Buku 5 Musa

5 Musa ᯔᯮᯘ 1

1:1 On do hata, angka na pinaboa ni si Musa tu sandok Israel di bariba ni Jordan di halongonan, di adaran tondong ni laut arung, di holangholang ni Elaparan, Topel, Laban, Hazerot, dohot Disahab: ᯀᯉᯬ᯲ ᯑᯬ ᯂᯖ ᯀᯰᯄ᯦ ᯉ ᯇᯪᯉᯅᯬᯀ ᯉᯪ ᯘᯪ ᯔᯮᯘ ᯖᯮ ᯘᯉ᯲ᯑᯄ᯦ᯬ᯲ ᯀᯘᯪ᯲ᯒᯀᯞᯩ᯲ ᯑᯪ ᯅᯒᯪᯅ ᯉᯪ ᯐᯒᯬ᯲ᯑᯉ᯲ ᯑᯪ ᯂᯞᯬᯝᯬᯉᯉ᯲ ᯑᯪ ᯀᯑᯒᯉ᯲ ᯖᯉᯬ᯲ᯑᯰᯬ ᯉᯪ ᯞᯀᯖᯮ᯲ ᯀᯒᯮᯰ ᯑᯪ ᯂᯬᯞᯰᯂᯬᯞᯰ ᯉᯪ ᯀᯩᯞᯇᯒᯉ᯲ ᯖᯬᯇᯞᯩ᯲ ᯞᯅᯉ᯲ ᯂᯐᯩᯒᯖᯬ᯲ ᯑᯬᯂᯖᯬ᯲ ᯑᯪᯘᯂᯅ᯲

1:2 Sampulu sada ari mardalan daona sian Horeb mangihutihut dolok Seir sahat ro di Kades-Barnea.

1:3 Masa ma di taon paopatpuluhon, di artia bulan Li ro ma hata ni si Musa tu halak Israel, hombar tu saluhut na tinonahon ni Jahowa tu ibana patolhasonna tu nasida.

1:4 Dung tinaluhonna si Sihon, raja ni halak Amori na maringan di Hesbon dohot si Og, raja di Basan, na maringan di Astarot mardonokkon Edrei.

1:5 Di bariba ni Jordan, di tano Moab dipungka si Musa pajojorhon patikon, ninna ma:

1:6 Ro do hata ni Jahowa, Debatanta i mandok tu hita uju di lambung Horeb, ninna do: Nunga sae lelengna hamu maringan di lambung dolok on.

1:7 Borhat ma hamu mamedu, asa sahat hamu tu dolok ni halak Amori dohot tu sude halak hombar balokna di adaran, di atas dolok dohot di angka rura dohot di tano sambola tungkan dangsina dohot martopihon laut, di tano ni halak Kanaan dohot di Libanon, sahat ro di sunge na bolon i ma sunge Euprat.

1:8 Ida ma, nunga Ahu marbasabasahon tano i di jolomuna, asa bongotan jala soluhanmuna tano naung niuarihon ni Jahowa hian tu ompumuna i, tu si Abraham, si Isak dohot si Jakkob, lehononna tu nasida dohot tu pinomparnasida i.

1:9 Jadi ningku ma tu hamu uju i songon on: Ndang tarbahen sasada ahu mangusung hamu.

1:10 Ai nunga dipatorop Jahowa, Debatamuna i hamu, jala ida ma, nunga hira bintang di langit toropmuna sadarion.

1:11 Sai ditambai Jahowa Debata ni ompumuna i ma bilanganmuna marriburibu tumorop sian nuaeng, jala dipasupasu ma hamu, songon na pinarbagabagana hian tu hamu.

1:12 Tung beha ma panahanku sasada ahu mangusung halojaon hangaluton dohot parbadaan sian hamu?

1:13 Pillit hamu di hamu baoa angka na pistar jala na pantas marroha jala naung tartanda burju marparange sian ganup marga, asa hupabangkit nasida gabe indukmuna.

1:14 Jadi didok hamu ma mangalusi ahu: Denggan do hata na pinaboami sibahenonnami.

1:15 Dung i hubuat ma angka indukmuna marmargamarga, baoa angka na pistar jala naung tangkas tartanda, laos hupabangkit nasida bahen induk di hamu, induk sisaribu halak dohot sisaratus halak dohot silimapulu halak dohot sisampulu halak, ro di angka panuturimuna marmargamarga.

1:16 Ro huhut hatangku uju i tu angka panguhum di hamu songon on: Tangkas tangitangi hamu parhataan ni hahaanggimuna i jala uhum hasintongan dabu hamu tu ganup na marhahamaranggi dohot tu halak dagang.

1:17 Ndang jadi marmiak ni bohi hamu di paruhuman, suang songon halak na balga halak na metmet tangitangionmuna, ndang jadi tahuton hamu mida manang ise, ai Debata do nampuna paruhuman; alai tung sura adong hata na mamaolhu risihonmuna, ingkon tu ahu boanonmuna, asa ahu manulingkitsa.

1:18 Laos hutonahon ma uju i tu hamu nasa hata angka sibahenonmuna.

1:19 Dung i borhat ma hita sian Horeb jala itaaotaoti sandok halongonan na bolon jala na jorbut i, naung niidamuna i tahe di dalan laho tu dolok Amori, songon na tinonahon ni Jahowa. Debatanta i tu hita, gabe sahat hita tu Kades-Barnea.

1:20 Dung i ningku ma mandok hamu: Nunga sahat hamu tu dolok Amori, na naeng lehonon ni Jahowa, Debatanta i, tu hita.

1:21 Ida ma, nunga dilehon Jahowa, Debatamu tano i di adopanmu; dibahen i borhat ma ho, tean ma tano i, songon naung pinarbagabaga ni Jahowa Debata ni ompumu hian; unang ho mabiar jala unang ho godoron!

1:22 Dung i ro ma hamu sudena jumonok tu ahu, jala didok hamu: Tole itasuru ma baoa parjolonta, asa dihahapi nasida tano i di hita, laos mamboan barita tu hita taringot tu dalan sibolusonta dohot taringot tu huta angka simasukanta.

1:23 Jadi denggan hata i di rohangku, laos hubuat sian hamu sampulu dua halak, sasahalak sian ganup marga.

1:24 Dung i borhat ma nasida nangkok tu dolok, jala sahat nasida muse tu rura Eskol, laos dihahapi ma i.

1:25 Diboan nasida huhut di bagasan tangannasida sian parbue ni tano i, laos dipatuat tu hita huhut mamboan barita tu hita, angka ninna ma: Na denggan sahali do tano naung binasabasahon ni Jahowa, Debatanta i tu hita.

1:26 Alai ndang olo hamu nangkok, lam manggunturi do hamu dompak hata ni Jahowa, Debatamuna i.

1:27 Jala marmungutmungut hamu di bagasan undungundungmuna i, pola didok hamu: Sian gigi ni rohana hape umbahen ditogihon Jahowa hita ruar sian tano Misir, asa pasahathon hita tu bagasan tangan ni halak Amori laho maniaphon hita.

1:28 Tung beha ma pambahenta hita nangkok? Ai nunga malala ateatenta i dibahen angka hahaangintai, na nidokna i: Sada bangso na umbolon jala na tumimbul sian hita do i; angka hutanasida pe balga do jala pinatogu sahat ro di langit; adong huhut huida hami disi halak pinompar ni Enak.

1:29 Jadi ningku ma uju i tu hamu: Unang hamu godoron, jala unang mabiar hamu mida nasida!

1:30 Ai Jahowa, Debatamuna i mardalan di jolomuna, Ibana sandiri marporang humongkop hamu, sandok songon na binahenna i tu hamu di Misir di adopan ni matamuna.

1:31 Nang di halongonan naung niidamuna i, naung niompa ni Jahowa, Debatamu do ho, songon pangompa ni baoa di anakna manondong saluhut dalan, naung nidalananmuna i, nunga pola sahat hamu tu inganan on.

1:32 Alai atik pe songon i hatangku, tong do ndang porsea hamu di Jahowa, Debatamuna i.

1:33 Ibana sandiri nian mardalan di adopanmuna mandiori di hamu inganan bahen pangulonanmuna i, bornginna i di bagasan api patuduhon tu hamu dalan sidalananmuna i, jala arianna i di bagasan ombun.

1:34 Alai dung dibege Jahowa soara ni hatahatamuna i, marpiarpiar ma rimasna, pola maruari Ibana mandok:

1:35 Na so tupa idaon ni nanggo sahalak sian angka baoa na sansundut na roa on tano na denggan i, naung pola huuarihon nian mangalehon tu ompunasida i.

1:36 Dungkon ni si Kaleb, anak ni si Jepune, ibana masuk marnida, tu ibana dohot tu pinomparna ma lehononku tano naung nidegena i, ala marsihohot rohana mangihuthon tu Jahowa.

1:37 Mida Ahu pe marronirimas do Jahowa, ala hamu, pola ninna: Ho pe ndang jadi masuk tusi.

1:38 Alai anggo si Josua, anak ni si Nun, na marhalado di adopanmi, ingkon masuk ma anggo ibana tusi, papir ma tondina i, ai ingkon ibana marbagi tano i bahen partalian ni Israel.

1:39 Anakkonmuna pe, angka naung nidokmuna i ripe pupuson nasida dohot anakmuna, angka na so umboto dope sadarion na denggan manang na roa, nasida ma saut masuk tusi, jala tu nasida do i lehononku bahen teanteananna.

1:40 Alai borhat ma anggo hamu mardalan dompak halongonan di dalan laho tu laut arung.

1:41 Dung i ro ma hatamuna mangalusi ahu: Nunga mardosa hami dompak Jahowa, alai na naeng nangkok hami marporang hombar tu saluhut naung tinonahon ni Jahowa, Debatanta i tu hita; sanga hamu ganup manandang podangna be, jala hobas hamu naeng nangkok tu dolok i.

1:42 Dung i ro ma hata ni Jahowa tu ahu: Dok ma tu nasida: Ndang jadi hamu nangkok jala ndang jadi hamu marporang, ai ndada Ahu di tongatongamuna i, asa unang tung talu hamu maradophon musumuna i.

1:43 Jadi hupasahat hata i nian tu hamu, hape ndang ditangihon hamu, lam manggunturi hamu dompak hata ni Jahowa jala manjahati, laos nangkok hamu tu dolok.

1:44 Dung i ruar ma halak Amori na maringan di dolok i manjumpangkon hamu, laos dilotongi hamu, songon pangalotongi ni harinuan, laos ditaluhon nasida hamu di Seir sahat ro di Horma.

1:45 Jadi dung mulak hamu jala tumatangis di adopan ni Jahowa, ndang olo Jahowa tumangihon soaramuna i, jala ndang dipaeleng pinggolna i tu hamu.

1:46 Jadi tinggal hamu di Kades na nia leleng, suang songon ari tinggalmuna na jolo disi.

5 Musa 2

2:1 Dung i mamedu ma hita jala mardalan tu halongonan di dalan laho tu laut arung, songon naung pinaboa ni Jahowa hian tu ahu gabe italiati tor Seir na nia leleng.

2:2 Dung i ro ma hata ni Jahowa tu ahu songon on:

2:3 Nunga sae lelengna hamu mangaliati tor on, mamedu ma hamu dompak utara!

2:4 Paboa ma tu bangso on: Bolusonmuna ma nuaeng parbalohan ni hahamuna, i ma pinompar ni si Esau, angka na maringan di Seir, mabiar ma nasida tagamon mida hamu, dibahen i ingkon ramotanmuna situtu dirimuna.

2:5 Ndang jadi masisindir hamu marmusu dompak nasida, ai anggo sian tanonasida i ndang lehononku tu hamu nanggo santopap, ai nunga hulehon tor Seir tu pinompar ni si Esau bahen partalianna.

2:6 Ia sipanganon ingkon tuhoronmuna do sian nasida, asa jadi hamu mangan, tapian pe ingkon tuhoronmuna do sian nasida asa jadi hamu minum.

2:7 Ai nunga dipasupasu Jahowa, Debatam ho di saluhut ulaon ni tanganmu. Ibana do manarihon ho saleleng mardalan di halongonan na bolon on; nunga pola opatpulu taon lelengna sai didongani Jahowa, Debatam do ho, ndang hurangan ho di manang aha.

2:8 Jadi dung salpu itabolus hahantai, i ma pinompar ni si Esau, angka na maringan di Seir, di dalan laho tu adaran, olat ni Elat dohot Esion Geber, gabe mamedu hita muse umbolus dalan tu halongonan Moab.

2:9 Dung i ro muse hata ni Jahowa tu ahu: Ndang jadi hagogotan Moab bahenonmu, jala ndang jadi masisindir hamu marmusu dompak nasida, ai anggo sian tanona ndang adong lehononku bahen partalianmu; ai nunga hulehon Ar tu pinompar ni si Lot bahen partalianna.

2:10 Anggo di na robi halak Emi maringan disi, i ma sada bangso na bolon na torop jala na marhuaso, songon halak Enak.

2:11 Taretong nasida huhut tu halak Repaim, suang songon halak Enak, jadi digoar halak Moab do nasida halak Emi.

2:12 Di Seir pe maringan do na jolo halak Hori, gabe ro pinompar ni si Esau manoluk tanona i, jala siap nasida dibahen, laos nasida maringan disi singkatna, suang songon na binahen ni Israel tu tano partalianna, na nilehon ni Jahowa tu nasida.

2:13 Nuaeng pe borhat ma hamu jala taripari hamu sunge Zered. Jadi itataripari ma sunge Zered i.

2:14 Alai anggo lelengna hita mardalan sian Kades-Barnea sahat ro di na manaripari sunge Zered hita, tolupulu ualu taon do, paima sun siap sandok sundut halak parmusu sian tongatonga ni parsaroan i, songon naung niuarihon ni Jahowa hian tu nasida.

2:15 Tole huhut tangan ni Jahowa mangalo nasida laho maniaphon nasida sian tongatonga ni parsaroan i, paima sun siap nasida.

2:16 Jadi dung songon i siap sude halak parmusu, mate tahe sian tongatonga ni bangso i.

2:17 Ro muse hata ni Jahowa tu ahu songon on:

2:18 Ingkon bolusonmu sadarion parbalohan ni Moab mardonokkon Ar.

2:19 Jadi jonok ma ho masidolosan dohot Amon. Ndang jadi hagogotan nasida bahenonmu jala ndang jadi masisindir ho marmusu dompak nasida, ai anggo sian tano ni halak Amon ndang adong lehononku tu ho bahen partalianmu; ai nunga hulehon tano i tu pinompar ni si Lot, bahen partalianna.

2:20 Nang luat i taretong do i tu halak Repaim, ala halak Repaim maringan disi na jolo, jadi digoar halak Amon ma nasida halak Samsumi.

2:21 I ma sada bangso na bolon, na torop jala na marhuaso suang songon halak Enak; alai direndephon Jahowa do nasida di adopannasidai, laos dionjar halak Amon nasida, gabe nasida maringan disi singkatna.

2:22 Songon naung binahen ni Jahowa marhite sian pinompar ni si Esau, angka na maringan di Seir, uju siniaphonna halak Hori maradophon nasida, asa nasida manoluk tano i, laos maringan disi singkatna rasirasa sadarion.

2:23 Suang songon i halak Awi, angka na maringan di sosor sahat ro di Gaza, gabe ro halak Kreta, angka naung bungkas sian Kreta maniaphon nasida, laos maringan disi singkatna.

2:24 Borhat ma hamu mardalan jala taripari hamu ma sunge Arnon! Ida ma, nunga Ahu pasahathon tu bagasan tanganmu si Sihon, raja sian Hesbon, halak Amori, rap dohot tanona; pungka hamu ma manoluk tanona dohot marmusu dompak ibana.

2:25 Apala sadarion ma Ahu mamungka mangalehon roha hagodoron dohot biar mida ho, tu angka bangsona di toru ni sandok langit i; molo sahat dibege nasida baritam, ingkon raion jala rianon nasida maradophon ho.

2:26 Dung i husuru ma angka suruan sian halongonan Kadermat manopot si Sihon, raja sian Hesbon, mandok hata hadameon nian songon on:

2:27 Ua loas ma ahu mamolus sian luatmu, dalan na bolon do ihutihutongku, unang pe ahu manimbil tu siamun manang tu hambirang.

2:28 Sipanganon i ingkon marpanuhor gadisonmu tu ahu, asa mangan ahu; aek pe songon i ingkon marpanuhor do lehononmu tu ahu, asa inumonku; asal mardalan pat ahu mamolus sian luatmu.

2:29 Suang songon na binahen ni pinompar ni si Esau tu ahu, angka na maringan di Seir, nang halak Moab angka na maringan di Ar, paima tolhas hutaripari Jordan sahat tu tano naung binasabasahon ni Jahowa, Debatanami tu hami.

2:30 Alai ndang olo si Sihon, raja sian Hesbon, mangaloas hita mamolus sian luatna; ai nunga ditangkangi Jahowa, Debatamu tondina jala dipajogal ia rohana, ala naeng pasahatonna ibana tu bagasan tanganmu, songon na andar sadarion.

2:31 Dung i ro ma hata ni Jahowa tu ahu: Ida ma, nunga hupungka pasahathon si Sihon rap dohot tanona di adopanmu, dibahen i pungka hamu ma manoluk tanona bahen partalianmuna.

2:32 Dung i ruar ma si Sihon manjumpangkon hita tu Jahas, ibana dohot sandok bangsona, naeng marmusu.

2:33 Alai dipasahat Jahowa, Debatanta i, ibana di adopanta, gabe itataluhon ibana rap dohot angka anakna dohot sandok bangsona.

2:34 Jadi patu ma itabahen uju i sude hutana jala itaharomhon ganup huta, angka baoa, parompuan dohot dakdanak, nanggo sahalak ndang teba italoas.

2:35 Holan pinahan i tahe italaum di hita ro di tabantaban sian huta angka na itapapatu.

2:36 Olat ni Aroer na martopihon sunge Arnon ro di huta angka na martopihon sunge i, sahat ro di Gilead, ndang adong nanggo sada huta na so tarpapatu hita dibahen toguna; tung saluhutna do dipasahat Jahowa, Debatanta i tu bagasan tanganta.

2:37 Holan tu tano ni halak Amon ndang jumonok ho ro di sandok luat na martopihon sunge Jabok dohot huta angka na di atas tor ro di sude naung nioraan ni Jahowa, Debatanta i hian.

5 Musa 3

3:1 Dung i muse mamedu hita jala nangkok sian dalan tu Basan; jadi ruar ma si Og, raja sian Basan manjumpangkon hita, ibana rap dohot sandok bangsona, naeng marmusu di Edrei.

3:2 Dung i ro ma hata ni Jahowa tu ahu; unang ho mabiar mida ibana, ai nunga Ahu pasahathon ibana tu bagasan tanganmu rap dohot sandok bangsona dohot tanona, ingkon bahenonmu tu ibana, songon naung binahenmi tu si Sihon, raja ni halak Amori, na maringan di Hesbon.

3:3 Jadi dipasahat Jahowa, Debatanta i ma tutu nang si Og, raja sian Basan rap dohot sandok bangsona tu bagasan tanganta, gabe saut patu ibana itabahen, nanggo sahalak ndang adong teba sian ibana.

3:4 Itapapatu ma tutu uju i saluhut hutana, ndang adong nanggo sada huta na so tarrampas sian nasida, onompulu huta ro di sandok luat Argob, gomgoman ni si Og di Basan.

3:5 Luhutna i angka huta na gonting do, marparik batu na timbo do, marharbangan jala marransangransang, so padohot angka huta na so marparik mansai torop.

3:6 Itaharomhon do saluhutna i, suang songon na itabahen tu si Sihon, raja sian Hesbon, harom binahen ganup huta, baoa, parompuan dohot dakdanak.

3:7 Alai anggo sandok pinahan dohot tabantaban sian angka huta i italaum do di hita.

3:8 Jadi itabuat uju i tano na di bariba ni Jordan sian tangan ni na dua raja Amori, olat ni sunge Arnon sahat ro di dolok Hermon.

3:9 (Halak Sidon tahe manggoar Hermon i Sirion, jala halak Amorimanggoar ibana Senir.)

3:10 Saluhut huta di adaran ro di sandok Gilead dohot sandok Basan sahat ro di Salka dohot Edrei, huta angka na masuk tu gomgoman ni si Og di Basan.

3:11 Ai holan si Og, raja sian Basan, teba sian pasipasi ni halak Repaim; ida ma, anggo podomanna, podoman bosi tahe, nda di Rabba ni halak Amon do i? Sia asta unjurna jala opat asta bohangna mangihuthon asta ni sada baoa.

3:12 I ma tano i na itasoluk uju i olat ni Aroer na martopihon sunge Arnon; jadi satonga sian tor Gilead ro di angka hutana nunga hulehon hian tu halak Ruben dohot halak Gad.

3:13 Alai na lobi sian Gilead ro di sandok Basan, gomgoman ni si Og i, hulehon do tu na satonga marga Manasse, sandok luat Argob di sandok Basan, i ma na targoar tano ni halak Repaim.

3:14 Si Jair, anak ni si Manasse mambuat sandok luat Argob, sahat ro di parbalohan ni halak Gesur i dohot Maakat i, jala digoar do Basan i angka sosor ni si Jair mangihuthon goarna sandiri rasirasa sadarion.

3:15 Anggo tu si Mahir hulehon do Gilead.

3:16 Jala tu halak Ruben dohot Gad hulehon do olat ni Gilead sahat ro di sunge Arnon (parsitongaan ni sunge i do partalpahanna) sahat muse tu sunge Jabok, parbalohan ni halak Amon.

3:17 Angkup ni tano adaran dohot Jordan parbalohanna olat ni Kineret sahat ro di laut di adaran, i ma laut sira di toru ni robean ni Pisga tungkan habinsaran.

3:18 Dung i hudok ma uju i tu hamu songon on: Nunga dilehon Jahowa, Debatamuna i tano on tu hamu bahen partalian, dibahen i ingkon tang marsinjata be hamu nasa sialo musu taripar manguluhon hahaanggimuna, i ma halak Israel i.

3:19 Holan angka jolmamuna, anakkonmuna dohot dorbiamuna (ai huboto pardorbia na godang do hamu) ingkon naung nilehon tu hamu.

3:20 Paima marhasonangan dibahen Jahowa hahaanggimuna i, suang songon hamu, asa dohot nasida manoluk tano, silehonon ni Jahowa, Debatamuna i tu nasida di bariba ni Jordan; dung i jadi ma mulak ganup tu partalianna be, naung hulehon tu hamu.

3:21 Hudok ma huhut uju i tu si Josua songon on: Nunga matam sandiri marnida saluhut naung binahen ni Jahowa, Debatamuna i, tu na dua raja on, suang songon i bahenon ni Jahowa tu saluhut harajaon, angka sitopotonmu.

3:22 Unang hamu mabiar mida nasida, ai Jahowa, Debatamuna sandiri marporang humongkop hamu.

3:23 Dung i marhuraja ahu uju i tu Jahowa mangido:

3:24 Ale Tuhan Jahowa! Nunga tutu dipungka Ho patuduhon tu naposom hatimbulonmu dohot tanganmu na gogoi; ai tung Debata dia ma di banua ginjang manang di tano on na tarbahensa patupahon songon jadijadianmi dohot songon hagogoonmi?

3:25 Ua loas ma ahu taripar, asa huida tano na denggan i na di bariba ni Jordan, tor na denggan on rap dohot Libanon.

3:26 Alai marronirimas do Jahowa mida ahu, ala hamu, gabe ndang ditangihon tangiangki, lam ninna Jahowa do mandok ahu: Nunga sae di ho! Unang be datdati hatam mandok tu Ahu taringot tu hata on!

3:27 Nangkok ma ho tu punsu ni Pisga jala ranapi ma tano i tungkan hasundutan, tungkan utara, tungkan dangsina dohot tungkan habinsaran, jala tatap ma i dohot matam, ai ndang tarbahen ho tariparanmu Jordan on.

3:28 Dung i dokkon ma si Josua, asa pir tondina i jala marsihohot, ai taripar do anggo ibana manguluhon bangso on, jala ibana marbagihon tano naung niidam bahen partaliannasida.

3:29 Jadi tinggal ma hita di rura, tondong ni Betpeor.

5 Musa 4

4:1 Nuaeng pe, ale Israel, sai tangihon ma aturan dohot uhum, angka na hupodahon tu hamu, sibahenonmuna, asa mangolu hamu jala masuk hamu tu tano siteanonmuna i, na nilehon ni Jahowa, Debata ni ompumuna i tu hamu.

4:2 Ndang jadi ambaanmuna tu hata naung hutonahon i tu hamu, jala ndang jadi oruanmuna sian i, ingkon radotanmuna do angka tona ni Jahowa Debatamuna i, naung hutonahon i tu hamu.

4:3 Nunga matamuna sandiri marnida, na binahen ni Jahowa tu Baal-Peor, ai manang ise na mangihuthon tu Baal-Peor, nunga direndephon Jahowa, Debatamu, ibana sian tongatongamu.

4:4 Alai anggo hamu, angka na marsihohot tu Jahowa, Debatamuna i, mangolu do saluhutna sadarion.

4:5 Ida ma, nunga hupodahon tu hamu angka aturan dohot uhum, songon na tinonahon ni Jahowa, Debatangku tu ahu, asa bahenonmuna songon i di tano simasukanmuna i bahen partalianmuna.

4:6 Antong radoti jala ulahon hamu ma angka i, ai i do gabe hapistaranmuna dohot hapantasonmuna di adopan ni angka bangso; ia dung dibege nasida saluhut angka aturan on, gabe dohononnasida ma: Bangso na pistar sahali jala na pantas marroha do bangso na bolon on!

4:7 Ai tung tu bangso na bolon dia ma songon i jonok angka Debata, songon Jahowa, Debatanta i, manang piga hali pe hita pajoujou Ibana?

4:8 Ai tung di bangso na bolon dia ma adong aturan dohot uhum na tigor, songon sandok patikon, na hulehon di adopanmuna sadarion?

