Buku 2 Kronika

2 Kronika ᯄ᯦᯲ᯒᯬᯉᯪᯄ᯦ 1

1:1 Dung i lam hot ma si Salomo, anak ni si Daud, di bagasan harajaonna i, ai Jahowa Debatana mandongani ibana dohot pasangaphon ibana gabe timbul situtu. ᯑᯮᯰ ᯤ ᯞᯔ᯲ ᯂᯖᯬ᯲ ᯔ ᯘᯪ ᯘᯞᯬᯔᯬ ᯀᯉᯄ᯦᯲ ᯉᯪ ᯘᯪ ᯑᯀᯑᯮ᯲ ᯑᯪ ᯅᯎᯘᯉ᯲ ᯂᯒᯐᯀᯉᯬ᯲ᯉ ᯤ ᯤᯀ ᯐᯂᯬᯋ ᯑᯩᯅᯖᯉ ᯔᯉ᯲ᯑᯬᯝᯉᯪ ᯤᯅᯉ ᯑᯬᯂᯖᯬ᯲ ᯇᯘᯝᯇ᯲ᯂᯉᯬ᯲ ᯤᯅᯉ ᯎᯅᯩ ᯖᯔᯪ᯲ᯅᯞᯮ᯲ ᯘᯪᯖᯮᯖᯮ

1:2 Dung i ro ma hata ni si Salomo mandok tu sandok Israel, tu angka induk sisaribu halak dohot sisaratus, tu angka panguhum dohot tu partogi ni sandok Israel, angka induk marompuompu. ᯑᯮᯊ᯲ᯎ᯲ ᯤ ᯒᯬ ᯔ ᯄᯖ ᯊᯪ ᯚᯪ ᯚᯞᯬᯔᯬ ᯔᯊ᯲ᯑᯬᯄ᯦᯲ ᯖᯮ ᯚᯊ᯲ᯑᯬᯄ᯦᯲ ᯤᯚ᯲ᯒᯤᯞ᯲, ᯖᯮ ᯀᯊ᯲ᯎ᯲ᯄ᯦ ᯤᯊ᯲ᯑᯮᯄ᯦᯲ ᯚᯪᯚᯒᯪᯅᯮ ᯄᯞᯄ᯦᯲ ᯑᯬᯄᯬᯖ᯲ ᯚᯪᯚᯒᯖᯮᯚ᯲, ᯖᯮ ᯀᯊ᯲ᯎ᯲ᯄ᯦ ᯇᯊ᯲ᯎᯮᯄᯮᯔ᯲ ᯑᯬᯄᯬᯖ᯲ ᯖᯮ ᯇᯒ᯲ᯖᯬᯎᯪ ᯊᯪ ᯚᯊ᯲ᯑᯬᯄ᯦᯲ ᯤᯚ᯲ᯒᯤᯞ᯲, ᯀᯊ᯲ᯎ᯲ᯄ᯦ ᯤᯊ᯲ᯑᯮᯄ᯦᯲ ᯔᯒᯬᯔ᯲ᯇᯮᯥᯔ᯲ᯇᯮ

1:3 Asa laho nasida, si Salomo ro di sandok luhutan i rap dohot ibana, manopot tambak pamelean na di Gibeon; ai disi do ojak undungundung parluhutan ni Debata, na pinauli ni si Musa, naposo ni Jahowa di halongonan.

1:4 Alai anggo poti ni Debata, nunga diboan si Daud nangkok sian Kiriat Jearim tu inganan na pinadiri ni si Daud tusi; ai nunga dipagohon sada undungundung bahen ingananna di Jerusalem.

1:5 Alai anggo langgatan tombaga na pinauli ni si Bezaleel, anak ni si Uri, tubu ni si Hur, laos disi do di adopan ni undungundung ni Jahowa; jala somal si Salomo dohot luhutan i mangalului Jahowa disi.

1:6 Jadi mamele ma si Salomo disi di adopan ni Jahowa di atas langgatan tombaga na di jolo ni undungundung parluhutan i; dipelehon ma di atasna saribu pelean situtungon.

1:7 Laos di borngin na sasada i tarida Debata di si Salomo, jala didok mandok ibana: Pangido ma manang aha silehononku tu ho.

1:8 Dung i ninna si Salomo ma tu Debata: Nunga dibahen Ho asi ni roha godang tu damang, si Daud i, jala nunga dipabangkit Ho ahu gabe raja singkatna.

1:9 On pe ale Debata Jahowa, sai pasintong ma bagabagami tu damang, si Daud i! Ai nunga sapala dipabangkit Ho ahu gabe raja gumomgom sada bangso, na tudoshon orbuk ni tano i toropna.

1:10 Dibahen i sai lehon ma tu ahu hapistaran dohot parbinotoan, asa huboto marmeang muli songon na tama di adopan ni bangso on; ai tung ise ma na tuk manguhum bangsom on na sai balga i?

1:11 Dung i ninna Debata ma tu si Salomo: Ala na songon i pangidoan ni roham, jala ndang dipangido ho hamoraon, angka arta, manang hamuliaon, manang hosa ni angka musum, manang ginjang ni umur; hapistaran tahe dohot parbinotoan pinangidom di ho, asa botoonmu manguhum bangsongki, naung hupampe ho gabe rajana.

1:12 Dibahen i nunga hubasabasahon tu ho hapistaran dohot parbinotoan. Angkup ni lehononku do tu ho hamoraon dohot arta dohot hamuliaon na so dung adong tudosanna di manang ise raja angka na jumolo sian ho, manang sian pudim pe ndang adong tudosanna.

1:13 Dung i mulak ma si Salomo sian tambak, sian adopan ni undungundung parluhutan na di Gibeon i tu Jerusalem, jala dirajai halak Israel.

1:14 Dung i dipapungupungu si Salomo ma angka hureta dohot jolma parsihundul, pola saribu opat ratus hureta di ibana, jala sampulu dua ribu jolma parsihundul, angka na sinagihonna di bagasan angka huta hajongjongan ni hureta dohot di Jerusalem di lambung ni rajai.

1:15 Dung i dipagodang rajai ma perak dohot sere di Jerusalem, hira doshon batu godangna; tole hau ares, hira antajau na tubu di tano pea godangna.

1:16 Ianggo haroroan ni hoda angka na tu si Salomo sian Misir do, marrongkanrongkan angka saudagar ni rajai mangalap hoda i marhabanhaban, pajak hian ia argana.

1:17 Mararga onom ratus sekkel perak sada hureta, diboan halak nangkok sian Misir, jala saratus limapulu sekkel arga ni sada hoda; laos songon i diboan nasida tu sude raja ni halak Het dohot halak Ram.

1:18 Dung i disangkap si Salomo ma naeng pajongjong sada joro di Goar ni Jahowa dohot sada bagas ojahan ni habangsana.

2 Kronika 2

2:1 Dung i dibilang si Salomo ma pitupulu ribu halak parhuli jala ualupulu ribu halak pandakdak batu di atas dolok, jala tolu ribu onom ratus halak sintua pandasdas di nasida.

2:2 Dung i disuru si Salomo ma suruanna manopot si Hiram raja sian Tirus, ninna ma: Songon na binahenmi tu damang si Daud i manongosi tu ibana hau ares, asa pajongjongonna di ibana sada bagas bahen ingananna, suang songon i ma bahen tu ahu nuaeng.

2:3 Ida ma, naeng ahu pajongjong sada joro di Goar ni Jahowa, Debatangku, bahen habadiaonna, bahen panutungan di daupa na hushus di adopanna dohot padiri tongtong sagusagu na marhadohoan dohot angka pelean situtungon manogotna i dohot bodarina i, angka ari Sabbat dohot di poltak ni bulan dohot di angka ari raya ni Jahowa, Debatanami, gabe patik di Israel ro di salelenglelengna.

2:4 Jala bagas joro na naeng pajongjongonki, ingkon balga do, ai tumongam do Debatanami sian nasa debata sileban.

2:5 Alai tahe tung ise ma na tuk gogo pajongjong sada joro di Ibana? Ai gari langit ni langitan, ndang tarhangkamsa anggo Ibana; tung ise ma ahu pola asa pajongjongonku di Ibana sada joro, nda holan laho manutung daupa nian di adopanna?

2:6 On pe suru ma tu ahu sada halak na pistar marhapandean di sere, perak, tombaga, bosi dohot di panubaron dohot di pansopan dohot na malo manguhir mata intan, rap dohot halak na pistar angka na di lambungku di Juda dohot di Jerusalem, angka na pinadiri ni damang si Daud i.

2:7 Tongoshon huhut tu ahu angka hau ares, sampinur dohot ingul sian Libanon; ai tangkas do huboto na pande do angka naposom pauli hau di Libanon; jala ida ma, ingkon angka naposongku dongan ni angka naposom.

2:8 Asa godang situtu parhau diparade di ahu; ai joro na naeng paulionki, ingkon tongam do tau halongangan.

2:9 Jala ida ma, lehononku do tu pande hau, angka na pauli hau i bahen bohal ni angka naposom duapulu ribu pingkul itak na lamot dohot duapulu ribu bat anggur dohot duapulu ribu bat miak.

2:10 Dung i ninna si Hiram, raja sian Tirus ma di bagasan surat tinongoshonna tu si Salomo: Ala holong ni roha ni Jahowa mida bangsona, umbahen ho dipabangkit gabe raja gumomgom nasida.

2:11 Angkup ni didok si Hiram: Pinuji ma Jahowa, Debata ni Israel, na manompa langit dohot tano, naung mangalehon tu raja Daud sada anak na pistar, na umboto hapantason dohot panimbangon laho pajongjong sada joro di Jahowa dohot sada bagas ojahan ni habangsana!

2:12 Dibahen i husuru ma sada halak na pistar, na umboto panimbangon, i ma damang si Hiram i.

2:13 Anak ni sada parompuan sian pinompar ni si Dan, alai anggo amana halak Tirus do; na pistar do ibana marhapandean di sere, perak, tombaga, bosi hau, di panubaron dohot di pansopan dohot na malo manguhir mata intan dohot manurgasi saluhut ulaon hapistaran, hapandean angka na pineakkon di jolona rap dohot halak na pistar na di ho hian dohot halak na pande ni tuanku, amangmu si Daud i.

2:14 Antong ditongoshon tuanku ma tu angka naposona itak na lamot dohot itak hian, miak dohot anggur, naung pinarbagabagami.

2:15 Asa hutaba hami angka hau sian Libanon manang sadia, asa singkop di ho; hami pe mamboan hau i tu ho marrakitrakit di laut tu Joppe, jala ho muse mamboan nangkok tu Jerusalem.

2:16 Dung i dibilang si Salomo ma sude halak dagang di tano Israel mangihuthon bilangan na binahen ni amana si Daud i di nasida, gabe jumpang ma saratus limapulu tolu ribu onom ratus halak toropna.

2:17 Jadi dipapulik sian i pitupulu ribu halak parhuli, jala ualupulu ribu halak pandakdak batu di dolok, jala tolu ribu onom ratus halak sintua mandasdas situan na torop i tu ulaonna.

2 Kronika 3

3:1 Dung i dipungka si Salomo ma pajongjong joro ni Jahowa di Jerusalem, di atas dolok Moria, naung pinatuduhon hian tu si Daud amana i, di inganan naung pinadiri ni si Daud hian di pardegean ni si Ornan, halak Jebusi i.

3:2 Alai di bulan sipaha dua di suma paopattaonhon hinarajaonna i, dipungka rajai paulihon.

3:3 Jala on do ojahan binahen ni si Salomo laho paulihon joro ni Debata: Unjurna onompulu asta, mangihuthon ungkuran na jolo, jala bohangna duapulu asta.

3:4 Alai anggo emper na di adopan i, duapulu asta unjurna mangihuthon bohang ni joro i, ia timbona duapulu asta do; ianggo parbagasanna i dilampis do i dohot sere na pita.

3:5 Joro ma balga i pe dilampis do i sian bagasan dohot hau sampinur, jala dilampis muse dohot sere palangki, jala diuhir tusi angka hau harambir dohot gabagaba.

3:6 Jala dilohothon tu joro i batu angka na arga situtu bahen sipajagarjagar; alai anggo sere i, sere sian Parwaim do.

3:7 Dilampis muse dohot joro i, angka gulanggulangna, tiangna, lobulobuna, dorpina, angka pintuna dohot sere jala diuhirhon angka rupa ni kerubim di dorpina.

3:8 Dipauli huhut joro i inganan na songkal sahali, unjurna duapulu asta mangihuthon bohang ni joro i, jala bohangna pe duapulu asta do, jala dilampis do i dohot sere na pita, arga onom ratus talenta godangna.

3:9 Jala dokdok ni angka labang pola limapulu sekkel sere, jala dilampis do angka bilut parginjang dohot sere.

3:10 Dibahen huhut di bagasan joro, i ma na songkal sahali, dua kerubim, jadijadian ni pandakdak batu, jala dilampis do i dohot sere.

3:11 Ia habong ni angka kerubim duapulu asta unjurna, ia bohang ni na sada lima asta unjurna, pola dais tu dorpi ni joro i, jala habongna na sadanari laos lima asta do, jala dais tu habong ni kerubim na sadanari.

3:12 Jala habong ni kerubim na sada laos lima asta do, jala dais tu dorpi ni joro i; jala habongna na sadanari laos lima asta do, jala dais tu habong ni kerubim na asing.

3:13 Jadi angka habong ni angka kerubim i mangerbang duapulu asta ganjangna; jala duansa jongjong di atas patna sandiri, jala bohinasida mandompakkon joro i.

3:14 Dipauli huhut rimberimbe sada sian bonang na sinop dohot na tinubar dohot sian haen na halus, jala digorga angka rupa ni kerubim tusi.

3:15 Dibahen huhut di adopan ni bagas i dua tiang, tolupulu lima asta ganjangna, jala uluna di atasna lima asta timbona.

3:16 Dibahen huhut pinartaraoang songon jala dohot ranterante tu ulu ni tiang na di atasna i, dibahen muse saratus parbue ni hau dalimo, jala digantung tu taraoang i.

3:17 Dung i dipajongjong ma angka tiang i di adopan ni joro, sada tu siamun, jala sada tu hambirang, jala dibahen do goar ni tiang na di siamun i Jakin, jala goar ni na di hambirang i Boas.

2 Kronika 4

4:1 Dung i dibahen ma sada langgatan tombaga, duapulu asta unjurna, duapulu asta bohangna, jala sampulu asta timbona.

4:2 Dibahen huhut sada tobat tuangan, sampulu asta sian topina na sada tu topina na sadanari, tingko humaliang, jala lima asta timbona, jala tolupulu asta ganjang ni tali lilitna humaliang.

4:3 Jala di toru ni topina adong angka mutik ni bungabunga tuk humaliang sampulu kibung toropna di bagasan saasta humaliang tobat i; dua rinte mutik ni bungabunga i tartuang di panuanganna.

4:4 Ojak do i di atas ni sampulu dua lombu, tolu uluna mandompakkon utara, tolu uluna mandompakkon pastima, tolu uluna dompak dangsina, jala tolu uluna dompak habinsaran, jala tobat i di atasna, jala ihur ni angka lombu i dompak bagasan do.

4:5 Ia hapalna santopap do, jala topina hira topi ni panginuman, songon bunga pansur na mangerbang, siatsiat tolu ribu bat.

4:6 Dibahen huhut sampulu tong pamurian, lima dibahen tu siamun jala lima tu hambirang bahen pamurian ni ulaula na pinangke tu pelean situtungon, asa dilusak tu bagasan; alai anggo tobat i bahen parburian ni angka malim do i.

4:7 Dibahen huhut sampulu parpalitoan sere suman tu tiruan i, jala dibahen do i tu bagasan joro, lima tungkan siamun jala lima tungkan hambirang.

4:8 Dibahen huhut sampulu meja jala dipajongjong tu bagasan joro i, suang songon bongka ondeng; lima tungkan siamun jala lima tungkan hambirang; dibahen huhut mangkuk pangurasan sian sere saratus toropna.

4:9 Dibahen huhut alaman di angka malim dohot alaman godang, tole angka pintu laho tu alaman godang, jala dilampis pintu i duansa dohot tombaga.

4:10 Ia tobat i dibahen do i tungkan siamun, dingkan habinsaran dompak dangsina.

4:11 Angkup ni dibahen si Hiram do angka hudon, siuksiuk dohot mangkuk pangurasan. Jadi sun ma dibahen si Hiram sandok ulaon na niulana di raja Salomo tu joro ni Debata.

4:12 Na dua tiang i ro di pinarninggor ni ulu angka na di atas ni tiang na dua i dohot taraoang na dua i bahen pangkuphupi na pinarninggor na dua i na di atas ni ulu ni tiang i.

4:13 Tole muse na opat ratus parbue ni hau dalimo na lohot di taraoang i, duadua rinte parbue ni hau dalimo di sada taraoang bahen pangkuphupi ni na dua pinarninggor ni ulu di atas ni tiang na dua i.

4:14 Dibahen muse angka rinti dohot angka hudon di atas ni angka rinti.

4:15 Tole muse tobat i ro di na sampulu dua lombu na di toruna.

4:16 Tole muse angka hudon, siuksiuk dohot garpu; saluhut ulaula na masuk tusi tahe dipandei si Hiram amana i di raja Salomo tu joro ni Jahowa sian tombaga mamolin do.

4:17 Di tano tobing mardonokkon Jordan, didokkon rajai tuangon luhutna i di bagasan tuangan sian tano liat, di holangholang ni Sukot dohot Zaretan.

4:18 Tung na mansai godang situtu sude ulaula angka na binahen ni si Salomo, pola ndang dapot dasingon borat ni tombaga i.

4:19 Didokkon si Salomo huhut paulion sude ulaula angka na masuk tu joro ni Debata, tole langgatan sere dohot angka meja hapeahan ni sagusagu na marhadohoan.

4:20 Tole muse angka parpalitoan rap dohot palitona sian sere na pita, asa pagalahonna di adopan ni partangiangan, songon uhumna hian.

4:21 Tole muse bungabungana, angka palitona dohot gustingna sian sere na pita do i.

4:22 Ro di angka raut, mangkuk pangurasan dohot saoan pardaupaan sian sere na pita do i; tole pintu ni joro i, angka hinsuhinsuna parbagasan na tungkan inganan na songkal sahali, nang hinsuhinsu ni bilut na badia, sian sere do.

2 Kronika 5

5:1 Jadi sun ma sandok ulaon na binahen ni si Salomo tu joro ni Jahowa. Dung i diboan si Salomo ma tu bagasan saluhut ugasan na niuras ni amana si Daud ro di perak dohot sere dohot sude ulaula, jala dipeakkon tu bilut parpeopan arta di bagas ni Debata.

5:2 Dung i dipaluhut si Salomo ma angka sintua ni Israel dohot sude induk ni halak Israel marmargamarga, ro di induk marompuompu tu Jerusalem, naeng boanonna nangkok poti parpadanan ni Jahowa sian huta ni si Daud, i ma Sion.

5:3 Jadi marluhut ma tu jolo ni rajai nasa baoa di Israel di ari raya na di bulan sipaha pitu.

5:4 Jadi dung marluhut sude sintua ni Israel, dihindat halak Lepi ma poti i.

5:5 Dung i diboan nasida ma poti i nangkok, ro di undungundung parluhutan dohot sude ulaula ni habadiaon, angka na di undungundung i na sai laon; laos diboan angka malim dohot halak Lepi do angka i nangkok.

5:6 Alai anggo raja Salomo ro di sandok luhutan ni halak Israel angka na marluhut di lambungna di adopan ni poti i, mamelehon angka birubiru dohot lombu, angka na so tarbilang manang taretong dibahen godangna.

5:7 Jadi sahat ma diboan angka malim poti parpadanan ni Jahowa tu hajongjonganna, tu bilut partangiangan di joro i, tu bagasan bilut na songkal sahali, di toru ni habong ni kerubim na dua i.

5:8 Ai dipaherbang kerubim na dua i do habongna na dua i tu atas hajongjongan ni poti i, laos dihungkupi kerubim na dua i do poti i ro di haluhaluna sian ginjang.

5:9 Juruk do angka haluhalu i pola dapot idaon uluna sian bilut na badia i di adopan ni bilut partangiangan, alai ndang dapot idaon anggo sian ruar; laos disi do i rasirasa sadarion.

5:10 Ndang adong agia aha di bagasan poti i, nda holan na dua lei batu, angka naung pineakkon ni si Musa tusi uju di Horeb, uju na binahen ni Jahowa parjanjian tu halak Israel, dung diparuar nasida sian tano Misir.

5:11 Jadi dung ruar angka malim sian bilut na badia i (ai saluhut malim angka na disi nunga manguras be ndang be dijujur anggo pargansionna.

5:12 Tole muse halak Lepi; angka parende i ro di sude angka na niuluhon ni si Asap, si Heman, si Jedutun ro di angka anaknasida dohot habaangginasida marpangkean haen na halus be, huhut mardongan sarune, arbap dohot biola, jongjong tungkan habinsaran ni langgatan, jala di lambungnasida saratus duapulu malim, angka na umpalu sarunena be.)

5:13 Jadi hira sisada soara begeon halak na umpalu sarune dohot angka na marende laho mamuji dohot mandok mauliate tu Jahowa. Jadi dung dipangiar soara i binahen ni sarune, arbap dohot parhinaloan, angka na asing dohot binahen ni pamujimujon di Jahowa, ala pardengganbasa Ibana jala ro di salelenglelengna do asi ni rohana i, jadi ro ma ombun i manggohi joro ni Jahowa.

5:14 Pola ndang manahan angka malim i jongjong marulaon na badia maradophon ombun i, ai hamuliaon ni Jahowa manggohi joro ni Debata.

2 Kronika 6

6:1 Uju i ma didok si Salomo: Nunga marboaboa hian Jahowa ingkon naeng maringanan Ibana di bagasan haholomon.

6:2 Antong nunga hupauli sada joro parmiananmu, bahen ojahan ni habangsam ro di saleleng ni lelengna.

6:3 Dung i dipahusor rajai ma bohina, asa pasupasuonna sandok luhutan Israel, jala jongjong be do sandok luhutan Israel.

6:4 Dung i ninna rajai ma: Pinuji ma Jahowa, Debata ni Israel, naung marbagabaga hian marhite sian pamanganna sandiri tu damang si Daud i, jala nunga dipasintong nuaeng marhite sian tanganna, uju na nidokna i.

6:5 Olat ni ari uju Ahu manogihon bangsongku ruar sian tano Misir, ndang dung hupillit sada huta sian sandok marga ni Israel paulionna sada joro bahen inganan di Goarhu, jala ndang dung hupillit nanggo sada halak, asa ibana gabe jujungan gumomgom bangsongku Israel.

6:6 Alai nunga hupillit anggo Jerusalem, asa disi Goarhu; jala nunga hupillit anggo si Daud, asa ibana manggomgomi bangsongku Israel.

6:7 Nunga nian disangkap roha ni damang si Daud i, naeng paulionna sada joro di Goar ni Jahowa, Debata ni Israel.

6:8 Alai ninna Jahowa ma mandok damang si Daud i: Ala naung ditahi roham naeng pajongjongonmu sada joro di Goarhu, denggan do nian anggo sangkap ni roham.

6:9 Alai ndada jadi anggo ho pajongjong joro i, ingkon anakmu na ruar sian butuham, ibana pe pajongjong sada joro di Goarhu.

6:10 Nunga tung dipasintong Jahowa hatana, naung pinaboana hian, jala nunga ahu dipahot singkat ni damang si Daud i, jala nunga hundul ahu di atas habangsa ni harajaon Israel, songon na pinaboa ni Jahowa hian, jala nunga ahu pajongjong sada joro di Goar ni Jahowa, Debata ni Israel.

6:11 Jala nunga hubahen tusi poti, parpeopan ni parjanjian ni Jahowa, binahenna tu halak Israel.

6:12 Dung i jongjong ma rajai di adopan ni langgatan ni Jahowa mandompakkon sandok luhutan Israel, jala dipaherbang tanganna.

6:13 Ai nunga dibahen si Salomo hian sada parjamitaan sian tombaga, jala tu tongatonga ni alaman do i dibahen, lima asta unjurna jala lima asta bohangna jala tolu asta timbona. Jadi jongjong ma rajai tu atasna, laos marsinggang di adopan ni sandok luhutan Israel, jala dipaherbang tanganna dompak langit.

6:14 Dung i ninna ma: Ale Jahowa, Debata ni Israel! Ndang adong Debata na tudoshon Ho, nang di banua ginjang, nang di tano on; Ho do tutu pahothon parjanjian dohot asi ni roha tu naposom, angka na marparange di adopan ni Bohim sian nasa rohana.

