Buku 1 Samuel

1 Samuel ᯘᯔᯮᯀᯞᯩ᯲ 1

1:1 Dung i adong ma sada baoa sian Ramataim-Sup, sian dolok Epraim, goarna si Elkana, anak ni si Jeroham, tubu ni si Elihu, tubu ni si Tohu, tubu ni si Sup, halak Eprata. ᯑᯮᯰ ᯤ ᯀᯑᯰᯬ ᯔ ᯘᯑ ᯅᯀᯬᯀ ᯘᯪᯀᯉ᯲ ᯒᯔᯖᯀᯔᯪ᯲ᯘᯇᯮ᯲ ᯘᯪᯀᯉ᯲ ᯑᯬᯞᯄ᯦᯲ ᯀᯩᯇ᯲ᯒᯀᯔᯪ᯲ ᯎᯬᯀᯒ᯲ᯉ ᯘᯪ ᯀᯞᯩ᯲ᯄ᯦ᯉ ᯀᯉᯄ᯦᯲ ᯉᯪ ᯘᯪ ᯐᯩᯒᯬᯂᯔ᯲ ᯖᯮᯅᯮ ᯉᯪ ᯘᯪ ᯀᯩᯞᯪᯂᯮ ᯖᯮᯅᯮ ᯉᯪ ᯘᯪ ᯘᯇᯮᯔ ᯂᯞᯄ᯦᯲ ᯀᯩᯇ᯲ᯔᯒᯖ

1:2 Dua do jolmana, goar ni na sada si Hanna, jala goar ni na sadanari si Pininna. Marianakkon do ianggo si Pininna, alai ndang adong anggo tubu ni si Hanna. ᯑᯮᯀ ᯑᯬ ᯐᯬᯞ᯲ᯔᯊ, ᯎᯬᯀᯒ᯲ ᯊᯪ ᯊ ᯚᯑ ᯚᯪ ᯄᯊ᯲ᯊ, ᯐᯞ ᯎᯬᯀᯒ᯲ ᯊᯪ ᯊ ᯚᯑᯊᯒᯪ ᯚᯪ ᯇᯪᯊᯪᯊ᯲ᯊ. ᯔᯒᯪᯀᯊᯄ᯦᯲ᯄ᯦ᯬᯊ᯲ ᯑᯬ ᯤᯀᯊ᯲ᯎ᯲ᯎᯬ ᯚᯪ ᯇᯪᯊᯪᯊ᯲ᯊ, ᯀᯞᯤ ᯊ᯲ᯑᯊ᯲ᯎ᯲ ᯀᯑᯬᯊ᯲ᯎ᯲ ᯀᯊ᯲ᯎ᯲ᯎᯬ ᯖᯮᯅᯮ ᯊᯪ ᯚᯪ ᯄᯊ᯲ᯊ

1:3 Sai nangkok do baoa i ganup taon sian hutana laho marsomba dohot mamele tu Jahowa Zebaot di Silo; jala disi do anak ni si Eli na dua i, si Hopni dohot si Pinehas, angka malim ni Jahowa.

1:4 Jadi dung jumpang ari ni si Elkana mamele, gabe dilehon ma tu si Pininna, jolmana i dohot tu saluhut anakna dohot boruna angka parjambaran.

1:5 Alai anggo tu si Hanna parjambaran sidua halak dilehon, ai tuanlaenna do si Hanna, alai na hol do bortianna dibahen Jahowa.

1:6 Sai disungguli imbangna huhut hinamagona manggitihi rohana nian, ala na hol bortianna dibahen Jahowa.

1:7 Sai songon i do dibahen ganup taon, manang piga hali nasida nangkok tu bagas ni Jahowa, sai songon i do diarsahi rohana, gabe tumatangis ibana jala ndang olo mangan.

1:8 Jadi ninna si Elkana, sinondukna i ma tu ibana: Ale Hanna, boasa tung tumatangis ho? Jala boasa so olo ho mangan? Jala boasa sai gondok roham? Nda tagonan ahu di ho sian anak sampulu?

1:9 Jadi dung mangan jala minum di Silo, hehe ma si Hanna. Alai hundul di hundulanna ianggo malim Eli di lambung tiang ni bagas ni Jahowa.

1:10 Tung na marsak situtu rohana, gabe martangiang si Hanna tu Jahowa, huhut tumatangis situtu.

1:11 Dung i marbagabaga ma ibana, ninna ma: Ale Jahowa Zebaot! Molo ditatap roham pardangolan ni naposomon, jala diingot Ho ahu, jala ndang halupahononmu naposomon, jala dilehon Ho tu naposomon sada anak, lehononku ma ibana muse tu Jahowa saleleng mangolu ibana, jala ndang jadi hona raut parnabung uluna.

1:12 Jadi dung leleng ibana martangiang di jolo ni Jahowa, sai dipamanatmanat si Eli ma pamanganna.

1:13 Ai martangiang di bagasan rohana do si Hanna, asal ubitubit bibirna, ndang tarbege ianggo suarana, gabe dirimpu si Eli na mabuk ibana.

1:14 Jadi ninna si Eli ma tu ibana: Sadia leleng on ho mabuk? Utahon ma anggur niinummi sian ho?

1:15 Alai ninna si Hanna ma mangalusi: Sitongka, ale tuanku! Parompuan na gondok roha do ahu tahe, ndang dung huinum anggur, manang siinumon na koras, rohangki do na huusehon di jolo ni Jahowa.

1:16 Unang tung bahen naposom hira boru na jahat, ai sian ponjot dohot arsak ni rohangku na godang i ahu mangkatai rasirasa nuaeng.

1:17 Dung i ninna si Eli ma mangalusi: Laho ma ho muli mardamedame! Sai na lehonon ni Debata ni Israel tu ho na pinangidom sian Ibana.

1:18 Jadi ninna si Hanna ma: Sai dapotan asi ni roha ma naposomi di jolom! Dung i ditulus parompuan i ma dalanna, jala mangan, bohina pe, ndang be surbot idaon.

1:19 Tole manogotna i, sogot ma nasida hehe asa marsomba di jolo ni Jahowa, dung i mulak ma nasida muli tu jabuna di Rama. Dung i ditopot si Elkana ma si Hanna jolmana i, gabe marningot Jahowa di nasida.

1:20 Dung i di laonlaon ni ari gabegabean ma si Hanna, jala ditubuhon anak sada, jala dibahen goarna si Samuel, ai sian Jahowa ibana hupangido, ninna.

1:21 Dung i nangkok ma muse si Elkana rap dohot sude isi ni bagasna laho mamelehon tu Jahowa pelean siganup taon ro di bagabagana.

1:22 Alai anggo si Hanna ndang nangkok, ai ninna do mandok sinondukna: Dung pe sirang susu dakdanak i, asa boanonku ibana, paidaidaonna bohi ni Jahowa, laos tinggal disi tongtong.

1:23 Dung i ninna si Elkana, sinondukna i ma tu ibana: Bahen ma lomo ni roham! Tinggal ma ho, paima sirang susu ibana dibahen ho; tung dipasaut Jahowa hatana! Jadi tinggal ma parompuan i pasusu anakna, paima sirang susu ibana dibahen.

1:24 Jadi dung sirang susu ibana, udur ma nasida nangkok huhut mamboan anak ni lombu tolu dohot itak sada Epah dohot anggur sapoting, jala diboan ibana tubagasan bagas ni Jahowa di Silo. Alai bajar situtu dope dakdanak i.

1:25 Dung i dipotongi nasida ma anak ni lombu i, jala diboan dakdanak i tu si Eli.

1:26 Dung i ninna si Hanna ma: Santabi ale tuangku, songon sintongna mangolu tondim ale tuan, ahu ma parompuan i na jongjong di lambungmon na jolo, martangiang tu Jahowa.

1:27 Dakdanak on do na hupangido uju i, gabe dibasabasahon Jahowa tu ahu na pinangido ni rohangku sian Ibana.

1:28 Dibahen i ahu pe pasahatonku ma ibana tu Jahowa saleleng mangolu ibana; ai na pinangido di Jahowa do ibana. Jadi laos martangiang tu Jahowa nasida disi.

1Samuel 2

2:1 Dung i martangiang ma si Hanna, ninna ma: Marolopolop ma rohangku mida Jahowa, timbul do tandukku di bagasan Jahowa, na hirtap situtu do pamanganku dompak angka musungku, umbahen na las rohangku di pangurupionmi.

2:2 Ndang adong na badia, tudoshon Jahowa, ai ndang adong dungkon ni Ho, jala ndang adong partanobatoan, dungkon ni Debatangku.

2:3 Unang sai datdati hamu manenganengahon haginjangon, unang ruar hata jungkat sian pamanganmuna, ai Jahowa do, Debata nampuna angka parbinotoan, jala Ibana dumasing angka pambahenan.

2:4 Marponggolan do sior ni ulubalang, jala marhohos hatogaron do angka naung mandate.

2:5 Angka na lobian na sai laon laho do mansari sipanganon, jala angka na rapar hian marlanggelangge; pola tubuan anak pitu na hol hian, jala merus boti sitorop anak hian.

2:6 Jahowa do na mambunu dohot na pangoluhon; Ibana patuathon tu banua toru dohot panangkokkon muse.

2:7 Jahowa do na mambahen pogos dohot mambahen mamora; Ibana do paijurhon, laos Ibana patimbulhon muse.

2:8 Ibana pahehehon sian orbuk halak na tarjepol hian, jala dipatimbul na pogos i sian gambo laho pahundulhon tu lambung ni angka na sangap, jala diturpukkon habangsa hamuliaon tu nasida, ai Jahowa do nampuna angka ojahan ni tano on, jala dipaojak di atasna hasiangan on.

2:9 Sai na ramotanna do pat ni angka na niasianna, alai sai parendeponna do di bagasan haholomon ianggo angka parjahat i, ai ndada binahen ni hagogoon sandiri marhuaso baoa.

2:10 Sai na tunduk do bahenon ni Jahowa halak angka na mangalo Ibana; mangkuling ronggurna di banua ginjang di atas nasida; Jahowa manguhum angka ujung ni tano on sogot, jala lehononna hamuliaon tu Rajana, jala patimbulonna sogot tanduk ni Messiasna.

2:11 Dung i muli ma si Elkana tu jabuna di Rama; alai parhalado ni Jahowa do anggo dakdanak i di jolo ni malim Eli.

2:12 Alai anggo angka anak ni si Eli jolma na jahat sahali do, ndang ditanda nasida Jahowa.

2:13 Ianggo hasomalan ni malim na dua i tu situan na torop i songon on do: Ia adong manang ise na naeng mamelehon pelean, gabe ro naposo ni malim, tagan mangalompa juhut i, mamboan garpu sitolu ngingi di bagasan tanganna.

2:14 Jala dipantullangkon tubagasan hudon manang seret manang balanga manang kuali, nasa na lohot tu garpu i dibuat malim i di ibana. Sai songon i do dibahen nasida tu sandok Israel, angka na ro tusi, tu Silo.

2:15 Gari tagan so dinahiti dope tabotabo i; nunga ro naposo ni malim i, jala ninna do tu baoa na mamelei: Sai lehon ma juhut i gorengon di malim i, ai ndang jaloonna sian ho juhut na nilompa, ingkon na tata do.

2:16 Ia didok baoa i tu ibana: Sai loas jolo dinahiti tabotabo i, songon na siap ari, dung i buat ma di ho guru pinangido ni roham; gabe didok naposo i tu ibana: Ndangana, ingkon nuaeng do lehononmu, molo ndang, antong gogo do bahenonku laho mambuat.

2:17 Dibahen i balga situtu do dosa ni angka dolidoli i di jolo ni Jahowa; ai lam lea do roha ni angka baoa di pelean sipanganon tu Jahowa.

2:18 Alai anggo si Samuel marhalado di jolo ni Jahowa, jala marsampesampe epod sian hori do dakdanak i.

2:19 Dibahen inana do huhut jobit sada na metmet di ibana, binoanna tu ibana ganup taon, uju nangkok nasida rap dohot sinondukna laho mamelehon pelean siganup taon.

2:20 Laos dipasupasu si Eli do si Elkana dohot jolmana, ninna ma: Sai dilehon Jahowa ma pinompar tu ho sian jolmamon, singkat ni pangidoan na pinangidona sian Jahowa. Dung i muli nasida tu ingananna.

2:21 Tongon tahe, diebati Jahowa ma si Hanna muse, jadi gabegabean nasida, laos ditubuhon tolu anak dohot dua boru di laonlaon ni ari; alai magodang di adopan ni Jahowa do ianggo si Samuel.

2:22 Alai nunga matua situtu ianggo si Eli, jala dibege do barita ni saluhut na binahen ni anakna tu sandok Israel, dohot na niangkupannasida angka boruboru modom, angka na marhalado di lambung pintu ni undungundung luhutan i.

2:23 Jadi ninna ma tu nasida: Boasa tung angka sisongon i bahenonmuna? Ai tarbortik do tu pinggolhu sian sandok situan na torop i pambahenanmuna, angka na jahat i.

2:24 Sitongka ale anaha, ai ndang denggan barita na hubage i, mardosa do bangso ni Jahowa binahenmu.

2:25 Molo mardosa jolma tu donganna jolma, Debata do pangalualuanna; alai molo dompak Jahowa jolma i mardosa, tung ise ma pangalualuanna? Alai ndang ditangihon nasida suara ni amanasida i, ai naeng do bunuon ni Jahowa nasida.

2:26 Alai anggo si Samuel na bajar i, lam magodang, lam hasian ni Jahowa dohot jolma.

2:27 Dung i ro ma sada halak ni Debata manopot si Eli, ninna ma tu ibana: Boti hata ni Jahowa: Atehe, nda hupapatar situtu Ahu tu pinompar ni ompum, uju di Misir dope nasida, di bagasan bagas ni si Firaun?

2:28 Jala hupillit ibana di Ahu sian nasa marga ni Israel bahen malim, asa mamele ibana di atas langgatanku, manutung daupa, mamangke sampesampe epod di jolongku, jala hulehon do tu pinompar ni ompum saluhut pelean situtungon ni halak Israel.

2:29 Boasa tung lea bahenonmuna peleanki sipotongon dohot sipanganon, angka na hutonahon pelehononhon di bagasan undungundung i? Jala sumangap angka anakmu sian Ahu dibahen ho, asa pamokmokkon hamu sian patumonaan ni ganup pelean sipanganon, pinelehon ni bangsongku Israel.

2:30 Dibahen i boti hata ni Jahowa, Debata ni Israel: Nunga pola hudok nian: Pinomparmu dohot pinompar ni amam marhalado di jolongku ro di salelenglelengna. Alai anggo nuaeng, ninna Jahowa: Dao ma i sian Ahu; ai angka na pasangap Ahu marsangap bahenonku, alai angka na palea Ahu, marlea do bahenonku.

2:31 Ida ma, na ro do angka ari sogot, gotaphononku ma tanganmu dohot tangan ni pinompar ni amam, asa unang be adong jolma sarimatua di bagasan jabum.

2:32 Jala sanga dope idaonmu hagogotan ni undungundung di hamamasa ni sandok na denggan tu Israel, jala ndang adong na sarimatua di bagasan jabum ro di salelenglelengna.

2:33 Alai nda tung sun siap baoa di ho sian langgatanku, asa tung lotop matam, jala marsipal tondim bahenon ni; alai godangan pinomparmu ingkon mate di haroro ni dagingna.

2:34 Jala on do partinandaan di ho, na ro tu anakmu na dua i, si Hopni dohot si Pinehas: Ingkon mate nasida duansa di bagasan sadari.

2:35 Alai patindangonku ma di Ahu sada malim haposan, hombar tu na di bagasan rohangku dohot di bagasan tondingku bahenonna, jala paulionku di ibana sada bagas na hot, asa marhalado di jolo ni Messiashu ibana saleleng mangolu.

2:36 Jala nasa na teba sian pinomparmu, ingkon ro marsomba tu ibana mangido hepeng sambiji dohot roti sanseat, jala dohononna ma: Sai pabangkit ma ahu mangaradoti ulaon malim sada, asa adong panganonku roti sanseat.

1 Samuel 3

3:1 Dung i uju si Samuel na bajar i marhalado di Jahowa, di jolo ni si Eli, mahal ma di angka ari i hata ni Jahowa, jala ndang adong sadia pangungkapon.

3:2 Dung i di na sadari modommodom ma si Eli di ingananna, matana pe nunga mamungka rambon, ndang tarbaensa be marnida.

3:3 Ndang dope mintop ianggo palito ni Debata, jala nunga modom ia si Samuel di joro ni Jahowa, hajongjongan ni poti parpadanan ni Debata.

3:4 Jadi joujou ma Jahowa di si Samuel, gabe didok ibana ma: Ida ma, dison do ahu!

3:5 Dung i marlojong ma ibana tu si Eli, jala ninna ma: Ida ma, dison do ahu, ai dijou ho do ahu. Alai didok si Eli ma: Ndang ahu manjou ho, mulak ma ho mangulahi modom, gabe laho ma ibana jala modom.

3:6 Dung i diulahi Jahowa manjou si Samuel paduahalihon, gabe hehe ma si Samuel jala laho mandapothon si Eli, jala didok ma: Ida ma, dison do ahu, ai dijou ho do ahu. Dung i ninna si Eli ma: Ndang ahu manjou ho, ale anaha, mulak ma ho mangulahi modom.

3:7 Alai ndang dope ditanda si Samuel Jahowa, jala ndang dope pinapatar tu ibana hata ni Jahowa.

3:8 Dung i diulahi Jahowa ma manjou si Samuel patoluhalihon, gabe hehe ibana jala laho mandapothon si Eli, jala ninna ma: Ida ma, dison do ahu, ai dijou ho do ahu. Jadi mamoto ma roha ni si Eli, Jahowa do hape manjou dolidoli i.