4:9 Antong ramoti ma dirim jala parhamaol situtu tondim, asa unang lupa roham di jamita, angka naung niida ni matam, asa unang tallus sian roham saleleng ho mangolu, jala ingkon pabotohononmu do angka i tu angka anakmu dohot tu angka pahompum.

4:10 Di ari uju na jongjong ho di adopan ni Jahowa, Debatam, di Horeb, uju na nidok ni Jahowa tu ho: Paluhut ma bangso i di Ahu, asa Ahu patubegehon tu nasida hatangku, angka siparateatehononnasida, asa marhabiaran nasida mida Ahu saleleng mangolu nasida di tano on, asa diajarhon huhut tu angka anakkonnasida.

4:11 Jadi ro ma hamu jumonok laos jongjong di bona ni dolok, jala dolok i marsigorgor di bagasan api sahat ro di parsitongaan ni langit, masa huhut disi parhobot ni ombun dohot haholomon marimpotimpot.

4:12 Dung i ro ma hata ni Jahowa tu hamu sian tongatonga ni api; dibege hamu do nian anggo soara ni hata, alai ndang adong diida hamu anggo rupa, holan soara i do.

4:13 Dung i dibaritahon Ibana ma tu hamu padan binahenna, naung tinonahonna tu hamu ulahononmuna, i ma hata na sampulu i, laos disurathon do i tu dua lei batu.

4:14 Jala ahu didokkon Jahowa uju i mangajarhon tu hamu angka aturan dohot patik, angka sibahenonmuna di tano sitopotonmuna taripar tusi bahen partalianmuna.

4:15 Antong tangkas situtu ma ramoti hamu rohamuna, ai ndang diida hamu agia aha rupa di ari uju Jahowa mandok hatana tu hamu di atas Horeb sian tongatonga ni api.

4:16 Asa unang laos hamu mangago dirimuna, hamu tahe mambahen di hamu ganaganaan na niuhir manang na tinuang, sumansuman ni baoa manang parompuan.

4:17 Manang sumansuman ni sandok pinahan na di tano on, manang sumansuman ni sandok pidong na marhabong, na habang di toru ni langit.

4:18 Manang sumansuman ni sandok gulokgulok na manjirir di tano i, manang sumansuman ni sandok dengke di bagasan aek na di toru ni tano.

4:19 Jala na so tupa manaili matam dompak langit paberengbereng mata ni ari dohot bulan dohot angka bintang ro di sandok parangan di langit tahe, gabe olo ho elaelaonna asa marsomba tusi dohot mangoloi, angka naung tinurpukkon ni Jahowa, Debatam nian tu saluhut bangso, angka na di toru ni sandok langit.

4:20 Alai anggo hamu nunga pola Jahowa mambuat dohot manogihon hamu ruar sian liang bosi, sian Misir tahe, asa hamu gabe bangso parjambaranna, songon na andar sadarion.

4:21 Nunga pola tarrimas situtu Jahowa mida ahu ala hatahatamuna i, pola maruari Ibana na so jadi ahu manaripari Jordan, jala na so jadi ahu masuk tu tano na denggan i, na naeng lehonon ni Jahowa Debatam tu ho bahen partalianmu.

4:22 Ingkon mate ahu tahe di tano on, ndang jadi anggo ahu manaripari Jordan, alai anggo hamu tariparanmuna do i jala soluhonmuna tano na denggan i.

4:23 Antong tangkas ma ramoti hamu dirimuna, asa unang tung dihalupahon hamu padan na binahen ni Jahowa, Debatamuna i tu hamu, unang hamu mambahen di hamu ganaganaan, sumansuman ni manang aha pe, songon naung nioraan ni Jahowa Debatam ho.

4:24 Ai api na mangallang do Jahowa, Debatam, sada Debata parlulu.

4:25 Molo dung sanga hamu maranak jala marpahompu, nunga pola sanga matua hamu di tano i, hape laos hamu mangago dirimuna, hamu tahe mambahen ganaganaan, sumansuman ni manang aha, jala diulahon hamu sogo ni roha ni Jahowa, Debatamu, asa pahehe rimasna.

4:26 Jouonku ma sadarion langit dohot tano gabe sitindangi mangalo hamu, asa gira situtu hamu mago sian tano, na naeng soluhonmuna nuaeng bahen partalianmu, dung ditaripari hamu Jordan i; ndang tagamon sadia leleng hamu maringan disi, ai ingkon rendep situtu hamu.

4:27 Jadi marserak ma hamu di tongatonga ni angka bangso bahenon ni Jahowa, gabe otik na ma bilangan ni jolma tinggal sian hamu di tongatonga ni angka bangso parbegu, haambolonganmuna i tinogihon ni Jahowa.

4:28 Jadi oloanmuna ma disi angka debata sileban, jadijadian ni tangan ni jolma, hau tahe dohot batu, angka na so marnida manang marbinege, manang mangan manang manganggo pe.

4:29 Alai ia dilului hamu olat ni Jahowa, Debatamu, sai jumpang ho do Ibana, molo tung dilului hamu Ibana sian nasa rohamu dohot sian nasa ateatemu.

4:30 Ia dung targogot ho jala manginona tu ho sude angka hata on, mulak ma roham di ujung ni angka ari tu Jahowa, Debatam, jala tangihononmu soarana.

4:31 Ai Debata na marasi roha do Jahowa, Debatamu, ndang tagamon tadingkononna ho, manang agoonna ho, jala ndang tagamon halupahononna padan naung binahenna i tu angka ompum, pola maruari Ibana tu nasida.

4:32 Ua usouso ma ho di angka ari na robi, angka na jumolo sian ho, olat ni ari uju Debata manompa jolma di atas tano on, sian ujung ni langit na sada tu ujung ni langit na asing, manang dung ma masa hata songon i balga, manang tarbege na tudos tusi?

4:33 Manang dung adong sada bangso na umbege soara ni Debata mangkatai sian tongatonga ni api, songon naung binegem i nian, hape tong do mangolu?

4:34 Manang dung ma Debata marsangkap naeng ro mambuat di Ibana sada bangso sian tongatonga ni bangso na asing marhite sian pangunjunan, angka tanda, angka halongangan dohot marhitehite hamusuon, huhut marhitehite tangan na gogo dohot botohon na toltol dohot marhite sian songgotsonggot angka na bolon, hombar tu saluhut naung binahen ni Jahowa, Debatamuna i tu hamu di Misir di adopanmuna?

4:35 Nunga tung tangkas dipatuduhon anggo tu ho, tama do botoonmu Jahowa do Debata, jala dungkon ni Ibana ndang adong.

4:36 Nunga pola dipatubegehon tu ho soarana sian banua ginjang naeng mangajari ho, jala dipataridahon tu ho apina na sai balga di atas tano on, hatana pe nunga pola dibege ho sian tongatonga ni api.

4:37 Ala naung hinaholonganna i angka ompumu, gabe dipillit ma pinomparna dung salpu nasida, jala ditogihon Ibana ho ruar sian Misir marhite sian Bohina, marhite sian gogona na godang i.

4:38 Asa pabalionna sian partalianna bangso angka na umbolon jala na gumogo sian ho di adopanmu, asa mamboan ho tu tanonasida i na naeng lehononna tu ho bahen partalianmu, songon na andar sadarion.

4:39 Antong ingkon botoonmu sadarion jala tangkas parateatehononmu marhatutuhon Jahowa do Debata di langit na di ginjang dohot di tano na di toruon, jala dungkon ni Ibana ndang adong be.

4:40 Dibahen i ingkon ramotanmu angka aturanna dohot tonana, angka na hutonahon i tu ho sadarion, asa marhasonangan ho dohot angka anakmu dung salpu ho, jala asa leleng ho mangolu di tano, na nilehon ni Jahowa Debatam tu ho saleleng ho mangolu.

4:41 Dung i dipapulik si Musa ma tolu huta di bariba ni Jordan tungkan habinsaran.

4:42 Asa tarbahen maporus tusi halak sibunu jolma, naung mambunu donganna so tinuntunna, jala ndada dihosom ibana hian na sai laon, asa maporus ibana tu sada sian angka huta i, asa laos mangolu hosana:

4:43 I ma Bezer di halongonan, di tano na hornop, di tongatonga ni halak Ruben; tole muse Ramot di Gilead di tongatonga ni halak Gad; tole muse Golan di Basan di tongatonga ni halak Manasse.

4:44 Jala on do patik naung niaturhon ni si Musa di adopan ni halak Israel.

4:45 On do angka panindangion dohot angka aturan dohot uhum, angka naung pinatolhas ni si Musa tu halak Israel, dung ruar nasida sian Misir.

4:46 Di bariba ni Jordan, di rura tondong ni Betpeor, di tano ni si Sihon, raja ni halak Amori na maringan di Hesbon, naung tinaluhon ni si Musa dohot halak Israel, dung ruar nasida sian Misir.

4:47 Laos disoluk nasida tanona rap dohot tano ni si Og, raja sian Basan, duansa tahe raja ni halak Amori na di bariba ni Jordan tungkan habinsaran.

4:48 Olat ni Aroer na martopihon sunge Arnon, jala sahat ro di dolok Sirion, i ma Hermon.

4:49 Tole muse sandok adaran di bariba ni Jordan, tungkan habinsaran sahat ro di laut na di adaran di bona ni dolok Pisga.

5 Musa 5

5:1 Dung i dipaluhut si Musa ma sandok halak Israel, ninna ma mandok nasida: Tangihon ma, ale Israel, aturan dohot uhum, angka sipaboaonku tu pinggolmuna sadarion, guruhon jala parateatehon hamu ma angka i laho patupahon.

5:2 Nunga pola Jahowa, Debatanta i mambahen padan tu hita di Horeb.

5:3 Ndada tu angka amanta Jahowa mambahen padan on, tu hita do, tu hita on angka na dison nuaeng, tu luhut hita angka na mangolu.

5:4 Pola adop bohi be Jahowa mandok hatana tu hita di atas dolok sian tongatonga ni api.

5:5 Ahu do uju i jongjong di holangholang ni Jahowa dohot hamu laho pabotohon tu hamu hata ni Jahowa; ai mabiar do anggo hamu maradophon api, jala ndang nangkok hamu tu atas dolok i, jadi ninna Ibana ma:

5:6 Ahu do Jahowa, Debatam, na manogihon ho ruar sian tano Misir, sian bagas parhatobananmu.

5:7 Ndang jadi marangkup Ahu adong Debatam.

5:8 Ndang jadi bahenonmu di ho ganaganaan, manang sumansuman dia na di banua ginjang, nang di tano on, ro di na di bagasan aek na di toru ni tano.

5:9 Ndang jadi ho marsomba tusi manang oloanmu angka i; ai Ahu do Jahowa Debatam, Debata parrimas, na mangaluluhon hajahaton ni amaama tu angka anakna, ro di sundut patoluhon dohot paopathon, angka na sogo roha di Ahu.

5:10 Alai asi do rohangku di angka na marriburibu, angka na mangkaholongi Ahu, angka na mangaradoti angka patikku.

5:11 Ndang jadi dohononmu Goar ni Jahowa, Debatam, anggo sian neang ni roha, ai sai na hona toru ni Jahowa do manang ise na mandok Goarna sian neang ni rohana.

5:12 Ingot hamu ma ari Sabbat i laho pabadiahonsa, songon na tinonahon ni Jahowa, Debatam tu ho.

5:13 Onom ari ma lelengmu mulaulaon jala radotanmu nasa sibahenonmu.

5:14 Alai anggo ari papituhon i, ari Sabbat (paradianan) ni Jahowa, Debatam do i, ndang jadi radotanmu disi agia aha ulaon, nang ho, manang anakmu manang borum, manang naposom lahilahi, manang naposom boruboru, ro di pinahanmu, nang na sorang tu ho di bagasan hutam, asa maradian naposom lahilahi dohot naposom boruboru suang songon ho.

5:15 Ai tama ingkon ingotonmu naposo do ho na jolo di tano Misir, gabe ditogihon Jahowa, Debatam ho ruar sian i marhite sian tangan na gogo dohot botohon na toltol; ala ni do umbahen didokkon Jahowa Debatam ho pabadiahon ari Sabbat i.

5:16 Ingkon pasangaponmu do natorasmu, songon na tinonahon ni Jahowa, Debatam tu ho, asa leleng ho mangolu jala asa marhasonangan ho di tano, na nilehon ni Jahowa Debatam tu ho.

5:17 Unang ho mambunu. Unang ho mangalangkup. Unang ho manangko. Unang ho olo sitindangkon gabus maralohon donganmu.

5:18 Ndang jadi haliangan ni roham jolma ni donganmu, jala ndang jadi haliangan ni roham bagas ni donganmu, manang haumana manang naposona baoa manang naposona boruboru, manang lombuna manang hodana, manang dia pe ugasan ni donganmu.

5:19 I ma hata i, angka na hinatahon ni Jahowa tu sandok luhutanmuna i di atas dolok sian tongatonga ni api, ombun dohot na holom marimpotimpot mardongan soara na gogo, jala ndang ditambai manang aha, jala disurathon do angka hata i tu dua lei batu, jala dilehon do i tu ahu.

5:20 Alai dung dibege hamu soara i sian tongatonga ni haholomon, jala marsigorgor dolok i di bagasan api, ro ma hamu jumonok tu ahu, sude indukmuna tahe marmargamarga dohot sintuamuna.

5:21 Jala didok hamu, ida ma, nunga dipataridahon Jahowa, Debatanta i tu hita hamuliaonna dohot hatimbulonna, jala nunga dipatubegehon tu hita soarana sian tongatonga ni api, jala nunga itaida sadarion, pola Debata mandok hatana tu jolma i, hape tong do mangolu.

5:22 Nuaeng pe, boasa tagonan ingkon mate hita? Ai suda hita panganon ni api na bolon on, tung sura pabegebegeonta dope soara ni Jahowa, Debatanta i, ingkon mate hita.

5:23 Ai tung ise ma sian nasa sibuk naung umbege soara ni Debata na mangolu i mandok hatana sian tongatonga ni api songon hita, hape tong do mangolu?

5:24 Ho ma tahe laho jumonok huhut umbege saluhut sidohonon ni Jahowa, Debatanta i, jala ho muse paboahon tu hami saluhut na pinaboa ni Jahowa, Debatanta i tu ho, ingkon tangihononnami jala patupaonnami do.

5:25 Jadi dung dibege Jahowa soara ni hatamuna i, angka na nidokmuna i tu ahu, gabe didok Jahowa ma tu ahu: Nunga hubege soara ni hata ni bangso on, angka na pinaboanasida tu ho; denggan do sude na nidoknasida i.

5:26 Ise ulaning mangalehon tu nasida, asa tongtong marroha sisongon i nasida marhabiaran tu Ahu dohot mangaradoti saluhut tonangku saleleng mangolu nasida, asa marhasonangan nasida dohot pinomparnasida i ro di salelenglelengna!

5:27 Laho ma ho, paboa ma tu nasida: Muli ma hamu tu undungundungmuna be!

5:28 Alai anggo ho, ingkon jongjong ho dison, di lambungkon, asa Ahu paboahon tu ho saluhut tona, angka aturan dohot uhum, angka sipodahononmu tu nasida, asa diulahon nasida angka i di tano silehononku tu nasida bahen partalianna.

5:29 Antong ringkoti hamu ma mangulahon, songon na tinonahon ni Jahowa, Debatamuna i tu hamu, unang hamu manimbil tu siamun manang tu hambirang!

5:30 Marparange ma hamu di bagasan saluhut dalan naung tinonahon ni Jahowa, Debatamuna i tu hamu, asa mangolu hamu jala marhasonangan hamu, jala leleng hamu mangolu di tano siteanonmuna i.

5 Musa 6

6:1 Alai on do tona, aturan dohot uhum, angka naung tinonahon ni Jahowa, Debatamuna i, podahononhon tu hamu, asa ulahononmuna di tano sisoluhonmuna i, dung taripar hamu tusi.

6:2 Asa marhabiaran ho tu Jahowa, Debatam jala diradoti ho saluhut aturanna dohot tonana, angka naung hutonahon tu ho, songon i ho nang anakmu nang pahompum saleleng ho mangolu, asa tung hupaganjang umurmu.

6:3 Antong tangihon ma i, ale Israel, jala ringkoti mangulahon angka i, asa marhasonangan ho, jala asa lam torop situtu hamu, songon naung pinorbagabaga ni Jahowa Debata ni angka ompum tu ho, di tano habaoran ni susu dohot situak ni loba.

6:4 Tangihon ma, ale Israel, anggo Jahowa Debatanta i, Jahowa Sasadasa do.

6:5 Jala ingkon haholonganmu Jahowa, Debatam sian nasa roham dohot sian nasa ateatem dohot sian nasa gogom.

ᯐᯞ ᯀᯰᯪᯂᯉᯬ᯲ ᯂᯂᯬᯞᯬᯝᯉ᯲ᯔᯮ ᯐᯂᯬᯋ, ᯑᯩᯅᯖᯔ᯲ ᯘᯪᯀᯉ᯲ ᯉᯘ ᯒᯬᯂᯔ᯲ ᯑᯬᯂᯖᯬ᯲ ᯘᯪᯀᯉ᯲ ᯉᯘ ᯀᯖᯩᯀᯖᯔᯩ᯲ ᯑᯬᯂᯖᯬ᯲ ᯘᯪᯀᯉ᯲ ᯉᯘ ᯎᯬᯎᯔᯬ᯲,

6:6 Jala ingkon parateatehononmu luhut hata on, angka na hutonahon tu ho sadarion.

6:7 Jala ingkon gogoonmu mangajarhon angka i tu angka anakmu, jala taringotanmu angka i, molo hundulhundul ho di bagasan jabum, manang mardalani ho di pardalanan, manang laho modom pe ho, nang dung hehe muse.

6:8 Jala ingkon rahuthononmu angka i bahen partinandaan di atas tanganmu, jala bahen parningotan di holangholang ni matam.

6:9 Jala ingkon surathononmu angka i tu tohang ni jabum dohot tu panggumbanganmu.

6:10 Ia dung masuk ho ditogihon Jahowa, Debatam, tu tano na niuarihonna tu ompum, tu si Abraham, si Isak dohot si Jakkob mangalehon tu ho huta, angka na bolon dohot na denggan, angka na so pinungkam.

6:11 Tole bagas angka na gok dohot na denggan marragamragam, angka na so niisianmu dohot sumur angka na so hinalianmu, tole porlak anggur dohot hau Jetun angka na so sinuanmu, jala mangan ho sian i pola bosuran.

6:12 Sai marjaga ma ho di dirim, asa unang dihalupahon roham Jahowa, naung manogihon ho ruar sian tano Misir, sian bagas parhatobananmu.

6:13 Tama ingkon habiaranmu Jahowa, Debatam, jala oloanmu Ibana jala maruari ho tu Goarna.

6:14 Ndang jadi ihuthononmuna angka debata sileban, sian debata ni bangso angka na humaliang hamu.

6:15 Ai Debata parrimas do Jahowa, Debatam, di tongatongamu, asa unang marpiarpiar rimas ni Jahowa, Debatam, mida ho, gabe siaphononna ho maon sian sisik ni tano on.

6:16 Ndang jadi unjunanmuna, Jahowa Debatamuna i, songon naung niunjunanmuna Ibana di Massa.

6:17 Ingkon burju hamu mangaradoti angka tona ni Jahowa, Debatamuna i, ro di panindangionna dohot aturanna, angka naung tinonahonna tu ho.

6:18 Asa ulahononmu na tigor dohot na denggan di adopan ni Jahowa, asa marhasonangan ho, jala asa masuk ho jala teanonmu tano na denggan i naung niuarihon ni Jahowa tu angka ompum.

6:19 Ingkon Ibana mangeak saluhut musum sian adopanmu, songon naung pinorbagabaga ni Jahowa hian.

6:20 Tung sura sungkunsungkun on ni anakmu ho sogot songon on: Dia do parmulaan ni angka panindangion, aturan dohot uhum, angka na tinonahon ni Jahowa, Debatanta i tu hamu?

6:21 Jadi dohononmu ma tu anakmu: Hatoban ni si Firaun do hami na jolo di Misir, gabe ditogihon Jahowa hami ruar sian Misir marhite sian tangan na gogo.

6:22 Jala dibahen Jahowa do tanda dohot halongangan angka na bolon jala na rahat di Misir, tu si Firaun dohot tu sandok isi ni bagasna di adopannami.

6:23 Alai anggo hami ditogihon Ibana do ruar sian i, asa boanonna hami masuk jala lehononna tu hami tano naung niuarihonna tu ompunami.

6:24 Ala ni umbahen ditonahon Jahowa uju i tu hami ulahononnami sude angka uhumon, marhabiaran tu Jahowa, Debatanami, asa marhasonangan hami ariari jala tongtong hami pangoluonna, songon na andar sadarion.

6:25 Manjadi hatigoran do i huhut di hami, molo huringkoti hami mangulahon sandok uhumon di adopan ni Jahowa, Debatanta i, songon naung tinonahonna tu hami.

5 Muse 7

7:1 Ia dung diboan Jahowa, Debatam ho masuk tu tano sitopotonmi bahen partalianmu, jala dung torop angka bangso parbegu pinabalina maradophon ho, i ma halak Het i, Girgasi, Amori, Kanaan, Perisi, Hevi dohot Jebusi, pitu bangso angka na tumorop jala na gumogo sian ho.

7:2 Jala ia dung dipasahat Jahowa, Debatam nasida maradophon ho, taluhononmu nasida, ingkon haromhononmu nasida, ndang jadi marpadanpadan ho tu nasida, jala ndang jadi asiasianmu nasida.

7:3 Jala ndang jadi ho martondong tu nasida, borum ndang jadi lehononmu tu anakna, jala boruna ndang jadi buatonmu di anakmu.

7:4 Ai marbalik sian Ahu do anakmu elaonna, asa oloanna angka debata sileban, jadi marsigorgor ma rimas ni Jahowa mida hamu, jala gira hamu agoonna.

7:5 Ingkon songon on do bahenonmu tu nasida: Ingkon lohaonmuna do angka langgatannasida, jala ingkon taporanmuna do angka ajiajiannasida, ingkon tabaonmuna do angka sombaonnasida jala ingkon suda tutungonmuna di bagasan api angka ganaganaannasida.

7:6 Ai bangso na badia do anggo ho di Jahowa, Debatam, nunga ho pinillit ni Jahowa, Debatam sian nasa bangso angka na di tano on, gabe bangso hapunjunganna.

7:7 Ndada ala tumorop hamu sian angka bangso na asing, umbahen dihaholongi Jahowa hamu jala dipillit hamu, ai hamu do apala na ummetmet sian nasa bangso.

7:8 Tung sian holong ni roha ni Jahowa do mida hamu, asa dipahot Ibana huhut uari, naung pola niuarihonna tu ompumuna, umbahen ditogihon Jahowa hamu ruar marhite sian tangan na gogo, jala ditobus ho sian bagas parhatobanan, sian si Firaun, raja sian Misir.

7:9 Dibahen i tama ingkon botoonmu, Jahowa do Debatam, Ibana do Debata na sintong jala na bonar, na pasintong padan dohot asi ni roha tu halak, angka na mangkaholongi Ibana dohot tu angka na mangaradoti tonana, pola marriburibu sundut.

7:10 Ibana huhut marlulu tu halak angka na mangkagigihon Ibana, marsibalik tahe bohina sandiri, asa agoonna; ndang maralangalang rohana mamaloshon jalojalo hajahaton ni halak na mangkagigihon Ibana.

7:11 Antong radoti hamu ma angka tona, aturan dohot uhum, angka na hutonahon tu ho sadarion, asa ulahononmu angka i.

7:12 Jadi molo tung ditangihon hamu angka uhumon, diparangehon jala diulahon hamu angka i, jadi pasintongon ni Jahowa, Debatam ma tu ho padan dohot asi ni roha, naung niuarihonna tu ompumu.

7:13 Haholonganna ma ho jala pasupasuonna jala patoroponna ho; pasupasuonna huhut parbue ni bortianmu dohot parbue ni tanomi, emem, anggurmu, miakmu jala sinur tumpahanna lombum dohot birubirum di tano naung niuarihonna tu angka ompum,lehononna tu ho.

7:14 Dapotan pasupasu ma ho lobi sian saluhut angka bangso; ndang adong di tongatongamu nanggo sahalak baoa manang parompuan na so gabe, nang di pinahanmu.

7:15 Jala padaoon ni Jahowa ma sian ho nasa parsahiton, jala ndang loasonna mangonai tu ho nanggo sada sian sude begu masa na rahat di Misir, angka na tinandam, mangonai do angka i anggo tu sude halak na mangkagigihon ho.

7:16 Ingkon suda panganonmu saluhut bangso angka sipasahaton ni Jahowa, Debatam tu ho, ndang jadi maralangalang roham mida nasida jala ndang jadi oloanmu debatanasida i, ai gabe jorgong do i di ho.

7:17 Alai tung sura dohononmu di bagasan roham: Tumorop do angka bangso parbegu on sian ahu, beha ma pambahenna tung ahu pabalihon nasida?

7:18 Unang ma ho tahuton mida nasida; sai dipaingotingot roham ma tongtong naung binahen ni Jahowa, Debatam, tu si Firaun dohot tu sude halak Misir!

7:19 Paingotingot pangunjunan angka na bolon, angka naung niida ni matam sandiri, tole angka tanda dohot halongangan, ro di tangan na gogo, jala botohon na toltol, pinamasa ni Jahowa, Debatam manogihon ho ruar. Suang songon i bahenon ni Jahowa, Debatam tu saluhut bangso, angka na hinabiaranmu nuaeng.

7:20 Tongoson ni Jahowa, Debatam huhut angka uhum hamagoan tu tongatonganasida, paima rendep dibahen jolma angka na tinggal dope jala na martabuni maradophon ho.

7:21 Unang tung godoron roham maradophon nasida, ai Jahowa Debatam do di tongatongamu, Ibana do Debata na timbul jala na songkal.