6:15 Ho do naung pasintongkon tu damang, naposom si Daud i, hata na pinorbagabagam tu ibana; pamanganmu tutu marbagabagahon, jala tanganmu pasintongkon apala sadarion ma.

6:16 On pe, ale Jahowa, Debata ni Israel! Sai pasintong ma tu naposom si Daud, damang i, hata naung pinarbagam hian tu ibana, uju na nidokmu: Ndang jadi hurangan di ho sada baoa di jolongku, na hundul di atas habangsa ni harajaon Israel, asal diramoti angka anakmu dalanmu, marparange nasida di bagasan patikku, songon ho naung marparange di jolongku.

6:17 On pe, ale Jahowa, Debata ni Israel! Sai pasintong ma hatami, naung pinarbagam tu naposom si Daud i.

6:18 Alai tahe, tung tarbahen Debata ma tutu maringan rap dohot jolma i di atas tano on? Ida ma, gari langit ni langitan ndang tuk mangkamham Ho, baliksa apala joro na hupauli on.

6:19 Alai sai manatap ma Ho tu tangiang ni naposom dohot tu parhurajaonna i, ale Jahowa, Debatangku! Sai tangihon ma joujou dohot tangiang, na tinangiangkon ni naposom di adopanmon!

6:20 Sai tonggor ma matam manatap tu joro on borngin dohot arian, tu inganan naung nidokmu: Ingkon disi bahenonmu Goarmu; antong sai tangihon ma tangiang na tinangiangkon ni naposom di inganan on!

6:21 Sai tangihon ma tutu parhurajaon ni naposomon dohot bangsom on Israel, na tinangiangkonnasida di inganan on; sai tangihon ma i tutu sian inganan parhabangsaanmu, sian banua ginjang, tangihon ma tutu, jala marpamuati roham!

6:22 Tung sura mardosa sada baoa dompak donganna, molo dipatolon halak ibana alani, sanga ibana ro jala saut manolon di adopan ni langgatanmon di bagasan joro on.

6:23 Sai manangi ma Ho sian banua ginjang huhut marlulu, asa maruli uhum angka naposom, laho manorui anggo halak parjahat, asa manginona pambahenanna tu uluna sandiri, laho mamintori anggo halak parpintor, mangalehon tu ibana hombar tu hatigoranna i.

6:24 Tung sura talu bangsom Israel maradophon musuna, ala naung mardosa nasida dompak Ho; alai molo mulak nasida tu Ho, jala dihatindangkon Goarmu, jala martangiang nasida huhut marhuraja tu adopan ni bohim di bagasan joro on.

6:25 Sai manangi ma Ho sian banua ginjang, jala marpamuati roham mida dosa ni bangsom Israel, jala boan nasida mulak tu tano naung nilehonmu tu nasida dohot tu ompunasida i.

6:26 Tung sura tarhinsu langit i, gabe ndang ro udan, ala naung mardosa nasida dompak Ho, dung i martangiang nasida di inganan on, jala dihatindangkon nasida Goarmu, jala mulak nasida sian dosanasida i, ala naung tarjepol nasida binahenmu.

6:27 Sai manangi ma Ho di banua ginjang, jala marpamuati roham mida dosa ni angka naposom dohot bangsom Israel, ala naung niajarhonmu tu nasida dalan na denggan i na tama sidalananna, jala lehon udan tu tanom naung nilehonmu tu bangsom bahen partalianna.

6:28 Tung sura masa haleon di tano i, manang begu antuk, manang siraraon hauma, manang antinganoon, manang masa sihapor manang tamponok; molo tung disosak musuna nasida di tano i, pola dirongom pargumbanganna, tung sura masa begu masa manang sahit na asing.

6:29 Nasa tangiang dohot nasa pangidoan manang marsasahalak, manang tung sandok bangsom Israel manangiangkonsa, ala naung mananda be di jea ni harohaonna dohot parsorionna, gabe dipaherbang tanganna dompak joro on.

6:30 Sai manangi ma Ho sian banua ginjang, ojahan ni habangsam, jala marpangulahi roham huhut mangalehon tu ganup hombar tu saluhut dalanna, marguru tu panandam di harohaonna, ai sasada Ho do tumanda roha ni jolma manisia!

6:31 Asa tung dihabiari nasida Ho, jala marparange di bagasan angka dalanmu ariari, saleleng mangolu nasida di tano naung nilehonmu tu ompunasida i.

6:32 Nang halak dagang na so sian bangsom Israel, tung sura ro ibana sian luat na dao ala Goarmu na timbul i dohot ala ni Tanganmu na sun hinagogo i dohot ala ni Botohonmu na toltoli, molo ro ibana tahe martangiang dompak joro on.

6:33 Sai manangi ma Ho sian banua ginjang, sian ojahan ni habangsam, jala bahen ma saluhut hombar tu na pinangido ni halak dagang i tu Ho, asa tung saluhut bangso di tano on mananda di Goarmu, jala marhabiaran tu Ho, suang songon bangsom Israel, asa tung diboto naung sahat jinou Goarmu tu atas joro on na hupauli i.

6:34 Tung sura borhat bangsom laho marporang dompak musuna, di dalan sinurum nasida, jala martangiang nasida tu Ho mandompakkon huta on, naung pinillitmu dohot mandompakkon joro naung hupajongjong di Goarmu.

6:35 Sai tangihon ma tangiang dohot pangidoannasida di banua ginjang, jala pasintong uhum tu nasida!

6:36 Tung sura mardosa nasida dompak Ho (ai ndang adong jolma nanggo sada na so mardosa), gabe tarrimas Ho mida nasida, jala dipasahat Ho nasida tu musuna, asa tung tarbuang nasida tu tano ni musuna na dao manang na donok.

6:37 Dung i dipasuang nasida ma rohanasida tu bagasan di tano habuangannasida i, laos dipauba nasida rohanasida i, jala martangiang tu Ho di tano habuangannasida i songon on: Nunga mardosa hami, nunga huulahon hami hajahaton, jala nunga manggunturi hami.

6:38 Molo tung mulak nasida tu Ho sian nasa rohanasida dohot sian nasa ateatenasida di tano habuangannasida i, jala martangiang nasida mandompakkon tanonasida, naung nilehonmu tu ompunasida i dohot mandompakkon huta naung pinillitmu dohot mandompakkon joro naung hupauli on di Goarmu.

6:39 Sai manangihon ma Ho sian banua ginjang, sian ojahan ni habangsam mangalusi tangiang dohot pangidoannasida, huhut pasintong uhum tu nasida, jala sai marpamuati ma roham mida dosa, angka naung niulahon ni bangsom dompak Ho!

6:40 On pe, ale Debatangku! Sai tonggor ma matam, jala tinggil pinggolmu mangalusi tangiang di inganan on!

6:41 On pe ale Debata Jahowa! Sai hehe ma Ho tumopot paradiananmon, Ho dohot poti ni hamuliaonmu, alai sai marpangkean hatuaon ma angka malimmu bahen, ale Debata Jahowa, jala marlas ni roha ma angka na niasianmu mida denggan ni basam!

6:42 Ale Debata Jahowa! Unang tung tulak bohi ni na miniahanmu, sai ingot ma asi ni roha angka na tu si Daud naposom!

2 Kronika 7

7:1 Jadi dung sun na martangiangi si Salomo, madabu ma api sian banua ginjang mansudahon pelean situtungon dohot angka pelean sipotongon, jala hamuliaon ni Jahowa manggohi joro i.

7:2 Pola ndang manahan angka malim i masuk tu bagasan joro ni Jahowa, ala gok hamuliaon ni Jahowa joro ni Jahowa.

7:3 Jadi dung diida sude halak Israel madabu api i dohot hamuliaon ni Jahowa songgop tu joro i, manungkap be ma nasida tu tano di pantar, jala martangiang huhut mamujimuji Jahowa, ala pardengganbasa Ibana, jala ro di saleleng ni lelengna asi ni rohana i.

7:4 Dung i dipelehon rajai rap dohot sandok bangso i angka pelean sipotongon di adopan ni Jahowa.

7:5 Ia pelean sipotongon angka na pinelehon ni raja Salomo i, i ma duapulu dua ribu lombu dohot saratus duapulu ribu birubiru. Songon i ma panahathon ni rajai dohot sandok bangso i di joro ni Debata.

7:6 Jongjong be angka malim i mangaradoti tohonannasida rap dohot halak Lepi umpalu parhinaloan ni Jahowa, naung pinauli ni raja Daud hian laho mamujimuji Jahowa, ala ro di salelenglelengna asi ni rohana i, huhut marendehon ende Psalmen angka na binahen ni si Daud; jala angka malim umpalu angka sarune patondong dohot nasida, jongjong do anggo sandok Israel.

7:7 Dung i diuras si Salomo ma alaman parbagasan i na di adopan ni joro ni Jahowa; ai disi do dipelehon angka pelean situtungon dohot tabotabo ni angka pelean hamauliateon, ai ndang siat anggo tu langgatan tombaga na binahen ni si Salomo angka pelean situtungon dohot sipanganon ro di tabotabo.

7:8 Dung i marari raya ma si Salomo uju i, pola pitu ari lelengna rap dohot sandok Israel, sada luhutan na bolon situtu, olat ni Hamat sahat ro di sunge Misir ro tusi.

7:9 Tole paualuarihon disi ma mata ni ari raya i; ai panahathonna di langgatan pitu ari lelengna, ari raya i pe laos pitu ari lelengna.

7:10 Tole paduapulutoluarihon di bulan sipaha pitu, dipamuli rajai ma bangso i tu undungundungna be, marlas ni roha be jala sonang ala sude na denggan, na binahen ni Jahowa tu si Daud, tu si Salomo pe dohot tu Israel, bangsona i.

7:11 Jadi sun ma dibahen si Salomo joro ni Jahowa dohot bagas ni rajai; jala nasa esehesek na tubu di bagasan roha ni si Salomo laho pajongjong joro ni Jahowa dohot bagasna sandiri pe manjadi do.

7:12 Ro muse Jahowa pataridahon dirina tu si Salomo bornginna i, jala ninna ma mandok ibana; nunga hutangihon tangiangmi, jala nunga hupillit inganan on di Ahu bahen joro pamelean.

7:13 Ida ma, tung sura tarhinsu langit i hubahen, gabe ndang ro udan, manang molo hudokkon angka sihapor, asa suda gogo ni tano i panganonna, manang molo hudokkon ro begu antuk di tongatonga ni bangsongku.

7:14 Ia dung dipaunduk bangsongku, na targoar tu Goarhu rohana, jala martangiang nasida, jala dilului Bohingku, jala mulak nasida sian dalannasida, angka na roa i, Ahu pe tangihononku do sian banua ginjang, jala marpamuati rohangku di dosanasida i, jala pamalumonku ma isi ni tanona.

7:15 Antong ingkon tonggor matangku, jala tinggil pinggolhu tumangihon tangiang di inganan on.

7:16 On pe nunga hupillit jala huparbadiai joro on, asa disi Goarhu ro di salelenglelengna; matangku pe dohot rohangku, ingkon disi do manatap ariari.

7:17 Alai anggo ho, molo tung marparange ho di jolongku, suang songon amam si Daud i marparange, jala diulahon ho saluhut hombar tu na hutonahon i tu ho, jala diradoti ho aturanku dohot uhumhu.

7:18 Jadi pahotonku ma habangsa ni harajaonmi, hombar tu naung huparbagabaga tu amam si Daud i, mandok songon on: Ndang jadi hurang di ho sada baoa panggomgomi di Israel.

7:19 Alai molo tung marbalik hamu dohot manadingkon aturanku dohot tonangku, angka naung hupeakhon di jolomuna, pola hamu laho mangoloi angka debata sileban dohot marsomba tusi.

7:20 Jadi ripashononku ma nasida sian tanongku, naung hulehon i tu nasida, jala joro on naung huparbadiai di Goarhu, padaoonku ma i sian jolo ni Bohingku, jala bahenonku nasida gabe pambuatan umpama dohot gabe alingalingan di tongatonga ni saluhut bangso.

7:21 Ia joro on naung timbul sahali, pola tung longang roha ni ganup na mamolus sian i, huhut mandok: Boasa ulaning bahenon ni Jahowa songon i tu tano on dohot tu joro on?

7:22 Dung i dohonon ni halak ma mangalusi: Ala na tinadingkonnasida i Jahowa, Debata ni ompunasida i, naung manogihon nasida ruar sian tano Misir, gabe marsitiopan nasida tu angka debata sileban, huhut marsomba tusi jala dioloi, ala ni do umbahen diparo Ibana luhut jea on tu nasida.

2 Kronika 8

8:1 Jadi dung salpu na duapulu taon lelengna raja Salomo paulihon joro ni Jahowa dohot bagasna sandiri.

8:2 Dipagonting si Salomo huhut huta angka na pinaulak ni si Hiram tu si Salomo, jala disagihon halak Israel maringan disi.

8:3 Dung i borhat ma si Salomo tu Hamat-Zoba jala dipapatu do i.

8:4 Dung i dipagonting ibana ma huta Tamar di halongonan, ro di sude huta parpeopan arta, angka na pinagontingna di Hamat.

8:5 Dipagonting muse Bethoron julu dohot Bethoron jae, asa gabe huta na gonting situtu, marparik, marpargumbangan dohot marransangransang.

8:6 Tole muse Baalat dohot sude huta parpeopan arta, angka na di si Salomo, ro di sude huta inganan ni hureta porang dohot sude huta inganan ni jolma parsihundul dohot nasa esehesek ni si Salomo, na hinalomohon ni rohana naeng paulionna di Jerusalem, di Libanon dohot di sandok tano ginomgomanna i.

8:7 Anggo saluhut halak situan na torop i na tinggal sian halak Het i, Amori, Perisi, Hevi dohot Jebusi, angka na so sian halak Israel.

8:8 Pinomparnasida i tahe, angka na tinggal sian pudinasida di tano i, angka na so nirendephon ni halak Israel, angka i ma hona rodi dibahen si Salomo rasirasa sadarion.

8:9 Alai anggo sian halak Israel ndang adong nanggo sahalak hona ulaon rodi dibahen si Salomo; ingkon gabe jolma parmusu nasida, gabe induk ni angka ulubalangna dohot induk ni angka huretana porang ro di angka jolma parsihundul.

8:10 Jala on do induk angka na pinabangkit mamatamatahon ulaon na nidokkon ni raja Salomo, dua ratus limapulu halak toropna.

8:11 Dung i didokkon si Salomo ma boanon nangkok boru ni si Firaun sian huta ni si Daud tu jabu naung pinaulina di nasida, ai ninna do: Ndang jadi maringan jolmangku di bagasan jabu ni si Daud, raja ni Israel, ai badia do angka inganan i, ala naung masuk tusi poti ni Jahowa.

8:12 Olat ni ma si Salomo mamelehon angka pelean situtungon tu Jahowa di atas langgatan ni Jahowa, na pinajongjongna di adopan ni emper i.

8:13 Ganup di arina be dipelehon hombar tu tona ni si Musa, di angka ari Sabbat, di poltak ni bulan, di angka ari raya naung binuhul, tolu hali di bagasan sataon, i ma di ari raya sagusagu na so niasoman, tole ari raya sisaminggu dohot di ari raya parlapelapean.

8:14 Dung i didokkon rajai ma jongjong angka malim marguru tu gansina mangaradoti tohonanna, hombar tu uhum na binahen ni si Daud, amana i, tole halak Lepi mangaradoti tohonanna laho mamujimuji Debata dohot marhalado di adopan ni angka malim i, ganup di arina be; tole angka sijaga bahal marningot gansina be di ganup bahal; ai songon i do parenta ni si Daud, halak ni Debata.

8:15 Jala ndang adong nanggo sahalak na mangalaosi tona ni rajai taringot tu angka malim dohot halak Lepi dohot taringot tu sude hata dohot arta.

8:16 Jadi sun ma dipadiri saluhut ulaon ni si Salomo sahat ro di ari haoojak ni joro ni Jahowa, sahat ro di sunna tahe. Jadi sun ma tutu joro ni Jahowa.

8:17 Uju i ma laho si Salomo tu Esion Geber dohot tu Elat na di topi laut di bagasan tano Edom.

8:18 Dung i ditongos si Hiram ma tu ibana angka kopal marhite sian naposona dohot naposo angka na somal marlayar di laut. Jadi marlayar ma nasida rap dohot naposo ni si Salomo tu Opir, jala diboan sian i sere opat ratus limapulu talenta godangna jala diboan do i tu raja Salomo.

2 Kronika 9

9:1 Ia raja boruboru sian Saba, dung dibege barita ni si Salomo, ro ma nasida tu Jerusalem naeng masiujian dohot si Salomo marundangundang, mardongan parangan mansai tongam, tole unto, angka na mangusung na hushus marragamragam dohot sere mansai godang dohot mata intan. Jadi dung sahat nasida tu jolo ni si Salomo, dipaboaboa ma tu ibana saluhut na di bagasan rohana i.

9:2 Jadi dipatorang si Salomo tu nasida sude sungkunsungkunna, jala ndang adong na buni nanggo sada sian roha ni si Salomo, na so pinatorangna tu nasida.

9:3 Jadi dung diida raja boruboru sian Saba hapistaran ni si Salomo dohot bagas na pinaulina i.

9:4 Tole sipanganon di mejana, tole partordingna hundul angka naposona, tole panagam ni angka parhaladona dohot pangkeannasida, tole angka sitahu anggurna dohot pangkeannasida, tole partanggaonna laho nangkok tu joro ni Jahowa, jadi hira na tarmali tondinasida.

9:5 Laos didok ma mandok rajai: Sintong do hape barita i na hubege di luathu, taringot tu aturan binahenmi dohot taringot tu hapistaranmu.

9:6 Ndang nian diparhatongon rohangku jolo barita i, paima ro ahu tuson, gabe diida matangku; hape ida ma, nanggo satongana ndang dibaritahon halak tu ahu sian hinagodang ni hapistaranmi; dilompoi hapistaranmi do barita na hubage i.

9:7 Martua ma halak parhaladom, martua ma dohot angka naposom, angka na tongtong marhalado di adopanmu pabegebege hapistaranmu!

9:8 Pinuji ma Jahowa Debatam, na marlomo ni roha mida ho laho pabangkithon ho tu atas habangsana, bahen raja singkat ni Jahowa Debatam! Ala holong ni roha ni Debatam mida Israel, naeng pahotonna do i ro di salelenglelengna, umbahen dipabangkit Ibana ho gabe raja gumomgom nasida, mangulahon uhum dohot hatigoran.

9:9 Dung i dilehon boruboru i ma tu rajai saratus duapulu talenta sere dohot pamurpuri mansai godang dohot mata intan; ndang dung ro be pamurpuri na sai godang, songon na nilehon ni raja boruboru sian Saba tu raja Salomo.

9:10 Tole muse angka naposo ni si Hiram rap dohot naposo ni si Salomo, angka na mamboan sere sian Opir, mamboan dohot hau jati dohot mata intan.

9:11 Dung i didokkon rajai ma paulion sian hau jati angka handanghandang di joro ni Jahowa dohot di jabu ni rajai, tole angka hasapi dohot tulila di halak parende; ndang dung diida songon i mansam ni hau jati di tano Juda anggo nasailaonna i.

9:12 Raja Salomo i pe dilehon do tu raja boruboru sian Saba sandok guru lomo ni rohana dohot pangidoanna, so padohot na binoannasida tu rajai. Dung i muli ma nasida tu tanona rap dohot angka naposona.

9:13 Dokdok ni sere pe na ro tu si Salomo di bagasan sataon arga onom ratus onompulu onom talenta sere do.

9:14 So padohot sere na dapotsa sian halak pangallung dohot sian partigatiga pansar dohot sian saluhut raja ni Arab dohot sian halak na mora di tano i angka na mamboan sohe sere dohot perak tu si Salomo.

9:15 Dung i didokkon raja Salomo ma paulion dua ratus lombulombu sian sere na pinapita pola onom ratus sekkel sere di lampishon tu sada lombulombu.

9:16 Dipauli huhut tolu ratus lombulombu parinse sian sere na pinapita, pola tolu ratus sekkel sere dilampishon tu sada parinse; tu bagasan jabu na di tombak Libanon angka i dipambahen rajai.

9:17 Dung i didokkon rajai ma paulion sada habangsa na bolon sian gading, jala lampisanna do i dohot sere palangki.

9:18 Onom do talha ni habangsa i jala sada sidegean ni pat sian sere lohot tu habangsa i, dua siradeon ni tangan angkupangkup be humaliang hundulani, jala dua suman ni singa jongjong di lambung siradeon i.

9:19 Jongjong huhut disi sampulu dua suman ni singa di atas ni na onom talha i angkupangkup be. Ndang dung songon i dope hapandean ni halak manang di harajaon dia.

9:20 Nang saluhut mangkuk panginuman ni raja Salomo sian sere do, jala saluhut ulaula ni jabuna di tombak Libanon sian sere na pinapita do, ai hira na so marguna do anggo perak di roha ni halak uju di tingki ni si Salomo.

9:21 Ai angka kopal ni rajai angka na marlayar tu Tarsis rap dohot angka naposo ni si Hiram; sahali di bagasan tolu taon ro angka kopal Tarsis mamboan sere, perak, gading, bodat dohot angka pidong uo.

9:22 Dung i tumimbul ma raja Salomo sian saluhut raja ni tano on taringot tu hamoraon dohot hapistaran.

9:23 Nasa raja ni tano on tahe marsangkap naeng idaonna bohi ni si Salomo, naeng huhut begeonna hapistaranna naung nilehon ni Debata tu bagasan rohana.

9:24 Jadi angka diboan be siluana gonop taon, i ma angka ulaula perak dohot sere dohot angka pangkean dohot sinjata marragamragam dohot pamurpuri, tole angka hoda hian dohot hoda na marsahe.

9:25 Pola siat opat ribu hoda dohot hureta jongjong di bara pinauli ni si Salomo, jala sampulu dua ribu jolma parsihundul, angka na sinagihonna di bagasan angka huta hajongjongan ni hureta dohot di Jerusalem di lambung ni rajai.

9:26 Jala marunduk tu rajai do sude angka raja olat ni batang aek Euprat sahat ro di tano ni halak Palistim, jala sahat tu partalpahan ni Misir.

9:27 Dung i dipagodang rajai perak i di Jerusalem, hira doshon batu godangna, tole angka hau ares hira antajau na tubu di tano pea godangna.

9:28 Ianggo haroroan ni hoda tu raja Salomo sian Misir do diboan halak dohot sian angka luat humaliang.

9:29 Ia jamita angka na tinggal i dope sian si Salomo, angka na parjolo dohot parpudi, nda tarsurat do i di bagasan buku ni panurirang Natan dohot di bagasan buku panurirangon ni si Ahia sian Silo dohot di bagasan buku pangungkapon ni si Ido sinurirangkonna taringot tu si Jerobeam, anak ni si Nebat.

9:30 Jadi opatpulu taon lelengna si Salomo mangarajai di Jerusalem gumomgom sandok Israel.

9:31 Dung i monding ma si Salomo gabe top dohot angka ompuna, jala tartanom ibana di bagasan huta ni si Daud amana i. Jadi Rehabeam anakna i bangkit raja singkatna.

2 Kronika 10

10:1 Dung i laho ma si Rehabeam tu Sikem, ai nunga marpungu sandok Israel di Sikem naeng parajahon ibana.

10:2 Jadi dung dibege si Jerobeam, anak ni si Nebat barita i uju di Misir dope ibana, ai maporus tusi ibana maradophon raja Salomo, gabe mulak si Jerobeam sian Misir.

10:3 Ai nunga disuru nasida hian suruanna manjou ibana. Dung i ro ma si Jerobeam rap dohot sandok Israel, asa mandok hatana tu si Rehabeam songon on.

10:4 Ianggo amanta nahinan dokdok do auganami dibahen, alai anggo ho sai paneang ma rodi na poran binahen ni amanta i dohot auga na dokdok na niampehonna i tu hami, asa marunduk hami tu ho.

10:5 Dung i ninna rajai ma tu nasida: Tolu ari nari ulahi hamu ma ro tu ahu. Jadi muli ma bangso i.

10:6 Dung i martuptup ma raja Rehabeam dohot sintua, angka dongan satuptupan ni raja Salomo amana i andorang di ngoluna, ninna ma: Songon dia panuturimuna, patut alusta tu bangso on?

10:7 Jadi didok nasida ma tu ibana: Molo basar ho tu situan na toropon dohot sumambut lomonasida dohot mandok hata na lambok tu nasida, jadi mangunduk tu ho ma nasida saleleng ho mangolu.

