Buku Hesekiel

Hesekiel ᯂᯩᯘᯩᯄ᯦ᯪᯀᯞᯩ᯲ 1

1:1 Dung i masa patolupulutaonhon, di ari lima bulan sipaha opat, uju ahu di tongatonga ni angka na tarbuang martopihon * batang aek Hebar, buha ma angka langit, gabe huida angka pangungkapon sian Debata. ᯑᯮᯰ ᯤ ᯔᯘ ᯇᯖᯬᯞᯮᯇᯮᯞᯮᯖᯀᯉᯬ᯲ᯂᯉᯬ᯲ ᯑᯪ ᯀᯒᯪ ᯞᯪᯔ ᯅᯮᯞᯉ᯲ ᯘᯪᯇᯂ ᯀᯬᯇᯖ᯲ ᯥᯐᯮ ᯀᯂᯮ ᯑᯪ ᯖᯬᯝᯖᯬᯝ ᯉᯪ ᯀᯰᯄ᯦ ᯉ ᯖᯒ᯲ᯅᯮᯀᯰ ᯔᯒ᯲ᯖᯬᯇᯪᯂᯉᯬ᯲ ᯅᯖᯰ ᯀᯀᯄ᯦ᯩ᯲ ᯂᯩᯅᯒ᯲ ᯅᯮᯂ ᯔ ᯀᯰᯄ᯦ ᯞᯝᯖᯪ᯲ ᯎᯅᯩ ᯂᯮᯤᯑ ᯀᯰᯄ᯦ ᯇᯝᯮᯰᯰᯄ᯦ᯇᯉᯬ᯲ ᯘᯪᯀᯉ᯲ ᯑᯩᯅᯖ

1:2 Palimaarihon di bulan i, i ma palimataonhon, dung tarbuang raja Joiakin.

1:3 Ro ma tongon hata ni Jahowa tu Hesekiel, anak ni malim Busi, di tano ni halak Kasdim, martopihon batang aek Hebar, songgop ma tu ibana disi tangan ni Jahowa.

1:4 Jadi maralatan ma ahu, gabe ida ma, ro habahaba sian utara, mardongan ombun na bolon dohot api na marjilam, jala marsinondang humaliang, jala sian tongatonga ni api i, songon pangalaho ni sere na humillohillo idaon.

1:5 Jala sian tongatongana ruar sumansuman ni opat parngolu, jala songon on do rupanasida: Tudos tu jolma do nasida.

1:6 Jala ganup maropat bohi be dohot marhabong opat be nasida.

1:7 Jala tingkos do ia patnasida, jala palak ni patnasida i, songon tambirik ni anak ni lombu, jala marlinanglinang songon haksa na niugam.

1:8 Jala di toru ni habongnasida, di lambungna na opat i, adong angka tangan ni jolma, jala opat be do bohi dohot habongnasida.

1:9 Marrapitrapit do habongnasida ganup tu donganna. Molo mardalan nasida, ndang manaili tu pudi, sai masitulus dalanna be do nasida.

1:10 Jala rupa ni bohinasida songon on: Bohi jolma, jala bohi singa tungkan siamun ni opatsa nasida, jala bohi jonggi dohot bohi pidong raja ualu tungkan hambirang ni opatsa nasida.

1:11 Jala bohinasida dohot habongnasida mamerper do dompak ginjang; masidolosan do habongnasida na dua, manghungkupi dagingnasida ianggo na dua nari.

1:12 Jala masitulus dalanna be do nasida, manang dompak dia * Tondi i mardalan, ndang dung manaili tu pudi nasida, jumpa mardalan nasida.

1:13 Jala rupa dohot rumang ni angka parngolu i songon gara ni api do, angka na marsigorgor, songon rumang ni huat, sai mardalandalan do i di tongatonga ni angka parngolu i, jala marsinondang do api i, jala ruar do sian api i angka hilap.

1:14 Alai sai sumiksaksiksak do angka parngolu i, songon rupa ni hilap idaon.

1:15 Jadi dung huida angka parngolu i, ida ma, di tano i adong sada roda di lambung ni parngolu i mangihuthon bohina na opat i.

1:16 Ia rupa ni angka roda i, jala panjadijadina songon sillam ni mata intan tarsis, jala sisada rupa do opatsa, jala rupanasida dohot panjadijadina, songon di tongatonga ni roda na sada do na sadanari idaon.

1:17 Molo mardalan nasida, dompak desa na opat i ditulus, ndang manaili tu pudi nasida di pardalanonna.

1:18 Jala tanggurungna mansai timbo jala songkal, jala gok mata do angka tanggurungna i opatsa humaliang.

1:19 Molo mardalan parngolu na opat i, mardalan ma dohot angka roda di lambungna; alai molo tarhinsat angka parngolu i sian tano on, tarhinsat ma dohot angka roda i.

1:20 Manang dompak dia tarhinsat Tondi i, laos tusi do mardalan nang nasida, mangihuthon pardalan ni Tondi i, tarhinsat do huhut angka roda di lambungna, ai di bagasan angka roda i do Tondi ni parngolu i.

1:21 Rap mardalan do nasida, jala rap ngongong do nasida, jala molo tarhinsat nasida sian tano i, tarhinsat ma dohot angka roda di lambungnasida, ai di bagasan angka roda i do Tondi ni parngolu i.

1:22 Jala di atas ni angka ulu ni parngolu i adong do tudosan ni langit na rata, songon rupa ni mata intan na songkal, mangerbang do di atas ulunasida sian ginjang.

1:23 Jala di toru ni langit na rata i marsijongjong habongnasida masidompahan, ganup dua be habongna manghungkupi dagingnasida.

1:24 Jala hubege do parngongos ni habongnasida, jumpa mardalan nasida, songon parhasak ni aek magodang, songon soara ni pargogo na so hatudosan, soara hariburon, songon pardorom ni parangan saparsaroan. Alai jumpa ngongong nasida, dipaheput be do habongnasida.

1:25 Jala tarbege do sada soara sian atas ni langit na rata i, na di atas ni ulunasida i, jumpa ngongong nasida dipaheput do habongnasida i.

1:26 Jala di atas ni langit na rata i, na di ginjang ni ulunasida i, idaon do songon rupa ni mata intan sapir, sumansuman ni habangsa, jala di atas ni sumansuman ni habangsa i hundul do songon rupa ni jolma idaon sian ginjang.

1:27 Huida ma huhut, songon sillam ni sere, songon rupa ni api parbagasanna humaliang; sian rupa ni gontingna tu ginjang, jala sian rupa ni gontingna tu toru huida do songon pangalaho ni api, jala marsinondang humaliang.

1:28 Songon rupa ni halibutongan na tarjadi di ombun jumpa ari haroro ni udan, songon i do rupa ni sondangna humaliang. I ma rupa ni sumansuman ni hamuliaon ni Jahowa. Jadi dung huida songon i, manungkap ma ahu tu tano, gabe hubege ma soara ni na mangkatai.

Hesekiel 2

2:1 Jadi didok ibana ma tu ahu: Ale anak ni jolma, ojakkon ma patmu, asa mangkatai ahu tu ho.

2:2 Dung i uju mangkatai ibana tu ahu, * bongot ma Tondi i tu bagasan ahu, laos dipajongjong ahu di pathu, gabe mananginangi ahu tu ibana na mangkatai dohot ahu.

