Buku Esra

Esra ᯀᯘᯩ᯲ᯒ 1

1:1 Di taon parjolo hinarajahon ni si Sirus, raja sian Persia, asa pasintongkon hata ni Jahowa marhite sian pamangan ni si Jeremia, disunggul Jahowa ma tondi ni si Sirus, raja sian Persia, asa disuru martingting tu sandok gomgomanna, pola mardongan surat mandok: ᯑᯪ ᯖᯀᯉᯬ᯲ ᯇᯒ᯲ᯐᯬᯞᯬ ᯂᯪᯉᯒᯐᯂᯉᯬ᯲ ᯉᯪ ᯘᯪ ᯘᯪᯒᯘᯮ᯲ ᯒᯐ ᯘᯪᯀᯉ᯲ ᯇᯒᯩ᯲ᯘᯪᯀ ᯀᯘ ᯇᯘᯉᯪ᯲ᯖᯰᯬᯄ᯦ᯉᯬ᯲ ᯂᯖ ᯉᯪ ᯐᯂᯬᯋ ᯔᯖ᯲ᯂᯪᯖᯩ ᯘᯪᯀᯉ᯲ ᯇᯔᯝᯉ᯲ ᯉᯪ ᯘᯪ ᯐᯩᯒᯩᯔᯪᯀ ᯑᯪᯘᯮᯰᯎᯞᯮ᯲ ᯐᯂᯬᯋ ᯔ ᯖᯉᯬ᯲ᯑᯪ ᯉᯪ ᯘᯪ ᯘᯪᯒᯘᯮ᯲ ᯒᯐ ᯘᯪᯀᯉ᯲ ᯇᯒᯩ᯲ᯘᯪᯀ ᯀᯘ ᯑᯪᯘᯮᯒᯮ ᯔᯒ᯲ᯖᯰᯪᯖᯰᯪ ᯖᯮ ᯘᯉ᯲ᯑᯂᯬ᯲ ᯎᯔᯬ᯲ᯎᯬᯔᯉ᯲ᯉ ᯇᯬᯞ ᯔᯒ᯲ᯑᯬᯝᯉ᯲ ᯘᯮᯒᯖ᯲ ᯔᯉ᯲ᯑᯄ᯦ᯬ᯲

1:2 Songon on do hata ni si Sirus, raja sian Persia: Nunga sahat tu ahu saluhut harajaon di tano on, dilehon Jahowa, Debata di surgo, jala Ibana marsuru ahu pajongjong di Ibana sada joro di Jerusalem, na di tano Juda.

1:3 Manang ise sian hamu, sian sandok bangsona i, sai didongani Debatana ma ibana, asa nangkok tu Jerusalem, na di tano Juda, asa dipajongjong joro ni Jahowa, Debata ni Israel, Ibana do Debata na mian di Jerusalem.

1:4 Jala manang ise na tinggal dope di saluhut inganan paisolatanna i, songon halak dagang, ingkon tolongon ni angka baoa donganna sahuta ibana marhite sian perak, sere, sinamot dohot pinahan, angkup ni silehonlehon sian lomo ni rohana tu joro ni Debata, na di Jerusalem.

1:5 Jadi hehe ma angka induk sian Juda dohot Benjamin marompuompu, ro di angka malim dohot halak Lepi, sude tahe angka na sinunggul ni Debata tondina i laho nangkok, asa pajongjong joro ni Jahowa, na di Jerusalem.

1:6 Dung i luhut jolma angka na humaliang nasida margogoihon tangannasida marhite sian angka ulaula perak dohot sere, tole sinamot dohot pinahan dohot arta angka na arga, so padohot saluhut silehonlehon tu joro sian lomo ni rohana.

1:7 Diparuar raja Sirus huhut ulaula ni joro ni Jahowa, angka naung binoan ni si Nebukadnesar sian Jerusalem, jala naung binahenna tu bagasan joro ni debatana.

1:8 Jadi didokkon si Sirus, raja sian Persia, paruaron ni si Mistredat, siramoti arta angka i, jala bilanganna angka i tu si Sesbasar, induk ni halak Juda.

1:9 Jala on do bilanganna: Angka saoan sere tolupulu, angka saoan perak saribu, angka raut duapulu sia.

1:10 Angka panginuman sere tolupulu angka panginuman perak paidua opat ratus sampulu, ulaula angka na asing saribu.

1:11 Luhut angka ulaula sere dohot perak lima ribu opat ratus do. Luhutna i diboan si Sesbasar nangkok manguluhon angka na tarbuang sian Babel tu Jerusalem.

Esra 2

2:1. Jala on do pinompar ni Juda marluatluat, angka na nangkok sian habuangan, angka na binuangkon ni si Nebukadnesar, raja sian Babel tu Babel, jala angka na mulak tu Jerusalem dohot tu Juda, ganup tu hutana be.

2:2 Angka na ro rap dohot si Serubabel, si Josua, si Nehemia, si Seraia, si Reelaia, si Mordahai, si Bilsan, si Mispar, si Bigpai, si Rehum dohot si Baana. On do bilangan ni angka baoa sian bangso Israel.

2:3 Pinompar ni si Paras dua ribu saratus pitupulu dua.

2:4 Pinompar ni si Sepatia tolu ratus pitupulu dua.

2:5 Pinompar ni si Ara pitu ratus pitupulu lima.

2:6 Pinompar ni si Pahat-Moab, sian pinompar ni si Jesua-Joab dua ribu ualu ratus sampulu dua.

2:7 Pinompar ni si Elam saribu dua ratus limapulu opat.

2:8 Pinompar ni si Jattu siaratus opatpulu lima.

2:9 Pinompar ni si Sakai pitu ratus onompulu.

2:10 Pinompar ni si Bani onom ratus opatpulu dua.

2:11 Pinompar ni si Bebai onom ratus duapulu tolu.

2:12 Pinompar ni si Asgad saribu dua ratus duapulu dua.

2:13 Pinompar ni si Adonikam onom ratus onompulu onom.

2:14 Pinompar ni si Bigpai dua ribu limapulu onom.

2:15 Pinompar ni si Adin opat ratus limapulu opat.

2:16 Pinompar ni si Ater sian si Hiskia siapulu ualu.

2:17 Pinompar ni si Bisia tolu ratus duapulu tolu.

2:18 Pinompar ni si Jora saratus sampulu dua.

2:19 Pinompar ni si Hasum dua ratus duapulu tolu.

2:20 Pinompar ni si Gibar siapulu lima.

2:21 Pinompar sian Betlehem saratus duapulu tolu.

2:22 Angka baoa sian Netopa limapulu onom.

2:23 Angka baoa sian Anatot saratus duapulu ualu.

2:24 Pinompar sian Asmapet opatpulu dua.

2:25 Pinompar sian Kiriat Jearim, Kepira dohot Beerot pitu ratus opatpulu tolu.

2:26 Pinompar sian Rama dohot Geba onom ratus duapulu sada.

2:27 Angka baoa sian Mikhmas saratus duapulu dua.

2:28 Angka baoa sian Betel dohot Ai dua ratus duapulu tolu.

2:29 Pinompar sian Nebo limapulu dua.

2:30 Pinompar ni si Magbis saratus limapulu onom.

2:31 Pinompar ni si Elam na asing saribu dua ratus limapulu opat.