10:8 Alai ditadingkon rajai do panuturion tinuturhon ni angka na tuatua laho ibana martuptup dohot halak na umposo, angka donganna magodang, angka na jongjong di adopanna.

10:9 Dung i didok ma tu nasida: Ia hamuna, dia do panuturimuna patut alusta tu bangso on, na mandok tu ahu songon on: Sai paneang ma auga na niampehon ni amanta nahinan tu hami?

10:10 Dung i ninna halak na umposo i ma angka donganna magodang tu ibana, ingkon songon on dohononmu tu bangso i, na mandok tu ho hata on: Ianggo amanta nahinan dokdok do auganami dibahen, alai anggo ho sai paneang ma auganami; songon on do tama dohononmu tu nasida: Umbolon do anak ni tanganku sian haehae ni damang.

10:11 On pe, dokdok pe auga na niampehon ni damang nahinan tu hamu, alai anggo ahu lam dumokdok dope bahenonku augamuna; ia damang linsinglinsing hian do dibahen maminsang hamu, alai anggo ahu hala do bahenonku maminsang hamu.

10:12 Tole patoluarihon ro ma si Jerobeam rap dohot sandok bangso i mandapothon si Rehabeam, marningot janji ni rajai na nidokna i: Ulahi hamu patoluarihon ro tu jolongku.

10:13 Jadi koras ma alus ni rajai tu nasida, ai nunga ditadingkon raja Rehabeam panuturion ni angka na tuatua i.

10:14 Jadi ninna rajai ma tu nasida, hombar tu panuturion ni halak na umposo i songon on: Dokdok pe auga na niampehon ni damang nahinan tu hamu, alai anggo ahu lam dumokdok dope ampehononku tu hamu; ia damang linsinglinsing hian do dibahen maminsang hamu, alai anggo ahu hala do bahenonku maminsang hamu.

10:15 Asa ndang dioloi rajai pangidoan ni bangso i, ai marharoroan sian Debata do hata i, asa naeng mangkajongjongkon hatana do Jahowa naung nilumbahonna hian marhitehite si Ahia sian Silo tu si Jerobeam, anak ni si Nebat.

10:16 Jadi dung diida sandok Israel, na so nioloan ni rajai pangidoannasida i, ro ma alus ni bangso i mandok tu rajai: Aha do parjambaranta dibahen si Daud? Ndang adong partalianta dibahen anak ni si Isai. Beta hita, ale Israel, mulak ganup tu undungundungna be! On pe paingotingot angka isi ni bagasmu sandiri, ale Daud! Jadi muli ma sandok Israel tu undungundungna be.

10:17 Alai anggo halak Israel angka na maringan di angka huta ni Juda, angka nasida ma dirajai si Rehabeam.

10:18 Dung i disuru raja Rehabeam ma si Adoniram, sintua papungu guguan, hape didangguri halak Israel do ibana dohot batu pola mate. Dung i hapogan ma raja Rehabeam manaek tu huretana laho maporus tu Jerusalem.

10:19 Jadi bali ma Israel sian pinompar ni si Daud rasirasa sadarion.

2 Kronika 11

11:1 Jadi dung sahat si Rehabeam tu Jerusalem, dipaluhut ma sandok pinompar ni si Juda dohot si Benjamin, saratusualupuluribu halak sialo musu angka na pinillit, naeng marmusu dompak Israel, asa pasuangkon nian harajaon i tu si Rehabeam.

11:2 Alai ro ma hata ni Jahowa tu si Semaya, halak ni Debata songon on:

11:3 Dok ma tu si Rehabeam, anak ni si Salomo, raja sian Juda dohot tu sandok Israel di Juda dohot di Benjamin, songon on.

11:4 Boti hata ni Jahowa: Ndang jadi hamu nangkok, jala ndang jadi hamu marmusu garembong dompak hahaanggimuna! Mulak ma hamu ganup tu jabuna be, ai marharoroan sian Ahu do hata on. Jadi ditangihon nasida ma hata ni Jahowa, laos mulak nasida sian na borhat i dompak si Jerobeam.

11:5 Alai maringan di Jerusalem do anggo si Rehabeam, jala dipagonting angka huta di Juda bahen paraloan.

11:6 Dipagonting ma: Betlehem, Etham, Tekoa.

11:7 Betzur, Soko, Adullam.

11:8 Gat, Maressa, Sip.

11:9 Adoraim, Lakis, Azeka.

11:10 Zora, Aiyalon dohot Hebron, i ma angka huta na gonting di Juda dohot di Benjamin.

11:11 Laos dipatogu ma angka huta paraloan i, jala dibahen tusi angka induk jala dipagodang tusi sipanganon miak dohot anggur.

11:12 Diparade muse tu bagasan ganup huta i angka lombulombu dohot hujur, jala dipagonting situtu angka huta i: Asa mangunduk tu ibana do Juda dohot Benjamin.

11:13 Tole angka malim dohot halak Lepi, angka na di sandok Israel mandapoti ibana sian sandok partalpahannasida i.

11:14 Ai ditadingkon halak Lepi do huta partaliannasida i dohot ugasanna laho bali tu Juda dohot tu Jerusalem, ala naung dipabali si Jerobeam dohot angka anakna i nasida sian ulaon malim di adopan ni Jahowa.

11:15 Laos si Jerobeam do pabangkit di ibana angka malim mamele tu angka tambak, tu angka begu dohot tu lombu angka na binahenna i.

11:16 Mangihut tu halak Lepi do sian sandok marga ni Israel halak angka na mangalehon rohanasida naeng mangalului Jahowa, Debata ni Israel; ro be do nasida tu Jerusalem, asa mamele tu Jahowa, Debata ni ompunasida i.

11:17 Jadi lam tu toguna do harajaon Juda, patogar roha ni si Rehabeam, anak ni si Salomo, tolu taon lelengna; ai tolu taon lelengna nasida marparange di dalan ni si Daud dohot si Salomo.

11:18 Dung i dibuat si Rehabeam ma si Mahalat, boru ni si Jerimot, anak ni si Daud bahen jolmana, angkup ni si Abihail, boru ni si Eliab, anak ni si Isai.

11:19 Jadi tubuan anak ma ibana: Si Jeus, si Semaria dohot si Saham.

11:20 Dung i dibuat muse ma si Maaka, boru ni si Absalom, na manubuhon di ibana: Si Abia, si Ahai, si Sisa dohot si Selomit.

11:21 Alai humolong do roha ni si Rehabeam mida si Maaka boru ni si Absalom, asa mida sude jolmana dohot radingna. Ai sampulualu parompuan dioli, jala onompulu radingna, jala ditubuhon duapulu ualu anak, dohot onompulu boru.

11:22 Dung i dipabangkit si Rehabeam ma si Abia, anak ni si Maaka bahen partogi dohot induk di tongatonga ni angka hahaanggina, ai naeng pabangkitonna ibana gabe raja.

11:23 Jala marbisuk pambahen ni rajai, disagihon do saluhut angka anakna tu sandok luat ni Juda dohot Benjamin, di bagasan huta angka na pinagontingna i, jala marlobilobi di parbohalon nasida dibahen, jala torop parompuan diririt bahen jolmanasida.

2 Kronika 12

12:1 Alai dung lam hot harajaon ni si Rehabeam, jala lam marhuaso ibana, ditadingkon rohana ma patik ni Jahowa, rap dohot sandok Israel.

12:2 Dibahen i palimataonhon dung raja si Rehabeam, nangkok ma raja Sisak sian Misir mandopang Jerusalem, ala naung mardosa nasida dompak Jahowa.

12:3 Manguluhon saribu dua ratus hureta porang dohot onompulu ribu jolma parsihundul, jala ndang habilangan anggo situan na torop angka na ro rap dohot ibana sian halak Misir, halak Libia, Suki dohot Kus.

12:4 Dung i dipapatu ma sude huta na gonting, angka na di Juda, pola sahat ibana tu Jerusalem.

12:5 Dung i ro ma panurirang Semaya manopot si Rehabeam dohot angka induk sian Juda, angka na manginsurut tu Jerusalem maradophon Sisak, jala didok mandok nasida: Songon on do hata ni Jahowa: Nunga ditadingkon hamu Ahu, dibahen i Ahu pe nunga hupasahat hamu tu bagasan tangan ni si Sisak.

12:6 Jadi dipaunduk angka induk ni halak Israel dohot rajai ma rohanasida angka ninna ma: Bonar do Jahowa!

12:7 Alai dung diida Jahowa naung dipaunduk nasida rohanasida i, ro ma hata ni Jahowa tu si Semaya songon on: Nunga dipaunduk nasida rohanasida i, dibahen i ndang be mago nasida bahenonku, magira ma Ahu mangalehon haluaon tu nasida, asa unang apala use parsigorgor ni rimashu tu Jerusalem marhite sian tangan ni si Sisak.

12:8 Alai ingkon mangunduk nasida di ibana, asa tung diboto nasida parsirangna mangoloi Ahu sian na mangoloi di angka harajaon ni luat ni halak na asing.

12:9 Jadi nangkok ma raja Sisak sian Misir mandopang Jerusalem, jala dilaum angka arta sian joro ni Jahowa dohot arta sian bagas ni rajai, tung luhut do dilaum ro di lombulombu parinse sian sere, angka na pinauli ni si Salomo.

12:10 Dung i didokkon raja Rehabeam ma paulion angka lombulombu tombaga bahen singkatna, jala dipasahat do i tu tangan ni partogi ni parangan, angka na marhal di lambung pintu ni jabu ni rajai.

12:11 Manang piga hali pe rajai masuk tu bagasan joro ni Jahowa, sai ro do angka parangan i mangusung angka parinse i, dung i dipaulak muse tu bilut ni angka parangan i.

12:12 Ala songon i pinaunduk ni rajai rohana sumurut ma rimas ni Jahowa sian ibana, asa unang tung sahali diago luhutna, ai adong dope tinggal ruhut na denggan di halak Juda.

12:13 Dung i mangulahi marhuaso ma raja Rehabeam di Jerusalem jala mangarajai, ai marumur opatpulu sada taon si Rehabeam di na bangkit raja, jala sampulu pitu taon lelengna ibana mangarajai di Jerusalem, huta na pinillit ni Jahowa sian nasa marga ni Israel, bahen parmianan ni Goarna. Ia goar ni ina ni rajai Naema, boru Amon do.

12:14 Dung i diulahon rajai ma hajahaton, ai ndang marsihohot rohana dibahen laho mangalului Jahowa.

12:15 Alai anggo jamita ni si Rehabeam, angka na parjolo dohot parpudi, nda tarsurat do i di bagasan buku jamita ni panurirang Semaya dohot di bagasan buku sundutsundut, sinurat ni partondung Ido? Alai sai tong tangging humusuon i di holangholang ni si Rehabeam dohot si Jerobeam.

12:16 Dung i monding ma si Rehabeam gabe top dohot angka ompuna, jala tartanom di bagasan huta ni si Daud, jala si Abia anakna i bangkit raja singkatna.

2 Kronika 13

13:1 Pasampuluualutaonhon dung raja si Jerobeam, bangkit raja ma si Abia di Juda.

13:2 Tolu taon lelengna ibana mangarajai di Jerusalem; ia goar ni inana si Mikha, boru ni si Uriel sian Gibea. Dung i tubu ma hamusuon di holangholang ni si Abia dohot si Jerobeam.

13:3 Jala si Abia jumolo bingkas mardongan parduaan ni parangan angka na begu opat ratus ribu halak, angka na pinillit; si Jerobeam pe paodor paranganna mangalo ibana, ualu ratus ribu halak na pinillit, jala na begu donganna.

13:4 Dung i nangkok ma si Abia tu atas ni dolok Semaraim, na di tor Epraim, jala ninna ma: Tangihon ma hatangkon, ho ale Jerobeam dohot sandok Israel!

13:5 Atehe ndang diboto hamu naung nilehon ni Jahowa, Debata ni Israel, harajaon Israel tu si Daud ro di salelenglelengna tu ibana dohot tu pinomparna, pola mardongan sira padanna.

13:6 Hape hehe ma si Jerobeam, anak ni si Nebat, naposo ni si Salomo, anak ni si Daud, laos manggunturi dompak tuanna.

13:7 Jala marpungu tu lambungna do baoa angka na neang marroha, angka anak na jahat situtu, angka na manggogo be mangalo si Rehabeam, anak ni si Salomo; bajar dope anggo si Rehabeam jala biahat marroha, umbahen so hum ibana mangalo nasida.

13:8 Hape ditahi rohamuna nuaeng naeng manggaga mangalo dompak harajaon ni Jahowa, na pinegang ni angka anak ni si Daud; tutu do nian mansai torop hamu, jala donganmuna lombu sere i, angka na binahen ni si Jerobeam, bahen debata sileban di hamu.

13:9 Nda nunga dipabali hamu angka malim ni Jahowa, pinompar ni si Aron, dohot halak Lepi, laos hamu pabangkit malim di hamu manuman pambahen ni angka bangso parbegu marluatluat? Ganup na ro mamboan sada lombu naposo dohot pitu birubiru tunggal mangido pabangkiton, i do dipabangkit hamu gabe malim di debata sileban.

13:10 Alai anggo hami on, Jahowa do Debatanami, jala ndang dung hutadingkon hami Ibana; angka malim pe, angka na marhalado di Jahowa, angka anak ni si Aron do, jala halak Lepi mangaradoti tohonanna be.

13:11 Sai tole do nasida ganup sogot ganup potang manutung angka pelean situtungon di Jahowa, tole daupa na hushus marragamragam. Huhut diparade roti di atas meja na badia i, tole angka parpalitoan sere dohot palito na pinagalakna ganup bodari; ai anggo hami sai huradoti hami do pangoloion tu Jahowa, Debatanami, alai anggo hamu nunga ditadingkon hamu Ibana.

13:12 Dibahen i ida ma, Debata sandiri do manguluhon anggo hami dohot malimna ro di angka sarune panonggahi, asa marsoara toletole mangalo hamu! Hamu ale pinompar ni Israel, unang marporang hamu dompak, Debata ni ompumuna i; ai ndang tagamon marantu hamu!

13:13 Alai didokkon si Jerobeam ma halak bahen paronggopan, asa ro sian pudinasida, asa paranganna di adopan ni Juda, jala halak pangonggopi sian pudinasida.

13:14 Jadi dung hamusor halak Juda, ida ma turtar do marporang dompak nasida sian jolo dohot sian pudi. Jadi mangangguhi ma nasida tu Jahowa, jala umpalu sarunena angka malim i.

13:15 Dung i manggogo marsurak toletole halak Juda. Jadi dung marsurak toletole halak Juda, ditaluhon Debata ma si Jerobeam dohot sandok Israel maradophon si Abia dohot Juda.

13:16 Jadi maporus ma halak Israel maradophon halak Juda, jala dipasahat Debata nasida tu bagasan tanganna.

13:17 Tung pamunuon na rahat situtu do dipamasa si Abia dohot bangsona di tongatonganasida, marragean do sian Israel lima ratus ribu halak angka na pinillit.

13:18 Jadi tarjepol situtu ma halak Israel uju i, alai lam margogo ma anggo halak Juda, ai marpangatauan tu Jahowa, Debata ni ompunasida i do nasida.

13:19 Dung i dieak si Abia ma si Jerobeam, laos dilaum sian ibana angka huta on: Betel ro di pagaran angka na masuk tusi; Jesana ro di pagaran angka na masuk tusi dohot Epron ro di pagaran angka na masuk tusi.

13:20 Laos so maruli gogo be manuhenuhe anggo si Jerobeam saleleng mangolu si Abia. Dung i dipastap Jahowa ma ibana laos mate ibana.

13:21 Jadi dung lam mardohar si Abia, dibuat ma sampulu opat parompuan bahen jolmana, jala ditubuhon duapulu dua anak jala sampulu onom boru.

13:22 Jamita na tinggal i dope sian si Abia, angka dalanna pe dohot pangkataionna tarsurat do i di bagasan buku jamita sian panurirang Ido.

13:23 Dung i monding ma si Abia gabe top dohot angka ompuna, jala tartanom ibana di huta ni si Daud; jadi si Asa, anakna i bangkit raja singkatna. Uju hinarajaonna i mardemak ma tano i sampulu taon lelengna.

2 Kronika 14

14:1 Jala diulahon si Asa do na denggan dohot lomo ni roha ni Jahowa, Debatana i.

14:2 Ai dipaholang do angka langgatan pamelean tu debata sileban dohot angka tambak, jala ditapori angka ganaganaan jala ditaba angka sombaon.

14:3 Dung i martingting ma ibana tu Juda mandokkon mangalului Jahowa, Debata ni ompunasida i dohot mangulahon patikna dohot tonana.

14:4 Dipaholang huhut sian saluhut huta ni Juda angka tambak dohot tiang parsombaan. Jadi mardemak ma harajaon i di hinarajaonna i.

14:5 Dipungka huhut angka huta na gonting di Juda, ala mardemak tano i, jala ndang masa hamusuon dompak ibana di angka taon uju i; ai Jahowa do manumpak ibana sonang.

14:6 Dung i ro ma hata ni rajai tu halak Juda: Tole ma itapauli ma angka huta on jala itapagonting parikna humaliang, tole angka partanobatoan, pargumbangan dohot ransangransang, ai hita dope nampuna tano i, ala italului, Jahowa, Debatanta i, italului Ibana tutu jadi ditumpak hita sonang humaliang. Jadi tole ma nasida umpungka huta, laos manjadi do antong.

14:7 Dung i adong ma di si Asa sada parduaan parangan, angka na marlombulombu dohot marhujur, sian Juda tolu ratus ribu jala sian Benjamin angka na marlombulombu parinse dohot do umboto manintak sior dua ratus ualupulu ribu halak; luhutna i angka ulubalang na begu do.

14:8 Dung i borhat ma mandopang nasida si Jara, halak Etiopia manguluhon paranganna sajuta halak toropna dohot tolu ratus hureta porang, pola sahat ibana tu Maressa.

14:9 Jadi borhat ma si Asa manjumpangkon ibana, rap dipaodor do paranganna di rura Zera mardonokkon Maressa.

14:10 Dung i joujou ma si Asa tu Jahowa, Debatana, ninna ma: Ale Jahowa, ndang adong dia imbarna anggo di Ho, manolongi halak na margogo dohot na so margogo; sai tolongi ma hami, ale Jahowa, Debatanami, ai tu Ho do hami marpangatauan, jala mangasahon Goarmu do hami umbahen na ro mangalo halak na toropon! Ale Jahowa, Ho do Debatanami! Sai unang ma margogo jolma na gale i, anggo so mardonganhon Ho.

14:11 Dung i ditaluhon Jahowa ma halak Etiopia maradophon si Asa dohot Juda, gabe maporus halak Etiopia.

14:12 Dung i dieak si Asa rap dohot bangso donganna i ma nasida, sahat ro di Gerar. Jadi marragean ma halak Etiopia, ndang tarbahen nasida be manuhenuhe, ai tung rendep do nasida maradophon Jahowa dohot maradophon paranganna i; jadi maruli tabantaban halak Juda mansai godang.

14:13 Dipapatu nasida huhut sude huta angka na humaliang Gerar, ai nunga madabu hasonggoton sian Jahowa tu nasida, gabe halak Juda martaban duduk sude huta i, ai mansai godang tabantaban di bagasan.

14:14 Tole huhut angka undungundung ni dorbia dapotsa gabe diboan mansai godang birubiru dohot unto, dung i mulak nasida tu Jerusalem.

2 Kronika 15

15:1 Dung i songgop ma Tondi ni Debata tu si Azaria, anak ni si Obet.

15:2 Jadi ruar ma ibana manjumpangkon si Asa jala didok ma tu ibana: Tangihon ma hatangkon, ho ale Asa dohot sandok Juda dohot Benjamin! Nunga didongani Jahowa hamu, ala marsitiopan hamu tu Ibana; molo tung laos dilului rohamuna Ibana, sai jumpang hamu do Ibana; alai molo tung hamu manadingkon Ibana, tadingkononna ma hamu.

15:3 Alai pola nania lelengna sogot halak Israel so mardebata na sintong, jala so marmalim pangajari, jala so marpatik be.

15:4 Alai molo nionjar ni haporsuhon niaena i nasida paubahon rohana tu Jahowa, Debata ni Israel, jala luluanna Ibana, sai na jumpang nasida do Ibana.

15:5 Alai di angka tingki uju i ndang marhasonangan jolma na marmeang muli, ai haporsuhon angka na balga do masa tu sandok isi ni tano on.

15:6 Ai masijonapan ma disi bangso sama bangso, jala huta sama huta; ai Debata do manonggoti nasida marhite sian haporsuhon marragamragam.

15:7 Alai anggo hamu, pir ma tondimuna, jala unang daukdauk boti tanganmuna i, ai sai na marupa do sogot ulaonmuna i.

15:8 Jadi dung dibege si Asa angka hata ondeng dohot panurirangon ni panurirang Obet, pir ma tutu tondina i, dipadao ma angka ganaganaan na ronsam sian sandok tano Juda dohot Benjamin dohot sian huta angka na pinapatuna sian dolok Epraim, jala dipaimbaru do langgatan ni Jahowa na di adopan ni emper di joro ni Jahowa.

15:9 Dung i dipaluhut ma sandok Juda dohot Benjamin rap dohot halak dagang angka sian Epraim, Manasse dohot Simeon, ai mansai torop halak bali tu ibana sian Israel, dung diida nasida Jahowa Debatana mandongani ibana.

15:10 Jadi marluhut ma nasida tu Jerusalem di bulan sipaha tolu, pasampululimataonhon harajaon ni si Asa.

15:11 Jadi di na sadari i mamele ma nasida tu Jahowa sian tabantaban, na binoannasida i, pitu ratus lombu jala pitu ribu birubiru.

15:12 Dung i diparata nasida ma padani marbagahon luluanna Jahowa, Debata ni ompunasida i sian nasa rohana dohot sian nasa ateatena.

15:13 Jala manang ise na so mangalului Jahowa, Debata ni Israel, ingkon marutang hosa do, nang dakdanak, nang na magodang, nang baoa, nang parompuan.

15:14 Pola marbulan nasida tu Jahowa marsoara na balga, huhut mardongan olopolop, hasapi dohot sarune.

15:15 Jadi marlas ni roha sandok Juda mida bulanna i; ai marbulan do nasida sian nasa rohanasida, jala dilului nasida Ibana sian nasa lomonasida, gabe jumpang nasida Ibana tutu, jadi marhasonangan ma nasida humaliang, ditumpak Jahowa.

15:16 Nang si Maaka, inana i dipaijur raja Asa sian tohonanna raja, ala pinaulina i sada ganaganaan di sombaon Asera. Dung i disiaphon si Asa ma ganaganaan i jala ditutung di bagasan rura ni sunge Kidron.

15:17 Alai ndang dipaholang anggo angka joro parsantian sian Israel; sai tong do nian marsihohot roha ni si Asa tu Jahowa saleleng mangolu ibana.

15:18 Diboan huhut tu bagasan joro ni Debata ugasan, angka na pinarbadiaan ni amana, pinarbadiaanna sandiri pe, angka sere, perak dohot ulaula marragamragam.

15:19 Jala ndang adong masa hamusuon sahat ro di patolupululimataonhon harajaon ni si Asa.

2 Kronika 16

16:1 Tole patolupuluonomtaonhon harajaon ni si Asa, nangkok ma si Baesa, raja sian Israel mandopang Juda, jala dipagonting huta Rama, asa unang tarbahen manang ise marmeang muli tumopot Asa, raja sian Juda.

16:2 Dung i diparuar si Asa ma sian angka arta na di joro ni Jahowa dohot di bagas ni rajai sere dohot perak, jala ditongoshon do i tu si Benhadad, raja sian Ram, na maringan di Damaskus, ninna ma.

16:3 Tibu hian do hita marjanji, sian amanta be dope; dibahen manongos perak dohot sere ahu tu ho, asa laho ho manulakkon parjanjianmu tu si Baesa, raja sian Israel, asa sumurut ibana sian ahu.

16:4 Jadi ditangihon si Benhadad ma hata ni raja Asa, jala disuru angka partogi ni paranganna mandopang angka huta ni Israel, gabe dipapatu ma huta Ijon, Dan dohot Abel Maim ro di sude huta parpeopan bohal di Naptali.

16:5 Dung sahat barita i dibege si Baesa, mansohot ma ibana pagonting Rama, laos dipasadi ma ulaonna i.

16:6 Dung i santibalatuk ma sandok Juda, didokkon raja Asa, asa diusung nasida angka batu dohot hau sian Rama, naung pinauli ni si Baesa, laos dipangke rajai do i pauli huta Geba dohot Mispa.

