ma ibana laos ditanom.

13:30 Dipeakkon tahe bangkena i tu bagasan tanomanna sandiri, jala diandungi nasida ibana: Oe isuang, ale anggia!

13:31 Jadi dung ditanom nasida ibana, ninna panurirang i ma mandok angka anakna: Ia dung mate ahu, sai tanom hamu ma ahu di bagasan tanoman hapeahan ni halak ni Debata; peakkon hamu holiholingku tu lambung ni holiholina.

13:32 Ai ingkon saut do hata na jinouhonna i, nidokkon ni Jahowa dompak langgatan na di Betel dohot dompak saluhut joro parsantian, angka na di bagasan angka huta ni Samaria.

13:33 Dung salpu jamita on, laos so mulak si Jerobeam sian dalanna na roa i, lam diulahi tahe pabangkithon jolma sian sandok bangso i bahen angka malim di joro parsantian. Manang ise tahe na lomo roha, i do dipabangkit gabe malim di angka joro parsantian i.

13:34 Jadi pambahenanna i gabe parbingkasan tu dosa di pinompar ni si Jerobeam, asa siap jala ripur sian tano on.

1 Raja-raja 14

14:1 Laos di tingki uju i, marsahit ma si Abia, anak ni si Jerobeam.

14:2 Dung i didok si Jerobeam ma tu jolmana: Ua borhat ma ho jala patinda rupam, asa unang diboto halak jolma ni si Jerobeam do ho, jala laho ma ho tu Silo; ida ma, disi do panurirang Ahia na marbagahon hian tu ahu gabe raja gumomgom bangso on.

14:3 Laos boan ma di bagasan tanganmu sampulu sugusagu dohot angka gaburgabur dohot sada guriguri marisi situak ni loba laho manopot ibana, asa ibana pabotohon tu ho taringot tu hosa ni dakdanak on.

14:4 Jadi dibahen jolma ni si Jerobeam ma songon i, borhat ma nasida mardalan tu Silo, gabe masuk ma nasida tu jabu ni si Ahia. Alai anggo si Ahia i ndang be tangkas marnida, ai nunga rambon matana dibahen hatutuana.

14:5 Alai nunga ro hian hata ni Jahowa tu si Ahia: Ida ma, na ro ma jolma ni si Jerobeam, naeng manungkun hata tu ho taringot tu anakna, ai marsahit do ibana. Songon on songon on ma dohononmu tu nasida; molo masuk ibana pasamahonna ibana tu halak na asing.

14:6 Jadi dung dibege si Ahia soara ni patna i, ro masuk tu bagasan pintu, ninna ma: Masuk ma ho, ale jolma ni si Jerobeam! Boasa tung paasingonmu rupam? Na sinuru do ahu paboahon tu ho hata na horas.

14:7 Laho ma ho, paboa ma tu si Jerobeam: Songon on do hata ni Jahowa, Debata ni Israel: Ala naung hupatimbul ho sian tongatonga ni bangso i, jala hupabangkit ho bahen partogi ni bangsongku Israel.

14:8 Pola Ahu mangarampas harajaon i sian pinompar ni si Daud, jala hulehon do i tu ho; hape ndang suman ho marroha songon naposongku si Daud, na mangaradoti angka patikku, jala na mangihuthon Ahu sian nasa rohana, holan na tigor di bagasan rohangku do na niulana.

14:9 Hape mangulahon na roa do anggo ho, lobi sian saluhut raja na jumolo sian ho; laho do ho mambahen di ho angka debata sileban dohot ganaganaan tuangan, asa pahehe murukku, jala dibolongkon ho Ahu tu pudi ni tanggurungmu:

14:10 Dibahen i, ida ma, paroonku ma jea tu pinompar ni si Jerobeam, jala ripashononku sian si Jerobeam nasa baoa, na bajar dohot na tang di Israel, jalojalo buriapus bahenonku pinompar ni si Jerobeam, songon pangapusi ni halak di na rotak, paima sun siap ibana.

14:11 Manang ise na mate sian si Jerobeam di bagasan huta, ingkon suda panganon ni panangga; jala manang ise na mate di ladang, ingkon suda parguton ni pidong na martongatonga langit; tongon tahe, nunga pola Jahowa mandok songon i!

14:12 Antong borhat ma ho laho muli tu jabum; molo masuk patmu tu bagasan huta, mate ma dakdanak i.

14:13 Jala sandok Israel mangandungi anggo ibana, dohot mananom ibana; ai sasadasa do sian pinompar ni si Jerobeam tipak tu tanoman, ala adong jumpang di bagasan ibana roha na denggan maradophon Jahowa, Debata ni Israel, di bagasan jabu ni si Jerobeam.

14:14 Alai patindangon ni Jahowa ma sada raja gumomgom Israel, na mangaripashon pinompar ni si Jerobeam di ari binuhulna i; aha huhut naung masa nuaeng?

14:15 Jala rosahon ni Jahowa ma Israel, songon arung na meoleol di bagasan aek, jala paunsatonna Israel sian tano na denggan on, naung nilehonna tu angka ompunasida i, jala paserahonna nasida sahat tu bariba ni batang aek, ala sombaon angka na binahennasida i, pahehe rimas ni Jahowa.

14:16 Jala pasahatonna ma Israel ala ni dosa na niulahon ni si Jerobeam sandiri, huhut ala na nielana i halak Israel mambahen dosa.

14:17 Dung i borhat ma jolma ni si Jerobeam mardalan sahat tu Tirza. Jadi dung sahat ibana tu lobulobu ni jabuna, mate ma dakdanak i.

14:18 Dung i ditanom nasida ma ibana, jala sandok Israel mangandungi ibana, hombar tu hata ni Jahowa, naung pinaboana hian marhite sian panurirang Ahia naposona i.

14:19 Jamita na tinggal i dope sian si Jerobeam, i ma parture ni parporangonna dohot pangarajaionna, tarsurat do angka i di bagasan buku jamita ni angka raja ni Israel.

14:20 Alai anggo lelengna mangarajai si Jerobeam duapulu dua taon do. Dung i monding ma ibana gabe top dohot angka ompuna, jala si Nadab anakna i bangkit raja singkatna.

14:21 Alai anggo si Rehabeam, anak ni si Salomo, mangarajai di Juda. Opatpulu sada taon umur ni si Rehabeam di na bangkit raja ibana, jala sampulu pitu taon lelengna ibana mangarajai di Jerusalem, huta na pinillit ni Jahowa sian saluhut marga ni Israel bahen parmianan ni Goarna. Ia goar ni ina ni rajai, i ma si Naema, boru Amon.

14:22 Dung i diulahon halak Juda ma sogo ni roha ni Jahowa, pahehe iburuna, lobi hehena sian sude na binahen ni ompunasida marhite sian dosa, angka na niulahonnasida i.

14:23 Ai dohot do nasida paulihon ni nasida angka joro parsantian dohot ganaganaan dohot angka sombaon di atas ni saluhut dolokdolok na timbo dohot di toru ni saluhut hau na rugun.

14:24 Adong do huhut baoa angka na marjolmahon baoa di tano i, angka na maniru mangulahon hajahaton na niula ni bangso parbegu, angka naung pinabali ni Jahowa maradophon halak Israel.

14:25 Alai tole palimataonhon dung raja si Rehabeam, nangkok ma si Sisak, raja sian Misir mandopang Jerusalem.

14:26 Dung i ditaban duduk ma angka ugasan sian joro ni Jahowa dohot sian bagas ni rajai, tung saluhut do dibuat; dibuat do huhut saluhut lombulombu parinse sian sere, angka na pinauli ni si Salomo.

14:27 Dung i dipauli raja Rehabeam ma angka parinse sian tombaga bahen singkatna, jala dipasahat do i tu tangan ni partogi ni parangan, angka na marhal di lambung pintu ni jabu ni rajai.

14:28 Manang piga hali pe rajai masuk tu bagasan joro ni Jahowa, sai diusung angka parangan i do angka parinse i, dung i dung salpu i diboan do i mulak tu bilut ni angka parangan i.

14:29 Jamita na tinggal i dope sian si Rehabeam dohot sude na niulana, nda tarsurat do i di bagasan buku jamita ni angka raja sian Juda?

14:30 Alai sai tong tangging humusuon i di holangholang ni si Rehabeam dohot si Jerobeam saleleng mangolu be nasida.

14:31 Dung i monding ma si Rehabeam gabe top ibana dohot angka ompuna, laos tartanom di lambung ni angka ompuna di bagasan huta ni si Daud. Ia goar ni inana, i ma si Naema, boru Amon. Jadi si Abia anakna i bangkit raja singkatna.

1 Raja-raja 15

15:1 Tole pasampuluualu taonhon dung raja si Jerobeam, anak ni si Nebat, bangkit raja ma si Abia di Juda.

15:2 Dung i tolu taon lelengna ibana mangarajai di Jerusalem; ia goar ni inana, i ma si Maaka, boru ni si Absalom.

15:3 Dung i marparange ibana di bagasan saluhut dosa ni amana, angka ma binahenna jumolo sian ibana, jala ndang sun daulat rohana tu Jahowa, Debatana, songon roha ni ompuna si Daud.

15:4 Alai ala ni si Daud dilehon Jahowa, Debatana i tu ibana sada palito di Jerusalem laho pabangkithon anakna dung salpu ibana, asa pahothon Jerusalem.