2:32 Pinompar ni si Harim tolu ratus duapulu.

2:33 Pinompar ni si Lod, si Hadid dohot si Ono pitu ratus duapulu lima.

2:34 Pinompar sian Jeriko tolu ratus opatpulu lima.

2:35 Pinompar sian Sena tolu ribu onom ratus tolupulu.

2:36 Angka malim: Pinompar ni si Jedaia sian pinompar ni si Jesua sia ratus pitupulu tolu.

2:37 Pinompar ni si Immer saribu limapulu dua.

2:38 Pinompar ni si Pashur saribu dua ratus opatpulu pitu.

2:39 Pinompar ni si Harim saribu sampulu pitu.

2:40 Halak Lepi: Pinompar ni si Jesua dohot si Kadmiel, sian pinompar ni si Hodapia, pitupulu opat.

2:41 Angka parende: Pinompar ni si Asap saratus duapulu ualu.

2:42 Pinompar ni angka sijaga pintu: Pinompar ni si Sallum, pinompar ni si Ater, pinompar ni si Talmon, pinompar ni si Akkub, pinompar ni si Hatita, pinompar ni si Sobai, luhutna i saratus tolupulu sia.

2:43 Angka Netinim: Pinompar ni si Siha, pinompar ni si Hasupa, pinompar ni si Tabaot.

2:44 Pinompar ni si Keros, pinompar ni si Siaha, pinompar ni si Padon.

2:45 Pinompar ni si Lebana, pinompar ni si Hagaba, pinompar ni si Akkub.

2:46 Pinompar ni si Hagab, pinompar ni si Salmai, pinompar ni si Hanan.

2:47 Pinompar ni si Gidel, pinompar ni si Gohar, pinompar ni si Reia.

2:48 Pinompar ni si Resin, pinompar ni si Nekoda, pinompar ni si Gasam.

2:49 Pinompar ni si Usa, pinompar ni si Pasea, pinompar ni si Bisia.

2:50 Pinompar ni si Asna, pinompar ni si Meunim, pinompar ni si Nepusim.

2:51 Pinompar ni si Bakbuk, pinompar ni si Hakupa, pinompar ni si Harhur.

2:52 Pinompar ni si Baslut, pinompar ni si Mehida, pinompar ni si Harsa.

2:53 Pinompar ni si Barkos, pinompar ni si Sisera, pinompar ni si Tama.

2:54 Pinompar ni si Nesia, pinompar ni si Hatipa.

2:55 Pinompar ni angka naposo ni si Salomo: Pinompar ni si Sotai, pinompar ni si Soperet, pinompar ni si Perida.

2:56 Pinompar ni si Jaala, pinompar ni si Darkon, pinompar ni si Gidel.

2:57 Pinompar ni si Sepatia, pinompar ni si Hatil, pinompar ni si Rokeret Hasebaim, pinompar ni si Ami.

2:58 Luhut angka Netinim dohot pinompar ni angka naposo ni si Salomo tolu ratus siapulu dua.

2:59 Jala on do huhut angka na nangkok sian Tel-Mela, Tel-Harsa, Kerub, Addon dohot Immer; alai ndang tarpajojor nasida pinompar ni amanasida i, manang pinomparna sandiri pe, manang tung sian halak Israel nasida.

2:60 Pinompar ni si Delaia, pinompar ni si Tobia, pinompar ni si Nekoda, onom ratus limapulu dua.

2:61 Jala sian pinompar ni angka malim: Pinompar ni si Habai, pinompar ni si Hakos, pinompar ni si Barsilai na mambuat boru sian si Barsilai, halak Gilead bahen jolmana, laos dibuat goarna i.

2:62 Angka i ma mandiori surat aturan ni partubunasida, alai ndang jumpangsa, jadi ramun nasida dietong, laos dipabali nasida sian hamalimon.

2:63 Dung i ro ma hata ni pangarajai mandok tu nasida: Tung na so jadi do nasida mangan sian na badia sahali, paima adong hehe malim sada mangkajongjongkon Urim dohot Tummum.

2:64 Sandok luhutan i hira sahalak do, opatpulu dua ribu tolu ratus onompulu halak toropna.

2:65 So padohot angka naposonasida baoa dohot parompuan, pitu ribu tolu ratus tolupulu pitu halak toropna; mangihut tu nasida do halak parende baoa dohot parompuan dua ratus halak toropna.

2:66 Ia hodanasida pitu ratus tolupulu onom, ia hodanasida angka na marsahe dua ratus opatpulu lima.

2:67 Ia untonasida opat ratus tolupulu lima, ia halodenasida onom ribu pitu ratus duapulu.

2:68 Jadi dung sahat deba induk marompuompu tu joro ni Jahowa na di Jerusalem, margugu ma nasida sian lomona tu joro ni Debata, asa pajongjongonna di hajongjonganna hian.

2:69 Marguru tu gogonasida dilehon nasida pasingkop bohal tu ulaon i onom loksa saribu dirham sere, jala lima ribu hati perak, angkup ni saratus salinan pangkean malim.

2:70 Jadi maringan ma angka malim dohot halak Lepi, nang sian situan na torop i, ro di halak parende dohot sijaga pintu dohot halak Netinim di bagasan hutana be, sandok Israel pe di bagasan hutana be maringan.

Esra 3

3:1 Jadi dung jumpang bulan sipaha pitu, jala maringan di bagasan hutana be halak Israel, marluhut ma bangso i, hira sahalak do, tu Jerusalem.

3:2 Jadi hehe ma si Josua, anak ni si Josadak, rap dohot hahaanggina, i ma angka malim i dohot si Serubabel, anak ni si Sealtiel, ro di hahaanggina, asa nasida paulihon langgatan pamelean tu Debata ni Israel, mamelehon di atasna angka pelean situtungon, songon na tarsurat di bagasan buku patik ni si Musa, halak ni Debata.

3:3 Jadi dipaojak nasida ma langgatan i di atas hajongjonganna hian (atik pe tahuton nasida maradophon angka bangso marluatluat), tole do nasida mamelehon di atasna angka pelean situtungon tu Jahowa, angka pelean situtungon manogotna i dohot bodarina i.

3:4 Marari raya parlapelapean nasida huhut, songon na tarsurat i, mardongan pelean situtungon siganup ari, mangihuthon bilangan hombar tu uhum hian toropna ariari.

3:5 Tole songon i muse dipelehon angka pelean situtungon hian ariari dohot di poltak ni bulan dohot di saluhut ari raya tu Jahowa, angka naung pinarbadiaan hian, ro di sude pelean na pinelehon sian lomo ni roha tu Jahowa.

3:6 Olat ni artia bulan sipahapitu dipungka nasida mamelehon angka pelean situtungon tu Jahowa; alai anggo joro ni Jahowa ndang dope dipaojak.

3:7 Dung i dilehon nasida hian ma perak tu halak pande batu dohot hau, angkup ni sipanganon, siinumon dohot miak tu halak Sidon dohot Tirus, asa diboan nasida hau Ares sian Libanon mardalan sian laut sahat tu Joppe, hombar tu parenta ni Sirus, raja sian Persia tu nasida.