16:7 Uju i ma ro panurirang Hanani manopot si Asa, raja sian Juda, jala ninna ma mandok ibana: Ala naung marpangunsandean ho tu raja sian Ram, jala ndang ho marpangunsandean tu Jahowa, Debatam, ala ni nunga malua parangan ni raja ni Ram sian tanganmu.

16:8 Nda torop situtu do parangan ni halak Kus dohot Libia najolo mardongan torop situtu hureta porang dohot jolma parsihundul? Alai ala marpangunsandean ho tu Jahowa, gabe dipasahat Ibana nasida tu bagasan tanganmu.

16:9 Ai manatap manonggor do mata ni Jahowa manatap sandok tano on humaliang, laho mangalehon gogo tu halak parroha na marsitiopan tu Ibana. Dibahen i hata oto do i na binahenmon, ai olat ni on masa ma hamusuon di ho.

16:10 Alai marronirimas ma si Asa tu panurirang i, pola dibeangkon ibana di bagasan bagas hurungan, ai piripirion ibana mida panurirang ala hatana i; angkup ni dirupa si Asa uju i deba sian halak situan na torop i.

16:11 Dung i ida ma, jamita ni si Asa, angka na parjolo dohot parpudi tarsurat do angka i di bagasan buku rajaraja sian Juda dohot Israel.

16:12 Tole patolupulusiataonhon ni harajaonna i sarion ma patna duansa, mansai posi diae sahitna i. Alai nang di bagasan sahitna i, ndada Jahowa dilului rohana, tagonan do pandaoni.

16:13 Dung i monding ma si Asa gabe top dohot angka ompuna, paopatpulusadataonhon hinarajaonna i ibana mate.

16:14 Dung i tartanom ibana di bagasan tanomanna sandiri naung tinuhilna hian di bagasan huta ni si Daud. Dung i dipeakkon nasida ma ibana tu lagena naung sinirsiran dohot sira na hushus marragamragam, pinadiri ni halak na pande mangkapur, ditutung huhut sada pamurunan apala na balga sahali pasangap rajai.

2 Kronika 17

17:1 Dung i si Josapat, anakna i, bangkit raja singkatna, jala dipatomos dirina mangalo Israel.

17:2 Ai disagihon do angka parangan di saluhut huta ni Juda angka na gonting i, dipambahen huhut angka parduaan parangan di tano Juda dohot di huta ni Epraim, angka na pinapatu ni si Asa amana i.

17:3 Jala didongani Jahowa do si Josapat, ala marparange ibana di bagasan dalan ni si Daud ompuna i, angka na parjolo i, jala ndang marsungkun ibana tu angka Baal.

17:4 Sai dilului rohana do tahe Debata ni amana, jala marparange ibana di bagasan angka tonana, ndang songon pambahenan ni halak Israel dibahen.

17:5 Jadi dipahot Jahowa ma harajaon i di bagasan tanganna, pola sandok halak Juda mangalehon silua tu si Josapat, gabe marhamoraon jala marhamuliaon situtu ibana.

17:6 Jadi dung lam marsihohot rohana marparange di angka dalan ni Jahowa, lam dipaholang dope angka joro parsantian dohot sombaon Asera sian Juda.

17:7 Tole patolutaonhon hinarajaonna i dipaborhat ma angka indukna: Si Benhail, si Obaja, si Sakaria, si Netaneel dohot si Mikha, asa mangajari nasida di angka huta ni Juda.

17:8 Dibahen huhut dongannasida halak Lepi: Si Semaya, si Netania, si Sebadia, si Asael, si Semiramot, si Jonatan, si Adonia, si Tobia dohot si Tob-Adonia halak Lepi; dongannasida muse: Malim Elisama dohot si Joram.

17:9 Jadi mangajari ma nasida di Juda, dipaboanboan nasida huhut buku patik ni Jahowa, gabe diebati nasida sude huta ni Juda humaliang huhut mangajari halak situan na torop i.

17:10 Dung i madabu ma songgotsonggot sian Jahowa songgop tu sude harajaon ni luat angka na humaliang Juda, gabe ndang hum marmusu dompak si Josapat.

17:11 Tole deba halak Palistim mamboan silua perak tu si Josapat bahen sohe; nang halak Arab mamboan tu ibana dorbia, pitu ribu pitu ratus birubiru tunggal jala pitu ribu pitu ratus hambing tunggal.

17:12 Jadi lam leleng, lam timbul ma si Josapat, pola marmulia situtu. Jadi dipungka ma di Juda angka huta na gonting dohot huta parpeopan bohal.

17:13 Godang situtu bohal dipagukguk di angka huta ni Juda, ia angka baoa parmusu dohot ulubalang di Jerusalem do.

17:14 Jala on do bilangannasida marompuompu. Sian Juda angka induk manguluhon saribu halak: Si Adna induk jala donganna tolu ratus ribu halak ulubalang niuluhonna.

17:15 Jala donganna induk i ma si Johanan, jala dua ratus ualupulu ribu halak niuluhonna.

17:16 Donganna induk muse i ma si Amasia, anak ni si Sikri, na pasahathon dirina tu Jahowa sian nasa rohana, jala dua ratus ribu ulubalang niuluhonna.

17:17 Jala sian Benjamin: Si Eliada sada halak ulubalang jala na niuluhonna dua ratus ribu halak, angka na marsinjatahon sior dohot lombulombu.

17:18 Jala donganna induk i ma si Josabad, jala na niuluhonna saratus ualupulu ribu halak, angka na tang be borhat tu parporangan.

17:19 Angka i ma parhalado ni rajai, so padohot angka na sinagihon ni rajai tu bagasan huta angka na gonting di sandok Juda.

2 Kronika 18

18:1 Jadi marhamoraon godang ma si Josapat jala marhamuliaon situtu, hape martondong ibana tu si Ahab.

18:2 Dung i di laonlaon ni ari tuat ma rajai tu Samaria manopot si Ahab. Dung i didokkon si Ahab ma patongon di rajai, dohot di halak donganna i torop birubiru dohot lombu, dung i dielaela ma rajai nangkok tu Ramot di Gilead.

18:3 Ai didok si Ahab, raja sian Israel ma tu si Josapat, raja sian Juda: Atehe olo do ho haraonku laho marmusu dompak Ramot di Gilead? Dung i didok rajai ma tu ibana: Ia songon i ho, songon i do ahu, ia songon i bangsom, songon i do bangsongku, donganmu pe hami di hamusuonon.

18:4 Angkup ni ninna si Josapat tu raja sian Israel: Ua marsungkun ho jolo sadarion tu hata ni Jahowa.

18:5 Dung i dipaluhut raja sian Israel ma angka panurirang, opat ratus halak toropna, jala ninna ma mandok nasida: Atehe na jadi do hami laho marporang dompak Ramot di Gilead, manang na so jadi? Dung i ninna angka nasida ma: Jadi do ho nangkok, sai na pasahaton ni Debata do huta i tu bagasan ni tangan ni rajai.

18:6 Alai ninna si Josapat ma: Atehe ndang adong be dison nanggo sada panurirang ni Jahowa, asa marsungkun tu ibana hita?

18:7 Dung i ninna raja sian Israel ma tu si Josapat: Adong dope nian dison sada halak, tarsungkun hita do nian Jahowa marhite sian ibana, alai sogo do rohangku mida ibana, ai ndang dung adong na denggan nanggo sada disurirangkon ibana tu ahu, sai holan jea do ariari; i ma si Mika, anak ni si Jimla. Dung i ninna si Josapat ma: Unang nian songon i hata ni rajai!

18:8 Dung i dijou raja sian Israel ma sada halak siramoti bagasna, ninna ma: Hatop boan tuson si Mika, anak ni si Jimla.

18:9 Alai anggo raja sian Israel dohot si Josapat, raja sian Juda, hundul ganup di habangsana be, jala marpangkean harajaon: Hundul do nasida tahe di partungkoan mardonokkon pintu harbangan ni Samaria, jala saluhut angka panurirang i manurirangi di adopannasida.

18:10 Ia si Sedekia, anak ni si Kenaana, nunga dibahen hian di ibana angka tanduk bosi, huhut didok: Songon on do hata ni Jahowa: Marhite sian angka on tambingonmu ma halak Ram, paima sun siap nasida bahenonmu.

18:11 Sude angka panurirang i laos songon i do disurirangkon, ninna do: Nangkok ma ho tu Ramot di Gilead, sai na marantu do ho! Jala pasahaton ni Jahowa do nasida tu bagasan tangan ni rajai.

18:12 Ia suruan naung laho i manjou si Mika mandok hian tu ibana songon on: Ida ma, sauduran do hatahata ni angka panurirang i mandok na denggan tu rajai; dibahen i hatamu pe, sai songon hata ni sahalak sian nasida ma, sai hatahon ma na denggan.

18:13 Alai ninna si Mika ma: Songon sintongna mangolu Jahowa, manang aha sipaboaon ni Debata tu ahu, i do hatahononku!

18:14 Jadi dung sahat ibana tu jolo ni raja, ninna rajai ma tu ibana: Atehe ale Mika, na jadi do hami laho marporang tu Ramot di Gilead, manang na so jadi? Dung i ninna ibana ma: Laho ma hamu nangkok, sai na marantu do hamu, jala sai na sahat do nasida tu bagasan tanganmuna.

18:15 Alai ninna rajai ma tu ibana: Ingkon intap piga hali ho patolononku, paboa na so hatahononmu tu ahu, nda holan hasintongan marhite sian Goar ni Jahowa?

18:16 Dung i ninna si Mika ma: Nunga hutatap hian sandok Israel marserak di atas ni angka dolok, songon birubiru na so adong na marmahan. Dung i ninna Jahowa ma: Ndang martuan angka ndian; mulak be ma ganup tu jabuna mardamedame!

18:17 Dung i ro ma hata ni raja sian Israel tu si Josapat: Nda nunga hudok hian tu ho, ndang tagamon agia aha na denggan surirangkononna tu ahu, nda holan jea do?

18:18 Dung i didok si Mika ma: Dibahen i tangihon hamu ma hata ni Jahowa: Nunga hutatap hian Jahowa hundul di atas habangsana, jala sandok parangan ni banua ginjang tindang di siamunna dohot di hambirangna.

18:19 Dung i ninna Jahowa ma: Ise ulaning olo mangelaela si Ahab, asa nangkok ibana jala tinggang mardonokkon Ramot di Gilead? Dung i masidok sian ibana be do nasida.

18:20 Dung i ruar ma sada tondi panurirangon laos jongjong tu adopan ni Jahowa, jala ninna ma: Ahu ma mangela ibana. Dung i ninna Jahowa ma tu ibana: Marhite sian aha do?

18:21 Dung i ninna ibana ma: Ruar ma ahu gabe tondi sipaotooto di bagasan pamangan ni saluhut angka panurirangna. Dung i ninna Jahowa ma: Saut ma ibana elaelaonmu, jala ingkon monang ho; antong ruar ma ho jala ulahon ma songon i!

18:22 Nuaeng pe, ida ma, nunga dilehon Jahowa tondi sipaotooto tu bagasan pamangan ni saluhut panurirangmon, jala nunga dilumbahon Jahowa hian ro jea tu ho.

18:23 Dung i ro ma jumonok si Sedekia, anak ni si Kenaana, dipastap ma hurum ni si Mika, huhut didok: Beha nimmu, hira naung munsat Tondi ni Jahowa sian ahu, mandok tu na sasada ho huroha?

18:24 Dung i ninna si Mika ma: Ida ma, sanga do i idaonmu di ari hapoporusmu sian bilut na sada tu bilut na sada laho martabuni nian.

18:25 Dung i didok raja sian Israel ma: Tangkup hamu ma si Mika, jala boan ibana mulak tu si Amon, induk ni huta i dohot tu si Joas, anak ni rajai.

18:26 Jala dohononmuna ma: Songon on do hata ni rajai: Bahen hamu ma baoa on tu hurungan, jala lehon hamu ibana mangan sagusagu pardangolan dohot tapian pardangolan, paima mulak ahu mardamedame.

18:27 Dung i ninna si Mika ma: Molo tung mulak ho marsonangsonang, ndang tutu naung marlumba Jahowa marhite sian ahu; pola ninna muse dope: Tangihon ma hata i, hamu ale angka bangso luhutna.

18:28 Dung i nangkok ma raja sian Israel dohot si Josapat, raja sian Juda, tu Ramot di Gilead.

18:29 Jadi ninna raja sian Israel ma tu si Josapat: Patinda rupa ma anggo ahu ro tu tongtangan, alai anggo ho pangkeanmu hian ma pangke. Jadi patinda rupa ma anggo raja sian Israel laho tu parporangan nasida.

18:30 Alai nunga martona hian raja sian Ram tu angka induk panahatan ni huretana, songon on: Ndang jadi hamu mardopur dompak halak na metmet manang na magodang, nda holan dompak raja sian Israel sasadasa.

18:31 Jadi dung diida angka induk panahatan ni huretai si Josapat, ninna rohanasida ma: Rupa ibana do raja sian Israel, gabe ibana ditahopi nasida naeng paranganna; alai mangangguhi ma si Josapat, jala Jahowa mangurupi ibana, jala dipaundar Debata ma nasida sian ibana.

18:32 Jadi dung diida angka induk panahatan ni huretai, ndada ibana hape raja sian Israel, sumurut ma nasida sian ibana.

18:33 Alai adong ma sada baoa na manintak siorna, ndang manang ise nian tinujuna, hape hona do raja sian Israel sian pardomuan ni baju partahanan i. Dung i ninna rajai ma tu jolma sihosing huretana: Hosingkon ma huretai dohot tanganmu, jala togu ahu haruar sian tongtangan i, ai nunga mabugang ahu.

18:34 Hape lam tu ragatna marporang di na sadari i, laos jongjong rajai di bagasan huretana ditungkol paadopadop dohot halak Ram sahat ro di bodari, dung i mate ma rajai di na mate mata ni ari.

2 Kronika 19

19:1 Alai anggo si Josapat, raja sian Juda, mulak do mardamedame tu jabuna di Jerusalem.

19:2 Dung i ruar ma manjumpangkon ibana panurirang Jehu, anak ni si Hanani, jala ninna ma tu raja Josapat: Tung na jadi ma di roham tolongan halak parjahat manang haholongan halak na hinagigihon ni Jahowa? Marmuruk situtu Jahowa ala ni mida ho.

19:3 Alai adong dope tahe jumpang ruhut na denggan sian ho, ala naung disiaphon ho angka sombaon Asera sian tano i jala nunga dipadiri ho roham, naeng mangalului Debata.

19:4 Dung i maringan di Jerusalem ma si Josapat; alai diulahi muse borhat maningkir bangso i sian Berseba sahat ro di dolok Epraim, jala mulak nasida ditogihon tu Jahowa, Debata ni ompunasida i.

19:5 Dung i dipabangkit ma angka panguhum di luat i, di bagasan saluhut huta ni Juda angka na gonting i, tung diganupi do huta i sadasada.

19:6 Dung i didok rajai ma tu angka panguhumi: Manat timbangi hamu na binahenmuna! Ai ndada di jolma hamu mandabu uhum, di Jahowa do, di lambungmuna do Ibana uju mandok uhum hamu.

19:7 Nuaeng pe sai songgop ma tu hamu biar mida Jahowa, sai ramoti hamu dirimuna, jala torang ulahon hamu! Ai ndang masa anggo di Jahowa Debatanta i uhum hageduhon, manang marmiak ni bohi, manang panjaloon sisip.

19:8 Nang di huta Jerusalem dipabangkit si Josapat deba sian halak Lepi dohot angka malim dohot sian angka induk marompuompu di Israel mangaradoti uhum ni Jahowa dohot paputus parbadaan; alai sai mulak nasida tu Jerusalem.

19:9 Dung i gogo ma rajai mandok tu nasida: Ingkon songon i bahenonmuna di bagasan biar mida Jahowa, di bagasan hasintongan dohot sian roha sisangunjur.

19:10 Nasa parbadaan tahe na tarboan tu jolomuna sian hahaanggimuna, angka na maringan di hutanasida be taringot tu mudar na durus, taringot tu partorang ni patik, tona, angka aturan dohot uhum, ingkon ajaranmuna nasida, asa unang marsala nasida tu Jahowa, gabe songgop maon rimasna tu hamu dohot tu hahaanggimuna i. Antong bahen hamu ma songon i, asa unang marsala hamu.

19:11 Jala ida ma, sintua ni malim Amasia do jujunganmuna taringot tu saluhut hata tu Jahowa; jala si Sebadia, anak ni Ismael, jujungan di pinompar ni Juda taringot tu sude hata tu rajai; tole muse halak Lepi bahen panuturi di jolomuna. Antong pir ma tondimuna laho mangulahon songon i! Jala sai donganan ni Jahowa do panguhum na denggan marroha!

2 Kronika 20

20:1 Jadi dung salpu angka i, ro ma halak Moab dohot Amon, jala dongannasida halak Maoni marporang dompak si Josapat.

20:2 Dung i ro ma halak paboahon barita i tu si Josapat songon on: Na ro ma mandopang ho mansai torop parangan sian bariba ni laut, sian Ram, jala ida ma, nunga sahat nasida tu Haseson-Tamar, i ma Engedi.

20:3 Jadi godoron ma si Josapat, huhut dipatohom bohina mangalului Jahowa, jala didokkon maningtingkon sada parpuasaon tu sandok Juda.

20:4 Dung i marluhut ma sandok Juda mangido pangurupion sian Jahowa; ro do huhut halak sian saluhut huta ni Juda mangalului Jahowa.

20:5 Dung i jongjong ma si Josapat di tongatonga ni luhutan Juda dohot Jerusalem, di bagasan joro ni Jahowa, di adopan ni alaman na imbaru i.

20:6 Dung i ninna ma: Ale Jahowa, Debata ni ompunami, nda Ho do Debata di banua ginjang, Ho huhut panggomgomi di sude harajaon ni angka bangso parbegu? Tongon tahe di bagasan tanganmu do hagogoon dohot hatogaron, jala ndang adong nanggo sahalak na tarbahen manahan anggo maradophon Ho.

20:7 Nda nunga dipabali Ho, ale Debatanami, angka isi ni tano on maradophon bangsom Israel, jala nunga pola dibasabasahon Ho tano i tu pinompar ni si Abraham, hasudungan ni roham ro di salelenglelengna?

20:8 Jadi nunga maringan nasida disi jala nunga pola dipajongjong di Ho disi sada bagas habadiaon di Goarmu, nunga pola didok nasida:

20:9 Tung sura ro tu hami hinamago manang podang, torutoru, begu antuk manang haleon, ingkon jongjong hami di adopan ni joro on dohot di adopan ni Bohim; ai maringan di bagasan jabu on do Goarmu! Ingkon joujou hami tu Ho sian haporsuhon na huae hami, gabe tangihononmu jala urupanmu hami!

20:10 Ia nuaeng, ida ma, ro halak Amon dohot Moab dohot halak sian tor Seir, na so niloasmu halak Israel mamolus sian luatna, uju ro nasida sian tano Misir, lam mamedu nasida pasiding nasida, asa unang ingkon ripashononna nasida.

20:11 Jala ida ma, ro nasida nuaeng tutu naeng mamaloshon tu hami, naeng pabalihon hami sian partaliannami, naung binasabasahonmu teanonnami.

20:12 Asi roham, ale Debatanami! Tung so marlulu Ho dompak nasida? Ai ndang margogo anggo hami maralohon parangan na toropon, na ro mangalo hami; jala ndang huboto hami manang aha sibahenonnami, sai tu Ho do mangaranap matanami.

20:13 Jadi sandok Juda jongjong di adopan ni Jahowa, rap dohot posoposonasida, angka jolmanasida dohot anaknasida.

20:14 Alai songgop ma Tondi ni Jahowa di tongatonga ni luhutan i tu si Jehasiel, anak ni si Sakaria, i ma anak ni si Benaia, i ma anak ni si Jeiel, anak ni Matania, halak Lepi sian pinompar ni si Asap.

20:15 Jala ninna ma: Tangihon ma hatangkon, hamu ale sandok Juda dohot isi ni Jerusalem, dohot ho, ale raja Josapat! Songon on do hata ni Jahowa tu hamu: Unang hamu mabiar, jala unang godoron hamu maradophon parduaan ni parangan na toropon, ai ndada hamu suhut di hamusuonon, Debata do.

20:16 Ingkon manogot hamu tuat mandapothon nasida! Ida ma, nangkok do nasida sian nangkohan Sis, jala dapot hamu do nasida di ujung ni rura di adopan ni halongonan Jeruel.

20:17 Sandok ndada hamu marporang sahalion, ingkon hohom be hamu jongjong disi, huhut paidaidahon tua sibahenon ni Jahowa tu hamu, ale halak Juda dohot Jerusalem! Unang hamu mabiar, jala unang godoron hamu! Manogot ma hamu borhat mandapothon nasida, sai na donganan ni Jahowa do hamu!

20:18 Jadi marsomba ma si Josapat, pola manungkap tu tano bohina, sandok Juda pe dohot isi ni Jerusalem marsinggang be di adopan ni Jahowa, asa martangiang tu Jahowa.

20:19 Dung i hehe ma halak Lepi sian pinompar ni si Kohat dohot sian pinompar ni si Kora, laos jongjong mamujimuji Jahowa, Debata ni Israel, pola dipagogo situtu soarana be.

20:20 Jadi dipasogot nasida ma manogotna i borhat mardalan tu halongonan Tekoa. Jadi di na borhat i nasida jongjong ma si Josapat huhut didok: Tangihon ma hatangkon, hamu ale halak Juda dohot isi ni Jerusalem: Sai porsea ma hamu di Jahowa, Debatamuna i, asa marsihohot rohamuna; porsea hamu huhut di angka panurirangna, asa marantu hamu.

20:21 Dung i martuptup ma rajai dohot situan na torop i, jala dipajongjong angka parende di Jahowa, asa mamujimuji nasida marpangkean habadiaon laho borhat mardalan di adopan ni parangan na tang be marsinjata, jala dohononna: Mandok mauliate ma hamu tu Jahowa, ai ro di saleleng ni lelengna do asi ni rohana i.

20:22 Jadi andorang mamungka nasida marsoara olopolop dohot pujipujian, didokkon Jahowa ma ro halak parbajo sian pangaropan manahopi halak Amon, Moab dohot halak sian tor Seir, angka na ro mamorang Juda nian, gabe tunduk nasida dibahen.

20:23 Ai marmusu tihus hian halak Amon dohot Moab dompak isi ni dolok Seir, naeng mangkaromhon dohot maniaphon nasida. Jadi dung sun siap isi ni dolok Seir, masilongsaan ma nasida sama nasida.

20:24 Jadi dung sahat halak Juda tu robean panatapan tungkan halongonan, humusor ma nasida dompak musu na torop i; hape ida ma, angka bangke marpeahan di tano i, ndang adong na malua nanggo sada.

20:25 Dung i ro ma si Josapat rap dohot bangsona, naeng marbagi tabantaban, gabe jumpang nasida disi mansai godang ugasan dohot bangke dohot ulaula angka na arga, laos masilaum di ibana be, pola ndang tarusungsa; tolu ari lelengna nasida marbagi tabantaban, ai tung na godang situtu do.

20:26 Tole paopatarihon marluhut ma nasida di rura pamujimujian, ai disi do dipapujipuji nasida Jahowa. Ala ni umbahen didok halak goar ni inganan i rura pamujimujian rasirasa sadarion.

20:27 Dung i mulak ma sude halak Juda dohot Jerusalem, jala si Josapat manguluhon nasida, asa muli tu Jerusalem marlas ni roha godang, ai nunga las rohanasida mida musunasida i dibahen Jahowa.

20:28 Dung i bongot ma nasida tu Jerusalem umpalu arbab, sordam dohot sarune laho tu joro ni Jahowa.

20:29 Dung i songgop ma hasonggoton sian Debata tu saluhut harajaon ni angka luat i, dung dibege nasida naung marporang Jahowa dompak angka musu ni Israel.

20:30 Jadi marsonangsonang ma harajaon ni si Josapat, ai ditumpakkon Debatana tu rajai hasonangan humaliang.

20:31 Songon i ma pangarajaion ni si Josapat gumomgom Juda. Marumur tolupulu lima taon ibana di na bangkit raja, jala duapulu lima taon lelengna ibana mangarajai di Jerusalem, ia goar ni inana, i ma Azuba, boru ni si Silhi.

20:32 Dung i marparange ma rajai di dalan ni si Asa amana i, jala ndang manimbil ibana sian i, laho mangulahon na tigor di roha ni Jahowa.

20:33 Alai tahe ndang diloha anggo angka joro parsantian, ai ndang dope marsihohot anggo roha ni situan na torop i tu Debata ni ompunasida i.