3:9 Jadi ninna si Eli ma tu si Samuel: Laho ma ho mangulahi modom; molo tung joujou muse di ho, dohononmu ma: Mangkuling ma Ho, ale Jahowa, ai mananginangi do naposomon! Dung i laho ma si Samuel, jala diulahi modom di ingananna.

3:10 Dung i ro muse ma Jahowa, tindang disi jala joujou songon na jolo: O Samuel, Samuel! Gabe didok si Samuel ma: Mangkuling ma Ho, ai mananginangi do naposomon.

3:11 Dung i ninna Jahowa ma tu si Samuel: Ida ma, pamasaonku ma uhum sada di Israel, tung marnginging do pinggol ni ganup na umbegesa duansa.

3:12 Di ari na sasada i paroonku ma tu si Eli saluhut na huhatahon taringot tu pinomparna. Ahu mamungka, laos Ahu paujungkon.

3:13 Ai nunga hulumbahon hian tu ibana, paboa Ahu parlulu dompak pinomparna ro di salelenglelengna, ala hajahaton na binotona, ai mangala torutoru tu nasida angka anakna i, hape so mangonai hata ibana tu nasida.

3:14 Dibahen i nunga pola maruari Ahu taringot tu pinompar ni si Eli: Tung na so hahuphupan be hajahaton ni pinompar ni si Eli marhitehite pelean sipotongon manang sipanganon ro di salelenglelengna.

3:15 Dung i modom ma si Samuel ro di torang ni ari, dung i diungkap ma angka pintu ni joro ni Jahowa. Alai mabiar do anggo si Samuel paboahon pangungkapon i tu si Eli.

3:16 Jadi dijou si Eli ma si Samuel, jala ninna ma: Jo Samuel, ale anaha, gabe didok ibana ma: Dison do ahu.

3:17 Dung i ninna si Eli ma: Dia do hata na pinaboana tu ho? Unang tung porso maradophon ahu! Suang songon i bahenon ni Debata tu ho, jala patambaonna dope, molo tung diporso ho tu ahu nanggo sada hata sian saluhut hata na pinaboana tu ho.

3:18 Jadi dipaboa si Samuel ma hata i luhut tu ibana, jala ndang diporso agia aha tu ibana. Dung i ninna si Eli ma: Jahowa do Ibana, na denggan di rohana ma dibahen.

3:19 Dung i lam magodang ma si Samuel, jala didongani Jahowa ibana, jala ndang madabu boti tu tano nanggo sada sian saluhut hatana i.

3:20 Jadi sandok Israel, olat ni Dan sahat ro di Beerseba marhatopothon si Samuel sintong panurirang ni Jahowa.

3:21 Dung i didatdati Jahowa ma pataridahon Ibana di Silo; ai nunga patar Jahowa tu si Samuel di Silo marhitehite hata ni Jahowa.

1 Samuel 4

4:1 Dung i songgop ma lumbalumba ni si Samuel tu sandok Israel. Alai borhat ma halak Israel manjumpangkon halak Palistim laho marmusu, gabe marsaro nasida mardonokkon Ebeneser; marsaro di Apek do ianggo halak Palistim.

4:2 Dung i pariris ma halak Palistim manjumpangkon halak Israel, gabe ragat martongtang, jadi talu ma halak Israel dibahen halak Palistim, marragean nasida di tongtangan arga opat ribu halak.

4:3 Jadi dung mulak bangso i tu parsaroan, ninna angka sintua ni Israel ma: Boasa ulaning talu hita sadarion dibahen Jahowa maradophon halak Palistim? Beta ma, itaalap ma sian Silo poti parpadanan ni Jahowa, asa ro Ibana tu tongatonganta, asa dipalua hita sian tangan ni musunta!

4:4 Dung i disuru bangso i ma tu Silo mamboan sian i poti parpadanan ni Jahowa Zebaot, na marhabangsahon angka kerubim, disi do huhut na dua anak ni si Eli, si Hopni dohot si Pinehas, mandongani poti parpadanan ni Debata.

4:5 Jadi dung sahat poti parpadanan ni Jahowa tu parsaroan i, marsurak godang ma sandok halak Israel mangolophonsa, pola humuntal tano i dibahen.

4:6 Jadi dung dibege halak Palistim suara suraksurahi, angka ninna nasida ma: Soara surak godang dia do i di parsaroan ni halak Heber? Jala dung diboto nasida, poti ni Jahowa do hape ro tu parsaroan i.

4:7 Mabiar ma halak Palistim, ai ninna nasida ma: Nunga ro Debata tu parsaroan i; angkupni didok nasida; marjea ma hita, ai ndang songon i nantuari manang nantuari sada.

4:8 Marjea ma hita! Tung ise ma paluahon hita sian tangan ni Debata, angka na marmulia sisongon i? I ma Debata, angka na mambunu halak Misir marhitehite begu masa marragamragam di halongonan.

4:9 Antong pir ma tondimuna, hamu baoa ni halak Palistim, asa unang diparhatoban halak Heber hamu, songon na pinarhatobanmuna nasida na sai laon. Asa pir ma tondimuna huhut mangalo, hamu ale angka baoa!

4:10 Jadi turtar ma halak Palistim marmusu, gabe talu ma halak Israel, jala maporus nasida ganup tu undungundungna; asa hataluan na bolon situtu do i, marragean do sian Israel tolupulu ribu parangan angka na mardalan pat.

4:11 Dapot do dohot poti ni Debata, mate dohot na dua anak ni si Eli, si Hopni dohot si Pinehas.

4:12 Dung i marlojong ma sada halak Benjamin sian tongtangan i, jala sahat ibana tu Silo sadarina i, jala marpangkean na sinansanan, jala tano di atas uluna.

4:13 Jadi dung sahat ibana, ida ma, hundul di hundulanna si Eli di lambung dalan manatapnatap, ai nunga holsoan hian rohana taringot tu poti ni Debata. Jadi dung sahat baoa i tu huta i paboahon barita i, mangangguhi ma sandok isi ni huta i.

4:14 Jadi dung dibege si Eli suara ni angguhanggukki, ninna ma: Soara hagunturon dia do i? Gabe hapogan ma baoa i ro mamaritahon tu si Eli.

4:15 Alai marumur siapulu ualu taon ma ia si Eli uju i, jala nunga rambon matana, ndang be marnida.

4:16 Dung i ninna baoa i ma tu si Eli: Na ro sian tongtangan do ahu jala maporus sian tongtangan i do ahu sadarion. Jadi ninna si Eli ma: Aha do barita na masa, ale anaha?

4:17 Jadi ninna siboan barita i ma mangalusi: Nunga maporus halak Israel maradophon halak Palistim, tung talu situtu do bangso i, mate dohot anakmu na dua i, si Hopni dohot si Pinehas, diboan dohot poti ni Debata.

4:18 Jadi dung ditaringoti ibana poti ni Debata, singgalak ma si Eli tu pudi sian hundulanna di lambung ni harbangan i, gabe upok ma rungkungna laos mate; ai nunga jolma matua ibana, jala na mokmok. Alai arga opatpulu taon lelengna ibana manguhum halak Israel.

4:19 Ia parumaenna, jolma ni si Pinehas, gabegabean do uju i matoras ne emena; dung dibege barita taringot tu poti ni Debata naung dapot i, jala naung mate simatuana doli dohot sinondukna, marsinggang ma ibana laos mangintubu; ai tompu do manombo rianna.

4:20 Marhira laho mate ibana, ro ma hata ni sibaso, angka na jongjong di lambungna: Unang ho mabiar, ai anak do tinubuhonmon! Alai ndang dialusi, jala ndang parduli rohana disi.

4:21 Jadi digoar ma dakdanak i si Ikabod, huhut mandok: Nunga pesan hamuliaon sian Israel, ala naung dapot i poti ni Debata, jala ala naung mate simatuana doli dohot sinondukna i.

4:22 Alani do umbahen didok: Nunga pesan hamuliaon sian Israel, ai nunga tarboan poti ni Debata.

1 Samuel 5

5:1 Dung i dibuat halak Palistim ma poti ni Debata, jala diboan sian Ebeneser tu Asdod.

5:2 Asa dibuat halak Palistim ma poti ni Debata, jala diboan do i tu bagasan joro ni Dagon, dipahombar do i tu lambung ni Dagon i.

5:3 Alai dung dipasogot halak Asdod hehe manogotna i, ida ma, nunga tungkap tu tano Dagon i di jolo ni poti ni Jahowa didapot; jadi dibuat nasida ma Dagon i, jala dipasuang ibana tu ingananna hian.

5:4 Alai dung dipasogot nasida muse hehe manogotna i, ida ma, nunga manungkap muse tu tano Dagon i didapot di jolo ni poti ni Jahowa; alai matipul ulu ni Dagon dohot palak ni tanganna duansa, peak di lobulobu, holan badanna dengke na teba sian ibana.

5:5 Dibahen i sitongka do degeon ni angka malim ni Dagon ro di sude angka na masuk tu joro ni Dagon i lobulobu ni joro ni Dagon na di Asdod rasirasa sadarion.

5:6 Alai dokdok do tangan ni Jahowa mandondon tu halak Asdod, jala mangago tu nasida, jala dipatubu barobuni di isi ni Asdod ro di na humaliang huta i.

5:7 Jadi dung diida halak Asdod songon i do hape pangalahona, angka ninna nasida ma: Ndang jadi tinggal di lambungnami on poti ni Debata ni halak Israel, ai posi do tanganna mangonai tu hami dohot tu Dagon, debatanta i.

5:8 Dung i disuru nasida ma paluhuthon sude raja ni halak Palistim tu nasida, angka ninna nasida ma: Beha do bahenonnami taringot tu poti ni Debata ni halak Israel? Jadi ninna angka rajai ma mangalusi: Tu huta Gat ma pinaunsat poti ni Debata ni halak Israel. Jadi dipaunsat nasida ma poti ni Debata ni halak Israel tusi.

5:9 Jadi dung dipaunsat nasida tusi, mangonai ma tangan ni Jahowa tu isi ni huta i, pola guntur situtu, hona toruna ma isi ni huta i, nang na metmet, nang na magodang, tubu do angka barobuni di nasida.

5:10 Dung i ditongos nasida ma poti ni Debata tu Ekron. Alai dung tolhas poti ni Debata tu Ekron, mangangguhi be ma isi ni Ekron, angka ninna ma: Diboan nasida poti ni Debata ni halak Israel tu hami, asa mambunu hami dohot bangsonami huroha.

5:11 Dung i disuru nasida ma paluhuthon sude raja ni halak Palistim, angka didok nasida ma: Tongos hamu ma poti ni Debata ni Israel mulak tu ingananna hian, asa unang dibunui hami ro di bangsonami; ai masa do gunturguntur hamatean di sandok huta i, tung na dokdok situtu do tangan ni Debata mangonai tusi.

5:12 Jala baoa angka na so mate, hona barobuni do, pola manaek sahat tu langit angguhangguk ni huta i.

1 Samuel 5

5:1 Dung i dibuat halak Palistim ma poti ni Debata, jala diboan sian Ebeneser tu Asdod.

5:2 Asa dibuat halak Palistim ma poti ni Debata, jala diboan do i tu bagasan joro ni Dagon, dipahombar do i tu lambung ni Dagon i.

5:3 Alai dung dipasogot halak Asdod hehe manogotna i, ida ma, nunga tungkap tu tano Dagon i di jolo ni poti ni Jahowa didapot; jadi dibuat nasida ma Dagon i, jala dipasuang ibana tu ingananna hian.

5:4 Alai dung dipasogot nasida muse hehe manogotna i, ida ma, nunga manungkap muse tu tano Dagon i didapot di jolo ni poti ni Jahowa; alai matipul ulu ni Dagon dohot palak ni tanganna duansa, peak di lobulobu, holan badanna dengke na teba sian ibana.

5:5 Dibahen i sitongka do degeon ni angka malim ni Dagon ro di sude angka na masuk tu joro ni Dagon i lobulobu ni joro ni Dagon na di Asdod rasirasa sadarion.

5:6 Alai dokdok do tangan ni Jahowa mandondon tu halak Asdod, jala mangago tu nasida, jala dipatubu barobuni di isi ni Asdod ro di na humaliang huta i.

5:7 Jadi dung diida halak Asdod songon i do hape pangalahona, angka ninna nasida ma: Ndang jadi tinggal di lambungnami on poti ni Debata ni halak Israel, ai posi do tanganna mangonai tu hami dohot tu Dagon, debatanta i.

5:8 Dung i disuru nasida ma paluhuthon sude raja ni halak Palistim tu nasida, angka ninna nasida ma: Beha do bahenonnami taringot tu poti ni Debata ni halak Israel? Jadi ninna angka rajai ma mangalusi: Tu huta Gat ma pinaunsat poti ni Debata ni halak Israel. Jadi dipaunsat nasida ma poti ni Debata ni halak Israel tusi.

5:9 Jadi dung dipaunsat nasida tusi, mangonai ma tangan ni Jahowa tu isi ni huta i, pola guntur situtu, hona toruna ma isi ni huta i, nang na metmet, nang na magodang, tubu do angka barobuni di nasida.

5:10 Dung i ditongos nasida ma poti ni Debata tu Ekron. Alai dung tolhas poti ni Debata tu Ekron, mangangguhi be ma isi ni Ekron, angka ninna ma: Diboan nasida poti ni Debata ni halak Israel tu hami, asa mambunu hami dohot bangsonami huroha.

5:11 Dung i disuru nasida ma paluhuthon sude raja ni halak Palistim, angka didok nasida ma: Tongos hamu ma poti ni Debata ni Israel mulak tu ingananna hian, asa unang dibunui hami ro di bangsonami; ai masa do gunturguntur hamatean di sandok huta i, tung na dokdok situtu do tangan ni Debata mangonai tusi.

5:12 Jala baoa angka na so mate, hona barobuni do, pola manaek sahat tu langit angguhangguk ni huta i.

1 Samuel 6

6:1 Asa pola pitu bulan leleng ni poti ni Jahowa di luat ni halak Palistim.

6:2 Dung i dipaluhut halak Palistim ma angka malim dohot pangarunding, angka ninna ma: Aha do sibaenonnami taringot tu poti ni Jahowa? Sai pabotohon hamu ma tu hami manang aha bahenonnami hamulianna tu ingananna hian.

6:3 Jadi didok angka nasida ma: Molo naeng tongoshononmuna poti ni Debata ni Israel, unang rumar boti tongoshon hamu ingkon paihuthononmuna sada pelean parsalaan tusi. Molo tung malum hilalaonmuna, andar ma botoonmuna manang ala ni aha umbahen so manginsurut tanganna sian hamu.

6:4 Jadi ninna nasida ma: Aha do pelean parsalaan sipaihuthononnami tusi? Dung i didok nasida ma mangalusi: Lima baro sere dohot lima monsi sere, marguru tu bilangan ni raja ni halak Palistim, ai sada do uhumi na mangonai tu nasida sude dohot tu rajanasida i.

6:5 Dibahen i ingkon bahenonmuna do sumansuman ni baromuna dohot sumansuman ni monsimuna, angka na mangago tu tano i, ingkon lehononmuna hamuliaon tu Debata ni Israel; anggiat dipaganggang tanganna sian hamu dohot sian debatamuna dohot sian tanomuna.

6:6 Jala boasa tung tangkanganmuna rohamuna, songon na tinangkangan ni halak Misir dohot Firaun najolo rohanasida i? Nda songon on do, dung ditorui Jahowa nasida, balik do nasida mandokkon bangso i mardalan?

6:7 On pe, hobas i hamu ma mambahen padati na imbaru sada, jala buat hamu dua lombu panusuan, angka na so dung niaugaan, tu lombu i ma pampe hamu padati i, alai olat hamu anakna i sian pudina mulak tu bara.

6:8 Dung i handit hamu ma poti ni Jahowa, jala pajongjong hamu tu padati i; jala sombasomba sere, angka sipaihuthononmuna tusi bahen pelean parsalaan, bahen hamu ma i tu bagasan potipoti di lambungna, jala loas hamu laho manulus dalanna.

6:9 Dung i matahon hamu: Molo dalan parbalohan ni tanona dinangkohi laho tu Betsemes, andar ma Ibana do na mambahen jea godangon tu hita; alai molo ndang, botoonta ma na so tanganna do na mangonai tu hita, hamamasana hian do i tu hita.

6:10 Jadi dibahen angka baoa i ma songon i, dibuat nasida ma dua lombu panusuan, jala dipampe padati i tusi, alai dihurung do anggo anakna i di bara.

6:11 Dung i dipajongjong nasida ma poti ni Jahowa tu padati i ro di potipoti, isian ni angka monsi sere dohot sumansuman ni baronasida.

6:12 Jadi sai ditulus angka lombu i dalan panigoran mangihuthon dalan laho tu Betsemes; sai dalan balobung i ditulus nasida, huhut marumbeumbe, jala ndang manimbil tu siamun manang tu hambirang; sai diiringiring angka raja ni halak Palistim do antong sahat ro di partalpahan ni Betsemes.

6:13 Alai ragat mambuat eme di rura do ianggo isi ni Betsemes, jadi manaili dompak ginjang ma nasida, gabe diida nasida poti i, jala las rohanasida marnidasa.

6:14 Dung i sahat ma padati i tu hauma ni si Josua, isi ni Betsemesi, laos ngongong disi, jala adong disi sada batu na bolon. Dung i ditahai nasida ma parhau ni padati i, jala lombu i dipelehon bahen pelean situtungon tu Jahowa.