2:3 Dung i didok ibana tu ahu: Ale anak ni jolma, ahu ma marsuru ho tu halak Israel, tu bangso angka na manggunturi dompak ahu; nang nasida, nang ompunasida, sai marbalik do sian ahu rasirasa sadarion.

2:4 Ahu ma tongon marsuru ho tu anak, angka na pir bohi dohot na tangkang marroha, jala dohononmu ma tu nasida: Boti hata ni Tuhan Jahowa.

2:5 Alai anggo nasida, * manang tangihononna manang ndang, ai bangso panggunturi do nasida, gabe diboto nasida naung adong panurirang sada di tongatonganasida.

2:6 Ia ho ale anak ni jolma, * unang ho mabiar maradophon nasida, manang umbege hatanasida i pe, unang ho tahuton! Ai atik pe suga jala tadatada donganmi, jala maringan ho di lambung hala, unang tahuton ho umbege hatanasida i, jala unang mabiar ho mida bohinasida, ai bangso panggunturi do nasida.

2:7 Ingkon dohononmu angka hatangku tu nasida, manang tangihononna manang ndang, ai panggunturi do nasida.

2:8 Dibahen i, ho ale anak ni jolma, tangihon ma na hudok tu ho, unang dohot ho manggunturi, songon bangso panggunturi i! Pabuha ma pamanganmu, jala pangan silehononku tu ho.

2:9 Dung i maralatan ma ahu, gabe ida ma, tangan sada sonson tu jolongku, jala ida ma, di bagasanna do surat laklak sada na binalunan.

2:10 Jala dipaherbang di jolongku, jala marsurat do i di jolo dohot di pudi, jala tarsurat disi: Angka andung, partatangison dohot parisuangon!

Hesekiel 3

3:1 Dung i ninna ibana muse tu ahu: Ale anak ni jolma, pangan ma na jumpang ho di jolom; pangan ma tahe balunanon, jala laho ma ho, hatahon ma tu pinompar ni Israel.

3:2 Jadi hupangangang ma pamanganku, gabe dilehon ibana ma balunan i panganonku.

3:3 Laos didok ma tu ahu: Ale anak ni jolma, ingkon panganonmu, jala onjathononmu tu butuham balunan na hulehon i tu ho. Jadi hupangan ma, gabe tonggi songon situak ni loba di bagasan pamanganku.

3:4 Dung i ninna ibana muse tu ahu: Ale anak ni jolma, laho ma ho mandapothon pinompar ni Israel, jala hatahon ma tu nasida angka hatangki!

3:5 Ai ndada tu bangso parhata bobang, manang pardila na hallang ho sinuru, tu pinompar ni Israel do.

3:6 Ndada tu torop bangso, angka parhata bobang, manang pardila na hallang, angka na so dapot ho hatanasida antusanmu; atik pe so tu nasida ho husuru, ianggo nasida tangihononna do ho, tung sura.

3:7 Alai anggo pinompar ni Israel, ndang olo nasida tumangihon ho, ai ndang olo nasida tumangihon ahu; ai tung sandok pinompar ni Israel, angka sipir pardompahan do, jala angka na tangkang marroha do nasida.

3:8 Ida ma, nunga hupapir bohim suman tu bohinasida, jala nunga hupapir pardompahanmu suman tu pardompahannasida i.

3:9 Nunga hupapir pardompahanmu, songon mata intan, umpir sian batu hian tahe; unang ho mabiar mida nasida, jala unang tahuton ho maradophon bohinasida, ai pinompar na tangkang do nasida.

3:10 Angkup ni ninna ibana tu ahu: Ale anak ni jolma, luhut hata angka na huhatahon tu ho, ingkon pajoponmu tu bagasan roham, jala pinggolonmu.

3:11 Antong laho ma ho mandapothon angka naung tarbuang, manopot angka anak ni bangsom, pangkulinganmu ma nasida, jala dohononmu tu nasida: Songon on do hata ni Tuhan Jahowa! Manang tangihononna, manang ndang.

3:12 Dung i * diluahon Tondi i ma ahu, gabe hubege sian pudingku soara hariburon bolon, ninna ma: Pinuji ma hamuliaon ni Jahowa * sian hajongjonganna!

3:13 Angkup ni hubege soara ni habong ni angka parngolu i, angka na masidolosan, dohot soara ni roda, angka na di lambungna, dohot soara ni hariburon bolon.

3:14 Jadi dung diluahon Tondi i ahu, laos diusung ahu, gabe piripirion ahu mardalan di mohop ni ateatengku, alai tangan ni Jahowa do margogoihon ahu.

3:15 Jadi tolhas ma ahu tu angka na tarbuang di Tel-Abib, angka na maringan martopihon batang aek Hebar, laos disi do ahu hundulhundul rap dohot nasida pitu ari padodot, hohom boti di tongatonganasida.

3:16 Jadi dung salpu na pitu ari i, ro ma hata ni Jahowa tu ahu songon on:

3:17 Ia ho anak ni jolma! Nunga hupabangkit ho bahen * siparmahan halak Israel, dibahen i sai tangihon ma hata na ruar sian pamanganku, angka sipatolhasonmu palumba nasida sian ahu.

3:18 Molo hudok tu parjahat i: Ingkon mate ho, hape ndang dipalumba ho ibana, jala ndang diapoi ho ibana tumundalhon dalanna na jahat i, asa dapotan hangoluan ibana nian; sai na mate do nian parjahat i di bagasan hajahatonna, alai * sian tanganmi do partungguhononku mudarna.

3:19 Alai anggo dipalumba ho do parjahat i, hape ndang olo ibana tumadingkon hajahatonna i dohot dalanna na jahat i, mate di bagasan hajahatonna ma ibana, alai malua do anggo tondim.

3:20 Alai molo * ditadingkon partigor i hatigoranna na sai laon, jala diulahon hageduhon, bahenonku ma partuktuhan tu jolona, asa mate ibana, ai ndang dipalumba ho ibana; mate di bagasan dosana do nian ibana, jala ndang be ingoton hatigoranna na niulana i, alai anggo mudarna sian tanganmu do pangidoonku.

3:21 Alai molo tung dipalumba ho partigor i na sai laon, unang nian mardosa partigor i, gabe laos so mardosa ibana, ingkon mangolu ibana, ala na olo ibana palumbaon, ho pe nunga dipalua ho tondim.

3:22 Dung i * ampe ma disi tu ahu tangan ni Jahowa, jala ninna ma tu ahu: Borhat ma ho, ruar ma ho mandapothon rura i, asa disi huangkupi ho mangkatai.

3:23 Jadi borhat ma ahu, jala ruar manopot rura i, gabe ida ma, jongjong disi hamuliaon ni Jahowa, suang songon hamuliaon, na huida di topi ni * batang aek Hebar, gabe manungkap ma ahu tu tano.

3:24 Jadi bongot ma Tondi i tu bagasan ahu, jala dipajongjong ahu di pathu, laos diangkupi ahu mangkatai, jala ninna mandok ahu: Laho ma ho, hurungkon ma ho di bagasan jabum!

3:25 Ia ho ale anak ni jolma, ida ma, ampehononnasida ma angka tali tu ho, laos ihotanna ho, asa unang ho ruar tu tongatonganasida.

3:26 Angkup ni lohot ma bahenonku dilam tu langitlangit ni pamanganmu, asa mangungu ho, asa unang be ho jolma paminsang di nasida, ai * bangso panggunturi do nasida.

