Buku Ester

Ester ᯀᯘᯩ᯲ᯖᯒᯩ᯲ 1

1:1 Dung i masa ma di angka ari ni si Serses, i ma si Serses, na mangarajai, olat ni India sahat ro di Kus, saratus duapulu pitu luat ginomgomanna. ᯑᯮᯰ ᯤ ᯔᯘ ᯔ ᯑᯪ ᯀᯰᯄ᯦ ᯀᯒᯪ ᯉᯪ ᯘᯪ ᯘᯒᯩ᯲ᯘᯘᯩ᯲ ᯤ ᯔ ᯘᯪ ᯘᯒᯩ᯲ᯘᯘᯩ᯲ ᯉ ᯔᯝᯒᯐᯤ ᯁᯬᯞᯖ᯲ ᯉᯪ ᯀᯉᯪ᯲ᯑᯪᯀ ᯘᯂᯖ᯲ ᯒᯬ ᯑᯪ ᯄ᯦ᯘᯮ᯲ ᯘᯒᯖᯘᯮ᯲ ᯑᯮᯀᯇᯮᯞᯮ ᯇᯪᯖᯮ ᯞᯮᯀᯖ᯲ ᯎᯪᯉᯔᯬ᯲ᯎᯬᯔᯉ᯲ᯉ

1:2 Jadi uju marhabangsa raja Serses sahali di atas habangsa harajaonna i di huta Susan.

1:3 Patolutaonhon hinarajaonna i, dibahen rajai ma sada panggalangon di saluhut indukna dohot angka naposona. Jadi marluhut ma angka partogi ni parangan di Persia dohot Madai ro di angka pangarajai dohot induk marluatluat di adopan ni rajai.

1:4 Asa patotondurhononna hinagodang ni hamoraon dohot hamuliaon ni harajaonna ro di hajagaron ni hatimbulonna i, pola na nia lelengna, sampe saratus ualupulu ari.

1:5 Jadi dung salpu angka ari i, dibahen rajai muse sada panggalangon di sandok situan na torop, angka na jumpang di huta Susan, nang halak na magodang, nang halak na metmet, pola pitu ari lelengna di alaman ni porlak mardonokkon bagas ni rajai.

1:6 Targantung do disi rimberimbe angka na bontar, sibolang dohot na rata disuruk dohot tali bonang na binalau dohot abit na tinubar, disuruk tu tintin perak, jala dilohothon tu tiang batu na martulis, tole angka bantal sian sere dohot perak marpeahan di pantar sian batu na martulis dohot simata landus.

1:7 Tole angka siinumon ditarehon do di bagasan panginuman sere, jala sai masisoluhan do angka panginumani marragamragam; tole anggur harajaon mansai godang, hombar tu hinagodang ni hamoraon ni rajai.

1:8 Parminumna pe tung guru sombuna be do ndang jadi ontohon, ai nunga songon i hian hata ni rajai tu sude induk di bagasan jabuna, ingkon ganup mambahen guru lomo ni rohana.

1:9 Nang si Wasti, jolma ni rajai dibahen do sada panggalangon di angka parompuan di bagasan jabu harajaon, na di raja Serses.

1:10 Tole papituarihon, uju marlas ni roha rajai binahen ni anggur, didokkon rajai ma si Mehuman, si Bista, si Harbona, si Bigta, si Abagta, si Jetar dohot si Karkas, na pitu halak naposo angka na marhalado di adopan ni raja Serses.

1:11 Asa boanonna si Wasti, jolma ni rajai tu adopan ni rajai mantat tumpal harajaon, naeng patuduhononna hinaulina tu angka bangso dohot induk, ai tung na uli utus do rupana i.

1:12 Alai manjua do anggo si Wasti, jolma ni rajai ro nidokkon ni rajai, pinasahat ni angka naposo. Jadi tarrimas situtu ma rajai, pola marpiarpiar murukna di bagasan ibana.

1:13 Dung i ro ma hata ni rajai tu halak na pistar, angka na umboto manjujur ari: Ai songon i somal hata ni rajai, ingkon dasingon ni saluhut panuturi dohot siboto patik.

1:14 Alai angka na sumolhot tu rajai, i ma: Si Karsena, si Jetar, si Admata, si Tarsis, si Meres, si Marsena dohot si Memukan, na pitu induk ni halak Persia dohot Madai, angka na somal marnida bohi ni rajai, angka na hundul di hundulan parjolo di bagasan harajaon i.

1:15 Manungkun manang aha na patut tu uhum bahenon tu si Wasti, jolma ni rajai, ala na jinouna i hata ni raja Serses, na pinasahat ni angka naposona.

1:16 Jadi ro ma alus ni si Memukan di adopan ni rajai dohot angka induk i: Ndada holan tu rajai sandiri marsala si Wasti, jolma ni rajai, dohot do tu sude induk dohot tu sude bangso, angka na maringan di saluhut luat ginomgom ni raja Serses.

1:17 Ai sar ma barita ni pambahenan ni jolma ni rajai tu sude angka parompuan, asa pis matana mida baoana tu joloan on, ai dohononnasida ma: Nunga pola dilehon raja Serses, parenta mandokkon boanon si Wasti, jolma ni rajai, tu adopan ni rajai, hape ndang ro nasida.

1:18 Jala olat ni sadarion dohonon ni angka jolma ni induk di Persia dohot Madai ma i, angka na umbege barita ni pambahenan ni jolma ni rajai tu sude angka induk ni rajai, jadi ndang mansohot haleaon, dohot hamuruhon na mardongan saripe.