6:15 Dung i dipaijur halak Lepi ma poti ni Jahowa dohot potipoti di lambungna, isian ni sombasomba sere i, jala dipeakkon tu batu na bolon i; laos mamelehon angka pelean situtungon dohot sipotongon halak Betsemes sadarina i tu Jahowa.

6:16 Alai dung ditonduri na lima raja ni halak Palistim pangalahona, mulak ma nasida tu Ekron sadarina i.

6:17 Jala on do baro sere, angka na pinaihut ni halak Palistim bahen pelean parsalaan tu Jahowa: Sian Asdod sada, sian Gaza sada, sian Askelon sada, sian Gat sada, sian Ekron sada.

6:18 Angkupni angka monsi sere. Marguru tu bilangan ni saluhut angka huta ni halak Palistim, ginomgom ni raja na lima i, olat ni huta na gonting sahat ro di sosor ni halak parpea; jala batu na bolon i do sitindangi, pangulonan ni poti ni Jahowa rasirasa sadarion, di hauma ni si Josua, isi ni Betsemesi.

6:19 Alai hona toru ma halak Betsemes, ala na tiniliknasida i poti ni Jahowa, jala dibunu sian nasida pitupulu halak sian limapulu ribu halak. Jadi margudompong ma bangso i, ala hataluan bolon na binahen ni Jahowa di tongatonganasida.

6:20 Dung i ninna halak Betsemesi ma: Tung ise ma manahan tindang di jolo ni Jahowa, Debata na badia sisongon i? Jala ise do ulaning topotonna, dung laho sian lambungta?

6:21 Dung i disuru nasida ma suruanna manopot isi ni Kiriat Jearim, angka ninna ma: Nunga mulak poti ni Jahowa ditaruhon halak Palistim; sai tuat ma hamu mangalap tu hamu.

1 Samuel 7

7:1 Dung i ro ma halak isi ni Kiriat Jearim mamboan poti ni Jahowa nangkok tu jabu ni si Abinadab, na di atas robean, jala si Eleasar, anakna i, diuras nasida mangaramoti poti ni Jahowa.

7:2 Dung i olat ni ari pangulonan ni poti i di Kiriat Jearim, nania laonna, arga duapulu taon lelengna. Sai margudompong sandok Israel mangihuthon Jahowa.

7:3 Jadi ro ma hata ni si Samuel tu sandok Israel songon on: Molo tung mulak hamu tu Jahowa sian nasa rohamuna, sai paholang hamu ma angka debata sileban sian tongatongamuna, ro di angka sombaon Astarot, jala marsihohot rohamuna tu Jahowa, jala sasada Ibana oloi hamu, asa dipalua hamu sian tangan ni halak Palistim.

7:4 Jadi dipaholang halak Israel ma angka Baal dohot Astarot, jala sasada Jahowa dioloi nasida.

7:5 Dung i ro muse hata ni si Samuel: Marluhut ma sandok Israel tu Mispa, asa huondihon hamu tu Jahowa.

7:6 Jadi marluhut ma nasida tu Mispa, jala ditahui aek, diusehon muse tu jolo ni Jahowa, jala marpuasa nasida sadarina i, angka ninna huhut disi: Nunga mardosa hami dompak Jahowa. Asa si Samuel do manguhum halak Israel di Mispa.

7:7 Alai dung dibege halak Palistim naung marluhut halak Israel di Mispa, nangkok ma angka raja ni halak Palistim dompak Israel. Jadi dung dibege halak Israel barita i, mabiar ma nasida maradophon halak Palistim.

7:8 Jadi ninna halak Israel ma tu si Samuel: Unang ma ho mansohot joujou tu Jahowa Debatanta, mangondihon hami, asa dipalua hami sian tangan ni halak Palistim.

7:9 Jadi dibuat si Samuel ma anak ni birubiru sada onsop manusu, jala hibul dipelehon tu Jahowa bahen pelean situtungon, huhut joujou si Samuel tu Jahowa mangondihon Israel, gabe dialusi Jahowa ibana.

7:10 Dung i uju mamelehon pelean situtungon i si Samuel, marrongoman ma ro halak Palistim laho marmusu dompak Israel; alai mangkuling ma ronggur mansai gogo sadarina i dibahen Jahowa mangalo halak Palistim, gabe guntur nasida, laos talu maradophon Israel.

7:11 Jadi ruar ma angka baoa ni Israel sian Mispa, jala dilele halak Palistim, jala ditaluhon nasida sahat ro di toruan ni Betkar.

7:12 Dung i dibuat si Samuel ma sada batu, jala dipatindang di holangkolang ni Mispa dohot Sen jala dibahen goarna: Ebeneser, jala ninna do: Rasirasa nuaeng diurupi Jahowa do hita.

7:13 Jadi tarjepol ma halak Palistim, jala ndang be ro nasida tu partalpahan ni Israel, jala sai dialo tangan ni Jahowa do halak Palistim saleleng mangolu si Samuel.

7:14 Jadi mulak ma tu Israel huta, angka na nilahang ni halak Palistim sian Israel, olat ni Ekron sahat ro di Gat, nang angka luat humaliang i dirampas Israel sian tangan ni halak Palistim, gabe mardemak ma Israel tu halak Amori.

7:15 Jadi si Samuel manguhum Israel saleleng mangolu ibana.

7:16 Jala ganup taon do ibana marliat sahat ro di Betel, boti tu Gilgal, boti tu Mispa, asa diuhumi Israel di angka huta i.

7:17 Dung i mulak ibana muse tu Rama; ai disi do jabuna, jala disi do diuhumi Israel, jala dipauli disi sada langgatan di Jahowa.

1 Samuel 8

8:1 Alai dung sarimatua si Samuel, dipabangkit ma anakna na dua i, bahen panguhum di Israel.

8:2 Ia goar ni anak buhabajuna, i ma si Joel, goar ni na paduahon i i ma si Abia, rap panguhum nasida di Berseba.

8:3 Alai ndang diihutihut anakna i dalan ni amana, impolan di perak do nasida, jala manjalo sisip nasida papeol uhum.

8:4 Alani marluhut ma saluhut angka sintua ni Israel manopot si Samuel tu Rama.

8:5 Angka ninna nasida ma tu ibana: Ida ma, nunga sarimatua anggo ho, jala angka anakmu ndang diihutihut nasida angka dalanmu, on pe pampe ma di hami sada raja, asa ibana manguhum hami, suang songon saluhut bangso parbegu.

8:6 Alai sogo ni roha ni si Samuel do hata, na nidoknasida i: Sai lehon di hami raja sada, asa ibana manguhum hami. Jadi martangiang ma si Samuel tu Jahowa.

8:7 Dung i ninna Jahowa ma tu si Samuel: Tangihon ma suara ni bangso i di saluhut na nidoknasida i tu ho, ai ndada ho, Ahu do na binolonghonnasida disi, asa unang be Ahu rajanasida.

8:8 Suman tu saluhut pambahenan, angka na binahennasida olat ni ari uju Ahu manogihon nasida ruar sian Misir rasirasa sadarion, sai ditadingkon nasida Ahu, asa mangoloi angka debata sileban, suang songon i dibahen nasida nang tu ho.

8:9 On pe, tangihon ma suaranasida i, asal tangkas dihatindangkon jala dipasingothon ho tu nasida uhum ni raja na gumomgom nasida sogot.

8:10 Dung i dipatolhas si Samuel ma sude hata ni Jahowa tu bangso i, angka na mangido raja sian ibana.

8:11 Jala didok ma: On do uhum siingoton tu raja na gumomgom hamu sogot; buatonna do angka anakmuna jala bahenonna mangiringiring huretana dohot hodana, asa marlojong nasida di jolo ni huretana.

8:12 Jala bahenonna nasida gabe induk ni marsasaribu, jala induk ni marlimalimapulu; huhut mambahen saro maninggala haumana, jala manggotil sigotilonna, mamandei dohot angka parhohas tu hamusuonna dohot parhohas ni huretana.

8:13 Buatonna dohot borumuna bahen pande pangir, jala bahen angka pangalompa dohot pande roti.

8:14 Buatonna dohot haumamuna dohot porlak anggurmuna dohot hau jetunmuna, angka na dumenggan i, jala lehononna tu angka naposona.

8:15 Buatonna do saparsampulu sian parbue ni na niulamuna sian hauma dohot sian porlak anggur, jala lehononna tu angka panuturina dohot tu angka naposona.

8:16 Buatonna huhut angka naposomuna baoa dohot parompuan, ro di lombu dohot halodemuna, angka na dumenggan i, asa pangkeonna tu ulaonna.

8:17 Buatonna saparsampulu nang sian birubirumuna, jala ingkon gabe naposona hamu.

8:18 Dung i di laonlaon ni ari mangangguhi ma hamu ala ni rajamuna, na pinillitmuna i di hamu, alai ndang alusan ni Jahowa hamu di ari na sasada i.

8:19 Hape manjua do bangso i tumangihon suara ni si Samuel, angka ninna nasida ma: Agia songon i, ingkon adong raja di hami.

8:20 Asa dos hami songon saluhut bangso parbegu, asa rajanta i manguhum hita, jala manguluhon hita laho marmusu.

8:21 Jadi dung dibege si Samuel luhut hata ni bangso i, dialualuhon ma i tu pinggol ni Jahowa.

8:22 Dung i ninna Jahowa ma tu si Samuel: Tangihon ma suaranasida i, jala pabangkit di nasida raja sada. Jadi ninna si Samuel ma tu angka baoa ni Israel: Muli ma hamu ganup tu hutana be.

1 Samuel 9

9:1 Dung i adong ma sada halak sian marga Benjamin, na margoar si Kis, anak ni si Abiel, anak ni si Zeror, anak ni si Behorat, anak ni si Apia, anak ni sada halak Benjamin, parsinamot na godang.

9:2 Adong di ibana anak sada, na margoar si Saul, dolidoli na uliutus do ibana, ndang adong baoa na ummuli sian sandok halak Israel; olat ni abarana tu ginjang hasurunganna sian sandok bangso i.

9:3 Dung i mago ma halode boruboru ni si Kis, ama ni si Saul. Jadi didok si Kis ma tu si Saul, anakna i: Ua arahon ma sada sian angka naposo bahen donganmu, dung i borhat ma ho laho mangalului angka halode boruboru i.

9:4 Jadi diliati ibana ma tor Epraim, boti luat Salisa, hape ndang jumpangsa; diliati nasida muse luat Saalim, hape ndang disi; dibolus nasida muse luat Benjamin, hape ndang jumpangsa.

9:5 Alai dung sahat nasida tu luat Sup, gabe didok si Saul ma tu naposona, donganna i: Beta hita mulak, atek beha naung malua roha ni damang sian angka halode i, humolsohon hita gumodang.

9:6 Jadi ninna naposona i ma mangalusi ibana; ida ma, adong do halak ni Debata sada di huta on, jala na marmulia do baoa i, sai na sintong do songgop manang aha na nidokna; ua ibana ma antong itatopot, anggiat paboaonna tu hita dalan sidalananta.

9:7 Dung i ninna si Saul ma tu naposona i: Ida ma, tung sura laho hita, tung aha ma boanonta tu baoa i? Ai nunga suda ianggo sagusagu sian isianna, jala so adong silua tau boanon tu halak ni Debata; tung aha ma adong di hita?

9:8 Dung i ro muse ma alus ni naposo i tu si Saul songon on: Ida ma, jumpang do di bagasan tanganku saparopat Sekel perak, i ma hulehon tu halak ni Debata, asa dipaboa tu hita dalan sidalananta.

9:9 (Ianggo di na robi somal do di halak Israel, jumpa lahomanang ise manungkun Debata mandok songon on: Beta hita laho tumopot partondung; ai partondung do digoar di na robi panurirang nuaeng.)

9:10 Dung i ninna si Saul ma tu naposona: Denggan do hatami, beta hita mardalan! Jadi laho ma nasida tu huta, inganan ni halak ni Debata.

9:11 Tole nangkok nasida di nangkohan laho tu huta, jumpang nasida ma boruboru partuaek, angka na ruar manahui aek, gabe didok ma manungkun nasida: Atehe, dison do partondung i?

9:12 Jadi ninna nasida ma mangalusi: Dison do, ida ma, indi an di jolomi do ibana; haru siluhon ma, apala sadarion ibana ro tu huta, ala pasahathon pelean situan natorop i sadarion di robean.

9:13 Ia dung tolhas hamu tu huta i, jumpang hamu ma ibana tagan so dinangkohi dope robean i laho mangan, ai ndang tagamon mangan situan natorop i, nda jolo ro ibana; ai ibana do mamasumasu pelean i, dung i pe asa mangan angka na pinio i. On pe, nangkok ma hamu, ai apala sadarion jumpang hamu ibana.

9:14 Jadi dung nangkok nasida sahat tu tongatonga ni huta i, ida ma, ruar ma si Samuel manjumpangkon nasida laho nangkok tu robean i.

9:15 Alai nunga dipalumba Jahowa hian tu pinggol ni si Samuel, jumolo sadari sian haroro ni si Saul, didok hian do:

9:16 Marsogot songon on suruhononku tu ho sada halak sian tano Benjamin, asa miahanmu ibana bahen partogi ni bangsongku Israel, asa ibana paluahon bangsongku sian tangan ni halak Palistim, ai nunga ditatap rohangku bangsongki, ala naung sahat tu Ahu angguhanggukna.

9:17 Jadi dung dibereng si Samuel si Saul i, ro ma hata ni Jahowa tu ibana: Ida ma, i ma baoa i na hupaboa i tu ho, ingkon gomgomanna bangsongki.

9:18 Dung i didapothon si Saul ma si Samuel di tongatonga ni harbangan i, ninna ma: Ua paboa di ahu, manang didia bagas ni partondung i?

9:19 Jadi ro ma alus ni si Samuel mandok tu si Saul: Ahu do partondung i, pajolo ma nangkok tu robean i, asa hamu donganku mangan sadarion, marsogot pe paborhatonku ho, jala luhut na di bagasan roham, hupaboa pe tu ho.

9:20 Anggo taringot tu halode, angka na mago i nunga pola tolu ari, unang pola holsoan roham taringot tusi, ai nunga jumpang; jala ise do nampuna sandok sipangidoon ni Israel? Nda ho do nampunasa ro di sandok pinompar ni amam?

9:21 Dung i ninna si Saul ma mangalusi: Nda pinompar ni si Benjamin do ahu, sian marga na ummetmet di Israel, jala ahu do na ummetmet sian sandok Benjamin marompuompu? Boasa tung songon i dohononmu tu ahu?

9:22 Dung i diarahon si Samuel ma si Saul i rap dohot naposona manogihon nasida tu bilut panganan, jala nasida dibahen tu juluan sian angka na tarpioi, arga tolupulu halak toropnasida.

9:23 Dung i ninna si Samuel ma tu pande sipanganon: Nia tuson todoan na hupasahat i tu ho, pola hudok tu ho papulihonmu do i.

9:24 Dung i diboan pande sipanganon i ma hae bona dohot na lohot tusi, jala dipeakkon tu jolo ni si Saul, huhut didok si Samuel: Ida ma, na pinapulik do i bahen tu jolom, antong pangan ma! Ai nunga sinimpan hian di ho tu ari raja on, laho manggokkon situan natorop i ahu. Jadi mangan ma si Saul rap dohot si Samuel sadarina i.

9:25 Jadi dung tuat nasida sian robean i laho tu huta, mangkatai ma si Samuel dohot si Saul di atas tarup.

9:26 Dung i dipasogot nasida ma hehe manogotna i; alai dung manaek sibalik hunik, joujou ma si Samuel di si Saul tu atas tarup, ninna ma: Borhat ma ho, asa hupataru ho. Jadi borhat ma si Saul, rap ruar ma nasida duansa tu balian, ibana dohot si Samuel.

9:27 Jadi dung tuat nasida sahat tu ujung ni huta i, ninna si Samuel ma tu si Saul: Dokkon ma naposo i pajolohon, gabe dipajolo ma; alai ngongong ma ianggo ho dison, asa hupatubegehon tu ho hata ni Debata.

1 Samuel 10

10:1 Dung i dibuat si Samuel ma guriguri sada marisi miak, jala diusehon tu ulu ni si Saul, laos diumma ibana huhut didok: Nda naung miniahan ni Jahowa do ho bahen partogi ni bangso naung niainna i?

10:2 Molo dung tundal ho annon sian lambungkon, jumpang ho ma dua baoa mardonokkon tanoman ni si Rahel, marbalokkon tano Benjamin di Selsa, dohononna ma tu ho: Nunga jumpang halode boruboru angka na niluluanmu; jala ida ma, nunga malua ianggo angka halode i sian roha ni amanta, balik taringot tu hamu holsoan ibana: Aha na ma bahenonku taringot tu anakku, ninna?

10:3 Molo dung mamedu ho sian i manulus dalanmu sahat ro di hariara Tabor, jumpang ho ma disi tolu halak, angka na nangkok manopot Debata tu Betel, na sada mangusung tolu anak ni hambing, na sada mamboan tolu kibung roti, na sada mamboan guriguri marisi anggur.

10:4 Jadi usousoannasida ma sonangmu, jala lehononna tu ho dua roti, sijaloonmu ma i sian tangannasida.

10:5 Dung i sahat ma ho tu dolok ni Debata, parsaroan ni halak Palistim, jadi ia dung sahat ho tubagasan huta i, pajumpang ma ho dohot sada horon panurirang, angka na tuat sian robean i, di jolonasida do arbab, sarune, tulila dohot hasapi, angka manurirangi be nasida.

10:6 Jadi songgopan ni Tondi ni Jahowa ma ho, gabe manurirangi ho rap dohot nasida, jadi muba ma ho gabe jolma na asing.