7:22 Jahowa, Debatam huhut mangarendephon nangetnanget angka bangso parbegu maradophon ho; ndang tarbahen sahali siap nasida bahenonmu, asa unang lam ganda binatang di harangan pasarisarionmu.

7:23 Ingkon Jahowa, Debatam pasahathon nasida di adopanmu, marhagodoron godang nasida bahenonna, paima sun siap nasida.

7:24 Angka rajanasida pe pasahatonna do tu bagasan tanganmu, asa siaphononmu goarnasida sian toru ni langit; ndang adong na manahan di adopanmu nanggo sahalak, paima rendep nasida bahenonmu.

7:25 Angka ajiajian ni debatanasida, ingkon suda tutungonmu di bagasan api, ndang jadi mangapian roham di perak manang di sere na lohot disi, naeng buatonmu di ho, asa unang tarjorgong ho bahenon ni, ai hagigian ni Jahowa, Debatam do i.

7:26 Dibahen i ndang jadi boanonmu hagigian i tu bagasan jabum, asa unang hona harom ho, suang songon ugasanna hian; ingkon marbiasbias situtu roham di ugasan sisongon i jala hagigihononmu, ai naung hona harom do i.

5 Musa 8

8:1 Sude patik, angka na hutonahon tu ho sadarion, ingkon ringkotanmuna do i mangulahon, asa mangolu, hamu jala torop, jala masuk hamu tu tano siteanonmuna i, naung niuarihon ni Jahowa tu angka ompumuna i.

8:2 Ingkon ingotonmu huhut saluhut dalan naung tinogihon ni Jahowa, Debatam ho na opatpulu taon on di halongonan, asa Ibana paserep roham, mangunjuni ho, asa tung tanda manang aha na di bagasan roham, manang na radotanmu angka tonana, manang ndang.

8:3 Ibana tutu paserep roham, Ibana huhut mangaranapi ho, Ibana muse mangalehon ho mangan Manna, na so tinandam hian, manang tinanda ni angka ompum; asa Ibana pabotohon tu ho, ndada holan sagusagu hangoluan ni jolma, mangolu do tahe jolma i sian ganup hata na ruar sian pamangan ni Jahowa.

8:4 Pangkeanmu pe ndang olo buruk di dagingmu na opatpulu taon i, patmu pe ndang olo marpurapura.

8:5 Antong sai tandai ma i di bagasan roham marhatopothon, na niajaran ni Jahowa, Debatam ho, songon amaama na mangajari anakna.

8:6 Dibahen i tama ingkon radotanmu angka patik ni Jahowa, Debatam, asa marparange ho di angka dalanna marhabiaran mida Ibana.

8:7 Ai Jahowa, Debatam manogihon ho tu tano na denggan, tu tano na marbatang aek, marmual dohot martao, angka na mabaor di rura dohot di dolok.

8:8 Sada tano hatubuan ni eme, jagung, hau anggur, hau ara dohot dalimo, tano na marmiak Jetun, jala na marsituak ni loba.

8:9 Sada tano, na so pola marhangaluton panganonmu rotim disi, jala ndang hurangan ho di manang aha; sada tano batuna do bosi jala sian dolokdolokna tarhali ho tombaga.

8:10 Ia dung mangan ho jala bosuran, ingkon pujionmu di Jahowa, Debatam, ala ni tano na denggan, naung nilehonna i tu ho.

8:11 Antong ramoti ma dirim, asa unang lupa roham di Jahowa, Debatam, gabe ndang diradoti ho angka tonana i, uhumna dohot aturanna, angka na hutonahon i tu ho sadarion.

8:12 Asa unang ia dung mangan ho jala bosuran, jala dipauli ho angka bagas na uli diingani ho.

8:13 Tole lombum dohot birubirum lam sinur do jala ganda perak dohot sere di ho, ganda huhut saluhut na di ho.

8:14 Hape lam dipaginjang ho roham jala lupa ho di Jahowa Debatam, na manogihon ho ruar sian tano Misir, sian bagas parhatobanan.

8:15 Ibana manogunogu ho di halongonan na bolon jala na jorbut, inganan ni ulok tulung api dohot naga dohot hala, tano hasang huhut na so marisi aek; Ibana tahe paruarhon di ho aek sian dolok batu na pir sahali.

8:16 Ibana mangalehon ho mangan Manna di halongonan, na so tinanda ni angka ompum, asa Ibana paserep roham dohot mangunjuni ho, asa marhasonangan ho bahenonna di ujung.

8:17 Asa unang dohononmu di bagasan roham: Gogongku sandiri dohot huaso ni tanganku mangomo di ahu hamoraon on.

8:18 Ingkon paingotingoton ni roham tahe Jahowa, Debatam, ai Ibana do na mangalehon gogo tu ho mangomo angka arta i, asa pahothon padanna naung niuarihonna tu angka ompum, songon na andar sadarion.

8:19 Alai tung sura lupa roham di Jahowa, Debatam, jala diihuthon ho angka Debata sileban huhut mangoloi jala marsomba tusi, hatindangkononku hian ma tu hamu sadarion, ingkon mago situtu hamu.

8:20 Songon bangso parbegu, angka naung niago ni Jahowa maradophon hamu, suang songon i hamu mago, ala so ditangihon hamu soara ni Jahowa, Debatamuna i.

5 Musa 9

9:1 Tangihon ma, ho ale Israel, tole ma ho sadarion manaripari Jordan laho masuk dohot papatuhon bangso, angka na umbolon jala gumogo sian ho dohot huta na bolon, angka na pinagonting sahat ro di langit.

9:2 Sada bangso na bolon jala na timbo, i ma pinompar ni si Enak, angka naung tinandam jala naung binegem i baritana, songon on: Tung ise ma manahan jongjong maradophon pinompar ni si Enak?

9:3 Ingkon botoonmu huhut sadarion, Jahowa Debatam, Ibana sandiri taripar manguluhon ho, hira api na mangallang; Ibana maniaphon nasida jala Ibana patundukkon nasida di adopanmu, gabe pabalionmu nasida sian partalianna jala gira agoonmu nasida, songon naung pinorbagabaga ni Jahowa hian tu ho.

9:4 Ia dung dionjar Jahowa, Debatam nasida sian adopanmu, ndang jadi dohononmu di bagasan roham: Ala ni hatigoranku do umbahen ditogihon Jahowa ahu masuk laho manean tano on; hape nian ala ni hajahaton ni angka bangso parbegu on, umbahen dionjar Jahowa nasida maradophon ho.

9:5 Ndada ala ni hatigoranmu sandiri manang binahen ni burju ni roham, umbahen masuk ho laho manean tanonasida i; ai ala ni hajahaton ni angka bangso parbegu on, umbahen dionjar Jahowa, Debatam nasida maradophon ho, huhut asa pahothon hata naung niuarihon ni Jahowa tu angka ompum, tu si Abraham, si Isak dohot si Jakkob.

9:6 Ingkon botoonmu tahe, ndada ala ni hatigoranmu sandiri, umbahen dilehon Jahowa, Debatamu tu ho tano na denggan on bahen partalianmu, ai bangso na tangkang do ho marroha.

9:7 Sai ingot ma, unang tung halupahon na pinahehemi rimas ni Jahowa, Debatam di halongonan, olat ni ari dung haruar ho sian tano Misir sahat hamu ro di inganan on, sai manggunturi do hamu dompak Jahowa.

9:8 Di Horeb dope nunga dipahehe hamu rimas di Jahowa, pola naeng agoon ni Jahowa hamu ala ni rimasna mida hamu.

9:9 Jadi dung manaek ahu tu dolok i laho manjalo lei batu na dua i, lei parpadanan, naung binahen ni Jahowa tu hamu, pola tinggal ahu di atas dolok i opatpulu ari opatpulu borngin lelengna, so mangan sagusagu ahu manang minum aek.

9:10 Dung i dilehon Jahowa ma tu ahu na dua lei batu, angka na sinuratan marhite sian jarijari ni Debata, jala di atasna tarsurat saluhut hata, angka naung hinatahon ni Jahowa tu hamu di atas dolok sian tongatonga ni api uju di ari parluhutan i.

9:11 Dung salpu na opatpulu ari opatpulu borngin, dilehon Jahowa ma tu ahu na dua lei batu, i ma lei parjanjian.

9:12 Dung i ro ma hata ni Jahowa tu ahu: Hehe ma ho, hatop ma ho tuat sian on, ai nunga marroha mago bangsomi, naung tinogihonmu ruar sian Misir. Tibunai nasida manimbil sian dalan naung hutonahon i tu nasida, nunga dibahen nasida di nasida sada ganaganaan na tinuang.

9:13 Dung i ro muse hata ni Jahowa tu ahu songon on: Nunga huida pangalaho ni bangso on, jala ida ma, tung na tangkang do roha ni bangso on!

9:14 Loas ma Ahu, asa tung hurendephon nasida, asa pesan goarnasida sian toru ni langit i! Asa hubahen ho gabe bangso na gumogo jala na umbolon sian bangso on.

9:15 Jadi dung humusor ahu jala tuat ahu sian dolok, na marsigorgor di bagasan api, jala na dua lei parjanjian di bagasan tanganku na dua i.

9:16 Jadi hubereng ma, gabe ida ma, nunga mardosa hamu dompak Jahowa, Debatamuna i, nunga dibahen hamu di hamu sada lombu tuangan; tibunai tutu hamu manimbil sian dalan, na tinonahon ni Jahowa tu hamu!

9:17 Jadi hutangkup ma na dua lei batu i jala hureongkon do i sian bagasan tanganku na dua i jala hutapori do i di adopanmuna.

9:18 Dung i hutinggangkon ma ahu di adopan ni Jahowa, suang songon parjolo i, opatpulu ari opatpulu borngin lelengna, ndang mangan sagusagu ahu manang minum aek, ala ni saluhut dosamuna, angka naung binahenmuna i laho mangulahon sogo ni roha ni Jahowa, asa pahehehon rimasna.

9:19 Ai gari ahu mabiar do maradophon parpiarpiar ni rimas, naung hinarimashon ni Jahowa tu hamu, naeng agoonna hamu; alai ditangihon Jahowa do ahu nang sahalion.

9:20 Mida si Aron pe tarrimas situtu do Jahowa, naeng agoonna ibana, alai martangiang ahu mangondihon nang si Aron uju i.

9:21 Alai anggo dosamuna i, i ma anak ni lombu naung binahenmuna i, hubuat ma i jala humosokkon do i di bagasan api, laos hutapori ma i jala hududa lamot maradu gabe orbuk jala husirsirhon orbukna i tu aek na mabaor sian dolok.

9:22 Marsigorgor muse rimas ni Jahowa dipahehe hamu uju di Tabera, di Massa dohot di angka tanoman hahisapon.

9:23 Tole muse uju na sinuru ni Jahowa hamu sian Kades-Barnea, ninna do: Nangkok ma hamu jala soluk hamu ma tano i naung hulehon tu hamu, hape dialo hamu do hata ni Jahowa, Debatamuna i, jala ndang porsea hamu di Ibana, jala ndang ditangihon hamu soarana.

9:24 Ai manggunturi do hamu dompak Jahowa olat ni ari dung hutanda hamu.

9:25 Jadi hutinggangkon ma ahu di jolo ni Jahowa opatpulu ari opatpulu borngin lelengna, sai tongtong do ahu manungkap ala naung nidok ni Jahowa naeng agoonna hamu.

9:26 Dung i martangiang ma ahu tu Jahowa, ningku ma: Iale Tuhan Jahowa! Sai unang ma ago bangsom dohot partalianmu naung tinobusmu marhitehite hatimbulonmu, naung tinogihonmu ruar sian tano Misir marhite sian tangan na gogo!

9:27 Sai ingot ma angka naposom, si Abraham, si Isak dohot si Jakkob! Unang ma Ho manaili dompak hatangkangon ni bangso on dohot dompak hajahatonna dohot dompak dosana.

9:28 Asa unang dohonon ni halak isi ni tano haruarannami tinogihonmi: Ala na so tarbahen Jahowa manogihon nasida masuk tu tano naung pinarbagabagana i tu nasida, jala ala ni gigina mida nasida, umbahen ditogihon nasida ruar, asa bunuonna nasida di halongonan.

9:29 Hape nian nasida do bangsom dohot partalianmu naung tinogihonmu ruar marhite sian hagogoonmu na godang i dohot marhite sian botohonmu na toltoli.

5 Musa 10

10:1 Uju i ro ma hata ni Jahowa mandok tu ahu: Dakdak ma di ho dua lei batu, songon parjolo i jala nangkok ma ho mandapothon Ahu tu atas dolok, jala bahen di ho sada poti sian hau.

10:2 Asa Ahu sandiri muse manurathon tu lei batu i hata angka na di lei batu parjolo i, angka na tinaporanmi, dung i bahenonmu ma angka i tu bagasan poti i.

10:3 Jadi hubahen ma sada poti sian hau maranti jala hudakdak dua lei batu songon parjolo i, dung i nangkok ahu tu dolok, jala lei batu na dua i di bagasan tanganku.

10:4 Dung i disurathon Ibana ma tu lei, songon panurathonna parjolo, hata na sampulu i, angka na hinatahon ni Jahowa tu hamu di atas dolok sian tongatonga ni api, uju di ari parluhutan, laos dilehon Jahowa angka batu i tu ahu.

10:5 Dung i humusor ma ahu jala tuat sian dolok i jala hupeakhon angka lei tu bagasan poti naung hupauli, asa laos disi, songon na tinonahon ni Jahowa tu ahu.

10:6 Borhat ma anggo halak Israel sian Beerot-Bene-Jakan tu Mosera; disi do mate si Aron laos tartanom disi, jala anakna si Eleasar bangkit malim singkatna.

10:7 Borhat muse nasida sian i tu Gudgoda, jala sian Gudgoda tu Jobata, i ma tano na marbatang aek.

10:8 Uju i ma dipapulik Jahowa marga Lepi, asa nasida mangusung poti parpadanan ni Jahowa huhut jongjong di adopan ni Jahowa marhalado di Ibana dohot mamasumasu marhitehite Goarna, rasirasa sadarion.

10:9 Dibahen i ndang maruli partalian manang teanteanan anggo halak Lepi rap dohot hahaanggina; Jahowa do tahe teanteananna, songon naung pinorbagabaga ni Jahowa, Debatam hian tu nasida.

10:10 Jongjong ma anggo ahu di atas dolok i, suang songon di angka ari na jolo, opatpulu ari opatpulu borngin lelengna, jala ditangihon Jahowa do ahu nang sahalion, ndada naeng agoon ni Jahowa ho.

10:11 Dung i ninna Jahowa ma tu ahu: Hehe ma ho laho borhat manguluhon bangso i, asa sahat nasida jala disoluk tano naung huuarihon hian tu ompunasida, naeng lehononku tu nasida.

10:12 Nuaeng pe, ale Israel, aha do na pinangido ni Jahowa, Debatam sian ho, nda asal marhabiaran ho tu Jahowa, Debatam, jala marparange ho di saluhut dalanna, huhut marroha haholongon mida Ibana dohot mangoloi Jahowa, Debatam sian nasa roham dohot sian nasa ateatem!

10:13 Huhut asa radotanmu angka tona ni Jahowa dohot aturanna, angka na hutonahon tu ho sadarion mambahen hasonanganmu.

10:14 Ida ma, guru di Jahowa Debatam do nian langit ni langitan, nang tano on ro di nasa isina.

10:15 Hape holan mida angka ompum do Jahowa marlomo ni roha, mangkaholongi nasida; jala pinomparnasida i do dipillit dung salpu nasida, i ma hamu, sian nasa bangso, songon na andar sadarion.

10:16 Antong sunati hamu ma hulup ni rohamuna i, jala unang be tangkangi hamu tangkuhukmuna i.

10:17 Ai Jahowa, Debatamuna i, Ibana do Debata ni angka debata, jala Tuhan ni angka tuan, Ibana Debata na sun timbul, na sun gogo jala na songkal sahali, na so marnidanida bohi jala na so olo manjalo silua.

10:18 Ibana huhut pasintong uhum tu na sopot so marama dohot tu parompuan na mabalu, Ibana huhut mangkaholongi halak dagang, naeng mangalehon tu nasida sipanganon dohot paruloson.

10:19 Dibahen i hamu pe ingkon haholonganmuna do halak dagang, ai halak dagang do nang hamu na jolo di tano Misir.

10:20 Ingkon marhabiaran ho tu Jahowa, Debatam, ingkon Ibana oloanmu, jala marsitiopan roham di Ibana jala marsumpa ho tu Goarna.

10:21 Ibana do pujipujionmu, jala Ibana do Debatam naung mambahen angka habalgaon dohot halongangan humongkop ho, angka naung niida ni matam sandiri.

10:22 Pitupulu halak sambing angka ompum tuat tu Misir, hape anggo nuaeng nunga ditumpak Jahowa, Debatam ho, songon angka bintang di langit toropna.

5 Musa 11

11:1 Dibahen i ingkon haholonganmu do Jahowa Debatam, jala radotanmu pangoloion tu Ibana, angka aturanna pe, angka uhumna dohot tonana saleleng ho mangolu.

11:2 Jala ingkon tandaonmuna sadarion (ai ndada tu anakmuna, angka na so sanga mananda manang marnida, ahu mandok soara) pangajaran ni Jahowa, Debatamuna i dohot hatimbulonna dohot tanganna na gogoi dohot botohonna na toltoli.

11:3 Tole angka tanda dohot halongangan, angka na binahenna i di parsitongaan ni Misir, tu si Firaun, raja sian Misir dohot tu sandok tanona.

11:4 Tole muse na binahenna i tu parangan ni halak Misir, tu angka hodana dohot tu huretana, angka na nilingkupan ni galumbang ni laut arung, uju nasida mangeak hamu, gabe mago nasida dibahen Jahowa, rasirasa sadarion.

11:5 Tole muse na binahenna i tu hamu di halongonan, paima sahat hamu tu inganan on.

11:6 Tole muse na binahenna i tu si Datan, dohot si Abiram, angka anak ni si Eliab, pinompar ni si Ruben, na pinangangang ni tano i babana laos mamondut nasida rap dohot jabunasida, angka undungundungna dohot saluhut sinamotna, na pinaihutihut ni patna na sai laon di tongatonga ni sandok halak Israel.

11:7 Ai matamuna sandiri do marnida nasa jadijadian ni Jahowa na bolon, angka na binahenna i.

11:8 Dibahen i sai radoti hamu ma sandok tona, na hutonahon i tu ho sadarion, asa marsihohot rohamuna jala masuk hamu tu tano siteanonmuna i, laho taripar tusi do hamu nuaeng maneansa.

11:9 Jala asa leleng hamu mangolu di tano, naung niuarihon ni Jahowa tu angka ompumuna i, lehononna tu nasida dohot tu pinomparnasida i, tano habaoran ni susu dohot situak ni loba do i.

11:10 Ai tano sitopotonmuna i laho manean, ndada marpangalaho songon tano Misir, haruaranmuna i, ia dung disaburhon ho bonim tusi, patmu dibahen ho manirami, songon porlak paringkauan.

11:11 Alai anggo tano sitopotonmuna taripar tusi laho manean, tano na mardolok do i jala na marrura, mangkangoluhon aek udan do i sian langit.

11:12 Tano na sinarihon ni Jahowa, Debatam do i, tongtong do mangaranapi mata ni Jahowa, Debatam tusi sian mula ni taon ro di ujungna.

11:13 Molo tung tinggil rohamuna manangihon tonangku, angka na hutonahon i tu hamu sadarion, mangkaholongi Jahowa, Debatamuna i, dohot mangoloi Ibana sian nasa rohamuna dohot sian nasa ateatemuna.

11:14 Ahu ma mangalehon udan tu tanomuna di tingki halehetanna, udan di bulan sipaha pitu dohot udan di bulan sipaha sada, asa tarpapungu ho emem dohot anggurmu dohot miakmu.

11:15 Ahu huhut patubuhon di duhutduhut di ladangmu, hangoluan ni pinahanmu, asa mangan ho jala bosuran.

11:16 Dibahen i ramoti hamu ma dirimuna, asa unang tarela rohamuna laos marbalik hamu, jala dioloi hamu angka debata sileban, huhut marsomba tusi.

11:17 Jadi marpiarpiar rimas ni Jahowa maon mida hamu, gabe Ibana mangkinsu langit i maniopi udan, tano i pe ndang lehononna gogona, gabe tibu hamu mago sian tano na denggan i, na nilehon ni Jahowa tu hamu.

11:18 Antong sai parateatehon hamu ma angka hatangkon jala pamasuk hamu tu rohamuna jala rahuthon hamu angka i bahen partinandaan di atas tanganmuna, jala bahen parningotan di holangholang ni matamuna.

11:19 Jala ajarhon hamu angka i tu angka anakmuna, taringoti hamu angka i, molo hundulhundul ho di bagasan jabum manang mardalani ho di pardalanan, manang laho modom pe ho, nang dung hehe muse.

11:20 Jala ingkon surathononmu angka i tu tohang ni jabum dohot tu panggumbanganmu.

11:21 Asa leleng hamu mangolu nang pinomparmuna i di tano naung niuarihon ni Jahowa tu angka ompumuna i, lehononna tu nasida, songon leleng ni angka ari ni langit lelengmuna tahe di atas tano on.

11:22 Ai tung sura marsihohot rohamuna mangaradoti sandok patikon, na hutonahon i tu hamu laho mangulahonsa, mangkaholongi Jahowa, Debatamuna i, marparange di saluhut dalanna jala marsitiopan tu Ibana.

11:23 Ingkon pabalion ni Jahowa do saluhut bangso parbegu on maradophon hamu, asa hamu manoluk bangso angka na umbolon, jala na gumogo sian hamu.

11:24 Nasa tano na nidege ni palak ni patmuna, ingkon hamu nampunasa, olat ni halongonan dohot Libanon, olat ni sunge i, i ma sunge Euprat, sahat ro di laut tungkan hasundutan, i ma parbalohan ni tanomuna.

11:25 Ndang adong nanggo sahalak na manahan jongjong di adopanmuna; lehonon ni Jahowa, Debatamuna i ma roha hagodoron dohot biar mida hamu tu sandok tano sidegean ni patmuna i, songon naung pinarbagabagana i hian tu hamu.

11:26 Ida ma, ahu papillithon di adopanmuna sadarion pasupasu dohot torutoru:

11:27 Pasupasu tahe, molo tung ditangihon hamu angka tona ni Jahowa, Debatamuna i, angka na hutonahon i tu hamu sadarion.

11:28 Alai torutoru tahe, tung sura so ditangihon hamu angka tona ni Jahowa, Debatamuna i, gabe manimbil hamu sian dalan na hutonahon i tu hamu sadarion, lam diihuthon hamu angka debata sileban, angka na so tinandamuna i.

11:29 Ia dung sahat ho, ditogihon Jahowa, Debatam masuk tu tano sitopotonmuna i bahen partalianmu, ingkon hatahononmu pasupasu i di atas dolok Gerizim, jala torutoru i di atas dolok Ebal.

11:30 Nda duansa do i di bariba ni Jordan dingkan ujung ni dalan tungkan hasundutan di tano ni halak Kanaan, na maringan di adaran, tondong ni Gilgal mardonokkon tombak More.

11:31 Ai tariparanmuna nama Jordan laho masuk manean tano, naung nilehon ni Jahowa, Debatamuna i tu hamu bahen partalianmuna, laos maringan hamu disi.

11:32 Dibahen i sai ringkoti hamu ma mangulahon saluhut aturan dohot uhum, angka na hutonahon i tu hamu sadarion.

5 Musa 12

12:1 On do aturan dohot uhum, angka na tama ringkotanmuna mangulahon di tano na nilehon ni Jahowa, Debata ni angka ompum, tu ho bahen partalianmu, saleleng hamu mangolu di atas tano on.

12:2 Ingkon panepneponmuna situtu sude inganan pamelean tu debata sileban di bangso parbegu, angka sisoluhonmuna, nang di atas dolok manang di atas robean, manang di toru ni saluhut hau na rata.

12:3 Ingkon lohaonmuna do angka langgatannasida i, jala taporanmuna ajiajiannasida, jala suda tutungonmuna sombaonnasida dohot api jala tahaonmuna do angka ganaganaan, sumansuman ni Debatanasida, ingkon pidomhononmuna goarnasida sian inganan i.

12:4 Ndang jadi bahenonmuna songon i tu Jahowa, Debatamuna i.

12:5 Ingkon di inganan sipilliton ni Jahowa, Debatamuna i, sian saluhut margamuna umpajokkon Goarna tusi bahen ingananna, ingkon disi tahe luluanmuna Ibana jala sitopotonmuna.

12:6 Tusi huhut boanonmuna angka peleanmuna situtungon dohot peleanmuna sipotongon dohot parpuluanmuna i dohot pelean sitatingan sian tanganmuna, angka bagabagamuna dohot peleanmuna sian lomo ni roha, ro di anak buhabaju sian lombumuna dohot sian birubirumuna.

12:7 Ingkon disi huhut hamu mangan di adopan ni Jahowa, Debatamuna i, jala marlas ni roha hamu mida saluhut na niradotan ni tanganmuna, songon i hamu, songon i dohot isi ni bagasmuna, angka na pinasupasuhon ni Jahowa, Debatam tu ho.

12:8 Ndang jadi bahenonmuna disi hombar tu saluhut na itabahen sadarion dison, ganup tahe mambahen lomo ni rohana be.

12:9 Ai ndang dope sahat hamu rasirasa nuaeng tu paradianan, manang tu partalian, silehonon ni Jahowa, Debatam tu ho.

12:10 Alai magira ma tariparanmuna Jordan jala maringan hamu di tano na binasabasahon ni Jahowa, Debatamuna i bahen partalianmuna, jala pasonangonna ma hamu maradophon saluhut musumuna humaliang, asa marsonangsonang hamu maringan.