15:5 Ala diulahon si Daud na tigor di bagasan roha ni Jahowa, jala ndang dung sumurut ibana sian saluhut na tinonahonna tu ibana saleleng mangolu ibana, dungkon ni hata na tu si Uria, halak Het i.

15:6 Alai sai tangging do hamusuon di holangholang ni si Rehabeam dohot si Jerobeam saleleng mangolu be nasida.

15:7 Jamita na tinggal i dope sian si Abia dohot sude na binahenna i, nda tarsurat do i di bagasan buku jamita ni angka raja sian Juda? Alai sai tangging do anggo humusuon i di holangholang ni si Abia dohot si Jerobeam.

15:8 Dung i monding ma si Abia gabe top dohot angka ompuna, jala tartanom ibana, di bagasan huta ni si Daud. Dung i si Asa anakna i bangkit raja singkatna.

15:9 Paduapulutaonhon dung gabe raja sian Israel si Jerobeam, bangkit raja ma si Asa gumomgom Juda.

15:10 Jala opatpulu sada taon lelengna ibana mangarajai di Jerusalem. Ia goar ni inana, i ma Maaka, boru ni si Absalom.

15:11 Dung i diulahon si Asa ma na tigor di roha ni Jahowa, suang songon si Daud ompuna i.

15:12 Ai dipalaho ibana do baoa angka na marjolmahon baoa sian tano i, jala dipaholang saluhut ganaganaan na ronsam, angka na pinauli ni ompuna.

15:13 Dipaijur huhut inana si Maaka sian tohonanna raja, ala pinaulina sada ganaganaan di sombaon Asera. Dung i disiaphon si Asa ma ganaganaanna i jala ditutung do i martopihon sunge Kidron.

15:14 Alai ndang dipaholang anggo angka joro parsantian. Sai tong do nian marsihohot roha ni si Asa tu Jahowa saleleng mangolu ibana.

15:15 Diboan do huhut perak dohot sere dohot ulaula, angka na pinarbadiaan ni amana, pinarbadiaanna sandiri pe tu bagasan joro ni Jahowa.

15:16 Sai tangging do anggo hamusuon di holangholang ni si Asa dohot si Baesa, raja sian Israel, saleleng mangolu be nasida.

15:17 Ai nangkok do si Baesa, raja sian Israel, mandopang Juda, jala dipagonting huta Rama, asa unang tarbahen manang ise marmeang muli tumopot si Asa, raja sian Juda.

15:18 Dung i dibuat si Asa ma sandok perak dohot sere na tinggal i dope sian arta angka na di joro ni Jahowa, tole arta angka na di jabu ni rajai jala dipasahat do i tu angka naposona; dung i disuru raja Asa ma nasida manopot si Benhadad, anak ni si Tabrimon, tubu ni si Hesion, raja sian Ram, na maringan di Damaskus, ninna ma:

15:19 Tibu hian do hita marjanji, sian amanta be dope, dibahen i manongos silua perak dohot sere ma ahu tu ho; antong laho ma ho, tulakkon ma padanmu tu si Baesa, raja sian Israel, asa sumurut ibana sian ahu.

15:20 Dung i ditangihon si Benhadad ma hata ni raja Asa jala disuru angka partogi ni paranganna mandopang angka huta ni Israel, gabe dipapatu ma huta Iyon dohot Dan dohot Abel Betmaaka dohot sandok tano Kinerot ro di sandok tano Naptali.

15:21 Dung sahat barita i, dibege si Baesa, mansohot ma ibana pagonting Rama, laos tinggal di Tirza.

15:22 Dung i santi balatuk ma sandok Juda, didokkon raja Asa, ndang jadi malua nanggo sahalak, asa diusung nasida angka batu dohot hau sian Rama naung pinauli ni si Baesa, naeng pangkeon ni raja Asa do i pauli huta Geba dohot Mispa.

15:23 Jamita na tinggal i dope sian si Asa ro di sude huasona dohot na binahenna dohot huta angka na pinaulina, nda tarsurat do i di bagasan buku jamita ni angka raja sian Juda? Dung marhira matua ibana sarion ma patna duansa.

15:24 Dung i monding ma si Asa, gabe top dohot angka ompuna, jala tartanom di lambung ni angka ompuna di huta ni si Daud ompuna i. Dung i si Josapat, anakna i bangkit raja singkatna.

15:25 Alai si Nadab, anak ni si Jerobeam, bangkit raja di Israel paduataonhon dung raja si Asa di Juda, jala dua taon lelengna ibana mangarajai Israel.

15:26 Jala diulahon do sogo ni roha ni Jahowa, diihutihut tahe dalan ni amana dohot dosana mangela Israel mardosa.

15:27 Dung i marbulan ma si Baesa, anak ni si Ahia sian pinompar ni si Isasar, naeng mangalo ibana, laos dibunu si Baesa ibana di Gibeton na masuk tu halak Palistim, tongon uju si Nadab dohot sandok Israel martungkum huta Gibeton.

15:28 Jadi dibunu si Baesa ibana patolutaonhon dung si Asa raja di Juda, jala si Baesa bangkit raja singkatna.

15:29 Dung bangkit raja ibana, diripurhon ma sandok pinompar ni si Jerobeam, ndang teba nanggo sada na marhosa sian si Jerobeam dipasombu, tung diripurhon do pinomparna, hombar tu hata ni Jahowa naung nilumbahonna hian marhitehite naposona si Ahia sian Silo.

15:30 Ala ni dosa ni si Jerobeam angka na niulana sandiri huhut, ala na nielana i halak Israel mambahen dosa, marhite sian paminggilna pahehe muruk ni Jahowa, Debata ni Israel.

15:31 Jamita na tinggal i dope sian si Nadab dohot sude na binahenna, nda tarsurat do i di buku jamita ni angka raja sian Israel?

15:32 Sai tangging do anggo humusuon i di holangholang ni si Asa dohot si Baesa, raja sian Israel saleleng mangolu be nasida.

15:33 Patolutaonhon dung raja si Asa di Juda, bangkit raja ma si Baesa, anak ni si Ahia gumomgom sandok Israel di Tirza duapulu opat taon lelengna.

15:34 Jadi diulahon ibana ma sogo ni roha ni Jahowa mangihutihut dalan ni si Jerobeam dohot dosana sandiri huhut mangela Israel mardosa.

1 Raja-raja 16

16:1 Alai ro ma hata ni Jahowa tu si Jehu, anak ni si Hanani palumba si Baesa songon on:

16:2 Ala naung hupatimbul ho sian orbuk jala hupabangkit ho gabe partogi ni bangsongku Israel, hape diihutihut ho do dalan ni si Jerobeam dohot mangela bangsongku Israel mardosa, asa pahehe murukku marhite sian dosanasida.

16:3 Ida ma, ripur ma bahenonku si Baesa dohot pinomparna, bahenonku tahe tu pinomparmu, suang songon tu pinompar ni si Jerobeam, anak ni si Nebat.

16:4 Manang ise na mate sian si Baesa di bagasan huta, ingkon suda panganon ni panangga, jala manang ise na mate di ladang, ingkon suda parguton ni pidong na martongatonga langit.

16:5 Jamita na tinggal i dope sian si Baesa dohot na binahenna ro di huasona, nda tarsurat do i di bagasan buku jamita ni angka raja sian Israel?

16:6 Dung i monding ma si Baesa gabe top dohot angka ompuna, jala tartanom di Tirza, jadi si Ela anakna i bangkit raja singkatna.

16:7 Alai songgop pe hata ni Jahowa nilumbahon ni panurirang Jehu hian, anak ni si Hanani, tu si Baesa dohot tu pinomparna i, ala saluhut hajahaton na niulana maradophon Jahowa, pahehe murukna marhite sian pambahenan ni tanganna, gabe tudos ibana tu pinompar ni si Jerobeam dohot ala naung binununa ibana.

16:8 Tole paduapuluonomtaonhon dung raja si Asa di Juda, bangkit raja ma si Ela, anak ni si Baesa, gumomgom Israel di Tirza dua taon lelengna.

16:9 Dung i marbulan ma naposona si Simri, induk ni satonga huretana mangalo ibana, tongon ibana di Tirza minum anggur, pola mabuk di jabu ni si Arza, siramoti bagas ni rajai di Tirza.

16:10 Dung i masuk ma si Simri laos dibunu ibana mate paduapulupitutaonhon dung raja si Asa di Juda, jala si Simri bangkit raja singkatna.

16:11 Jadi dung bangkit raja ibana, sanga juguk di atas habangsana, didokkon ma bunuon sandok pinompar ni si Baesa, ndang teba dibahen nanggo sada baoa, ro di tuturna dohot alealena.

16:12 Tung siap do dibahen si Simri sandok pinompar ni si Baesa, hombar tu hata ni Jahowa, na nilumbahonna hian tu si Baesa marhite sian panurirang Jehu.

16:13 Ala saluhut dosa ni si Baesa dohot ala dosa ni si Ela, anakna i na niulana sandiri dohot mangela Israel mardosa pahehe muruk ni Jahowa, Debata ni Israel, marhite sian ganaganaannasida.

16:14 Jamita na tinggal i dope sian si Ela dohot sude na binahenna, nda tarsurat do i di buku jamita ni angka raja sian Israel?