1:19 Asa molo denggan di roha ni rajai, ruar ma sada parenta harajaon sian adopan ni rajai laos tarsurat tu bagasan buku patik ni halak Persia dohot Madai, angka na so jadi laosan: Na so tupa be ro si Wasti tu adopan ni rajai Serses, jala sahala harajaonna i basabasahonon ni rajai ma tu parompuan na asing na dumenggan marparange sian ibana.

1:20 Jala ingkon tingtingkononhon parenta na binahen ni rajai, asa sange umbotosa di sandok harajaonna na bolon i, jadi saluhut parompuan mangalehon hormat tu harajaannasida, nang na magodang nang na metmet.

1:21 Jadi denggan ma hata i di roha ni rajai dohot angka induk i, gabe dibahen rajai ma hombar tu hata ni si Memukan.

1:22 Dung i dipantongoshon ma angka surat tingting tu saluhut luat ginomgom ni rajai, tu ganup luat mangihuthon panurathonna dohot tu ganup bangso mangihuthon pangkulingna mandok: Ingkon ganup baoa mangarajai di bagasan jabuna, jala ingkon marpangkuling hombar tu pangkuling ni bangsona.

Ester 2

2:1 Jadi dung salpu angka jamita ondeng, dung mombun rimas ni raja Serses, diingot rohana ma si Wasti ro di naung binahenna dohot naung tinuptupna taringot tu nasida.

2:2 Dung i ro ma hata ni angka naposo ni rajai, angka pahaladona i mandok: Ingkon ririton nian di rajai boruboru angka namarbaju, angka na uli rupa.

2:3 Ingkon pabangkiton ni rajai nian angka jolma simatamatai di saluhut luat ginomgomanna i, asa dipapungupungu sude boruboru namarbaju, angka na uli rupa tu huta Susan, tu bagasan jabu parpunguan ni boruboru i, na marpandapotan tu si Hegai, naposo ni rajai, siramoti angka parompuan, ingkon lehonon nian huhut miak parpangiron.

2:4 Jala boruboru namarbaju, lomo ni roha ni rajai, ingkon i ma nian pabangkiton gabe jolma ni rajai singkat ni si Wasti. Jadi denggan ma hata i di roha ni rajai, jala dibahen songon i.

2:5 Alai adong ma uju i di huta Susan sada baoa Jahudi na margoar si Mordahai, anak ni si Jair, i ma anak ni si Simei, i ma anak ni si Kis, halak Benjamin.

2:6 Naung tarbuang sian Jerusalem rap dohot halak na tarbuang uju tarboan si Joiakin raja sian Juda, na binuangkon ni si Nebukadnesar, raja sian Babel.

2:7 Ibana ma ama pagodanggodang si Hadasa, i ma si Ester boru ni amangtuana, ai ndang adong be amana manang inana; na uli utus do pardagingonna, uli dohot rupana. Jadi dung mate amana dohot inana, ro ma si Mordahai mangain nasida.

2:8 Jadi dung sar hata ni rajai dohot patikna, jala nunga nania torop boruboru dipapungupungu tu huta Susan, marpandapotan tu si Hegai, tarboan ma dohot si Ester tu bagasan jabu ni rajai, marpandapotan tu si Hegai, siramoti angka parompuan.

2:9 Jadi lomo ma rohana mida boruboru namarbaju i, jala jumpangan asi ni roha di adopanna, hapogan ma ibana mangalehon angka miak parpangiron dohot parjambaran naung binuhul tu nasida dohot na pitu boruboru silehonon sian jabu ni rajai bahen pandonganina. Dung i dipatongon ma tu ibana dohot tu boruboru pandonganina i bilut na dumenggan di jabu parpunguan i.

2:10 Alai ndang dipaboaboa si Ester bangsona manang hulahulana, ai nunga ditonahon si Mordahai hian tu nasida, na so jadi paboaboaonna.

2:11 Alai ariari si Mordahai mardalandalan di jolo bagas parpunguan ni parompuan i, asa diboto manang na sonang dihilala si Ester, jala manang aha binahenna tu nasida.

2:12 Alai molo dung jumpang gansi ni ganup namarbaju, asa bongot ibana tu adopan ni raja Serses, di ujung ni tingki naung binuhul hian tu angka parompuan, pola sampulu dua bulan lelengna; ai songon on do panggohina di angka ari parpangiron: Onom bulan marpangir dohot miak mir, jala onom bulan muse dohot miak na hushus marragamragam, pinangke ni parompuan hian.

2:13 Ia dung songon i masuk ma namarbaju i tu adopan ni rajai, tung guru dokna do mangido manang aha boanonna sian jabu parpunguan ni boruboru laho masuk tu jabu ni rajai.

2:14 Ia bodarina i ibana masuk, manogotna i muse ibana mulak tu jabu paduahon parpunguan ni boruboru, marpandapotan tu si Saasgas, naposo ni rajai, siramoti angka rading; jala ndang jadi be ro tu jolo ni rajai, nda ingkon lomo ni rajai di ibana, jala dijou goarna.

2:15 Jadi dung jumpang gansi ni si Ester, boru ni si Abigail, amangtua ni si Mordahai, naung niainna i bahen boruna, asa masuk tu adopan ni rajai, ndang adong agia aha dipangido, dungkon ni na nidokkon ni si Hegai, naposo ni rajai, siramoti angka parompuan. Jadi jumpangan asi ni roha ma si Ester sian saluhut halak na marnida ibana.

2:16 Jadi tarboan ma si Ester tu adopan ni raja Serses, tu bagasan jabu ni rajai di bulan sipaha sampulu, i ma bulan Tebet, papitutaonhon hinarajaonna i.