10:7 Jadi ia dung masa angka tandai tu ho, bahen ma guru roham na jumpang tanganmu, ai donganan ni Jahowa do ho.

10:8 Dung i tuat ma ho tu Gilgal pajolohon, jala ida ma, tuat pe ahu mandapothon ho laho mamelehon angka pelean situtungon dohot angka pelean hamauliateon; ingkon pitu ari lelengna paimaonmu ahu ro mandapothon ho, asa hupabotohon tu ho sibahenonmu.

10:9 Jadi dung tundal ibana laho sian lambung ni si Samuel, gabe dipauba Debata ma rohana, songgop ma dohot sude angka tandai sadarina i.

10:10 Ai dung sahat nasida tu dolok Gibea, ida ma, sahoron panurirang manjumpangkon ibana, gabe songgop ma Tondi ni Debata tu ibana, laos manurirangi ibana di tongatonganasida.

10:11 Alai dung diida saluhut angka na tumanda ibana na sai laon, ibana manurirangi hape rap dohot angka panurirang, gabe ninna be ma tu donganna: Aha do na masa tu anak ni si Kis? Dohot do si Saul hape di tongatonga ni angka panurirang?

10:12 Jadi ro ma alus ni na sahalak sian i mandok: Ise do ulaning amanasida? Alani manjadi gabe umpama: Dohot do si Saul hape di tongatonga ni angka panurirang?

10:13 Dung mansohot ibana manurirangi tolhas ma ibana tu robean i.

10:14 Dung i ninna tulang ni si Saul ma tu ibana dohot tu naposona: Tudia hamu laho huroha? Gabe didok ibana ma: Mangalului angka halode boruboru nian; jadi dung huida hami ndang disi, gabe laho hami manopot si Samuel.

10:15 Dung i ninna tulang ni si Saul ma: Ue paboa di ahu manang aha na nidok ni si Samuel tu hamu.

10:16 Jadi ninna si Saul ma tu tulangna i: Tangkas do dipaboa tu hami naung jumpang angka halode i. Alai anggo hata harajaon i, na nidok ni si Samuel, ndang dipaboa tu ibana.

10:17 Dung i dipaluhut si Samuel bangso i tumopot Jahowa tu Mispa.

10:18 Jadi ninna ma tu halak Israel: Boti hata ni Jahowa, Debata ni Israel: Ahu do manogihon Israel ruar sian Misir, jala hupalua hamu sian tangan ni halak Misir, sian tangan ni saluhut harajaon angka na mangarupa hamu.

10:19 Alai nunga ditoishon hamu sadarion Debatamuna, na paluahon hamu sian saluhut jeamuna dohot sian hagogotanmuna, hape didok hamu do tu Ibana: Ingkon pabangkitonmu di hami sada raja. Dibahen i tindang ma hamu di jolo ni Jahowa marmargamarga, jala marsaribusaribu.

10:20 Dung i didokkon si Samuel ma jumonok saluhut marga ni Israel, gabe hona ma marga Benjamin.

10:21 Dung i didokkon muse jumonok marga Benjamin marsuhusuhu, gabe hona suhu Matris, hona muse si Saul, anak ni si Kis. Jadi dilului nasida ma ibana, hape ndang jumpangsa.

10:22 Jadi diulahi nasida ma manungkunhon tu Jahowa: Ndang dope ro baoa i tuson? Jadi ninna Jahowa ma: Ida ma, na martabuni do ibana tu parugasanan.

10:23 Jadi marlojong ma nasida mangalap ibana sian i. Jadi dung tindang ibana di tongatonga ni bangso i, gabe gumanjang ibana sian sandok bangso i, olat ni abarana tu ginjang.

10:24 Dung i ninna si Samuel ma tu sandok bangso i: Ida hamu ma na pinillit ni Jahowa, ai tudoshon ibana ndang adong di sandok bangso i. Jadi marsurak ma sandok bangso i, angka ninna nasida ma: Sai mangolu ma rajai!

10:25 Dung i dipaboa si Samuel ma tu bangso i uhum harajaon, laos disurathon tubagasan sada buku, jala dipeakkon tu jolo ni Jahowa Dung i dipamuli si Samuel ma sandok bangso i, ganup tu jabuna be.

10:26 Laho do dohot si Saul tu jabuna di Gibea, dipataru parangan angka na sinunggul ni Debata rohanasida.

10:27 Alai adong do huhut angka halak na jahat, angka na mandok: Tung aha ma hangoluan turgas on ni baoa on, gabe marhu ni roha nasida mida ibana, laos so diboan silua tu ibana; alai dipaula so dibege si Saul do hata i.

1 Samuel 11

11:1 Dung i nangkok ma si Nahas, marga Amon, jala marungkum dompak Jabes di Gilead; jadi ninna sude baoa ni Jabes ma tu si Nahas: Bahen ma parjanjian tu hami, asa huoloi hami rodim.

11:2 Jadi ninna si Nahas, marga Amoni ma tu nasida: Olo pe ahu marjanji tu hamu, molo dung hupulsikkon mata siamun ni saluhut hamu dohot mambahen haurahon tu sandok Israel.

11:3 Dung i ninna angka sintua ni Jabes ma tu ibana: Loas ma hami marpingkir pitu borngin on, asa marsuru angka suruan hami tu sandok partalpahan ni Israel; molo tung laos soadong na palua hami, ruar pe hami mandapothon ho.

11:4 Dung i sahat ma angka suruani tu Gibea-Saul, jala dihatahon angka hata i tu pinggol ni situan natorop i. Jadi dipangiar nasida suarana be tumatangis.

11:5 Dung i ida ma, ro do tongon si Saul mangadu lombu sian ladang, gabe didok si Saul ma: Aha do huroha na masa di bangso i umbahen tumatangis nasida? Jadi dipajojor nasida ma tu ibana hatahata ni halak Jabes i.

11:6 Jadi dung dibege si Saul angka hata i, songgop ma Tondi ni Debata tu ibana, marsigorgor situtu ma rimasna.

11:7 Dung i dibuat ma sapasang lombu, laos ditanggoi, jala dipantongoshon tu sandok partalpahan ni Israel, binoan ni angka suruan laho maningtingkon: Manang ise na so borhat mangihuthon si Saul dohot si Samuel, songon i do bahenon tu lombuna. Jadi madabu hatahuton sian Jahowa tu bangso i, borhat be ma nasida, hira sahalak sambing.

11:8 Dung i dibilang ma nasida di Besek, jadi tolu ratus ribu ma torop ni halak Israel, jala tolupulu ribu ia halak Juda.

11:9 Dung i didok angka nasida ma tu suruan, angka na ro i: Boti ma dohononmuna tu halak Jabes di Gilead: Ingkon marsogot dapotan pangurupion hamu apala di parngiar ni mata ni ari. Jadi dung ro angka suruani, jala dibaritahon barita i tu angka baoa sian Jabes, las ma rohanasida.

11:10 Dung i ninna angka baoa sian Jabes ma: Marsogot ma hami ruar mandapothon hamu, asa bahenonmuna tu hami sandok guru lomo ni rohamuna.

11:11 Tole marsogotna i diaturhon si Saul ma bangso i bahen tolu parduaan, gabe disola nasida ma tongatonga ni parsaroan i, tongon uju di gansi marhira torang ari, gabe tunduk ma halak Amon ro di parngiar ni ari; marserak ma ianggo angka na teba i, ndang tading nanggo dua halak sauduran.

11:12 Dung i ninna situan natorop i ma tu si Samuel: Ise do angka na mandok: Tung si Saul ma mangarajai hita? Lehon tuson angka baoa i, asa hubunu hami nasida.

11:13 Alai ninna si Saul ma: Ndang jadi bunuon manang ise sadarion, ai apala sadarion mambahen pangurupion Jahowa di Israel.

11:14 Dung i ninna si Samuel ma tu bangso i: Beta hita laho tu Gilgal, asa itaparata disi harajaon i.

11:15 Jadi laho ma sandok situan natorop i tu Gilgal pabangkithon si Saul disi gabe raja di jolo ni Jahowa di Gilgal, jala dipelehon disi angka pelean hamauliateon di jolo ni Jahowa. Jadi marlas ni roha situtu ma disi si Saul dohot saluhut baoa ni Israel.

1 Samuel 12

12:1 Dung i ninna si Samuel ma tu sandok Israel: Ida ma, nunga hutangihon soaramuna taringot tu saluhut na pinaboamuna tu ahu, jala nunga hupabangkit sada raja di hamu.

12:2 On pe, ida ma, rajai ma manguluhon hamu; nunga sarimatua ianggo ahu jala ubanon, ia angka anakku, ida ma, di tongatongamuna do nasida, jala ahu manguluhon hamu sian sidakdanakonku rasirasa sadarion.

12:3 Ida ma, dison do ahu, maralus ma hamu dompak ahu di adopan ni Jahowa dohot di adopan ni raja naung miniahanna: Tung dung ma hubuat lombu ni manang ise, manang halodena, tung dung ma hurupa manang ise, manang hubahen gogo tu manang ise, manang manjalo sisip ahu sian tangan ni manang ise, tung hupapitpit matangku mida ibana? Asa hupasuang nuaeng tu hamu.

12:4 Dung i ninna nasida ma: Ndang dung mambahen gogo ho tu hami, jala ndang dung dirupa ho hami, jala ndang dung manjalo agia aha ho sian tangan ni manang ise.

12:5 Jadi ninna si Samuel ma tu nasida: Ingkon Jahowa ma sitindangi dompak hamu sadarion, sitindangi dohot raja naung miniahanna, paboa na soadong jumpang hamu agia aha di bagasan tanganku! Sitindangi ma tutu, ninna bangso i.

12:6 Dung i ninna si Samuel ma tu bangso i: Jahowa tongon naung pabangkit si Musa dohot si Aron, jala naung manogihon ompumuna ruar sian tano Misir.

12:7 Antong pajonok hamu ma jongjong tuson, asa hupasingot hamu di jolo di Jahowa taringot tu saluhut denggan basa ni Jahowa angka na binahenna tu hamu dohot tu ompumuna i.

12:8 Dung sahat si Jakkob tu Misir, mangangguhi ma angka ompumuna tu Jahowa, gabe disuru Jahowa ma si Musa dohot si Aron, asa ditogihon nasida ompumuna i ruar sian Misir, jala dipahundul nasida di inganan on.

12:9 Alai dung dihalupahon nasida Jahowa, Debatanasida i, gabe dipasahat Ibana nasida tu tangan ni si Sisera, partogi ni parangan di Hazor, dohot tu tangan ni halak Palistim, dohot tu tangan ni raja sian Moab, angka na marmusu dompak nasida.

12:10 Jadi mangangguhi ma nasida tu Jahowa, angka ninna do: Nunga mardosa hami, tung hutadingkon hami Jahowa, jala huoloi hami angka Baal dohot Astarot; on pe sai palua ma hami sian tangan ni musunami, asa huoloi hami Ho.

12:11 Jadi disuru Jahowa ma si Jerubbaal dohot si Bedan dohot si Jepta dohot si Samuel, asa dipalua hamu sian tangan ni musumuna i humaliang, asa sonang hamu maringan.

12:12 Alai dung diida hamu si Nahas, raja ni halak Amon ro mangalo hamu, gabe didok hamu tu ahu: Ndada ho, ingkon adong raja sada mangarajai hami, hape Jahowa, Debatamuna do nian Rajamuna i.

12:13 On pe, ida ma, indi raja na pinillitmuna i, na pinangidomuna i, jala ida ma, nunga dilehon Jahowa raja sada tu hamu.

12:14 Molo dihabiari hamu Jahowa, jala dioloi hamu Ibana, jala ditangihon hamu soarana, jala ndang dialo hamu hata ni Jahowa, jala rap nang hamu, nang raja na mangarajai hamu mangihuthon tu Jahowa Debatamuna i, jadi dongananna ma hamu.

12:15 Alai molo so ditangihon hamu soara ni Jahowa, jala dipaaloalo hamu hata ni Jahowa, jadi tangan ni Jahowa ma mangalo hamu, songon naung nialona angka ompumuna i.

12:16 Antong pajonok hamu ma jongjong tuson, jala ida hamu ma hata na balga on, sibahenon ni Jahowa di adopanmuna.

12:17 Nda masa do nuaeng gotilon eme? Joujou ma ahu annon tu Jahowa gabe paroonna ma ronggur dohot udan, asa tung ditanda jala diida hamu godang ni hajahatonmuna, naung binahenmuna di adopan ni Jahowa, laho mangido raja sada di hamu.

12:18 Jadi joujou ma si Samuel tu Jahowa, gabe diparo Jahowa ma ronggur dohot udan sadarina i. Jadi mabiar situtu ma sandok bangso i mida Jahowa dohot mida si Samuel.

12:19 Dung i ninna sandok bangso i ma tu si Samuel: Sai tangiangkon ma angka naposomon tu Jahowa Debatam, asa unang mate hami, ai hutambai hami do tu saluhut dosanami na sai laon hajahaton on na mangido di hami sada raja.

12:20 Jadi ninna si Samuel ma tu bangso i: Unang hamu mabiar! Nunga tutu dibahen hamu saluhut hajahaton on, asal unang manimbil hamu sian Jahowa, sai oloi hamu ma Jahowa sian nasa rohamuna.

12:21 Jala unang manimbil hamu mangihuthon tu na so marguna, na so tarbahen mangurupi manang paluahon hamu, ai tung na so marguna do angka ajiajian.

12:22 Ai ndang tagamon tadingkonon ni Jahowa bangsona ala ni Goarna na timbul i, dung sapala dihalomohon Jahowa mambahen hamu gabe bangsona.

12:23 Ahu pe antong, dao ma i sian ahu, tung mardosa dompak Jahowa, tung mansohot tumangiangkon hamu, sai podahononku do tu hamu dalan na denggan dohot na tigor i.

12:24 Asal dihabiari hamu Jahowa, jala dioloi hamu Ibana di bagasan hasintongan sian nasa rohamuna; ai ida hamu ma godangna i naung binahenna tu hamu.

12:25 Alai molo didatdati hamu mambahen na jat, rendep ma nang hamu, nang rajamuna i bahenonna.

1 Samuel 13

13:1 Dung salpu sataon hinarajahon ni si Saul, tole paduataonhon mangarajai Israel.

13:2 Jadi dipillit si Saul ma di ibana tolu ribu halak sian Israel; dua ribu sian i dongan ni si Saul di Mikhmas dohot di dolok Betel, jala saribu dongan ni si Jonatan di Gibea-Benjamin, dipamuli do ianggo bangso na lobi i ganup tu undungundungna be.

13:3 Dung i ditaluhon si Jonatan ma parangan ni halak Palistim, angka na marsaro di Geba, tarbortik ma barita i tu halak Palistim. Alai lam didokkon si Saul ma mamalu sarune di sandok tano i maningtinghon: Ingkon begeon ni halak Heber ma i.

13:4 Jadi sandok Israel umbege barita i: Nunga ditaluhon si Saul parangan ni halak Palistim, nunga ngorngor huhut roha ni halak Palistim mida Israel. Jadi dipaluhut si Saul ma bangso i tu Gilgal.

13:5 Marpungu ma dohot halak Palistim laho marmusu dompak Israel: Tolupulu ribu hureta, jala onom ribu parsihundul, jala situan natorop i tudoshon horsik na di topi ni laut hinadeakna; nangkok ma nasida jala marsaro di Mikhmas, tondong ni Bethapen.

13:6 Jadi dung diida halak Israel naung hagogotan nasida, ai godoron do situan natorop i, gabe martabuni ma bangso i di angka liang, dohot di ramba, dohot di dolok batu, dohot di godunggodung dohot di angka bondar.

13:7 Taripar do huhut halak Heber tu bariba ni Jordan, tu luat Gad dohot Gilead; alai tading di Gilgal dope ianggo si Saul, jala sandok situan natorop i godoron be do mangihuthon ibana.

13:8 Jadi dung pitu borngin lelengna ibana paimaimahon janji na binahen ni si Samuel, hape matua so ro si Samuel tu Gilgal, mampar ma situan natorop i sian lambungna.

13:9 Dung i ninna si Saul ma: Boan tu ahu pelean situtungon dohot angka pelean hamauliateon; gabe dipelehon ibana ma pelean situtungon i.

13:10 Jadi dung tolhas dipelehon pelean situtungon i, ida ma, ro ma tongon si Samuel, gabe ruar ma si Saul manjumpangkon ibana, mandok tabena.

13:11 Dung i ninna si Samuel ma: Aha do na binahenmu? Jadi ninna si Saul ma: Dung huida mampar bangso i sian lambungku, jala ndang ro ho di tingkina i, tole halak Palistim marpungu di Mikhmas.

13:12 Jadi ninna rohangku ma: Tuat ma annon halak Palistim mandapothon ahu tu Gilgal, laos so martangiang dope ahu di adopan ni Jahowa, jadi hupahum rohangku, laos hupelehon pelean situtungon i.

13:13 Dung i ninna si Samuel ma tu si Saul: Na oto do pambahenmi, ndang diradoti ho tona ni Jahowa Debatam, na tinonahonna tu ho; ai nuaeng nian naeng pahoton ni Jahowa harajaonmi gumomgom Israel ro di salelenglelengna.

13:14 Alai anggo nuaeng ndang hot harajaonmi; nunga pola dilului Jahowa sada halak bangunan ni rohana, naung tinonahon ni Jahowa bahen partogi ni bangsona, ai ndang diradoti ho, na tinonahon ni Jahowa tu ho.

13:15 Dung i hehe ma si Samuel, laos nangkok sian Gilgal tu Gibea-Benjamin; alai anggo si Saul umbilang situan natorop i, angka na jumpang di lambungna, arga onom ratus halak toropna.