16:15 Tole paduapulupitutaonhon dung raja si Asa di Juda bangkit raja ma si Simri pitu ari lelengna di Tirza; alai anggo angka parangan i martungkum huta Gibeton do, na masuk tu halak Palistim.

16:16 Jadi dung tarbege barita i tu parangan angka na di parsaroan i: Naung mambahen parbulanan si Simri, nunga pola mate rajai dibunu, jadi sandok parangan ni Israel pabangkithon sadarina i si Omri, partogi ni angka parangan bahen raja gumomgom Israel di parsaroan i.

16:17 Dung i nangkok ma si Omri rap dohot sandok Israel sian Gibeton laho martungkum Tirza.

16:18 Alai dung diida si Simri naung patu huta i, masuk ma ibana tu parhalan ni bagas ni rajai, laos ibana sandiri mamosokkon bagas ni rajai di atasna, gabe mate.

16:19 Ala dosana sandiri, na niulahonna i sogo ni roha ni Jahowa laho mangihutihut dalan ni si Jerobeam dohot maniru dosana na niulahonna mangela dohot Israel mardosa.

16:20 Jamita na tinggal i dope sian si Simri dohot parbulanan na binahenna i, nda tarsurat do i di bagasan buku jamita ni angka raja sian Israel?

16:21 Mardua rongkanan bangso Israel uju i; na satonga bangso i mangihuthon tu si Tibni, anak ni si Ginat parajahon ibana, na satonganari mangihuthon tu si Omri.

16:22 Alai ditaluhon bangso na mangihuthon tu si Omri do bangso na mangihuthon si Tibni, anak ni si Ginat; mate ma ia si Tibni, jadi si Omri bangkit raja.

16:23 Patolupulusadataonhon dung raja si Asa di Juda, bangkit raja ma si Omri gumomgom Israel sampulu dua taon lelengna, onom taon lelengna ibana mangarajai anggo di Tirza.

16:24 Dung i dituhor ma dolok Samaria sian si Semer mararga dua talenta perak, jala dipungka sada huta di atas dolok i, dibahen ma goar ni huta na pinungkana i Samaria mangihuthon goar ni si Semer, tuan nampuna dolok i hian.

16:25 Dung i diulahon si Omri ma sogo ni roha ni Jahowa, jumahat tahe ibana sian saluhut jolma angka na jumolo sian ibana.

16:26 Diihutihut ibana huhut saluhut dalan ni si Jerobeam, anak ni si Nebat dohot dosana angka na binahenna i mangela Israel mardosa, asa pahehe muruk ni Jahowa, Debata ni Israel marhite sian ganaganaannasida i.

16:27 Jamita na tinggal i dope sian si Omri, na binahenna dohot habeguon na niulana, nda tarsurat do i di buku jamita ni angka raja sian Israel?

16:28 Dung i monding ma si Omri gabe top dohot angka ompuna, jala tartanom di Samaria, jadi si Ahab, anakna i, bangkit raja singkatna.

16:29 Patolupuluualutaonhon dung raja si Asa di Juda, bangkit raja ma si Ahab, anak ni si Omri, gumomgom Israel di Samaria duapulu dua taon lelengna.

16:30 Dung i diulahon si Ahab, anak ni si Omri ma sogo ni roha ni Jahowa, gumodang sian saluhut jolma angka na jumolo sian ibana.

16:31 Hira na maotikku dope di rohana na niihutihutna angka dosa ni si Jerobeam, anak ni si Nebat. Lam dibuat dope si Izebel, boru ni si Etbaal, raja ni halak Sidon, bahen jolmana; laho ibana huhut mangoloi Baal dohot marsomba tusi.

16:32 Dung i dipajongjong ma sada langgatan di Baal, di bagasan joro ni Baal, na pinaulina di Samaria.

16:33 Dipungka si Ahab huhut sada sombaon Asera, asa gumodang do dibahen si Ahab pahehe muruk ni Jahowa, Debata ni Israel, sian saluhut raja ni Israel angka na jumolo sian ibana.

16:34 Di angka arina ro si Hiel sian Betel mangulahi paulihon huta Jeriko. Mate si Abiram, anak buhabajuna laho mambahen ojahanna; mate si Segub, anakna siampudan laho umpajokkon pargumbanganna, hombar tu hata ni Jahowa, naung nilumbahonna hian marhite sian si Josua, anak ni si Nun.

1 Raja-raja 17

17:1 Dung i ro ma hata ni si Elia, halak Tisbi, sian halak paisolat di Gilead, mandok tu si Ahab: Songon sintongna mangolu Jahowa, Debata ni Israel, jala ahu marhalado di jolona, ndang jadi ro nambur manang udan, manang piga taon on, molo so jolo ahu mandokkon!

17:2 Dung i ro ma hata ni Jahowa mandok tu ibana:

17:3 Laho ma ho sian on jala tondong ma dompak purba, jala martabuni ma ho di lambung sunge Kerit na di bariba ni Jordan.

17:4 Ingkon minum sian sunge i ma ho, jala nunga hudokkon angka pidong sigak, asa nasida marmudu do disi.

17:5 Dung i laho ma ibana jala dibahen ma hombar tu hata ni Jahowa, laho ma ibana tutu jala hundul di lambung sunge Kerit na di bariba ni Jordan.

17:6 Jadi ro ma angka pidong sigak mamboan tu ibana sagusagu dohot juhut manogotna i dohot bodarina i, jala sian sunge i ibana minum.

17:7 Dung i marhira sataon lelengna, marsik ma sunge i, ala soada ro be udan di tano i.

17:8 Dung i ro ma hata ni Jahowa tu ibana songon on:

17:9 Borhat ma ho laho tu Sarpat na mardonokkon Sidon, maringan disi ma ho; ida ma, nunga hudokkon sada parompuan na mabalu disi marmudu ho.

17:10 Dung i borhat ma ibana laho tu Sarpat; jadi dung sahat ibana tu harbangan ni huta i, ida ma, adong ma disi sada parompuan na mabalu na marsobansoban. Dung i joujou ma si Elia mandok tu nasida: Ua alap di ahu aek i otik di bagasan tabutabu on, asa minum ahu.

17:11 Alai dung laho nasida naeng mangalap, joujou muse ibana mandok tu nasida songon on: Ua buat di ahu santopik sagusagu di bagasan tanganmu.

17:12 Alai ninna parompuan i ma: Songon sintongna mangolu Jahowa, Debatam, ndang adong sagusagu di ahu nanggo sada, nda holan itak sampohul di bagasan hudon, angkup ni miak otik di bagasan guriguri, jala ida ma, na marsobansoban do ahu, asa laho ahu paulihon itak i di ahu dohot di anakki, asa mangan hami na dua dung i mate ma.

17:13 Alai ninna si Elia ma tu nasida: Unang ho mabiar, laho ma ho, bahen ma songon na nidokmu, alai pauli di ahu jumolo sian i sada sagusagu na metmet, jala boan tu ruar di ahu, dung pe i asa pauli di ho dohot di anakmu.

17:14 Ai songon on do hata ni Jahowa, Debata ni Israel: Ia itak na di bagasan hudon ndang olo suda, jala miak na di bagasan guriguri ndang jadi marsik, paima jumpang ari haroro ni udan tongoson ni Jahowa tu sisik ni tano on.

17:15 Dung i laho ma parompuan i, dibahen ma songon na nidok ni si Elia, gabe mangan nasida, nang ibana nang parompuan i ro di isi ni jabuna ariari.

17:16 Ia itak na di bagasan hudon ndang olo suda, jala miak na di bagasan guriguri ndang olo marsik, hombar tu hata ni Jahowa, naung pinaboana hian marhite sian si Elia.

17:17 Jadi dung salpu angka jamita ondeng, marsahit ma anak ni parompuan, soranganna i, pola pasang situtu sahitna laos tos hosana.

17:18 Dung i ninna parompuan i ma tu si Elia: Aha parsaoranku tu ho, ale halak ni Debata? Rupa ro do ho tu ahu laho pasingothon dosangku dohot mambunu anakki?

17:19 Dung i ninna si Elia ma mandok nasida: Boan tuson anakmi. Dung i dibuat si Elia ma anakna i sian ampuanna, laos diboan ibana tu ginjang, tu bilut na niingananna i, jala diampehon ibana tu podomanna.

17:20 Dung i joujou ma ibana tu Jahowa, ninna ma: Oale Jahowa, Debatangku! Tung dohot ma parompuan na mabalu on, soranganki marhinamago bahenonmu laho mambunu anakna?

17:21 Dung i dipabustang ma ibana tolu hali di ginjang ni dakdanak i huhut joujou tu Jahowa, ninna ma: Ale Jahowa, Debatangku, ua paulak ma hosa ni dakdanak on tu bagasan ibana.

17:22 Jadi ditangihon Jahowa ma soara ni si Elia, gabe mulak hosa ni dakdanak i tu bagasan ibana, laos mangolu ibana.

17:23 Dung i dibuat si Elia ma dakdanak i jala diboan sian bilut parginjang tu toru, jala dilehon ibana tu inana huhut didok si Elia: Ida ma, na mangolu do anakmon.