20:34 Jamita angka na tinggal i dope sian si Josapat, angka na parjolo dohot parpudi, ida ma, tarsurat do i di bagasan buku jamita ni si Jehu, anak ni si Hanani, angka na sinurathonna tu bagasan buku rajaraja ni Israel.

20:35 Dung salpu angka i marsatahi ma si Josapat, raja sian Juda dohot Ahasia, raja sian Israel, na jahat do i marparulan.

20:36 Marsatahi rajai tahe dohot ibana laho paulihon angka kopal, asa marlayar tu Tarsis; di Ezion Geber ditungkangi nasida angka parau i.

20:37 Alai ro ma si Elieser, anak ni si Dodawa sian Maressa, manurirangi dompak si Josapat, ninna ma: Ala marsatahi ho dohot si Ahasia, nunga disegai Jahowa angka ulaonmu. Jadi marropuhan ma angka kopal i, gabe ndang tarbahensa marlayar tu Tarsis.

2 Kronika 21

21:1 Dung i monding ma si Josapat, gabe top dohot angka ompuna, jala tartanom di lambung ni ompuna, di huta ni si Daud. Jadi si Joram, anakna i, bangkit raja singkatna.

21:2 Adong huhut angka hahaanggina, angka anak ni si Josapat, i ma: si Azaria, si Jeiel, si Sakaria, si Azariahu, si Mikhael dohot si Sepatia. Luhutna i angka anak ni si Josapat, rajai sian Juda.

21:3 Dung i dilehon amanasida tu nasida godang silehonlehon sian perak, sere dohot arta angka na arga, tole deba huta angka na gonting di Juda. Alai anggo harajaon i tu si Joram do dilehon, ai ibana do buhabajuna.

21:4 Alai dung sahat tu si Joram harajaon ni amana i jala lam marhuaso ibana, dibunu ma saluhut anggina marhite sian podang, angkup ni deba sian angka induk ni Israel.

21:5 Marumur tolupulu dua taon si Joram di na bangkit raja ibana, jala ualu taon lelengna ibana mangarajai di Jerusalem.

21:6 Jala marparange do ibana di dalan ni angka raja sian Israel, suang songon na binahen ni pinompar ni si Ahab; ai nunga boru ni si Ahab gabe jolmana; jala diulahon do sogo ni roha ni Jahowa.

21:7 Alai ndang olo Jahowa anggo tung mangago tu pinompar ni si Daud, ala padan naung binahenna tu si Daud, jala ala naung pinarbagana lehononna tongtong tu ibana sada palito dohot tu pinomparna ro di salelenglelengna.

21:8 Uju di tingki ni si Joram mamulik halak Edom sian gomgoman Juda, laos dipabangkit nasida sada raja gumomgom nasida.

21:9 Jadi taripar ma si Joram rap dohot angka indukna dohot saluhut huretana; dung i hehe ma ibana bornginna i mangarampok halak Edom, angka na humaliang ibana, ro di angka induk panahatan ni hureta porang.

21:10 Alai atik pe songon i laos mamulik do halak Edom sian gomgoman Juda rasirasa sadarion. Mamulik huhut uju i Libna; ai nunga ditadingkon rajai Jahowa, Debata ni ompunasida i.

21:11 Dibahen ibana huhut angka joro parsantian di atas ni angka dolok Juda, jala dielaela isi ni Jerusalem mangulahon parmainanon, pola dipaksa dohot Juda.

21:12 Alai sahat ma tu ibana sada surat sian panurirang Elia na mandok: Songon on do hata ni Jahowa, Debata ni ompum si Daud: Ala so marparange ho di angka dalan ni si Josapat, amangmu dohot di angka dalan ni si Asa, raja sian Juda.

21:13 Nunga pola diihutihut ho dalan ni angka raja sian Israel, jala diela ho Juda dohot isi ni Jerusalem mangulahon parmainanon, maniru parmainanon ni pinompar ni si Ahab, angkup ni nunga dibunu ho angka anggim, pinompar ni amangmu, angka na dumenggan marroha sian ho.

21:14 Ida ma, Jahowa mangkonahon sada jea na bolon tu bangsom, tu angka anakmu, tu angka jolmam dohot tu sandok ugasonmu.

21:15 Alai anggo ho aeonmu ma sahit na pasang, marsahit rojan ma butuham, pola martaontaon, paima ruar butuham nionjar ni sahit i.

21:16 Dung i disunggul Jahowa ma tondi ni halak Palistim dohot Arab, angka na maringan di lambung ni halak Kus mangalo si Joram.

21:17 Dung i nangkok ma nasida dompak Juda, laos disola ma i jala ditaban duduk sandok ugasan na jumpang di jabu ni rajai, tole angka anakna dohot jolmana, gabe ndang tinggal di ibana anak, dungkon ni si Joahas, anakna siampudan i.

21:18 Dung salpu luhutna i ditorui Jahowa ma ibana marhite sian sahit di bagasan butuhana na so hadaonan.

21:19 Pola martaontaon diae; alai dung salpu dua taon, ruar ma butuhana nionjar ni sahitna i, gabe mate ibana marsingkor situtu. Ndang pola dibahen bangsona tu ibana sada pamurunan pasangaphon rajai, songon pamurunan na tu ompuna i.

21:20 Marumur tolupulu dua taon ibana di na bangkit raja, jala ualu taon lelengna ibana mangarajai di Jerusalem; dung i mate ma ibana, ndang pola marhabot ni roha disi manang ise; tartanom do nian ibana di huta ni si Daud, alai ndang tu parbandaan ni angka raja.

2 Kronika 22

22:1 Dung i dipabangkit isi ni Jerusalem ma si Ahasia, anakna siampudan i, gabe raja singkatna; ai sude angka hahana nunga dibunu sahoron parbajo, angka na ro dohot halak Arab tu parsaroan i. Jadi bangkit raja ma si Ahasia, anak ni si Joram, raja sian Juda.

22:2 Marumur opatpulu dua taon si Ahasia di na bangkit raja ibana, jala sataon sambing ibana mangarajai di Jerusalem; ia goar ni inana i ma si Atalia, boru ni si Omri.

22:3 Ibana pe marparange do di angka dalan ni pinompar ni si Ahab, ai inana do panuturina, laho mangulahon hajahaton.

22:4 Ala ni sai diulahon do sogo ni roha ni Jahowa, suang songon pinompar ni si Ahab, ai nasida do gabe panuturina, dung mate amana i, bahen hamagoanna.

22:5 Paihuthon tahinasida ibana huhut umbahen borhat ibana rap dohot si Joram, anak ni si Ahab, raja sian Israel, laho marporang dompak si Hasael, raja sian Ram, tu Ramot di Gilead; alai ditaluhon halak Ram do si Joram.

22:6 Dung i mulak ma ibana tu Jesreel laho padaonhon bugangna, angka na binahen ni halak Ram di Rama, uju marporang ibana dompak si Hasael, raja sian Ram. Dung i tuat ma si Ahasia, anak ni si Joram, raja sian Juda, naeng maningkir si Joram, anak ni si Ahab di Jesreel, ai na marsahit do ibana.

22:7 Alai marharoroan sian Debata do roha tu si Joram mambahen hamagoan tu si Ahasia; ai dung sahat ibana, borhat ibana muse rap dohot si Joram dompak si Jehu, anak ni si Nimsi, naung miniahan ni Jahowa, asa siaphononna pinompar ni si Ahab.

22:8 Jadi laho mangalaluhon uhum si Jehu tu pinompar ni si Ahab, jumpangsa deba induk sian Juda, angka anggi ni si Ahasia, angka na marhalado di si Ahasia, gabe dibunu nasida.

22:9 Dung i dilului ma dohot si Ahasia, gabe ditangkup halak ibana, uju martabuni ibana di Samaria, laos diboan ibana tu si Jehu, jala dibunu ibana jala ditanom, ai ninna nasida do: Anak ni si Josapat na mangalului Jahowa sian nasa rohana do ibana. Dung i ndang adong be nanggo sahalak sian pinompar ni si Ahasia, na tuk gogo jumujung harajaon i.

22:10 Alai anggo si Atalia, ina ni si Ahasia, dung diida naung mate anakna i, hehe ma ibana jala dibunui sandok pinompar ni raja sian Juda.

22:11 Alai dibuat si Josabad, boru ni rajai ma si Joas, anak ni si Ahasia, jala diluahon ibana sian tongatonga ni angka anak ni rajai, angka sibunuon hian, jala dibahen ibana rap dohot parorotna tu bilut podoman. Jadi ditabunihon si Josapat, boru ni raja Joram, jolma ni malim Joiada anak i (ai iboto ni si Ahasia do nasida) maradophon si Atalia, asa unang dapotsa bunuonna.

22:12 Jadi rap martabuni nasida di bagasan joro ni Debata, pola onom taon lelengna. Alai si Atalia do mangarajai di tano i.

2 Kronika 23

23:1 Tole papitutaonhon dipatodos si Joiada ma rohana, dialapi ma angka partogi ni parangan, sirajai sisaratus,ima: Si Azaria, anak ni si Jeroham dohot si Ismael, anak ni si Johanan dohot si Azaria, anak ni si Obed dohot si Maseia, anak ni si Adaya dohot si Elisapat, anak ni si sikri bahen donganna saparjanjian.

23:2 Dung i diliati nasida ma Juda jala dipaluhut halak Lepi sian saluhut huta ni Juda, dohot angka partogi marompuompu di Israel, asa ro nasida tu Jerusalem.

23:3 Jadi umpungka parjanjian ma sandok luhutan i di bagasan joro ni Debata rap dohot rajai. Dung i ninna si Joiada ma tu nasida: Ida ma, ingkon anak ni rajai patut bangkit raja, songon naung pinarbaga ni Jahowa taringot tu angka anak ni si Daud.

23:4 On do hata i sibahenonmuna: Sapartolu sian hamu, angka na masuk gansi di ari Sabbat sian angka malim dohot halak Lepi, ingkon marjaga di lambung jabu ni rajai.

23:5 Jala sapartolu ingkon marjaga di bagasan jabu ni rajai, jala sapartolu muse di lambung bagas parrapotan; alai sandok bangso i, ingkon jongjong do di angka alaman ni joro ni Jahowa.

23:6 Jala ndang jadi masuk tu bagasan joro ni Jahowa manang ise, dungkon ni angka malim dohot halak Lepi, angka na marhalado, nasida do na jadi masuk, ai na badia do nasida; alai anggo sandok situan na torop i, ingkon radotanna pangoloion hian tu Jahowa.

23:7 Jala ingkon haliangan ni halak Lepi rajai humaliang, ganup marsinjata di bagasan tanganna; jala manang ise na naeng masuk tu bagasan joro i, ingkon marutang hosa do. Asa ingkon sai dongan ni rajai nasida, molo ruar ibana manang masuk.

23:8 Jadi dibahen halak Lepi dohot sandok Juda ma saluhut hombar tu na tinonahon ni malim Joiada; diarahon be ma donganna, angka na masuk gansi di ari Sabbat rap dohot angka na malua di ari Sabbat; ai ndang diloas malim Joiada muli angka pargansion i.

23:9 Dung i diparlehon malim Joiada ma tu angka partogi ni parangan sisaratus angka hujur dohot lombulombu dohot parinse na sian raja Daud nahinan, angka na pineop di bagasan joro ni Debata.

23:10 Dung i dipajongjong ma sandok bangso i, ganup patioptiop sinjatana di bagasan tanganna dingkan siamun ni joro i sahat ro di hambirang ni joro i, di holangholang ni langgatan dohot joro i, humaliang rajai.

23:11 Dung i ditogihon nasida ma anak ni rajai tu ruar, jala dibahen tumpal i tu atas uluna, jala dilehon buku patik i tu bagasan tanganna, jala dipabangkit nasida ibana bahen raja; laos dimiahi si Joiada dohot angka anakna i ibana, huhut didok mangolophon: Horas ma rajai!

23:12 Jadi dung dibege si Atalia soara olopolop ni situan na torop i, angka na ro mangarongom, huhut papujipuji rajai, ro ma ibana manopot situan na torop i tu joro ni Jahowa.

23:13 Jadi dung dipamanat pangalahona, ida ma, jongjong do rajai mangunsande di tiang hajongjonganna hian di pintu haroroan, jala angka induk dohot parsarune di lambung ni rajai, jala marlas ni roha be sandok bangso isi ni luat i, huhut mamalui sarune, marendei huhut umpalu parhinaloan angka parende i manunggulnungguli manggogo mamuji. Dung i disansani si Atalia ma pangkeanna, huhut didok: Masa do jehejehe!

23:14 Alai didokkon malim Joiada ma angka partogi ni parangan sisaratus, angka na manguluhon parangan i, ninna ma mandok nasida: Togihon hamu ibana ruar sian holangholang ni adaran, jala manang ise na mangihuthon tu ibana, ingkon mate ibana bunuon marhite sian podang! Ai nunga pola didok malim i: Ndang jadi mate bunuon nasida di bagasan joro ni Jahowa.

23:15 Dung i ditangkup nasida ma ibana; dung sahat nasida tu pintu habongotan ni angka hoda, mardonokkon bagas ni rajai, laos dibunu ma nasida disi.

23:16 Dung i dibahen si Joiada ma sada padan tu ibana sandiri tu sandok situan na torop i dohot tu rajai, paboa ingkon bangso ni Jahowa nasida.

23:17 Dung i bongot ma sandok situan na torop i tu bagasan joro ni Baal, jala dilohai do i, jala diropuhi angka langgatanna dohot ganaganaanna, jala dibunu si Matan, malim ni Baal i, di adopan ni angka langgatan.

23:18 Dung i diparenta si Joiada ma angka ulaon tohonan di bagasan joro ni Jahowa marhite sian angka malim dohot halak Lepi, naung sinagi ni si Daud hian tu joro ni Jahowa, asa nasida mamelehon angka pelean situtungon tu Jahowa, hombar tu na tarsurat di bagasan patik ni si Musa, mardongan las ni roha dohot parendeon, mangihuthon aturan binahen ni si Daud.

23:19 Dung i dipajongjong ma angka sijaga pintu tu lambung ni angka pintu di joro ni Jahowa, asa unang masuk tusi manang ise na ramun binahen ni manang aha pe.

23:20 Dung i dibuat ma angka partogi ni parangan sisaratus, angka jolma na marhuaso pe dohot angka panggomgomi di situan na torop i, ro di sandok bangso isi ni luat i, laos ditogihon ibana rajai tuat sian joro ni Jahowa, jala mardalan nasida sian tongatonga ni bahal parjulu sahat tu bagas ni rajai, laos dipahundul nasida rajai tu atas habangsa harajaon i.

23:21 Jadi marlas ni roha be ma sandok bangso isi ni luat i, jala sonang be isi ni huta i. Alai nunga dibunu nasida anggo si Atalia marhite sian podang.

2 Kronika 24

24:1 Marumur pitu taon si Joas di na bangkit raja ibana, jala opatpulu taon lelengna ibana mangarajai di Jerusalem; ia goar ni inana i ma si Zibia sian Beerseba.

24:2 Dung i diulahon si Joas ma lomo ni roha ni Jahowa, saleleng mangolu malim Joiada.

24:3 Dung i dibuat si Joiada ma dua parompuan bahen jolmana, gabe tubuan anak dohot boru ibana.

24:4 Jadi dung salpu angka i tubu ma roha ni si Joas, naeng mangumban joro ni Jahowa.

24:5 Dung i dipaluhut rajai ma angka malim dohot halak Lepi, ninna ma mandok nasida: Borhat ma hamu manopot angka huta di Juda, asa papunguhon perak sian sandok Israel laho mangumban joro ni Debatamuna ganup taon; jala ringkot bahen hamu hata i, hape ndang diringkoti halak Lepi.

24:6 Dung i dijou rajai ma sintua ni malim Joiada, jala ninna ma mandok ibana: Boasa tung so dasdasonmu halak Lepi, asa diboan sian Juda dohot sian Jerusalem guguan pinatikkon ni si Musa, naposo ni Jahowa siguguan ni sandok luhutan Israel tu undungundung ni panindangion?

24:7 Ai nunga maloha joro ni Debata dibahen si Atalia na jahat i dohot angka anakna, jala saluhut ugasan angka na badia i di joro ni Jahowa mamele tu angka Baal do dipangke.

24:8 Dung i didokkon rajai ma mambahen sada poti, jala dipeakkon do i tu balian di lambung pintu laho masuk tu joro ni Debata.

24:9 Dung i didokkon ma martingting di Juda dohot di Jerusalem: Ingkon diboan be tu Jahowa guguan pinatikkon ni si Musa, naposo ni Debata, tu halak Israel uju di halongonan.

24:10 Jadi marlas ni roha be ma sude angka induk dohot sandok bangso i, diboan be guguanna mandekdekkon tu bagasan poti i, paima gok.

24:11 Ia dung jumpang tingkina boanon ni halak Lepi poti i tingkiron ni rajai; jala ia dung diida nasida naung godang perak di bagasan, ro ma juaratulis ni rajai dohot wakil ni sintua ni malim, asa diparumar poti i, dung i dipasuang muse tu ingananna hian. Sai songon i dibahen nasida marngombasngombas, gabe godang perak dipapungupungu.

24:12 Dung i dipasahat rajai dohot si Joiada ma i tu jolma panahatan ni ulaon pauli joro ni Jahowa, asa nasida muse mangalehon upa tu angka tungkang pandakdak batu dohot tungkang hau, laho mangumban joro ni Jahowa; nang angka tungkang bosi dohot tombaga laho paulihon joro ni Jahowa.

24:13 Jadi tole be ma angka tungkang i mangaringkoti ulaon i, gabe lam tu tipakna ma marhite sian ulaon ni tangannasida, gabe suang ma hot jongjong joro ni Debata di hajongjonganna hian.

24:14 Jadi dung sun ulaon i, diboan nasida ma perak na lobi i tu jolo ni rajai dohot tu jolo ni si Joiada; sian i ma dipauli angka ulaula tu joro ni Jahowa, angka ulaula laho marhalado dohot mamelehon angka pelean situtungon, tole angka saoan dohot ulaula sian sere dohot perak. Dung i dipelehon nasida ma tongtong angka situtungon di bagasan joro ni Jahowa saleleng mangolu si Joiada.

24:15 Dung i sarimatua ma si Joiada jala mahap rohana di hangoluan on laos mate; marumur saratus tolupulu taon ibana di na laho mate ibana.

24:16 Dung i tartanom ma ibana di huta ni si Daud di lambung ni angka raja, ala na denggan na binahenna i di Israel taringot tu Debata dohot jorona i.

24:17 Jadi dung mate si Joiada ro be ma angka induk ni Juda marsomba tu rajai: Ditangihon rajai do antong pangidoannasida i marisuang!

24:18 Dung i ditadingkon nasida ma joro ni Jahowa, Debata ni ompunasida i, tagonan nasida marsomba tu angka sombaon Asera dohot tu angka ajiajian, asa parohon rimas ni Debata tu Juda dohot tu Jerusalem ala ni dosanasida on.

24:19 Dung i disuru Jahowa ma angka panurirang tu tongatonganasida, asa mulak nasida tu Jahowa togihononna: Gogo do angka i marsipaingot tu nasida, alai ndang diparateatehon nasida.

24:20 Dung i songgop ma Tondi ni Debata tu si Sakaria, anak ni malim Joiada, gabe jongjong ma ibana di adopan ni situan na torop i jala didok ma tu nasida: Songon on do hata ni Debata: Boasa tung laosanmuna angka tona ni Jahowa? Ala ni ndang tagamon marhasonangan hamu; ai nunga ditadingkon hamu Jahowa, jadi tadingkononna ma hamu.

24:21 Hape lam marbulan nasida mangalo ibana, pola didangguri ibana dohot batu, patulus tona ni rajai di alaman ni joro ni Jahowa.

24:22 Asa ndang be diingot raja Joas uhum na denggan naung binahen ni si Joiada amana i tu ibana, lam dibunu tahe anakna; alai laho mate ibana didok si Sakaria ma: Tatapon ni Jahowa do i jala luluhononna!

24:23 Jadi dung salpu sataon, nangkok ma parangan ni halak Ram marporang dompak ibana, pola sahat nasida tu Juda dohot tu Jerusalem, jala disiaphon sude induk ni bangso i, jala nasa tabantaban na dapot nasida ditongoshon do i tu raja sian Damaskus.

24:24 Ai otik do nian parangan ni halak Ram ro; alai Jahowa do pasahathon tu bagasan tangannasida sada parduaan parangan na torop situtu, ala naung ditadingkon nasida Jahowa, Debata ni ompunasida i; asa halak Ram mangalaluhon uhumi tu si Joas.

24:25 Jadi di na laho nasida manadingkon ibana, nunga pasang hian bugangna, lam marbulan angka naposona mangalo ibana, ala mudar ni anak ni malim Joiada, laos ditodos ibana di atas podomanna pola mate. Dung i ditanom halak ibana di huta ni si Daud; alai ndang tartanom ibana tu parbandaan ni angka raja.

24:26 Alai on do halak angka na marbulan mangalo ibana: Si Sabad, anak ni si Simeat, boru Amon dohot si Josabad, anak ni si Simrit, boru Moab.

24:27 Alai anggo angka anakna dohot godang ni sohe na ampe tu ibana, ro di na pinaulina i joro ni Debata, ida ma, tarsurat do i di bagasan buku jamita ni angka raja. Jadi si Amasia, anakna i, bangkit raja singkatna.

2 Kronika 25

25:1 Marumur duapulu lima taon si Amasia di na bangkit raja ibana, jala duapulu sian taon lelengna mangarajai di Jerusalem; ia goar ni inana, i ma Nai Joadan sian Jerusalem.

25:2 Jala diulahon ibana do lomo ni roha ni Jahowa, alai ndang sian nasa rohana marisuang!

25:3 Jadi dung lam hot harajaon i di ibana, dibunu ma naposona, angka na manodos raja nahinan amana i.

25:4 Alai anggo anaknasida i ndang dibunu, hombar tu hata na tarsurat di bagasan buku patik na binahen ni si Musa, tinonahon ni Jahowa tu ibana, songon on: Ndang jadi mate amaama ala angka anakna, jala ndang jadi mate angka anak i ala amana, alai ganup ingkon mate ala ni dosana sandiri.

25:5 Dung i dipaluhut si Amasia ma halak Juda, jala dipaodor nasida marompuompu bahen angka induk ni sisaribu halak dohot sisaratus di sandok Juda dohot Benjamin; dung i dibilangi ma nasida olat ni na marumur duapulu taon dohot lobi sian i, gabe jumpangsa ma tolu ratus ribu halak angka na pinillit, angka na tarbahen borhat tu parporangan patioptiop hujur dohot lombulombu.

25:6 Angkup ni diupai dope sian Israel saratus ribu halak parangan angka ma marhuaso, pola saratus talenta perak dilehon.

25:7 Alai ro ma sada halak ni Debata manopot ibana, ninna ma: Ale rajanami, unang loas borhat parangan ni Israel rap dohot ho, ai ndang hadonganan Jahowa anggo halak Israel ro di sude halak Epraim.

25:8 Molo sai naeng borhat ho, ulahon ma, pir ma tondim marporang! Atik tung beha tarurak ho maon, bahenon ni Debata maradophon musu; ai saguru di Debata do hagogoon laho manolongi dohot mambahen tarurak.

25:9 Dung i ninna si Amasia ma tu halak ni Debata: Alai beha na ma bahenon taringot tu sisaratus talenta, naung hulehon i bahen upa ni parduaan parangan sian Israel? Dung i ninna halak ni Debata ma: Gumodang sian i dope dipeop Jahowa, tarlehonsa tu ho.

25:10 Dung i dipapulik si Amasia ma parduaan parangan, angka na ro tu ibana sian Epraim, jala didokkon muli tu ingananna hian. Ala ni marsigorgor situtu rimasnasida mida Juda, jadi mulak ma nasida tu ingananna hian marmurukmuruk situtu.

25:11 Dung i pir ma tondi ni si Amasia manogihon paranganna, pola sahat ibana tu rura parsiraan, jala dibunu sian halak Seir saloksa halak.

25:12 Dapot tartangkup songon i mangolu dibahen halak Juda saloksa halak, angka na binoanna tu punsu ni dolok batu, laos didabu sian punsu ni dolok batu i, gabe maropuk saluhutna.

25:13 Alai anggo parduaan parangan, angka naung pinamuli ni si Amasia, asa unang rap dohot ibana borhat tu parporangan, dirampok nasida ma angka huta ni Juda olat ni Samaria sahat ro di Bethoron, jala dibunu sian nasida tolu ribu halak, jala godang tabantaban dilaum.