3:8 Alai paduataonhon dung sahat nasida tu joro ni Debata di Jerusalem, di bulan sipaha dua, dipungka si Serubabel, anak ni si Sealtiel dohot si Josua, anak ni Josadak, ro di pasipasi ni hahaangginasida i, i ma angka malim dohot halak Lepi, ro di sude angka naung mulak sian habuangan ro tu Jerusalem, jala dipabangkit nasida halak Lepi olat ni na marumur duapulu taon tu ginjang, mangaradoti ulaon di joro ni Jahowa.

3:9 Jongjong huhut disi si Josua rap dohot anakna dohot hahaanggina, si Kadmiel pe rap dohot angka anakna, ro di halak Juda, hira sahalak do mangaranapi angka jolma na mangaradoti ulaon di joro ni Debata, tole pinompar ni si Henadad ro di anaknasida dohot hahaanggina, i ma halak Lepi.

3:10 Jadi dung dibahen angka pande ojahan ni joro ni Jahowa, jongjong ma angka malim marpangkean be, patioptiop sarune dohot halak Lepi, pinompar ni si Asap mardongan parhinaloan laho mamujimuji Jahowa, hombar tu aturan na binahen ni si Daud, raja sian Israel.

3:11 Jadi marende taripar nasida mamujimuji dohot mandok mauliate tu Jahowa, ala pardengganbasa Ibana, jala ro di salelenglelengna asi ni rohana i mida Israel. Jadi sandok bangso i pangiar soarana marolopolop mansai gogo laho mamujimuji Jahowa, ala naung dibahen ojahan ni joro ni Jahowa.

3:12 Alai torop do sian angka malim dohot halak Lepi ro di angka induk marompuompu, angka na tuatua, angka na sanga marnida joro parjolo i, dung diida nasida ojahan di bagas i tumatangis be do nasida marsoara godang; alai torop halak huhut marolopolop sian las ni rohana, pola dipangiar soarana i.

3:13 Jadi ndang tarsirang halak situan na torop i soara olopolop dibahen las ni roha sian soara partangison ni bangso i: Ai tung marsoara na gogo situtu bangso i marolopolop pola tarbege soara i tu na dao.

Esra 4

4:1 Alai dung dibege angka musu ni halak Juda dohot Benjamin, naung tole hape halak na mulak sian habuangan i paulihon sada joro tu Jahowa, Debata ni Israel.

4:2 Ro ma nasida mandapothon si Serubabel dohot angka induk i marompuompu, ninna ma mandok nasida: Donganmuna ma hami paulihon; ai suang songon hamu naeng luluannami Debatamuna i; nunga pola hami mamelehon angka pelean tu Ibana olat ni tingki ni Asarhadon, raja sian Assur, na marsuru hami nangkok tuson.

4:3 Alai ro ma hata ni si Serubabel dohot si Josua dohot pasipasi ni angka induk sian Israel marompuompu mandok tu nasida: Ndang tama rap hamu dohot hami paulihon joro di Debatanami, holan hami sandiri pe paulihon di Jahowa, Debata ni Israel, hombar tu parenta ni raja Sirus, raja sian Persia tu hami.

4:4 Jadi daukdauk ma tangan ni halak Juda dibahen halak isi ni luat i, manundatnundati nasida di ulaonna i.

4:5 Pola mangalehon sisip nasida manggaji halak panuturi mangalo nasida, mangambatambat sangkapnasida i, saleleng mangolu si Sirus, raja sian Persia sahat ro di harajaon ni si Darius; raja sian Persia.

4:6 Alai dung bangkit raja Serses, di mula ni harajaonna i dope, manongos surat pangalualuan ma nasida dompak halak isi ni Juda dohot Jerusalem.

4:7 Nang uju hinarajaon ni si Artasasta manongos surat ma si Bislam, si Mistredat dohot si Tabel ro di donganna satahi angka na asing tu si Artasasta, rajai sian Persia; tarsurat do surat i marhite sian surat dohot hata Ram.

4:8 Si Rehum panuturi dohot si Simsai juaratulis i, manongoshon sada surat taringot tu Jerusalem tu raja Artasasta, songon on:

4:9 Ia hami, si Rehum, panuturi dohot si Simsai, juaratulis i, ro di sude donganna satuptupan na asing, angka sian Dina, sian Aparsata, sian Tarpela, sian Aparsata, sian Ara, sian Babel, sian Susan, sian Deha dohot sian Elam.

4:10 Ro di angka bangso na asing, angka naung nilopokkon ni Assurbanipal naung tarbarita i, jala disuru nasida maringan di angka huta ni Samaria dohot halak na asing tu bariba ni sunge Euprat.

4:11 On do hata ni surat, na tinongoshon nasida tu ibana, tu raja Artasasta, hami baoa angka naposom di bariba ni batang aek i songonsongon on:

4:12 Na pabotohon ma hami tu rajai, ia halak Jahudi naung manadingkon ho mandapothon hami nangkok tu Jerusalem, naeng paulihon muse huta panggunturi dohot na jahat i, nunga pola sidung ne parikna jala dibahen ojahanna.

4:13 On pe, na pabotohon ma hami tu rajai, tung suru ulahanna paulihon huta i jala sun angka parikna bahenonna, ndang tagamon gararonnasida be sohe, beo dohot gogo ni tano i gabe marhagigian angka rajai.

4:14 Alai ala sude hami manggugut sira sian bagas ni rajai, jala ndang patut paidaidaonnami marlea rajai, ala ni do umbahen na hutongos hami suraton pabotohonsa tu rajai.

4:15 Asa dohononmu halak mandiori buku parningotan sian angka ompum, jadi jumpang ho ma di bagasan buku i tarsurat, asa botoonmu huta panggunturi do huta on, pasusasusa angka raja dohot luat, sian na robi dope sai masa do hagunturon di bagasan huta i, umbahen laos diago huta i na jolo.

4:16 Dibahen i umbahen na hupabotohon hami tu rajai, tung sura loasonmu paulionna muse huta on, jala pasunonna angka parikna, ndang tagamon adong be tinggal di bariba ni batang aek i masuk tu gomgomanmu.

4:17 Dung i ditongos rajai ma sada surat tingting balosna i tu si Rehum, panuturi, dohot tu si Simsai, juaratulis i dohot tu dongannasida satahi, angka na maringan di Samaria dohot tu halak na asing angka na maringan di bariba ni batang aek i: Dame ma di hamu! Songonsongon on:

4:18 Ia surat naung tinongosmu tu hami, nunga tangkas dijaha di adopanku.

4:19 Pintor mangalehon parenta ahu mandiori buku parningotan; jadi jumpang nasida ma tutu, olat ni na robi dope sai manggunturi huta i dompak angka raja, sai masa hagunturon dohot musu garembong di bagasan.

4:20 Angkup ni raja angka na marhuaso gumomgom huta i na jolo, pola sandok tano na di bariba ni batang aek i digomgomi nasida, pola manjalo sohe, beo dohot gogo ni tano i nasida ganup taon.

4:21 Nuaeng pe, lehon hamu ma parenta mandokkon halak manundati angka baoa i, asa unang dipauli nasida muse huta i, nda jolo ro sian ahu parenta mangaloas.

4:22 Antong manat ma parateatehon hamu hata i, so tung marlemba hamu disi, asa unang lam ganda jea i, boasa tagonan marharugian angka rajai?