2:17 Jadi humolong ma roha ni rajai mida si Ester, asa mida sude parompuan na asing, jumpangan asi dohot talup ni roha ibana di adopan ni rajai, gumodang sian saluhut namarbaju i; jadi dibahen rajai ma sada tumpal harajaon tu uluna, jala dipabangkit gabe raja, singkat ni si Wasti.

2:18 Dung i dibahen rajai ma sada panggalangon na bolon di saluhut indukna dohot naposona; panggalangon ala si Ester ma i. Dung i marari raya ma saluhut luat didokkon rajai, jala mangalehon asiasi ibana, hombar tu hamoraon ni rajai.

2:19 Tole laho papunguhon angka namarbaju paduahalihon hundul ma si Mordahai di pintu ni jabu ni rajai.

2:20 Alai ndang dipaboaboa si Ester hulahulana dohot bangsona, songon na tinonahon ni si Mordahai hian tu nasida, ai guru dok ni Mordahai dioloi si Ester, suang songon uju pinagodanggodangna nasida.

2:21 Di angka ari uju hundulhundul si Mordahai di pintu ni jabu ni rajai, tarrimas ma dua naposo ni rajai, goarna si Bigtan dohot si Teres, sian angka sijaga lobulobu, pola mangalului dalan naeng todosonna rajai.

2:22 Tarbortik ma hata i tu si Mordahai, gabe dipaboa ma i tu si Ester jolma ni rajai, jala si Ester muse paboahon tu rajai marhite sian goar ni si Mordahai.

2:23 Jadi dung disulingkit hata i, sintong do hape dapotsa; laos targantung nasida duansa tu hau, jala tarsurat hata i di bagasan buku jamita ariari na di adopan ni rajai.

Ester 3

3:1 Dung salpu angka jamita ondeng dipasangap raja Serses ma si Haman, anak ni si Hamedata, pinompar ni si Agag, jala dipatimbul ibana, jala tumimbo hundulanna dibahen sian hundulan ni saluhut induk donganna i.

3:2 Jala saluhut naposo ni rajai, angka na di pintu ni jabu ni rajai marsomba tu si Haman, pola marsinggang di jolona, ai songon i do tona ni rajai taringot tu ibana; alai anggo si Mordahai ndang olo marsinggang manang marsomba.

3:3 Dung i ninna angka naposo ni rajai ma, angka na di pintu ni jabu ni rajai, tu si Mordahai: Boasa tung laosanmu tona ni rajai?

3:4 Jadi dung songon i didok nasida ariari tu ibana, hape ndang ditangihon ibana hatanasida i, dipaboa nasida ma i tu si Haman, naeng idaonna antong manang na tarhajongjongkon si Mordahai angka hatana i, ai adong do na paboahon tu nasida halak Jahudi ibana.

3:5 Jadi dung diida si Haman, na so marsinggang si Mordahai manang marsomba tu ibana, gabe tarrimas situtu ma si Haman.

3:6 Alai maleahu di rohana laluhononna tanganna holan tu si Mordahai; ai nunga dipaboa halak tu ibana bangso ni si Mordahai, jadi ditahi roha ni si Haman naeng rendephononna sude halak Jahudi, angka na di sandok harajaon ni si Serses, ala bangso ni si Mordahai nasida.

3:7 Tole di bulan sipaha sada, i ma bulan Nisan, pasampuluduataonhon hinarajahon ni raja Serses mandabu tondung ma halak, i ma Pur, di adopan ni si Haman manjujur ari na denggan, pola marbulanbulan lelengna sahat ro di bulan hurung, i ma bulan Adar.

3:8 Dung i ninna si Haman ma mandok raja Serses: Adong do sada bangso na marserak, jala mampar tu tongatonga ni angka bangso di saluhut luat ginomgomanmu; patiknasidai asing do sian patik ni saluhut bangso, jala ndang diturut nasida patik ni rajai; dibahen i ndang patut pasombusombuon ni rajai nasida songon i.

3:9 Molo denggan di roha ni rajai, dibahen ma nian surat mandokkon bunuon nasida; asa hudasingkon saloksa talenta perak tu bagasan tangan ni halak na pasauthon ulaon i, asa boanonna tu bagasan bilut parartaan ni rajai.

3:10 Dung i diumpat rajai ma tintinna sian tanganna, jala dilehon do i tu si Haman, anak ni si Hamedata, pinompar ni si Agag, alo ni halak Jahudi.

3:11 Dung i ninna rajai ma tu si Haman: Sahat tu ho ma anggo perak i nang bangso i, asa bahenonmu tusi guru lomo ni roham.

3:12 Jadi dijou ma angka juaratulis ni rajai, di bulan sipaha sada, ari sampulu tolu di bulan i, gabe disurat ma guru pangaturhon ni si Haman tu angka induk ni rajai dohot tu angka pangarajai marluatluat dohot tu angka induk marsasabangso marluatluat mangihuthon panurathon dohot pangkuling ni ganup bangso, marhite sian goar ni raja Serses do disurat, dibahen huhut tintin sahap ni rajai tusi.

3:13 Jadi dipantongoshon ma angka surat i marhite sian halak parsihundul tu sandok luat ni rajai, mandokkon rotongkononhon, bunuon jala agoon saluhut halak Jahudi, sian na bajar ro di na tuatua, posoposo dohot parompuan di bagasan sadari, i ma di ari sampulu tolu bulan hurung, i ma bulan Adar, huhut do pupusan barangnasida i.

3:14 I ma hata ni surat i mangalehon parenta tu sude luat pabotohononhon tu sude bangso, asa ingkon managam be di ari naung binuhul i.