3:27 Alai molo huangkupi ho muse mangkatai, bungkaonku ma pamanganmu, gabe dohononmu ma tu nasida: Songon on do hata ni Tuhan Jahowa: Manang ise na umbegesa, dibege ma, manang ise na so olo, ndengkon olo! Ai bangso panggunturi do nasida.

Hesekiel 4

4:1 Ia ho ale anak ni jolma, buat ma di ho tano takko sada, jala peakkon di jolom, jala uhirhon tusi huta Jerusalem.

4:2 Jala bahen hubu dompak huta i, jala pauli angka batarbatar di atasna, jala pajongjong parik sada dompak huta i, jala bahen angka parsaroan martungkum huta i, jala pajongjong angka salosap humaliang.

4:3 Angkup ni buatonmu ma di ho balanga bosi sada, jala pajongjongonmu ma i gabe parik bosi, parholanganmu sian huta i, jala sai dituju bohim ma i, asa hona hubu huta i tungkumonmu. I ma gabe tanda di pinompar ni Israel.

4:4 Alai anggo ho podomanmu ma sihambirangmu, jala ampehon ma hajahaton ni pinompar ni Israel tu atasna, marguru sian bilangan ni angka ari parpodommu disi, lelengna usungonmu hajahatonnasida.

4:5 Ianggo ahu nunga hubuhul tu ho * angka taon ni hajahatonnasida, manjadi torop ni ari tolu ratus siapulu ari lelengna usungonmu hajahaton ni pinompar ni Israel.

4:6 Ia dung dipatolhas ho angka ari i, podomanmu ma paduahalihon siamunmi, asa usungonmu hajahaton ni pinompar ni Juda opatpulu ari lelengna, sada taon gabe sadari hubahen anggo tu ho.

4:7 Antong dompak parhubuon ni Jerusalem ma tujuon ni bohim dohot tanganmu manangkas, asa manurirangi ho dompak huta i.

4:8 Jala ida ma, nunga pola hubahen tu ho angka tali, jala ndang jadi humosing ho sian hambirang tu siamun, paima dipatolhas ho angka ari partungkumonmu.

4:9 Ia ho buatonmu ma di ho eme simetmet dohot siansimun dohot dalidali dohot hadio dohot bajaure dohot daua, jala bahenonmu luhutna i tu bagasan sada tong, jala paulionmu angka i di ho bahen sagusagu, marguru sian bilangan ni angka ari parpodommu manjorbing, singkop * tolu ratus siapulu ari lelengna panganonmu.

4:10 Ia godang ni panganon sipanganonmu ganup ari dasingon do duapulu sekkel sadari, ingkon martingki do panganonmu.

4:11 Ingkon marsuhat do nang aek siinumonmu, saparonom hin, ingkon martingki do inumonmu.

4:12 Angkup ni panganonmu do sagusagu sada sian gadongkau, jala masahonmu do i marhitehite ginagat ni jolma di adopannasida.

4:13 Dung i ninna Jahowa ma: Ingkon songon i ramun panganon ni halak Israel sogot rotinasida di tongatonga ni angka parbegu, haambolongannasida bahenonku.

4:14 Jadi ningku ma: Iale Tuhan Jahowa, ida ma, ndang dung tarsamar rohangku, jala ndang dung hupangan na mate garam, manang soroan olat ni sietehetehonku rasirasa nuaeng jala ndang dung bongot tu bagasan pamanganku juhut habiason.

4:15 Dung i ninna ibana tu ahu: Ida ma, hulehon pe tu ho ginagat ni lombu, singkat ni ginagat ni jolma, di atas ni pe masahonmu sagusagum.

4:16 Angkup ni ninna ibana tu ahu: Ale anak ni jolma, ida ma, * ponggolhononku ma tungkot parbohalon di Jerusalem, asa panganonnasida roti na nidasing, jala mardongan hagogotan, nang aek marsupak do inumonnasida, jala mardongan hapariron.

4:17 Ala hurangan roti dohot aek nasida, gabe tarhatotong be nasida jala mandate binahen ni hajahatonnasida i.

Hesekiel 5

5:1 Ia ho ale anak ni jolma, buat ma di ho podang sada na tajom, songon raut parnabung! Buat ma i di ho, jala bolushon sian ulum dohot sian janggutmu; dung i buat muse di ho dasing sada laho marbagi angka obuk i.

5:2 Sapartoluna ma purunonmu di bagasan api di tongatonga ni huta i, ia dung gok angka ari partungkumon i; dung i buat ma na sapartolu nari, jala jaljali marhitehite podang humaliang huta i; jala na sapartolu muse purpurhon ma tu alogo, ai sintahonku ma podang i sian pudinasida.

5:3 Angkup ni buatonmu ma sian i otik bilanganna, jala pudunonmu do i di bagasan suhisuhi ni ulosmu.

5:4 Dung i buatonmu muse sian i otik, jala reongkononmu do i tu tongatonga ni api, jala purunonmu di bagasan api; ruar ma sian i muse api rarat tu sandok pinompar ni Israel.

5:5 Songon on do hata ni Tuhan Jahowa: Ia huta Jerusalemon, nunga hupahot di tongatonga ni angka parbegu, jala dihaliangi angka luat.

5:6 Hape manggunturi nasida dompak angka uhumhu, gabe jumahat nasida sian angka parbegu, jala manggunjal nasida dompak angka patikku, lobi sian luat angka na humaliang nasida, ai ditoisi nasida do angka uhumhu, jala ndang diparangehon nasida angka patikku.

5:7 Dibahen i songon on do hata ni Tuhan Jahowa: Ala jumahat hamu sian parbegu, angka na humaliang hamu, ndang diparangehon hamu angka patikku, jala ndang diradoti hamu angka uhumhu; uhum ni parbegu pe, angka na humaliang hamu, ndang diihuthon hamu.

5:8 Dibahen i, songon on do hata ni Tuhan Jahowa: Ida ma, dohot ma ahu gabe alom, apala di tongatongami ahu mandabu uhum di adopan ni angka bangso parbegu.

5:9 Jala bahenonku tu ho na so dung hea hubahen, manang ulahanku pe mambahen sogot, ala ni saluhut hasogiron angka na niulam.

5:10 Dibahen i * masipapanganan ma amaama dohot anakna di tongatongami, jala ahu mandabu angka uhum di tongatongami, jala ahu paserakkon sandok pasipasimi tu * ganup desa.

5:11 Dibahen i, songon sintongna ahu mangolu, ninna Tuhan Jahowa: Ala niramunanmu habadiaonki marhitehite sandok * biasbias dohot hasogiron, angka na niulam, gabe dohot ma ahu marnabung, jala ndang * marolanolan matangku, jala ndang marpangulahi rohangku.

5:12 Sapartolu hamu mate binahen ni begu antuk, jala siap mate anturaparon di tongatongami, jala na sapartolu nari marragean binahen ni podang humaliang ho, jala na sapartolu muse ahu do paserakkon tu ganup desa, jala marpodang sintak sian pudinasida.

5:13 Asa tung sun tolhas hinamurukku, jala sombu rimashu di nasida, jala dampor ateatengku, asa tung diboto nasida, ahu Jahowa do naung mangkuling di bagasan piripiringku, molo dung * sun tolhas hubahen rimashu tu nasida.

5:14 Dung i bahenonku ma ho gabe halongonan dohot haurahon di tongatonga ni parbegu, angka na humaliang ho, di adopan ni saluhut pamolus.

5:15 Asa tung gabe * haurahon dohot sieleseleson, panjoraan dohot hatotongon di parbegu angka na humaliang ho, ia dung hudabu tu ho angka uhum di bagasan rimas dohot di bagasan piripiri marhitehite pinsangpinsang ni harimason. Ahu Jahowa do na mandok i.