13:16 Ianggo si Saul dohot si Jonatan, anakna i ro di situan natorop, angka na di lambungnasida i, maringan do di Gibea-Benjamin, alai marsaro di Mikhmas do anggo halak Palistim.

13:17 Dung i borhat ma parbajo sian parsaroan ni halak Palistim tolu panggungan; panggungan na sada mamedu dompak dalan laho tu Opra, tu luat Saul;

13:18 Panggungan na sada mamedu dompak dalan laho tu Bethoron; panggungan na sada muse mamedu dompak dalan partalpahan, tondong ni rura Zeboim, tungkan halongonan.

13:19 Alai ndang adong jumpang nanggo sada tungkang bosi di sandok tano Israel, ai ninna roha ni halak Palistim do, sai unang ma sanga halak Heber mambahen podang manang mundimundi.

13:20 Dibahen i ingkon tuat sandok Israel manopot halak Palistim laho patiptiphon gigi ni ninggalana be manang gupakna, manang tangkena, manang sasapna.

13:21 Jadi ndang bolut be baba ni gigi ni ninggala, sasap, gupak dohot tangke, nang patigor turatura tu horbo.

13:22 Ia dung tole ari tongtangan i, ndang adong jumpang podang manang hujur di tangan ni sandok halak situan natorop, dongan ni si Saul dohot si Jonatan; alai anggo di si Saul dohot di si Jonatan, anakna i, adong do jumpang.

13:23 Dung i borhat ma sada panggungan ni halak Palistim laho tu jaringjing Mikhmas.

1 Samuel 14

14:1 Dung i di na sadari i, ninna si Jonatan, anak ni si Saul, ma tu naposo siusung angka sinjatana: Beta hita taripar tu parsaroan ni halak Palistim na di bariba i; alai ndang dipaboa anggo tu amana.

14:2 Marsaro do ia si Saul i di ujung ni Gibea, di toru ni hau dalimo na di Migron, jala arga onom ratus halak donganna.

14:3 Ia si Ahia, anak ni si Ahitub, haha ni si Ikabod, anak ni si Pinehas, tubu ni si Eli, malim ni Jahowa di Silo, marpangkean epod; situan natorop i pe ndang parbinoto naung laho si Jonatan.

14:4 Alai diholangkolang ni jarungjung, hatariparan ni si Jonatan, naeng laho taripar tu parsaroan ni halak Palistim, adong do disi dua dolok batu paiparipar be, goar ni na sada Bozez, goar ni na sadanari Sene.

14:5 Ia dolok batu na sada bahen tiang tungkan utara, tondong ni Mikhmas, jala na sadanari tungkan dangsina, tondong ni Geba.

14:6 Jadi ninna si Jonatan ma tu naposo siusung sinjatana: Beta hita taripar tu parsaroan ni halak na marhulup i, anggiat ditolongi Jahowa hita; ai ndang maol anggo di Jahowa manumpak marhite sian na torop, manang sian na otik.

14:7 Jadi ninna siusung sinjatana ma tu ibana: Bahen ma guru lomo ni roham! Ida ma, sai donganmu do ahu, manang dompak dia lomo ni roham.

14:8 Dung i ninna si Jonatan ma: Ida ma, taripar ma hita tu halahan, paandarhon hita tu nasida.

14:9 Molo tung songon on dohononnasida tu hita; paima hamu ma hami disi, jadi ngongong ma hita di hajongjonganta on, jala unang nangkok hita mandapothon nasida.

14:10 Alai molo tung didok nasida songon on: Sai nangkok ma hamu mandapothon hami, nangkok ma hita tutu, ia nunga sahat nasida tu tanganta dilehon Jahowa, i ma gabe partinandaan di hita.

14:11 Jadi dung mullop nasida na dua tu parsaroan ni halak Palistim, gabe didok halak Palistim ma: Ida ma, nunga rungkar halak Heber sian angka liang partabuniannasida na sai laon.

14:12 Dung i joujou ma angka baoa di parsaroan i tu si Jonatan dohot tu siusung sinjatana, angka ninna ma: Nangkok ma hamu mandapothon hami, asa tung hupabotohon hami hata i tu hamu! Jadi ninna si Jonatan ma tu siusung sinjatana: Ihuthon ma ahu nangkok, ai nunga dilehon Jahowa nasida tu tangan ni Israel.

14:13 Jadi diparsinggorikkon si Jonatan ma tanganna dohot patna tu ginjang, jala diihuthon siusung sinjatana ibana; jadi marragean ma musu i di jolo ni si Jonatan, jala siusung sinjatana mambunu i sian pudina.

14:14 Jadi di na tongtang parjolo si Jonatan, dohot siusung sinjatana, mate musu i arga duapulu halak, hirahira satonga parmasan boni tano hamateannai.

14:15 Jadi masa ma hagodoron di parsaroan, di ladang dohot di sandok situan natorop i, tole isi ni benteng i dohot parbajo rap godoron nasida, angka hitir be do isi ni tano i, laos gabe hagodoron sian Debata do i.

14:16 Dung i manatapnatap ma angka parjaga dongan ni si Saul di Gibea-Benjamin, gabe diida ma, pasimpar pasebut do angka na guntur i.

14:17 Dung i ninna si Saul ma tu situan natorop, angka na rap dohot ibana: Ua bilangi jala patangkas hamu, manang ise hita on na laho; jadi dibilangi nasida, gabe ida ma, ndang disi si Jonatan dohot siusung sinjatana i.

14:18 Dung i ninna si Saul ma tu si Ahia: Boan tuson poti ni Debata, ai di tongatonga ni halak Israel do uju i poti ni Debata.

14:19 Jadi uju mangkatai dope si Saul dohot malim i, lam tu gandana ma hagunturon di parsaroan ni halak Palistim. Dung i ninna si Saul ma tu malim i: Patait ma tanganmu!

14:20 Dung i martoletole ma si Saul dohot sandok bangso donganna i, gabe sahat ma nasida tu tongtangan; hape ida ma, masitallik donganna be do nasida disi, tung hagunturon na bolon situtu do.

14:21 Halak Heber pe, dongan ni halak Palistim na sai laon, angka na nangkok rap dohot nasida tu parsaroan humaliang, nasida pe gabe dongan ni Israel, angka na rap dohot si Saul dohot si Jonatan hian.

14:22 Jala sude halak Israel, angka na martabuni di dolok Epraim, dung dibege barita i naung maporus halak Palistim, dohot ma nasida porang mangeak musu i.

14:23 Jadi ditumpak Jahowa ma Israel sadarina i, jala taripar ma angka na martongtang i sahat ro di Bethapen.

14:24 Dung i mansai maheu ma halak Israel sadarina i. Alai dipatolon si Saul do bangso i, ninna do: Marjea ma manang ise na mangan sagusagu sahat ro di bodari, asa martubol ahu tu musungku! Jadi ndang apus sipanganon tu sandok bangso i.

14:25 Jadi sahat ma sandok isi ni tano i tu tombak, gabe rarak situak ni loba di sisik ni ladang i.

14:26 Jadi dung sahat bangso i tu tombak, gabe ida ma, mabaor ma situak ni loba i, alai ndang adong na hum mambahen tanganna tu pamanganna, ai mabiar do bangso i mida uari.

14:27 Alai anggo si Jonatan, ndang dibege barita na pinatolon ni amana situan natorop i, gabe ditullukkon ujung ni tungkot na di tanganna i tu bagasan sarang ni loba, laos dibahen tanganna tu pamanganna, gabe sihar ma panailina.

14:28 Dung i ninna na sahalak sian bangso i ma songon on: Gogo situtu do amanta patolonhon situan natorop i, pola didok: Marjea ma manang ise na manganhon sagusagu sadarion. Jadi mandate ma bangso i.

14:29 Dung i ninna si Jonatan ma: Marhinamago do tano i binahen ni damang; ua ida hamu sihar ni panailingku, dung hudai otik situak ni loba on.

14:30 Muba do siharna tagamon, tung sura mangan bangso i sadarion sian tabantaban na dapotsa sian musuna i, muba dohot panimbukbuk ni hamonangon tagamon dompak halak Palistim.

14:31 Jadi ditaluhon nasida ma sadarina i halak Palistim olat ni Mikhmas sahat ro di Aiyalon, alai mansai mandate do anggo situan natorop i.

14:32 Dung i marsiraup ma bangso i tu tabantaban i, jala dibuat nasida birubiru dohot lombu dohot angka anak ni lombu, laos dipotongi manangkas di tano i, jala dipapangani rap dohot mudar.

14:33 Dung i adong ma na paboahon tu si Saul; ida ma, nunga mardosa bangso i dompak Jahowa, ala dipangan juhut mardongan mudar. Jadi ninna si Saul ma: Na mangalaosi patik do hamu; gulang hamu ma nuaeng sada batu na bolon tu ahu.

14:34 Angkupni didok si Saul: Marserak ma hamu tu tongatonga ni bangso i, jala dok hamu tu nasida: Masiboan lombuna dohot birubiruna ma nasida tu ahu, jala potongi hamu dison, asa mangan hamu, jala unang mardosa hamu dompak Jahowa ala manganhon juhut mardongan mudar. Jadi sandok bangso i masitogu lombuna be bornginna i, jala dipotongi disi.

14:35 Dung i dipajok si Saul ma langgatan sada di Jahowa, i ma langgatan parjolo pinajokna i di Jahowa.

14:36 Dung i ninna si Saul ma: Beta hita tuat mangeak halak Palistim bornginna i, jala mamupusi nasida sahat ro di torang ni ari, jala unang tatebahon sian nasida nanggo sahalak. Jadi ninna nasida ma: Bahen ma sandok guru lomo ni roham. Alai ninna malim i ma: Jumonok ma hita dison tu Debata!

14:37 Jadi disungkunhon si Saul ma tu Debata: Na jadi do ahu tuat mangalele halak Palistim? Pasahatonmu do nasida tu tangan ni Israel? Alai ndang dialusi Debata ibana sadarina i.

14:38 Dung i ninna si Saul ma: Ro be ma tuson sude induk ni bangso i, asa diboto jala diida hamu, manang binahen ni aha masa dosa i sadarion.

14:39 Ai songon sintongna mangolu Jahowa, naung mangalehon tua tu Israel, nang pe di si Jonatan anakki jumpang dosa i, ingkon marutang hosa ibana, jadi ndang adong manang ise pe sian sandok bangso i mangalusi ibana.

14:40 Dung i ninna si Saul ma tu sandok Israel: Bahir ma hamu di na sambariba, ianggo ahu dohot si Jonatan, anakki di na sambariba. Jadi ninna bangso i ma tu si Saul: Lomo ni roham ma bahen.

14:41 Jadi ninna si Saul ma tu Jahowa, Debata ni Israel: Hajongjonghon ma hasintongan! Jadi hona ma si Jonatan dohot si Saul, lias ma anggo bangso i.

14:42 Dung i ninna si Saul ma: Dabu hamu muse rujiruji taringot tu ahu dohot taringot tu si Jonatan anakki! Jadi hona ma si Jonatan.

14:43 Dung i ninna si Saul ma tu si Jonatan: Sai paboa ma tu ahu manang aha na binahenmi! Jadi dipaboa si Jonatan ma tu ibana, ninna do: Ala na hudai otik situak ni loba marhitehite ujung ni tungkot na di tanganku; ida ma, tung patut ma ahu mate?

14:44 Jadi ninna si Saul ma: Songon i do bahenon ni Debata tu ahu, jala patambaonna dope, ingkon marutang hosa do ho, ale Jonatan!

14:45 Alai ninna situan natorop i ma tu si Saul: Tung mate ma si Jonatan, na mambahen hatuaon godang sisongon i di Israel? Dao ma i! Songon sintongna mangolu Jahowa, ndang jadi marurus obuk ni uluna nanggo sada tu tano, ai mardonganhon Debata do ibana mangulahoni sadarion! Jadi bangso i nama paluahon si Jonatan umbahen so mate.

14:46 Dung i nangkok ma si Saul sian na mangalele halak Palistim, mulak tu ingananna be nang halak Palistim.

14:47 Jadi olat ni dung pampe harajaon tu si Saul gumomgom Israel, sai marmusu do ibana dompak saluhut musuna humaliang, dompak Moab dohot dompak halak Amon, dompak Edom dohot dompak angka raja sian Zoba, dohot dompak halak Palistim; manang dompak dia pe ditulus, sai na marantu do ibana.

14:48 Muba huhut gomosna papatu halak Amalek, gabe dipalua Israel sian tangan ni halak na mamupusi nasida na sai laon.

14:49 Ianggo angka anak ni si Saul, on do: Si Jonatan, si Ispi dohot si Malkisua; ia goar ni boruna na dua i: Goar ni buhabajuna si Merab, jala goar ni siampudan i: Si Mikhal.

14:50 Ia goar ni jolma ni si Saul: Si Ahinoam do, boru ni si Ahimas; ia goar ni partogi ni paranganna si Abner, anak ni si Ner, amanguda ni si Saul.

14:51 Ai si Kis, ama ni si Saul dohot si Ner, ama ni si Abner, rap anak ni si Abiel do.

14:52 Alai sai musu tihus do dompak halak Palistim saleleng mangolu si Saul; dibahen i dipapungupungu si Saul do tu lambungna luhut halak na begu dohot ulubalang, angka na niidana.

1 Samuel 15

15:1 Dung i ninna si Samuel ma tu si Saul: Na sinuru ni Jahowa do ahu na jolo laho mamiahi ho bahen raja gumomgom bangsona Israel; on pe tangihon ma suara ni angka hata ni Jahowa.

15:2 Boti hata ni Jahowa Zebaot: Marlulu ma Ahu taringot tu na binahen ni Amalek tu Israel, na niambatna di dalan uju di hananangkokna ruar sian Misir.

15:3 On pe laho ma ho jala taluhon Amalek, jala haromhon nasida ro di saluhut na di nasida, jala unang olani nasida; ingkon bunuonmu do nang baoa ro di parompuan, nang dakdanak ro di posoposo, nang lombu ro di birubiru, nang unto ro di halode.

15:4 Dung i ditingtingkon si Saul ma hata i tu bangso i, laos dibilangi nasida di Telem, dua ratus ribu halak parhantarhantar, jala sampulu ribu halak sian Juda.

15:5 Dung i sahat ma si Saul tu huta ni Amalek, jala dibahen pangaropan di rura.

15:6 Jadi didok si Saul ma tu halak Keni: Laho ma hamu sumurut, tuat ma hamu sian tongatonga ni halak Amalek, asa unang hurendephon hamu rap dohot nasida; ai nunga mardenggan basa anggo hamu tu sandok halak Israel, uju di hananangkoknasida ruar sian Misir. Jadi sumurut ma halak Keni sian tongatonga ni Amalek.

15:7 Jadi ditaluhon si Saul ma Amalek i, olat ni Hevila sahat ro di Sur, marbalokkon Misir.

15:8 Dung i ditangkup ibana ma anggo si Agag, raja ni Amalek songon i mangolu, dungkon ni luhut situan natorop i direndephon dohot podang.

15:9 Alai diolani si Saul dohot bangso i do anggo si Agag ro di birubiru pamuean dohot lombu, ro di pahanpahanan angka na mokmok, angka anak ni birubiru pe, ro di sude na uli, ndang olo nasida mangarotongkon; alai anggo ugasan rentuk angka na roa i dirotongkon nasida do.

15:10 Dung i ro ma hata ni Jahowa tu si Samuel songon on:

15:11 Nunga husolsoli rohangku, apala tung hupampe ma si Saul bahen raja, ai nunga ditundali rohana Ahu, jala ndang dihajongjongkon angka hatangki. Jadi tarrimas situtu ma si Samuel, jala joujou ibana tu Jahowa manipat sabornginna i.

15:12 Dung i dipasogot si Samuel ma hehe manogotna i manjumpangkon si Saul. Jadi tarbortik ma tu si Samuel dipaboa halak: Nunga sahat si Saul tu Karmel, jala ida ma, nunga pola dipatindang di ibana tanda parningotan sada, mamedu ibana muse jala taripar laho tuat tu Gilgal.

15:13 Jadi dung sahat si Samuel tu si Saul, ninna si Saul ma tu ibana: Na pinasupasu ni Jahowa ma ho! Nunga huhajongjongkon hata ni Jahowa.

15:14 Alai ninna si Samuel ma: Suara ni birubiru dia do i ulaning di bagasan pinggolhon, dohot suara ni lombu na hubege?

15:15 Jadi ninna si Saul ma: Sian halak Amalek do i diboan nasida, angka na niolanan ni bangso i sian birubiru pamuean dohot lombu bahen pelean tu Jahowa Debatam, ianggo na teba i nunga hurotonghon hami.

15:16 Dung i ninna si Samuel ma tu si Saul: Sae ma i! Asa hupabotohon tu ho na pinaboa ni Jahowa tu ahu naborngin. Jadi ninna si Saul ma tu ibana: Antong hatahon ma!

15:17 Dung i ninna si Samuel ma: Nda songon on do, uju metmet ho di panimbangon ni roham, gabe induk ni angka marga ni Israel do ho, jala dimiahi Jahowa ho gabe raja gumomgom Israel?

15:18 Jala disuru Jahowa ho tu dalan on, huhut didok: Laho ma ho jala rotongkon angka pardosa, halak Amalek i, jala marmusu ma ho dompak nasida, paima sun rendep nasida dibahen ho.

15:19 Boasa tung so tangihononmu hata ni Jahowa, tung tagonan hape manahopi tabantaban ho dohot mambahen sogo ni roha ni Jahowa?

15:20 Dung i ro ma hata ni si Saul tu si Samuel: Nunga hutangihon antong suara ni Jahowa, nunga pola hudalani dalan na sinuru ni Jahowa ahu, jala nunga huboan tuson si Agag, raja ni Amalek i, jala nunga pola hurotonghon halak Amalek i.