3:15 Dung i borhat ma angka parsihundul i, pola mangenjak didokkon rajai; tarlehon do parenta i di huta Susan; minum anggur do rajai rap dohot si Haman, alai tarhatotong do anggo isi ni huta Susan.

Ester 4

4:1 Alai dung diboto si Mordahai saluhut na masa i, disansani si Mordahai ma angka ulosna, jala marulos tangki dohot sirabun ibana, laos ruar ibana tu tongatonga ni huta i huhut mangangguk badar dohot mangandungi.

4:2 Jadi ro ma ibana sahat tu jolo pintu jabu ni rajai, ai ndang jadi masuk halak tu bagasan pintu jabu ni rajai anggo marulos tangki.

4:3 Nang di saluhut luat hasahatan ni hata dohot parenta ni rajai, masa do angguk badar di halak Jahudi dohot parpuasaon, partangison dohot andung, jala torop halak marpeahan di sirabun marulos tangki.

4:4 Dung i ro ma boruboru pandongani ni si Ester rap dohot angka naposona pabotohon barita i tu nasida gabe holsoan situtu ma roha ni jolma ni rajai, laos ditongoshon ma pangkean solukkonon ni si Mordahai, jala tanggalanna sian dagingna tangkina, alai ndang dijalo.

4:5 Dung i dijou si Ester ma si Hatak, sada sian naposo ni rajai, na nidokkonna marhaladoi di adopannasida, laos disuru ibana manopot si Mordahai, asa diboto manang aha na masa dohot alana.

4:6 Jadi ruar ma si Hatak mandapothon si Mordahai tu alaman ni huta na di jolo pintu ni jabu ni rajai.

4:7 Dung i dipaboa si Mordahai ma tu ibana saluhut na masa tu ibana dohot godang ni perak, naung pinarbaga ni si Haman dasingkononna tu arta ni rajai, molo jadi agoonna halak Jahudi.

4:8 Dilehon huhut tu ibana sada surat parenta, naung nilehon di Susan mandokkon agoon nasida, asa patuduhononna tu si Ester pabotohon barita i, huhut mandokkon nasida masuk tu adopan ni rajai, mangidohon asi ni rohana, mangondihon bangsona i di adopanna.

4:9 Dung i ro ma si Hatak pabotohon tu si Ester angka hata ni si Mordahai.

4:10 Alai ninna si Ester ma tu si Hatak, laos ditonai ibana pasahathon hata on tu si Mordahai:

4:11 Sude naposo ni rajai dohot sandok bangso di angka luat ni rajai tangkas umbotosa manang ise baoa manang parompuan na masuk tu adopan ni rajai tu alaman parbagasan, na so jinouna, sada do patikna, ingkon marutang hosa do, dungkon ni molo disurdukkon rajai tungkot harajaon sere tu ibana, asa mangolu ibana. Alai anggo ahu ndang tarjou ahu masuk tu adopan ni rajai, nunga pola tolupulu ari.

4:12 Jadi dipasahat nasida ma angka hata ni si Ester tu si Mordahai.

4:13 Alai ro ma muse alus ni si Mordahai mandok tu si Ester; unang ma ninna roham, ala di bagasan jabu ni rajai ho umbahen malua ho, jumolo sian saluhut halak Jahudi na asing.

4:14 Ai tung sura mauhom boti ho di tingki on, ro do nian panolongion dohot haluaon di halak Jahudi sian inganan na asing; alai mago ma anggo ho dohot pinompar ni amangmu. Angkup ni, ise umbotosa, atik ala ni tingki on do umbahen sahat harajaon tu ho?

4:15 Dung i ditonahon si Ester ma tu si Mordahai:

4:16 Laho ma ho paluhuthon saluhut halak Jahudi, angka na jumpang di Susan, jala marpuasa ma hamu manangiangkon ahu, unang hamu mangan manang minum tolu ari on, arian dohot borngin; ahu pe rap dohot boruboru pandonganingku marpuasa songon i, dung pe songon i asa masuk ahu tu adopan ni rajai, atik pe pantang bolon nian; molo tung mago ahu, ba mago ahu tusi!

4:17 Dung i laho ma si Mordahai jala dibahen ma, hombar tu sude naung tinonahon ni si Ester tu ibana.

Ester 5

5:1 Tole patoluarihon marpangkean harajaon ma si Ester jala jongjong di alaman parbagasan mardonokkon jabu ni rajai, tondong ni jabu ni rajai tahe, alai hundul di habangsa harajaonna i anggo rajai di bagasan jabu ni rajai, tondong ni pintu ni jabu i.

5:2 Jadi dung diida rajai si Ester, jolma ni rajai, jongjong di alaman, lomo ma roha ni rajai marnida si Ester, laos disurdukkon rajai ma tu si Ester tungkot harajaon sere na di bagasan tanganna. Dung i dipajonok si Ester ma, laos dijama ma ujung ni tungkot harajaon i.

5:3 Dung i ninna rajai ma tu nasida: Aha do na hurang di ho, ale Ester, jolma ni raja, jala aha do na pinangido ni roham? Sahat ro di satonga ni harajaon i ingkon lehonon do i tu ho.

5:4 Alai ninna si Ester ma: Molo tung denggan di roha ni rajai, sai ro ma rajai rap dohot si Haman sadarion tu panggalangon na hupauli di ibana.

5:5 Dung i ninna rajai ma: Haru silu ma dokkon hamu si Haman pasauthon hata ni si Ester! Jadi dung ro rajai dohot si Haman tu panggalangon, na pinadiri ni si Ester.