17:24 Dung i didok parompuan i ma tu si Elia: Nuaeng pe asa huboto halak ni Debata do ho, jala hasintongan do hata ni Jahowa na ruar sian pamanganmu.

1 Raja-raja 18

18:1 Dung i di laonlaon ni ari ro muse ma hata ni Jahowa tu si Elia, patolutaonhon tahe, ninna ma: Laho ma ho, pataridahon ma ho tu si Ahab, ai naeng ma tongosonku udan tu tano i.

18:2 Dung i laho ma si Elia pataridahon ibana tu si Ahab. Alai masa do uju i haleon potir di Samaria.

18:3 Dung i dijou si Ahab ma si Obaja, siramoti jabuna. Alai marhabiaran situtu anggo si Obaja mida Jahowa.

18:4 Ai uju na niripashon ni si Izebel angka panurirang ni Jahowa, dibuat si Obaja ma saratus halak panurirang jala ditabunihon nasida limalimapulu halak di bagasan sada liang, jala dipasingkop sagusagu dohot aek tu nasida.

18:5 Dung i ninna si Ahab ma tu si Obaja: Adangi ma tano on manopot sude mual dohot sunge anggiat tung jumpang hita duhutduhut, asa itapangolu angka hoda dohot angka hoda na marsahe, asa unang rendep angka pinahan i.

18:6 Jadi disagi nasida padua ma tano i adangadanganna; sasada si Ahab mardalan di dalan na sada, jala sasada si Obaja mardalan di dalan na sadanari.

18:7 Jadi dung di tongan dalan si Obaja ida ma, pajumpang ma ibana dohot si Elia; dung ditanda ibana rupana, manungkap ma ibana huhut didok: Dison do ho hape ale tuanku Elia?

18:8 Dung i didok ma: Dison ma tutu, laho ma ho, paboa ma tu tuanmu: Ida ma nunga disi si Elia!

18:9 Alai ninna si Obaja ma: Aha ulaning dosangku, umbahen naeng pasahatonmu naposom tu bagasan tangan ni si Ahab, asa bunuonna ahu?

18:10 Songon sintongna mangolu Jahowa, Debatam: Ndang adong bangso manang harajaon na so tinopot ni suruan ni tuanku mangalului ho nian; ia didok nasida: Ndang dison ibana, pola dipatolon rajai harajaon dohot bangso i, paboa na tutu ndang jumpang nasida ho.

18:11 Ia nuaeng lam didok ho do: Laho ma ho, paboa ma tu tuanmu: Ida ma, nunga disi si Elia!

18:12 Angkup ni, molo laho ahu sian lambungmon, gabe ro Tondi ni Jahowa mangusung ho manang tudia so huboto; hape ro ahu palumbahon nian tu si Ahab, alai ndang jumpangsa ho, gabe bunuonna ma ahu; alai sai marhabiaran do naposomon mida Jahowa olat ni sidakdanahonna.

18:13 Ndada tarbortik huroha barita ni na hubahen i tu tuanku, uju na binunu ni si Izebel angka panurirang ni Jahowa, na hutabunihon i angka panurirang ni Jahowa saratus halak, limalimapulu halak di bagasan sada liang, jala hupasingkop tu nasida sagusagu dohot aek?

18:14 Lam didok ho nuaeng: Laho ma ho, paboa ma tu tuanmu: Ida ma, nunga disi si Elia, asa bunuonna ahu huroha.

18:15 Dung i didok si Elia ma: Songon sintongna mangolu Jahowa Zebaot, jala ahu marhalado di jolona, ingkon sadarion dope patuduhononku ahu tu ibana.

18:16 Dung i laho ma si Obaja manjumpangkon si Ahab, jala dipaboa barita i tu ibana; gabe mardalan ma si Ahab manjumpangkon si Elia.

18:17 Jadi dung pajumpang si Ahab dohot si Elia, ninna si Ahab ma tu ibana: Nunga disi hape ho siago Israel?

18:18 Alai ninna ibana ma: Ndada ahu mangago Israel, ho do dohot pinompar ni amam, binahen ni naung tinadingkonmuna angka patik ni Jahowa, jala mangihuthon tu angka Baal.

18:19 On pe, suru ma na papunguhon sandok Israel mandapothon ahu tu atas dolok Karmel ro di angka panurirang ni Baal na opat ratus limapulu halak i dohot angka panurirang ni sombaon Asera na opat ratus halak i, angka na mangan sian meja ni si Izebel.

18:20 Dung i disuru si Ahab ma martingting tu sandok halak Israel, dipapungu huhut angka panurirang i tu atas dolok Karmel.

18:21 Dung i didapothon si Elia ma sandok bangso i, ninna ma: Sadia leleng nari naeng mengkatengkat hamu angkup be? Molo Jahowa Debata, Ibana nian ihuthon; alai ia tung Baal, ibana nian ihuthon hamu! Hape nanggo sahata ndang dialushon bangso i tu ibana.

18:22 Dung i didok si Elia ma tu bangso i: Sasada ahu na ma tinggal panurirang ni Jahowa, alai anggo panurirang ni Baal opat ratus limapulu halak do toropna.

18:23 Antong lehon hamu ma tu hami dua jonggi, itenang dipillit nasida sada jonggi di nasida jala ditanggoi laos diampehon tu soban i, alai unang dibahen api tusi; jadi ahu ma marhobas jonggi na sadanari dohot mangampehon tu soban, unang pe hubahen api tusi.

18:24 Dung i pajoujou hamu ma goar ni debatamuna, jala ahu pajoujou Goar ni Jahowa; manang debata dia na mangalusi dohot api, Ibana ma Debata na tutu. Dung i sahata ma sandok bangso i mangalusi: Denggan do hata i!

18:25 Dung i didok si Elia ma tu angka panurirang ni Baal: Pillit hamu ma di hamu sada jonggi jala pauli hamu parjolo, ai torop do anggo hamu, jala pajoujou hamu ma goar ni debatamuna, alai unang ampehon hamu api tusi.

18:26 Dung i dibuat nasida ma jonggi, na nilehonna tu nasida, jala dipauli nasida lombu i, jala dipajoujou nasida goar ni Baal sian manogotna i sahat ro di hos ni ari, sai ninna do: O Baal, alusi hami! Hape ndang adong ro soara manang alus; pola marhajingjang nasida humaliang langgatan na binahennasida i.

18:27 Alai dung hos ari, direhe si Elia ma nasida, ninna ma: Pagogo hamu soaramuna antong manjoujou, ai Debata do ibana tahe! Atek tung lilian marhusari ibana, manang adong ulaonna na ringkot, manang di pardalanan ibana, manang tung tarlalap modom, asa ngot ibana.

18:28 Dung i dipagogo nasida ma soarana be manjoujou jala dirarihi dagingna marhitehite podang dohot hujur marningot hasomalannasida, pola sap mudar dagingnasida i.

18:29 Alai dung salpu hos ari, sai didatdati nasida do marhatahata sahat ro di tingki pamelehon di pelean sipanganon, alai ndang adong soara manang alus manang panangihon pe.

18:30 Dung i didok si Elia ma tu sandok bangso i: Pajonok hamu ma tu ahu! Jadi sandok bangso i jumonok tu ibana; laos diumban ibana ma langgatan ni Jahowa naung malohai.

18:31 Dung i dibuat si Elia ma sampulu dua batu, mangihuthon bilangan ni marga ni anak ni si Jakkob panahatan ni hata ni Jahowa na jolo, uju na nidokna i: Ingkon si Israel goarmu.

18:32 Dung i sian angka batu i dipauli ibana sada langgatan di Goar ni Jahowa, dihali huhut sada bondar humaliang langgatan i, arga dua solup boni lambasna.

18:33 Dipatutur huhut soban i, jala ditanggoi dohot jonggi jala diampehon tu atas soban i.

18:34 Dung i ninna ma: Gohi hamu opat gunsi aek, jala usehon hamu tu pelean situtungon i dohot tu soban i. Didok muse: Bahen hamu songon i paduahalihon! Jadi dipaduahali nasida ma; didok muse: Bahen hamu songon i patoluhalihon! Jadi dipatoluhali nasida.

18:35 Pola mardalan aek i humaliang langgatan i, bondar i pe gok aek do.

18:36 Jadi dung jumpang tingki pamelehon di pelean sipanganon, ro ma panurirang Elia jumonok jala didok ma: Ale Jahowa, Debata ni si Abraham, si Isak dohot si Israel, sai pabotohon ma sadarion, paboa Ho do Debata di Israel jala ahu naposom, jala marhite sian hatam saluhutna on hubahen.

18:37 Sai alusi ma ahu, ale Jahowa, alusi ma ahu tutu! Asa tung diboto bangso on sasada Ho Debata, ale Jahowa asa tung dipauba Ho rohanasida tumadingkon Baal!

18:38 Dung i madabu ma api sian Jahowa jala suda dipangan pelean situtungon ro di soban dohot batu dohot tano i, pola didilati dohot aek di bagasan bondar.

18:39 Jadi dung diida sandok bangso i songon i, manungkap be ma nasida, angka didok ma: Jahowa do Debata na tutu! Jahowa do Debata na tutu!

18:40 Alai ninna si Elia ma tu nasida: Tangkupi hamu ma angka panurirang ni Baal, unang adong malua sian nasida nanggo sahalak. Jadi ditangkupi ma nasida songon i. Dung i ditogu si Elia ma nasida tuat tu sunge Kison, laos diseseati nasida disi.