4:23 Jadi dung dijaha hata ni surat tinongos ni raja Artasasta di adopan ni si Rehum, panuturi dohot si Simsai, juaratulis i dohot dongannasida satahi, hapogan ma nasida laho tu Jerusalem mandapothon halak Juda manundatnundati nasida, pola gogo dibahen.

4:24 Jadi mansohot ma ulaon di joro ni Debata di Jerusalem, laos mansohot do sahat ro di paduataonhon hinarajahon ni si Darius, raja sian Persia.

Esra 5

5:1 Alai anggo panurirang Haggai dohot Sakaria, anak ni si Ido rap manurirangi do nasida duansa marhite sian Goar ni Debata ni Israel tu halak Juda na di tano Juda dohot Jerusalem.

5:2 Jadi hehe ma si Serubabel, anak ni si Sealtiel dohot si Josua, anak ni si Josadak, jala dipungka nasida muse pajongjong joro ni Debata na di Jerusalem, jala dongannasida do angka panurirang ni Debata na papir tondinasida i.

5:3 Laos di tingki uju i ro ma manopot nasida si Tatnai, pangarajai ni luat i sian bariba ni batang aek i dohot si Jetar Bosenai rap dohot donganna satahi, angka ninna ma tu nasida: Ise marsuru hamu pajongjong joro on dohot pasunhon angka parik on?

5:4 Jadi hudok hami ma tu nasida goargoar ni baoa angka na mangkasuhuthon pajongjong joro i.

5:5 Alai marpanatapon do ianggo mata ni Debatanasida tu angka sintua ni halak Juda, asa unang sanga dilohai halak nasida, paima sahat pangaluani tu si Darius, jala sanga ro mulak surat balosna.

5:6 Alai on do hata ni surat naung tinongos ni si tatnai, pangarajai ni tano di bariba ni batang aek i dohot si Jetar Bosenai, ro di donganna satahi, i ma halak Aparsata i, angka na di bariba ni batang aek i tu raja Darius.

5:7 Ia hata ni surat barita na tinongosnasida tu rajai songon on do: Dame godanggodang di raja Darius!

5:8 Na hupabotohon hami tu rajai, nunga sahat hami tu tano Juda, tu joro ni Debata na timbul sahali, sian batu na balga angka na denggan binarbar dipauli nasida joro i, jala dorpina i dilampis dohot hau, mansai gira huhut ulaon i diula, jala manjadi marhite sian tangannasida sandiri.

5:9 Nunga pola husungkun hami sintuanasida i, songon on hudok hami tu nasida: Atehe, ise naung marsuru hamu pajongjong joro on dohot pasunhon angka parik on?

5:10 Nang goarnasida husungkun hami do tu nasida, naeng pabotohononnami nian tu ho, ala ni umbahen husurathon hami goargoar ni baoa angka na manguluhon nasida.

5:11 Alai on do hata alusnasida tu hami: Ia hami, naposo ni Debata sigomgom langit dohot tano on do hami, jala hupajongjong hami joro on, naung pinauli hian di tingki na robi, na pinajongjong ni sada raja ni Israel na timbul jala dipasidung.

5:12 Alai dung dipahehe angka ompunami rimas ni Debata sigomgom langit i, gabe dipasahat nasida tu bagasan tangan ni si Nebukadnesar, raja sian Babel, halak Kasdim i, na mangaloha joro on, jala dibuangkon bangso i tu Babel.

5:13 Alai di taon parjolo hinarajahon ni si Sirus, raja sian Babel, dilehon raja Sirus i ma parenta mandokkon pajongjongon joro on di Debata.

5:14 Nang ulaula sere dohot perak di bagasan joro ni Debata, angka na binuat ni si Nebukadnesar sian joro na di Jerusalem, jala binoanna tu bagasan joro na di Babel, nunga pola diparuar raja Sirus sian joro na di Babel, jala dipalumehon angka i tu sada halak na margoar Sesbasar, naung pinabangkitna gabe pangarajai di luat i.

5:15 Dung i ninna rajai ma mandok ibana: Buat ma angka ulaula on, boan ma i tu joro na di Jerusalem, jala dokkon ma pajongjongon muse joro ni Debata di hajongjonganna hian.

5:16 Jadi ro ma tutu Sesbasar i, saut ma tutu dibahen ojahan ni joro ni Debata di Jerusalem, jadi olat ni rasirasa nuaeng sai tole halak paulihon, alai ndang dope sidung.

5:17 Nuaeng pe, molo denggan di roha ni rajai, didokkon ma manigati di bagasan jabu parpeopan arta ni rajai na di Babel, manang tutu jumpang disi surat parenta sian raja Sirus mandokkon pajongjongon joro ni Debata na di Jerusalem; manang beha pingkiran ni roha ni rajai taringot tusi, ditongoshon ma tu hami!

Esra 6

6:1 Dung i didokkon raja Darius ma, ingkon dioran di bagasan jabu parpeopan ni surat parningotan, di bagasan jabu parpeopan arta ni rajai na di Babel.

6:2 Jadi jumpang ma di Akmeta, di bagasan huta na gonting na di tano Madai, sada pustaha parningotan, songon on do hata na tarsurat disi:

6:3 Di taon parjolo hinarajahon ni raja Sirus dilehon raja Sirus parenta taringot tu joro ni Debata na di Jerusalem: Ingkon pajongjongon muse di ingananna hian joro bahen pamelean, ingkon togu bahenon ojahanna, onompulu asta timbona jala onompulu asta bohangna.

6:4 Ingkon tolu rinte batu na nidakdak bahen dorpina jala sarinte hau na imbaru; ia harugian tusi ingkon sian bagas ni rajai lehonon.

6:5 Angkup ni ulaula sere dohot perak sian bagas ni Debata hian, angka naung binuat ni si Nebukadnesar sian joro na di Jerusalem, jala diboan tu Babel, ingkon paulahon do, asa dipasuang tu bagasan joro na di Jerusalem, tu ingananna hian, ingkon sahat tu joro ni Debata boanonna.

6:6 Dibahen i, ho ale Tatnai, pangarajai di bariba ni batang aek Euprat dohot ho Jetar Bosenai, ro di donganmu satahi sian halak Aparsata i, angka na maringan di bariba ni batang aek i, unang jonoki hamu nasida.

6:7 Pasombu hamu nasida mangulasulas ulaon di joro ni Debata, asa tole pangarajai ni halak Juda dohot sintua ni halak Juda pajongjong joro ni Debata di hajongjonganna hian.

6:8 Angkup ni i nunga pola mangalehon parenta ahu taringot tu sibahenonmuna tu angka sintua ni halak Juda, asa dipajongjong nasida joro ni Debata: ingkon buaton sian arta ni rajai, sian seoa na jinalo sian bariba ni batang aek i jala bulus lehonon tu halak on bahen bohalnasida, asa unang tarsabat nasida.

6:9 Tung sura hurangan nasida di lombu naposo, manang di birubiru tunggal, manang di anak ni birubiru, bahen pelean situtungon tu Debata sigomgom langit i, hurangan huhut di eme, sira, anggur manang miak, ingkon guru dok ni malim, angka na di Jerusalem godangna lehonon tu nasida ariari, na so tupa marbeda.

6:10 Asa dipelehon nasida pelean angka na hushus tu Debata sigomgom langit i, huhut mangidohon hahorason di rajai dohot di angka anakna.