5:6 Mangkuling ma rajai mandok tu si Ester, dung sombu rohana minum anggur: Aha do na pinangido ni roham, ingkon lehonon do i tu ho, jala aha do sihol ni roham ro di satonga ni harajaon i, ingkon pasauton do.

5:7 Jadi ninna si Ester ma mangalusi: Pangidoanku dohot sihol ni rohangku on do:

5:8 Molo asi roha ni rajai marnida ahu, jala molo denggan di roha ni rajai mangalehon pangidoanku dohot pasombu sihol ni rohangku, sai ro ma rajai rap dohot si Haman tu panggalangon na hupauli di nasida, jadi marsogot ma bahenonku hombar tu hata ni rajai.

5:9 Dung i ruar ma si Haman di ari na sasada i marlas ni roha jala marhasonangan; alai dung diida si Haman si Mordahai di pintu ni tarrimas situtu ma si Haman mida si Mordahai.

5:10 Alai ditiopi si Haman dirina, laos sahat ma ibana tu jabuna; dung i disuru ma mangalapi angka alealena dohot si Seres jolmana i.

5:11 Dung i dipajojor si Haman ma tu nasida hamuliaon ni hamoraonna dohot hinadeak ni angka anakna, ro di sude pambahen ni rajai pasangap ibana, jala naung pinatimbona ibana gumodang sian angka induk dohot naposo ni rajai.

5:12 Angkup ni didok si Haman: Ndang adong nanggo sahalak didokkon si Ester, jolma ni rajai ro tu panggalangon na pinaulina i, dongan ni rajai, dungkon ni ahu; nang marsogot sasada ahu do dijou mangan rap dohot rajai.

5:13 Alai saluhutna i ndang tau pasombu rohangku, saleleng huida dope si Mordahai, halak Jahudi i, hundul di pintu ni jabu ni rajai.

5:14 Dung i ro ma hata ni si Seres jolmana i dohot sude alealena mandok tu ibana: Ua pinajongjong nian sada tiang limapulu asta timbona, jala marsogotna i pinaboa tu rajai, asa targantung si Mordahai tusi, asa marlas ni roha ho ro rap dohot rajai tu panggalangon i. Jadi denggan ma hata i di roha ni si Haman, laos didokkon ma pajongjongon tiang i.

Ester 6

6:1 Di borngin na sasada i ndang tarnono mata ni rajai, jadi didokkon ma boanon buku parningotan di angka jamita ariari, laos dijaha ma angka i di adopan ni rajai.

6:2 Jadi jumpangsa ma tongon na tarsurat, naung pinalumba ni si Mordahai taringot tu si Bigtan dohot si Teres na dua naposo ni rajai sian halak sijaga lobulobu, angka naung marsangkap naeng laluhononna tanganna tu raja Serses.

6:3 Dung i ninna rajai ma: Aha do upa manang hatimbulon naung itabahen tu si Mordahai balosna? Dung i ninna angka dolidoli, parhalado ni rajai ma: Ndang adong agia aha itabahen tu ibana balosna.

6:4 Dung i ninna rajai ma: Ise do di alaman i? Ai nunga ro si Haman tu alaman parbalian ni jabu ni rajai naeng dohononna tu rajai, asa targantung nian si Mordahai tu hau naung pinajongjongna di ibana.

6:5 Dung i ninna angka naposo ni rajai ma tu ibana: Ida ma, si Haman do jongjong di alaman i. Dung i didok rajai ma: Denggan ibana masuk.

6:6 Jadi dung masuk si Haman, ninna rajai ma mandok ibana: Ingkon songon dia do bahenon tu baoa sigodang ni rohangku pasangaphon ibana? Jadi marhusari ma si Haman di bagasan rohana: Tung ise ma tagamon sigodang ni roha ni rajai, naeng marmulia bahenonna, ia so ahu?

6:7 Dibahen i didok si Haman ma tu rajai: Ia baoa sigodang ni roha ni rajai naeng pasangaponna.

6:8 Ingkon boanon ni halak nian sada pangkean harajaon, naung somal pinarulos ni rajai dohot hoda naung somal hinundulan ni rajai, jala ingkon bahenon nian sada tumpal harajaon tu uluna.

6:9 Ingkon lehonon nian pangkean dohot hoda i tu tangan ni sahalak sian angka induk ni rajai, sian halak angka na sumangap, asa diparuloshon pangkean i tu baoa sigodang ni roha ni rajai, na naeng pasangaponna, jala pahundulonna ibana tu atas hoda i, laos togutoguonna di angka alaman ni huta i, huhut tingtingkononna di jolona: Ingkon songon i do bahenon tu baoa sigodang ni roha ni rajai pinasangapna i.

6:10 Dung i didok rajai ma tu si Haman: Haru gira ma buat pangkean i dohot hoda na nidokmi, dung i bahen ma songon i tu si Mordahai halak Jahudi i, na hundulhundul di pintu ni jabu ni rajai, na so tupa hurang nanggo sahata sian naung nidokmi.

6:11 Jadi dibuat si Haman ma pangkean dohot hoda i, jala diparuloshon tu si Mordahai, jala dipahundul ibana tu hoda i, laos ditogutogu di angka alaman ni huta i, jala ditingtingkon di jolona: Ingkon songon i do bahenon tu baoa sigodang ni roha ni rajai laho pasangaphon ibana.

6:12 Dung i mulak ma anggo si Mordahai tu pintu ni jabu ni rajai; alai humalaput ma anggo si Haman mulak tu jabuna margudompong jala martujung uluna.