5:16 Molo dung husiorhon * sumbia ni haraparon, angka na rahat i dompak nasida, angka na laho mangago, angka na husiorhon laho mangago hamu, jala patambaonku dope * haraparon tu hamu, jala ponggolhononku do di hamu tungkot parbohalon.

5:17 Dung i tongoshononku ma tu hamu haraparon dohot binatang angka na rahat, asa tung punu ho bahenonna, masa huhut tu ho begu antuk dohot durusdurus ni mudar, paroonku huhut dompak ho podang. Ahu Jahowa do na mandok i.

Hesekiel 6

6:1 Dung i ro muse ma hata ni Jahowa tu ahu songon on.

6:2 Ale anak ni jolma, tujuhon ma bohim * dompak angka dolok di Israel, jala surirangi dompak nasida.

6:3 Jala dohononmu ma: Hamu ale angka dolok ni Israel, tangihon hamu ma hata ni Tuhan Jahowa! Songon on do hata ni Tuhan Jahowa tu angka dolok dohot tu angka robean, tu angka jaringjing dohot tu angka rura: Ida ma, ahu parohon tu hamu podang, asa huago angka tambaktambakmuna.

6:4 Jala ingkon marumpak sogot angka langgatanmuna, jala angka ropuk * tiang panombanombaan jala marragean bahenonku jolma angka na tartullang sian hamu di adopan ni angka ganaganaanmuna.

6:5 Tongon tahe, reongkononku ma angka bangke ni halak Israel di adopan ni angka ganaganaannasida, jala marambolangan bahenonku holiholimuna humaliang angka langgatanmuna.

6:6 Tung di saluhut ingananmuna, ingkon pansingkononhon angka huta, jala tarulang bahenon angka robean, asa tung pansing jala marumpak angka langgatanmuna, marponggolan jala siap angka ganaganaanmuna, jala maropuk angka tiang panombanombaan, jala sun siap jadijadianmuna.

6:7 Jala marragean jolma di tongatongamuna, asa tung ditanda hamu ahu do Jahowa.

6:8 Alai tebahononku do di hamu angka na malua sian podang di tongatonga ni angka parbegu, ia dung marserak hamu di angka luat ni halak.

6:9 Jadi ingoton ni angka na malua i sian hamu ahu di tongatonga ni angka parbegu, habuangannasida i, ia dung hulala roha parmainanonnasida i, na manimbil sian ahu, ro di mata parmainanonna i mangihuthon ganaganaannasida, gabe laos nasida marbiasbias mida bohinasida i, ala ni hajahaton, angka na niulanasida, marguru tu saluhut hasogironnasida i.

6:10 Asa tung ditanda nasida ahu do Jahowa, ndada asal hulumbahon jea i na naeng bahenonku tu nasida.

6:11 Songon on do hata ni Tuhan Jahowa: Martopapi ma tanganmu, jala marhajingjang bahen patmu, jala manimbas ma ho taringot tu saluhut hasogiron dohot hajahaton angka na niula ni pinompar ni Israel, angka na marragean sogot bahenon ni podang, haraparon dohot begu antuk.

6:12 Manang ise naung holang, ingkon mate binahen ni begu antuk, jala manang ise na jonok, ingkon tinggang binahen ni podang, jala manang ise na teba, manang naung malua, ingkon mate anturaparon, asa tung sun hupatolhas rimashu tu nasida.

6:13 Jadi tandaonmuna ma, ahu do Jahowa, ia dung marpeahan angka na binunu sian nasida di tongatonga ni angka ganaganaannasida, humaliang langgatannasida i, di atas ni saluhut buntulbuntul, * di punsu ni angka dolok, di toru ni saluhut hau na rugun dohot di toru ni saluhut hariara bolon, di panutungan daupa tu saluhut ganaganaannasida i.

6:14 Jadi patoltolonku ma tanganku dompak nasida, jala bahenonku tano i tarulang gabe halongonan, lobi sian halongonan Ribla, di saluhut inganannasida i, asa tung * diboto nasida ahu do Jahowa.

Hesekiel 7

7:1 Dung i ro muse ma hata ni Jahowa tu ahu, songon on:

7:2 Ia ho ale anak ni jolma! Songon on do hata ni Tuhan Jahowa taringot tu tano ni Israel: Nunga jumpang ajalna, nunga ro ajal ni na opat suhi ni tano i.

7:3 Apala nuaeng ma ro ajalmu, jala ahu manongoshon rimashu tu bagasan ho dohot manguhum ho, hombar tu angka dalanmu, jala manginona bahenonku tu ho sude hasogiron, angka na niulam.

7:4 Jala ndang maralangalang matangku dompak ho, jala ndang marpangulahi rohangku, ingkon manginona tu ho bahenonku, hombar tu dalanmu na sai laon, jala ingkon di tongatongami hasogiron, angka na niulam, asa tung ditanda hamu, ahu do Jahowa.

7:5 Songon on do hata ni Tuhan Jahowa: Ingkon mardapotdapot do jea i ro!

7:6 Nunga tung ro ajal i, nunga tung tarsunggul dompak ho, ida ma, nunga tung ro.

7:7 Nunga tung marliat mangonai tu ho, ale isi ni tano i, nunga ro tingkina, * jonok nama arina, soara hagunturon do, ndada hariburon di atas ni angka dolok.

7:8 On pe magira ma usehononku rimashu tu ho, jala sun tolhas bahenonku murukku tu ho, jala uhumonku ho, hombar tu angka dalanmu, jala bahenonku manginona tu ho saluhut hasogiron, angka na niulam.

7:9 Jala ndang maralangalang matangku, jala ndang marpangulahi rohangku, hombar tu angka dalanmu manginona tu ho bahenonku, jala ingkon di tongatongami do hasogiron, angka na niulam, asa tung ditanda hamu, ahu do Jahowa na manginonahonsa.

7:10 Ida ma ari i, ida ma, nunga tung ro, nunga tung marliat, nunga tung * martumbur batahi, nunga tung marbunga hajungkaton.

7:11 Nunga tung borhat sipangarupa bahen linsinglinsing di hajahaton; ndang adong teba sian nasida, nang sian hinadeaknasida, nang sian hariburonnasida, jala ndang adong * na mangandungi nasida.

7:12 Nunga tung ro tingkina, nunga jumonok ari i; unang marlas ni roha ia panuhor, jala unang gondok roha ni panggadis; ai na ro ma rimas na marsigorgor dompak sandok hinadeaknasida i.

7:13 Ai ndang be mulak tu panggadis * ugasan naung ginadisna i, nang tung sura mangolu dope nasida duansa, ai ndang tagamon tulak pangungkapon taringot tu sandok hinadeaknasida i, jala ndang manahan ngolu ni manang ise di bagasan hajahatonna.

7:14 Dipapalupalu nasida pe sangka, jala dihontas saluhutna, hape ndang adong na hum, nanggo sahalak borhat tu tongtangan, ai rimashu do alo ni sandok hinatoropnasida i.

7:15 Podang do marraserasehon di balian, begu antuk dohot haraparon ia di bagasan jabu; manang ise na di ladang, ingkon mate binahen ni podang, jala manang ise na di bagasan huta, ingkon siap bahenon ni haraparon dohot begu antuk.