15:21 Ia dibuat halak situan natorop i pe sian tabantaban i angka birubiru dohot lombu, angka na dumenggan sian sirotonghononhon hian, laho mamelehon tu Jahowa Debatam do di Gilgal.

15:22 Dung i ninna si Samuel ma: Tung tagamon ma lomoan roha ni Jahowa mida pelean situtungon dohot sipanganon, asa mida panangihon di suara ni Jahowa? Ida ma, dumenggan do roha panangihon sian pelean sipotongon, jala dumenggan do marateatehon hata i, asa tabotabo sian birubiru tunggal.

15:23 Ai doshon dosa pangarundingon do roha hatangkangon, jala hajahaton dohot pardebataon sileban sambing do na tarboan roha. Ala naung binolangkonmi hata ni Jahowa, ala ni nunga dibolongkon Ibana ho, asa unang be ho raja.

15:24 Dung i ninna si Saul ma tu si Samuel: Nunga mardosa ahu, ala naung hulaosi tona ni Jahowa dohot angka hatami; ai mabiar do ahu mida situan natorop i, gabe huoloi soaranasida i.

15:25 On pe, sai marpamuati ma roham mida dosangki, jala rap mulak ma hita, asa marsomba ahu tu Jahowa.

15:26 Alai ninna si Samuel ma tu si Saul: Ndang mulak ahu rap dohot ho, ai nunga dibolongkon roham hata ni Jahowa, jala nunga dibolongkon Jahowa ho, asa unang be ho raja gumomgom Israel.

15:27 Dung i humusor ma si Samuel naeng mardalan, gabe ditiop si Saul ma suhisuhi ni bajuna, pola maribak.

15:28 Jadi ninna si Samuel ma tu ibana: Nunga dirampas Jahowa harajaon Israel sian ho sadarion, jala dilehon do i tu donganmu na dumenggan marroha sian ho.

15:29 Angkupni ndang tagamon margapgap Haposan ni Israel manang tarsolsol bagi, ai ndada jolma Ibana, tung tarsolsol bagi.

15:30 Dung i ninna si Saul ma: Nunga mardosa ahu nuaeng, alai sai pasangap ahu maradophon sintua ni bangsongki dohot maradophon Israel, rap muli ma hita, asa marsomba ahu tu Jahowa Debatam.

15:31 Jadi mulak ma si Samuel mangihuthon si Saul, gabe marsomba ma si Saul tu Jahowa.

15:32 Dung i ninna si Samuel ma: Boan hamu ma tu ahu si Agag, raja ni Amalek i. Jadi mardalan ma si Agag marhiras ni roha mandapothon ibana, pola didok hatana: Nunga tung mandao hapaeton ni hamatean!

15:33 Dung i ninna si Samuel ma: Songon binahen ni podangmi papunu angka inaina, suang songon i do punu bahenon inangmu di tongatonga ni angka inaina. Dung i ditanggoi si Samuel ma si Agag di jolo ni Jahowa di Gilgal.

15:34 Dung i laho ma si Samuel tu Rama; alai nangkok do anggo si Saul tu jabuna, tu Gibea-Saul.

15:35 Jadi ndang be masipaidaan si Samuel dohot si Saul rasirasa ari hamamatena; alai sai diarsakkon roha ni si Samuel do si Saul i, ala naung tarsolsol bagi Jahowa, tung dipampe si Saul gabe raja gumomgom Israel.

1 Samuel 16

16:1 Dung i ninna Jahowa ma tu si Samuel: Sadia leleng on ho marsak taringot tu si Saul, naung pola hubolongkon, asa unang be raja ibana gumomgom Israel? Gohi ma sahanmu dohot miak, jala laho ho, naeng suruhononku ho tumopot si Isai, isi ni Betlehem; ai nunga hupillit di Ahu sada sian angka anakna bahen raja.

16:2 Dung i ninna si Samuel ma: Songon dia ma langkangku tusi? Ai begeon ni si Saul ma barita i, jadi bunuonna ma ahu. Dung i ninna Jahowa ma: Togutogu ma anak ni lombu sada, jala dohononmu ma: Laho mamele tu Jahowa do ahu umbahen na ro.

16:3 Ingkon pioonmu huhut si Isai tu pamelean i, dung i Ahu pabotohon tu ho manang aha sibahenonmu, ingkon miahanmu di Ahu manang ise sidohononku tu ho.

16:4 Dung i dibahen si Samuel ma na nidok ni Jahowa, jala sahat ibana tu Betlehem. Jadi tarsonggot situtu ma angka sintua ni huta i manjumpangkon ibana, huhut didok: Hata hademakon do na hinarohonmu?

16:5 Dung i ninna ibana ma: Hademakon do! Laho mamele tu Jahowa do ahu umbahen na ro. Manguras ma hamu, asa ro hamu donganku tu pamelean i! Dung i diuras ibana ma si Isai dohot angka anakna, laos dipio nasida tu pamelean i.

16:6 Jadi dung masuk nasida, dibereng ibana ma si Eliab, gabe ninna rohana ma: On do huroha simiahan di jolo ni Jahowa!

16:7 Alai didok Jahowa ma tu si Samuel: Unang ho mamereng tu rupana, manang tu tongam di dagingna, ai nunga hubolongkon anggo ibana, ai ndada marguru tu parnidaan ni jolma; ianggo jolma rupa do na niidana, alai anggo Jahowa roha di bagasan do na niidana.

16:8 Dung i dijou si Isai ma si Abinadab, jala didokkon ibana mamolus sian jolo ni si Samuel; alai ninna si Samuel ma: Ibana pe ndang na pinillit ni Jahowa.

16:9 Dung i didokkon si Isai ma si Samma mamolus, alai ninna si Samuel muse ma: Ibana pe laos na so pinillit ni Jahowa do.

16:10 Jadi songon i didokkon si Isai pitu angka anakna mamolus sian jolo ni si Samuel; alai ninna si Samuel ma tu si Isai; ndang adong na pinillit ni Jahowa sian nasida i.

16:11 Dung i ro muse hata ni si Samuel tu si Isai: Holan on do angka anakmu? Dung i ninna ibana ma: Tinggal dope ianggo siampudan i, jala ida ma, marmahan birubiru do ibana. Jadi ninna si Samuel ma tu si Isai: Suru ma mangalap ibana; ai ndang tagamon hundul hita laho mangan, nda jolo ro ibana tuson.

16:12 Jadi disuru ma na mangalapi ibana. Alai tarrara do dagingna, uli dohot rupana sorur do ro di panailina. Dung i ninna Jahowa ma: Hehe ma ho, miahi ma ibana, ai i ma ibana!

16:13 Jadi dibuat si Samuel ma sahan parmiahan i, jala dimiahi ibana di tongatonga ni angka hahana. Dung i songgop ma Tondi ni Jahowa tu si Daud olat ni na sadari i dohot tu jolo on. Dung i borhat ma si Samuel laho mulak tu Rama.

16:14 Alai sumurut ma Tondi ni Jahowa anggo sian si Saul, gabe guga rohana dibahen sada tondi na jahat sian Jahowa.

16:15 Dung i didok angka naposo ni si Saul ma mandok ibana: Ua ida ma, sai guga do roham dibahen sada tondi na jahat sian Debata.

16:16 Ua martona ma ho, ale rajanami -- guru dokmu do naposom angka na di jolomon -- asa hulului hami sada halak na malo marhasapi; asa ia songgop muse tondi na jahat i sian Debata tu ho, gabe mamiltik ibana dohot tanganna, anggiat sonang hilalaonmu.

16:17 Jadi didok si Saul ma tu angka naposona: Antong denggan lulu i hamu ma di ahu sada halak, na malo marhasapi, jala boan hamu ma ibana tu ahu.

16:18 Jadi didok sahalak sian angka dolidoli ma mangalusi: Ida ma, huida do na jolo sada anak ni si Isai, isi ni Betlehem, na malo marhasapi, jala na begu, tau ulubalang, huhut na pantas marhata, na uli do rupana, jala dihombari Jahowa do ibana.

16:19 Jadi disuru si Saul ma angka suruanna mandok tu si Isai: Sai suru ma tu ahu anakmu si Daud, na marmahan birubiru i.

16:20 Dung i dibuat si Isai ma sada halode angkup ni roti dohot sapoting anggur ro di hambing tunggal sada laho manongoshon tu si Saul, boanon ni si Daud anakna i.

16:21 Jadi sahat ma si Daud tu si Saul, asa marhalado di jolona; holong situtu ma roha ni rajai mida ibana, laos dipabangkit ibana bahen siusung sinjatana.

16:22 Dung i disuru si Saul muse suruanna mandok tu si Isai: Ua loas ma tongtong si Daud marhalado di jolongku, ai tung hasudungan ni rohangku do ibana.

16:23 Jadi ia jumpa soluk tondi na sian Sibolis i tu si Saul, gabe dibuat si Daud ma hasapina, laos dipiltik dohot tanganna, jadi gumanggang ma roha ni si Saul i, laos sonang dihilala, sumurut huhut sian ibana tondi na jahat i.

1 Samuel 17

17:1 Dung i santi balatuk ma parangan ni halak Palistim laho marmusu, jala marluhut nasida tu Soko, di Juda, jala marsaro di holangholang ni Soko dohot Azeka, mardonokkon Dammim.

17:2 Santi balatuk ma dohot si Saul ro di angka baoa ni Israel, jala marsaro di rura parhariaraan, jala patutur be jongjong manjumpangkon halak Palistim marmusu.

17:3 Jadi jongjong ma halak Palistim marbonahon dolok di bariba i, jongjong ia halak Israel marbonahon dolok di baribaon, gabe rura holangholangnasida.

17:4 Dung i ruar ma sian parsaroan ni halak Palistim sahalak panglima, na margoar si Goliat, sian huta Gat, onom asta santopap ganjangna.

17:5 Tahuluk sian tombaga di atas uluna, jala marpangkean baju partahanan bosi na marsisik ibana, ia dokdok ni baju partahanan i lima ribu sekkel tombaga do.

17:6 Jala marondingonding tombaga ia patna duansa, jala marmundimundi tombaga di holangholang ni sasapna.

17:7 Ia suhul ni podangna na saumban; anggo apala dokdok ni mata ni podangna onom ratus sekkel bosi do, jala siusung lombulombuna mardalan di jolona.

17:8 Dung i sai jongjong ibana jala joujou manguai dompak parangan, ni Israel angka na patutur ninna ma mandok nasida: Boasa tung ruar hamu, jongjong patutur be laho marmusu? Nda ahu do halak Palistim, jala hamu angka naposo ni si Saul? Pillit hamu ma di hamu sahalak, asa tuat ibana mandopang ahu!

17:9 Molo tung tardopang ibana ahu, jala talu ahu dibahen, jadi hatobanmuna ma hami; alai molo tung ahu patunduk ibana, jala mate ibana hubunu, jadi hamu ma hatobannami, mangoloi patu tu hami.

17:10 Angkupni ninna halak Palistim i: Nunga tung ahu mangelesi parangan ni Israel sadarion: Antong suru hamu ma sada halak tu ahu, asa manguji hami padua.

17:11 Jadi dung dibege si Saul dohot sandok Israel hatahata ni halak Palistim i, gabe godoron nasida jala mabiar situtu.

17:12 Ianggo si Daud, anak ni sahalak Eprata sian Betlehem Juda, na margoar Isai, ualu do anakna, nunga tung jolma sarimatua ibana uju di ngolu ni si Saul.

17:13 Laho do ianggo na tolu anak ni si Isai angka na umbalga i mangihuthon si Saul tu parporangan, ia goar ni anakna na tolu i, angka na borhat tu parporangan i on do: Si Eliab buhabajuna, paidua si Abinadab, paitolu si Samma.

17:14 Siampudan do ianggo si Daud. Alai dung borhat na tolu halak sihahaan i mangihuthon si Saul.

17:15 Marmeang muli anggo si Daud sian lambung ni si Saul laho marmahan birubiru ni amana di Betlehem.

17:16 Alai sai torpatorpa do ia halak Palistim i sogot manogotna i dohot bodarina i jongjong mangasapi opatpulu ari lelengna.

17:17 Dung i ro ma hata ni si Isai tu si Daud anakna i: Ua buat ma di angka hahami sian eme na nirondangon saepa dohot roti na sampulu on, jala siluhon mamboan tu parsaroan tu angka hahami.

17:18 Boan dohot susu na malhotan na sampulu pohulon tu partogi ni saribu parangan, jala tingkir angka hahami manang na sonang nasida, jala boan sada tanda sian nasida laho mulak.

17:19 Alai anggo si Saul, nang nasida ro di sude baoa ni Israel di rura parhariaraan do marporang dompak halak Palistim.

17:20 Jadi dipasogot si Daud ma manogotna i borhat jala dipasahat angka birubiru tu sada parmahan, jala dung dibuat siboanonna i, laho ma ibana songon na tinonahon ni si Isai tu ibana, gabe sahat ma ibana tu parsaroan i, tongon ruar angka parangan i maraturan huhut marsurak toletole.

17:21 Jadi patutur be jongjong halak Israel dohot halak Palistim paadopadop be maraturan.

17:22 Dung i dipeakkon si Daud ma barang binoanna i, jala dipasahat tu tangan ni halak sijaga barang, marlojong ma anggo ibana tu partontangan i, laos disaor do, huhut usouso di angka hahana mandok tabena.

17:23 Dung i uju mangkatai dope ibana dohot nasida, ida ma, nangkok do tongon baoa panglima i, na margoar si Goliat halak Palistim i sian huta Gat, ro sian tongatonga ni parangan ni halak Palistim, jala mangasapi songon hatahatana na sai laon, dibege si Daud antong.

17:24 Alai anggo sude baoa ni Israel, dung diida nasida baoa i, marbubur be ma nasida maporus maradophon ibana, jala mabiar situtu.

17:25 Dung i ninna angka baoa ni Israel ma: Atehe, nunga diida hamu baoa na nangkohi? Ai laho mangasapi Israel do ibana umbahen na nangkok. Dibahen i manang ise na mambunu ibana, mamora situtu do bahenon ni rajai, jala lehononna boruna bahen jolmana, jala paluaonna do sian rodi pinompar ni amana di Israel.

17:26 Dung i ninna si Daud ma tu baoa angka na jongjong di lambungna songon on: Aha do bahenon tu baoa na mambunu halak Palistim adui, jala na paholang haurahon sian Israel? Ai tung ise ma pola halak Palistim siparhulup on, tung asapanna angka parangan ni Debata na mangolu i?

17:27 Dung i dipaboa situan natorop i ma tu ibana hombar tu hata ondeng: Songon i ma tutu bahenon tu baoa na mambunu ibana.

17:28 Jadi dibege si Eliab hahana i pangkataionna tu angka baoa i, gabe marpiarpiar ma rimas ni si Eliab dompak si Daud, laos didok ma: Marhua tung tuat ho tuson, jala tu ise do dipasahat ho birubiru na otik i di halongonan? Tangkas do hutanda panengaon dohot hinajahat ni roham: Ai na naeng marnida na marporang i do ho umbahen na tuat.

17:29 Dung i ninna si Daud ma: Ai apala aha do na hubahen i? Nda hata sangkababa sambing do i?

17:30 Dung i humusor ma ibana manundalhon hahana, mandompakkon halak na asing, laos songon hatana ondeng do didok, laos songon hata parjolo i do alus ni situan na torop i tu ibana.

17:31 Jadi dung dibege nasida hata angka na pinaboa ni si Daud, gabe dipatolhas ma i tu jolo ni si Saul, na mandokkon alapon ibana.

17:32 Dung i ninna si Daud ma mandok si Saul: Unang pola godoron roha ni manang ise ala bayo an! Laho pe naposomon mandopang halak Palistim on.

17:33 Alai ninna si Saul ma mandok si Daud: Ndang tarbahen ho laho mandopang halak Palistim on laho mangalo ibana, ai bajar dope ho, alai anggo ibana baoa na somal marmusu sian sieteketehonna.

17:34 Dung i ninna si Daud ma mandok si Saul: Marmahan birubiru ni amana do naposomon sahali, gabe ro ma sada singa dohot gompul mangaluahon sada birubiru sian punguan i.

17:35 Jadi ruar ma ahu mangalele, laos huompongi ma ibana jala hupalua birubiru i sian babana; jadi uju naeng timbungonna ahu, husoro ma misena, laos hupatunduk ma jala hubunu ibana.

17:36 Nang singa i, nang gompul i dibunu naposomon do; ingkon suman songon na sada sian i bahenon tu halak Palistim siparhulup on, ala naung niasapanna angka parangan ni Debata na mangolu i.

17:37 Angkupni ninna si Daud: Jahowa na paluahon ahu sian sisilon ni singa dohot sian sisilon ni gompul, paluaonna do ahu sian tangan ni halak Palistim. Dung i ninna si Saul ma mandok si Daud: Antong laho ma ho, sai didongani Jahowa ma ho!

17:38 Dung i disolukkon si Saul ma pangkeanna sandiri tu si Daud, jala diampehon tahuluk tombaga tu uluna, jala marbaju partahanan ibana dibahen.

17:39 Dung i disolothon si Daud ma podangna tu pangkeanna, jala dipungka mardalandalan, ai ndang dung dope diunjuni. Dung i ninna si Daud ma mandok si Saul: Ndang tarbahen ahu mardalan mamangke sisongon i, ai ndang dung dope huunjuni, laos ditanggali si Daud do i muse sian ibana.

17:40 Dung i dibuat ma tungkotna tu bagasan tanganna, jala dibahen ma i tu bagasan hadanghadanganna, dipatioptiop huhut ambalangna laho mandapothon halak Palistim i.