6:13 Dung i dipajojor si Haman ma tu si Seres jolmana i dohot tu sude alealena, saluhut naung masa tu ibana. Dung i ro ma hata ni alealena, angka na pistar i dohot hata ni si Seres jolmana i mandok tu ibana: Molo tung sian pinompar ni halak Jahudi si Mordahai, parbingkasanmu mamungka tinggang maralohon ibana, ndang tagamon manahan ho di adopanna, ingkon tunduk situtu na ma ho.

6:14 Andorang mangkatai dope nasida dohot ibana, nunga sahat angka naposo ni rajai, jala humalaput naeng mangarahon si Haman tu panggalangon, naung binahen ni si Ester.

Ester 7

7:1 Jadi dung ro rajai dohot si Haman, naeng minum rap dohot si Ester jolma ni rajai.

7:2 Ro ma hata ni rajai tu si Ester nang paduaarihon, dung sombu minum anggur: Aha do na pinangidom, ale Ester, jolma ni rajai? Ingkon lehonon do i tu ho; jala aha do sihol ni roham? Sahat ro di satonga ni harajaon i, ingkon pasahaton do.

7:3 Dung i ninna si Ester, jolma ni rajai ma mangalusi: Molo naung jumpangan asi ni roha ahu di adopanmu, ale rajanami, jala molo tung denggan di roha ni rajai, sai pangolu ma hosangku ala pangidoanku, pangolu dohot hosa ni bangsongku, pasombu sihol ni rohangku.

7:4 Ai nunga targadis hami, nang ahu nang bangsongku asa siaphononhon, bunuon dohot agoon; ummaha dope tung sura targadis hami, gabe hatoban baoa manang boruboru, jala masip boti ahu; ai ndang tartimbang musu panosahi harugian ni rajai.

7:5 Dung i ninna raja Serses ma mandok tu si Ester, jolma ni rajai: Ai ise do ibana? Jala didia do ibana na hum marsangkap di bagasan rohana naeng mambahen songon i?

7:6 Dung i ninna si Ester ma: Baoa alo i, jala musu i, i ma si Haman na jahat on! Jadi tarmali tondi ma si Haman dibahen biarna maradophon rajai dohot jolma ni rajai.

7:7 Dung i hehe ma rajai di bagasan rimasna sian na minum anggur, laos laho ibana tu porlak mardonokkon bagasna i; alai laos jongjong tarhatotong anggo si Haman mangido tu si Ester, jolma ni rajai pangoluonna hosana; ai nunga tangkas diida naung putus roha ni rajai pasonggophon hamagoan tu ibana.

7:8 Alai dung mulak rajai sian porlak mardonokkon bagasna i tu bagasan bagas parminuman anggur, bustang ma didapot si Haman di atas bantal, hundulan ni si Ester, gabe didok rajai ma: Tung dohot do di lambungku di bagasan jabungku naeng gogoanna jolma ni rajai? Disi ruar hata i sian pamangan ni rajai, pintor dihungkupi halak ma bohi ni si Haman.

7:9 Dung i ro ma hata ni si Harbona, sada sian angka naposo di adopan ni rajai, ninna ma: Ida ma, jongjong huhut sada tiang di lambung jabu ni si Haman, limapulu asta timbona, naung binahen ni si Haman di si Mordahai, naung mandok hata parhorasan tu rajai. Dung i ninna rajai ma: Gantungkon hamu ma ibana tusi!

7:10 Jadi digantungkon nasida ma si Haman tu tiang, naung pinajongjongna hian di si Mordahai. Dung i mombun ma rimas ni rajai.

Ester 8

8:1 Laos di ari na sasada i dibasabasahon raja Serses tu si Ester jolmana i bagas ni si Haman, musu tihus ni halak Jahudi; si Mordahai pe ro do tu adopan ni rajai, ai nunga dipaboa si Ester tuturna tu si Mordahai.

8:2 Dung i diumpat rajai ma tintinna, naung binuatna i sian si Haman, jala disolukkon tu si Mordahai, laos dipabangkit si Ester do si Mordahai panahatan ni bagas ni si Haman.

8:3 Dung i diulahi si Ester muse mandok hatana di adopan ni rajai, pola marsinggang tu jolo ni patna, tumatangis huhut marhuraja tu ibana, asa disundati rajai hajahaton ni si Haman, pinompar ni si Agag dohot tahi ni rohana naung sinangkapna dompak halak Jahudi.

8:4 Jadi disurdukkon rajai ma tungkot harajaon sian sere tu si Ester, gabe hehe ma si Ester, laos jongjong di adopan ni rajai.

8:5 Ninna ma: Molo tung denggan di roha ni rajai, jala molo nunga jumpangan asi ni roha ahu di adopanna, molo bonar dohot hata i di adopan ni rajai, jala lomo roha ni rajai marnida ahu, dibahen ma nian surat manulak hata ni angka surat sangkap ni si Haman, anak ni si Hamedata, pinompar ni si Agag, angka naung sinuratna mandokkon agoon halak Jahudi, angka na marserak di saluhut luat ni rajai.

8:6 Ai tung tarpaidaida ahu ma hamagoan na mangonai tu bangsongku, tung sura? Tung tarpaidaida ahu ma hamagoan ni hulahulangku?

8:7 Dung i ninna raja Serses ma tu si Ester jolmana i dohot tu si Mordahai halak Jahudi: Ida ma, nunga pola hulehon bagas ni si Haman tu si Ester, jala si Haman i nunga targantung tu hau, ala naung dilaluhon tanganna tu halak Jahudi.