18:41 Dung i ninna si Elia ma tu si Ahab: Nangkok ma ho, asa mangan minum, ai marhasak do hubege songon haroro ni udan na por.

18:42 Jadi dung nangkok si Ahab laho mangan minum, nangkok ma si Elia tu punsu ni Karmel laos manungkap tu tano, jala dibahen bohina tu holangholang ni ulu ni totna.

18:43 Dung i didok ma tu naposona: Ua nangkok ma ho manatapnatap tungkan laut. Dung i nangkok ma ibana manatapnatap huhut didok: Ndang adong disi agia aha. Dung i didok si Elia muse: Ulahi laho, pola pitu hali.

18:44 Tole papituhalihon ninna ma: Ida ma, ombun sada na metmet songon tangan ni baoa sada balgana manaek sian laut. Dung i didok si Elia ma: Nangkok ma ho, dok ma tu si Ahab: Pasang ma huretam jala tuat, asa unang ambaton ni udan i ho.

18:45 Dung i ndang piga dan mangkolom ma langit i dibahen ombun mardongan habahaba, gabe ro ma udan tipotipo. Alai marhureta ma anggo si Ahab laho tu Jisreel.

18:46 Dung i ro ma tangan ni Jahowa manogu si Elia, laos dihohosi ma gontingna marlojong manjoloani si Ahab sahat ro di Jisreel.

1 Raja-raja 19

19:1 Dung i dipajojor si Ahab ma tu si Izebel sude na binahen ni si Elia dohot pamununa di saluhut angka panurirang marhite sian podang.

19:2 Dung i disuru si Izebel ma suruanna manopot si Elia mandok tu ibana: Ingkon pinsangon ni angka debata ma ahu, molo so bahenonku tu hosam marsogot songon on, suang songon na binahenmi tu hosa ni sada sian angka nasida i.

19:3 Dung sanat hata i diboto si Elia hehe ma ibana mardalan marhamaol hosana, gabe sahat ma ibana tu Berseba na di Juda, jala ditinggalhon naposona disi.

19:4 Alai mardalan ma anggo ibana tu halongonan, sadari mardalan daona, dung sahat tusi hundul ma ibana marlinggomlinggom di bona ni sada hau tadatada laos mangidohon mate hosana, ninna ma: Nunga i sae ale Jahowa, buat na ma tagonan hosangki, ai apala dumenggan ahu marroha sian angka daompung.

19:5 Dung i dipapeak ma ibana laos modom di linggom ni hau tadatada i. Jadi ida ma, ro sada surusuruan manjama ibana, huhut didok tu ibana: Hehe ma ho mangan!

19:6 Dung i humusor ma ibana, gabe diida peak dingkan uluna sada sagusagu na ginoreng dohot sada gunsi marisi aek. Jadi dung mangan dohot minum ibana, diulahi muse ma modom.

19:7 Dung i ro surusuruan ni Jahowa paduahalihon manjama ibana huhut didok: Hehe ma ho mangan, ai dalan na dao do sidalananmu.

19:8 Dung i hehe ma ibana jala mangan minum, jala mardalan margogohon sipanganon i opatpulu ari opatpulu borngin lelengna, sahat ro di dolok ni Debata, i ma Horeb.

19:9 Masuk ma ibana disi tu bagasan sada liang laos marborngin disi. Dung i ida ma, ro ma hata ni Jahowa, mandok tu ibana: Aha do ni niulam dison, ale Elia?

19:10 Dung i ninna ibana ma: Marmurukmuruk situtu do ahu nian humongkop ulaon ni Jahowa, Debata Zebaot, ai nunga ditadingkon halak Israel parjanjianmu, nunga maloha angka langgatanmu, jala nunga dibunu angka panurirangmu marhite sian podang, sasada ahu na ma tading, dohot hosangki dope dilului nasida naeng buatonna.

19:11 Dung i ninna Ibana ma: Ruar ma ho jala jongjong tu dolok na di jolo ni Jahowa, ai ida ma, naeng mamolus Jahowa! Tongkinnari ro ma habahaba bolon, na manorbani angka dolok dohot mambolai angka dolok batu mardalan di jolo ni Jahowa; alai ndada Jahowa dope di bagasan habahaba i. Dung salpu habahaba i ro ma lalo; alai ndada Jahowa dope di bagasan lalo i.

19:12 Dung salpu lalo i ro ma api; alai ndada Jahowa dope di bagasan api i. Dung salpu api ro ma alogo na tarangonangon.

19:13 Jadi dung dibege si Elia soarana i, dihungkupi ma bohina dohot sampesampena; dung i ruar ma ibana laos jongjong di baba ni liang i. Dung i ida ma, ro sada soara mandok tu ibana: Aha do na niulam dison, ale Elia?

19:14 Dung i ninna ibana ma: Marmurukmuruk situtu do ahu nian humongkop ulaon ni Jahowa, Debata Zebaot; ai nunga ditadingkon halak Israel parjanjianmu, jala nunga diloha nasida angka langgatanmi, nunga dibunui dohot angka panurirangmu marhite sian podang, jala sasada ahu na ma tading, dohot hosangki dope dilului nasida naeng buatonna.

19:15 Alai ninna Jahowa ma tu ibana: Mulak ma ho tu dalanmu hian tungkan Damaskus, laho ma ho tusi jala miahi si Hasael bahen raja gumomgom Ram.

19:16 Miahi dohot si Jehu, anak ni si Nimsi bahen raja gumomgom Israel, miahi dohot si Elisa, anak ni si Sapat sian Abel Mehola bahen panurirang singkatmu.

19:17 Jadi manang ise na malua sian podang ni si Hasael, ingkon mate bunuon ni si Jehu ma i, jala manang ise na malua sian podang ni Jehu, ingkon mate bunuon ni si Elisa ma i.

19:18 Angkup ni tinggal dope hubahen di Israel pitu ribu halak, saluhutna i angka na so mangalompit ulu ni totna marsomba tu Baal dohot na so dung mangumma ibana.

19:19 Dung i mardalan ma si Elia sian i, gabe jumpangsa si Elisa, anak ni si Sapat, tongon maninggala ibana dohot sampulu dua pasang horbo di jolona, ibana sandiri mangolatolat pasang na pasampuluduahon i. Dung i didapothon si Elia ma ibana laos dilungkuphon sampesampena tu ibana.

19:20 Dung i ditadingkon si Elisa ma angka horbo i jala marlojong mangihuthon si Elia, didok ma: Ua loas ahu jolo mangumma damang dohot dainang, asa huihuthon ho. Dung i ninna si Elia ma tu ibana: Laho ma ho mulak! Ai aha do na hubahen i tu ho?

19:21 Dung i mulak ma ibana sian lambungna, jala dibuat sapasang horbo laos dipotongi do i, ulaula ni horbo i do dipangke marmasak juhut i jala dilehon panganon ni angka naposona. Dung i borhat ma ibana mangihuthon si Elia gabe parhaladona.

1 Raja-raja 20

20:1 Dung i dipaluhut si Benhadad raja sian Ram ma sandok paranganna, jala tolupulu dua raja angka na hinarana, tole angka hoda dohot hureta porang, jadi nangkok ma ibana, ditungkum ma Samaria, laos diporang do i.

20:2 Dung i disuru ma angka suruanna manopot si Ahab, raja sian Israel, tu bagasan huta i.

20:3 Asa dohononna tu ibana: Songon on do hata ni si Benhadad: Perakmu dohot serem ahu do nampunasa, angka jolmami dohot anakkonmu angka na ummuli ahu do nampuna nasida.

20:4 Dung i ninna raja ni Israel ma mangalusi: Songon na nidokmi do na tutu, ale rajanami, ho do nampuna ahu ro di sude na di ahu.

20:5 Dung i diulahi angka suruani ro muse, didok nasida ma: Songon on do hata ni si Benhadad: Nunga nian husuru suruanku mandok tu ho: Perakmu dohot serem dohot angka jolmam ro di anakkonmu ingkon tu ahu do i lehononmu.

20:6 Antong marsogot songon on suruonku ma angka naposongku manopot ho, asa disungkapi nasida jabum dohot jabu ni angka naposom, jala nasa ugasan homitan ni roham, ingkon boanor nasida ma i di bagasan tanganna.

20:7 Dung i dipaluhut raja sian Israel ma sude sintua ni tano i, didok ma: Ua tanda jala ida hamu, haurahonta do hape na niluluan nian, ai nunga disuru ibana suruanna mangido tu ahu angka jolmangku dohot anakkonku ro di perakku dohot serengku, jala ndang hujua mangalehon angka i tu ibana.

20:8 Dung i sahata ma sude sintua dohot bangso i mandok tu ibana: Unang patangitangi hatahatana jala unang oloi.

20:9 Dung i ninna rajai ma tu angka suruan ni si Benhadad: Dok hamu ma tu tuanku rajai: Saluhut naung nidok ni suruanmi parjolo tu ahu naposom, bahenonku do i, alai anggo hata on ndang haoloan ahu. Dung i laho ma angka suruani patolhas alusi tu tuanna.