6:11 Angkup ni dope parenta sian ahu, tung sura adong manang ise na manguba parentangkon, ingkon buaton sada tiang ni bagasna sandiri bahen pamajalanna, jabuna pe ingkon gabe partangkalan ala ni.

6:12 Alai anggo Debata, naung paian Goarna disi, sai ditunggalingkon ma nasa raja dohot bangso, angka na hum patoltol tanganna naeng paubahon manang mangaloha joro ni Debata na di Jerusalemi. Ahu, raja Darius i mangalehon parenta i, ingkon sigop do i pasauton!

6:13 Jadi sigop ma dipasaut si Tatnai, pangarajai di bariba ni batang aek i dohot si Jetar Bosenai ro di angka donganna satahi parenta i, hombar tu hata naung tinongoshon ni raja Darius i.

6:14 Jadi tole ma angka sintua ni halak Juda mangaringkoti ulaon i, jala gira dipasidung, hombar tu hata panurirang Haggai dohot Sakaria, anak ni si Ido; diringkoti nasida ma tutu ulaon i jala dipasidung, hombar tu hata ni Debata ni Israel, hombar huhut tu parenta ni si Sirus dohot si Darius dohot si Artasasta, raja sian Persia.

6:15 Jadi sidung ma joro i di ari tolu bulan Adar, paonomtaonhon hinarajaon ni raja Darius.

6:16 Dung i marari raya ma halak Israel, angka malim dohot halak Lepi, ro di halak na asing angka na mulak sian habuangan pasahathon joro i tu Debata marlas ni roha godang.

6:17 Laho pasahathon joro i nasida tu Debata, dipelehon ma saratus jonggi, dua ratus birubiru tunggal, opat ratus anak ni birubiru, jala sampulu dua hambing tunggal bahen pelean pardosaon manguras sandok Israel, mangihuthon bilangan ni angka marga ni Israel.

6:18 Jadi dipajongjong nasida ma angka malim mangihuthon pargansionna dohot halak Lepi mangihuthon rongkananna marhalado di Debata na di Jerusalem, hombar tu na tarsurat di bagasan buku ni si Musa.

6:19 Dung i marulaon Paska ma halak Juda, angka na mulak sian habuangan di ari sampulu opat bulan sipaha sada.

6:20 Ai nunga diuras angka malim dohot halak Lepi dirina be, hira sahalak do iasnasida sudena; jadi diseat nasida ma birubiru Paska i di sude halak Juda, angka na mulak sian habuangan dohot di hahaangginasida i, i ma angka malim i dohot di nasida sandiri.

6:21 Jadi halak Israel angka naung mulak sian habuangan ro di sude halak angka na papulik dirina sian haramunon ni angka bangso parbegu di luat i, gabe dongannasida mangalului Jahowa, Debata ni Israel manganhon Paska i.

6:22 Jala marari raya sagusagu na so niasoman nasida pitu ari lelengna marlas ni roha; ai nunga dipalas Jahowa rohanasida i, jala disunggul roha ni raja sian Assur manumpak nasida, margogoihon tangannasida mangaradoti ulaon di bagas ni Debata, i ma Debata ni Israel.

Esra 7

7:1 Jadi dung salpu angka jamita ondeng, uju hinarajahon ni si Artasasta, raja sian Persia, ro ma sian Babel si Esra, anak ni si Seraia, i ma anak ni si Azaria, i ma anak ni si Hilkia.

7:2 I ma anak ni Sallum, i ma anak ni si Sadok, i ma anak ni si Ahitub.

7:3 I ma anak ni si Amaria, i ma anak ni si Azaria, i ma anak ni si Merayot.

7:4 I ma anak ni si Seraia, i ma anak ni si Usi, i ma anak ni si Bukki.

7:5 I ma anak ni si Abisua, i ma anak ni si Pinehas, i ma anak ni si Eleasar, i ma anak ni si Aron, sintua ni malim i.

7:6 I ma si Esra i, na nangkok sian Babel, jala siboto surat do ibana, na pistar di bagasan patik ni si Musa, naung nilehon ni Jahowa, Debata ni Israel. Sandok guru pangidoanna dilehon rajai tu ibana, hombar tu panogunoguon ni Jahowa Debatana di ibana.

7:7 Nangkok huhut deba sian halak Israel, sian angka malim dohot halak Lepi, sian angka parende, sijaga pintu dohot halak Netinim tu Jerusalem papitutaonhon hinarajahon ni raja Artasasta.

7:8 Dung i sahat ma ibana tu Jerusalem di bulan sipahalima, papitutaonhon hinarajahon ni rajai.

7:9 Ai di artia bulan sipahasada ibana mamungka nangkok sian Babel, jala di artia bulan sipahalima sahat ibana tu Jerusalem, hombar tu panogunoguon ni Debata na basa i di ibana.

7:10 Ai nunga marsihohot hian roha ni si Esra mandiori patik ni Jahowa naeng ulahononna, huhut laho mangajarhon patik ni uhumi tu halak Israel.

7:11 Jala on do hata ni surat, na pinaihut ni raja Artasasta tu si Esra, malim jala siboto surat i, na pistar pajojor angka hata tona ni Jahowa dohot aturanna tu halak Israel.

7:12 Ahu surat tinongos ni si Artasasta, raja ni angka raja, tu malim Esra, siboto surat na sun pistar pajojor patik ni Debata na di surgo, dame ma di hamu.

7:13 Nunga hulehon parenta sian ahu: Nasa na lomo roha di harajaonku sian bangso Israel, nang sian angka malim dohot halak Lepi naeng laho tu Jerusalem, jadi do i donganmu laho.

7:14 Ala naung sinuru ni rajai dohot panuturina sipitu halak i ho, asa parentaonmu Juda dohot Jerusalem, hombar tu patik ni Debatam na di bagasan tanganmu.

7:15 Boanonmu huhut perak dohot sere, naung nilehon ni rajai dohot angka panuturina sian lomona di Debata ni Israel, na maringanan di Jerusalem.

7:16 Angkup ni sandok perak dohot sere guguan na dapot ho di sandok tano Babel rap dohot guguan na nilehon ni situan na torop i dohot angka malim sian lomona, tumpakna tu joro ni Debatana na di Jerusalem.

7:17 Ala ni gira ma tuhorhon hepeng i tu angka jonggi, birubiru tunggal, anak ni birubiru rap dohot angka pelean sipanganon dohot siinumon donganna i, ingkon pelehononmu do i di atas langgatan mardonokkon joro ni Debatamuna na di Jerusalem.

7:18 Taringot tu perak dohot sere na lobi, jadi do marguru tu panimbang ni rohamuna pangkeonmuna, hombar tu lomo ni roha ni Debatamuna.

7:19 Tole ulaula angka naung pinalumehon tu ho laho mangaradoti tohonan di joro ni Debatam, pasahatonmu do i tu adopan ni bohi ni Debata di Jerusalem.

7:20 Tung sura adong dope hurang di joro ni Debatamu, na patut lehonon, ninna roham, lehon ma i sian bagas parpeopan arta ni rajai.

7:21 Sian ahu sandiri, sian raja Artasasta, ruar parenta i tu saluhut induk siramoti arta, angka na di bariba ni batang aek i, manang sadia pe na pinangido ni malim Esra, na pistar pajojor patik ni Debata na di surgo, ingkon gira lehonon tu ibana.