12:11 Ia dung dipillit Jahowa, Debatamuna i, sada inganan di Ibana bahen inganan ni Goarna i, ingkon tusi ma boanonmuna saluhut naung hutonahon i tu hamu: Angka peleanmuna situtungon dohot angka peleanmuna sipotongon, angka parpuluanmuna, angka pelean sitatinganmuna ro di sude ugasan na pinillit, garar ni bagabagamuna, angka na binagabagahonmuna tu Jahowa.

12:12 Jala ingkon marlas ni roha hamu di adopan ni Jahowa, Debatamuna i, songon i hamu dohot angka anakmuna, angka borumuna, angka naposomuna baoa dohot parompuan, ro di halak Lepi, angka na maringan di bagasan hutamuna i, ai ndang maruli parjambaran manang partalian anggo nasida rap dohot hamu.

12:13 Ingkon ramotanmu dirim, na so tupa pelehononmu angka peleanmu situtungon di ganup inganan na denggan di roham.

12:14 Ingkon di inganan sipilliton ni Jahowa di tongatonga ni sada sian angka margamu, ingkon disi do pelehononmu angka peleanmu situtungon, jala ingkon disi do bahenonmu manang aha na hutonahon i di ho.

12:15 Alai jadi do huhut guru sandok sombu ni roham seatonmu jala panganonmu juhut, hombar tu pasupasu ni Jahowa, Debatam, na nilehonna i tu ho di bagasan saluhut ingananmu; halak na ramun dohot na ias, jadi do manganhon sian i, suang songon hije manang ursa.

12:16 Holan mudar i tahe ndang jadi panganonmuna, ingkon tu tano do i usehononhon songon aek.

12:17 Ndang jadi hamu manganhon di bagasan hutamuna i parpuluan sian ememu manang sian anggurmu, manang sian miakmu, manang anak buhabaju sian lombum manang sian birubirum, ro di sude ugasan garar ni bagabagam, angka naung binagabagahonmu ro di peleanmu sian lomo ni roha dohot pelean sitatingan sian tanganmu.

12:18 Ingkon di adopan ni Jahowa, Debatam do panganonmu angka i, di inganan sipilliton ni Jahowa, Debatam, di Ibana, songon i ho nang anakmu dohot borum, ro di naposom baoa dohot parompuan dohot halak Lepi, na maringan di bagasan hutam, ingkon marlas ni roha ho di adopan ni Jahowa, Debatam, mida saluhut na niradotan ni tanganmu.

12:19 Jaga dirim, na so tupa marlea roham mida halak Lepi, saleleng mangolu ho di atas tanomi.

12:20 Alai tung sura dipalambas Jahowa, Debatam parbalohan ni tanomi, songon naung pinarbagabagana hian tu ho, gabe nimmu ma: Naeng mangan juhut ahu, ala hisapan roham naeng mangan juhut, jadi do panganonmu juhut sandok guru sombu ni roham.

12:21 Alai tung sura holang sian ho inganan naung pinillit ni Jahowa, Debatam, paojakkon Goarna disi, jadi do seatonmu sian lombum manang sian birubirum, angka na nilehon ni Jahowa tu ho, songon naung hutonahon i tu ho, jala mangan ma ho di bagasan hutam, sandok guru sombu ni roham.

12:22 Tongon tahe songon papangan ni halak di hije dohot di ursa, jadi do songon i panganonmu i; halak na ias dohot na ramun, jadi do rap mangan sian i.

12:23 Asal marsihohot roham unang mangan mudar, ai mudar i do hosa; dibahen i ndang jadi panganonmu hosai i rap dohot sibukna.

12:24 Ndang jadi panganonmu mudar i, ingkon tu tano do i usehononmu songon aek.

12:25 Ndang jadi panganonmu i, asa marhasonangan ho dohot pinomparmu dung salpu ho, molo diulahon ho lomo ni roha ni Jahowa.

12:26 Alai anggo peleanmi angka na badia i sipelehononmu hian, ro di angka bagabagami, ingkon buatonmu jala boanonmu do i tu inganan naung pinillit ni Jahowa.

12:27 Ingkon hobasonmu anggo angka peleanmu situtungon, sibukna dohot mudarna di atas langgatan ni Jahowa, Debatam; ia mudar ni angka peleanmu sipotongon ingkon usehononmu do i tu atas langgatan ni Jahowa, Debatam, alai anggo sibukna jadi do panganonmu.

12:28 Sai paingotingot jala tangihon sude hata on, angka na hutonahon tu ho, asa marhasonangan ho dohot pinomparmu dung salpu ho ro di salelenglelengna, molo tung diulahon ho na denggan dohot na tigor di roha ni Jahowa, Debatam.

12:29 Ia dung sun siap dibahen Jahowa, Debatam maradophon ho bangso parbegu, angka sitopotonmi laho manean nasida, jala ia dung ditean ho nasida, laos maringan ho di tanonasida i:

12:30 Sai ramoti ma dirim, asa unang tung tarjorgong ho mangihuthon tu nasida, dung siap nasida maradophon ho, jala unang usouso ho taringot tu debatanasida gabe nimmu: Songon pangoloi ni angka bangso parbegu on di debatanasida, suang songon i do nang ahu bahenonku.

12:31 Ndang jadi bahenonmu songon i di Jahowa, Debatam, ai saluhut biasbias ni Jahowa na hinagigihon ni rohana dibahen nasida do i tu debatanasida i; ai gari anaknasida dohot borunasida, suda do i ditutung nasida di bagasan api umpele debatanasida i.

5 Musa 13

13:1 Sandok hata naung hutonahon i tu hamu, ingkon ringkotan ni rohamuna do laho mangulahon; ndang jadi ambaanmuna tusi, jala ndang jadi huranganmuna sian i.

13:2 Tung sura hehe di tongatongamuna sada panurirang manang halak siparnipi, pola dilehon tu ho sada tanda manang halongangan.

13:3 Ro do huhut antong tanda dohot halongangan, naung pinaboana i hian tu ho, ninna do: Beta hita mangihuthon tu debata sileban, angka na so tinandamuna i na sai laon jala marsomba hita tusi!

13:4 Ndang jadi tangihononmu hatahata ni panurirang sisongon i manang halak siparnipi sisongon i; ai na mangunjuni hamu do Jahowa, Debatamuna i, naeng botoonna manang na tutu hamu mangkaholongi Jahowa, Debatamuna i sian nasa ro hamuna dohot sian nasa ateatemuna.

13:5 Ingkon Jahowa, Debatamuna i tama ihuthononmuna jala marhabiaran tu Ibana, huhut mangaradoti angka tonana jala tumangihon soarana, huhut marpangoloion dohot marparsigantungan tu Ibana.

13:6 Alai anggo panurirang manang halak siparnipi sisongon i, ingkon marutang hosa do, ala mangela ibana marbalik sian Jahowa, Debatamuna i, naung manogihon hamu ruar sian tano Misir, jala naung manobus ho sian bagas parhatobanan, ala naeng pasimbilonna ho sian dalan naung tinonahon ni Jahowa, Debatam tu ho, ingkon dalananmu; ingkon songon i paholangonmu hajahaton i sian tongatongamu.

13:7 Tung sura anggim sandiri, donganmu saina, manang anakmu, manang borum, manang jolmam tuanlaenmu, manang alealem hasudungan ni roham, mangela ho marsibuni mandok songon on: Beta hita mangoloi debata sileban, angka na so tinandam, manang na so tinanda ni angka ompum pe.

13:8 Sian angka debata ni bangso, angka na humaliang hamu, angka na jonok tu ho, manang na holang sian ho, sian ujung ni tano na sada sahat ro di ujung ni tano na sadanari.

13:9 Ndang jadi oloanmu pinangidona i jala ndang jadi tangihononmu ibana; ndang jadi moralangalang roham mida ibana, jala ndang jadi asianmu manang tabunihononmu ibana.

13:10 Ingkon bunuonmu ibana, tanganmu sandiri tahe tama parjolo mangonai laho mambunu ibana, ipe asa tangan ni sandok bangso i.

13:11 Ingkon mate ibana dangguran ni halak dohot batu, ala diunjuni rohana mangela ho marbalik sian Jahowa, Debatam, na manogihon ho ruar sian tano Misir, sian bagas parhatobanan.

13:12 Ingkon sandok Israel umbegesa, asa laos mabiar nasida, jala unang be didatdati mambahen hajahaton sisongon i di tongatongamu.

13:13 Tung sura dibege ho barita ni sada huta sian huta angka na nilehon ni Jahowa, Debatam di ho, bahen ingananmu, didok halak:

13:14 Nunga ruar deba baoa, angka halak parroha Belial sian tongatongamu, jala nunga pola diela marbalik halak isi ni hutanasida i, ninna do: Beta hita asa itasomba debata sileban, angka na so tinandamuna i na sai laon.

13:15 Ingkon sungkunsungkunonmu jala risihanmu jala tangkas sulingkitanmu pangalahona; hape ida ma, hasintongan do hata i, jala andar do masa biasbias i di tongatongamu.

13:16 Ingkon hamu do mambunu isi ni huta sisongon i marhite sian baba ni podang, ingkon haromhononmu ia huta i rap dohot sude isina dohot pinahanna marhite sian baba ni podang.

13:17 Tole sandok ugasan tabantaban ingkon papunguonmu do i tu tongatonga ni onan, laos tutungonmu ma huta i ro di sandok tabantabanna di bagasan api bahen pelean situtungon tu Jahowa, Debatamu, asa gabe timbunan batu ro di salelenglelengna; ndang jadi be paulion huta i.

13:18 Na so tupa adong agia aha lohot tu tanganmu sian na hona harom i, asa anggiat marpangulahi roha ni Jahowa sian parpiarpiar ni rimasna jala dilehon tu ho asi ni roha jala marpangulahi rohana mida ho jala dipatorop ho, songon na niuarihonna tu angka ompum.

13:19 Tung sura ditangihon ho soara ni Jahowa, Debatam, laho mangaradoti saluhut tonana, angka na hutonahon i tu ho sadarion laho mangulahon na tigor di roha ni Jahowa, Debatam.

5 Musa 14

14:1 Angka anak na niain ni Jahowa, Debatamuna i do hamu; dibahen i ndang jadi garianganmuna dagingmuna, jala ndang jadi nabunganmuna salibon ni matamuna i, ala ni salahak naung mate.

14:2 Ai bangso na badia do ho di Jahowa, Debatam, jala nunga dipillit Jahowa ho, asa ho gabe bangso hapunjunganna sian saluhut bangso, angka na di atas tano on.

14:3 Ndang jadi panganonmu manang aha na ramun sihabiashononhon.

14:4 On do tahe pinahan na jadi panganonmuna: lombu, birubiru dohot hambing.

14:5 Ursa, hije, sipan, bedu, badak ursa piutpiut.

14:6 Ro di nasa pinahan na martambirik, jala bola dua tambirikna i huhut marngalu, i ma na jadi panganonmuna.

14:7 Alai ndang jadi panganonmuna sian angka na marngalu sambing dohot sian angka na marbola tambirikna sambing, songon: unto, ampodi, dohot landuk; ai marngalu do angka i nian, alai ndang marbola anggo tambirikna, dibahen i ingkon ramun do i di hamu.

14:8 Tole muse babi, ai marbola do nian anggo tambirikna, alai ndang marngalu, dibahen i ingkon ramun do i di hamu. Ndang jadi hamu manganhon sian sibukna, bangkena pe ndang jadi jamaonmuna.

14:9 Angka on do na jadi panganonmuna, sian saluhut angka na di bagasan aek: nasa na marhapihapi jala na marsisik, i ma na jadi panganonmuna.

14:10 Alai nasa na so marhapihapi jala na so marsisik, ndang jadi panganonmuna i; ingkon ramun do i di hamu.

14:11 Nasa pidong na ganjing jadi do panganonmuna.

14:12 Alai ndang jadi panganonmuna anggo angka pidong on: pidong raja wali, isuisu dohot honong bosi.

14:13 Tole lali lopak, lali lapuk dohot lali bangar ro di mansammansamna.

14:14 Tole muse sigak ro di mansammansamna.

14:15 Tole muse pidong unto, langkupa, sihungkung lali piuan ro di mansammansamna.

14:16 Tole muse sipauk, ampapaluan dohot situbiak.

14:17 Tole muse onggang, silogologo dohot soro aek.

14:18 Tole muse siboru tasik, sibarung ro di mansammansamna, nang lompong dohot ariparip.

14:19 Tole muse nasa na manjirir sian angka na marhabong, ingkon ramun do i di hamu, ndang jadi panganonmuna angka i.

14:20 Nasa pidong na ganjing jadi do panganonmuna.

14:21 Ndang jadi panganonmuna manang aha na mate garam; tu halak dagang na maringan di bagasan hutam, jadi do i lehononmu, asa panganonna manang gadisonna tu halak sileban; ai bangso na badia do anggo ho, di Jahowa, Debatam. Ndang jadi lompaonmu anak ni hambing di bagasan aek ni susu ni inana.

14:22 Ingkon burju do lehononmu parpuluan sian nasa gogo ni tano, boni sinaburhonmi, sian saluhut na tubu di tanomi ganup taon.

14:23 Jala ingkon mangan ho di adopan ni Jahowa, Debatam, di inganan na pinillitna bahen inganan ni Goarna disi, mangan ho tutu sian parpuluan ni emem, anggurmu, miakmu dohot anak buhabaju ni lombum dohot birubirum, asa marsiajar ho marhabiaran tu Jahowa, Debatam saleleng ho mangolu.

14:24 Alai tung sura madaohu dalan i di roham, pola ndang tarusung ho siboanonmu i, ala madaohu di roham inganan naung pinillit ni Jahowa, Debatam bahen ojahan ni Goarna disi, ala naung dipasupasu Jahowa Debatam ho:

14:25 Jadi do i tobusonmu marhite sian perak, tungkusonmu muse perak i di bagasan tanganmu, asa laho ho tu inganan naung pinillit ni Jahowa, Debatam di Ibana.

14:26 Perak i ma lehononmu singkat ni saluhut na pinangido ni roham, singkat ni lombu, birubiru, anggur, siinumon na horas jala singkat ni saluhut na pinangido ni roham, dung i mangan ma ho disi, di adopan ni Jahowa, Debatam, jala marlas ni roha ho rap dohot donganmu sajabu.

14:27 Alai mida halak Lepi, na maringan di bagasan hutam, ndang jadi marlea roham; ai ndang maruli bagian manang partalian ibana rap dohot ho.

14:28 Dung salpu tolutolu taon ingkon paruaronmu nasa parpuluan ni gogo ni tanomi di taon na sasada i, jala pajoponmu do i di bagasan hutam.

14:29 Jadi ingkon ro halak Lepi, ala so maruli bagian manang partalian ibana rap dohot ho, ro dohot halak dagang, dakdanak na sopot so marama dohot parompuan na mabalu di bagasan hutam, asa nasida mangan jala bosuran, asa dipasupasu Jahowa, Debatam ho di bagasan saluhut jadijadian ni tanganmu na niulami.

5 Musa 15

15:1 Dung salpu pitupitu taon ingkon bahenonmu taon haluaon.

15:2 Ingkon songon on do pangalaho ni taon haluaoni: Ganup halak parutangan, na pautang donganna, ndang jadi tungguonna donganna manang hahaanggina; ai nunga pola ditingtingkon halak taon haluaon di Jahowa.

15:3 Anggo halak dagang jadi do tungguonmu; alai manang aha ugasanmu di hahaanggim, ingkon salesean ni tanganmu do i.

15:4 Tung na so tupa adong di tongatongamuna halak na pogos, ai buas do pasupasuon ni Jahowa ho di tano silehonon ni Jahowa, Debatam tu ho soluhonmu bahen partalianmu.

15:5 Asal ditangihon ho situtu soara ni Jahowa, Debatam, huhut mangaringkoti mangulahon sandok tona on, angka na hutonahon tu ho sadarion.

15:6 Ai pasupasuon ni Jahowa, Debatam do ho, songon naung pinarbagana i hian tu ho, jadi pasalionmu torop angka bangso parbegu, alai ndang marsali anggo ho; jala gomgomanmu torop angka bangso parbegu, alai anggo ho ndang jadi rajaannasida.

15:7 Tung sura adong di tongatongamu sahalak na pogos sian hahaanggim di bagasan sada sian angka hutam, di tanomi, silehonon ni Jahowa, Debatam tu ho, ndang jadi papironmu roham jala ndang jadi tutuponmu tanganmu maradophon donganmu na pogos i.

15:8 Ingkon ringgas ho mamuhai tanganmu di ibana jala buas ho pasali ibana pasingkophon di ibana marguru tu godangna na hurang di ibana.

15:9 Sai ramoti dirim, asa unang tubu pingkiran na jahat di bagasan roham, mandok songon on: Nunga lam jonok taon papituhon, i ma taon haluaon, gabe murhing pamerengmu mida donganmu na pogos i, laos sundat ho mangalehon tu ibana, gabe alualuhononna ho tu Jahowa, gabe dapotan dosa ho.

15:10 Ingkon buas lehononmu ibana, unang pola marmurukmuruk roham di na mangalehoni ho tu ibana; ai ala ni do pasupasuon ni Jahowa, Debatam do ho di saluhut ulaonmu dohot di saluhut na jinama ni tanganmu.

15:11 Ai ndang tagamon mansadi adong halak na pogos di tongatonga ni tano i, ala ni do umbahen hutonahon tu ho songon on: Ingkon ringgas ho mamuhai tanganmu mangalehon donganmu na targogot jala na pogos di bagasan tanomi.

15:12 Tung sura mangadop di ho donganmu sahalak Heber baoa manang parompuan, ingkon onom taon lelengna ibana mangula di ho, tole papitutaonhon ingkon paluaonmu boti ibana sian lambungmu.

15:13 Jala tung sura dipalua ho ibana boti sian lambungmu, ndang jadi rumar boti ibana paluaonmu.

15:14 Ingkon buas pangalehonmu tu ibana sian birubirum dohot sian pardegeanmu dohot sian pangilanganmu anggur, sian luhut naung pinasupasuhon ni Jahowa, Debatam tu ho, lehononmu ibana.

15:15 Ingkon paingotingotonmu, hatoban do nang ho najolo di tano Misir, gabe ditobus Jahowa, Debatam ho, ala ni do umbahen hutonahon tu ho hata on sadarion.

15:16 Alai tung sura dohononna mandok ho: Ndang dipangido rohangku naeng malua ahu ruar sian lambungmu ala holong rohana mida ho dohot mida isi ni jabum, ai sonang rohana di lambungmu.

15:17 Ingkon buatonmu ma sada sigirik jala turaonmu pinggolna di lambung pintu, jadi hatobanmu ma ibana ro di salelenglelengna; tu hatobanmu parompuan pe laos songon i do bahenonmu.

15:18 Unang pola dok roham ala paluaonmu ibana boti sian lambungmu, ai silompit sian gaji ni halak sipangan gaji pinangulahonna ho onom taon lelengna, jadi pasupasuon ni Jahowa, Debatam ma ho, di saluhut na niulam.

15:19 Nasa anak buhabaju, na tubu di tongatonga ni lombum dohot birubirum, ingkon parbadiaanmu do i di Jahowa, Debatam; ndang jadi pangkeonmu mangula anggo anak buhabaju ni lombum, jala ndang jadi gustingonmu imbulu ni anak buhabaju ni birubirum.

15:20 Ingkon di adopan ni Jahowa, Debatam do i panganonmu ganup taon di inganan sipilliton ni Jahowa, songon i ho dohot isi ni bagasmu.

15:21 Alai tung sura adong lindangna, mengkat do i manang mapitung manang martihas na roa dia na asing, ndang jadi pelehononmu i tu Jahowa, Debatam.

15:22 Ingkon panganonmu do i di bagasan hutam, suang songon hije manang ursa, nang halak na ramun manang na ias pe.

15:23 Alai anggo mudarna na so tupa panganonmu, ingkon tu tano do i usehononmu, songon aek.

5 Musa 16

16:1 Sai ingot hamu ma bulan Abib, asa marulaon Paska ho di Jahowa, Debatam, ai apala di bulan Abib ditogihon Jahowa, Debatam ho ruar sian Misir bornginna i.

16:2 Ingkon seatonmu di ari raya Paska lombu dohot birubiru di Jahowa, Debatam di inganan sipilliton ni Jahowa bahen inganan ni Goarna disi.

16:3 Ndang jadi panganonmu sagusagu na niasoman di ari raya Paska i; ingkon pitu ari lelengna panganonmu disi sagusagu na so niasoman, sagusagu pardangolan, ai mardangoldangol do ho ruar sian tano Misir, asa dipaingotingot roham saleleng ho mangolu ari haruruarmu sian tano Misir.

16:4 Dibahen i ndang jadi dapot idaon di ho igarigar di sandok parbalohanmu pitu ari lelengna, jala ndang jadi marborngin sian pinahan na sineatmi di bodari ni ari parjolo sahat ro di manogotna i.

16:5 Ndang jadi seatonmu Paska i di bagasan sada sian hutam, angka silehonon ni Jahowa, Debatam tu ho.

16:6 Ingkon di inganan sipilliton ni Jahowa, Debatam, bahen inganan ni Goarna disi, seatonmu Paska i di bodari marhira manihir mata ni ari, di tingki haruruarmu sian Misir.

16:7 Ingkon panggangonmu jala panganonmu do i di inganan sipilliton ni Jahowa, Debatam di Ibana, manogotna i jadi do ho mardalan mulak tu undungundungmu hian.

16:8 Ingkon onom ari lelengna panganonmu sagusagu na so niasoman, tole papituarihon jumpang ma mata ni ari raya di Jahowa, Debatam, ndang jadi ulaonmu disi nanggo sada ulaon.

16:9 Ingkon pitu minggu bilangonmu di ho; olat ni dung mamungka madabu sasabi tu eme, pungkaonmu ma mamilangi na pitu minggu i.

16:10 Dung i marari raya minggu ma ho di Jahowa, Debatam, marguru tu pangalehon ni tanganmu di pelean sian lomo ni roha silehononmu, hombar tu pamasumasu ni Jahowa, Debatam di ho.

16:11 Ingkon marlas ni roha ho di adopan ni Jahowa, Debatam, songon i ho dohot anakmu dohot borum dohot naposom baoa dohot naposom parompuan dohot halak Lepi na di bagasan hutam, ro di halak dagang dohot dakdanak na tading di lampin dohot parompuan na mabalu na di tongatongami, di inganan sipilliton ni Jahowa, Debatam, bahen inganan ni Goarna disi.

16:12 Sai dipaingotingot roham ma hatoban do ho na jolo di Misir, asa ingkon radotanmu jala ulahononmu angka aturan on.

16:13 Ingkon marari raya parlapelapean ho pitu ari lelengna, ia dung dipapungu ho parbue sian pardegeanmu dohot sian pangilanganmu.

16:14 Jala ingkon marlas ni roha ho di ari rayamu, songon i ho dohot anakmu dohot borum dohot naposom baoa dohot naposom parompuan dohot halak Lepi dohot halak dagang dohot dakdanak na tading di lampin dohot parompuan na mabalu di bagasan angka hutamu.

16:15 Ingkon pitu ari lelengna ho marari raya di Jahowa, Debatam di inganan sipilliton ni Jahowa; ai pasupasuon ni Jahowa, Debatam ma ho di saluhut gogo ni tanomu dohot di saluhut ulaon ni tanganmu, dibahen i ingkon marlas ni roha situtu ho.

16:16 Ingkon tolu hali di bagasan sataon ro nasa baoa di tongatongamu tu adopan ni Jahowa Debatam, di inganan sipilliton ni Jahowa, i ma di ari raya sagusagu na so niasoman dohot di ari raya minggu dohot di ari raya parlapelapean, jala ndang jadi rumar boti ro manang ise tu adopan ni Jahowa.

16:17 Ganup tahe marguru tu na tarlehon tanganna, hombar tu pasupasu naung nilehon ni Jahowa, Debatam tu ho.

16:18 Ingkon pabangkitonmu di ho angka jolma bahen panguhum dohot panuturi di saluhut harbanganmu, angka silehonon ni Jahowa, Debatam tu ho di tongatonga ni angka margam, asa nasida mandabu uhum hasintongan tu bangso i.

16:19 Ndang jadi papeolonmu uhum, ndang jadi ho marnidanida bohi, jala ndang jadi jaloonmu silua, ai sisip do papitung mata ni halak na pistar jala pabalikbalik parhataan ni halak na tigor.

16:20 Hatigoran, hatigoran ma tutu ingkon eahanmu, asa mangolu ho jala teanonmu tano silehonon ni Jahowa, Debatam tu ho.

16:21 Ndang jadi pajongjongonmu di ho manang sian hau dia sumansuman ni sombaon Asera jonok tu langgatan ni Jahowa, Debatam sibahenonmu di ho.

16:22 Ndang jadi huhut pajongjongonmu di ho tiang panombanombaan, na hinagigihon ni Jahowa, Debatam.

5 Musa 17

17:1 Ndang jadi pelehononmu tu Jahowa, Debatam lombu manang birubiru na martihas manang na marsahit dia pe; ai marbiasbias do roha ni Jahowa, Debatam disi.

17:2 Tung sura adong jumpang di tongatongami di bagasan sada sian hutam, angka silehonon ni Jahowa, Debatam tu ho sada baoa manang parompuan, na mangulahon sogo ni roha ni Jahowa, Debatam mangose padan binahenna i.

17:3 Tung laho ibana mangoloi angka debata sileban jala marsomba tusi, tu mata ni ari manang tu bulan, manang tu sandok parangan di langit, na so hutonahon i.

17:4 Tarbortik dohot tu ho, pola dibege pinggolmu, ingkon tangkas do i sulingkitanmu, jadi ida ma, sintong situtu do hape hata i masa biasbias sisongon i di Israel.

17:5 Ingkon ruar toguonmu baoa manang parompuan na mambahen hajahaton sisongon i tu balian ni harbanganmu, jala baoa manang parompuan sisongon i danggurannasida dohot batu asa mate.