8:8 Alai anggo hamu, jadi do tongosanmuna surat tu halak Jahudi, guru lomo ni rohamuna marhite sian goar ni rajai, huhut mansahap surat i marhite sian tintin sahap ni rajai; ai surat naung sinurat marhite sian goar ni rajai, jala tarsahap marhite sian tintin sahap ni rajai, na so tupa tulak.

8:9 Jadi tarjou ma angka juaratulis ni rajai di tingki uju i, di bulan sipaha tolu, i ma bulan Sipan, di ari duapulu tolu bulan i. Jadi disurat nasida ma saluhut hombar tu pangaturhon ni si Mordahai tu halak Jahudi dohot tu angka induk, pangarajai dohot partogi marluatluat, olat ni India sahat ro di tano Kus, saratus duapulu pitu luat, tu ganup luat mangihuthon panurathonna dohot tu ganup bangso mangihuthon pangkulingna, nang tu halak Jahudi mangihuthon panurathon dohot pangkulingnasida i.

8:10 Jadi disurat nasida ma i marhite sian goar ni raja Serses, laos disahap marhite sian tintin sahap ni rajai. Dung i ditongoshon ma angka surat i marhite sian halak parsihundul di hoda, angka na tangkas niajaran ni halak na sangap marenjak.

8:11 Maningtingkon paboa naung niloas ni rajai halak Jahudi, manang di huta dia pe marpungupungu pangoluhon hosanasida i, huhut mangarontongkon, mambunu dohot mangago nasa huaso ni bangso manang isi ni luat, angka na pasosaksosak nasida. Jadi do huhut laumonna angka dakdanak, parompuan dohot ugasannasida i.

8:12 Laos di ari na sasada i sude luat ni raja Serses, di ari sampulu tolu bulan hurung, i ma bulan Adar.

8:13 Alai anggo hata ni surat i on do: Nunga nilehon parenta di saluhut luat, papataron tu sandok bangso, palumbahon ingkon hobas halak Jahudi di ari na sasada i marlulu dompak musunasida i.

8:14 Jadi halak parsihundul di hoda, angka na tangkas niajaran i, halak na sangap marenjak, borhat be ma mamatak hoda i, nidokkon ni rajai; tarlehon huhut parenta i di huta Susan.

8:15 Alai ruar ma anggo si Mordahai sian adopan ni rajai marpangkean harajaon, marabit surta na tinubar jala marhaen na halus, jala martumpal sere na bolon, jala marsalendang sian bonang na saksak saor surta na rara, jala sandok isi ni huta Susan marolopolop huhut marlas ni roha.

8:16 Binsar ma anggo di halak Jahudi hatiuron, las ni roha, hasonangan dohot hamuliaon.

8:17 Jadi di saluhut luat dohot di saluhut huta hasampean ni hata ni rajai dohot parentana, masa ma las ni roha dohot hariburon di halak Jahudi, panggalangon dohot ari raya. Jadi torop halak sian angka bangso ni luat i masuk Jahudi, ai songgop do marsibalik hasonggoton mida halak Jahudi.

Ester 9

9:1 Tole di bulan hurung, i ma bulan Adar, di ari sampulu tolu bulan i, naung binuhul ni hata ni rajai dohot parentana ulahononhon nian, di ari naung hinirim ni angka musu ni halak Jahudi tunduk nasida bahenonna, hape marsibalik do tahi, halak Jahudi balik patundukkon halak na mangkagigihon nasida.

9:2 Jadi marpungupungu ma halak Jahudi di bagasan hutanasida dohot di saluhut luat ni raja Serses, asa mangalaluhon tangan tu halak na naeng mangago nasida, jala ndang manahan jongjong nanggo sahalak maradophon nasida, ai biar mida nasida songgop do tu saluhut bangso.

9:3 Tole saluhut induk ni angka luat dohot pangarajai dohot partohonan pinabangkit ni rajai dohot halak angka na mangaradoti ulaon ni rajai, pasangaphon halak Jahudi; ai songgop do tu nasida biar mida si Mordahai.

9:4 Ai tung na timbul do si Mordahai di bagasan jabu ni rajai, jala baritana marlupuk tu saluhut angka luat; ai lam leleng, lam timbul do halak si Mordahai.

9:5 Jadi dipatunduk halak Jahudi ma saluhut musunasida i marhite sian podang, bunubunu dohot harendepon, tung guru lomo ni rohana do dibahen nasida tu halak na mangkagigihon nasida.

9:6 Di huta Susan pe dibunu jala diago halak Jahudi do lima ratus baoa.

9:7 Dibunu nasida huhut si Parsandata, si Dalpon, si Aspata.

9:8 Si Porata, si Adalia, si Aridata.

9:9 Si Parmasta, si Arisai, si Aridai dohot si Waisata.

9:10 I ma na sampulu anak ni si Haman, anak ni si Hamedata, musu tihus ni halak Jahudi, alai ndang dihahua anggo ugasannasida.

9:11 Laos di ari na sasada i sahat do bilangan ni jolma angka na binunu di bagasan huta Susan tu adopan ni rajai.

9:12 Dung i ninna rajai ma tu si Ester jolmana i, nunga dibunu halak Jahudi di huta Susan lima ratus baoa, direndephon dohot na sampulu anak ni si Haman; aha ulaning binahennasida di luat ni rajai angka na asing, jala aha dope pangidoanmu? Ingkon lehonon do i tu ho, jala aha dope sihol ni roham? Ingkon pasauton do!

9:13 Dung i ninna si Ester ma: Molo tung denggan di roha ni rajai, sai diloas rajai ma nang marsogot halak Jahudi angka na di Susan mangulahon hombar tu parenta sadarion, asa digantung nasida na sampulu anak ni Haman i tu hau.