7:16 Malua pe angka na malua i, ingkon maotaot nasida di atas ni angka dolok, songon darapati di angka rura, tung saluhut do nasida marturtu, ganup di bagasan hajahatonna.

7:17 Saluhut tangan mandate, jala saluhut ulu ni tot mabaor do songon aek.

7:18 Jala maruloshon abit tangki do nasida, jala hasonggoton do bulusanna, bolak be do bohinasida, jala * palpal ia ulunasida luhutna.

7:19 Peraknasida reongkononna do tu alaman, jala serenasida gabe biasbias di nasida. Ndang masuk * perak manang serenasida bahen partobus di nasida di ari pangarimasan ni Jahowa, ndang tarpasabam nasida rohanasida disi, jala ndang hagohansa butuhanasida sian i, ai parbingkasan tu hajahatonnasida do i.

7:20 Jala hamuliaon ni hinaulina, gabe hatongamonna hian nian binahenna, hape sumansuman ni hasogiron dohot biasbias dibahen nasida sian i. Dibahen i lehononku do i gabe haramunon di nasida.

7:21 Jala pasahatonku do i tu tangan ni halak sileban pupusanna dohot tu angka parjahat di tano on, bahen tabantaban jala ramunanna.

7:22 Jala padaoonku do bohingku sian nasida, asa ramunannasida ingananku na badia i, jala masuk tu bagasan do angka sipangarupa laho ramunanna.

7:23 Bahen ma rante, ai gok parsapataan mudar do tano i, jala gok pangarupaon do huta i.

7:24 Dibahen i paroonku ma angka parbegu, apala parjahat sahali, asa teanonna angka bagasnasida, jala pasadionku ma hajungkaton ni angka na gogo, jala tarramun habadiaonnasida i.

7:25 Nunga ro hasiapon, mangalului pardemahan nian anggo nasida, hape ndang jumpangsa.

7:26 Sai mardapotdapot do tahe jea i ro, jala pasimpar barita i, jala usouso do nasida di alatan sian panurirang, hape nunga pesan * patik sian malim, jala panuturion sian angka sintua.

7:27 Gondok do ia roha ni rajai, jala induk i maruloshon hatotongon, jala raion do tangan ni situan na torop, isi ni tano i; hombar tu dalannasida bahenonku tu nasida, jala marguru tu uhumnasida i dabuonku uhum tu nasida, asa tung ditanda nasida, ahu do Jahowa.

Hesekiel 8

8:1 Dung i paonomtaonhon, di ari lima bulan sipaha onom, hundulhundul ahu di bagasan jabungku, jala * angka sintua ni Juda hundul di jolongku, gabe songgop ma tu ahu disi tangan ni Jahowa.

8:2 Jadi maralatan ma ahu, gabe ida ma, sumansuman sada, songon rupa ni jolma, sian gontingna tu toru idaon songon api, sian gontingna tu ginjang, songon sondang, songon sillam ni sere tahe.

8:3 Dung i disurdukkon ma sumansuman ni tangan sada, jala dijambut obuk ni ulungku, jala * diluahon Tondi i ahu tu holangholang ni tano dohot langit, di bagasan alatan angka na sian Debata, laos diusung ahu tu Jerusalem, boti tu baba pintu parbagasan na tungkan utara, disi do hajongjongan ni ganaganaan pangiburuan, na pasunggul iburu.

8:4 Jala ida ma, laos disi do * hamuliaon ni Debata ni Israel, suman tu rupa na huida na jolo di rura i.

8:5 Dung i ninna ibana ma tu ahu: Ale anak ni jolma, ua manaili ma matam tu dalan tungkan utara, jadi manaili ma matangku tu dalan tungkan utara, gabe ida ma, tungkan utara sian pintu ni langgatan, apala di haroroan, jongjong do ganaganaan pangiburuan i.

8:6 Dung i ninna ibana ma tu ahu: Atehe ale anak ni jolma, diida ho do na binahennasida? Tung biasbias bolon angka na binahen ni pinompar ni Israel disi, asa holang ahu sian habadiaonku, alai idaonmu muse dope biasbias angka na umbolon.

8:7 Dung i ditogihon ma ahu tu pintu ni alaman i, gabe maralatan ahu, jadi ida ma, sada bungbung di bagasan dorpi.

8:8 Dung i ninna ibana ma tu ahu: Ale anak ni jolma, ua paruak ma bungbung na di bagasan dorpi! Jadi dung hutolpushon dorpi i, gabe ida ma, pintu sada disi.

8:9 Dung i ninna ibana ma tu ahu: Beta hita, asa diida ho biasbias angka na roa, angka na binahennasida disi.

8:10 Jadi dung masuk ahu, jala hutilik, gabe ida ma, disi do * saluhut sumansuman ni gulokgulok dohot pinahan, biasbias dohot ragamragam ganaganaan ni pinompar ni Israel, taruhir tu dorpi tuk humaliang.

8:11 Jala pitupulu baoa, sintua ni pinompar ni Israel, angka na jongjong paadopadop, jala si Jesania, anak ni si Sapan, jongjong di tongatonganasida, jala ganup nasida maniop pardaupaanna be di bagasan tanganna, jala uap ni timus ni daupa i martimpul tu ginjang.

8:12 Dung i ninna ibana ma tu ahu: Atehe ale anak ni jolma, diida ho do na binahen ni angka sintua ni pinompar ni Israel di bagasan haholoman, ganup di bagasan bilut panguhiranna be? Ai * angka didok nasida do: Ndang tagamon idaon ni Jahowa hami, nunga pola ditadingkon Jahowa tano on!

8:13 Dung i ninna ibana ma tu ahu: Adong muse dope idaonmu biasbias bolon, angka na binahennasida.

8:14 Dung i ditogihon ibana ma ahu tu baba pintu ni joro ni Jahowa, na tungkan utara, gabe ida ma, adong disi hundulhundul inaina, angka na mananangisi Tamus.

8:15 Dung i ninna ibana ma tu ahu: Atehe ale anak ni jolma, nunga diida ho? Idaonmu muse dope biasbias, angka na umbolon sian i.

8:16 Dung i ditogihon ibana ma ahu tu alaman parbagasan ni joro ni Jahowa, gabe ida ma, di lambung pintu ni joro ni Jahowa, di holangholang ni emper dohot langgatan, adong arga duapulu baoa, * tanggurungnasida dompak joro ni Jahowa, jala bohinasida dompak habinsaran, sai marsombasomba nasida dompak habinsaran, dompak * mata ni ari.

8:17 Dung i ninna ibana ma tu ahu: Atehe ale anak ni jolma, nunga diida ho? Tung na lobi neang do i di pinompar ni Juda mambahen biasbias, angka na niulanasida dison, ai nunga pola gok pangarupaon tano i dibahen nasida, jala marbalik nasida, asa pahehe rimashu, jala ida ma, lam di pambahen nasida dope rantingranting ni hau anggur tu igungnasida.

8:18 Ahu pe antong laluhononku ma rimashu, * ndang maralangalang matangku, jala ndang marpangulahi rohangku, nang pe * dipangiar nasida soarana joujou tu bagasan pinggolhu, ndang tagamon tangihononku nasida.

Hesekiel 9

9:1 Dung i dipangiar ibana ma soarana joujou tu bagasan pinggolhu, songon on: Nunga jonok angka partubolon tu huta i, jala ganup marsinjata pangago di bagasan tanganna be.