17:6 Molo dua manang tolu halak mangkatindangkon hata i, ingkon saut ma bunuonna halak na marutang hosa hian; alai anggo holan sahalak sitindangi ndang jadi bunuon ibana.

17:7 Ingkon tangan ni angka sitindangi jumolo mangonai laho mambunu ibana, dung i muse tangan ni sandok bangso i, asa tung siaphononmu hajahaton i sian tongatongami.

17:8 Tung sura mamaolhu risihanmu sada parkaro di paruhuman taringot tu na masibunuan hosa manang na masigulutan, manang na masibugangan, manang dia tahe hatahata parsalisian masa di harbanganmu, ingkon borhat ma ho jala nangkok tu inganan sipilliton ni Jahowa, Debatam di Ibana.

17:9 Ingkon topotonmu ma tu adopan ni angka malim, halak Lepi dohot tu panguhum pandapotan di tingki uju i jala sungkunonmu uhum, asa nasida paboahon tu ho hata patik i.

17:10 Jala ingkon bahenonmu do hombar tu hata sipaboaonnasida tu ho sian inganan naung pinillit ni Jahowa, ingkon ringkotanmu huhut mangulahon hombar tu saluhut na pinodahonnasida tu ho.

17:11 Hombar tu hata ni patik na pinodahonnasida, jala hombar tu uhum sipaboaonnasida tu ho, ingkon bahenonmu; ndang jadi ho manimbil sian hata na pinaboanasida tu ho tu siamun manang tu hambirang.

17:12 Tung sura adong sada halak na mambahen songon i mangasahon hajungkaton, ndang ditangihon hata ni malim na jongjong disi marulaon tu Jahowa, Debatam manang hata ni panguhum pandapotan i pe, ingkon marutang hosa baoa sisongon i, asa tung siap bahenonmu hajahaton i sian Israel.

17:13 Ingkon sandok bangso i umbegesa, asa mabiar nasida jala unang be mangulahon hajungkaton.

17:14 Ia dung masuk ho tu tano, silehonon ni Jahowa, Debatam tu ho, asa soluhonmu laos maringan disi, gabe ro hatam mandok: Naeng pabangkitonku sada raja gumomgom ahu, suang songon saluhut bangso parbegu, angka na humaliang ahu.

17:15 Ingkon pabangkitonmu gumomgom ho sada raja sipilliton ni Jahowa, Debatam di Ibana; ingkon sian tongatonga ni hahaanggim pabangkitonmu sada raja gumomgom ho; ndang jadi pabangkitonmu gumomgom ho halak na pulik bangso, na so sian hahaanggim.

17:16 Alai na so tupa patoropon ni rajai di ibana angka hoda, jala ndang jadi togihononna bangso i mulak tu Misir, ala naeng patorophon hodana, ai nunga pola didok Jahowa tu hamu: Na so tupa be hamu mulak sian dalan on.

17:17 Angkup ni ndang jadi patoroponna angka jolmana, asa unang manimbil rohana; perak pe dohot sere ndang jadi pagukguhonna di ibana.

17:18 Ia dung hundul ibana di atas habangsa ni harajaonna i, ingkon uhalonna di ibana hata ni patikon tu sada buku di adopan ni angka malim dohot halak Lepi.

17:19 Ingkon patik i tongtong donganna jala pajahajahaonna saleleng mangolu ibana, asa marsiajar ibana marhabiaran tu Jahowa, Debatana, asa radotanna sude hata ni patikon dohot angka aturan on, laho patupahon angka i.

17:20 Asa unang dipaginjang rohana mangastaasta angka hahaanggina, jala unang ibana manimbil sian tona i tu siamun manang tu hambirang, asa leleng ibana mangolu jumujung harajaonna i, ibana dohot angka anakna di tongatonga ni Israel.

5 Musa 18

18:1 Ianggo angka malim, halak Lepi, sandok marga Lepi tahe, ndang jadi maruli bagian manang partalian rap dohot Israel; angka pelean api tu Jahowa jala parjambaranna, i do panganonnasida.

18:2 Alai ndang jadi maruli partalian ibana di tongatonga ni hahaanggina, ai Jahowa sandiri do partalianna, songon naung pinarbagabagana i hian.

18:3 Ingkon on do tahe uhum siingoton ni bangso i tu angka malim sian halak angka na mamelehon pelean, manang lombu, manang birubiru, ingkon lehononna tu malim hae bona, hurumna na dua i dohot butuha bolon.

18:4 Tole patumonaan sian emem, anggurmu, miakmu ro di patumonaan sian imbulu ni birubirum ingkon lehononmu tu ibana.

18:5 Ai nunga dipillit Jahowa, Debatam ibana di Ibana sian saluhut angka margam, asa ibana jongjong marulaon marhite sian Goar ni Jahowa, ibana dohot angka anakna saleleng mangolu.

18:6 Tung sura ro sahalak Lepi sian sada ni angka hutam, sian sandok Israel paisolatanna i, jala ro ibana sian nasa ringkot ni rohana tu inganan naung pinillit ni Jahowa.

18:7 Asa marulaon ibana marhite sian Goar ni Jahowa, Debatana, suang songon saluhut hahaanggina i ma halak Lepi, angka na jongjong disi di adopan ni Jahowa.

18:8 Ingkon songon bagian ni halak na asing bagianna panganonnasida; angkup ni bagianna sian ugasan na ginadisna tu angka ompu.

18:9 Ia dung masuk ho tu tano silehonon ni Jahowa, Debatam tu ho, ndang jadi ho marsiajar mangulahon maniru biasbias na niulahon ni angka bangso on.

18:10 Na so tupa adong jumpang di tongatongamu sahalak na pabolushon anakna manang boruna sian api, manang halak pangarunding manang sijujur ari, manang sitabasi ulok manang parsibalik mata.

18:11 Manang sibahen panutupi, manang partondung, manang na manungkun begu ni na mate.

18:12 Ai marbiasbias situtu do roha ni Jahowa mida saluhut halak, angka na mangulahon sisongon i, jala ala ni biasbias angka sisongon i pabalion ni Jahowa, Debatam ma angka bangso i maradophon ho.

18:13 Ingkon sun denggan do anggo mardonganhon ho Jahowa, Debatam.

18:14 Ai bangso parbegu angka sisoluhonmu, somal do nasida patangitangi hatahata ni sijujur ari dohot pangarunding; alai ndang songon i pangalehon ni Jahowa, Debatam anggo tu ho.

18:15 Panurirang sada, songon ahu on patindangon ni Jahowa, Debatam sian tongatongami, sian angka hahaanggim; Ibana tama tangihononmuna.

18:16 Hombar tu saluhut naung pinangido ni roham sian Jahowa, Debatam di Horeb, uju di ari parluhutan i, nimmu do: Ndang be tarpabegebege ahu soara ni Jahowa, Debatangku, jala ndang be tarpaidaida ahu api na bolon on, asa unang mate ahu.

18:17 Dung i ro ma hata ni Jahowa tu ahu: Denggan do hata na nidoknasida i.

18:18 Ahu ma tutu patindangkon sogot di nasida sada Panurirang sian tongatonga ni hahaangginasida i, songon ho, jala Ahu mangalehon angka hatangku tu bagasan pamanganna, gabe hatahononna tu nasida saluhut na hutonahon i tu Ibana.

18:19 Jadi manang ise na so olo tumangihon hatangki, angka sihatahononna di bagasan Goarhu, ingkon Ahu mangaluluhonsa tu Ibana.

18:20 Alai tung sura adong, sada panurirang na paginjang rohana mangkatahon sada hata di bagasan Goarhu, so Ahu mandokkon hatahononna, manang panurirang na mangkatai marhite sian goar ni angka debata sileban, ingkon marutang hosa panurirang sisongon i.

18:21 Alai tung sura dohononmu di bagasan roham: Sian dia dapot tandaonnami hata na so hinatahon ni Jahowa?

18:22 Tung sura mangkatahon panurirang i marhite sian Goar ni Jahowa hape ndang songgop hata i jala ndang ro, i ma hata na so hinatahon ni Jahowa; mangasahon hajungkaton panurirang i umbahen dihatahon, ndang jadi mabiar ho mida ibana.

5 Musa 19

19:1 Ia dung sun siap dibahen Jahowa, Debatam angka bangso parbegu, nampuna tano silehonon ni Jahowa, Debatam tu ho, gabe soluhonmu tanonasida i, jala ingananmu hutanasida dohot bagasnasida i:

19:2 Ingkon papulihonmu di ho tolu huta di tongatonga ni tanomi, silehonon ni Jahowa, Debatam tu ho bahen partalianmu.

19:3 Ingkon parhornoponmu dalanmu tusi, jala bagi tolu bahenonmu parbalohan ni tanomi, silehonon ni Jahowa, Debatam tu ho bahen partalianmu, asa maporus tusi ganup sibunu jolma.

19:4 Jala on do patik taringot tu sibunu jolma i, jadi ma maporus tusi asa laos mangolu ibana: Manang ise naung mambunu donganna so pangkirimanna, jala ndada dihosom ibana hian na sai laon.

19:5 Songon on rupani, masuk ibana tu tombak rap dohot donganna naeng manaba hau, gabe dialbangkon tangkena naeng manaba hau i nian, hape pinsir mata ni tangke i sian songkirna, gabe hona donganna laos mate, jadi ma ibana maporus tu sada sian angka huta i, asa laos mangolu ibana.

19:6 Asa unang dilele parlulu i jolma pamunui, ala mohop ateatena, gabe dapotsa ditangkup ala madaohu dalan i, laos dibunu ibana maon, hape nian ndada patut dope uhum hamatean mangonai tu ibana, ala so dihosom ibana hian na sai laon.

19:7 Ala ni umbahen hutonahon tu ho songon on: Ingkon papulihonmu di ho tolu huta.

19:8 Jala tung sura lam mangonjar parbalohanmu bahenon ni Jahowa, Debatam, songon naung niuarihonna hian tu angka ompum, jala saut dilehon tu ho sandok tano, naung pinarbagabagana lehononna tu angka ompum.

19:9 Molo tung diringkoti ho mangulahon sandok tona on, na hutonahon tu ho sadarion, mangkaholongi Jahowa, Debatam dohot marparange di angka dalanna saleleng ho mangolu, ingkon ambaanmu dope di ho tolunari huta i angkup ni na tolu huta ondeng.

19:10 Asa unang tardurus mudar na so marpipot di tongatonga ni tanomi, silehonon ni Jahowa, Debatam tu ho bahen partalian, asa unang marsapata tu ho mudar i.

19:11 Alai tung sura naung magigi hian manang ise mida donganna, pola ibana digopgop jala dibajo ibana, jala dibunu ibana pola tos hosana mate, hape sanga ibana maporus tu sada sian angka huta i.

19:12 Ingkon suruan ni angka sintua di hutana i suruanna mangalapi ibana sian i, jala pasahatonna ibana tu tangan parlulu, asa mate ibana dibunu.

19:13 Ndang jadi moralangalang roham mida ibana, ingkon purpurhononmu do sapata ni mudar na so marpipot sian Israel, asa marhasonangan ho.

19:14 Ndang jadi paorotonmu talutuk sian hauma ni donganmu, angka na binahen ni ompu na jolo di bagasan partalianmu, siteanonmu di tano silehonon ni Jahowa, Debatam di ho bahen partalianmu.

19:15 Ndang masuk anggo holan sahalak hehe sitindangi mangalo, manang ise taringot tu manang aha hajahaton manang dosa, angka naung binahenna, ingkon tinindangkon ni dua manang tolu halak sitindangi, asa hot hata i.

19:16 Tung sura hehe sahalak sitindangi pargapgap mangalo manang ise naeng mangkatindangkon panundalion dompak ibana.

19:17 Ingkon jongjong na dua halak i, angka na marparsalisian di adopan ni Jahowa, di adopan ni malim dohot panguhum, angka na mangarajai disi.

19:18 Dung i tangkas ma sulingkiton ni angka panguhum hata i, gabe ida ma, andar do sitindangkon gabus do sitindangi i, sipaotooto do nialushonna dompak donganna i.

19:19 Jadi ingkon bahenonmuna tu ibana suang songon na sinangkap ni rohana naeng bahenonna tu donganna, asa tung siap bahenonmu hajahaton i sian tongatongamu.

19:20 Asa dibege halak na asing pangalahona i, anggiat mabiar nasida, jala unang be didatdati mangulahon hajahaton sisongon i di tongatongamu.

19:21 Ndang jadi moralangalang roham mida ibana: Ingkon hosa abul ni hosa, mata abul ni mata, ipon abul ni ipon, tangan abul ni tangan, pat abul ni pat.

5 Musa 20

20:1 Molo ruar ho naeng marporang dompak angka musum, gabe diida ho hoda dohot hureta dohot parangan na tumorop sian ho, unang ho mabiar maradophon nasida, ai Jahowa Debatam do donganmu, Ibana naung manogihon ho nangkok sian tano Misir.

20:2 Ia dung lam jonok hamu tu tongtangan, ingkon ro ma jumonok malim i huhut mandok tu bangso i.

20:3 Jala dohononna ma tu nasida; tangihon ma, ale Israel, na tole ma hamu sadarion manahopi tongtangan mangalo musumuna i; unang godoron rohamuna jala unang tahuton hamu jala unang tarsonggot hamu maradophon nasida!

20:4 Ai Jahowa, Debatamuna i mardalan rap dohot hamu, naeng marporang dompak musumuna i humongkop hamu, mangalehon parantuon tu hamu.

20:5 Angka panuturi pe ingkon dohononna ma tu bangso i songon on: Manang ise naung pajongjong bagas na imbaru, hape ndang dope dibongoti, jadi do ibana muli tu jabuna, asa unang mate ibana di humusuon i, gabe halak na asing mangingani jabuna i.

20:6 Jala manang ise naung mamungka sada porlak anggur, hape ndang sanga dope anggo manganhon parbuena, jadi do muli ibana tu jabuna, asa unang mate ibana di humusuon i, gabe halak na asing manganhon parbuena i.

20:7 Jala manang ise na maroroan, ndang haru dialap dope, jadi do ibana muli tu jabuna, asa unang mate ibana di hamusuon, gabe halak na asing mambuat parompuan i bahen jolmana.

20:8 Ingkon datdatan ni angka panuturi dope mandok hatana tu bangso i songon on: Manang ise na tahuton jala godoron rohana, jadi do ibana muli tu jabuna, asa unang dohot roha ni donganna malala dibahen, songon rohana sandiri.

20:9 Ia dung sidung angka panuturi i mandok hatana tu bangso i, ingkon dohononna ma angka partogi ni parangan manguluhon bangso i.

20:10 Molo jonok ho mangarongom sada huta laho mamereng dompak huta i, ingkon uahononmu tusi hata pardemahan.

20:11 Molo tung hata demak dialushon tu ho jala diungkap pargumbanganna di ho, jadi sandok bangso isi ni huta i ingkon mangoloi rodim jala marpandapotan tu ho.

20:12 Alai tung sura so mangoloi mardemak nasida tu ho, tagonan naeng marmusu dompak ho, ingkon tungkumonmu ma huta i.

20:13 Jadi ia dung dipasahat Jahowa, Debatam huta i tu bagasan tanganmu, ingkon mate tampulonmu saluhut baoa isi ni huta i dohot podang.

20:14 Alai anggo angka parompuan dohot dakdanak dohot pinahan ro di sandok ugasan na di huta i, sandok tabantabanna, jadi do laumonmu di ho jala panganonmu tabantaban sian musum, angka naung pinasahat ni Jahowa, Debatam tu ho.

20:15 Ingkon songon i do bahenonmu tu saluhut huta angka na holang situtu sian ho, angka na so sian huta ni angka bangso parbegu on.

20:16 Alai anggo sian isi ni angka huta ni angka bangso parbegu on, angka silehonon ni Jahowa, Debatam tu ho, bahen partalianmu, ndang jadi pangoluonmu nanggo sada na marhosa.

20:17 Ingkon sun siap nasida bahenonmu, halak Het i, Amori, Kanaan, Perisi, Hevi dohot Jebusi, songon na tinonahon ni Jahowa Debatam tu ho.

20:18 Asa unang nasida mangajarhon tu hamu mangulahon hombar tu saluhut biasbias, angka na binahennasida pasangap debatanasida i, asa unang mardosa hamu tu Jahowa, Debatamuna i.

20:19 Tung sura ingkon pola leleng tungkumonmu sada huta mandopang huta i laho papatuhon nian, ndang jadi agoonmu hau na disi, pola ditaba ho angka i marhite sian tangkem, ai tarbahen ho do mangan sian parbuena, ala ni ndang jadi tabaonmu; ai apala doshon jolma anggo hau di ladang tarbahensa laho maradophon ho tu bagasan partanobatoan.

20:20 Alai anggo hau naung binotom hian, ndada hau sipanganon parbuena, jadi do agoonmu jala tabaonmu jala pangkeonmu bahen hubu dompak huta i na marmusu dompak ho, paima patu huta i dibahen ho.

5 Musa 21

21:1 Tung sura jumpang sahalak na mate tartodos di tano, silehonon ni Jahowa, Debatam tu ho bahen partalianmu, bustang di ladang, ndang binoto manang ise na mambunu ibana.

21:2 Ingkon ruar angka sintua dohot panguhum di ho, asa manuhati holangna tu huta angka na humaliang hapeahan ni jolma na mate tartodos i.

21:3 Jadi manang huta dia na jumonok tu na mate, ingkon buaton ni angka sintua ni huta i sada anak ni lombu, na so dung pinangke dope maninggala, jala na so dung dope hapampean ni auga.

21:4 Dung i ingkon togutoguon ni angka sintua ni huta i anak ni lombu i tuat tu sada sunge na tongtong mabaor, na so dung niula dope pasirna manang tarsabur, ingkon ponggolhononhon disi rungkung ni anak ni lombu i martopihon sunge i.

21:5 Dung i ingkon ro jumonok angka malim i ma pinompar ni halak Lepi; ai nunga dipillit Jahowa, Debatam nasida bahen parhaladona, dohot mamasumasu marhitehite Goar ni Jahowa, jala marguru tu pandoknasida do marhasunan nasa parsalisian dohot badabada.

21:6 Jala sude sintua ni huta i, angka na jumonok tu hapeahan ni halak na mate, ingkon buriannasida tangannasida i di atas ni lombu na pinonggolan rungkungna i martopihon sunge i.

21:7 Ingkon dohononnasida huhut songon on: Ndada tangannami mandurushon mudar on, jala ndada matanami marnidasa.

21:8 Bahen pardengganan ma on di bangsom Israel naung tinobusmu, ale Jahowa! Sai unang ma manginona mudar na so marpipot i di tongatonga ni bangsom Israel! Jadi dapotan pardengganan ma nasida lias sian mudar i.

21:9 Ingkon songon i do purpurhononmu sapata ni mudar na so marpipot sian tongatongami, ai ingkon ulahononmu do hatigoran di adopan ni Jahowa.

21:10 Molo borhat ho laho marporang dompak angka musum, jala Jahowa, Debatam pasahathon musum tu bagasan tanganmu, gabe adong tarboan sian nasida dibahen ho.

21:11 Jadi diida ho di tongatonga ni angka na tarboan i sada parompuan na uli rupa gabe solo roham di nasida, laos dibuat ho nasida bahen jolmam.

21:12 Ingkon boanonmu nasida masuk tu bagasan jabum, ingkon gorbangonna uluna jala buatonna sisilonna.

21:13 Dung i osaronna ma ulos pinangkena di na tarboan i nasida, laos maringan ma nasida di bagasan jabum huhut mananangisi amana dohot inana sabulan lelengna; dung salpu songon i jadi ma topotonmu nasida gabe harajaanna jala nasida gabe jolmam.

21:14 Alai tung sura ndang be lomo roham di nasida, ingkon palahoonmu nasida, jadi ma topotonna guru lomo ni rohana, na so tupa gadisonmu nasida, manang marhatobanhon nasida, ala naung sampur ho tu nasida.

21:15 Tung sura marsiduadua manang ise, parompuan na sada tuanlaenna, na sadanari dihagigihon, gabe rap tubuan anak, parompuan tuanlaenna dohot na hinagigihonna, jala na hinagigihon i do nampuna anak buhabaju i.

21:16 Ia dung jumpang ari pangalehonna di teanteanan tinadingkonna i tu angka anakna, ndang tarbahensa pabangkithon gabe anak buhabajuna tubu ni jolma tuan laenna i, saleleng mangolu anak buhabaju ni jolmana na hinagigihonna i.

21:17 Ingkon tolopanna do anak tubu ni na hinagigihon i do anak buhabajuna, ingkon lehononna tu ibana dua bagian sian saluhut ugasan pineopna i, ai ibana do patumonaan ni hagogoonna, ibana huhut nampuna uhum sahala ni sihahaan.

21:18 Tung sura adong di manang ise sada anak na so mangoloi ajar jala na tarboan rohana, ndang ditangihon soara ni amana manang inana, diajar nasida pe ibana, laos so ditangihon do nasida.

21:19 Ingkon tangkupon ni amana dohot inana ma ibana jala toguonna ibana ruar tu adopan ni angka sintua ni hutana i dohot tu pargumbangan ni hutana i.

21:20 Dung i dohononnasida ma tu angka sintua ni hutana i: Anaknami on ndang mangoloi ajar jala tarboan rohana, ndada ditangihon soaranami, halak pargadombus dohot parminum do ibana.

21:21 Jadi ingkon dangguran ni saluhut baoa isi ni hutana i ibana dohot batu, asa mate ibana; ingkon songon i siaphononmu hajahaton i sian tongatongam, asa sandok Israel umbegesa, anggiat mabiar nasida.

21:22 Tung sura manang ise mambahen dosa, umbahen patut ibana marutang hosa, gabe saut ibana tarbunu, pola targantung ibana tu hau.

21:23 Ndang jadi pola sanga marborngin bangkena i gantung di hau i, ingkon tanomonmu ibana di ari na sasada i, ai na hona bura ni Debata do halak na targantung; dibahen i ndang jadi ramunanmu tanomi, na nilehon ni Jahowa, Debatam tu ho bahen partalianmu.

5 Musa 22

22:1 Ndang jadi paidaidaonmu lombu manang birubiru ni hahaanggim laho lilu sian punguanna, laos dipadao ho matam sian i, ingkon toguonmu do i mulak tu donganmu.

22:2 Tung sura pe ndang solhot donganmu tu ho, manang na so tinandam ibana, ingkon pamasuhonmu do i tu bagasan bara ni pinahanmu, asa di lambungmu do i paima usouso donganmu disi, dung i ingkon pasuangonmu tu ibana.

22:3 Suang songon i do bahenonmu nang taringot tu halodena, laos songon i bahenonmu taringot tu ulosna, laos songon i bahenonmu nang taringot tu saluhut ugasan na mago, na mago sian donganmu, manang aha pe na jumpang ho, ndang tarbahen ho padaoonmu matam sian i.

22:4 Ndang jadi paidaidaonmu halode ni donganmu manang lombuna martinggangan di tongan dalan, laos padaoonmu matam sian i, ingkon paheheonmu do i rap dohot ibana.

22:5 Ndang jadi marpangkean baoa ia parompuan, jala ndang jadi marpangkean parompuan ia baoa; ai manang ise na mangulahon sisongon i, hagigian ni Jahowa Debatam do i.

22:6 Tung sura talpe jumpang ho sada asar ni pidong di tongan dalan manang di atas hau dia manang manangkas di tano, maranak poso manang marisi pira, laos inana i mamodomhon anakna manang pirana, ndang jadi buatonmu inana rap dohot angka anakna.

22:7 Ingkon paluaonmu do inana, jadi do buatonmu anggo angka anakna, asa marhasonangan ho jala leleng mangolu.

22:8 Molo pajongjong bagas na imbaru ho, ingkon bahenonmu do handanghandang humaliang tarup ni bagasmu, asa unang ampehononmu utang mudar tu jabum, tung sura madabu halak sian i.

22:9 Ndang jadi mardua ragam boni saburhononmu tu porlak anggurmu, asa unang mago parbue ni boni na sinaburhonmi rap dohot parbue ni porlak anggur hian.

22:10 Ndang jadi bahenon marsaauga maninggala lombu dohot halode.

22:11 Ndang jadi pangkeonmu ulos na mardua mansam bonangna, sian imput ni birubiru rap dohot hori.

22:12 Ingkon bahenonmu di ho angka rambu tu na opat suhi ni sampesampem, na pinangkem manghungkupi dagingmu.

22:13 Tung sura mambuat boru sada baoa, pola sanga sampur nasida, hape magigi ibana muse di nasida.

22:14 Dung i dipatubutubu gasana jala diparoaroa baritana tu halak, ninna do: Nunga nian hubuat parompuan on bahen jolmangku, hape dung hutopot nasida, gabe ndang jumpang ahu di nasida tanda ni habajuonna.

22:15 Jadi ingkon boanon ni ama dohot ina ni boruboru i ma boruna, rap dohot tanda ni habajuonna tu adopan ni sintua ni huta i tu partungkoan.

22:16 Dung i dohonon ni ama ni boruboru i ma tu angka sintua i: Nunga hupamuli nian borungkon tu baoa on bahen jolmana, gabe magigi ibana disi.

22:17 Jala ida ma, lam dipatubutubu ibana gasana, ninna do: Ndang jumpang ahu di borumon tanda ni habajuonna; hape dison do tanda ni habajuon ni borungkon! Dung i ingkon pahembangonnasida ma ulosna borngin di adopan ni angka sintua ni huta i.

22:18 Dung i ingkon buaton ni angka sintua ni huta i ma baoa i, laos pungkulonnasida ma ibana.

22:19 Jala dandoonna ma ibana saratus rupia, lehononnasida ma i tu ama ni boruboru i, ala diparoaroa tu halak goar ni sada boruboru namarbaju di Israel, jala ingkon hot do nasida jolmana, na so tupa bolongkononna nasida saleleng mangolu ibana.

22:20 Alai tung sura sintong hatana i, ndang jumpang tutu tanda ni habajuonna di parompuan i.