7:22 Sahat ro di saratus talenta perak, jala saratus tuhukan eme, jala saratus bat anggur, jala saratus bat miak, ndang pola dibuhul anggo godang ni sira.

7:23 Tung saluhut do na masuk tu lomo ni roha ni Debata na di surgo, ingkon bahenon do i sian nasa roha manumpak joro ni Debata na di surgo, asa unang hehe rimasna songgop tu harajaon ni rajai dohot tu angka anakna.

7:24 Angkup ni na pabotohon ma ahu di hamu taringot tu angka malim dohot halak Lepi, angka parende, sijaga pintu dohot halak Netinim, ro di angka parhalado di bagasan joro ni Debata, na so tupa pangidoon sian nasida sohe manang beo manang gogo ni tano i siganup taon.

7:25 Alai anggo ho, ale Esra, hombar tu hapistaran ni Debatamu na sahat tu ho, pabangkit ma angka pangarajai dohot panguhum, angka na manguhumi bangso na di bariba ni batang aek i, i ma sude halak angka naung umboto patik ni Debatam, tung sura adong dope na so umbotosa, ingkon siajaranmuna do i tu ibana.

7:26 Jala manang ise na so gira mangulahon patik ni Debata dohot patik ni rajai, ingkon gira hona uhum ibana bahenon ala ni, manang marutang hosa ibana manang tu habuangan, manang mangalehon dando, manang tarhurung.

7:27 Pinuji ma Jahowa, Debata ni ompunta i, naung manungguli songon i roha ni rajai, asa tung marmulia dibahen joro ni Jahowa di Jerusalem!

7:28 Nunga dipatongon Ibana tu ahu asi ni roha di adopan ni rajai dohot di adopan ni wakil ni rajai dohot di adopan ni saluhut induk ni rajai, angka na marhuaso. Jadi lam margogo ma ahu hombar tu panogunoguon ni Jahowa, Debatangku manumpak ahu, jala hupaluhut sian Israel induk angka na nangkok rap dohot ahu.

Esra 8

8:1 On do goargoar ni angka induknasida marompuompu dohot aturan ni partubunasida, angka na nangkok rap dohot ahu sian Babel, uju hinarajahon ni raja Artasasta.

8:2 Sian pinompar ni si Pinehas: Si Gerson; sian pinompar ni si Itamar: Si Daniel; sian pinompar ni si Daud: Si Hantus.

8:3 Sian pinompar ni si Sekania dohot si Paras: Si Sakaria rap dohot angka baoa donganna saompu, saratus limapulu halak toropna.

8:4 Sian pinompar ni si Pahat-Moab: Si Eleonai, anak ni si Seraia rap dohot donganna, dua ratus halak baoa.

8:5 Sian pinompar ni si Jattu: Si Sekania anak ni si Jehasiel rap dohot donganna, tolu ratus halak baoa.

8:6 Sian pinompar ni si Adin: Si Ebed, anak ni si Jonatan rap dohot donganna, limapulu halak baoa.

8:7 Sian pinompar ni si Elam: Si Jesaya, anak ni Atalia rap dohot donganna, pitupulu halak baoa.

8:8 Sian pinompar ni si Sepatia: Si Sebadia, anak ni si Mikhael rap dohot donganna, ualupulu halak baoa.

8:9 Sian pinompar ni si Joab: Si Obaja, anak ni si Jeiel rap dohot donganna, dua ratus sampulu ualu halak baoa.

8:10 Sian pinompar ni si Selomit: Anak ni si Josipia rap dohot donganna, saratus onompulu halak baoa.

8:11 Sian pinompar ni si Bebai: Si Sakaria, anak ni si Bebai rap dohot donganna, duapulu ualu halak baoa.

8:12 Sian pinompar ni si Asgad: Si Johanan, anak ni si Hakkaban rap dohot donganna, saratus sampulu halak baoa.

8:13 Sian pinompar ni si Adonikam, angka na parpudi tubu, jala on do goarnasida: Si Elipelet, si Jeiel dohot si Semaya rap dohot donganna, onompulu halak baoa.

8:14 Sian pinompar ni si Bigpai: Si Utai dohot si Sabut rap dohot donganna, pitupulu halak baoa.

8:15 Dung i hupaluhut ma nasida di topi ni batang aek na mardalan tungkan Ahapa laos mangulon disi hami tolu ari lelengna. Jadi dung hupamanatmanat situan na torop i dohot angka malim, gabe ndang adong jumpang ahu nanggo sahalak Lepi.

8:16 Dibahen i husuru ma mangalapi si Elieser, si Ariel, si Semaya, si Elnatan, si Jarib, si Natan, si Sakaria dohot si Mesulam, i ma angka induk, tole muse si Johaiarib dohot si Elnatan, i ma pangajari angka na marroha.

8:17 Jadi hupaborhat ma nasida manopot Ido pangarajai di Kaspia pola humemehon tu pamangannasida hata angka sipatolhasonna tu Ido, tu angka hahaanggina dohot tu halak Netinim angka na di huta Kaspia, asa diboan tu hami angka parhalado di joro ni Debatanta.

8:18 Jadi diboan nasida ma tu hami, hombar tu panogunoguon ni tangan ni Debatanta di hita, sada baoa na pistar sian pinompar ni si Mahli, halak Lepi, anak ni si Israel, i ma si Serebia ro di angka anakna dohot hahaanggina, sampulu ualu halak toropna.

8:19 Tole muse si Hasabya jala donganna si Jesaya sian pinompar ni si Merari, angka hahaanggina dohot anaknasida duapulu halak toropna.

8:20 Ia sian halak Netinim, angka na nilehon ni si Daud dohot angka induk i bahen parhalado ni halak Lepi, dua ratus duapulu halak Netinim, pola dipaboa goargoar ni saluhutna i.

8:21 Dung i hutingtingkon ma disi di topi ni batang aek Ahapa sada parpuasaon asa hupaunduk hami rohanami di adopan ni Debatanami, mangidohon sian Ibana dalan na tiur di hami dohot di ianakhonnami ro di sandok ugasannami.

8:22 Ai maila do ahu anggo mangidohon sian rajai angka parangan dohot jolma parsihundul manolongi hami maralohon musu di tongan dalan; ai nunga pola hudok hami tu rajai songon on: Panogunoguon ni tangan ni Debatanami manumpak tu na denggan di saluhut jolma angka na mangalului Ibana; alai anggo gogona dohot rimasna manginona tu saluhut jolma angka na manadingkon.

8:23 Jadi marpuasa ma hami huhut mangidohon pangurupion sian Debatanami, gabe ditangihon Ibana hami.

8:24 Dung i hupapulik ma sian angka induk ni malim sampulu dua halak, i ma si Serebia dohot si Hasabya, jala hahaangginasida sampulu halak dongannasidai.

8:25 Dung i hudasingkon ma tu nasida perak dohot sere dohot ulaula, silehonlehon tu joro ni Debatanta, angka naung binasabasahon ni rajai dohot angka panuturina dohot angka indukna ro di sandok Israel na disini bahen pelean.

8:26 Alai godangna na hudasingkon tu tangannasida onom ratus limapulu talenta perak, ia ulaula perak saratus talenta, laos saratus talenta sere.

8:27 Tole muse duapulu panginuman sere na mararga saribu dirham sere dohot dua mangkuk sian tombaga marsillam songon sere na pita, argana pe doshon sere do.