9:2 Jadi ida ma, onom baoa, angka na ro sian dalan ni bahal parjulu na tungkan utara, jala ganup marantukantuk pangaropuhi di bagasan tanganna be; adong muse * sada baoa di tongatonganasida marulos hori, jala parmangsian sada gampit di gontingna; dung i bongot ma nasida, jala jongjong di lambung ni langgatan tombaga.

9:3 Dung i tarhinsat ma * hamuliaon ni Debata ni Israel sian ginjang ni kerubim na di atasna hian, laho tu lobulobu ni joro i; dung i joujou ma ibana di baoa na marulos hori, na marparmangsian gampit di gontingna.

9:4 Jadi ninna Jahowa ma tu ibana: Bolus ma tongatonga ni huta i, tongatonga ni Jerusalem tahe, jala * gurithon parsilang sada tu pardompahan ni baoa, * angka na marisuang, jala na marhoi taringot tu saluhut biasbias, angka na masa di tongatongana.

9:5 Alai tu angka na asing i, ninna do, dibege pinggolhon: Bolus hamu ma huta i ihut tu ibana huhut mambunu i; unang maralangalang matamuna, jala unang marpangulahi rohamuna!

9:6 Na ubanon, dolidoli, nang namarbaju rodi posoposo dohot inaina, * ingkon bunuonmuna do maradu siap sude; alai taringot tu saluhut baoa, angka na marparsilang ndang jadi hahuaonmuna, jala sian * habadiaonku do pungkaonmuna. Jadi dipungka nasida ma sian sintua angka na di jolo ni joro i.

9:7 Dung i ninna ibana ma tu nasida: Ramuni hamu ma joro i, jala gok bangke ma bahen hamu angka alaman; ruar ma hamu! Jadi ruar ma nasida, jala marraserase dibahen nasida jolma angka na di bagasan huta i.

9:8 Jadi dung songon i marraserase angka jolma i dibahen nasida, tading ma ianggo ahu, gabe * manungkap ma ahu huhut mangangguhi mandok: Iale Tuhan Jahowa, tung siaphononmu ma sandok pasipasi ni Israel di na niusehonmu rimasmu tu Jerusalem?

9:9 Jadi ninna ibana ma mangalusi ahu: Hajahaton ni pinompar ni Israel dohot Juda, tung na godang sahali do i, jala gok parsapataon mudar do tano i, jala gok hageduhon ia huta i, ai angka * didok nasida do: Nunga ditadingkon Jahowa tano i antong, jala ndang marnidasa Jahowa.

9:10 Ahu pe antong, * ndang maralangalang matangku, jala ndang marpangulahi rohangku, balbal hona tu ulunasida bahenonku dalannasida i.

9:11 Dung i ida ma, baoa na marulos hori i, jala na marparmangsian gampit di gontingna i mamboan alus, ninna do: Nunga hubahen songon na tinonahonmi tu ahu.

Hesekiel 10

10:1 Dung i maralatan ma ahu, gabe ida ma, di ratarata ni langit, na di atas ulu ni angka kerubim, adong do * songon batu intan sapir, songon sumansuman ni habangsa sada idaon di atasnasida.

10:2 Dung i ninna ibana ma tu * baoa na marulos hori: Bongot ma ho tu holangholang ni angka roda, tu toru ni kerubim, jala gomaki gara ni api gok tanganmu duansa sian holangholang ni angka kerubim, jala * sampakkon tu atas ni huta i. Jadi bongot ma ibana di adopan ni matangku.

10:3 Jongjong do ianggo angka kerubim di sambariba ni joro i tungkan siamun laho bongot baoa i, jala ombun i manggohi alaman parbagasan i.

10:4 Dung i tarhinsat ma * hamuliaon ni Jahowa sian ginjang ni kerubim di atas ni lobulobu ni joro i, jadi * digohi ombun i ma joro i, jala gok sinondang ni hamuliaon ni Jahowa do alaman i.

10:5 Dung i tarbege ma soara ni habong ni angka kerubim, sahat ro di alaman parbalian, suman tu soara ni Debata pargogo na so hatudosan, uju mangkatai ibana.

10:6 Jadi dung martona ibana tu baoa na marulos hori, songon on: Buat ma api sian holangholang ni angka roda, sian holangholang ni angka kerubim gabe bongot ma ibana, jala jongjong tu lambung ni roda i.

10:7 Jadi surduk ma tangan ni kerubim na sada sian tongatonga ni angka kerubim i tu api na di holangkolang ni angka kerubim, laos dibuat sian i jala dipagolomhon tu tangan ni na marulos hori, dung di jalo ruar ma ibana.

10:8 Dung i tarida ma di angka kerubim sumansuman ni tangan ni jolma sada di toru ni habongnasida.

10:9 Dung i maralatan ma ahu, gabe ida ma, opat roda di lambung ni angka kerubim, sada be do roda i di lambung ni kerubim sadasada, jala rupa ni angka roda tudos do tu batu intan tarsis.

10:10 Jala sisada rupa do opatsa nasida idaon, songon di tongatonga ni roda na sada do roda na sadanari.

10:11 Molo mardalan nasida, tungkan na opat desanasida do ditulus, ndang manaili tu pudi nasida jumpa mardalan, ai manang dompak dia dituju ulu i, ihut tusi do nasida mardalan, ndang manaili tu pudi nasida jumpa mardalan.

10:12 Jala sandok daging ni kerubim i, hau tanggurungnasida, tangannasida dohot habongnasida ro di angka roda i, gok mata do tuk humaliang, opatsa do nasida marroda be.

10:13 Taringot tu angka roda i digoar do nasida halisungsung, pola hubege.

10:14 Alai opat bohi be do angka parngolu i: Bohi ni na sada, bohi kerubim do, jala bohi ni na paduahon i, bohi jolma, jala na patoluhon i bohi singa, jala na paopathon i bohi pidong raja ualu.

10:15 Dung i tarhinsat ma angka kerubim i, i ma parngolu i na huida na jolo di topi ni batang aek Hebar.

10:16 Jala molo mardalan angka kerubim i, mardalan ma dohot roda angka na di lambungnasida, molo dipaperper angka kerubim i habongnasida, asa tarhinsat sian tano i, laos so mamedu dohot angka roda i sian lambungnasida.

10:17 Molo ngongong nasida rap ngongong do, molo tarhinsat nasida rap tarhinsat do, ai tondi ni parngolu i do di bagasan nasida.

10:18 Dung i ruar ma hamuliaon ni Jahowa sian atas ni lobulobu ni joro i, jala marsijongjong di atas ni angka kerubim i.

10:19 Dung i dipaperper angka kerubim i ma habongnasida, jala tarhinsat sian tano i di adopan ni matangku di na ruar i nasida, jala angka roda i di lambungnasida, jala ngongong be do di baba pintu ni joro ni Jahowa tungkan habinsaran, jala hamuliaon ni Debata ni Israel mangalinggomi nasida * sian ginjang.

10:20 I ma parngolu i na huida di toru ni Debata ni Israel martopihon batang aek Hebar, gabe hutanda angka kerubim do nasida hape.

10:21 Maropat bohi be do sadasada, jala maropat habong be, jala sumansuman ni tangan ni jolma di toru ni habongnasida.

10:22 Jala rupa ni bohinasida, suman tu bohi angka na huida martopihon batang aek Hebar, rupanasida pe, nang nasida sandiri tahe, ganup masitulus dalanna tu jolona be.