20:10 Dung i diulahi si Benhadad muse marsuru suruanna mandok tu ibana: Ingkon marlulu situtu angka debata tu ahu, molo tung singkop orbuk ni Samaria manggohi tangan sandok bangso angka na mangihuthon tu ahu.

20:11 Dung i ninna raja ni Israel ma mangalusi, dok hamu ma tu rajai: Ndang jadi nian manenganenga halak na manandang podangna, hira songon halak naung mambahen sinjatana tu rompean.

20:12 Jadi dung dibege raja Benhadad hata i, tongon ibana minum anggur rap dohot angka raja hinarana di bagasan undungundungna, didok ma tu angka naposona: Haliangi hamu ma huta i! Jadi dihaliangi nasida ma huta i.

20:13 Dung i ida ma, ro ma sada panurirang mandapothon si Ahab, raja sian Israel, didok ma: Songon on do hata ni Jahowa: Atehe nunga diida ho musum na deakon? Ida ma, pasahatonku ma i sadarion tu bagasan tanganmu, asa tung ditanda ho Ahu do Jahowa.

20:14 Dung i ninna si Ahab ma: Marhite sian ise do? Dung i ninna panurirang i ma: Songon on do hata ni Jahowa: Marhite sian angka naposo ni angka induk marluatluat. Dung i ninna rajai ma: Ise hami jumolo bingkas? Dung i ninna panurirang i ma: Ho do!

20:15 Dung i dibilang rajai ma angka naposo ni angka induk i marluatluat, gabe dua ratus tolupulu dua halak toropna, dung salpu nasida, dibilang ma dohot sian sandok bangso i, i ma sude halak Israel, pitu ribu halak.

20:16 Dung i ruar ma nasida di hos ni ari. Alai anggo si Benhadad lilian minum anggur sanga mabuk di bagasan undungundungna rap dohot na tolupulu dua raja, angka na hinarana i.

20:17 Dung i ruar ma jumolo angka naposo ni angka induk i marluatluat. Jadi disuru si Benhadad ma suruanna, angka na mangalualuhon tu ibana mandok: Nunga adong ruar angka baoa sian Samaria.

20:18 Dung i didok rajai ma: Manang na naeng mardemak nasida umbahen ruar, manang laho marporang, sai tangkupi hamu nasida songon i mangolu!

20:19 Alai dung ruar angka nasida sian huta i, i ma angka naposo ni angka induk i marluatluat dohot angka parangan sian pudinasida.

20:20 Dibunu nasida be ma alona, gabe maporus halak Ram jala dieak halak Israel nasida; maporus dohot si Benhadad, raja sian Ram marsihundul di hoda rap dohot deba jolma parsihundulna.

20:21 Jadi ruar ma dohot raja ni Israel, jala dibunu angka jolma parsihundul di hoda dohot hureta porang, gabe torop situtu marragean halak Ram dibahen.

20:22 Dung i ro ma panurirang i mandapothon raja ni Israel, didok ma tu ibana: Mulak ma ho, patorop ma jolo angka paranganmu, pingkiri ma jala ida manang aha na tama sibehenonmu; ai dapot taon ulahan ni raja sian Ram ma nangkok mandopang ho.

20:23 Ai nunga didok angka naposo ni raja sian Ram hian mandok ibana: Debata pandingini di dolok do angka Debatanasida i, ala ni do umbahen talu hita dibahen nasida; alai molo maralo di adaran hita dohot nasida, sai na tunduk do nasida bahenonta.

20:24 Ala ni songon on ma bahen: Palaho ma angka rajai, ganup sian hajongjonganna be, jala bahen ma angka ulubalang singkatnasida.

20:25 Alai anggo papungu ma di ho parangan, suang songon torop ni parangan naung marragean sian ho, tole angka hoda dohot hureta songon toropna na jolo, asa taulahi marmusu dohot nasida di adaran, sai na tunduk do nasida bahenonta. Jadi dioloi rajai ma hatanasida i, jala dibahen songon i.

20:26 Jadi dung salpu na sataon i, dibilang si Benhadad ma halak Ram, jala nangkok ibana tu Apek laho marporang dompak Israel.

20:27 Dung i tarbilang ma dohot halak Israel jala diparbohali, asa mardalan manjumpangkon halak Ram; dung i marsaro ma halak Israel patondong dohot nasida, hira songon dua punguan hambing; alai anggo halak Ram tung ditutup do tano i.

20:28 Dung i ro ma sada halak ni Debata mandapothon raja ni Israel, ninna ma mandok ibana: Songon on do hata ni Jahowa: Ala naung didok halak Ram, Debata pandingini di angka dolok do Jahowa, ndada Debata pandingini di adaran, dibahen i nunga hupasahat tu tanganmu sandok jolma na deak on, asa tung ditanda hamu, Ahu do Jahowa.

20:29 Jadi marsaro ma nasida patondong be pola pitu ari lelengna. Tole papitu arihon turtar be ma nasida tongtang, gabe dibunu halak Israel ma saratus ribu halak Ram, angka na mardalan pat di bagasan sadari.

20:30 Jala angka na teba i maporus do tu bagasan huta Apek, gabe ditinggang parik ni huta i duapulu pitu ribu halak angka na teba i; maporus dohot si Benhadad masuk tu bagasan huta i, laho sian bilut na sada tu bilut na sadanari.

20:31 Dung i ninna angka naposona i ma mandok ibana: Ida ma, nunga hubege hami barita ni angka raja ni halak Israel, raja parasi ni roha do nasida; dibahen i loas ma hami marabithon tangki dohot martalitalihon tangki ruar mandapothon raja ni Israel, anggiat tung pangoluonna hosam.

20:32 Dung i marabithon tangki ma nasida jala martalitalihon tangki laho mandapothon raja ni Israel, laos didok nasida ma: Hata ni naposom si Benhadad mandok: Ua pangolu ma hosangku! Jadi ninna rajai ma: Mangolu dope ibana hape? Antong anggingku ma ibana.

20:33 Pintor disigop angka baoa i ma hatana i mangaithon tu nasida, angka didok ma: Anggim ma tutu si Benhadad! Dung i didok rajai ma: Laho ma hamu mamboan ibana tuson. Jadi ruar ma si Benhadad mandapothon rajai, laos didokkon rajai ibana manaek tu hureta.

20:34 Dung i didok si Benhadad ma tu rajai: Huta angka na nirampas ni damang na jolo sian amanta, paulahonku ma tu ho, bahen huhut di ho angka jambur di Damaskus, songon na binahen ni damang nahinan di Samaria. Alai anggo ahu (ninna si Ahab), paluaonku ma ho marningot padan on. Jadi marpadan ma nasida na dua, diloas ma ibana laho.

20:35 Dung i ro ma hata ni sada halak sian angka anak ni panurirang mandok tu donganna marhite sian hata ni Jahowa: Ua lombuti ma ahu! Hape manjua do baoa i mangalombuti ibana.

20:36 Dung i didok panurirang i ma tu ibana: Ala na so tinangihonmi soara ni Jahowa, ida ma, molo laho ho annon sian lambungkon, soroon ni singa ma ho. Jadi dung laho ibana sian lambungna pajumpang ma ibana dohot singa na manoro ibana.

20:37 Dung i jumpang panurirang i ma sada halak na asing, ninna ma: Ua lombuti ma ahu! Jadi dilombuti baoa i ma ibana, pola mabugang ibana dibahen.

20:38 Dung i laho ma panurirang i mangambat rajai di tongan dalan, jala dipatinda rupana marhite sian bulangbulang binahenna tu matana.

20:39 Jadi dung mamolus rajai, mangangguhangguk ma ibana dompak rajai, ninna ma: Ruar do ahu naposomon sian tongatonga ni parporangan, gabe ida ma, ro sada halak na manimbil sian parporangan mamboan tu ahu sada halak, ninna ma: Ramoti baoa on! Molo tung mangangkat ibana, ingkon hosam singkat ni hosana; manang ingkon gararonmu perak satalenta.

20:40 Hape uju ringkot situtu ulaon ni naposomon, gabe ndang disi be ibana hudapot. Dung i ninna raja ni Israel ma tu ibana: Laos i ma uhum madabu tu ho, ho sandiri tahe paputushon.

20:41 Dung i hapogan ma panurirang i mananggal bulang i sian matana, gabe ditanda raja ni Israel ma ibana, sada sian angka panurirang i do ibana hape.

20:42 Dung i ninna panurirang i ma mandok rajai: Songon on do hata ni Jahowa: Ala na pinaluam i sian tanganmu baoa naung harom hian hubahen, ingkon hosam singkat ni hosana, jala bangsom singkat ni bangsona.

20:43 Dung i laho ma mulak raja ni Israel tu jabuna, pola gusar jala muruk situtu ibana sahat tu Samaria.

1 Raja-raja 21

21:1 Jadi dung salpu angka jamita ondeng, adong ma sada halak na margoar si Nabot sian Jisreel, marporlak anggur ibana di Jisreel, mardonokkon jabu ni si Ahab, raja di Samaria.

21:2 Dung i ro ma hata ni si Ahab mandok tu si Nabot: Ua lehon tu ahu porlak anggurmi, asa gabe porlak hatubuan ni ingkau rata i di ahu, ala jonokna tu lambung ni jabungku; hulehon pe tu ho porlak anggur na dumenggan bahen singkatna, manang perak na saarga ni porlakmi, molo i lumehet di bagasan roham.