25:14 Jadi dung mulak si Amasia sian na manuluhon halak Edom, laos diboan ma debata angka na pinasombasomba ni halak Seir, jala dipajongjong do angka i bahen debatana, laos marsomba di adopannasida, huhut manutung daupa tusi.

25:15 Jadi marsigorgor ma rimas ni Jahowa mida si Amasia, laos disuru ma manopot ibana sada panurirang na mandok tu ibana: Boasa tung luluanmu debata sileban ni bangso, angka na so tarbahen paluahon bangso nidinginanna sandiri sian tanganmu?

25:16 Alai andorang mangkatai dope ibana, ro ma hata ni rajai tu ibana: Atehe nunga dipabangkit halak ho bahen panuturi ni rajai? Pasadi hatahatam, boasa tagonan bunuon ni halak ho? Jadi mansadi ma panurirang i, ninna ma: Nunga tangkas hutanda naung putus sangkap ni Debata, naeng mangago ho, ala na binahenmon, jala ndang ditangihon ho panuturionku.

25:17 Dung i martuptup ma si Amasia, raja sian Juda, laos disuru ma suruanna manopot si Joas, anak ni si Joahas, tubu ni si Jehu, raja sian Israel, mandok tu ibana: Tole ma hita masiujian!

25:18 Alai disuru si Joas, raja sian Israel ma suruanna manopot si Amasia, raja sian Juda mandok hata alingalingan: Hau unak na di Libanon marsuru pangaririt manopot hau Ares na di Libanon mandok songon on: Ua lehon ma borum bahen jolma ni anakku; hape ro ma binatang angka na di atas Libanon, ditondong ma hau unak i laos didegedegei.

25:19 Ninna roham huroha: Ida ma, nunga hutaluhon halak Edom, jadi dipaginjang ho roham naeng masipujipujian. On pe tinggal ma ho tagonan di bagasan jabum! Boasa tagonan tahopanmu hamagoan, asa marjea ho rap dohot halak Juda?

25:20 Alai ndang ditangihon si Amasia hata umpamana i, ai marharoroan sian Debata do i, asa lehononna nasida tu bagasan tangan ni musu, ala na niluluannasida debata ni halak Edom.

25:21 Jadi nangkok ma si Joas, raja sian Israel, gabe masiujian ma nasida, ibana dohot si Amasia, raja sian Juda di Betsemes na di tano Juda.

25:22 Alai talu ma halak Juda maradophon halak Israel, gabe maporus nasida ganup tu undungundungna be.

25:23 Alai dapot tartangkup ma di Betsemes anggo si Amasia, raja sian Juda, anak ni si Joas, dibahen si Joas, tubu ni si Joahas, raja sian Israel, laos diboan ibana tu Jerusalem, jala dilohai parik ni Jerusalem olat ni bahal Epraim sahat tu bahal parsuhisuhi, pola opat ratus asta ganjangna.

25:24 Dibuat huhut nasa sere dohot perak ro di sude ulaula angka na jumpang di bagasan joro ni Debata na niramotan ni si Obed-Edom, tole muse angka arta di jabu ni rajai, tole angka jolma tahan joratna dung i mulak ibana tu Samaria.

25:25 Alai anggo si Amasia, anak ni si Joas, raja sian Juda mangolu dope sampulu lima taonnari dung mate si Joas, anak ni si Joahas, raja sian Israel.

25:26 Jamita na tinggal i dope sian si Amasia, angka na parjolo dohot parpudi, ida ma, nda tarsurat do i di bagasan buku jamita ni angka raja sian Juda dohot Israel.

25:27 Jadi olat ni dung sumurut si Amasia sian Jahowa, dibahen halak ma parbulanan mangalo ibana di Jerusalem. Alai maporus do rajai tu Lakis, jadi disuru nasida ma halak mangihuthon ibana tu Lakis, asa bunuonna ibana disi.

25:28 Dung i diboan nasida ma ibana di atas ni angka hoda; laos tartanom ibana di lambung ni angka ompuna di bagasan huta ni si Daud.

2 Kronika 26

26:1 Dung i ro ma sandok bangso Juda, dibuat ma si Usia na marumur sampulu onom taon dope, jala dipabangkit ibana gabe raja, singkat ni si Amasia amana i.

26:2 Ibana do i na patoguhon huta Elat, jala mulak tu Juda dipasuang, dung monding rajai rap dohot angka ompuna.

26:3 Marumur sampulu onom taon si Usia di na bangkit raja ibana, jala limapulu dua taon lelengna ibana mangarajai di Jerusalem; ia goar ni inana, i ma Nai Jekolia sian Jerusalem.

26:4 Dung i diulahon ibana ma lomo ni roha ni Jahowa, sandok songon na binahen ni si Amasia amana i.

26:5 Sai diringkoti rohana do mangalului Debata saleleng mangolu si Sakaria, na pande patorangkon pangungkapon sian Debata; jala saleleng ibana mangalului Jahowa, manjadi do ulaon ni rajai, ditumpak Debata.

26:6 Ai borhat do rajai marporang dompak halak Palistim, jala digargari parik ni huta Gat dohot parik ni huta Jamnia dohot parik ni huta Asdod, jala dipungka angka huta humaliang Asdod dohot di tongatonga ni halak Palistim.

26:7 Ai ditumpak Debata do ibana mangalo halak Palistim dohot halak Arab, angka na maringan di Gurbal dohot mangalo halak Maoni.

26:8 Dung i ro ma halak Amon manaruhon silehonlehon tu si Usia gabe tarbarita goarna sahat ro di Misir, ai lam timbul situtu do huasona.

26:9 Dipauli si Usia huhut angka palaspalas di Jerusalem di atas bahal parsuhisuhi dohot di atas bahal rura dohot di saluhut suhisuhi, jala dipatogu angka i.

26:10 Dipajongjong huhut angka palaspalas di halongonan jala dihali torop angka sumur, ai godang do dorbiana di tano pea dohot di adaran; tole angka halak parumauma dohot tungkang porlak anggur di atas ni angka dolok dohot di Karmel; ai lomo roha ni rajai mangaradoti parumaon.

26:11 Angkup ni godang do parangan ni si Usia, angka na somal marmusu, angka na borhat tu parporangan marhoronhoron mangihuthon torop ni bilangannasida, niuluhon ni si Jeuel, juaratulis i dohot si Maaseia, panuturi angka na marpandapotan tu si Hanania, sada sian angka induk ni rajai.

26:12 Sandok bilangan ni angka partogi marompuompu di angka ulubalang dua ribu onom ratus halak do.

26:13 Marpandapotan tu nasida do sada parduaan parangan, tolu ratus ribu pitu ribu lima ratus halak angka na marhuaso situtu marmusu manolongi rajai mangalo musu.

26:14 Dung i didokkon si Usia ma paulion di nasida, di sandok paranganna i tahe angka lombulombu, hujur, tole tahuluk dohot baju partahanan dohot sior dohot angka batu ambalang.

26:15 Dipauli huhut di Jerusalem angka parhohas, hapandean ni halak na pande, angka sibahenon tu atas ni angka palaspalas dohot bungkulan laho maniorhon sian i angka sumbia dohot mandanggurhon angka batu bolon. Jadi tarbarita situtu ma goar ni rajai sahat tu na dao, ai marhasurungan situtu pangurupion tu ibana, sanga marhuaso situtu ibana.

26:16 Alai dung marhuaso rajai, dipaginjang ma rohana mambahen hamagoanna; ai mardosa ibana dompak Jahowa, Debatana, tung dibongoti do joro ni Jahowa laho manutung daupa di atas langgatan pardaupaan.

26:17 Ro do nian malim Azaria mangihuthon ibana, pola ualupulu malim ni Jahowa, angka na marhuaso be donganna.

26:18 Diambat nasida nian raja Usia, angka ninna ma tu ibana: Ale Usia! Ndang patut anggo di ho manutung daupa di Jahowa, holan di angka malim do, angka anak ni si Aron, angka naung niuras patut manutung daupa. Ruar ma ho sian inganan na badia i, ai na mardosa do ho disi, jala ndang tagamon gabe hamuliaonmu bahenon ni Debata Jahowa.

26:19 Hape lam piripirion dope si Usia huhut patioptiop saoan pardaupaan di bagasan tanganna, naeng manutung daupa. Alai andorang piripirion dope ibana dompak angka malim i, tubu ma puru di pardompahanna di adopan ni angka malim di bagasan joro ni Jahowa di lambung langgatan pardaupaan.

26:20 Dung i humusor ma sintua ni malim Azaria, ro di sude angka malim mandompakkon ibana, hape ida ma, nunga puruon ibana di pardompahanna. Jadi hapogan nasida pabali ibana sian i; ibana sandiri pe hapogan do laho tu balian, ala naung ditorui Jahowa ibana.

26:21 Jadi laos puruon ma raja Usia sahat ro di ari hamamatena, gabe punjung ibana maringan di bagasan sada jabu ala puruna i, ai bali ibana huhut sian joro ni Jahowa. Jadi si Jotam, anakna i, panahatan ni bagas ni rajai, manguhum sandok bangso isi ni luat i.

26:22 Jamita na tinggal i dope sian si Usia, angka na parjolo dohot na parpudi, i ma naung sinurat ni panurirang Jesaya, anak ni si Amos.

26:23 Dung i monding ma si Usia gabe top dohot angka ompuna, jala tartanom ibana di lambung ni angka ompuna di ladang parbandaan ni angka raja; ai ninna nasida do: Na puruon do ibana. Jadi si Jotam, anakna i, bangkit raja singkatna.

2 Kronika 27

27:1 Marumur duapulu lima taon si Jotam di na bangkit raja ibana, jala sampulu onom taon lelengna ibana mangarajai di Jerusalem; ia goar ni inana, i ma si Jerusa, boru ni si Sadok.

27:2 Jala diulahon ibana do lomo ni roha ni Jahowa, sandok songon na binahen ni si Usia amana i; dungkon ni na so bongot ibana tu bagasan joro ni Jahowa; alai tong dope marroha mago anggo halak situan na torop i.

27:3 Dipauli rajai huhut pintu na timbo di joro ni Jahowa; jugul ibana huhut patoguhon parik Opel.

27:4 Dipungka ibana huhut angka huta di atas dolok Juda; jala di bagasan angka tombak dipauli do angka partanobatoan dohot batarbatar.

27:5 Dung i marmusu ma rajai dompak raja ni halak Amon jala ditaluhon nasida, pola mangalehon sohe halak Amon di na sataon i tu ibana saratus talenta perak saloksa kor dahanon simetmet dohot saloksa kor dahanon siansimun; suang songon i godang dilehon halak Amon tu rajai nang paduataonhon dohot patolutaonhon.

27:6 Jadi lam naek huaso ni si Jotam, ai marsihohot angka dalanna di adopan ni Jahowa, Debatana.

27:7 Jamita na tinggal i dope sian si Jotam ro di sude hamusuonna dohot pangalahona, ida ma, tarsurat do i di bagasan buku ni angka raja sian Israel dohot Juda.

27:8 Marumur duapulu lima taon ibana di na bangkit raja, jala sampulu onom taon lelengna ibana mangarajai di Jerusalem.

27:9 Dung i monding ma si Jotam gabe top dohot angka ompuna, jala tartanom ibana di huta ni si Daud. Jadi si Ahas anakna i bangkit raja singkatna.

2 Kronika 28

28:1 Marumur duapulu taon si Ahas di na bangkit raja ibana, jala sampulu onom taon lelengna ibana mangarajai di Jerusalem, jala ndang diulahon lomo ni roha ni Jahowa, songon si Daud ompuna i.

28:2 Lam marparange ibana di angka dalan ni angka raja sian Israel, angkup ni dipauli huhut angka ganaganaan tuangan di Baal.

28:3 Manutung daupa ibana huhut di rura na di anak ni si Hinnom, jala suda ditutung angka anakna di bagasan api mangihuthon biasbias ni bangso parbegu, angka na pinabali ni Jahowa maradophon halak Israel.

28:4 Mamele jala manutung daupa ibana huhut di atas ni angka tambak dohot di atas ni dolokdolok dohot di toru ni saluhut hau na rugun.

28:5 Dibahen i dipasahat Jahowa, Debatana ma ibana tu bagasan tangan ni raja sian Ram, gabe ditaluhon nasida ibana, jala mansai torop sian angka na nirajaanna dibuangkon laho mamboan tu Damaskus. Dipasahat ibana huhut tu bagasan tangan ni raja sian Israel, na manaluhon ibana situtu.

28:6 Ai dibunu si Peka, anak ni si Remalia, di Juda di bagasan sadari saratus duapulu ribu halak, luhutna i halak na somal marmusu, ala na tinadingkonnasida Jahowa, Debata ni ompunasida i.

28:7 Tole muse si Sikri sahalak ulubalang sian Epraim mambunu si Maaseia, anak ni rajai dohot si Asrikam, siramoti bagasna dohot si Elkana, panuturi ni rajai.

28:8 Asa dibuangkon halak Israel sian angginasida i dua ratus ribu parompuan ro di anak dohot boru angkup ni mansai godang tabantaban dilaum sian nasida, laos diboan tabantaban i tu Samaria.

28:9 Dung i adong ma disi sada panurirang ni Jahowa, na margoar si Obed; ruar ma ibana manjumpangkon parangan angka na ro tu Samaria, ninna ma tu nasida: Ida ma, ala marronirimas Jahowa, Debata ni ompumuna i, mida Juda, umbahen dipasahat nasida tu bagasan tanganmuna; hape marmurukmuruk dohot hamu mambunu i nasida, pola maungaung sahat tu banua ginjang.

28:10 Nuaeng pe, lam ditahi rohamuna dope naeng patundukkon halak Juda dohot Jerusalem, bahen naposomuna baoa dohot parompuan. Beha ia hamu, nda dokdok do nang angka salamuna maradophon Jahowa, Debatamuna i?

28:11 Dibahen i tangihon hamu ma hatangkon jala paulak hamu jolma na tarboan i, angka na binoanmuna sian anggimuna i; ai nunga marpiarpiar muruk ni Jahowa mida hamu.

28:12 Jadi hehe ma deba baoa sian angka induk ni halak Epraim, i ma: si Azaria, anak ni si Johanan dohot si Berekia, anak ni si Mesilemot dohot si Hiskia, anak ni si Sallum dohot si Amasa, anak ni si Hadlai laho mandapothon parangan angka na mulak sian tongtangan.

28:13 Ninna ma mandok nasida: Ndang jadi boanonmuna tuson jolma angka na tarboan i, ai parohon torutoru ni Jahowa tu hita hamu disi; rupa disangkap rohamuna do naeng manambai dosa dohot salanta na sai laon; ai nunga godang hian salanta, jala marpiarpiar rimas ni Jahowa mida Israel.

28:14 Jadi ditadingkon parangan na marsinjata i ma halak na tarboan i ro di tabantaban di adopan ni angka induk dohot sandok luhutan i.

28:15 Jadi hehe ma baoa angka na ginoar ondeng manjangkon halak na tarboan i, jala saluhut sian nasida na marsaemara diparulosi do sian tabantaban i, diparlehon tu nasida angka ulos dohot sipatu ro di sipanganon dohot siinumon, pola dimiahi nasida jala dipahundul tu halode manogihon sude halak angka na mandate, jala diboan nasida, sahat tu Jeriko, huta parharambiran, tu hahaangginasida i; dung i mulak nasida tu Samaria.

28:16 Uju i ma disuru raja Ahas angka suruanna manopot angka raja sian Assur, mangido tolongannasida ibana.

28:17 Ai diulahi halak Edom muse ro mambunu halak Juda, diboan huhut torop halak tu habuangan.

28:18 Tole dohot halak Palistim mangalaum angka huta di pea dohot di tano dangsina sian Juda, jala dipapatu nasida Betsemes, Aialon, Gederot dohot Soko ro di pagaran na masuk tusi, dohot Timna ro di pagaran na masuk tusi, dohot Gimzo ro di pagaran na masuk tusi, laos maringan nasida disi.

28:19 Ai Jahowa pajimputhon Juda ala si Ahas, raja sian Juda, ala naung ibana pahijang Juda mardosa godang dompak Jahowa.

28:20 Jadi ro ma mangalo ibana si Tiglat-Pilesar, raja sian Assur, jala disosaksosak ibana, ndada ditogari.

28:21 Ai nunga pola dipupusi si Ahas deba ugasan sian joro ni Jahowa dohot sian bagas ni rajai ro di angka induk, jala dilehon do i tu raja sian Assur, hape laos so ditolongi ibana.

28:22 Alai gari tu tingki hagogotanna, lam digandai raja Ahas dope dosana dompak Jahowa.

28:23 Lam mamele ibana tu angka debata pandingini di Damaskus, angka na manaluhon ibana, ninna ma: Ala naung angka debata ni rajaraja sian Ram manolongi nasida, dohot ma ahu mamele tusi, anggiat dohot ahu ditolongi nasida; hape gabe jorgong do angka i di ibana dohot di sandok Israel.

28:24 Dung i dipapungu si Ahas ma angka ulaula di joro ni Debata jala ditapori angka ulaula di joro ni Debata, laos dihinsu angka pintu ni joro ni Jahowa, jala dipambahen di ibana angka langgatan di ganup suhi di Jerusalem.

28:25 Dipambahen huhut di ganup huta ni Juda angka tambak laho manutung daupa di angka debata sileban, asa pahehehon rimas ni Jahowa, Debata ni ompuna i.

28:26 Jamita na tinggal i dope sian ibana ro di sandok dalandalanna, angka na parjolo dohot parpudi, ida ma, tarsurat do i di bagasan buku ni angka raja sian Juda dohot Israel.

28:27 Dung i monding ma si Ahas gabe top dohot angka ompuna, jala tartanom ibana di huta Jerusalem; ai ndang diboan nasida ibana tu parbandaan ni angka raja sian Juda. Jadi si Hiskia anakna i bangkit raja singkatna.

2 Kronika 29

29:1 Marumur duapulu lima taon si Hiskia di na bangkit raja, jala duapulu sia taon lelengna ibana mangarajai di Jerusalem; ia goar ni inana, i ma si Abia, boru ni si Sakaria.

29:2 Jala diulahon ibana do lomo ni roha ni Jahowa, sandok songon binahen ni si Daud ompuna i.

29:3 Pintor didokkon ma ungkapon angka pintu ni joro ni Jahowa, jala dipaimbaru di bulan sipaha sada di taon parjolo hinarajaonna i.

29:4 Dung i didokkon ma ro angka malim dohot halak Lepi, jala dipaluhut nasida di alaman tungkan habinsaran.

29:5 Jala didok ma tu nasida: Tangihon ma hatangkon, hamu ale halak Lepi! Manguras ma hamu nuaeng, jala urasi hamu ma joro ni Debata, Debata ni ompumuna i, jala paruar hamu nasa na ramun sian joro na badia i.

29:6 Ai nunga mardosa godang angka ompunta i, jala diulahon nasida sogo ni roha ni Jahowa, Debatanta i, tung ditadingkon nasida Ibana, jala dipadao nasida bohinasida i sian inganan ni Jahowa, tung ditundali nasida do Ibana.

29:7 Angkup ni nunga dihinsui nasida angka pintu ni emper i, jala diintopi angka palito, jala ndang be ditutup nasida daupa, jala ndang be dipelehon pelean situtungon di bagasan bagas na badia i marsomba tu Debata ni Israel.

29:8 Jadi marronirimas ma Jahowa mida Juda dohot mida Jerusalem, jala dipasahat nasida ripe rupaon, ulangon dohot lealeaan, songon na niida ni matamuna sandiri.

29:9 Ai ida ma, nunga pola marragean angka ompunta marhite sian podang, anakta pe dohot borunta ro di jolmanta, nunga pola tarboan tu habuangan ala ni.

29:10 Nuaeng pe disangkap rohangku do naeng mambahen padan tu Jahowa, Debata ni Israel, asa anggiat sumurut sian hita parpiarpiar ni rimasna.

29:11 Dibahen i, hamu ale angka anaha, unang tung marbenda hamu nuaeng, ai hamu do na pinillit ni Jahowa jongjong di adopanna marhalado, jala hamu do angka parhaladona dohot manutung daupa di Ibana.

29:12 Jadi hehe ma halak Lepi: Si Mahat, anak ni si Amasa i dohot si Joel, anak ni si Azaria sian pinompar ni si Kohat; jala sian pinompar ni si Merari: Si Kis, anak ni si Abdi dohot si Azaria, anak ni si Jehalieel; ia sian pinompar ni si Gerson: Si Joa, anak ni si Sima dohot si Eden, anak ni si Joa.

29:13 Ia sian pinompar ni si Elisapan: Si Simri dohot si Jeiel; ia sian pinompar ni si Asap: Si Sakaria dohot si Matania.

29:14 Ia sian pinompar ni si Heman: Si Jeiel dohot si Simei; ia sian pinompar ni si Jedutun: Si Semaya dohot si Usiel.

29:15 Jadi dipaluhut nasida ma angka hahaangginasida i, laos diuras dirinasida, asa bongot nasida hombar tu tona ni rajai, naeng manguras joro ni Jahowa mangihuthon hata ni Jahowa.

29:16 Alai masuk ma anggo angka malim tu bagasan joro ni Jahowa laho manguras; nasa haramunon angka na jumpang nasida di bagasan joro ni Jahowa, diparuar nasida ma i tu alaman ni joro ni Jahowa; dijalo halak Lepi muse mamboan tu balian mangaup tu sunge Kidron.

29:17 Alai mamungka do nasida manguras di artia di bulan sipaha sada, tole paualuarihon di bulan i masuk ma nasida tu emper ni Jahowa laho manguras joro ni Jahowa, pola ualu ari lelengna, pasampuluonomarihon pe di bulan sipaha sada sidung nasida.

29:18 Dung i masuk ma nasida tu bagasan manopot raja Hiskia, ninna nasida ma: Nunga sun huuras hami sandok joro ni Jahowa dohot langgatan pamelean ni pelean situtungon ro di sandok ulaulana; nang meja hapeahan ni roti na marhadohoan ro di sandok ulaulana.

29:19 Angkup ni nasa ulaula, angka naung binolongkon ni raja Ahas saleleng hinarajaonna i, di na mardosai ibana, nunga hupadiri jala huurasi hami; jala ida ma, luhutna i di adopan ni langgatan ni Jahowa do.

29:20 Dung i dipasogot raja Hiskia ma hehe jala dipaluhut angka induk ni huta i, asa nangkok tu joro ni Jahowa.

29:21 Dung i diboan halak ma pitu lombu naposo dohot pitu birubiru tunggal dohot pitu anak ni birubiru dohot pitu hambing tunggal bahen pelean pardosaan manguras harajaon dohot joro na badia i dohot halak Juda. Dung i ninna rajai ma tu pinompar ni si Aron, angka malim i, asa mamele nasida di atas langgatan ni Jahowa.

29:22 Jadi dipotongi nasida ma angka lombu i, jala ditarei angka malim mudar i jala dipistikkon do i tu langgatan; dipotongi muse angka birubiru tunggal jala dipistikkon mudar i tu langgatan i; dipotongi muse angka anak ni birubiru jala dipistikkon mudar i tu langgatan i.

29:23 Dung i diboan muse angka hambing tunggal bahen pelean pardosaan di adopan ni rajai dohot di adopan ni luhutan i, jala diampehon tangannasida tu atasna.

29:24 Laos dipotongi angka malim ma hambing i, mudarna i na pinistikkon tu langgatan padaohon dosa mambahen pardengganan tu sandok Israel; ai manatap sandok Israel do umbahen didokkon rajai pelehononhon pelean situtungon dohot pelean pardosaan.

29:25 Dipajongjong rajai huhut halak Lepi di bagasan joro ni Jahowa mardongan arbab; sordam dohot hasapi mangihuthon tona ni si Daud dohot si Gad, partondung ni rajai dohot panurirang Natan; ai tona na ro sian Jahowa do i marhite sian pamangan ni angka panurirangna.

29:26 Jadi jongjong ma tutu halak Lepi patioptiop parhinaloan sian si Daud, patioptiop sarune anggo angka malim.

29:27 Dung i didokkon si Hiskia ma pelehononhon pelean situtungon i di atas langgatan. Jadi andorang mamungka mamelehon pelean situtungon i, manungka ma dohot ende pujipujian tu Jahowa rap dohot soara ni sarune dohot parhinaloan sian si Daud, raja sian Israel.

29:28 Jadi sandok luhutan i martangiang; sai didatdati angka parende do marende jala angka parsarune mamalu sarunena, luhutna i paima marujung pelean situtungon i.