22:21 Ingkon toguon do parompuan i tu balian pintu ni jabu ni amana, jala dangguran ni halak donganna sahuta do nasida dohot batu, asa mate, ala naung mangulahon haurahon nasida di Israel, tung marmainan nasida di bagasan jabu ni amana; asa tung siap bahenonmu hajahaton sian tongatongami.

22:22 Tung sura tardapot sada baoa maruhum na jat tu sada parompuan naung marharajaan, ingkon rap mate do nasida bunuon, nang baoa nang parompuan donganna maruhum na jati; asa tung siap bahenonmu hajahaton sian tongatonga ni Israel.

22:23 Tung sura adong sada boruboru namarbaju, naung oroan ni sada baoa, hape pajumpang nasida dohot sada baoa na asing di huta i, laos maruhum na jat nasida.

22:24 Ingkon duansa nasida toguon tu balian bahal ni huta i, jala dangguran nasida dohot batu, asa mate; boruboru i ala so mangangguhi nasida atik pe di bagasan huta; baoa i ala ginogoanna jolma ni donganna; asa tung siap bahenonmu hajahaton sian tongatongamu.

22:25 Alai tung sura pajumpang di ladang baoa i dohot boruboru naung oroan i, laos digogoi nasida maruhum na jat, holan sasada baoa na maruhum na jati marutang hosa.

22:26 Alai ndang jadi hahuaonmu anggo boruboru i, ala soada diulahon boruboru i dosa tu hamatean; ai songon sada halak na hehe mangalo donganna, laos diputus hosana, suman tusi do hata on.

22:27 Ai di ladang do nasida jumpangsa, mangangguhi pe boruboru naung oroan i, hape ndang adong nanggo sahalak na tarbahen mangurupi nasida.

22:28 Tung sura pajumpang sada baoa dohot sada boruboru namarbaju na so oroan dope, laos ditangkup nasida jala digogoi nasida maruhum na jat didapot halak.

22:29 Ingkon lehonon ni baoa na maruhum na jat dohot parompuan i limapulu rupia tu ama ni boruboru i, ingkon laos buatonna nasida bahen jolmana, ala naung ginogoanna i nasida, na so tupa bolongkononna nasida saleleng mangolu ibana.

5 Musa 23

23:1 Ndang jadi pagodangon ni manang ise jolma ni amana, ala naung sampur amana i tu nasida.

23:2 Ianggo halak na tarlisat, manang na pinaias ndang jadi masuk tu huria ni Jahowa.

23:3 Anak gampang pe ndang jadi masuk tu huria ni Jahowa; nang sundut na pasampuluhon ndang jadi masuk tu huria ni Jahowa.

23:4 Halak Amon pe manang Moab ndang jadi masuk tu huria ni Jahowa, nang sundut na pasampuluhon ndang jadi masuk sian nasida tu huria ni Jahowa ro di saleleng lelengna.

23:5 Ala so ditomutomuhon nasida tu hamu sagusagu manang aek di dalan, uju ruar hamu sian Misir, lam diupai tahe mangalo hamu si Bileam, anak ni si Beor sian Petor di Padang Ram, asa buraanna hamu.

23:6 Alai ndang olo Jahowa Debatam manolopi hata ni si Bileam, lam dipabalik Jahowa, Debatam bura i gabe pasupasu di ho, ala holong roha ni Jahowa, Debatam mida ho.

23:7 Ndang jadi luluanmu hadameonnasida manang hasonanganna saleleng ho mangolu ro di salelenglelengna.

23:8 Ndang jadi marbiasbias roham anggo mida halak Edom, ai haham do ibana; ndang jadi marbiasbias roham nang mida halak Misir, ai halak dagang do ho na jolo di tanona.

23:9 Pinomparnasida na tubu patolusunduthon, jadi do i masuk tu huria ni Jahowa.

23:10 Molo borhat ho tu parporangan laho mangalo dompak musum, ingkon ramotanmu dirim maradophon nasa hajahaton.

23:11 Tung sura adong di tongatongamu sahalak na ramun, ala bolong bonina bornginna i, ingkon ruar ibana tu balian ni parsaroan, jala ndang jadi ulahanna masuk tu parsaroan i.

23:12 Ia dung marhira bodari ingkon didionna dagingna di bagasan aek, ia dung mate mata ni ari, jadi ma ibana masuk tu parsaroan i.

23:13 Ingkon adong huhut di ho di balian ni parsaroan sada inganan sitopotonmu laho haduru.

23:14 Angkup ni angka sinjatam ingkon adong di ho sada siuksiuk, asa ia laho ho haduru ingkon pangkeonmu do i mangkali godunggodung, jala hungkupanmu muse ginagatmu.

23:15 Ai Jahowa, Debatam mardalandalan di tongatonga ni parsaroanmu laho paluahon ho sian parmaraan laho pasahathon anggo musum tu ho. Dibahen i ingkon badia do parsaroanmu, asa unang adong idaonna di tongatongami tau haurahon, asa unang manginsurut Ibana sian lambungmu.

23:16 Ndang jadi pasahatonmu sada hatoban mulak tu tangan ni indukna, dung sapala maporus ibana tu ho tumadingkon indukna.

23:17 Pasombu ibana maringan di lambungmu di tongatongamu, di inganan pinillitna i di bagasan sada sian angka hutam, marguru tu lomo ni rohana, ndang jadi rupaonmu ibana.

23:18 Ndang jadi adong sian boru ni halak Israel na pasahathon dirina mangulahon parmainanon, jala ndang jadi adong anak ni halak Israel na pasahathon dirina mangulahon parmainanon.

23:19 Ndang jadi boanonmu upa parmainanon, manang hepeng tuhor ni sada biang masuk tu joro ni Jahowa, Debatam bahen garar ni bagabaga manang dia; ai marbiasbias do roha ni Jahowa, Debatam mida duansa.

23:20 Ndang jadi jaloonmu bunga sian donganmu, manang bunga ni hepeng, manang bunga ni sipanganon, manang bunga ni ugasan dia pe, na somal marbunga dibahen halak.

23:21 Anggo sian halak sileban jadi do jaloonmu bunga, alai anggo tu donganmu ndang jadi bahenonmu marbunga manang aha, asa pasupasuon ni Jahowa Debatam ho di saluhut na jinama ni tanganmu, di tano sitopotonmi bahen partalianmu.

23:22 Tung sura naung marbagabaga, ho tu Jahowa, Debatam, ndang jadi ho marlemba manggararsa; ai sai na tungguon ni Jahowa, Debatam do i sian ho, jala gabe dosa do i di ho, tung sura.

23:23 Alai tung sura unang nian ho marbagabaga ndang dosa i di ho.

23:24 Alai anggo hata naung puas sian pamanganmu, ingkon ingotonmu do i jala ulahononmu, songon naung pinorbagabagam tu Jahowa, Debatam sian lomo ni roham, pola naung pamanganmu marbagabagahon.

23:25 Molo masuk ho tu bagasan porlak anggur ni donganmu, jadi do panganonmu parbue ni anggur guru sombu ni roham, maradu mahap ho; alai ndang jadi bahenonmu tu hadanghadanganmu nanggo sada.

23:26 Molo mamolus ho sian hauma ni donganmu sigotilon, jadi do gotilonmu biurna dohot tanganmu, alai ndang jadi pola sabihononmu sasabim tu hauma ni donganmu.

5 Musa 24

24:1 Tung sura sada baoa mambuat sada parompuan bahen jolmana, hape marsogo ni roha ibana muse mida nasida, ala adong jumpangsa di nasida manang aha tau tihasna, ingkon suratonna di nasida sada surat sirang jala lehononna do i tu bagasan tangannasida, laos palahoonna nasida sian jabuna.

24:2 Ia dung ruar nasida sian jabuna i, laos laho gabe jolma ni halak na asing.

24:3 Hape magigi muse dohot baoa na asing i mida nasida, laos disurathon di nasida sada surat sirang, jala dilehon tu tangannasida i jala dipalaho nasida sian jabuna; manang tung sura mate baoa na asing i, naung mambuat nasida bahen jolmana:

24:4 Ndang tarbahen harajaanna parjolo i, naung marsuru nasida mulak, mambuat nasida muse naeng gabe jolmana, dung gabe ramun nasida, ai marbiasbias do roha ni Jahowa disi, jala ndang jadi mardosa bahenonmu tano naung nilehon ni Jahowa, Debatam tu ho bahen partalianmu.

24:5 Tung sura sada baoa nambura mangalap jolmana, ndang jadi borhat ibana tu parporangan, jala ndang jadi dais tu ibana manang aha ulaon rodi, ingkon malua ibana patureture bagasna sataon lelengna, asa marlas ni roha ibana rap dohot jolmana, na binuatna i.

24:6 Ndang jadi jaloon bahen singkoram batu pandudaan partoru manang parginjang, ai hira hosa ni halak sandiri jinalona disi bahen singkoram.

24:7 Tung sura adong jumpang sada baoa na mamangus sahalak sian angka hahaanggina, sian halak Israel tahe, laos diparhatoban ibana manang digadis, ingkon marutang hosa pamangus sisongon i, asa tung siap bahenonmu hajahaton sian tongatongami.

24:8 Ramoti dirim taringot tu sahit puru, mangaringkoti situtu mangulahon saluhut hombar tu na pinodahon ni angka malim dohot halak Lepi tu hamu; songon na hutonahon i tu nasida, ingkon songon i do ringkotanmuna mangulahon.

24:9 Sai ingot ma na binahen ni Jahowa, Debatam tu si Miryam, di tongan dalan, uju na ruar i hamu sian Misir!

24:10 Tung sura dipautang ho donganmu di manang aha, ndang jadi ho masuk tu bagasan jabuna laho manjalo singkoram sian ibana.

24:11 Ingkon tinggal ho jongjong di balian, jala baoa na pinautangmi ruar mandapothon ho, mamboan singkorami tu balian.

24:12 Alai tung sura baoa na pogos ibana, ndang jadi ho laho modom rap dohot singkoram nilehonna i.

24:13 Ingkon pasuangonmu tu ibana singkorami, disi mate mata ni ari, asa modom ibana marbulusan di bagasan ulosna sandiri, jala pasupasuonna ho, ingkon gabe hatigoranmu do i di adopan ni Jahowa, Debatam.

24:14 Ndang jadi rupaonmu anak gajian na mardangoldangol jala na pogos, manang sian hahaanggim manang sian halak dagang na maringan di tanomi, di bagasan sada sian angka hutam.

24:15 Ingkon jalojalo ganup ari lehononmu upana, jumolo asa mate ni ari, ala marsiak bagi ibana jala upana i do na pinarbaga ni rohana, unang pola sanga joujou ibana tu Jahowa mangalualuhon ho gabe dosa do i di ho.

24:16 Ndang jadi marutang hosa amaama ala angka anakna, angka anak i pe ndang jadi marutang hosa ala amana, ingkon ganup ala dosana sandiri mate.

24:17 Ndang jadi papeolonmu uhum tu halak dagang dohot tu dakdanak na sopot so marama, jala ndang jadi buatonmu ulos ni parompuan na mabalu bahen singkoram.

24:18 Ingkon paingotingoton ni roham tahe, hatoban do ho na jolo di Misir, hape nunga ditobus Jahowa, Debatam ho sian i, ala ni do umbahen hudokkon ho mangulahon sisongon i.

24:19 Tung sura naung sun digotil ho sigotilonmi di haumam, hape lupa ho di sada tibalan tinggal di haumam, ndang jadi ho mulak mangalapsa, ingkon halak dagang, dakdanak na sopot so marama dohot parompuan na mabalu nampunasa, asa pasupasuon ni Jahowa, Debatam ho di saluhut ulaon ni tanganmu.

24:20 Ia dung suda dijungkiti ho parbue ni hau jetunmu, ndang jadi ulahanmu mandiori angka dangkana; ingkon halak dagang, dakdanak na sopot so marama dohot parompuan na mabalu nama nampunasa.

24:21 Ia dung suda ditapu ho parbue ni porlak anggurmu, ndang jadi ulahanmu manjomputi; halak dagang, dakdanak na sopot so marama dohot parompuan na mabalu nama nampunasa.

24:22 Ingkon paingotingoton ni roham do, hatoban do nang ho na jolo di tano Misir; ala ni do umbahen hudokkon ho mangulahon sisongon i.

5 Musa 25

25:1 Tung sura marparsalisian dua baoa, ingkon boanon do nasida tu adopan ni paruhuman pauhumhonsa, ingkon pintoran ma halak partigor, jala toruan do halak parjahat.

25:2 Tung sura patut hona pungkul halak parjahat i, ingkon dohonon ni panguhum ibana marsinggang, asa hona pungkul ibana di adopanna marguru tu hajahatonna godangna.

25:3 Opatpulu hali do na jadi ibana pungkulon, unang ganda, asa unang sai didatdati mamungkul ibana lobi sian i, atik tung magodangku maon pungkulpungkuli, gabe marlea donganmu di adopanmu.

25:4 Ndang jadi huntamonmu baba ni horbo, uju mardege ibana.

25:5 Molo tampak maringan halak na marhahamaranggi, hape mate sahalak sian nasida ndang tubuan anak, ndang jadi pamulion parompuan, jolma ni halak na mate bahen jolma ni halak ruar, ingkon anggina i do mareakkon nasida bahen jolmana pajongjongkon pomparan di hahana.

25:6 Ia anak buhabaju na tinubuhonna i ingkon marpanggoarhon goar ni amana na mate, asa unang pidom goarna i sian Israel.

25:7 Alai tung sura ndang lomo roha ni baoa i pagodangkon jolma ni hahana i, ingkon nangkok jolma ni hahana i tu harbangan ni huta i mandapothon angka sintua huhut mandok: Manjua do anggingki pajongjongkon goar ni hahana di Israel, ndang olo ibana mangabia ahu.

25:8 Dung i ingkon jouon ni angka sintua ni huta i ma ibana huhut mangapoi ibana; hape molo tong dipirhon rohana i mandok: Ndang lomo rohangku mangabia nasida.

25:9 Ingkon ro ma jumonok jolma ni hahana i tu lambungna di adopan ni angka sintua i, laos tanggalanna ma sipatuna sian patna jala tijuranna bohina, huhut dohononna mangalusi: Ingkon songon i do bahenon tu baoa, na so olo pajongjong pomparan tu hahana.

25:10 Jala ingkon dohonon ni halak goarna di Israel: Jabu ni halak naung tinanggalan sipatuna.

25:11 Molo marparsalisian dua baoa sama donganna, gabe ro tahop jolma ni na sahalak naeng paluahon sinondukna sian tangan ni na mambunu ibana, gabe disoro tanganna laos ditiop na niabitanna.

25:12 Ingkon gotaponmu tangan ni parompuan i, ndang jadi moralangalang roham.

25:13 Ndang jadi mardua batu timbangan ho peoponmu di bagasan hajutmu, sada na balga jala sada na metmet.

25:14 Ndang jadi mardua ampang ho di bagasan jabum, sada na balga sada na metmet.

25:15 Ingkon marbatu timbangan na botul jala na sintong ho, ingkon marampang na botul jala na sintong ho, asa leleng ho mangolu di tano, silehonon ni Jahowa, Debatam tu ho.

25:16 Ai marbiasbias do roha ni Jahowa, Debatam mida ganup jolma na mangulahon sisongon i, mida ganup jolma tahe na mangulahon hageduhon.

25:17 Ingkon paingotingoton ni roham do uhum na binahen ni halak Amalek tu ho di tongan dalan, uju na ruar i hamu sian Misir.

25:18 Na niambatambatna i ho di tongan dalan jala binununa sian ho luhut halak na mandate angka na ro sian pudi, uju na maheu ho jala loja, gabe so marhabiaran ibana tu Debata.

25:19 Ia dung marhasonangan ho, dibahen Jahowa, Debatam maradophon sude angka musum humaliang di tano silehonon ni Jahowa, Debatam tu ho bahen partalianmu, ingkon siaphononmu ma parningotan di halak Amalek sian toru ni langit; ndang jadi halupahononmu.

5 Musa 26

26:1 Ia dung masuk ho tu tano, silehonon ni Jahowa, Debatam tu ho bahen partalianmu, dung disoluk ho tano i laos maringan disi.

26:2 Ingkon buatonmu ma sian patumonaan ni sandok parbue ni tano i, na dapot ho sian tanomi, naung nilehon ni Jahowa, Debatam tu ho, jala pamasuhonmu do i tu bagasan ampang, jala boanonmu do i tu inganan sipilliton ni Jahowa, Debatam bahen inganan di Goarna.

26:3 Dung i ingkon topotonmu ma malim di angka ari uju i, jala dohononmu tu ibana: Na pabotohon ma ahu sadarion di adopan ni Jahowa, Debatam, naung masuk ahu tu tano, naung niuarihon ni Jahowa hian tu angka ompunami, lehononna tu hami.

26:4 Dung i ingkon buaton ni malim i ma hirang i sian tanganmu jala peakkononna do i di adopan ni langgatan ni Jahowa, Debatam.

26:5 Dung i dohononmu ma hatam mandok songon on di adopan ni Jahowa, Debatam: Halak Ram na madoado do anggo damang, dung i tuat ibana tu Misir, laos mardagangdagang disi, mardongan otik jolma, hape gabe bangso na bolon, na gogo jala na torop bilanganna ibana disi.

26:6 Alai ro ma halak Misir mambahen na so uhum tu hami, jala dirupa hami, jala diampehon ulaon na poran tu hami.

26:7 Jadi mangangguhi ma hami tu Jahowa, Debata ni ompunami, gabe ditangihon Jahowa do soaranami jala marpanatap rohana di pardangolan, hangaluton dohot hagogotan na huahap hami.

26:8 Dung i ditogihon Jahowa ma hami ruar sian Misir marhite sian tangan na gogo dohot marhite sian botohon na toltol dohot marhite sian hasonggoton bolon, mardongan angka tanda dohot halongangan.

26:9 Jala diboan hami sahat tu inganan on, jala dibasabasahon tu hami tano on, tano habaoran ni susu dohot situak ni loba.

26:10 Nuaeng pe, ida ma, ahu mamboan patumonaan ni parbue ni tano, na nilehonmi tu ahu, ale Jahowa! Laos tinggalhononmu ma ampangi di adopan ni Jahowa, Debatam jala marsomba ho di adopan ni Jahowa, Debatam.

26:11 Jala ingkon marlas ni roha ho mida sude na denggan naung nilehon ni Jahowa, Debatam tu ho dohot tu isi ni bagasmu; songon i ho ro di halak Lepi dohot halak dagang na di tongatongami.

26:12 Ia dung sun dipapungu ho sandok parpuluan ni gogo ni tanomu di taon patoluhon, i ma taon parpuluan, jala ia dung dilehon ho tu halak Lepi, tu halak dagang, tu dakdanak na sopot so marama dohot tu parompuan na mabalu, asa mangan nasida di bagasan angka hutam jala bosuran.

26:13 Ingkon dohononmu ma di adopan ni Jahowa, Debatam: Nunga hupaholang ugasan na badia sian jabu i, angkup ni nunga hulehon tu halak Lepi, tu halak dagang, tu dakdanak na sopot so marama dohot tu parompuan na mabalu, hombar tu sandok tonami, naung tinonahonmu tu ahu, ndang hulaosi nanggo sada sian angka tonami, jala ndang huhalupahon.

26:14 Ndang adong na hupangan sian i uju di hinamagongku, jala ndang adong hubuati sian i laho paramunhon, jala ndang adong hulehon sian i bahen boan ni na mate. Nunga hutangihon soara ni Jahowa, Debatangku, nunga hubahen sandok hombar tu na tinonahonmi tu ahu.

26:15 Sai manatap ma Ho sian ingananmu na badia i, sian banua ginjang i, sai pasupasu huhut bangsom Israel dohot tano naung nilehonmu tu hami, songon naung niuarihonmu tu ompunami, tano habaoran ni susu dohot situak ni loba.

26:16 Apala sadarion ma Jahowa, Debatam manonahon tu ho, ingkon ulahononmu angka aturan on dohot uhum, ingkon radotanmu jala ulahononmu angka i sian nasa roham dohot sian nasa ateatem.

26:17 Nunga diparbaga ho sadarion ingkon Jahowa do Debatam, jala ingkon marparange ho di angka dalanna, jala ingkon radotanmu angka aturanna, angka tonana dohot uhumna, jala ingkon tangihononmu soarana.

26:18 Jahowa i pe nunga marbagabaga tu ho sadarion, ingkon ho do gabe bangso hapunjunganna, songon naung pinarbagabagana i hian tu ho, jala ingkon radotanmu sude angka tonana.

26:19 Asa Ibana mambahen ho tumimbul sian saluhut bangso parbegu, angka naung jinadihonna bahen pujipujian dohot marbarita dohot bahen hamuliaon, jala asa ho gabe bangso na badia di Jahowa, Debatam, songon naung nidokna hian.

5 Musa 27

27:1 Dung i ro ma hata ni si Musa dohot angka sintua ni Israel mandok tu situan na torop i: Radoti hamu ma sandok tona, angka na hutonahon i tu hamu sadarion.

27:2 Ia dung ditaripari hamu Jordan sahat tu tano silehonon ni Jahowa, Debatam tu ho, ingkon pajongjongonmu ma di ho angka batu na bolon, jala sampangonmu angka i dohot hapur.

27:3 Ingkon uhirhononmu ma tusi sude hata ni patikon, dung taripar ho, asa tung masuk ho tu tano silehonon ni Jahowa, Debatam tu ho, tano habaoran ni susu dohot situak ni loba do i, songon naung pinorbagabaga ni Jahowa, Debata ni angka ompum, hian tu ho.

27:4 Ia dung ditaripari hamu Jordan, ingkon pajongjongonmuna ma angka batu on, songon na hutonahon i di hamu sadarion, di atas dolok Ebal, jala sampangonmu do angka i dohot hapur.

27:5 Ingkon pajongjongonmu huhut disi sada langgatan di Jahowa, Debatam, sada langgatan sian batu, ndang jadi mangonai tusi anggo bosi.

27:6 Ingkon sian batu angka na so nidakdak pajongjongonmu langgatan ni Jahowa, Debatam, asa mamelehon di atasna angka pelean situtungon di Jahowa, Debatam.

27:7 Ingkon pelehononmu huhut angka pelean hamauliateon, laos panganonmu disi, jala marlas ni roha ho di adopan ni Jahowa, Debatam.

27:8 Ingkon torang jala paltak situtu uhirhononmu tu angka batu i sude hata ni patikon.

27:9 Dung i ro ma hata ni si Musa dohot angka malim ro di halak Lepi mandok tu sandok Israel: Hohom be ma hamu patangitangihon ale Israel! Apala sadarion ma na niain ni Jahowa, Debatam ho bahen bangsona.

27:10 Dibahen i sai tangihon ma soara ni Jahowa, Debatam jala ulahon angka tonana dohot aturanna, angka na hutonahon i tu ho sadarion.

27:11 Dung i ro muse hata ni si Musa tu bangso i di na sadari i songon on:

27:12 Angka marga on ingkon jongjong di atas dolok Gerizim manjouhon pasupasu tu bangso i, ia dung ditaripari hamu Jordan: Simeon, Lepi, Juda, Isasar, Josep dohot Benjamin.

27:13 Jala angka marga on ingkon jongjong di atas dolok Ebal mangkonahon torutoru: Ruben, Gad, Aser, Zebulon, Dan dohot Naptali.

27:14 Dung i pangiaron ni halak Lepi ma soaranasida i mandok tu sandok bangso Israel:

27:15 Hona toru ma manang ise na mambahen sada ganaganaan, na niuhir manang na tinuang, hagigian ni Jahowa, jadijadian ni tangan ni halak pande, jala dipajongjong do i di inganan na buni! Dung i alusan ni sandok bangso i ma, mandok: Amin!

27:16 Hona toru ma manang ise na ro lea mida amana manang inana. Dung i dohonon ni sandok bangso i ma: Amin!

27:17 Hona toru ma manang ise na paorot talutuk tu hauma ni donganna! Dung i dohonon ni sandok bangso i ma: Amin!

27:18 Hona toru ma manang ise na mangaliluhon halak na mapitung di dalan! Dung i dohonon ni sandok bangso i ma: Amin!

27:19 Hona toru ma manang ise na papeol uhum tu halak dagang, tu dakdanak na sopot so marama dohot tu parompuan na mabalu! Dung i dohonon ni sandok bangso i ma: Amin!

27:20 Hona toru ma manang ise na pagodang jolma ni amana, ala naung sampur amana tu nasida! Dung i dohonon ni sandok bangso i ma: Amin!

27:21 Hona toru ma manang ise na sampur tu manang dia pinahan! Dung i dohonon ni sandok bangso i ma: Amin!

27:22 Hona toru ma manang ise na sampur tu ibotona, tubu ni amana manang tubu ni inana! Dung i dohonon ni sandok bangso i ma: Amin!

27:23 Hona toru ma manang ise na sampur tu simatuana boru! Dung i dohonon ni sandok bangso i ma: Amin!

27:24 Hona toru ma manang ise na manodos donganna marsibuni! Dung i dohonon ni sandok bangso i ma: Amin!

27:25 Hona toru ma manang ise na manjalo sisip, laho mamutus hosa ni halak mandurushon mudar na so marpipot! Dung i dohonon ni sandok bangso i ma: Amin!

27:26 Hona toru ma manang ise na so mangkajongjongkon angka hata ni patikon laho mangulahon angka i! Dung i dohonon ni sandok bangso i ma: Amin!

5 Musa 28

28:1 Molo tung tinggil situtu roham tumangihon soara ni Jahowa, Debatam, mangaringgas roham mangulahon patikna, angka na hutonahon i tu ho sadarion, jadi pabangkiton ni Jahowa, Debatam ma ho tumimbul sian nasa bangso di tano on.

28:2 Songgop ma huhut tu ho sude angka pasupasuon jala pasahatonna tu ho, molo ditangihon roham soara ni Jahowa, Debatam.