Hesekiel 11

11:1 Dung i * dihindat Tondi i ma ahu, jala diboan ahu tu pintu ni joro ni Jahowa sambariba tungkan habinsaran, gabe ida ma, di baba pintu i adong * duapulu lima baoa, di tongatonganasida huida si Jesania, anak ni si Assur dohot Pelatia, anak si Benaia, angka induk ni bangso i.

11:2 Dung i ninna Ibana ma tu ahu: Ale anak ni jolma, nasida do baoa angka na marsangkap jea, jala mangaturhon tahi na roa di bagasan huta on.

11:3 Angka didok nasida do: Ndang dope jonok! Tole tapauli ma angka bagas! Huta i do hudon, jala hita juhut.

11:4 Dibahen i manurirangi ma ho dompak nasida, manurirangi ma ho, ale anak ni jolma.

11:5 Jadi songgop ma tu ahu Tondi ni Jahowa, jala ninna tu ahu: Songon on do hata ni Jahowa dohononmu: Hamu ale pinompar ni Israel mandok songon i, apala so huboto tubutubu ni rohamuna i.

11:6 Nunga dipatorop hamu jolma angka na tartullang sian hamu di bagasan huta on, jala nunga gok bangke alamanna dibahen hamu.

11:7 Dibahen i songon on do hata ni Tuhan Jahowa: Jolma angka naung tartullang i sian hamu, angka na marragean di tongatonga ni huta i, nasida ma juhut i, jala huta i do hudon i; alai anggo hamu haruar do toguonku sian tongatongana.

11:8 Podang do na hinabiaranmuna, hape podang i do paroonku dompak hamu, ninna Tuhan Jahowa.

11:9 Ahu ma tahe paruar hamu sian tongatongana, jala ahu pasahathon hamu tu bagasan tangan ni halak ruar, jala ahu mangkonahon tu hamu angka torutoru.

11:10 Ingkon marragean hamu binahen ni podang; di partalpahan ni Israel uhumonku hamu, asa tung diboto hamu ahu do Jahowa.

11:11 Ndada huta i gabe hudon di hamu, manang hamu gabe juhut di tongatongana; di partalpahan ni Israel tahe uhumonku hamu.

11:12 Asa tung diboto hamu ahu do Jahowa, na so pinarangehonmuna angka patikku, jala ndang diulahon hamu angka uhumhu; hombar tu uhum ni parbegu, angka na humaliang hamu balik tahe diulahon hamu.

11:13 Dung i uju manurirangi ahu, mate satongkin ma si Pelatia, anak ni si Benaia. Jadi * manungkap ma ahu tu tano, jala hupangiar soarangku mangangguhi, ningku ma: Iale Tuhan Jahowa! Tung sun siap ma bahenonmu pasipasi ni Israel.

11:14 Dung i ro ma hata ni Jahowa tu ahu songon on:

11:15 Ale anak ni jolma! Hahaanggimu, hahaanggimu tongon, angka baoa hasolhotonmu ro di sandok pinompar ni Israel, tung tu nasida saluhut do na nidok ni isi ni Jerusalem: Paholang hamu ma sian lambung ni Jahowa! Antong nunga tu hita tano i dipasahat bahen partalian.

11:16 Dibahen i dohononmu ma: Songon on do hata ni Tuhan Jahowa: Ala ahu * mambolongkon nasida dao tu tongatonga ni angka parbegu, jala ala ahu paserakkon nasida tu angka luat ni halak, jadi laos ahu muse gabe habadiaon di nasida sangombas na metmet di angka luat hasahatannasida i.

11:17 Dibahen i dohononmu ma: Songon on do hata ni Tuhan Jahowa: Laos ahu papungupungu hamu sogot sian angka bangso, jala ahu patumpuhon hamu sian angka luat parserahanmuna i, jala ahu mangalehon tu hamu tano Israel.

11:18 Jadi dung sahat nasida ro disi, paholangonnasida ma sian i sandok hasogiron dohot saluhut biasbias.

11:19 Jadi lehononku ma tu nasida roha sisangunjur, jala suanhononku tondi na imbaru tu bagasan ateatenasida, jala paholangonku ma * roha batu sian dagingnasida, jala lehononku ma tu nasida roha sibuk.

ᯐᯑᯪ ᯞᯩᯂᯬᯉᯉᯬ᯲ᯂᯮ ᯔ ᯖᯮ ᯉᯘᯪᯑ ᯒᯬᯂ ᯘᯪᯘᯝᯉᯮ᯲ᯐᯒᯮ᯲, ᯐᯞ ᯘᯮᯀᯉ᯲ᯂᯬᯉᯉᯬ᯲ᯂᯮ ᯖᯉᯬ᯲ᯑᯪ ᯉ ᯀᯔᯪ᯲ᯅᯒᯮ ᯖᯮ ᯅᯎᯘᯉ᯲ ᯀᯖᯩᯀᯖᯩᯉᯘᯪᯑ, ᯐᯞ ᯇᯂᯬᯞᯝᯉᯬ᯲ᯂᯮ ᯔ ᯒᯬᯂ ᯅᯖᯮ ᯘᯪᯀᯉ᯲ ᯑᯎᯪᯰᯉᯘᯪᯑ, ᯐᯞ ᯞᯩᯂᯬᯉᯉᯬ᯲ᯂᯮ ᯔ ᯖᯮ ᯉᯘᯪᯑ ᯒᯬᯂ ᯘᯪᯅᯂᯮ᯲.

11:20 Asa diihuthon nasida angka patikku, jala diradoti angka uhumhu, jala diulahon, jadi gabe bangsongku ma nasida, jala ahu gabe Debatanasida.

11:21 Alai manang ise marrohahon roha ni angka hasogiron, dohot biasbiasnasida, naeng ihuthononna, manginona tu ulunasida dalannasida i bahenonku, ninna Tuhan Jahowa.

11:22 Dung i dipaperper angka kerubim ma habongnasida i, jala angka roda di lambungnasida, jala hamuliaon ni Debata ni Israel mangalinggomi nasida sian ginjang.

11:23 Dung i manaek ma hamuliaon ni Jahowa sian tongatonga ni huta i, jala marsijongjong di atas ni dolok, na tungkan habinsaran ni huta i.

11:24 Dung i * dihindat Tondi i ma ahu, jala diboan ahu di bagasan alatan marhitehite Tondi ni Debata tu luat Kasdim, tu angka na tarbuang i; dung i manaek ma sian atashu alatan naung huida i.

11:25 Jadi huhatahon ma tu angka na tarbuang i saluhut hata ni Jahowa, angka na pinapatarna i tu ahu.

Hesekiel 12

12:1 Dung i ro muse hata ni Jahowa tu ahu, songon on:

12:2 Ale anak ni jolma, di tongatonga ni bangso na manggunturi do ho maringan, angka parmata na marnida nian, hape ndang marnida, angka parpinggol na marbinege nian, hape ndang dibege, ai bangso panggunturi do nasida.

12:3 Dibahen i ho ale anak ni jolma, bahen ma di ho angka parhohas parbungkason, jala bungkas ma ho arian di adopan ni matanasida. Ingkon bungkas ho sian ingananmu tu inganan na asing di adopan ni matanasida, anggiat mamoto rohanasida, ai bangso panggunturi do nasida.

12:4 Ingkon paruaronmu angka parhohasmu arian i di adopan ni matanasida, songon angka parhohas parbungkason. Alai ingkon bodari pe ho ruar di adopan ni matanasida, songon na somal haruruar ni halak na bungkas.

12:5 Ingkon di adopan ni matanasida dungkirdungkironmu dorpi, asa sian i ho ruar.