8:28 Dung i ningku ma tu nasida: Na badia do hamu di Jahowa, angka ulaula i pe na badia do, ro di perak dohot sere silehonlehon sian lomo ni roha di Jahowa, Debata ni ompumuna i.

8:29 Dibahen i dungo ma hamu mangaramoti na pinalumehon i, paima sanga hamu mandasingkon angka i di jolo ni angka induk ni malim dohot halak Lepi ro di angka induk marompuompu di halak Israel di Jerusalem, di bagasan angka bilut ni joro ni Jahowa.

8:30 Jadi dijalo angka malim dohot halak Lepi ma perak dohot sere dohot ulaula na nidasing i, asa boanonnasida angka i tu Jerusalem, tu joro ni Debatanta.

8:31 Jadi borhat ma hami sian batang aek Ahapa di ari sampulu dua bulan sipaha sada, mardalan tu Jerusalem; jala tangan ni Debatanta manogunogu hami, jala dipalua hami sian tangan ni musu dohot sian halak parbajo di tongan dalan.

8:32 Jadi dung sahat hami tu Jerusalem mangulon hami disi tolu ari lelengna.

8:33 Tole paopatarihon hudasingkon hami ma perak dohot sere dohot angka ulaula di bagasan joro ni Debatanta tu tangan ni malim Meremot, anak ni si Uria, jala donganna do si Eleasar, anak ni si Pinehas, dongannasida muse si Josabad, anak ni si Jesua dohot si Noaja, anak ni si Binnui, halak Lepi duansa.

8:34 Sintong be do bilangan dohot timbangan ni saluhutna, disurathon huhut uju i timbanganna luhutna.

8:35 Ia halak angka na tarbuang na jolo, jala naung mulak sian habuangan mamelehon angka pelean situtungon tu Debata ni Israel, i ma sampulu dua lombu manguras sandok Israel, siapulu onom birubiru tunggal, pitupulu pitu anak ni birubiru dohot sampulu dua hambing tunggal bahen pelean pardosaon; saluhutna i bahen pelean situtungon tu Jahowa.

8:36 Dung i dipasahat nasida ma surat parenta ni rajai tu angka wakil ni rajai dohot tu pangarajai di bariba ni batang aek i, jadi ditumpak nasida ma situan na torop i paulihon joro ni Debata.

Esra 9

9:1 Jadi dung marujung saluhutna ondeng, ro ma angka induk manopot ahu, ninna ma: Ndang dipapulik bangso Israel, angka malim dohot halak Lepi dirina sian angka bangso parbegu marluatluat dohot sian biasbias angka na niulahonnasida, niulahon ni halak Kanaan, Het i, Perisi, Jebusi, Amoni, Moab i, Misir dohot Amori.

9:2 Ai nunga dibuat nasida sian borunasida bahen jolmanasida dohot bahen jolma ni anaknasida, nunga marsampur boni na badia i dibahen nasida marhite sian angka bangso parbegu marluatluat; jala tangan ni angka induk dohot partogi manjolohon mangulahon hajahaton on.

9:3 Jadi dung hubege barita i, husansani ma pangkeanhu dohot bajungku, huruntuni dohot obuk ni ulungku dohot misengku, laos hundul tarhatotong boti ahu.

9:4 Jadi marluhut ma tu lambungku saluhut halak na manonditnondit mida hata ni Debata ni Israel, ala pangalaosion ni halak angka na ro sian habuangan; alai laos hundul tarhatotong boti anggo ahu sahat ro di tingki pamelean bodarina i.

9:5 Jadi marhira jumpang tingki pameleon bodarina i hehe ma ahu sian hajepolonku laos mamangke pangkean dohot bajungku na sinansanan i, jala marsinggang ahu huhut paherbang tanganku duansa tu Jahowa, Debatangku.

9:6 Dung i ningku ma: Ale Debatangku, maila do ahu nian jala Debatangku, ai nunga tung disalpui hajahatonnami ulunami, jala na balga situtu salanami maungaung sahat ro di banua ginjang.

9:7 Olat ni tingki ni angka ompunami rasirasa sadarion hami di bagasan sala na godang, jala ala ni hajahatonnami umbahen naung pinasahat nang hami, nang rajanami, nang malimnami tu bagasan tangan ni angka raja marluatluat, na ripe suda bahenon ni podang, habuangan, tabantaban dohot hailaon ni bohi, songon na andar sadarion.

9:8 Alai anggo nuaeng hira jumpangan asi ni roha hami satongkin sian Jahowa, Debatanami ala ditebahon dope di hami jolma angka na malua dohot marbasabasahon tu hami nanggo sada labang hau di inganan na badia i, asa dipatiur Debatanami parnidaannami, jala diapuli hami muse otik di parhatobanannami.

9:9 Ai hatoban do hami tutu, alai nang di parhatobanannami ndang ditadingkon Debatanami hami, lam dipamelok tahe roha ni angka raja sian Persia marasi ni roha tu hami mangapuli rohanami otik, mangaloas hami pajongjong joro ni Debatanami dohot pauliulihon angka na maloha disi, huhut mangalehon tu hami sada parik di Juda dohot di Jerusalem.

9:10 Nuaeng pe, tung aha ma dohononnami, ale Debatanami, dung salpu angka i? Ai nunga hutadingkon hami angka tonami.

9:11 Angka naung tinonahonmu marhite sian pamangan ni angka naposom, angka panurirang i, nimmu do: Ia tano sisoluhonmuna laho manean, tano na ramun do i marhite sian haramunon ni angka bangso marluatluat, binahen ni hagigion angka na niulanasida i, pola gok tano i sian partalpahan na sada tu partalpahan na sadanari, binahen ni haramunonnasida i.

9:12 Dibahen i ndang jadi lehononmuna borumuna di anaknasida, jala ndang jadi buatonmuna borunasida di anakmuna, jala ndang jadi tumpahanmuna nasida mardame manang marhasonangan ro di salelenglelengna, asa lam margogo anggo hamu, jala manganhon na denggan di tano i, laos teanonmuna, nang anakmuna ro di salelenglelengna.

9:13 Manimbang sian saluhut naung songgop tu hami ala ni pambahenannami angka na roa i dohot ala ni salanami na godang i, tardok dope Ho marpanatap tu hami, ale Debatanami gumodang sian na tama, ala ni hajahatonnami, jala nunga dilehon Ho tu hami songon na andar sadarion.

9:14 Tung patut ma nian ulahannami mangose angka tonami, asa laho martondong tu angka bangso hagigian on? Tung so tagamon marronirimas Ho mida hami, maradu sun siap hami bahenonmu, asa unang tinggal manang malua nanggo sahalak?

9:15 Ale Jahowa, Debata ni Israel, na bonar do anggo Ho, ai tinggal dope anggo hami pasipasina malua, songon na andar sadarion; ida ma, di adopan ni Bohim do hami di bagasan hasalaannami, ai nanggo sahalak ndang manahan jongjong di adopan ni Bohim ala ni hajahaton on.

Esra 10

10:1 Jadi andorang martangiang dope si Esra, huhut manopoti dosa, sai tumatangis jala marsinggang di adopan ni joro ni Debata, marluhut ma tu lambungna sian halak Israel sada luhutan na balga situtu angka baoa, parompuan dohot dakdanak, ai tumatangis situtu situan na torop i, pola sosombopon.