28:3 Pasupasuonna ma ho di bagasan huta, pasupasuonna ho huhut di ladang.

28:4 Pasupasuonna parbue ni bortianmi dohot parbue ni tanomi, pasupasuonna ma sinur angka dorbiam, lombum dohot birubirum.

28:5 Pasupasuonna ampangmu dohot pangudianmu.

28:6 Pasupasuonna ho laho bongot, jala pasupasuonna ho laho ruar.

28:7 Pasahaton ni Jahowa do angka musum angka na hehe mangalo ho, asa marragean nasida di adopanmi; marhite sian sada dalan nasida borhat mandopang ho, ingkon marhite sian pitu dalan nasida maporus maradophon ho.

28:8 Dokkonon ni Jahowa ma pasupasu mandongani ho di bagasan angka sopom dohot di saluhut na jinama ni tanganmu, jala pasupasuonna do ho di tano na nilehon ni Jahowa, Debatam tu ho.

28:9 Pahoton ni Jahowa ma ho gabe bangsona na badia, songon naung niuarihonna hian tu ho, molo tung diradoti ho angka tona ni Jahowa, Debatam, jala marparange ho di angka dalanna.

28:10 Asa tung saluhut bangso di tano on marnida, naung targoar do ho tu Goar ni Jahowa, laos mabiar nasida mida ho.

28:11 Jala tumpahan ni Jahowa ma ho marlobilobi di na denggan, di parbue ni bortianmu, di sinur ni pinahanmu dohot di parbue ni tanomi di tano naung niuarihon ni Jahowa hian tu angka ompum, lehononna tu ho.

28:12 Buhaon ni Jahowa ma di ho parpeopan ni artana na denggan i, i ma langit i, laho mangalehon udan tu tanomi di tingki halehetanna, huhut mamasumasu sandok jadijadian ni tanganmu, gabe ho parsalian ni torop bangso parbegu, alai anggo ho na so tupa marsali.

28:13 Jala pabangkiton ni Jahowa ma ho gabe ulu (ihutan), unang gabe ihur (pangihutihut); ingkon tongtong do ho di ginjang, ndang jadi ho di toru, molo tung ditangihon roham angka patik ni Jahowa, Debatam, angka na hutonahon i tu ho sadarion ringkotanmu jala ulahononmu.

28:14 Molo tung so manimbil ho tu siamun manang tu hambirang sian saluhut hata, angka na hutonahon i tu hamu sadarion, unang tung ihuthononmu angka debata sileban laho marsomba tusi.

28:15 Alai tung sura so ditangihon ho soara ni Jahowa, Debatam, asa mangaringkoti mangulahon angka uhumna dohot aturanna, angka na hutonahon i tu ho sadarion, songgop ma tu ho sude angka torutoru on jala mangonai tu ho.

28:16 Hona toru ho di bagasan huta, jala hona toru ho di ladang.

28:17 Hona toru ampangmu dohot pangudianmu.

28:18 Hona toru parbue ni bortianmu dohot parbue ni tanomi, nang anak poso ni lombum dohot birubirum.

28:19 Hona toru ho laho bongot jala hona toru ho laho ruar!

28:20 Tongoson ni Jahowa ma tu tongatongamu torutoru, hagaoron dohot hinamago di saluhut na jinama ni tanganmu, na niulami, paima sun siap ho jala mago magira, binahen ni hinaroa ni angka pambahenanmu, ala na tinadingkonmi Ahu.

28:21 Sai marnehetnehet do di tongatongamu begu antuk bahenon ni Jahowa, paima siaphononna ho sian tano sitopotonmu nuaeng bahen partalianmu.

28:22 Toruan ni Jahowa ma ho marhite sian sahit tiarap, panepane, rojan, arun dohot marhite sian podang, sirara dohot antingano, sai lotonganna do ho paima mago ho.

28:23 Ianggo langit na di atas ulum gabe tombaga, jala tano na di torum gabe bosi.

28:24 Lehonon ni Jahowa ma horsik dohot orbuk singkat ni udan tu tanomi, madabu do i tu ho sian langit, paima mago ho.

28:25 Pasahaton ni Jahowa ma ho marragean di adopan ni musum; marhite sian sada dalan ho borhat mandopang musum, hape marhite sian pitu dalan ho maporus maradophon ibana, jala marsipal ho bahenonna di sude harajaon na di tano on.

28:26 Ia bangkem ingkon gabe sipanganon di sandok pidong na di toru ni langit dohot di binatang na di tano on, jala ndang adong nanggo sahalak na olo mangalele.

28:27 Toruan ni Jahowa ma ho marhite sian puru Misir, dohot marhite sian baro, gurap dohot rasa na so hadaonan.

28:28 Toruan ni Jahowa ma ho marhite sian roha na rintik dohot na lalaen, tole marhite sian hapitungon.

28:29 Jadi ingkon dadapdadap ma ho di hos ni ari, songon pandadapi ni halak na mapitung di haholomon, jala ndang mardohar ho di angka dalanmu, ingkon ripe rupaon jala pupusan ho saleleng ho mangolu, jala so adong sipalua di ho nanggo sahalak.

28:30 Olionmu nian sada parompuan bahen jolmam, hape halak na asing marjolmahon; pajongjongonmu do nian sada jabu, alai ndang sanga ingananmu; pungkaonmu do nian sada porlak anggur, hape ndang sanga panganonmu parbuena.

28:31 Seaton ni halak ma lombum di adopan ni matam, hape ndang panganonmu sian i; laumon ni halak do halodem sian jolom, hape ndang pasuangonna tu ho; ripe tabanon ni angka musum do birubirum, jala so adong sipalua di ho nanggo sahalak.

28:32 Angka anakmu dohot borum pasahatonna tu bangso na asing, paidaidaon ni matam maradu lotop binahen ni siholmu tu nasida manipat ari, hape ndang marnangon tanganmu martangiang tu Debata.

28:33 Ia parbue ni tanomi ro di sude na hinangaluthonmi, suda do i panganon ni sada bangso na so tinandam, ingkon ripe rupaon jala pupusan ho saleleng ho mangolu.

28:34 Ingkon mago roham bahenon ni panuluthon ni matam, paidaida saluhutna i.

28:35 Toruan ni Jahowa ma ho marhite sian puru na rahat di ulu ni totmu dohot di haehaem, angka na so hadaonan olat ni palak ni patmu sahat ro di pakpak ulum.

28:36 Pabalion ni Jahowa ma ho rap dohot rajam, na pinabangkitmi gumomgom ho tu sada bangso parbegu, na so tinandam jala na so tinanda ni angka ompum, jadi oloanmu ma disi angka debata sileban sian hau dohot sian batu.

28:37 Jala ingkon gabe hagigian ho, gabe pambuatan umpama dohot alingalingan di tongatonga ni saluhut bangso, habalianmu bahenon ni Jahowa.

28:38 Godang do nian boni boanonmu ruar manaburhon tu ladangmu, hape otik do papunguonmu, ai suda do i gagaton ni sihapor.

28:39 Pungkaonmu do nian angka porlak anggur jala pauliulionmu, hape ndang sanga inumonmu anggur sian i manang tapuonmu parbuena, ai suda do i panganon ni gulokgulok.

28:40 Tubu do nian di ho angka hau Jetun di saluhut tanomi humaliang, alai ndang tagamon miahanmu dagingmu dohot miak, ai marurus boti do angka parbue ni hau Jetunmu.

28:41 Tubuhononmu do nian angka anak dohot boru, hape ndang adong tinggal anggo di lambungmu, ai ingkon mardalan tu habuangan do nasida.

28:42 Suda do palpalan ni tamponok sude hau sinuanmu dohot parbue ni tano i.

28:43 Ia halak dagang na di tongatongami lam leleng ingkon lam naek manindi ho, alai anggo ho lam leleng ingkon lam surut do.

28:44 Balik ibana pasali ho, alai anggo ho ndang tagamon parsalianna; ibana balik gabe ulu, alai anggo ho gabe ihur.

28:45 Sai na songgop do tu ho saluhut torutoru on jala lotonganna ho, jala mangonai tu ho, paima siap ho, ala na so tinangihonmu soara ni Jahowa, Debatam, mangaradoti angka patikna dohot aturanna, angka na tinonahonna tu ho.

28:46 Ingkon gabe tanda dohot halongangan angka i di ho dohot di pinomparmu ro di salelenglelengna.

28:47 Luhutna i ala na so nioloanmu Jahowa, Debatam, mardongan las ni roha dohot sonang ni roham, mida hinagodang ni saluhutna i.

28:48 Ingkon marpandapotan nama ho tu musum, angka sisuruon ni Jahowa mangalo ho, pataontaon haraparon, hauason, parsaemaraon dohot hahurangan marragamragam, jala pampeon ni Jahowa do auga bosi tu rungkungmu, paima agoonna ho.

28:49 Boanon ni Jahowa ma sada bangso parbegu sian na dao, sian ujung ni tano on mangalo ho, songon parhabang ni pidong raja wali, sada bangso na so niantusanmu pangkulingna.

28:50 Sada bangso na murhing marbohi, na so moralangalang mida halak na tuatua, jala na so marasi ni roha mida dolidoli.

28:51 Suda do panganonna anak ni pinahanmu dohot parbue ni tanomi, paima sun siap ho, ndang tebahononna di ho eme, anggur, miak, angka anak ni lombum dohot birubirum, paima sun siap ho bahenonna.

28:52 Jala tarsosak ho bahenonna di saluhut angka hutam, paima maloha dibahen parikmu angka na timbo jala na togu, pangatauan ni roham nian di sandok tanomi; tongon tahe tarsosak do ho bahenonna di saluhut angka hutam di sandok tanomi, silehonon ni Jahowa, Debatam tu ho.

28:53 Lam panganonmu do parbue ni bortianmu sandiri, sibuk ni angka anakmu dohot borum, angka naung nilehon ni Jahowa, Debatam tu ho, binahen ni hagogotan dohot pardangolan na sinosakkon ni angka musum tu ho.

28:54 Gari baoa na buas hian di tongatongamu jala na margadombus situtu, somor pamerengna mangiburu mida hahaanggina dohot mida jolmana tuan laenna hian dohot mida pasipasi ni anakna angka na tinggal dope mangolu.

28:55 Asa unang nian lehononna tu sada sian nasida sian sibuk ni anakna sandiri na pinanganna; ala so adong teba di ibana agia aha di bagasan hagogotan dohot pardangolan, na pinasosaksosak ni musumi ho di bagasan saluhut angka hutam.

28:56 Gari parompuan na buas hian di tongatongamu jala na margadombus, pola ndang somal mangojakkon palak ni patna tu tano dibahen pargadombusonna dohot buasna, somor matana mangiburu mida baoa bangunan ni rohana dohot mida anakna dohot mida boruna.

28:57 Unang nian lehononna tusi pusok ni posoposo naung ruar sian holangholang ni patna, manang mida posoposo naung tinubuhonna i, ai naeng do i panganonna di sihabunian, ala hurangan ibana di saluhutna, di bagasan hagogotan dohot pardangolan na pinasosaksosak ni musumi ho di bagasan angka hutam.

28:58 Molo tung so ringkotanmu mangulahon saluhut hata ni patikon, angka na tarsurat di bagasan buku on, asa marhabiaran ho tu Goar na marmulia on dohot na songkal, i ma Jahowa, Debatam.

28:59 Marhasurungan ma torutoru tu ho dohot tu pinomparmu bahenon ni Jahowa, torutoru angka na bolon dohot na tongtong, ro di angka sahit na rahat jala na leleng honahononna tu ho.

28:60 Jala marsibalik mangonai tu ho bahenonna saluhut sahit na masa di Misir, angka na hinabiaranmu na jolo, i ma angka na mangonai tu ho.

28:61 Tole muse saluhut sahit dohot torutoru angka na so tarsurat di bagasan angka buku patikon, pasonggopon ni Jahowa do i tu ho, paima siap ho.

28:62 Jadi otik nama jolma tinggal sian hamu, atik pe tudoshon bintang na lohot di langit hinatoropmu na jolo, ala so ditangihon ho soara ni Jahowa, Debatam.

28:63 Jadi ia songon i las ni roha ni Jahowa mida hamu na jolo, mambahen uhum na denggan tu hamu dohot patorophon hamu, suang songon i marlas ni roha Jahowa mida hamu laho mangago dohot maniaphon hamu, jala butbutanna hamu sian tano simasukanmuna nuaeng bahen partalianmu.

28:64 Ai paserahon ni Jahowa ma ho tu tongatonga ni angka bangso, sian ujung ni tano on na sada tu ujungna na sadanari, jadi oloanmu ma disi debata sileban sian hau dohot sian batu, angka na so tinandam hian manang angka ompumu pe.

28:65 Angkup ni ndang tagamon marhasonangan ho di tongatonga ni angka bangso i, jala ndang adong pangulonan di palak ni patmu, ai lehonon ni Jahowa do tu ho disi roha na tongtong godoron dohot mata na rondaron dohot ateate na marpandelean.

28:66 Jadi gantung nama ngolum di obuk sada di adopanmu, jala marhatahuton ho borngin dohot arian, jala ndang be nalom roham di ngolum.

28:67 Manogotna i dohononmu: Oe aut haru bodari ma nian! Jala bodarina i dohononmu: Aut haru torang ari ma nian! Binahen ni biar ni roham do i, na mambiarbiari ho dohot binahen ni hinamago angka na niida ni matam.

28:68 Dung i mulak ho tu Misir boanon ni Jahowa di bagasan angka parau, sian dalan naung pola hupaboa nian tu ho: Ndang jadi be idaonmu i, jala gadison do hamuna disi tu angka musumuna bahen hatoban baoa dohot parompuan nian, hape ndang adong halak na olo manuhor.

28:69 On do hata ni parpadanan na nidokkon ni Jahowa tu si Musa bahenonna tu halak Israel di tano Moab, di balik ni parpadanan naung binahenna i tu nasida di Horeb.

5 Musa 29

29:1 Dung i dipaluhut si Musa ma sandok Israel jala didok tu nasida: Nunga diida hamu sude naung binahen ni Jahowa di adopan ni matamuna di tano Misir tu si Firaun dohot tu sude naposona dohot tu sandok tanona:

29:2 Angka pangunjunan bolon, angka naung niida ni matamu, angka tanda dohot halongangan na bolon i!

29:3 Hape laos so dilehon Jahowa dope tu hamu roha na marateatehonsa manang mata na marnidasa, manang pinggol na umbegesa rasirasa sadarion.

29:4 Jala Ahu mangiringiring hamu opatpulu taon lelengna di halongonan, ndang pola buruk ulosmuna di dagingmuna, sipatum pe ndang buruk di patmu.

29:5 Ndang mangan sagusagu hamu jala ndang minum anggur hamu, manang siinumon na horas, asa tung diboto hamu, Ahu do Jahowa, Debatamuna i.

29:6 Jadi dung sahat hamu tu inganan on, ruar ma si Sihon, raja di Hesbon dohot si Og, raja di Basan naeng manjumpangkon hita laho marmusu, hape talu do nasida itabahen.

29:7 Laos italaum do tanonasida i, jala italehon do i tu halak Ruben, Gad dohot tu na satonga marga Manasse bahen partalianna.

29:8 Antong ringkoti hamu ma hata ni parpadanan on, jala ulahon hamu angka i, asa marsihohot rohamuna di sude siulahononmuna.

29:9 Impi do hamu luhutna jongjong sadarion di adopan ni Jahowa, Debatamuna i, angka indukmuna, angka margamuna, angka sintuamuna, angka panuturimuna ro di sandok Israel sadasada.

29:10 Angka dakdanakmuna, angka jolmamuna, ro di halak dagang na di tongatonga ni parsaroanmu, olat ni halak sitaha sobanmu ro di halak sitahu tapianmu.

29:11 Asa masuk ho tu bagasan parpadanan binahen ni Jahowa, Debatam, dohot tu bagasan parbulanon, na binahen ni Jahowa, Debatam tu ho sadarion.

29:12 Asa Ibana pahothon ho sadarion gabe bangsona, jala Ibana gabe Debatam, songon naung pinarbagana i hian tu ho, jala songon naung niuarihonna tu angka ompum, si Abraham, si Isak dohot si Jakkob.

29:13 Ai ndada holan tu hamu ahu mambahen parpadanan dohot parbulanon.

29:14 Tung tu sude do tahe angka na dison jongjong rap dohot hami di adopan ni Jahowa. Debatanta, dohot tu sude angka na so dison sadarion rap dohot hita.

29:15 Ai tangkas do diboto hamu na maringan i hita na jolo di tano Misir, jala na itabolusi tongatonga ni bangso parbegu, angka na binolusmuna i.

29:16 Jadi nunga diida hamu biasbias angka na niulahonnasida i, ro di ajiajiannasida sian hau dohot batu, sian perak dohot sere, angka na pineopnasida i.

29:17 Dibahen i sai unang ma adong di tongatongamuna, nanggo sahalak baoa, manang parompuan, manang halak na saompu manang na samarga, tung marbalik rohana sadarion sian Jahowa, Debatanta i, asa laho mangoloi angka debata ni angka bangso on, asa unang adong di tongatongamuna urat na martumburhon na paet dohot pogu.

29:18 Tung sura pe binegena hata ni parbulanon on, lam dipasupasu dope dirina di bagasan rohana, ninna do: Ingkon marhasonangan do ahu nang pe ahu mardalan di hatangkangon ni rohangkon, asa rap mago halak na marlobilobi na uasan.

29:19 Ndang tagamon olo Jahowa marpangulahi rohana mida ibana, ingkon marpiarpiar situtu ma rimas ni Jahowa dohot pangiburuonna mida baoa sisongon i, jala ingkon manginona tu ibana saluhut torutoru, angka na tarsurat di bagasan buku on, jala siaphonon ni Jahowa goarna sian toru ni langit i.

29:20 Ingkon papulihon ni Jahowa huhut ibana sian saluhut marga ni Israel mambahen marhinamago, hombar tu saluhut torutoru ni parpadanan angka na tarsurat di bagasan buku patikon.

29:21 Pola dohonon ni sundut na soluk, anakmuna i tahe, angka na hehe dung salpu hamu, ro di halak sileban angka na ro sian tano na dao, molo diida nasida torutoru dohot parsahiton, angka na hinonahon ni Jahowa tu tano on.

29:22 Naung gabe barerang dohot sira naung matutung sandok tanona, tung na so tarsabur be, jala ndang martumbur disi agia aha, jala ndang tubu disi agia aha ingkau rata, suman tahe tu harorongrong ni Sodom, Gumora, Adma dohot Zeboim, angka naung marongrong dibahen Jahowa di bagasan rimasna dohot di bagasan parpiarpiar ni murukna.

29:23 Dung i dohonon ni sude angka bangso parbegu ma: Boasa tung songon i ulaning bahenon ni Jahowa tu tano on? Aha do ulaning parbonsiran ni parpiarpiar ni rimas na bolon on

29:24 Jadi dohonon ni halak ma mangalusi: Ala na tinadingkonnasida parpadanan na binahen ni Jahowa, Debata ni ompunasida i, na binahenna tu nasida, uju Ibana manogihon nasida ruar sian tano Misir.

29:25 Hape laho do nasida musengani mangoloi angka debata sileban, huhut marsomba tusi; debata angka na so tinandanasida i, jala na so tinurpukkonna tu nasida.

29:26 Dibahen i marsigorgor ma rimas ni Jahowa mida tano on, gabe manginona tusi saluhut torutoru, angka na tarsurat di bagasan buku on.

29:27 Jadi disiaphon Jahowa ma nasida sian tanonasida i di bagasan murukna dohot di bagasan parpiarpiar ni rimasna na godang i, jala diambolongkon nasida tu tano na asing, songon na andar sadarion.

29:28 Angka hahomion na buni, Jahowa Debatanta do nampunasa, alai anggo pangungkapon angka na pinapatarna i, hita do nampunasa, nang angka anakkonta ro di salelenglelengna, laho mangulahon sude hata ni patikon.

5 Musa 30

30:1 Ia dung songgop tu ho sogot saluhut hata on, manang pasupasu manang torutoru, angka naung hupeakhon di adopanmu, hape dipasuang ho muse roham tu bagasan, di tongatonga ni saluhut bangso parbegu, haambolonganmu binahen ni Jahowa, Debatam.

30:2 Jala mulak roham sahat tu Jahowa, Debatam, jala ditangihon ho soarana, hombar tu saluhut na hutonahon i tu ho sadarion, songon i ho nang angka anakmu sian nasa roham dohot sian nasa ateatem.

30:3 Jadi marpangulahi ma roha ni Jahowa, Debatam mida habuanganmu, jala asi rohana mida ho, Ibana sandiri tahe papunguhon ho sian saluhut bangso parserahanmu, binahen ni Jahowa, Debatam.

30:4 Tung sura pe ambolong ho tu ujung ni langit sahali, ingkon papunguon ni Jahowa, Debatam ho sian i, jala alapanna ho sian i.

30:5 Jadi mulak ma ho boanon ni Jahowa, Debatam tu tano naung tinean ni angka ompum nian, asa teanonmu do i muse, bahenonna huhut uhum na denggan tu ho, jala tumpahanna ho tumorop sian angka ompum.

30:6 Dung i sunaton ni Jahowa, Debatam ma roham dohot roha ni pinomparmu laho mangkaholongi Jahowa, Debatam sian nasa roham dohot sian nasa ateatem, asa mangolu ho.

30:7 Alai honahonon ni Jahowa, Debatam ma saluhut torutoru on tu angka musum dohot tu angka na mangkagigihon ho, angka naung mangalele ho.

30:8 Alai mulak ma anggo ho jala tangihononmu soara ni Jahowa jala ulahononmu saluhut tonana, angka na hutonahon i tu ho sadarion.

30:9 Jadi marlobilobi ma ho tumpahan ni Jahowa, Debatam di saluhut ulaon ni tanganmu, di parbue ni bortianmu, di sinur ni pinahanmu dohot di parbue ni tanomi, manumpak tu na denggan; ai mangulahi ma Jahowa sumuang marlas ni roha mida ho manumpak tu na denggan, suang songon las ni rohana na jolo mida angka ompum.

30:10 Molo tung ditangihon ho soara ni Jahowa, Debatam mangaradoti angka patikna dohot aturanna, angka na tarsurat di bagasan buku patikon, molo tung mulak ho tu Jahowa, Debatam sian nasa roham dohot sian nasa ateatem.

30:11 Ai patikon, na hutonahon i tu ho sadarion, ndang masongkalhu di ho, manang maholangku.

30:12 Ndada di banua ginjang hata i, umbahen pola ingkon dohononmu: Ise ulaning singkatnami manaek tu banua ginjang, asa mangalapsa di hami dohot pabegehonsa tu hami, asa ulahononnami nian?

30:13 Jala ndada di bariba ni laut hata i, umbahen pola ingkon dohononmu: Ise ulaning singkatnami taripar laut mangalapsa di hami dohot patubegehonsa, asa ulahononnami nian?

30:14 Ai mansai donok do hata i di ho, di bagasan pamanganmu tahe dohot di bagasan roham, asa ulahononmu i.

30:15 Ida ma, nunga hupapillithon tu ho sadarion hangoluan dohot hatuaon, hamatean dohot hamagoan.

30:16 Ahu ma tutu mandokkon ho sadarion: Ingkon haholonganmu Jahowa, Debatam, jala marparange di angka dalanna, huhut mangaradoti angka patikna, angka aturanna dohot uhumna, asa pangoluonna ho jala patoroponna ho, jala pasupasuon ni Jahowa, Debatam ho di tano sitopotonmu nuaeng bahen partalianmu.

30:17 Alai tung sura marbalik roham, ndang olo ho manangihon, lam olo ho elaelaon marsomba tu angka debata sileban dohot mangoloi angka i:

30:18 Na pabotohon hian ma ahu tu hamu sadarion, ingkon mago situtu hamu, jala ndang tagamon leleng hamu mangolu di tano sitopotonmu, dung taripar Jordan bahen partalianmu.

30:19 Jouonku ma sadarion langit dohot tano gabe sitindangingku dompak hamu, paboa naung hupapillithon tu hamu hangoluan dohot hamatean, pasupasu dohot torutoru; dibahen i pillit ma hangoluan i, asa mangolu ho dohot pinomparmu sogot.

30:20 Asa haholonganmu Jahowa, Debatam, jala tangihononmu soarana, jala marsilohot roham tu Ibana, ai Ibana hangoluanmu hian dohot na paginjang umurmu, asa tongtong ho maringan, di tano, naung niuarihon ni Jahowa hian tu angka ompum, tu si Abraham, si Isak dohot si Jakkob, naeng lehononna tu nasida.

5 Musa 31

31:1 Dung i didatdati si Musa ma mangkatahon angka hata on tu sandok Israel.

31:2 Ninna ma mandok nasida: Boho saratus duapulu taon ahu marumur sadarion, ndang tarbahen ahu be laho ruar dohot laho bongot, ai nunga pola marlumba Jahowa tu ahu: Ndang tarbahen ho manaripari Jordan on.

31:3 Jahowa, Debatam sandiri taripar manguluhon ho, Ibana maniaphon angka bangso on di adopanmu, asa soluhonmu; ingkon si Josua tahe taripar manguluhon ho, songon naung nidok ni Jahowa hian.

31:4 Jadi bahenon ni Jahowa ma tu nasida, songon naung binahenna i tu si Sihon dohot tu si Og, angka raja ni halak Amori dohot tu tanonasida, naung siniaphonna i.

31:5 Ia dung dipasahat Jahowa angka nasida i di adopanmuna, ingkon bahenonmuna ma tu nasida hombar tu saluhut uhum, naung hutonahon i tu hamu.

31:6 Pir ma tondimuna jala marsihohot, unang tahuton hamu jala unang godoron rohamuna maradophon nasida, ai Jahowa, Debatam sandiri donganmu mardalan, ndang tagamon marsombusombu Ibana mida ho manang tadingkononna ho.