29:29 Jadi dung tolhas pelean i, marsinggang ma rajai dohot sude halak na jumpang di lambungna, laos martangiang nasida.

29:30 Dung i didokkon raja Hiskia dohot angka induk i ma halak Lepi mamujimuji Jahowa marendehon hata ende sian si Daud dohot si Asap partondung i. Jadi mamujimuji ma nasida maradu marlas ni roha huhut marsomba dohot martangiang.

29:31 Dung i ro ma hata ni si Hiskia mandok: Nunga dipasahat hamu muse dirimuna tu Jahowa, antong pajonok hamu ma mamboan angka pelean sipotongon dohot pelean pujipujian tu joro ni Jahowa! Jadi diboan luhutan i ma angka pelean sipotongon dohot pelean pujipujian, jala nasa jolma na ringgas roha mamboan angka pelean situtungon.

29:32 Ia bilangan ni pelean situtungon, angka na binoan ni luhutan i, i ma pitupulu lombu, saratus birubiru tunggal jala dua ratus anak ni birubiru. Luhutna i bahen pelean situtungon tu Jahowa.

29:33 Diparbadiai dope angkup ni onom ratus lombu dohot tolu ribu birubiru.

29:34 Alai maotikku do angka malim, pola ndang taralo nasida mambobahi sude pelean situtungon i, dibahen i halak Lepi, angginasida i mangurupi nasida, paima sun ulaon i, paima dohot angka malim i taruras; ai umburju roha ni halak Lepi manguras dirina sian angka malim.

29:35 Angkup ni torop situtu do disi pelean situtungon rap dohot tabotabo ni angka pelean hamauliateon dohot angka pelean siinumon bahen dongan ni pelean situtungon. Asa songon i ma pangarataina di ulaon di joro ni Jahowa.

29:36 Jadi marlas ni roha ma si Hiskia dohot sandok bangso i, taringot tu naung pinadiri ni Debata di bangso i; ai tung tompu do masa hata i.

2 Kronika 30

30:1 Dung i disuru si Hiskia suruanna tu sandok Israel dohot Juda, ditongos huhut angka surat tu Epraim dohot Manasse, asa ro be nasida tu joro ni Jahowa di Jerusalem, asa marulaon Paska di Jahowa, Debata ni Israel.

30:2 Ai nunga martuptup hian rajai rap dohot angka indukna dohot sandok luhutan i di Jerusalem, naeng marulaon Paska di bulan sipaha dua.

30:3 Ai ndang tarbahen nasida marulaon di tingkina hian, ala so singkop dope taruras angka malim i jala ndang dope pungu situan na torop i di Jerusalem.

30:4 Jadi lomo ma roha ni rajai di hata i dohot sandok luhutan i.

30:5 Jadi mardos ni roha ma nasida, ingkon tingtingkononhon hata i tu sandok Israel, olat ni Berseba sahat ro di Dan, asa ro be tu Jerusalem marulaon Paska di Jahowa, Debata ni Israel, ai nunga tung leleng ndang rim nasida marulaon, hombar tu na tarsurat.

30:6 Dung i mardalan ma angka suruani mamboan angka surat sinurat ni tangan ni rajai dohot angka indukna martingting tu sandok Israel dohot Juda, hombar tu tona ni rajai songon on: Hamu ale angka anak Israel! Mulak ma hamu tu Jahowa, Debata ni si Abraham, si Isak dohot si Israel, asa mulak Ibana tu jolma pasipasi angka na malua di hamu sian tangan ni raja di Assur.

30:7 Unang tung hamu songon ompumuna dohot songon hahaanggimuna, angka na mardosa dompak Jahowa, Debata ni ompumuna i, gabe dipasahat Ibana nasida tu hamagoan, songon na niidamuna nuaeng.

30:8 On pe, sai unang ma patangkang hamu tangkuhukmuna i, songon na binahen ni ompumuna, pasahat hamu tagonan dirimuna tu Jahowa, jala ro be hamu tu habadiaonna, naung pinarbadiaanna ro di salelenglelengna, jala oloi hamu Jahowa, Debatamuna i, asa mundar sian hamu parpiarpiar ni rimasna.

30:9 Ai molo mulak hamu tu Jahowa, jumpangan asi ni roha ma hahaanggimuna dohot anakkonmuna maradophon halak na mambuangkon nasida, asa mulak nasida loasonna tu tano on. Ai parasi roha jala pardengganbasa do Jahowa, Debatamuna i, jala ndang tagamon padaoonna bohina sian hamu, molo mulak hamu tu Ibana.

30:10 Jadi mardalan ma angka suruani sian huta na sada tu na asing di tano Epraim dohot Manasse jala sahat tu Zebulon. Hape diparengkeli halak do nasida jala diinsahi.

30:11 Alai adong deba baoa sian Aser dohot Manasse dohot Zebulon, angka na paunduk rohana jala ro tu Jerusalem.

30:12 Angkup ni andar do di Juda tangan ni Debata manumpak, mangalehon tu nasida sada ni roha laho mangulahon tona ni rajai dohot angka induk i, hombar tu hata ni Jahowa.

30:13 Jadi marluhut ma di Jerusalem mansai torop halak, naeng marari raya sagusagu na so niasoman di bulan sipaha dua, tung na balga situtu do luhutan i.

30:14 Jadi hehe be ma nasida mangalohai langgatan, angka na di Jerusalem, jala dipadao sude langgatan pamelean daupa, jala direongkon angka i tu bagasan sunge Kidron.

30:15 Dung i dipotongi nasida ma birubiru Paska di ari sampulu opat bulan sipaha dua. Ai nunga tarurak angka malim dohot halak Lepi gabe diuras dirina, asa masuk boanonna angka pelean situtungon tu bagasan joro ni Jahowa.

30:16 Jadi marudur nasida jongjong di hajongjonganna be, hombar tu tohonanna hian, na tarsurat di patik ni si Musa, halak ni Debata. Dung i dipistikkon angka malim i ma mudar i sian tangan ni halak Lepi.

30:17 Ai mansai torop jolma di luhutan i, angka na so manguras dirina dope, dibahen i halak Lepi do umpotongi angka birubiru Paska, manguras sude jolma, angka na so taruras dope, asa gabe badia nasida di Jahowa.

30:18 Ai mansai torop halak situan na torop i, angka sian Epraim, Manasse, Isasar dohot Zebulon, angka na so taruras dope, mangan Paska do nian nasida, alai ndang hombar tu na tarsurat. Jadi martangiang ma si Hiskia mangondihon nasida, ninna ma: Pardengganbasa do Jahowa, sai marpangulahi ma rohana.

30:19 Mida ganup jolma na marsihohot mangalului sian nasa rohana Debata Jahowa, Debata ni ompuna i, atik pe so hombar tu pangurasion na badia i.

30:20 Jadi ditangihon Jahowa ma tangiang ni si Hiskia, jala dipahisar bangso i.

30:21 Jadi halak Israel angka na jumpang di Jerusalem marari raya sagusagu na so niasoman pitu ari lelengna marlas ni roha godang. Ianggo halak Lepi dohot angka malim, sai mamujimuji Jahowa do ariari huhut mardongan parhinaloan papujipuji hagogoon ni Jahowa.

30:22 Dung i marsipaingot ma si Hiskia tu roha ni ganup halak Lepi, angka na pantas marroha mangaradoti ulaon tu Jahowa. Dung i mangan pelean ari raya nasida pitu ari lelengna, huhut mamelehon angka pelean hamauliateon, huhut papujipuji Jahowa, Debata ni ompunasida i.

30:23 Dung i mardos ni roha sandok luhutan i, naeng dope marari raya pitu ari nari; saut ma nasida marari raya pitu ari nari huhut marlas ni roha.

30:24 Ai nunga dibasabasahon si Hiskia, raja sian Juda, tu luhutan i saribu lombu dohot pitu ribu birubiru; angka induk i pe marbasabasahon tu luhutan i saribu lombu dohot saloksa ribu birubiru; angka malim pe nunga mansai torop mangurasi dirina be.

30:25 Jadi marlas ni roha ma sandok luhutan Juda ro di angka malim dohot halak Lepi, rap dohot sandok luhutan angka na ro sian Israel, angkup ni halak dagang, angka na ro sian tano Israel, nang angka na maringan hian di Juda.

30:26 Jadi masa las ni roha godang di Jerusalem; ai olat ni tingki ni si Salomo, anak ni si Daud, raja sian Israel, ndang dung masa songon i di Jerusalem.

30:27 Dung i hehe ma angka malim dohot halak Lepi laho mamasumasu bangso i, jala ditangihon Debata soaranasida i, ai sahat do tangiangnasida i tu ingananna na badia i di banua ginjang.

2 Kronika 31

31:1 Jadi dung marujung saluhutna i, borhat ma sandok Israel, angka na jumpang disi manopot angka huta di Juda, jala dibolai nasida angka ganaganaan na jongjong, jala ditaba angka sombaon Asera, jala dilohai angka tambak dohot langgatan maniaphon sian sandok Juda dohot Benjamin dohot Epraim dohot Manasse, tung sun siap do dibahen. Dung i mulak ma sude halak Israel ganup tu partalianna di bagasan hutanasida.

31:2 Dung i dipaodor si Hiskia muse angka pargansion ni malim dohot halak Lepi, mangihuthon pargansionna hian, ganup hombar tu tohonanna, nang malim, nang halak Lepi, laho mamelehon pelean situtungon dohot pelean hamauliateon, asa marhalado nasida, mandok mauliate dohot mamujimuji di bagasan pintu ni joro ni Jahowa.

31:3 Nang bagian ni rajai, sian ugasanna sandiri do dilehon bahen pelean situtungon, i ma angka pelean situtungon manogotna i dohot bodarina i, ro di pelean situtungon di ari Sabbat dohot poltak ni bulan dohot di angka ari raya, songon na tarsurat di bagasan buku patik ni Jahowa.

31:4 Dung i didok rajai ma tu bangso i, isi ni Jerusalem, ingkon lehononna be guguanna tu malim dohot tu halak Lepi, asa marsihohot rohanasida mangaradoti patik ni Jahowa.

31:5 Jadi dung sar hata i dipagodang halak Israel ma angka patumonaan sian eme, anggur, miak, situak ni loba dohot sian sandok gogo ni tano i, ro di parsampuluan sian saluhutna diboan nasida mansai godang.

31:6 Tole halak Israel dohot Juda, angka na maringan di bagasan angka huta di Juda, diboan be huhut parsampuluan sian lombu dohot birubiru, nang parsampuluan sian ugasan na badia naung pinarbadiaan tu Jahowa, Debatanasida i, pola margugungugun dibahen.

31:7 Di bulan sipaha tolu dipungka nasida mambahen margugungugun, jala di bulan sipaha pitu pe asa marujung.

31:8 Jadi dung bongot si Hiskia dohot angka induk i maningkir angka gugungugun i, dipuji nasida ma Jahowa jala dipasupasu bangsona Israel.

31:9 Dung i usouso ma si Hiskia tu angka malim dohot halak Lepi taringot tu angka gugungugun i.

31:10 Dung i ninna sintua ni malim Azaria, sian pinompar ni si Sadok ma tu rajai: Olat ni dung dipungka halak mamboan silehonlehon tu joro ni Jahowa, sai mangan do hami jala bosur jala marlobilobi dope mansai godang; ai nunga dipasupasu Jahowa bangsona, ala ni umbahen lobi angka gugungugunon.

31:11 Dung i didokkon si Hiskia ma, ingkon paulion deba bilut parbohalan di joro ni Jahowa; jadi dipauli nasida ma i.

31:12 Dung i dipamasuk nasida ma tusi angka silehonlehon dohot parsampuluan dohot ugasan na pinarbadiaan marroha hasintongan; jala induk panahatan ni luhutna i, i ma si Hanania, halak Lepi dohot si Simei, anggina i induk paidua.

31:13 Tole muse si Jeiel, si Azasiah, si Nahat, si Asahel, si Jerimot, si Josabad, si Eliel, si Ismakia, si Mahat dohot si Benaia angka induk nian, alai marpandapotan tu si Hanania dohot si Simei anggina i, pinarenta ni raja Hiskia dohot si Azaria, induk di joro ni Debata.

31:14 Tole muse si Kora, anak ni si Innah, halak Lepi, sijaga pintu tungkan habinsaran, ibana panahatan ni nasa silehonlehon sian lomo ni roha tu Debata, asa sagihononna silehonlehon tu Jahowa dohot na badia sahali.

31:15 Jala marpandapotan tu ibana do si Eden, si Minyamin, si Jesua, si Semaya, si Amaria dohot si Sekania di bagasan angka huta ni malim, ingkon marroha hasintongan be nasida marsagihon tu hahaanggina hombar tu parsagionna, nang tu na magodang, nang tu na metmet.

31:16 So padohot baoa angka na sinuratnasida i, olat ni na marumur tolu taon tu ginjang, taringot tu sude angka na masuk tu bagasan joro ni Jahowa, singkop di ganup di arina be mangaradoti ulaon di tohonanna, mangihuthon pargansionna be.

31:17 Tole muse malim angka na tarsurat mangihuthon pinomparnasida marsasaama, tole halak Lepi olat ni na marumur duapulu taon tu ginjang mangaradoti tohonanna mangihuthon pargansionna be.

31:18 Tole muse angka na tarsurat sian saluhut dakdanaknasida, jolmanasida, anaknasida dohot borunasida di sandok luhutan i, ai marroha hasintongan nasida pabadiahon dirina be marsagihon ugasan na badia i.

31:19 Nang di pinompar ni si Aron, i ma angka malim i, adong do targoar angka baoa di ganup huta ro di tano na masuk tusi marsagihon parjambaran tu ganup baoa sian angka malim dohot tu sude na tarsurat sian halak Lepi.

31:20 Songon i dibahen si Hiskia di sandok Juda, sai diulahon do na denggan, habonaron dohot hasintongan di adopan ni Jahowa, Debatana.

31:21 Jala di bagasan saluhut ulaon na pinungkana mangaradoti ulaon di bagas ni Debata, mangaradoti patik dohot tona laho mangalului Debatana, sai sian nasa rohana do diula, gabe manjadi ma.

2 kronika 32

32:1 Jadi dung salpu angka jamita ondeng dohot ulaon hasintongan i, ro ma si Sanherib, raja sian Assur, manola Juda jala ditungkum huta angka na gonting, jala ditahi rohana naeng soluhonna.

32:2 Jadi dung diida si Hiskia naung ro si Sanherib, jala dipatohom bohina naeng marporang dompak Jerusalem.

32:3 Martuptup ma rajai rap dohot angka indukna dohot ulubalangna, naeng manongsong angka aek mual, angka na di balian ni huta i, jadi diurupi nasida ibana.

32:4 Ai marpungu do mansai torop halak, gabe disongsong nasida nasa mual dohot sunge i tahe, na mardalan sian tongatonga ni tano i, ai ninna do: Molo ro angka raja sian Assur, boasa ingkon godang aek dapotonna?

32:5 Dung i dipapir rajai ma tondina jala dipatogu sandok parik, molo adong na maloha, jala dipajongjong angka palaspalas di atasna, dibahen muse sadanari parik balian jala dipagonting Milo di bagasan huta ni si Daud, jala dipambahen sinjata mansai torop dohot angka lombulombu.

32:6 Dung i dipabangkit ma angka partogi tu hamusuon manguluhon situan na torop i jala dipaluhut nasida tu lambungna di alaman mardonokkon bahal ni huta i, jala didok hata sipir ni tondinasida i songon on:

32:7 Pir ma tondimuna jala marsihohot! Unang hamu mabiar jala unang godoron rohamuna maradophon raja sian Assur, manang maradophon sandok paranganna na rap dohot ibana, ai tumorop do na mandongani hita asa ibana!

32:8 Botohon sibuk tahe donganna, alai anggo donganta Jahowa, Debatanta do laho manolongi dohot manguluhon hita marporang. Jadi nalom ma roha ni situan na torop i umbege hata ni si Hiskia, raja sian Juda.

32:9 Dung i disuru si Sanherib, raja sian Assur ma angka naposona tu Jerusalem (ai di Lakis do anggo ibana rap dohot sandok paranganna) manopot si Hiskia, raja sian Juda, dohot sandok halak Juda, angka na di Jerusalem mandok tu nasida:

32:10 Songon on do hata ni si Sanherib, raja sian Assur: Marhaposan tudia do hamu ulaning, umbahen tinggal dope hamu di Jerusalem naung tinungkum humaliang?

32:11 Nda si Hiskia do i na paotootohon hamu, naeng pasahatonna hamu tu hamatean marhite sian haraparon dohot hauason mambahen ende halilian ni pinggol mandok: Jahowa, Debatanta i paluahon hita sian tangan ni raja di Assur?

32:12 Nda ibana do si Hiskia, naung mangaloha angka tambakna dohot langgatanna, lam didok muse tu Juda dohot tu Jerusalem: Di adopan ni langgatan na sasada on do hamu marsomba dohot manutung daupa di atasna?

32:13 Ndang diboto hamu huroha, manang aha naung hubahen dohot naung binahen ni angka daompung tu saluhut bangso ni angka luat? Tung adong ma angka debata ni bangso parbegu marluatluat na tuk paluahon angka luatnasida sian tanganku?

32:14 Tung ise ma sian saluhut debata ni angka bangso parbegu on, angka na nirendephon ni daompung, na tarbahen paluahon bangsona sian tanganku, tung muba tagamon. Debatamuna tarpaluasa hamu sian tanganku?

32:15 Nuaeng pe, unang olo hamu paotootoon ni si Hiskia, jala unang olo hamu ansionna, unang porsea hamu di ibana! Ai ndang adong nanggo sada debata ni sandok bangso parbegu manang harajaon, na tarbahen paluahon bangsona sian tanganku manang sian tangan ni angka daompung pe, lam Debatamuna ma huroha ndang tagamon tarpaluasa hamu sian tanganku!

32:16 Lam didatdati angka naposona dope mandok hatana manginsahi Debata Jahowa dohot si Hiskia naposona i.

32:17 Angkup ni disurati huhut deba surat laho manginsahi Jahowa, Debata ni Israel dohot mandok hatana dompak Ibana, songon on: Suang songon debata ni angka bangso parbegu marluatluat, ndang tarbahensa paluahon bangsonasida sian tanganku, suang le songon i Debata ni si Hiskia, ndang tagamon tarpaluasa bangsona sian tanganku!

32:18 Dung i joujou ma nasida marsoara na gogo di hata Jahudi tu bangso isi ni Jerusalem, na di atas parik, naeng manahuti nasida dohot mambahen godoron, asa papatuonna huta i.

32:19 Huhut marhatahata dompak Debata pandingini di Jerusalem, suang songon dompak debata sileban ni angka bangso di atas tano on, jadijadian ni tangan ni jolma.

32:20 Alai martangiang ma anggo raja Hiskia dohot panurirang Jesaya, anak ni si Amos, mangalo hatana i, pola mangangguhi nasida dompak banua ginjang.

32:21 Dung i disuru Jahowa ma sada suruanna, na mangarendephon sude ulubalang na marhuaso dohot partogi dohot induk di parsaroan ni raja sian Assur, gabe tarurak situtu ibana laho mulak tu luatna. Jadi dung masuk ibana tu bagasan joro ni Debatana, ro ma tubuna sandiri mambunu ibana disi marhite sian podang.

32:22 Asa Jahowa do paluahon si Hiskia dohot isi ni Jerusalem sian tangan ni si Sanherib, raja sian Assur dohot sian tangan ni saluhut musuna, jala diparmahan nasida humaliang.

32:23 Jadi torop halak mamboan silehonlehon di Jahowa tu Jerusalem dohot arta angka na arga tu si Hiskia, raja sian Juda. Jadi dung songon i lam timbul ma rajai maradophon saluhut bangso parbegu.

32:24 Di angka ari uju i marsahit ma si Hiskia pola matemate ne, gabe martangiang ibana tu Jahowa; na mangalusi ibana jalojalo huhut mangalehon sada tanda halongangan tu ibana.

32:25 Alai tahe ndang dibaloshon si Hiskia, hombar tu asi ni roha jinalona i, ai dipaginjang do rohana. Ala ni mangonai rimas tu ibana dohot tu Juda dohot tu Jerusalem.

32:26 Alai dung dipaunduk si Hiskia rohana i, ala ni ginjang ni rohana i rap dohot isi ni Jerusalem, gabe ndang saut ro rimas ni Jahowa tu nasida, saleleng mangolu si Hiskia.

32:27 Alai na mora jong do si Hiskia jala marhamuliaon godang situtu, jala dipauli di ibana angka bilut parpeopan arta, perak, sere, mata intan, pamurpuri, angka parinse dohot angka ulaula hasudungan ni roha marragamragam.

32:28 Dipauli huhut angka bagas parpeopan ni gogo ni tano i, eme, anggur dohot miak; tole muse angka bara ni pinahan marragamragam dohot bara ni birubiru.

32:29 Tole muse dipambahen angka huta, jala mansai godang dorbiana, angka birubiru dohot lombu; ai nunga dilehon Debata sinamot tu ibana mansai godang.

32:30 Laos si Hiskia do manambok haroroan ni aek Gihon sian julu, jala ditogutogu do i sian toru ni tano tungkan hasundutan sian huta ni si Daud. Jadi mardohar si Hiskia di sandok ulaonna.

32:31 Alai tahe dung ro suruan ni angka raja sian Babel, angka na sinuru manopot ibana usouso di tanda halongangan naung masa di luat i, ditadingkon Debata ma ibana, pola diunjuni ibana, asa tung tartanda saluhut na di bagasan rohana i.

32:32 Alai jamita na tinggal i dope sian si Hiskia dohot hadaulaton ni rohana, ida ma, tarsurat do angka i di bagasan buku pangungkapon ni panurirang Jesaya, anak ni si Amos dohot di bagasan buku ni angka raja sian Juda dohot Israel.

32:33 Dung i monding ma si Hiskia, gabe top dohot angka ompuna, jala tartanom ibana di robean ni parbandaan ni pinompar ni si Daud. Dung i ro be ma sandok halak Juda dohot isi ni Jerusalem pasangaphon rajai di hamamatena. Jadi si Manasse, anakna i bangkit raja singkatna.

2 Kronika 33

33:1 Marumur sampulu dua taon si Manasse di na bangkit raja ibana, jala limapulu lima taon lelengna ibana mangarajai di Jerusalem.

33:2 Dung i diulahon rajai ma sogo ni roha ni Jahowa hombar tu biasbias angka na niulahon ni angka bangso parbegu, angka naung pinabali ni Jahowa maradophon halak Israel.

33:3 Jala diulahi rajai paulihon tambak, angka naung nilohaan ni si Hiskia amana i, jala dipajongjong angka langgatan di Baal, jala dibahen angka sombaon Asera, jala marsomba ibana tu sandok parangan di langit, jala marpangoloion tusi.

33:4 Jala dipajongjong angka langgatan di bagasan joro ni Jahowa, taringot tusi nunga pola didok Jahowa nian: Di Jerusalem do pahotonku Goarhu ro di salelenglelengna.

33:5 Angkup ni dipauli do angka langgatan di sandok parangan di langit, di bagasan na dua alaman ni joro ni Jahowa.

33:6 Ibana sandiri tahe pabolushon angka anakna sian bagasan api, di rura na di anak ni si Hinnom, diulahon huhut pangarundingon dohot parsibalikmataon, jala dipabangkit angka jolma bahen hasandaran ni begu, dohot partondung, tung na godang situtu do diulahon sogo ni roha ni Jahowa, asa pahehe rimasna.

33:7 Dipajongjong huhut sada ganaganaan Asera, naung binahenna i tu bagasan joro ni Debata, naung pola nian didok Debata hian tu si Daud dohot tu Salomo anakna i: Tu bagasan joro on dohot tu bagasan Jerusalem, naung hupilliti sian saluhut marga ni Israel, pahotonku Goarhu ro di salelenglelengna.

33:8 Jala ndang be paunsatonku pat ni Israel sian tano naung huturpukhon tu ompunasida i, asal diringkoti nasida laho mangulahon hombar tu saluhut naung hutonahon i tu nasida, jala diihuthon sandok patik, aturan dohot uhum, angka na nilehon marhite sian si Musa!

33:9 Alai dililuhon si Manasse do halak Juda dohot isi ni Jerusalem laho mangulahon hajahaton, gumodang sian bangso parbegu angka naung niago ni Jahowa maradophon halak Israel.

33:10 Dung i ro do nian hata ni Jahowa tu si Manasse dohot tu sandok bangsona, alai ndang diparateatehon nasida.

33:11 Ala ni diparo Jahowa ma dompak nasida angka induk ni parangan ni raja sian Assur, angka na manangkup si Manasse marhite sian rante, laos songon i tarrante dohot dua rante tombaga diboan nasida ibana tu Babel.