21:3 Alai ninna si Nabot ma mandok si Ahab: Dao ma i sian ahu bahenon ni Jahowa, anggo tung lehononku tu ho tadingtadingan ni damang.

21:4 Jadi mulak ma si Ahab tu bagasan jabuna, pola gusar jala marmurukmuruk ala hata ni si Nabot sian Jisreel tu ibana, songon on: Ndang olo ahu mangalehon tu ho tadingtadingan ni damang. Dung i dipapeak rajai ma ibana tu podomanna, jala dipahusor bohina dompak dorpi pola ndang olo ibana mangan sagusagu.

21:5 Dung i ro ma si Izebel, jolmana i, manopot ibana huhut didok tu ibana: Ala ni aha umbahen tung marsakmarsak roham, jala ndang olo ho mangan sagusagu?

21:6 Dung i didok ibana ma tu nasida: Nunga nian mangkatai ahu dohot si Nabot sian Jisreel, jala hudok tu ibana: Ua lehon di ahu porlak anggurmi tuhoronku, manang molo lomoan roham asa hulehon tu ho sada porlak anggur na asing singkatna; alai ninna ibana do: Ndang olo ahu mangalehon tu ho porlak anggurhi.

21:7 Dung i didok si Izebel jolmana i ma mandok ibana: Atehe mangkajongjongkon harajaon di Israel do ho nuaeng? Hehe ho, jala pangan sagusaguon, jala pir tondim! Ahu pe mangalehon tu ho porlak anggur ni si Nabot, halak Jisreel.

21:8 Dung i dibahen ma angka surat marhitehite goar ni si Ahab jala disahap marhitehite sahapna, jala ditongoshon angka surat i tu angka sintua dohot tu halak na raja di bagasan hutana, angka dongan sahuta ni si Nabot tahe.

21:9 Jala songon on do hata ni angka suratna i: Martingting ma hamu mandokkon saluhut halak marpuasa, jala dokkon hamu si Nabot hundul di julu on ni luhutan i!

21:10 Pahundul hamu huhut dua halak parroha na so hasea, na jahat situtu paadopadop dohot ibana, asa manindangi nasida dompak ibana, dohononna ma: Nunga diinsahi ho Debata dohot raja. Dung i togihon hamu ibana tu ruar, laos dangguri hamu ibana dohot batu asa mate.

21:11 Jadi ro ma halak donganna sahuta, i ma angka sintua dohot halak na raja, angka na maringan di bagasan hutana i, dibahen nasida ma songon na nidokkon ni si Izebel di bagasan surat angka na tinongosna i tu nasida.

21:12 Martingting ma nasida mandokkon halak marpuasa, jala didokkon si Nabot hundul di julu on ni luhutan i.

21:13 Dung i ro ma sidua halak parroha na jahat i, jala hundul nasida paadopadop dohot ibana, dung i manindangi ma halak parroha na jahat i dompak si Nabot di adopan ni bangso i, ninna ma: Nunga diinsahi si Nabot on Debata dohot rajai. Dung i ditogihon nasida ma ibana tu balian ni huta i, gabe didangguri ibana dohot batu laos mate.

21:14 Dung i disuru nasida ma suruanna manopot si Izebel, mandok tu ibana: Nunga mate si Nabot didangguri dohot batu.

21:15 Jadi dung dibege si Izebel naung mate si Nabot didangguri dohot batu, didok si Izebel ma tu si Ahab: Hehe ma ho, buat ma porlak anggur ni si Nabot, halak Jisreel, na jinouna i mangalehon tu ho tuhoronmu, ai ndang be mangolu si Nabot, nunga mate ibana.

21:16 Jadi dung dibege si Ahab naung mate si Nabot, hehe ma ibana laho tuat tu porlak anggur ni si Nabot, halak Jisreel, asa soluhonna.

21:17 Alai ro ma hata ni Jahowa tu si Elia halak Tisbi, ninna ma:

21:18 Hehe ma ho jala tuat mandapothon si Ahab, raja ni Israel na marhabangsa di Samaria; ida ma, di bagasan porlak anggur ni si Nabot do ibana nuaeng, ai nunga tuat ibana tusi asa soluhonna.

21:19 Jala dohononmu ma tu ibana: Songon on do hata ni Jahowa: Nda nunga mambunu jolma ho huhut mangalaum ugasan? Angkup ni dohononmu ma tu ibana: Songon on do hata ni Jahowa: Ia disi didilati angka biang mudar ni si Nabot, ingkon disi dilatan ni angka biang mudarmu!

21:20 Dung i ninna si Ahab ma mandok si Elia: Nunga leak tardapot ahu dibahen ho, ale musungku? Dung i ninna si Elia ma: Nunga dapot ahu ho tutu, ala naung digadishon ho dirim mangulahon sogo ni roha ni Jahowa.

21:21 Ida ma, Ahu parohon jea tu ho, jala Ahu mangaripashon pinomparmu, mangaripashon sian Ahab nasa baoa, na bajar dohot na tang di Israel.

21:22 Jala Ahu mambahen pinomparmu, songon pinompar ni si Jerobeam, anak ni si Nebat dohot songon pinompar ni si Baesa, anak ni si Ahia, ala paminggilna pahehe murukku dohot ala nielana i halak Israel mambahen dosa.

21:23 Nang taringot tu si Izebel songon on do hata ni Jahowa: Ingkon suda panganon ni biang sogot si Izebel di lambung parik ni Jisreel.

21:24 Manang ise na mate sian si Ahab di bagasan huta, ingkon suda panganon ni biang, jala manang ise na mate di ladang, ingkon suda parguton ni pidong na martongatonga langit.

21:25 Ndang dung adong antong jolma naung manggadishon dirina mangulahon sogo ni roha ni Jahowa, songon si Ahab, na pinajuju ni si Izebel jolmana i.

21:26 Tung na sogir situtu do parulaonna laho mangihuthon tu angka debata sileban, maniru sude na binahen ni halak Amori na jolo, angka naung pinabali ni Jahowa nian maradophon halak Israel.

21:27 Alai dung dibege si Ahab angka hata ondeng, gabe diribahi ma pangkeanna, jala disolukkon abit tangki tu dagingna huhut marpuasa ibana, jala modom marabit tangki, jala tungki mardalan.

21:28 Dung i ro ma hata ni Jahowa tu si Elia, halak Tisbi songon on:

21:29 Atehe nunga diida ho na pinaunduk ni si Ahab dirinai maradophon Ahu? Ala naung pinaundukna i dirina maradophon Ahu, ndang paroonku jea i saleleng mangolu ibana, di ngolu ni anakna pe paroonku jea tu pinomparna.

1 Raja-raja 22

22:1 Dung i marsonangsonang ma nasida tolu taon lelengna, demak hamusuon ni Ram tu Israel.

22:2 Alai dapot patolutaonhon tuat ma si Josapat, raja sian Juda mandapothon raja sian Israel.

22:3 Dung i didok raja sian Israel ma tu angka naposona: Atehe diboto hamu do hita nian nampuna Ramot di Gilead? Hape sai so do hita, ndada itarampas huta i sian tangan ni raja sian Ram?

22:4 Dung i ninna rajai ma tu si Josapat: Atehe olo do ho haraonku laho marmusu dompak Ramot di Gilead? Dung i ninna si Josapat ma mandok raja sian Israel: Ia songon i ho, songon i do ahu, ia songon i bangsomi, songon i do bangsongki, ia songon i angka hodam, songon i do angka hodangku.

22:5 Angkup ni ninna si Josapat tu raja sian Israel: Ua marsungkun ho jolo sadarion tu hata ni Jahowa.

22:6 Jadi dipaluhut raja sian Israel ma angka panurirang, hirahira opat ratus halak toropna, jala didok do tu nasida: Atehe jadi do ahu laho tu Ramot di Gilead marporang, manang so jadi? Dung i ninna angka nasida ma: Jadi do ho nangkok, sai na pasahaton ni Tuhan i do nasida tu bagasan tangan ni rajai.

22:7 Alai ro ma hata ni si Josapat: Atehe ndang adong be dison nanggo sada panurirang ni Jahowa, asa marsungkun tu ibana hita?

22:8 Dung i ninna raja sian Israel ma tu si Josapat: Adong dope nian dison sada halak, tarsungkun hita do nian Jahowa marhite sian ibana, alai sogo do rohangku mida ibana, ai ndang dung adong na denggan nanggo sada disurirangkon ibana tu ahu, sai holan jea do, i ma si Mika, anak ni si Jimla. Dung i ninna si Josapat ma: Unang nian songon i hata ni rajai!

22:9 Dung i dijou raja sian Israel, ma sada halak siramoti bagasna, ninna ma: Hatop boan tuson si Mika, anak ni si Jimla!

22:10 Alai raja sian Israel dohot si Josapat, raja sian Juda hundul ganup di habangsana be mamangke pangkean harajaon di partungkoan mardonokkon pintu harbangan ni Samaria, jala saluhut angka panurirang i manurirangi di jolonasida.

22:11 Nunga dibahen si Sedekia, anak ni si Kenaana hian di ibana angka tanduk bosi, huhut didok: Songon on do hata ni Jahowa: Ingkon marhite sian angka on tambingonmu halak Ram, paima sun siap nasida bahenonmu.