17:41 Ro ma dohot halak Palistim i mandapothon si Daud, jala baoa siusung lombulombuna di jolona.

17:42 Dung i manaili ma halak Palistim i, gabe diida ma si Daud, jala lea rohana mida ibana, ai na bajar dope jala tarrara bohina jala uli rupana.

17:43 Dung i ninna halak Palistim i ma mandok si Daud: Hira biang do ahu di roham umbahen na ro ho mamboan tungkot manjumpangkon ahu? Laos dipambuburahon halak Palistim i ma si Daud tu debatana.

17:44 Ia hata ni halak Palistim i tu si Daud: Haru ro ma ho mandapothon ahu, asa hulehon sibukmu tu pidong angka na martongatonga langit dohot tu binatang na di ladang.

17:45 Alai ninna si Daud ma mandok halak Palistim i: Ia ho da ro tu ahu mangasahon podang dohot hujur dohot lombulombu; alai anggo ahu ro tu ho mangasahon goar ni Jahowa Zebaot, Debata ni parangan ni Israel, angka na niasapanmi.

17:46 Apala sadarion ma pasahaton ni Jahowa ho tu bagasan tanganku, asa hubunu ho, jala husirang ulum sian ho, jala hulehon bangke ni parangan ni halak Palistim sadarion tu pidong angka na martongatonga langit dohot tu binatang na di ladang, asa tung sandok tano on mananda, adong do Debata di Israel.

17:47 Jala sandok loloanon mananda, paboa na so marhite sian podang manang hujur Jahowa manolongi, ai rimpun di Jahowa do parporangan, jala pasahatonna do hamu tu bagasan tangannami.

17:48 Jadi dung hehe halak Palistim i, laos mardalan manjumpangkon si Daud i nian, manilu ma si Daud manahopi tongtangan i manjumpangkon halak Palistim i.

17:49 Dung i dibahen si Daud ma tanganna tu bagasan hadanghadanganna, dibuat ma sian i batu sada, laos mangambalang ibana, gabe hona ma pardompahan ni halak Palistim i, laos bongot ma batu i tu bagasan pardompahanna i, jala tungkap ma ibana tu tano.

17:50 Asa gumogo ma si Daud sian halak Palistim, ambalang dohot batu sambing binoanna jala dipatunduk halak Palistim i, jala dibunu ibana alai ndang adong anggo podang di bagasan tangan ni si Daud.

17:51 Dung i marlojong ma si Daud, jala jongjong di atas ni halak Palistim i, jala ditangkup podangna, jala diumpat ma i sian sarungna, jala dibunu ibana, jala dilobong uluna. Jadi dung diida halak Palistim naung mate do pangulimanasidai, maporus be ma nasida.

17:52 Dung i hehe ma angka baoa sian Israel dohot sian Juda marsuraksurak huhut mangeak halak Palistim sahat ro di Gat, sahat huhut ro di harbangan ni Ekron; jadi marragean ma halak Palistim di dalan laho tu Saraim sahat ro di Gat dohot Ekron.

17:53 Dung i mulak ma halak Israel sian na mangalotongi halak Palistim, jala ditaban duduk parsaroannasida i.

17:54 Dung i dibuat si Daud ma ulu ni halak Palistim i, jala diboan do i tu Jerusalem; alai anggo sinjatana dipeakkon do di bagasan undungundungna.

17:55 Alai uju diida si Saul si Daud i ruar manjumpangkon halak Palistim i, ninna ibana ma tu si Abner, partogi ni angka parangan i: Anak ni ise do dolidoli on, ale Abner? Jadi ninna si Abner ma: Songon sintongna mangolu hosam, ale rajanami, molo tung huboto.

17:56 Dung i ninna rajai ma: Antong pamanat ma manang anak ni ise do dolidoli an.

17:57 Jadi dung mulak si Daud sian pamunuan di halak Palistim i, diarahon si Abner ma ibana mamboan tu jolo ni si Saul, jala ulu ni halak Palistim i di bagasan tanganna.

17:58 Dung i ninna si Saul ma tu ibana: Atehe dolidoli, anak ni ise do ho? Jadi ninna si Daud ma: Anak ni naposom si Isai, isi ni Betlehem i do ahu.

1 Samuel 18

18:1 Jadi dung sidung si Daud mangkatai dohot si Saul, masijaloan ma roha ni si Jonatan dohot roha ni si Daud, jala dihaholongi si Jonatan ibana, songon hosana sandiri.

18:2 Laos dibuat si Saul ibana sadarina i, jala ndang be diloas ibana mulak tu jabu ni amana.

18:3 Dung i umpungka padan ma si Jonatan dohot si Daud, ala hinaholonganna ibana songon hosana sandiri.

18:4 Dung i ditanggal si Jonatan ma baju na pinangkena, jala dilehon ma i tu si Daud, ro di pangkeanna angka na asing ro di podangna, siorna dohot hohosna.

18:5 Dung i borhat ma si Daud, manang tudia pe disuru si Saul ibana, sai na marantu do ibana; alani dipampe si Saul ma ibana manguluhon angka baoa parporang, gabe hasian ni sandok bangso i ibana nang hasian ni angka naposo ni si Saul.

18:6 Alai dung mulak nasida, mulak dohot si Daud sian pamunuan ni halak Palistim i, ruar ma angka parompuan sian saluhut huta ni Israel marudurudur laho marende manomunomu raja Saul mardonganna arbab, suraksurak dohot parhinaloan.

18:7 Dung i marende taripar ma angka parompuan i, mamiltik parhinaloan huhut mandok; marriburibu do naung tinaluhon ni si Saul, alai anggo si Daud marloksaloksa do!

18:8 Jadi tarrimas situtu ma si Saul, jala barjing rohana mida hata i, gabe didok ma: Nunga tung marloksaloksa hape tu si Daud dilehon nasida, ia tu ahu holan marriburibu dilehon, holan jujungan harajaon i na ma so sahat tu ibana.

18:9 Jadi mangiburu ma roha ni si Saul mida si Daud olat ni ari i tu jolo.

18:10 Dung i marsogotna i songgop ma muse tondi na jahat i sian Debata tu si Saul, gabe ritoritoon ibana di tongatonga ni jabuna; alai marhasapi ma ianggo si Daud songon na siap ari, jala patioptiop mundimundi ianggo si Saul.

18:11 Dung i dipantomhon si Saul ma mundimundi i huhut ninna rohana: Pantikhononku ma si Daud tu dorpi. Alai disalahon si Daud do pola dua hali.

18:12 Jadi mabiar ma si Saul maradophon si Daud, ai didongani Jahowa do ibana, nunga munsat Ibana ianggo sian si Saul:

18:13 Dung i dipaholang si Saul ma si Daud i sian lambungna, jala dipampe ibana bahen induk ni saribu parangan, jadi marmeang muli ibana di adopan ni bangso i.

18:14 Ia si Daud sai marantu do di saluhut angka dalanna, jala didongani Jahowa ibana.

18:15 Jadi dung diida si Saul marantu situtu do ibana, muba ma biarna mida ibana.

18:16 Alai holong do roha ni sandok Israel dohot Juda mida si Daud, ai marmeang muli do ibana manguluhonnasida.

18:17 Dung i ninna si Saul ma tu si Daud: Ida ma, lehononku ma borungku sihahaan si Merab, bahen jolmam, asal anak na begu ho di ahu jala manolehon angka hamusuon ni Jahowa! Alai ninna roha ni si Saul do; ndada tanganku sandiri mangonai tu ibana, tagonan tangan ni halak Palistim patunduk ibana.

18:18 Alai ninna si Daud ma mandok si Saul: Tung ise ma ahu pola jala aha ngolungku pola nang pinompar ni damang di Israel, umbahen ingkon gabe hela ni rajai ahu?

18:19 Alai dung jumpang tingki lehonon nian si Merab boru ni si Saul, tu si Daud, gabe tu si Adriel, isi ni Mehola nasida dilehon bahen jolmana.

18:20 Alai holong do roha ni si Mikhal, boru ni si Saul, mida si Daud. Jadi adong ma na pabotohon i tu si Saul, gabe tongon do hata i tu rohana.

18:21 Jadi ninna roha ni si Saul ma: Lehononku ma i tu ibana, asa gabe jorgong di ibana, asa tangan ni halak Palistim patunduk ibana. Dung i ninna si Saul ma tu si Daud paduahalihon: Ingkon gabe helangku ma ho sadarion.

18:22 Jadi martona ma si Saul tu angka naposona: Mangkatai ma hamu tu si Daud marsibuni, dohononmuna ma: Ida ma, lomo do roha ni rajai mida ho, jala luhut naposona mangkaholongi ho; on pe oloi ma hela on ni rajai ho.

18:23 Jadi dihatahon angka naposo ni si Saul ma angka hata i tu pinggol ni si Daud. Alai ninna si Daud ma hata otik do huroha, di rohamuna, gabe hela ni rajai iba? Hape halak na pogos jala na bile do ia ahu.

18:24 Jadi dipaboa angka naposo ni si Saul ma hata i tu ibana: Songon on do angka hata ni si Daud.

18:25 Dung i ninna si Saul ma: Ingkon songon on do dohononmuna tu si Daud: Ndada mangido boli rajai, nda holan saratus sibursibur sian halak Palistim laho martubol tu musu ni rajai; alai disangkapi roha ni si Saul mambunu si Daud marhitehite tangan ni halak Palistim.

18:26 Jadi dipatolhas angka naposona ma hata i tu si Daud, gabe tongon ma hata i di roha ni si Daud, dioloi ma hela on ni rajai ibana. Alai ndang dope jumpang anggo buhul ni ari.

18:27 Dung i borhat ma si Daud jala mardalan, ibana dohot angka baoa donganna, laos dibunu ma halak Palistim dua ratus halak. Dung i diboan si Daud ma sibursiburnasida, jala gok bilanganna disombahon tu rajai, asa gabe hela ni rajai ibana. Jadi dilehon si Saul ma di ibana boruna si Mikhal bahen jolmana.

18:28 Jadi diida si Saul ma jala mananda rohana na nidonganan ni Jahowa do si Daud; si Mikhal, boru ni si Saul pe mangkaholongi ibana.

18:29 Dibahen i lam tamba dope biar ni si Saul maradophon si Daud, jala musu ni si Saul do si Daud saleleng mangolu ibana.

18:30 Dung i ruar ma angka induk ni halak Palistim, alai manang piga hali pe nasida ruar sai marantuan do si Daud sian saluhut naposo ni si Saul, gabe marmulia situtu ma goarna.

1 Samuel 19

19:1 Dung i ro ma hata ni si Saul tu si Jonatan, anakna i dohot tu sude naposona, naeng mambunu si Daud; alai lomo situtu do ianggo roha ni si Jonatan anak ni si Saul, mida si Daud.

19:2 Jadi dipaboa si Jonatan ma barita i tu si Daud, ninna ma: Sai dilului roha ni damang si Saul naeng mambunu ho; dibahen i, ua jaga ma dirim ro di manogot huhut marondingonding ho laos martabuni.

19:3 Alai anggo ahu ruar ma ahu, jala jongjong di lambung ni damang di ladang parmiananmi, jala taringotanku ma ho tu damang, jala paboaonku ma tu ho manang aha na huida.

19:4 Jadi ditaringoti si Jonatan ma na denggan sian si Daud tu si Saul amana i, ninna ma mandok ibana: Unang tung mardosa rajai tu si Daud, ai ndang adong dosana tu ho, mansai marguna situtu do balik pambahenanna i tu ho.

19:5 Ai nunga pola diseahon hosana laho mambunu halak Palistim i, jala tua bolon do binahen ni Jahowa tu sandok Israel; nunga diida ho tahe, jala las roham disi; boasa tung naeng mardosa ho di mudar na so marpipot, naeng mambunu si Daud soada alana.

19:6 Jadi ditangihon si Saul ma soara sipaingot ni si Jonatan, pola maruari si Saul: Songon sintongna mangolu Jahowa, molo tung bunuon be ibana.

19:7 Jadi joujou ma si Jonatan di si Daud, jala dipajojor tu ibana sude hata ondeng; laos ditogihon si Jonatan ma si Daud tu si Saul, asa di adopanna ibana songon siap ari.

19:8 Alai tubu ma muse hamusuon, jadi borhat ma si Daud asa marporang dompak halak Palistim, gabe talu situtu ma nasida dibahen, laos maporus nasida maradophon ibana.

19:9 Alai ro ma muse tondi na jahat sian Jahowa tu si Saul, tongon hundul ibana di bagasan jabuna, patioptiop mundimundina di bagasan tanganna, marhasapi do anggo si Daud.

19:10 Jadi diunjuni si Saul ma mamantikkon si Daud tu dorpi marhitehite mundimundina, alai didengkari ma pantom ni si Saul i, gabe pantik ma mundimundi i tu dorpi, laos maporus ma si Daud paluahon dirina bornginna i.

19:11 Alai marsuru suruanna ma si Saul tu jabu ni si Daud, asa dijaga ibana laos dibunu manogotna i. Alai ro ma si Mikhal, jolmana i paboahon barita i tu si Daud, ninna ma: Molo so paluaonmu hosam saborngin on, ingkon bunuonna ho manogot.

19:12 Dung i ditantan si Mikhal ma si Daud sian jandela tu toru, gabe laho ma ibana jala maporus palua dirina.

19:13 Dung i dibuat si Mikhal ma ganaganaan terapim, jala dipeakkon tu podoman i, jala bobak ni hambing halang uluna dibahen, jala diborhosi dohot hain panas.

19:14 Dung i marsuru surusuruanna ma si Saul mangalap si Daud nian, gabe ro ma hata ni si Mikhal: Marsahit do ibana ninna.

19:15 Alai disuru si Saul muse angka suruani maningkir si Daud nian, huhut martona: Sai boan hamu ibana nangkok tu ahu di bagasan podoman i, asa binunu ibana.

19:16 Jadi dung ro angka suruani, ida ma, ganaganaan terapim do hape di podoman i, jala bobak ni hambing halang uluna.

19:17 Jadi ninna si Saul ma tu si Mikhal: Boasa ma tung songon i sipaotootom tu ahu, jala diloas ho laho musungku, asa malua ibana? Jadi ninna si Mikhal ma tu si Saul: Ninna ibana do mandok ahu: Loas ahu laho, boasa ma tagonan bunuonku ho?

19:18 Dung i maporus ma si Daud palua dirina, gabe sahat ibana tu si Samuel di Rama, jala dipajojor tu ibana; sude naung binahen ni si Saul tu ibana; laos mardalan ma ibana rap dohot si Samuel, gabe maringan nasida ni Naiot (angka inganan ni panurirang).

19:19 Dung i dibaritahon halak ma tu si Saul songon on: Ida ma, maringan do si Daud di Naiot mardonokkon Rama.

19:20 Jadi marsuru angka suruan ma si Saul laho mangalap si Daud, gabe diida nasida ma luhutan ni panurirang angka na manurirangi, jala si Samuel jongjong disi induknasida. Jadi songgop ma tondi ni Debata tu angka suruan ni si Saul, gabe manurirangi ma nang nasida.

19:21 Dung i dibaritahon halak ma i tu si Saul, gabe marsuru surusuruan angka na asing ma ibana, manurirangi ma nang nasida; dung i diulahi si Saul muse marsuru angka surusuruan patoluhalihon, alai nasida pe manurirangi do.

19:22 Dung i ibana sandiri pe laho tu Rama, jadi dung sahat ibana tu sumur bolon na di Seku, usouso ma ibana: Didia do si Samuel dohot si Daud ninna? Gabe didok halak ma: Ida ma, di Naiot mardonokkon Rama do nasida.

19:23 Dung i laho ma ibana tusi, tu Naiot mardonokkon Rama, gabe songgop ma dohot tu ibana Tondi ni Debata, gabe mardalani ibana huhut manurirangi paima sahat ibana tu Naiot mardonokkon Rama.

19:24 Dung i mananggal pangkeanna ma nang ibana, laos manurirangi ma dohot ibana di adopan ni si Samuel, gabe bustang ibana salangsalang manipat sadari sabornginna i. Alani do umbahen didok halak: Dohot do si Saul hape di tongatonga ni angka panurirang?

1 Samuel 20

20:1 Dung i maporus ma si Daud sian Naiot mardonokkon Rama manopot si Jonatan, ninna ma dung ro di jolona: Aha do na hubahen? Aha do salangku jala aha do dosangku di jolo ni amangmu, umbahen sai lotonganna hosangki?

20:2 Alai ninna si Jonatan ma: Dao ma i! Ndang tagamon mate ho; ida ma, ndang adong dibahen damang, nang hata balga manang hata metmet, nda jolo dipapatar tu pinggolhon. Boasa ma tung tamondingkonon ni damang sian ahu ia hata on? Ndang tagamon songon i.

20:3 Dung i lam maruari ma si Daud, ninna ma: Tangkas do diboto amangmu naung jumpangan asi ni roha ahu maradophon ho, gabe ninna rohana: Ndang jadi botoon ni si Jonatan hata on, asa unang marsak rohana. Alai tongon do, songon sintongna mangolu Jahowa, mangolu dohot hosam: Hira holan salangka sambing holangholangku dohot hamatean.

20:4 Dung i ninna si Jonatan ma tu si Daud: Manang aha pe didok roham, sai na bahenonku do i tu ho.

20:5 Dung i ninna si Daud ma tu si Jonatan: Ida ma, marsogot ma poltak ni bulan, ingkon hundul ahu nian somalna rap mangan dohot rajai; alai loas ma ahu laho asa martabuni ahu di ladang sahat ro di patolu bodarihon.