33:12 Jadi dung hagogotan rohana, digogo ma marhuraja di adopan ni Jahowa, Debatana, jala dipaunduk situtu rohana maradophon Debata ni angka ompuna i.

33:13 Jala martangiang tu Ibana. Jadi marpangulahi ma roha ni Debata jala ditangihon tangiangna i, jala diboan ibana mulak tu Jerusalem, sumuang tu harajaonna. Jadi mananda ma si Manasse, Jahowa do hape Debata.

33:14 Dung salpu songon i dipatogu ma parik ruar di huta ni si Daud, tungkan hasundutan sian sunge Gihon laho masuk tu bahal pardengkean, jala dihaliangi do Opel, jala timbo situtu dibahen, jala dipaojak angka induk ni parangan di bagasan saluhut huta angka na gonting di Juda.

33:15 Dung i dipaholang angka debata sileban dohot ganaganaan sian bagasan joro ni Jahowa, jala saluhut langgatan angka na pinajokna di atas dolok hajongjongan ni joro ni Jahowa dohot di Jerusalem; laos dibolongkon do angka i tu balian ni huta i.

33:16 Jala dipajongjong muse langgatan ni Jahowa jala pipelehon di atasna angka pelean hamauliateon dohot pujipujian, jala dipatik halak Juda, ingkon oloanna Jahowa, Debata ni Israel.

33:17 Alai tong dope anggo situan na torop i mamele di atas ni angka tambak, atik pe holan tu Jahowa, Debatanasida i nian.

33:18 Alai jamita na tinggal i dope sian si Manasse ro di tangiangna tu Debatana dohot angka hata sipaingot sian angka panurirang, angka na marsipaingot tu ibana marhite sian Goar ni Jahowa, Debata ni Israel, ida ma, tarsurat do angka i di bagasan buku jamita ni angka raja sian Israel.

33:19 Nang tangiangna dohot panangihon ni Debata disi, ro di sude dosana dohot hajahatonna, ro di hajongjongan ni angka tambak pinaulina disi huhut bahen hajongjongan ni angka sombaon Asera dohot ganaganaan angka na niuhir, tagan so dipaunduk dope rohana, ida ma, tarsurat do angka i di bagasan buku ni halak partondung.

33:20 Dung i monding ma si Manasse gabe top dohot angka ompuna, jala tartanom ibana di bagasan jabuna sandiri; jadi si Amon, anakna i, bangkit raja singkatna.

33:21 Marumur duapulu dua taon si Amon di na bangkit raja ibana, jala dua taon lelengna ibana mangarajai di Jerusalem.

33:22 Jala diulahon ibana do sogo ni roha ni Jahowa, suang songon na binahen ni si Manasse amana i; huhut mamele do si Amon tu saluhut ganaganaan, angka na niuhir ni si Manasse amana i, jala marsomba do ibana tusi.

33:23 Alai ndang anggo dipaunduk rohana di adopan ni Jahowa, songon pangundukkon ni si Manasse amana i, lam dipagodang si Amon tahe salana.

33:24 Dung i marbulan ma angka naposona mangalo ibana, laos ditodos ma ibana di bagasan jabuna sandiri.

33:25 Alai ro ma situan na torop isi ni luat i, dibunu ma sude halak na marbulan mangalo raja Amon; laos dipabangkit situan na torop isi ni luat i ma si Josia, anakna i, gabe raja singkatna.

2 Kronika 34

34:1 Marumur ualu taon si Josia di na bangkit raja ibana, jala tolupulu sada taon lelengna ibana mangarajai di Jerusalem.

34:2 Jala diulahon do lomo ni roha ni Jahowa, jala marparange ibana di angka dalan ni si Daud, ompuna i, jala ndang manimbil ibana tu siamun manang tu hambirang.

34:3 Ai paualutaonhon hinarajaonna i, uju bajar dope ibana, nunga dipungka mangalului Debata ni si Daud, ompuna i, jala pasampuluduataonhon, dipungka ma manguras Juda dohot Jerusalem sian angka tambak dohot sombaon Asera dohot ganaganaan angka na niuhir dohot na tinuang.

34:4 Dung i di adopan ni raja dilohai halak angka langgatan pamelean tu Baal, jala angka tiang na jongjong di atasna dilobongi, jala ditaba angka sombaon Asera jala dibolahon ganaganaan angka na niuhir dohot na tinuang, laos disirabuni do jala disirsirhon tu atas tanoman ni halak angka na mamele tusi.

34:5 Ditutung huhut holiholi ni angka malim di atas langgatannasida, asa manguras Juda dohot Jerusalem.

34:6 Nang di bagasan angka huta ni Manasse, Epraim, Simeon sahat tu Naptali di bagasan angka halongonan humaliang.

34:7 Dilohai rajai huhut angka langgatan dohot sombaon Asera dohot ganaganaan angka na niuhir, laos ditapori jala digopui jala sude angka tiang panombanombaan dilobongi do di sandok tano Israel, dung i mulak ibana tu Jerusalem.

34:8 Pasampuluualutaonhon hinarajaonna i, dung sun diuras tano i dohot joro i, disuru ma si Sapan, anak ni si Azalia dohot si Maaseia, induk ni huta i dohot si Joa, anak ni si Joahas, juaratulis i, asa umbanonna joro ni Jahowa, Debatana i.

34:9 Jadi ro ma nasida manopot sintua ni malim Hilkia, jala dipasahat tu ibana perak, naung binoan tu joro ni Debata, na pinapungupungu ni halak Lepi, angka sijaga pintu mardonokkon lobulobu, sian tangan ni halak Manasse dohot Epraim dohot sian sandok pasipasi ni Israel dohot sian sandok Juda dohot Benjamin dohot sian angka isi ni Jerusalem.

34:10 Dipasahat nasida do i muse tu bagasan tangan ni tungkang, angka panahatan ni ulaon di joro ni Jahowa; jala nasida muse mangalehon perak i tu halak angka na mangula di joro ni Jahowa, laho mangumban dohot patoguhon joro i.

34:11 Ai dilehon nasida do i tu angka tungkang hau dohot tungkang batu, asa dituhor nasida angka batu na nidakdak dohot parhau bahen gulanggulang dohot bahen tiang singkop tu bagas angka naung niloha ni angka raja sian Juda.

34:12 Marhaburjuon be angka baoa i mangaradoti ulaon i; ai jolma panahatannasida i, i ma: Si Jahat, dohot si Obaja halak Lepi sian pinompar ni si Merari; tole muse si Sakaria dohot si Mesulam sian pinompar ni si Kohat, angka na mangaringkoti ulaon i; tole halak Lepi sude do nasida pande umpalu parhinaloan.

34:13 Nasida huhut panahatan ni halak parhuli dohot manguluhon saluhut halak tu ulaon marragamragam; adong huhut sian halak Lepi angka juaratulis dohot panuturi dohot sijaga pintu.

34:14 Jadi dung diparuar nasida perak na binoan tu bagasan joro ni Jahowa, jumpang malim Hilkia ma buku patik ni Jahowa, na nilehon marhite sian si Musa.

34:15 Dung i ro ma hata ni si Hilkia mandok tu si Sapan, juaratulis i: Nunga jumpang ahu buku patik di bagasan joro ni Jahowa! Laos dilehon si Hilkia ma buku i tu si Sapan.

34:16 Alai diboan si Sapan muse buku i tu rajai, laos diboan huhut barita, tu rajai songon on: Saluhut na pinasahat tu angka naposom, diula nasida do i.

34:17 Nunga diusehon nasida perak na jumpang i di bagasan joro ni Jahowa, jala dilehon do i tu halak panahatan ulaon dohot tu halak na mangaradoti ulaon i.

34:18 Angkup ni dipaboa si Sapan, juaratulis i tu rajai barita on: Nunga dilehon malim Hilkia sada buku tu ahu. Jadi dijaha si Sapan ma buku i di adopan ni rajai.

34:19 Jadi dung dibege rajai angka hata ni buku patik i, disansani ma pangkeanna.

34:20 Dung i ro ma hata ni rajai mandokkon si Hilkia dohot si Ahikam, anak ni si Sapan dohot si Akbor, anak ni si Mika dohot si Sapan, juaratulis i dohot si Asaya, parhalado ni rajai, ninna ma.

34:21 Laho ma hamu manungkunhon tu Jahowa taringot tu ahu dohot taringot tu jolma pasipasina di Israel dohot di Juda ala ni angka hata ni buku na jumpang i; ai tung na balga situtu do rimas ni Jahowa, na niusehonna tu hita, ala na so diradoti angka ompunta hata ni Jahowa, mangulahon nian luhut na tarsurat di bagasan buku on.

34:22 Dung i laho ma si Hilkia rap dohot angka na ginoar ni rajai manopot panurirang Nai Hulda, jolma ni si Sallum, anak ni si Tikpa, anak ni si Hasra, siramoti pangkean. Alai maringan do Nai Hulda * di Jerusalem partoruan, gabe mangkatai nasida patolhas tona i tu ibana.

34:23 Dung i ninna Nai Hulda ma tu nasida: Songon on do hata ni Jahowa, Debata ni Israel: Paboa hamu ma tu baoa na marsuru hamu manopot ahu:

34:24 Songon on do hata ni Jahowa: Ida ma, paroonku ma jea tu huta on dohot tu jolma isina i, hombar tu saluhut torutoru angka na tarsurat di bagasan buku i, naung jinaha di adopan ni raja sian Juda.

34:25 Ala naung tinadingkonnasida i Ahu, jala manutung daupa nasida tu angka debata sileban, asa pahehe rimashu marhite sian sude pambahenan ni tangannasida; dibahen i ingkon usehononhon rimashu tu inganan on, jala ndang be haintopan.

34:26 Alai anggo tu raja sian Juda, na marsuru hamu laho manungkunhon tu Jahowa, ingkon songon on do dohononmuna: Boti hata ni Jahowa, Debata ni Israel, anggo taringot tu hata angka naung binegem i:

34:27 Ala naung mangilala roham, jala dipaunduk ho dirim di adopan ni Debata, dung dibege ho hata angka na nilumbahonna i dompak huta on dohot dompak jolma pangisina i; ala naung dipaunduk ho tutu dirim di adopan ni Bohingku, nunga pola diribahi ho pangkeanmu huhut tumatangis di adopan ni Bohingku, Ahu pe, nunga hutangihon ho, ninna Jahowa.

34:28 Ida ma, Ahu sandiri papunguhon ho tu angka ompum, asa marsonangsonang ho papunguonna tu bagasan tanomanmu, asa unang sanga idaon ni matami saluhut jea na naeng paroonku tu atas ni huta on dohot tu atas ni jolma pangisina i. Jadi diboan nasida ma hata alusi tu rajai.

34:29 Dung i disuru rajai ma suruanna asa paluhuthon saluhut sintua sian Juda dohot Jerusalem.

34:30 Dung i nangkok ma rajai tu joro ni Jahowa, rap dohot sude baoa sian Juda dohot pangisi ni Jerusalem, ro di angka malim dohot halak Lepi dohot sandok situan na torop i, tole angka na magodang ro di na metmet; laos didokkon ma manjaha tu pinggolnasida saluhut hata ni buku parjanjian, na jumpang i di bagasan joro ni Jahowa.

34:31 Dung i jongjong ma rajai tu hajongjonganna hian, asa mambahen parpadanan di adopan ni Jahowa, ingkon mangihuthon tu Jahowa dohot mangaradoti angka tonana dohot panindangionna dohot aturanna sian nasa rohana be dohot sian nasa ateatena laho mangulahon angka hata ni parjanjian, angka na tarsurat di bagasan buku on.

34:32 Dung i didokkon rajai ma jongjong mangundukkon parjanjian i sude jolma na jumpang di Jerusalem dohot di Benjamin. Jadi dibahen isi ni Jerusalem ma hombar tu hata ni parjanjian ni Debata, i ma Debata ni ompunasida i.

34:33 Dung i didokkon si Josia ma paholangon saluhut ganaganaan biasbias sian sandok luat angka na niinganan ni Israel, jala dipatik sandok jolma angka na jumpang di Israel, ingkon mangoloi di Jahowa, Debatanasida i. Jadi saleleng mangolu rajai, ndang sumurut nasida sian Jahowa, Debata ni ompunasida i.

2 Kronika 35

35:1 Dung i marulaon Paska ma si Josia tu Jahowa di Jerusalem, jala diseat nasida birubiru Paska di ari sampulu opat bulan sipaha sada.

35:2 Laos rajai mandokkon angka malim mangaradoti tohonannasida i, jala dipapir tondinasida i mangaradoti ulaon di joro ni Jahowa.

35:3 Ro huhut hatana tu halak Lepi, angka na mangajari sandok halak Israel, jala naung pinarbadiaan di Jahowa: Bahen hamu ma poti na badia i tu bagasan joro naung pinajongjong ni si Salomo, anak ni si Daud, raja sian Israel; ndang pola be sorat abaramuna mangusung; dibahen i marpangoloion tu Jahowa, Debatamuna i ma hamu rap dohot bangsona Israel.

35:4 Antong diri ma hamu marhalado mangihuthon pargansionmuna marsasaama, songon na tarsurat di bagasan buku sinurat ni si Daud, raja sian Israel dohot si Salomo anakna i.

35:5 Ingkon jongjong ma hamu di bagasan inganan na badia i, marguru tu parsagi ni pinomparmuna marompuompu di tongatonga ni hahaanggimuna, i ma halak Israel i, huhut marguru tu pinompar ni halak Lepi marompuompu.

35:6 Dung i seati hamu ma birubiru Paska i, jala manguras ma hamu jala padiri hamu Paska i di hahaanggimuna i, asa diulahon nasida hombar tu hata ni Jahowa marhite sian si Musa.

35:7 Dung i dibasabasahon si Josia ma tu situan na torop i angka birubiru, angka anak ni birubiru dohot anak ni hambing, luhutna i bahen pelean Paska di sude jolma na disi, tolupulu ribu kibung toropna; angkup ni tolu ribu lombu; luhutna i sian ugasan ni rajai do.

35:8 Angka indukna pe girgir be do mangalehon tu situan na torop, tu angka malim dohot tu halak Lepi bahen pelean Paska, si Hilkia, si Sakaria dohot si Jeiel, na tolu induk i di bagasan joro ni Debata mangalehon tu angka malim dua ribu onom ratus birubiru angkup ni tolu ratus lombu bahen pelean Paska.

35:9 Ia si Hanania, si Semaya dohot di Netaneel, anggina i dohot si Hasabya, si Jeiel dohot si Josabad, angka induk ni halak Lepi, i ma mangalehon tu halak Lepi lima ribu birubiru dohot lima ratus lombu bahen pelean Paska.

35:10 Songon i ma pangaturna di ulaon i, jongjong tahe angka malim dihajongjongannasida, nang halak Lepi marguru tu pargansionnasida, hombar tu tona ni rajai.

35:11 Dung i diseat nasida ma birubiru Paska i, jala angka malim i mamistikkon mudar i sian tangannasida; ianggo halak Lepi dibobahi do angka pelean Paska.

35:12 Dung i dipapulik nasida ma angka pelean situtungon, asa lehononna marguru tu rongkanan ni pinomparnasida marompuompu di tongatonga ni halak Israel, asa pelehononna tu Jahowa, hombar tu na tarsurat di buku ni si Musa; suang songon i dibahen tu angka lombu i.

35:13 Dung i dipanggang nasida ma Paska i di atas api, songon na somal hian. Alai anggo naung pinarbadiaan i, dilompa nasida do i di bagasan hudon dohot seret dohot balanga, hatop do dibagi tu situan na torop i.

35:14 Dung i diparade ma dohot di nasida sandiri dohot di angka malim i, ai angka malim, i ma pinompar ni si Aron, pola sanga borngin nasida mamelehon angka pelean situtungon dohot tabotabo. Ala ni do umbahen ingkon halak Lepi marhobas di nasida sandiri dohot di angka malim, pinompar ni si Aron.

35:15 Tole angka parende, pinompar ni si Asap, jongjong di hajongjonganna be, hombar tu aturan na binahen ni si Daud, si Asap, si Heman dohot si Jedutun, partondung ni rajai; tole angka sijaga pintu jumaga pintuna be; ndada ingkon pola meret nasida sian ulaonna be, ai hahaangginasida, halak Lepi, marhobas di nasida.

35:16 Jadi maraturan ma sandok pangoloion tu Jahowa di ari na sasada i, asa tarbahen marulaon Paska dohot mamelehon angka pelean situtungon di atas langgatan ni Jahowa, hombar tu patik ni raja Josia.

35:17 Jadi marulaon Paska ma halak Israel angka na disi uju i, tole marari raya sagusagu na so niasoman pitu ari lelengna.

35:18 Ndang dung masa ulaon Paska songon sahalion di Israel, olat ni tingki ni panurirang Samuel; ndang dung marulaon Paska nanggo sada sian angka raja ni Israel, songon na binahen ni si Josia dohot angka malim dohot halak Lepi dohot sandok Juda, nang Israel na disi uju i ro di isi ni Jerusalem.

35:19 Pasampuluualutaonhon harajaon ni si Josia masa ulaon Paska on.

35:20 Dung salpu saluhutna i, dung diumban si Josia joro i, nangkok ma si Neko, raja sian Misir naeng marporang dompak Karkemis martopihon sunge Euprat. Jadi borhat ma si Josia manjumpangkon ibana.

35:21 Alai disuru ma suruanna mandok tu ibana: Aha parkarongku tu ho, ale raja sian Juda? Ndada mandopang ho ahu ro anggo sadarion, dompak pinompar ni musungku tihus hian do; pola dohot Debata mandok, ingkon hatop langkangku; dibahen i jaga dirim maradophon Debata na mandongani ahu, asa unang agoonna ho!

35:22 Alai ndang olo si Josia paundaronna, lam patinda rupa ibana naeng marporang dompak ibana, jala ndang ditangihon hata ni si Neko, angka na sian pamangan ni Debata, lam sahat ibana tu rura Megiddo asa marporang.

35:23 Hape manior halak parsior i, gabe hona raja Josia. Dung i didok rajai ma tu naposona: Boan hamu ma ahu sian on, ai nunga targisik bugangku.

35:24 Jadi dihindat angka naposona ibana sian hureta porang, jala diampehon ibana tu huretana paidua laho mamboan ibana tu Jerusalem. Dung i mate ma rajai jala tartanom di bagasan parbandaan ni angka ompuna. Jadi sandok isi ni Juda dohot Jerusalem margondok ni roha mida si Josia.

35:25 Si Jeremia pe dibahen do sada ende andung taringot tu si Josia, jala saluhut parende baoa dohot parompuan manaringoti goar ni si Josia di bagasan ende andungnasidai rasirasa sadarion; laos dibahen do angka i gabe hasomalan di Israel; jala ida ma, tarsurat do angka i di bagasan buku ende andung.

35:26 Jamita na tinggal i dope sian si Josia dohot hadaulaton ni rohana, hombar tu na tarsurat di bagasan buku patik ni Jahowa.

35:27 Jamitana pe angka na parjolo i dohot parpudi, ida ma, tarsurat do angka i di bagasan buku ni angka raja sian Israel dohot Juda.

2 Kronika 36

36:1 Dung i ro ma bangso isi ni tano i, dibuat ma si Joahas, anak ni si Josia, jala dipabangkit ibana gabe raja di Jerusalem singkat ni amana i.

36:2 Marumur duapulu tolu taon si Joahas di na bangkit raja ibana, jala tolu bulan lelengna ibana mangarajai di Jerusalem.

36:3 Ai dipaijur raja sian Misir ibana di Jerusalem, jala didando isi ni tano i saratus talenta perak dohot satalenta sere.

36:4 Dung i dipabangkit raja sian Misir ma si Eliakim, anggina i, bahen raja gumomgom Juda dohot Jerusalem, jala dipaimbar goarna gabe si Joiakim; alai anggo si Joahas hahana i diboan raja Neko, ibana tu Misir.

36:5 Marumur duapulu lima taon si Joiakim di na bangkit raja ibana, jala sampulu sada taon lelengna ibana mangarajai di Jerusalem; jala diulahon do sogo ni roha ni Jahowa, Debatana.

36:6 Dung i nangkok ma si Nebukadnesar, raja sian Babel mangalo rajai, laos dirante ma ibana dohot dua rante tombaga laho mamboan ibana tu Babel.

36:7 Sian ulaula angka na di bagasan joro ni Jahowa pe, diboan si Nebukadnesar deba tu Babel, jala dibahen do i tu bagasan jorona di Babel.

36:8 Jamita na tinggal i dope sian si Joiakim, ro di biasbias angka na niulana ro di hajahaton na asing na jumpang sian ibana, ida ma, tarsurat do i di bagasan buku jamita ni angka raja sian Israel dohot Juda. Jadi si Joiakin anakna i bangkit raja singkatna.

36:9 Marumur sampulu ualu taon si Joiakin di na bangkit raja ibana, jala tolu bulan sampulu ari lelengna mangarajai di Jerusalem, jala diulahon do sogo ni roha ni Jahowa.

36:10 Alai dung salpu sataon, disuru raja Nebukadnesar ma suruanna mamboan ibana tu Babel rap dohot ulaula angka na arga di joro ni Jahowa, jala dipabangkit si Sedekia amana i gabe raja gumomgom Juda dohot Jerusalem.

36:11 Marumur duapulu sada taon si Sedekia di na bangkit raja ibana, jala sampulu sada taon lelengna mangarajai di Jerusalem.

36:12 Jala diulahon ibana do sogo ni roha ni Jahowa, Debatana i, jala ndang dipaunduk dirina maradophon panurirang Jeremia, na patolhas hata ni Jahowa tu ibana.

36:13 Angkup ni i manggunturi ibana dompak raja Nebukadnesar naung patolon ibana tu Debata, hape dipajogal ibana tangkuhukna jala ditangkangi rohana, asa unang mulak rohana tu Jahowa, Debata ni Israel.

36:14 Nang sude induk ni angka malim dohot situan na torop i, godang situtu hajahaton diula, suman tu sandok biasbias angka na niulahon ni angka bangso parbegu, gari joro ni Jahowa na pinarbadiaanna di Jerusalem diramuni nasida do.

36:15 Angkup ni i tibu hian jala jotjot disuru Jahowa, Debata ni ompunasida i palumba nasida marhite sian angka suruanna, ai dipalambas do rohana mangolani bangsona dohot joro ingananna i.

36:16 Hape lam dilealeai nasida angka suruan ni Debata jala ditoishon rohana hata sipaingotna i, jala diengkelengkel angka panurirangna, paima marpiarpiar situtu rimas ni Jahowa tu bangsona, maradu so haintopan be.

36:17 Ai didokkon ibana ma nangkok raja ni halak Kasdim mandopang nasida, gabe dibunu angka dolidolinasida marhite sian podang di bagasan joronasida na badia i, jala ndang maralangalang rohana mida dolidoli manang namarbaju, nang mida halak na matua dohot na ubanon; tung luhutna do i dipasahat tu tanganna.

36:18 Tole nasa ulaula di joro ni Debata, angka na balga dohot na metmet ro di arta angka na di joro ni Jahowa, nang angka arta ni rajai dohot angka indukna, saluhutna i tarboan do tu Babel.

36:19 Ia joro ni Debata disurbu nasida do, jala dilohai angka parik ni Jerusalem jala sude bagas bolon na disi suda disurbu nasida dohot api; jadi mago ma sandok ulaulanasida angka na arga i.

36:20 Jala pasipasina angka na malua sian podang, dibuangkon do tu Babel, gabe naposo ni rajai nasida dohot naposo ni angka anakna, sahat ro di panggomgoman ni harajaon Persia.

36:21 Asa tung sintong jumpang hata ni Jahowa marhite sian pamangan ni si Jeremia, paima diparhasiholi tano i angka Sabbatna; ai saleleng hauulangna maradian do tano i, paima boho na pitupulu taon i.

36:22 Alai di taon parjolo hinarajahon ni si Sirus, raja sian Persia, asa tung sintong jumpang hata ni Jahowa marhite sian pamangan ni si Jeremia, disunggul Jahowa ma tondi ni si Sirus, raja sian Persia, asa disuru martingting tu sandok gomgomanna, pola mardongan surat mandok.

36:23 Songon on do hata ni si Sirus, raja sian Persia: Nunga sahat tu ahu saluhut harajaon di tano on, dilehon Jahowa, Debata na di surgo, jala Ibana marsuru ahu pajongjong di Ibana sada joro di Jerusalem, na di tano Juda. Manang ise nuaeng sian hamu, sian bangsona, sai didongani Jahowa, Debatana, ma ibana asa nangkok!