22:12 Sude angka panurirang i laos songon i do disurirangkon, ninna do: Nangkok ma ho laho tu Ramot di Gilead, sai marantu do ho, jala pasahaton ni Jahowa do nasida tu bagasan tangan ni rajai.

22:13 Ia suruan naung laho i manjou si Mika, mandok hian tu ibana songon on: Ida ma, sauduran do hatahata ni angka panurirang mandok na denggan tu rajai; dibahen i hatamu pe, sai songon hata ni sahalak sian nasida ma, sai hatahon ma na denggan.

22:14 Alai ninna si Mika ma: Songon sintongna mangolu Jahowa, manang aha sipaboaon ni Jahowa tu ahu, i do hatahononku!

22:15 Jadi dung sahat ibana tu jolo ni rajai, ninna rajai ma mandok ibana: Atehe ale Mika, na jadi do hami laho tu Ramot di Gilead marporang, manang na so jadi? Dung i ninna ibana ma tu rajai: Jadi do ho nangkok, jala marantu ho, ai pasahaton ni Jahowa do nasida tu bagasan tangan ni rajai.

22:16 Dung i diulahi rajai mandok tu ibana: Ingkon intap piga hali ho patolononku, paboa na so hatahononmu tu ahu, nda holan hasintongan marhite sian Goar ni Jahowa?

22:17 Dung i ninna si Mika ma: Nunga hutatap hian sandok Israel marserak di atas ni angka dolok, songon birubiru na so adong na marmahan. Dung i ninna Jahowa ma: Ndang martuan angka ndian, mulak be ma ganup tu jabuna mardamedame!

22:18 Dung i ro ma hata ni raja sian Israel tu si Josapat: Nda nunga hudok hian tu ho, ndang tagamon agia aha na denggan surirangkononna tu ahu, nda holan jea ho?

22:19 Dung i ninna si Mika ma: Dibahen i tangihon ma hata ni Jahowa: Nunga hutatap hian Jahowa hundul di atas habangsana, jala sandok parangan ni banuaginjang tindang di lambungna, tungkan siamunna dohot tungkan hambirangna.

22:20 Dung i ninna Jahowa ma: Ise ulaning olo mangelaela si Ahab, asa nangkok ibana, jala tinggang mardonokkon Ramot di Gilead? Dung i masidok sian ibana be do nasida.

22:21 Dung i ruar ma sada tondi panurirangon, laos jongjong tu adopan ni Jahowa, jala ninna ma: Ahu ma mangela ibana. Dung i ninna Jahowa ma tu ibana: Marhite sian aha do?

22:22 Dung i ninna ibana ma: Ruar ma ahu gabe tondi sipaotooto di bagasan pamangan ni saluhut angka panurirangna. Dung i ninna Jahowa ma: Saut ma ibana elaelaonmu, jala ingkon monang ho; antong ruar ma ho, jala ulahon ma songon i.

22:23 Nuaeng pe, ida ma, nunga dilehon Jahowa tondi sipaotooto tu bagasan pamangan ni saluhut panurirangmu on, jala nunga dilumbahon Jahowa ro jea tu ho.

22:24 Dung i ro ma jumonok si Sedekia, anak ni si Kenaana, dipastap ma hurum ni si Mika, huhut didok: Beha nimmu, hira naung munsat Tondi ni Jahowa sian ahu, mandok tu na sasada ho huroha?

22:25 Dung i ninna si Mika ma: Ida ma, sanga do i idaonmu di ari hapoporusmu sian bilut na sada tu bilut na sada laho martabuni nian.

22:26 Dung i didok raja sian Israel ma: Tangkup ma si Mika, jala boan ibana mulak tu si Amon, induk ni huta i dohot tu si Joas, anak ni rajai.

22:27 Jala dohononmu ma: Songon on do hata ni rajai: Bahen hamu ma bayo on tu hurungan jala lehon hamu ibana mangan sagusagu pardangolan dohot tapian pardangolan, paima mulak ahu mardamedame.

22:28 Dung i ninna si Mika ma: Molo tung mulak ho marsonangsonang, ndang tutu naung marlumba Jahowa marhite sian ahu, pola ninna muse dope: Tangihon ma hata i, hamu ale angka bangso luhutna!

22:29 Dung i nangkok ma raja sian Israel dohot si Josapat, raja sian Juda, tu Ramot di Gilead.

22:30 Jadi ninna raja sian Israel ma tu si Josapat: Patinda rupa ma anggo ahu ro tu tongtangan, alai anggo ho laos pangke ma pangkeanmu hian. Jadi patinda rupa ma anggo raja sian Israel laho tu parporangan.

22:31 Alai nunga martona hian raja sian Ram tu angka induk panahatan ni huretana, tolupulu dua halak toropna, songon on: Ndang jadi hamu mardopur dompak halak na metmet manang na magodang, nda holan dompak raja sian Israel sasadasa.

22:32 Jadi dung diida angka induk panahatan ni angka hureta ni si Josapat, ninna rohanasida ma: Rupa ibana do raja sian Israel, gabe ibana ditahopi nasida naeng porangonna, alai mangangguhi ma si Josapat.

22:33 Jadi dung diida angka induk panahatan ni hureta, ndada ibana hape raja sian Israel, sumurut ma nasida sian ibana.

22:34 Alai adong ma sada baoa na manintak siorna, ndang manang ise nian tinujuna, hape hona do raja sian Israel sian pardomuan ni baju partahanan i. Dung i ninna rajai ma tu jolma sihosing huretana: Hosingkon ma huretai dohot tanganmu, jala togu ahu haruar sian tongtangan, ai nunga mabugang ahu.

22:35 Hape lam tu ragatna marporang di na sadari i, laos jongjong rajai di bagasan huretana ditungkol paadopadop dohot halak Ram, tole bodarina i mate ma ibana, jala mudar sian bugang ni rajai mabaor do tu pamurnangan ni huretai.

22:36 Dung i marhira mate mata ni ari ro ma soara tingting tu parsaroan i songon on: Mulak be ma ganup tu hutana dohot tu tanona be.

22:37 Jadi mate ma rajai, jala tarboan tu Samaria, jala ditanom halak do rajai di Samaria.

22:38 Hape andorang diburi halak huretai di lambung tobat Samaria ro angka biang mandilati mudarna, ro dohot angka boruboru sibabijalang maridi disi, hombar tu hata ni Jahowa naung nilumbahonna hian.

22:39 Jamita na tinggal i dope sian si Ahab dohot sude na binahenna dohot jabu sian gading pinaulina i, ro di sude huta angka na pinungkana i, nda tarsurat do i di bagasan buku jamita ni angka raja sian Israel?

22:40 Dung i monding ma si Ahab gabe top dohot angka ompuna, jala si Ahasia anakna i bangkit raja singkatna.

22:41 Ia si Josapat, anak ni si Asa, bangkit raja di Juda, paopattaonhon dung raja si Ahab di Israel.

22:42 Alai marumur tolupulu lima taon do si Josapat uju bangkit raja ibana, jala duapulu lima taon lelengna ibana mangarajai di Jerusalem. Ia goar ni inana, i ma si Azuba, boru ni si Silhi.

22:43 Dung i marparange ma rajai di sandok dalan ni si Asa, amana i, ndang manimbil ibana sian i, asa mangulahon na tigor di roha ni Jahowa.

22:44 Alai tahe ndang diloha anggo angka joro na di angka robean, sai mamele dohot manutungi daupa dope anggo situan na torop i di atas ni angka tambak.

22:45 Dung i sai mardemak ma si Josapat tu raja sian Israel.

22:46 Jamita na tinggal i dope sian si Josapat dohot huaso angka na niulana ro di parporangonna, nda tarsurat do i di bagasan buku jamita ni angka raja sian Israel.

22:47 Nang pasipasi ni baoa angka na marjolmahon baoa angka na teba i, uju di ngolu ni si Asa amana i, disiaphon do sian tano i.

22:48 Ndang adong anggo raja ihutan di Edom uju i, wakil sambing mangarajai disi.

22:49 Dung i didokkon si Josapat ma paulihon angka kopal Tarsis, angka na marlayar tu Opir mangalap sere nian, alai ndang saut marlayar, ai marropuhan angka kopal i di Esion Geber.

22:50 Uju i ma didok si Ahasia, anak ni si Ahab tu si Josapat: Ua loas ma angka naposongku rap dohot angka naposom marlayar di angka kopal i; alai ndang olo be si Josapat.

22:51 Dung i monding ma si Josapat, gabe top dohot angka ompuna, jala tartanom di lambung ni ompuna, di huta ni si Daud, ompuna i, gabe si Joram, anakna i bangkit raja singkatna.

22:52 Anggo si Ahasia, anak ni si Ahab, bangkit raja gumomgom Israel di Samaria, pasampulupitutaonhon dung raja si Josapat di Juda jala dirajai Israel dua taon lelengna.

22:53 Jala diulahon do sogo ni roha ni Jahowa, sai diihutihut do dalan ni amana dohot inana, diihutihut huhut dalan ni si Jerobeam, anak ni si Nebat, na mangela Israel mambahen dosa.

22:54 Dioloi ibana huhut Baal, jala marsomba tusi, asa pahehe muruk ni Jahowa, Debata ni Israel, sandok suang songon na binahen ni amana i.