10:2 Dung i ro ma alus ni si Sekania, anak ni si Jeiel, sian pinompar ni si Elam mandok tu si Esra: Nunga tutu mardosa godang hami tu Debatanami, ala olo hami marjolmahon angka parompuan sibabijalang sian bangso isi ni luaton; alai tahe adong dope sihirimon di Israel taringot tu dosa on.

10:3 Tole ma hita mambahen padan tu Debatanta, paboa ingkon palahoonnami nasa parompuan ro di tubunasida, hombar tu lomo ni Debatanta, ingkon hombar tu patik i do bahenon.

10:4 Antong hehe ma ho, ingkon sahat tu ho ma hata i, jala ingkon donganannami ho; pir ma tondim jala ulahon hata i!

10:5 Dung i hehe ma si Esra, pola dipatolon angka induk ni malim dohot halak Lepi ro di sandok Israel, paboa ingkon ulahononna hombar tu hata i; jadi marsumpa ma nasida.

10:6 Dung i hehe ma si Esra sian adopan ni joro ni Debata, jala masuk tu bagasan bilut ni si Johanan, anak ni si Eliasib. Jadi dung sahat ibana tusi, ndang mangan roti ibana manang minum aek, ala arsak ni rohana mida dosa ni halak na mulak sian habuangan.

10:7 Dung i didokkon ma martingting di Juda dohot di Jerusalem tu sude halak habuangan i, asa marluhut nasida tu Jerusalem.

10:8 Jala manang ise na so ro tusi di bagasan tolu ari on mangihuthon panuturion ni angka induk dohot sintua, ingkon haromhononhon nasa ugasanna, jala ingkon pabalion ibana sian huria habuangan i.

10:9 Jadi marluhut ma sude baoa sian Juda dohot Benjamin tu Jerusalem di bagasan tolu ari, i ma di ari duapulu bulan sipaha sia, jala hundul do sandok bangso i di alaman ni joro ni Debata, pola angka hitir nasida ala hata i dohot binahen ni udan na por.

10:10 Dung i hehe ma malim Esra, ninna ma mandok nasida: Nunga mardosa godang hamu, na pinarjolmamuna angka parompuan sibabijalang laho manambai hasalaan ni Israel na sai laon.

10:11 Nuaeng pe topoti hamu ma dosamuna tu Jahowa, Debata ni ompumuna i, jala ulahon hamu ma lomo ni rohana, ingkon sirang ma hamu sian angka bangso ni luaton dohot sian angka parompuan sibabijalang.

10:12 Jadi sandok luhutan i mangalusi, pola marsoara na gogo mandok: I ma tutu, ingkon songon hatami tu hami ulahononnami.

10:13 Alai tahe mansai torop halak, jala nunga partaonan rondo ni ari, ndang tartahan halak jongjong di balian on, jala ndada ulaon sisadari manang sidua ari, ai nunga tung godang pangalaosionnami di hata na sasada on.

10:14 Ua angka induknami nian tinggal singkat ni sandok luhutan i, manang ise pe jumpang di bagasan angka hutanta naung marjolmahon angka parompuan sibabijalang, ingkon ro di tingki angka na binuhul rap dohot angka sintua dohot panguhum ni huta i, paima sumurut sian hita parpiarpiar ni rimas ni Debatanta, ala ni dosa on.

10:15 Holan si Jonatan, anak ni si Asahel dohot si Jehseia, anak ni si Tikwa hehe mangalo hata i, jala si Mesulam dohot si Sabetai, halak Lepi manolopi juanasida i.

10:16 Jadi dibahen halak habuangan i ma songon i. Dung i dipapulik malim Esra ma deba baoa, sian angka induk marompuompu ganup sian pinompar ni ompuna be, pola digoar luhutna i; marluhut ma nasida di artia bulan sipaha sampulu mangarisik hata i.

10:17 Jadi marujung ma hata i dibahen nasida tu sude baoa angka na marjolmahon parompuan sibabijalang, sahat ro di artia bulan sipaha sada.

10:18 Jadi jumpang ma sian angka anak ni malim, angka naung marjolmahon parompuan sibabijalang, sian pinompar ni si Jesua, anak ni si Josadak dohot hahaanggina i: si Maseia, si Elieser, si Jarib, dohot si Gedalia.

10:19 Pola martopap tangan nasida, paboa ingkon paulahonna jolmanasida i, jala pelehononna sada birubiru tunggal bahen pelean pardosaan.

10:20 Sian pinompar ni si Immer: Si Hanani dohot si Sebadia.

10:21 Sian pinompar ni si Harim: Si Maseia, si Elia, si Semaya, si Jeiel dohot si Usia.

10:22 Sian pinompar ni si Pashur: Si Eleonai, si Maseia, si Ismael, si Netaneel, si Josabad dohot si Eleasa.

10:23 Sian pinompar ni si Lepi: Si Josabad, si Simei, si Kelaia (i ma si Kelita), si Petahia, si Juda dohot si Elieser.

10:24 Sian angka parende: Si Eliasib. Sian angka sijaga pintu: Si Sallum, si Telem dohot si Uri.

10:25 Sian halak Israel sandok, sian pinompar ni si Paras: Si Ramia, si Ishia, si Malkia, si Mijamin, si Eleasar, si Malkia dohot si Benaia.

10:26 Sian pinompar ni si Elam: Si Matania, si Sakaria, si Jeiel, si Abdi, si Jeremot dohot si Elia.

10:27 Sian pinompar ni si Jattu: Si Eleonai, si Eliasib, si Matania, si Jeremot, si Sabad dohot si Asisa.

10:28 Sian pinompar ni si Bebai: Si Johanan, si Hanania, si Sabai, si Atlai.

10:29 Sian pinompar ni si Bani: Si Mesulam, si Malluk dohot si Adaya, si Jashub, si Seal dohot si Jeremot.

10:30 Sian pinompar ni si Pahat-Moab: Si Adna, si Kelal, si Benaia, si Maseia, si Matania, si Besalel, si Binnui dohot si Manasse.

10:31 Sian pinompar ni si Harim: Si Elieser, si Ishia, si Malkia, si Semaya, si Simeon.

10:32 Si Benjamin, si Malluk dohot si Semaria.

10:33 Sian pinompar ni si Hasum: Si Matenai, si Matatta, si Sabad, si Elipelet, si Jeremai, si Manasse dohot si Simei.

10:34 Sian pinompar ni si Bani: Si Maadai, si Amram, si Uel.

10:35 Si Benaia, si Bedaia, si Keluhi.

10:36 Si Benaia, si Meremot, si Eliasib.

10:37 Si Matania, si Matenai, si Jasu.

10:38 Si Bani, si Binnui, si Simei.

10:39 Si Selemia, si Natan, si Adaya.

10:40 Si Maknadeboi, si Sasai, si Sarai.

10:41 Si Asarel, si Selemia, si Semaria.

10:42 Si Sallum, si Amaria, si Josep.

10:43 Sian pinompar ni si Nebo: Si Jeiel, si Matitia, si Sabad, si Sebina, si Jahdai, si Joel, si Benaia.

10:44 Luhut nasida naung marjolmahon parompuan sibabijalang jala adong do deba sian angka parompuan naung tubuan anak.