9:14 Jadi didokkon rajai ma ingkon songon i bahenon, parenta i pe dilehon do di Susan, jala na sampulu anak ni si Haman digantungkon do i.

9:15 Nang di ari sampulu opat, bulan Adar marpungupungu do halak Jahudi, angka na di Susan, jala dibunui di Susan tolu ratus halak; alai ndang dais tangannasida anggo tu ugasannasida i.

9:16 Alai anggo pasipasi ni halak Jahudi, angka na di luat ni rajai marpungupungu do pangoluhon hosanasida i, gabe marhasonangan maradophon musunasida i, jala dibunui halak na mangkagigihon nasida pitupulu lima ribu halak; alai ndang dais tangannasida anggo tu ugasannasida i.

9:17 I ma na masa di ari sampulu tolu, bulan Adar, gabe marhasonangan nasida di ari sampulu opat bulan i, gabe dibahen nasida ma i ari panggalangan dohot las ni roha.

9:18 Alai anggo halak Jahudi, angka na di Susan marpungu do di ari sampulu tolu dohot sampulu opat, jala marhasonangan di ari sampulu lima bulan i, jala dibahen ma i ari panggalangan dohot las ni roha.

9:19 Dibahen i anggo halak Jahudi, angka na maringan di angka huta pagaran, ari sampulu opat bulan Adar dibahen nasida, ari las ni roha, panggalangon dohot ari raya, laos masipiringan nasida disi ganup tu alealena.

9:20 Dung i disurathon si Mordahai ma angka jamita on, jala ditongoshon angka surat tu sude halak Jahudi, angka na maringan di saluhut luat ni raja Serses, tu angka na jonok dohot tu angka na holang.

9:21 Umpatikkon di nasida, ingkon marari raya nasida di ari sampulu opat dohot sampulu lima bulan Adar ganup taon.

9:22 Bahen ari parningotan di hasonangan ni halak Jahudi maradophon musunasida i; ai di bulan i do martungkar gondok ni rohanasida gabe las ni rohana, jala arsak ni rohanasida, gabe ari raya; ingkon bahenonnasida do angka ari i gabe ari panggalangan dohot las ni roha, jala masipiringan ganup dohot alealena, huhut marsilehonlehon tu halak na pogos.

9:23 Dung i diundukkon halak Jahudi ma, ingkon ulahononna naung pinungkana i dohot naung sinurat ni si Mordahai tu nasida.

9:24 Ai nunga pola disangkap si Haman, anak ni si Hamedata, pinompar ni si Agag, musu tihus ni sude halak Jahudi, naeng agoonna nasida; nunga pola didabu tondung, i ma Pur, naeng maniaphon dohot mangago nasida.

9:25 Alai dung masuk si Ester tu adopan ni rajai, dilehon rajai ma surat parenta, ingkon tulak sangkapna hamagoan, naung sinangkap ni si Haman dompak halak Jahudi, marsibalik songgop tu uluna, gabe targantung ibana dohot angka anakna tu hau.

9:26 Ala ni do umbahen digoar nasida angka ari on Purim, mangihuthon goar Pur; ala ni saluhut hata ni suraton dohot ala ni sude na niidanasida taringot tusi manang naung sahat tarbortik tu nasida.

9:27 Dipatikkon jala diundukkon halak Jahudi ma i, ingkon nasida dohot pinomparnasida ro di sude halak angka na masuk tu nasida, na so tupa laosannasida, ingkon marari raya nasida di ari na dua i ganup taon, hombar tu hata ni surat i dohot tingki naung binuhul hian.

9:28 Jala angka ari on patut, ingkon ingoton jala marulaon disi, ingoton ni saluhut pinompar, luat dohot huta sadasada; jala na so tupa laosan angka ari Purim on di tongatonga ni halak Jahudi, jala na so tupa mansohot parningotanna di pinomparnasida sogot.

9:29 Alai anggo si Ester, jolma ni rajai, boru ni si Abigail dohot si Mordahai halak Jahudi mambahen nasa gogona manurathon surat tingting laho umpatikkon surat Purim na paduahon on.

9:30 Dung i ditongoshon ma angka surat tu sude halak Jahudi, angka na maringan di na saratus duapulu pitu luat gomgoman ni Serses, mardongan hata dame dohot hasintongan.

9:31 Asa dipatikkon nasida angka ari Purim on di angka tingki angka naung binuhul, naung pinatik ni si Mordahai, halak Jahudi i, dohot si Ester, jolma ni rajai tu nasida, naung pinatikna di ibana sandiri dohot di pinomparnasida, angka hata parpuasaon dohot andungnasidai.

9:32 Parenta ni si Ester pahothon angka ari raya taringot tu Purim on, laos tarsurat di bagasan sada buku.

Ester 10

10:1 Dung i diampehon raja Serses sohe gararon ni halak di darat dohot di pulo, angka na di bagasan laut.

10:2 Dung i saluhut ulaon ni hagogoonna dohot hatimbulonna, rodi sandok hatimbulon ni si Mordahai, naung pinatimbul ni rajai ibana, nda tarsurat do angka i di bagasan buku jamita ariari ni angka raja sian Madai dohot Persia?

10:3 Ai si Mordahai, halak Jahudi i, bangkit wakil ni raja Serses, sangap do ibana di tongatonga ni halak Jahudi, jala hasudungan ni torop hahaanggina ibana, ala naung diringkoti rohana hasonangan ni bangsona, sai hata dame dipaboa tu sandok pinomparna.