20:6 Tung sura usousoan ni amangmu ahu, jadi dohononmu ma: Mansai gogo hata ni si Daud mangido tu ahu, asa manilu ibana tu Betlehem hutana i, ai disi do masa pelean siganup taon di sandok margai.

20:7 Tung sura dohononna: Denggan do i! Adong ma hasonangan di naposomon; alai molo tung marpiarpiar rimasna, botoonmu ma naung putus rohana mambahen na jahat i.

20:8 On pe sai bahen ma asi ni roha tu naposomon, ai nunga pola mambahen parjanjian ho tu naposom di jolo ni Jahowa. Alai molo tung adong salangku, ho ma tagonan mambunu ahu, boasa ma tung togihononmu ahu pasahathon tu amangmu.

20:9 Dung i ro ma hata ni si Jonatan: Dao ma i sian ahu! Molo tung mamoto ahu, naung putus roha ni damang pasonggophon tu ho na jati, tung so pabotohononku ma tu ho?

20:10 Jadi ninna si Daud ma tu si Jonatan: Antong ise ma pabotohonsa tu ahu? Molo tung manang aha hata na koras alushonon ni amangmu tu ho?

20:11 Dung i ninna si Jonatan ma tu si Daud: Beta hita ruar tu ladang. Jadi ruar ma nasida duansa tu ladang.

20:12 Dung i ninna si Jonatan ma tu si Daud marmangmangkon: Ale Jahowa, Debata ni Israel! Molo dung hurisik roha ni damang marsogot songon on manang haduan, gabe ida ma, denggan rohana taringot tu si Daud, gabe so mamintor husuru tu ho pabotohonsa tu pinggolmu.

20:13 Ingkon songon i bahenon ni Jahowa tu si Jonatan, jala patambaonna dope songon i! Alai molo tung tagonan marsangkap hajahaton damang dompak ho, sai na papataronku do tu pinggolmu, asa marsuru ho, gabe laho ho mardamedame, jadi sai donganan ni Jahowa ma ho, songon na nidongananna damang na sai laon.

20:14 Alai ndada dolan di ngolungku bahenonmu asi ni roha ni Jahowa tu ahu nang dung mate ahu:

20:15 Unang tung tostosi asi ni roham sian pinomparhu ro di saleleng ni lelengna, nang dung disiaphon Jahowa angka musu ni si Daud, ganup sian sisik ni tano on.

20:16 Jadi mambahen padan ma si Jonatan tu isi ni bagas ni si Daud, asa marlulu Jahowa dompak angka musu ni si Daud.

20:17 Pola diulahi si Jonatan patolonhon si Daud dibahen holong ni rohana mida ibana, ai doshon dirina ibana dihaholongi.

20:18 Dung i ro ma hata ni si Jonatan tu ibana: Marsogot ma poltak bulan, jadi usousoan ni halak ma ho, ai rumar ma hundulanmu hian dapotonna.

20:19 Alai anggo patoluarihon pasigoponmu ma tuat, jala topotonmu partabunianmu najolo uju di ari pambahenan, jala hundul ma ho di lambung batu Asel.

20:20 Ianggo ahu siorhononku ma tolu sumbia tu lambungna, songon na marsalamat ahu paulaonku.

20:21 Dung i ida ma, suruhononku ma naposo i: Laho ma ho mangalului angka sumbia i! Molo tung dohononku tu naposo i: Ida ma, tartungkanon sian ho angka sumbia i, jomput ma! Sai ro ma ho, ai dame ma taringot tu ho, jala mora soada songon sintongna mangolu Jahowa!

20:22 Alai molo tung songon on hatangku tu dolidoli i: Ida ma, tartungkan adui, tungkan jolom angka sumbia i, denggan ma ho laho, ai Jahowa marsuru ho.

20:23 Alai anggo hata na itapadanhon, ahu dohot ho, ida ma, Jahowa do di tongatonganta ro di saleleng ni lelengna.

20:24 Dung i laho martabuni ma si Daud di ladang. Jadi dung jumpang poltak ni bulan, hundul ma rajai naeng mangan sagusagu.

20:25 Alai dung hundul rajai tu hundulanna hian, songon na somal na sai laon, tu hundulan mardonokkon dorpi; jadi hehe ma anggo si Jonatan, hundul ma anggo si Abner tu lambung ni si Saul; alai rumar do ianggo inganan ni si Daud.

20:26 Alai ndang mangkuling si Saul anggo sadarina i, ai ninna rohana do: Atik tung adong masa di ibana, ra tung ramun ibana, ramun ma tutu tagamon.

20:27 Alai marsogotna i, paduaarihon dung poltak bulan, laos rumar inganan ni si Daud, gabe ro ma hata ni si Saul tu si Jonatan, anakna i: Boasa so ro anak ni si Isai, nang nantoari, nang sadarion mangan sagusagu?

20:28 Jadi ro ma alus ni si Jonatan tu si Saul: Ringkot situtu si Daud mangido tu ahu naeng laho tu Betlehem.

20:29 Pola didok, ua loas ma ahu laho, ai mamele do hami na saompu di bagasan huta i, jala apala dahahang sandiri martona di ahu; on pe, molo maruli asi ni roha ahu sian ho, ua husiluhon ma, asa huida angka dahahang i; alani do umbahen so ro ibana mandapothon meja ni rajai.

20:30 Jadi marpiarpiar ma rimas ni si Saul, mida si Jonatan, ninna ma tu ibana: Anak jea na so siat hata do ho! Nda nunga huboto naung dipillit ho anak ni si Isai mambahen haurahonmu dohot haurahon ni inam na tumubuhon ho?

20:31 Alai saleleng mangolu anak ni si Isai di tano on, ndang tagamon hot ho, nang harajaonmu. On pe suruhon ma mangalap ibana tu ahu, ai anak sibunuon do ibana!

20:32 Jadi ro ma alus ni si Jonatan tu si Saul amana i, ninna ma tu ibana: Boasa tung ingkon bunuon ibana? Aha sala binahenna?

20:33 Jadi dipantomhon si Saul ma mundimundi tu ibana, naeng manullang ibana. Jadi mamoto ma roha ni si Jonatan, naung putus roha ni amana i, naeng mambunu si Daud.

20:34 Dung i hehe ma si Jonatan sian lambung meja i marmurukmuruk situtu, laos so mangan sagusagu ibana paduaarihon dung poltak bulan; ai marsak do rohana taringot tu si Daud, ala na pinamalu ni amana i ibana.

20:35 Dung i manogotna i ruar ma si Jonatan tu ladang di tingki naung jinanjina i tu si Daud, sada dakdanak na metmet donganna.

20:36 Dung i ninna ma mandok naposona i: Marlojong ma ho mangalului sumbia, angka na naeng siorhononku. Dung i marlojong ma naposo i, gabe disiorhon ibana ma sumbia sada salpu sian atas uluna.

20:37 Jadi dung sahat naposo i tu hapatean ni sumbia na siniorhon ni si Jonatan, joujou ma si Jonatan sian pudi ni naposo i, ninna ma: Nda tartungkan adui, tungkan jolom sumbia i?

20:38 Jadi sai joujou si Jonatan sian pudi ni naposo i: Haru silu, hatop ma ho, unang ho mangulon! Jadi dijomput naposo ni si Jonatan ma sumbia i, laos mulak diboan tu tuanna.

20:39 Alai anggo naposo i ndang diboto parbohalon, holan si Jonatan dohot si Daud do masibotoan di hata i.

20:40 Dung i dipasahat si Jonatan ma angka parhohasna tu naposo donganna i, jala ninna ma mandok ibana: Laho ma ho mamboan angka i tu huta.

20:41 Jadi dung laho naposo i, hehe ma si Daud sian sambariba tungkan dangsina jala manungkap tu tano huhut marsomba tolu hali; dung i masiummaan ma nasida huhut tangis be alai gumogo ma ianggo si Daud.

20:42 Dung i ninna si Jonatan ma tu si Daud: Laho ma ho mardamedame! Manang aha naung itabulanhon, hita na dua, marhitehite Goar ni Jahowa, pola tadok: Jahowa do di tongatonganta, dohot di tongatonga ni pinomparhu tu pinomparmu ro di saleleng ni lelengna.

1 Samuel 21

21:1 Dung i hehe ma si Daud laos mardalan; alai anggo si Jonatan mulak do tu huta.

21:2 Dung i sahat ma si Daud tu Nob, manopot malim Ahimelek, jadi tarsonggot ma si Ahimelek manjumpangkon si Daud, jala ninna ma tu ibana: Boasa tung punjung sasada ho, jala soadong donganmu nanggo sahalak.

21:3 Dung i ninna si Daud ma tu malim Ahimelek: Nunga ditonahon rajai sada hata tu ahu, jala didok do mandok ahu: Ndang jadi botoon ni manang ise agia aha taringot tu hata umbahen na husuru ho, jala na hutonahon tu ho; ianggo angka naposo i nunga hudokkon topotonna inganan adui.

21:4 On pe, molo adong manang aha talpe buaton ni tanganmu, manang sagusagu lima, sai lehon ma tu bagasan tanganku, manang aha tahe sipanganon na asing jumpang ho.

21:5 Dung i ninna malim i ma mangalusi si Daud: Ndang adong ianggo sagusagu hian talpe buaton ni tanganku, nda holan sagusagu na marhadohoan adong; asal haramotan angka naposo dirina sian parompuan.

21:6 Jadi ninna si Daud ma mangalusi malim i: Nunga pola tolu ari lelengna tarolat hami sian parompuan tagan so borhat dope ahu; angka ulaula ni angka naposo pe badia do; tung sura pe ramun lapangna on, ingkon gabe badia do i antong sadarion marhitehite ulaula i.

21:7 Jadi dilehon malim i ma tu ibana sagusagu na marhadohoan i, ala so adong disi sagusagu hian, dungkon ni sagusagu sipaidaidaon, angka na binuat sian adopan ni Jahowa, laho mameakkon sagusagu na las di ari pambuatanna i.

21:8 Alai adong do disi sahalak sian angka naposo ni si Saul na tarhurung di jolo ni Jahowa sadarina i, si Doeg goarna marga Edom, induk ni angka parmahan ni si Saul.

21:9 Dung i ninna si Daud ma tu si Ahimelek: Atehe adong do dison talpe buaton ni tanganmu hujur sada manang podang? Ai ndang sanga buaton ni tanganku nang podangku nang sinjatangku, ai mansai ringkot hata ni rajai.

21:10 Dung i ninna malim i ma: Podang ni si Goliat, halak Palistim i naung binunumi di rura parhariaraan, i ma na dison binalutan di bagasan dagangan, di pudi ni baju epod; molo naeng buatonmu i di ho ba buat; ai ndang adong na asing dison dungkonni. Jadi ninna si Daud ma: Ndang adong tudoshon ni dengganna, lehon ma i di ahu.

21:11 Dung i borhat ma si Daud, laos maporus sadarina i maradophon si Saul gabe tolhas ma ibana tu si Akis, raja sian Gat.

21:12 Alai ninna angka naposo ni si Akis ma tu ibana: Nda on do si Daud raja ni luat i? Nda taringot tu ibana do marende taripar angka parompuan songon on: Si Saul manaluhon marriburibu halak, alai anggo si Daud marloksaloksa do ditaluhon.

21:13 Dung i holsoan ma si Daud di bagasan rohana umbege angka hata i, laos tahuton situtu ibana maradophon si Akis, raja sian Gat.

21:14 Pola dipaasing ibana pangalahona di jolonasida jala lalaen ibana dipaula mangaruntarunta sian tangannasida jala diransangi angka hinsuhinsu, jala mabaor gubogubona dibahen tu janggutna.

21:15 Dung i ninna si Akis ma tu angka naposona: Ida ma, nunga diida hamu baoa na lalaen i, boasa tung boanonmuna ibana tu ahu?

21:16 Hurangan angka halak na lalaen do ahu huroha, umbahen boanonmuna jolma on, asa patuduhon lalaenna tu ahu? Tung tama ma jolma sisongon i masuk tu jabungku?

1 Samuel 22

22:1 Dung i laho ma si Daud sian i jala malua tu liang Adullam. Jadi dung dibege angka hahana ro di sandok pinompar ni amana barita i, gabe tuat ma nasida mandapothon ibana tusi.

22:2 Dung i marpungu ma tu ibana sude baoa angka na targogot dohot parutang, ro di sude angka na marsak marroha, jadi ibana ma induknasida, gabe arga opat ratus halak donganna.

22:3 Dung i laho si Daud sian i tu Mispa di Moab, jala ninna ma mandok raja sian Moab; ua loas ma marmeang muli damang dohot dainang di hamu, paima huboto manang aha sibahenon ni Debata tu ahu!

22:4 Jadi ditogihon ma nasida tu jolo ni raja sian Moab, asa tinggal nasida di lambungna saleleng si Daud martanobato di atas dolok.

22:5 Dung i ro ma hata ni panurirang si Gad tu si Daud: Unang ho tinggal di robean martanobato laho ma ho manopot tano Juda. Jadi laho ma si Daud, gabe tolhas ma ibana tu tombak Heret.

22:6 Dung i tarbortik ma tu si Saul barita taringot tu si Daud dohot taringot tu baoa angka donganna i; hundul di Gibea ianggo si Saul di toru ni hariara di atas robean jala hujurna di bagasan tanganna, jala saluhut naposona jongjong di lambungna.

22:7 Dung i ro ma hata ni si Saul tu naposona, angka na jongjong di lambungna: Ua tangihon ma, hamu ale halak Benjamin, tung tagamon ma lehonon ni anak ni si Isai tu hamu sudena angka hauma dohot porlak anggur? Tung tagamon ma pampeonna hamu sude bahen induk ni sasaribu manang induk ni sasaratus?

22:8 Umbahen tung luhut hamu marbulan mangalo ahu, jala so adong manang ise na papatar tu pinggolhu agia aha, gari anakku sandiri marpadanpadan do tu anak ni si Isai, jala ndang adong nanggo sada sian hamu marsahit ni roha taringot tu ahu manang papatarhonsa tu pinggolhu, naung pinahehe ni anakku naposongku mangalo ahu mangonggop ahu, songon na andar nuaeng.

22:9 Jadi ro ma alus ni si Doeg, marga Edom i, na jongjong di lambung ni angka naposo ni si Saul, ninna ma: Nunga huida anak ni si Isai ro tu Nob manopot si Ahimelek, anak ni si Ahitub.

22:10 Ibana ma manungkunhon tu Jahowa taringot tu langkana, dilehon huhut bohal tu ibana, dilehon muse dohot podang ni si Goliat, halak Palistim i, tu ibana.

22:11 Jadi disuru rajai ma suruanna manjou malim Ahimelek, anak ni si Ahitub ro di sandok pinompar ni amana, luhut malim angka na di Nob, jadi ro ma nasida sude manopot rajai.

22:12 Dung i ninna si Saul ma: Ua tangihon ma ale anak ni si Ahitub! Gabe didok ibana ma: Ida ma, dison do ahu, ale tuanku!

22:13 Dung i ninna si Saul ma mandok ibana: Boasa tung marbulan hamu mangalo ahu, ho dohot anak ni si Isai, di na nilehonmu tu ibana roti dohot podang jala naung sinungkunhonmu tu Debata taringot tu langkana, asa hehe ibana mangalo ahu mangarop ahu songon na andar nuaeng?

22:14 Jadi ro ma alus ni si Ahimelek tu rajai, ninna ma: Tung ise ma sian saluhut angka naposom haposan songon si Daud, jala hela ni rajai jala masuk umbege tahi sihabunianmu jala marsangap di bagasan jabum?

22:15 Sadarion pe huroha hupungka manungkunhon tu Debata taringot tu langkana? Dao ma i sian ahu! Unang diampehon rajai hata i tu naposona manang tu sandok pinompar ni damang; ai ndang adong diboto naposom taringot tu saluhutna i, nang hata metmet, nang hata balga.

22:16 Alai ninna rajai ma: Ingkon marutang hosa ho, ale Ahimelek, ho ro di sandok pinompar ni amam.

22:17 Dung i ninna rajai ma tu hupas kapala, angka na jongjong di lambungna: Humusor ma hamu jala bunu hamu angka malim ni Jahowa, ala dohot do tangannasida manumpak si Daud, jala ala diboto nasida na maporus do ibana, hape ndang dipapatar nasida tu pinggolhu Alai ndang olo angka naposo ni rajai manurdukkon tangannasida laho maniham angka malim ni Jahowa.

22:18 Jadi ninna rajai ma tu si Doeg: Humusor ma ho jala tiham ma angka malim i. Jadi humusor ma si Doeg marga Edom i, jala ditiham ibana angka malim i, gabe dibunu ma sadarina i ualupulu lima baoa, angka na marpangkean epod sian hori.

22:19 Dibunu huhut isi ni Nob, huta inganan ni angka malim, marhitehite podang, sian baoa ro di parompuan, sian dakdanak ro di posoposo, nang jonggi ro di halode dohot birubiru dibunu marhitehite baba ni podang.

22:20 Alai malua do sada anak ni si Ahimelek, anak ni si Ahitub, si Abiatar goarna, jala maporus ibana mangihuthon si Daud.

22:21 Jadi dibaritahon si Abiatar ma tu si Daud naung binunu ni si Saul angka malim ni Jahowa.

22:22 Dung i ninna si Daud ma tu si Abiatar: Nunga huboto hian di ari uju i naung disi si Doeg, marga Edom i sai na paboaonna do tu si Saul. Marbilangbilang tu ahu do saluhut hosa ni pinompar ni amam.

22:23 Antong tinggal ma ho donganku, unang ho mabiar, ai manang ise na tumahi hosangki, tahionna ma dohot hosam, ai sinok do ho ramotan di lambungki.