ᯇᯒᯪ᯲ ᯔ ᯖᯉᯬ᯲ᯑᯪᯔᯮᯉ ᯐᯞ ᯔᯒ᯲ᯘᯪᯂᯬᯂᯖᯬ᯲, ᯥᯉᯰ ᯖᯂᯮᯖᯉᯬ᯲ ᯂᯔᯮ ᯐᯞ ᯥᯉᯰ ᯎᯬᯑᯬᯒᯉᯬ᯲ ᯒᯬᯂᯔᯮᯉ ᯔᯒᯑᯇᯬ᯲ᯂᯉᯬ᯲ ᯉᯘᯪᯑ, ᯀᯤ ᯐᯂᯬᯋ, ᯑᯩᯅᯖᯔ᯲ ᯘᯉ᯲ᯑᯪᯒᯪ ᯑᯬᯝᯉ᯲ᯔᯮ ᯔᯒ᯲ᯑᯞᯉ᯲, ᯉ᯲ᯑᯰ ᯖᯎᯔᯉᯬ᯲ ᯔᯒ᯲ᯘᯔᯬ᯲ᯅᯮᯘᯔᯬ᯲ᯅᯮ ᯤᯅᯉ ᯔᯪᯑ ᯂᯬ ᯔᯉᯰ ᯖᯑᯪᯰᯂᯬᯉᯉᯬ᯲ᯉ ᯂᯬ.

31:7 Dung i dijou si Musa ma si Josua, jala ninna ma tu ibana di adopan ni sandok Israel: Pir ma tondim jala marsihohot, ai sahat ma anggo ho rap dohot bangso on masuk tu tano naung niuarihon ni Jahowa tu ompunasida, naeng lehononna tu nasida, jala ho do marsagihonsa tu nasida bahen partalianna.

31:8 Ai Jahowa sandiri mardalan di adopanmu, Ibana mandongani ho; ndang tagamon marsombusombu Ibana mida ho, manang tadingkononna ho; unang ho tahuton jala unang ho godoron!

31:9 Dung i disurathon si Musa ma patikon, jala dipasahat tu angka malim, pinompar ni Lepi, angka na mangusung poti parpadanan ni Jahowa, dohot tu sude angka sintua ni Israel.

31:10 Dung i ro ma hata ni si Musa tu nasida mandok: Dung salpu pitupitu taon, tongon di taon haluaon, di ari raya parlapelapean.

31:11 Molo ro sandok Israel tu adopan ni Jahowa, Debatam, di inganan sipillitonna i, ingkon dohononmu jahaon patikon tu adopan ni sandok Israel, begeon ni pinggolnasida.

31:12 Paluhut ma disi bangso i, angka baoa dohot inaina, angka dakdanak dohot halak dagang na di bagasan hutam, asa dibege nasida jala dapotan sipodaon, asa marhabiaran nasida tu Jahowa, Debatamuna i, jala diringkoti mangulahon saluhut hata ni patikon.

31:13 Asa dohot ianakhonnasida, angka na so umbotosa dope pabegebegehon jala dapotan sipodaon, asa marhabiaran nasida tu Jahowa, Debatamuna i, saleleng hamu mangolu di tano sitopotonmuna, dung taripar Jordan, bahen partalianmu.

31:14 Dung i ro ma hata ni Jahowa tu si Musa: Ida ma, nunga jumpang ne ajalmu, na mate ma ho; antong jou ma si Josua, jala jongjong ma hamu di bagasan undungundung parluhutan i, asa martona Ahu tu ibana. Jadi laho ma si Musa rap dohot si Josua, jala jongjong nasida di bagasan undungundung parluhutan i.

31:15 Jadi tarida ma Jahowa di bagasan undungundung i, di bagasan ombun na marsijongjong, di atas pintu ni undungundung i do marsijongjong ombun i.

31:16 Dung i ro ma hata ni Jahowa tu si Musa: Ida ma, na laho modom ma anggo ho, gabe top dohot angka ompum; hehe ma anggo bangso on jala marmainan mangihuthon tu angka debata sileban di tongatonga ni tano sibongotanna i, jala tadingkononnasida do anggo Ahu, jala oseonna do padan naung hubahen i tu nasida.

31:17 Jadi marsigorgor ma rimashu di ari na sasada i mida nasida, jala tadingkononku ma nasida, jala padaoonku ma Bohingku sian nasida, asa suda nasida marhinamago. Ia dung mangonai tu nasida angka hinamago godang dohot hagogotan marragamragam, dohononna ma di ari na sasada i: Nda manginona do angka hinamago on tu ahu, ala so di tongatongangku Debatangku?

31:18 Alai anggo Ahu tongtong do padaoonku situtu Bohingku di ari na sasada i, ala saluhut hajahaton na binahenna i, ala naung marbalik nasida tu angka debata sileban.

31:19 Nuaeng pe surathon hamu ma di hamu ende on, jala ajarhon ma i tu halak Israel jala memehon tu bagasan pamangannasida, asa ende on gabe sitindangi di Ahu dompak halak Israel.

31:20 Ia dung sahat nasida huboan masuk tu tano naung huuarihon hian tu ompuna, tano habaoran ni susu dohot situak ni loba, jadi dung mangan nasida jala bosuran maradu mokmok, marbalik ma nasida tu angka debata sileban jala marsomba tusi, alai toisanna ma anggo Ahu jala oseonna padan na hubahen i.

31:21 Jadi ia dung manginona tu nasida angka hinamago bolon dohot hagogotan marragamragam, ingkon ende on ma manindangi dompak nasida, ai ndang jadi lupa i sian pamangan ni pinomparna; ai tangkas do hutanda hian tubutubu ni rohana, naung pinajadijadi ni rohana hian sadarion, tagan so sahat dope nasida huboan tu tano naung huuarihon i.

31:22 Jadi disurathon si Musa ma ende on di na sadari i, jala diajarhon do i tu halak Israel.

31:23 Dung i ro ma hatana tu si Josua, anak ni si Nun mandokkon ingkon pir ma tondim jala marsihohot, ai ingkon ho do saut manogihon halak Israel masuk tu tano naung huuarihon i tu nasida, jala Ahu do mandongani ho.

31:24 Jadi dung sun tolhas disurathon si Musa angka hata ni patikon tu bagasan sada buku.

31:25 Ro ma hata ni si Musa tu halak Lepi, angka na mangusung poti parpadanan ni Jahowa:

31:26 Buat hamu ma buku patikon jala peakkon hamu ma i tu lambung poti parpadanan ni Jahowa, Debatamuna i, asa gabe sitindangi disi dompak ho.

31:27 Ai nunga tangkas hutanda panundalion ni roham dohot hatangkangon ni tangkuhukmu! Ida ma, gari uju mangolu dope ahu di tongatongamuna sadarion garina, sai manggunturi do hamu dompak Jahowa na sai laonna i, lam beha ma tagamon ia dung mate ahu?

31:28 Paluhut hamu ma tu lambungkon saluhut sintuamuna marmargamarga dohot panuturimuna, asa huhatahon, begeon ni pinggolnasida, angka hata on, ianggo ahu jouonku ma langit dohot tano on, gabe sitindangi dompak nasida.

31:29 Ai nunga tangkas hian huboto, ia dung mate ahu, ingkon marroha mago do hamu, jala manimbil sian dalan naung hutonahon tu hamu; jadi mangonai ma tu hamu hinamago di ujung ni angka ari, ala na niulahonmuna i sogo ni roha ni Jahowa laho pahehe rimasna marhite sian pambahenan ni tanganmuna.

31:30 Jadi dihatahon si Musa ma dibege pinggol ni sandok luhutan Israel angka hata ni ende on sahat ro di ujungna.

5 Musa 32

32:1 Paeleng ma pinggolmu, hamu ale angka langit! Ai naeng Ahu mandok hata, jala ho ale tano on, sai tangihon ma pangkataion ni pamanganku.

32:2 Ingkon manetehi nian songon udan sipaingothu, ingkon mabaor nian songon nambur pangkataionku, songon pangonai ni udan nene tu duhutduhut, jala songon pangonai ni simbur tu suansuanan.

32:3 Ai baritahononku ma Goar ni Jahowa; lehon hamu ma hatimbulon tu Debatanta i!

32:4 Tau partanobatoan do Ibana, na so hasurahan di pambahenanna, ai na tigor do luhut dalanna, sihaposan do Debata, ndang adong hageduhonna, na tigor jala na bonar do Ibana.

32:5 Na jahat do pambahenan ni sundut on, na marhajahaton dohot na geduk, ndada angka anakna nasida, gabe marhaurahon nasida.

32:6 Songon i do hape pamalosmu tu Jahowa, ho ale bangso na oto jala na so marbisuk? Nda Ibana do amangmu? Nda Ibana do manobus ho? Ibana tahe manjadihon dohot pauliuli ho.

32:7 Sai paingotingot ma angka ari na robi, parateatehon ma angka taon nahinan marsundutsundut! Marsungkun ma ho tu amangmu, asa ibana pabotohonsa tu ho, sungkun huhut angka na tuatua, asa nasida paboahon tu ho.

32:8 Uju disagihon Nasuntimbul tu angka bangso parbegu partalianna, uju Ibana mambahen parbolatan ni jolma manisia, disi ma dipaojak parbalohan ni angka bangso, marguru tu bilangan ni halak Israel.

32:9 Ai parjambaran ni Jahowa do bangsona, si Jakkob do partalian tineanna i.

32:10 Jumpangsa do ibana di tano bangkalbangkal, di halongonan paraotaotan, di tano parauangan ni angka binatang, Ibana marsaro humaliang nasida jala dimatamatahon; Ibana mangaramoti nasida, songon anak ni matana.

32:11 Songon pangaramoti ni pidong raja wali di asarna jala mangareapreap di atas angka anakna, suang songon i Ibana paherbang habongna, laos dijalo jala diusung nasida di atas habongna i.

32:12 Jahowa sandiri tahe manogihon nasida, jala ndang adong debata sileban donganna nanggo sada.

32:13 Ibana do manogihon nasida mardalan sian inganan angka na timbo di tano i, jala dilehon do panganonna gogo ni tano i, dilehon huhut siruponna situak ni loba sian dolok batu, jala miak sian batu na pir.

32:14 Miak susu sian lombu jala susu sian birubiru, rap dohot tabotabo sian anak ni birubiru dohot sian birubiru tunggal, angka na tubu di Basan dohot angka hambing tunggal rap dohot indahan sigambiri na humushus; jala mudar ni parbue ni anggur mamolin diinum ho.

32:15 Alai dung lam mokmok bangso na tigor manandak ma ibana! Nunga tung mokmok ho jala bolon jala tambos, jadi ditadingkon ibana ma Debata na jumadihon ibana, jala ditoisi dolok batu hatuaonna i.

32:16 Sai dipinggil nasida Ibana marhite sian angka debata sileban, jala dipahehe murukna marhite sian biasbias.

32:17 Mamele nasida huhut tu angka begu, ndada tu Debata; tu debata angka na so tinandana tahe, angka na imbaru pinajadi, angka na ro sian na jonok, angka na so hinabiaran ni ompumuna.

32:18 Ia Dolok batu na jumadihon ho, nunga ditadingkon ho, jala nunga dihalupahon ho Debata na mangae laho manubuhon ho.

32:19 Jadi dung diida Jahowa songon i diambolongkon ma nasida, ala rimasna pinahehe ni angka anakna dohot boruna.

32:20 Dung i ninna Ibana ma: Padaoongku ma Bohingku sian nasida; naeng Ahu marnida manang dia ujungnasida sogot; ai sundut na marbalik do nasida, anak angka na so marroha haporseaon.

32:21 Nunga tung dipinggil nasida Ahu mangiburu mida na so Debata, dipahehe nasida murukku binahen ni ganaganaannasida; Ahu pe antong pinggilonku ma nasida mangiburu mida na so bangso hian; marhite sian bangso na oto Ahu pahehehon rimasnasida.

32:22 Ai marsigorgor ma api di bagasan murukku, jala suda panganonna sahat ro di banua toru sahali, suda huhut panganonna tano i rap dohot gogona jala nahitanna do ojahan ni angka dolok.

32:23 Pagukguhonku ma angka hinamago tu nasida, jala suda angka sumbiangku siorhononku dompak nasida.

32:24 Ingkon mandate nasida bahenon ni haraparon, jala merus dagingna bahenon ni panepane dohot begu antuk na rahat; Ahu manongoshon sait ni binatang mangalo nasida rap dohot bisa ni ulok na manginsir di orbuk.

32:25 Sian balian podang i papunu nasida, jala di bagasan bilut masa hasonggoton, nang di dolidoli dohot namarbaju, nang di posoposo rap dohot halak naung ubanon.

32:26 Naeng dohononku hian nian: Purpuhononku ma nasida, asa tung mago nasida sian parningotan ni jolma.

32:27 Aut unang rimas ni musu na huhabiari, asa unang pabalion ni angka musuna tu sileban, unang dohononnasida: Tangannami na timbul i do, ndada Jahowa mambahen saluhutna i.

32:28 Ai bangso parroha mago do nasida, jala ndang adong roha panimbangon di bagasan rohanasida.

32:29 Oe aut marbisuk ma nasida nian marateatehon hata i, asa diantusi rohanasida nian na masa tu nasida sogot!

32:30 Tung beha ma pambahenna leleon ni sahalak saribu halak, jala maporus saloksa bahenon ni dua halak, aut unang Dolok batu di nasida naung manggadis nasida, jala Jahowa pasahathon nasida!

32:31 Ai ndada songon Dolok batu na di hita anggo dolok batu na di nasida, laos musunta i do marhatopothon uhumi.

32:32 Ai sian hau anggur Sodom do ianggo hau anggurnasida, jala sian ladang ni Gumora do; ia parbue ni anggurna, parbue sian pogu do, angka parbue na asom do diparbuehon.

32:33 Bisa ni ulok naga do anggurnasida i dohot bisa ni ulok dari na mangago situtu.

32:34 Nda nunga putus nian sangkap ni rohangku di bagasan, jala tarsahap di bagasan parpeopan ni artangku?

32:35 Ahu do nampuna partubolon dohot pamaloson di tingki uju gira do ro parsorion na pinadiri hian di nasida.

32:36 Ai uhumon ni Jahowa do sogot bangsona, alai marpangulahi rohana anggo mida angka naposona; ai tatapon ni rohana ma naung suda gogo ni tangannasida jala rap mago do na tarhurung dohot na pinalua.

32:37 Dung i dohononna ma: Didia do angka debatanasida, dolok batu, haposan ni rohanasida i?

32:38 Angka na manganhon tabotabo ni peleannasida sipotongon dohot manginum anggur ni peleannasida siinumon. Nasida ma nian hehe jala mangurupi hamu, nasida nian gabe partanobatoan di hamu.

32:39 Nuaeng pe, ida hamu ma, na mamunjung do anggo Ahu, jala ndang adong debata dungkon ni Ahu. Tarbahen Ahu do mambunu dohot pangoluhon muse; tarbahen Ahu do mambugangi dohot pamalumhon muse, jala ndang adong na tuk manang ise paluahon sian tanganku.

32:40 Ai Ahu patoltol tanganku dompak langit huhut mandok: Mangolu do Ahu ro di salelenglelengna!

32:41 Ia dung sapala Ahu patajom podangku na marsinondang jala tanganku mangumpatsa mangalaluhon uhum, ulahanku ma mambahen partubolon tu angka musungku jala Ahu mamaloshon tu halak na mangkagigihon Ahu.

32:42 Mabuk ma bahenonku angka sumbiangku sian mudar, jala podangku ingkon mangan sibuk sian mudar ni halak na mate tartiham dohot angka na dapot tartangkup, sian ulu parjambulan ni musu.

32:43 Marolopolop ma, hamu ale angka bangso parbegu mida bangsona, ai martubol ma bahenonna mudar ni angka naposona jala pasuangonna pamulason tu angka musuna, asa Ibana mambahen pardengganan tu tanona dohot tu bangsona.

32:44 Dung i ro ma si Musa jala dihatahon saluhut hata ni ende on, dipabegebege pinggol ni bangso i, ibana dohot si Josua, anak ni si Nun.

32:45 Jadi dung tolhas dihatahon si Musa saluhut hata i tu sandok Israel.

32:46 Ro muse hatana tu nasida: Sai parateatehon hamu ma hata i luhutna, angka na huhatindangkon tu hamu sadarion, laos dokkon hamu angka anakmuna, asa diringkoti mangulahon sude hata ni patikon.

32:47 Ai ndada hatahata boti angka i tu hamu, ingkon gabe hangoluanmuna angka i nian, jala hata on do paginjang ariarimuna di tano sisoluhonmuna i, dung taripar Jordan.

32:48 Dung i ro ma hata ni Jahowa tu si Musa, laos di ari na sasada i songon on:

32:49 Nangkok ma ho tu atas tor Abarim on, tu dolok Nebo tahe, na di tano Moab, tondong ni Jeriko, jala tatap sian i tano Kanaan, silehononku tu halak Israel bahen partalianna.

32:50 Laos mate ma ho di atas dolok sipanaehonmu i, asa pinapungu ho tu angka bangsom, suang songon si Aron, hahami, naung mate di atas dolok Hor, jala pinapungu tu bangsona.

32:51 Ala naung mardosa hamu dompak Ahu di tongatonga ni halak Israel, di lambung aek Meriba-Kades di halongonan Sin, ala na so pinarbadiaanmuna Ahu di tongatonga ni halak Israel.

32:52 Ai jadi do nian tataponmu tano i di adopanmu, alai ndang jadi anggo tung masuk ho tu tano na naeng lehononku tu halak Israel.

5 Musa 33

33:1 Alai on do pasupasu, na pinasupasuhon ni si Musa, halak ni Debata tu halak Israel, jumolo asa mate ibana.

33:2 Ninna ma: Nunga ro Jahowa sian Sinai, jala nunga binsar Ibana di nasida sian Seir; nunga poltak sinondangna sian dolok Elaparan, jala nunga ro Ibana mardongan angka na badia marriburibu, jala sian tanganna siamun ro api patik i tu nasida.

33:3 Tung na holong situtu do rohana mida angka bangso i! Saluhut angka na badiana di bagasan tanganmu do, hundul do nasida di lambung patmu, jala dapotan sipodaon sian angka hatam.

33:4 Ibana manonahon tu hita patik na nilehon ni si Musa, bahen teanteanan ni parluhutan ni si Jakkob.

33:5 Jala Ibana do Raja gumomgom bangso na tigor, uju marluhut angka induk ni bangso i rap dohot angka marga ni Israel.

33:6 Sai mangolu ma Ruben jala unang mate jala lam tu otikna bilangan ni jolma di ibana.

33:7 On do pasupasu taringot tu Juda, ninna do: Sai tangihon ma, ale Jahowa, soara ni Juda, jala boan ibana mulak tu bangsona! Sai tumpahi ma tanganna lam margogo, jala Ho ma donganna mangalo angka musuna!

33:8 Jala taringot tu Lepi, ninna do: Tummum dohot Urim (hasintongan dohot hatiuron) angka na sahat tu ho, tongtong ma i di baoa hasudungan ni roham, naung niunjunanmu di Massa jala naung binadaanmu di lambung aek Meriba!

33:9 Ibana do i naung mandok tu amana dohot tu inana: Ndang moralangalang rohangku marnidasa, jala ndang dipatandatanda angka anggina, jala ndang dipabotoboto angka anakna; ai nasida do mangaradoti angka hatam jala diramoti padan binahenmu.

33:10 Ingkon nasida mangajarhon angka uhummu tu Jakkob dohot patikmu tu Israel; ingkon nasida manutung daupa paanggoanggoon ni igungmu dohot mangampehon pelean situtungon di atas langgatanmu.

33:11 Sai pasupasu ma sahalana, ale Jahowa, jala tumpahi manjadi ulaon ni tanganna! Sai ponggolhon ma gonting ni halak na hehe mangalo ibana, nang halak na mangkagigihon ibana, asa unang be tarbahensa hehe.

33:12 Taringot tu Benjamin, ninna do: Ia hasudungan ni Jahowa maringan do di lambungna marsonangsonang; sai ondinganna do ibana manipat ari, jala maringan ibana di holangholang ni abarana!

33:13 Jala taringot tu Josep, ninna do: Naung maruli pasupasu tanona sian Jahowa, binahen ni surung ni panumpak sian langit, binahen ni nambur dohot binahen ni holbungholbung na tangkas di aek.

33:14 Binahen ni surung ni panumpak ni mata ni ari di parbue, gogo ni tano i, dohot binahen ni surung ni panumpak ni bulan pasimbur suansuanan!

33:15 Tole muse panumpak ni punsu ni angka dolok sian na robi dohot silehonlehon sian dolokdolok salelenglelengna.

33:16 Tole muse panumpak sian tano i ro di hinagokna: Sai songgop ma asi ni roha ni Na maringanan di bagasan ramba i tu ulu ni Josep dohot tu pakpak ulu ni jolma ma martumpal sian hahaanggina.

33:17 Hamuliaonna i do tudoshon anak buhabaju ni lombuna, jala tandukna songon tanduk ni horbo! Tambingonna ma marhite sian i angka bangso, asa rap marbubur sahat ro di ujung ni tano on. Ingkon songon i halak Epraim marloksaloksa, jala halak Manasse marriburibu.

33:18 Jala taringot tu Zebulon, ninna do: Marlas ni roha ma ho, ale Zebulon di haboborhatmu, jala ho, ale Isasar di bagasan angka undungundungmu.

33:19 Betabetaonnasida do angka bangso tu atas dolok i, mamelehon disi angka pelean hatigoran, ai parsaulihononnasida ma angka parsaulian sian laut dohot mutiha, angka na buni di bagasan horsik.

33:20 Jala taringot tu Gad, ninna do: Pinuji ma Jahowa, na palambas inganan ni Gad; maringan do ibana songon singa, jala diparsurage do botohon dohot pakpak ulu.

33:21 Ibana manjoloani manodo luat patumonaan di ibana, ai disi do partalian pinatongon ni silehon patik hian; dung i ro ma ibana manguluhon bangso i, asa mangalaluhon uhum hasintongan ni Jahowa dohot angka toruna rap dohot Israel.

33:22 Jala taringot tu Dan, ninna do: Singa na bajar do Dan, mangambur do ibana sian Basan.

33:23 Jala taringot tu Naptali, ninna do: Bosuran do Naptali di lomo ni roha, jala gok pasupasu sian Jahowa ibana; tean ma partalianmu tungkan laut dohot tungkan dangsina!

33:24 Jala taringot tu Aser, ninna do: Gumodang do pasupasu tu Aser sian tu angka anak na asing, ingkon halomoan ni angka hahaanggina ibana jala disornophon patna tu bagasan miak!

33:25 Bosi dohot tombaga angka ransangransangmu, songon ariarim ma hasonanganmi.

33:26 Ndang adong nanggo sada tudoshon Debata, ale bangso na tigor! Marsihundul Ibana di atas langit mambahen haluaon tu ho, jala di atas ombun parginjang jumujung habalgaonna.

33:27 Langit i do inganan ni Debata sian mulamula sahali jala di banua tonga on do manggomgomi tanganna saleleng ni lelengna! Ibana do antong mangonjar musum sian adopanmu jala ninna do: Siaphon ma i!

33:28 Jadi marsonangsonang ma Israel maringan sasadasa; sai manatapnatap do mata ni Jakkob tu tano hatubuan ni eme dohot anggur, sian angka langitna pe sai manetehi do nambur.

33:29 Tuami, ale Israel! Tung ise ma songon ho? Ho do sada bangso na martua binahen ni Jahowa, Ibana do lombulombu ni hatuaonmu dohot podang ni hatimbulonmu. Ingkon mangunduk tu ho sogot angka musum; alai anggo ho ingkon ojakkononmu patmu di inganannasida angka na timbo i.

5 Musa 34

34:1 Dung i nangkok ma si Musa sian adaran Moab tu dolok Nebo, i ma punsu ni Pisga, tondong ni Jeriko. Dung i dipatuduhon Jahowa ma tu ibana sandok tano olat ni Gilead sahat ro di Dan.

34:2 Tole muse sandok Naptali, tano Epraim dohot Manasse, nang sandok tano Juda sahat ro di laut tungkan hasundutan.

34:3 Tole muse tano na tungkan dangsina dohot luat di rura Jeriko, huta parharambiran, sahat ro di Zoar.

34:4 Dung i ro ma hata ni Jahowa tu ibana: I ma tano naung huuarihon hian tu si Abraham, si Isak dohot si Jakkob, ningku hian do: Tu pinomparmu ma lehononku on. Nunga hupatuduhon tu ho, diida matam, alai ndang jadi ho taripar masuk tusi.

34:5 Jadi mate disi ma si Musa, naposo ni Jahowa di tano Moab, ngomngom tu pamangan ni Jahowa.

34:6 Laos Jahowa mananom ibana di rura i, di tano Moab, tondong ni Betpeor, jala ndang adong nanggo sahalak na umboto hinamborna rasirasa sadarion.

34:7 Marumur saratus duapulu taon si Musa di hamamatena, ndang pola homur anggo matana jala ndada surut gogona.

34:8 Dung i ditatangisi halak Israel ma si Musa di adaran Moab tolupulu ari lelengna; marujung ma dibahen nasida angka ari partatangison dohot pangandungon ala si Musa.

34:9 Dung i gok Tondi hapistaran ma roha ni si Josua, anak ni si Nun, ai nunga diampehon si Musa hian tanganna tu ibana, jala ditangihon halak Israel do ibana, jala diulahon hombar tu na tinonahon ni Jahowa hian tu si Musa.

34:10 Dung i ndang adong be hehe di tongatonga ni Israel sada panurirang songon si Musa na mananda Jahowa adop bohi be.

34:11 Taringot tu saluhut tanda dohot halongangan, na sinuru ni Jahowa ibana, bahenonna angka i di tano Misir, tu si Firaun, tu sude naposona dohot tu sandok tanona.

34:12 Dohot taringot tu sandok tangan na gogoi dohot taringot tu sandok hasonggoton bolon na binahen ni si Musa di adopan ni sandok Israel.