12:6 Ingkon di adopan ni matanasida ampehononmu tu abaram, dung pe holom asa ruar usungonmu, ingkon tujunganmu bohim, jala ndang jadi idaonmu tano i; ai nunga * hubahen ho gabe tudosan halongangan di bangso Israel.

12:7 Jadi hubahen ma songon na tinonahon i tu ahu: Huparuar arian angka parhohashu, songon angka parhohas parbungkasan, jala hudungkirdungkiri bodarina i dorpi i torus dohot tanganku sandiri; dung pe holom asa ruar huusung, huampehon tu abarangku di adopan ni matanasida.

12:8 Alai manogotna i ro ma hata ni Jahowa tu ahu, songon on:

12:9 Atehe ale anak ni jolma, nda tung adong sian bangso Israel, bangso panggunturi i, angka na mandok tu ho: Aha do na binahenmu?

12:10 Dohononmu ma tu nasida: Songon on do hata ni Tuhan Jahowa: * Marhahonaan tu raja di Jerusalem do i dohot tu sandok bangso Israel, angka na di tongatongana.

12:11 Dohononmu ma: Ahu do apala * tanda halongangan di hamu; suang songon na hubahen i, ingkon bahenon tu nasida, ingkon mardalan nasida tu parbungkasan, tu habuangan.

12:12 Ia raja na di tongatonganasida, pasoratonna ma abarana, dung pe holom asa ruar usungonna, dorpi i do dungkirdungkirannasida laho paruarhon sian i; tujunganna ma bohina i, alai na so jadi idaon ni matana tano i.

12:13 Lingkuphononku huhut rambangku tu atasna, asa tartangkup ibana di bagasan jorgongku, jala ahu mamboan ibana tu Babel, tu tano ni halak Kasdim, alai ndang jadi idaonna tano i, laos mate disi ibana.

12:14 Jala saluhut angka na humaliang ibana, angka na hinarana ro di sandok paranganna, paserahonku do tu saluhut desa, jala podang i do sintahonku sian pudinasida.

12:15 Asa tung ditanda nasida ahu do Jahowa, ia dung mampar nasida hubahen di tongatonga ni angka parbegu, jala hupaserak nasida tu angka luat ni halak.

12:16 Alai * tebahononku do sian nasida angka baoa, hira pamilangina angka na malua sian podang, sian haraparon dohot sian begu antuk, asa nasida sandiri manjamitahon saluhut biasbias angka na niulanasida di tongatonga ni angka parbegu hasahatannasida i, asa ditanda nasida ahu do Jahowa.

12:17 Dung i ro muse ma hata ni Jahowa tu ahu songon on:

12:18 Ale anak ni jolma, ingkon mardongan raion ho laho manganhon rotim, jala mardongan hatahuton dohot hagogotan inumonmu aek.

12:19 Jala dohononmu ma tu bangso ni tano i: Songon on do hata ni Tuhan Jahowa taringot tu isi ni Jerusalem, angka na di tano Israel: Ingkon mardongan hagodoron panganonnasida rotinasida i, jala mardongan hapariron inumonnasida aek, ala naung tarulang tanona, bolong ia hinagabena binahen ni pangarupaon ni saluhut angka pangisina.

12:20 Jala tarulang do huta angka na niinganan na sai laon, jala tano i gabe halongonan, asa tung ditanda nasida ahu do Jahowa.

12:21 Dung i ro muse ma hata ni Jahowa tu ahu, songon on:

12:22 Ale anak ni jolma, umpama dia do i na mehet di hamu di tano Israel songon on: Laon dope angka ari i, jala nunga pesan sandok alatan.

12:23 Dibahen i dohononmu ma tu nasida: Songon on do hata ni Tuhan Jahowa: Pasadionku ma umpama i, asa unang be parumpamahononnasida di Israel, ingkon dohononmu ma tu nasida: Nunga jonok angka ari i dohot hata ni sandok alatan i.

12:24 Ai ndang tagamon adong be agia aha alatan sipaotooto, manang pangarundingon lesemlesem di tongatonga ni bangso Israel.

12:25 Ai ahu Jahowa sandiri mangkatai, manang hata dia huhatahon, ingkon pasautonku do i, ndang be togangonku, ai di angka arimuna, ho ale bangso panggunturi hatahononku, sada hata jala pasautonku, ninna Tuhan Jahowa.

12:26 Dung i ro muse hata ni Jahowa tu ahu songon on:

12:27 Ale anak ni jolma, ida ma, hata ni bangso Israel songon on: Alatan na niidana i, laon dope ariarina, jala taringot tu tingki angka na dao do ibana manurirangi.

12:28 Dibahen i dohononmu ma tu nasida: Songon on do hata ni Tuhan Jahowa: Ndang be togangonku saluhut angka hatangku; hata naung huhatahon i, ingkon pasautonku do i, ninna Tuhan Jahowa.

Hesekiel 13

13:1 Dung i ro muse hata ni Jahowa tu ahu songon on:

13:2 Ale anak ni jolma, manurirangi ma ho dompak panurirang ni Israel, angka na manurirangi, jala dohononmu ma tu angka na manurirangi * sian tubutubu ni rohana sandiri: Tangihon hamu ma hata ni Jahowa!

13:3 Songon on do hata ni Tuhan Jahowa: * Marjea ma panurirang angka na oto, angka na paihuthon tondinasida sandiri, dohot na so pinapatar tu nasida.

13:4 Tudoshon antuasu angka na di halongonan do angka panurirangmu, ale Israel.

13:5 Ndang dipanaek hamu * angka bungbung, jala ndang dibahen hamu parik humaliang pinompar ni Israel, asa manahan nian jongjong di hamusuon di ari ni Jahowa.

13:6 Sipaotooto do diida nasida dohot pangarundingon * gabus, angka didok nasida do: Songon on do hata ni Jahowa! Hape ndada Jahowa marsuru nasida, gabe tarurak nasida maimaima hasosonggop ni hata i.

13:7 Nda alatan sipaotooto na niidamuna i dohot pangarundingon gapgap na hinatahonmuna i, angka didok hamu do: Pandok ni Jahowa do i, hape so ahu mangkatahon.

13:8 Dibahen i songon on do hata ni Tuhan Jahowa: Ala sipaotooto na hinatahonmuna, jala ala gapgap na niidamuna i; dibahen i ida ma, ahu ma marlulu dompak hamu, ninna Tuhan Jahowa.

13:9 Jala tanganku sandiri mangonai tu panurirang angka na maralatan sipaotooto, dohot angka na mangarundingkon gapgap, ndang jadi * masuk nasida tu bagasan luhutan ni bangsongku, jala ndang jadi tarsurat nasida tu surat aturan, ni pinompar ni Israel, jala ndang jadi masuk nasida tu tano ni Israel, asa tung ditanda hamu ahu do Tuhan Jahowa.

13:10 Dibahen i tongon do, ala na nililuhonnasida bangsongki, didok do: Dame, hape soadong dame, gabe dipauli bangso i dorpi tano, jala ida ma, nasida mambahen sampangna.

13:11 Ingkon dohononmu ma tu angka sibahen sampang: Ingkon marumpak do i! Ai masa tahe udan tipotipo, jala hamu ale angka batu ambolas, madabu ma hamu, jala malua ma ho, ale habahaba!

13:12 Jadi ida ma, marumpak ma dorpi i; nda dohonon ni halak ma tu hamu: Didia do nuaeng sampang na nileaphonmuna i?

13:13 Dibahen i songon on do hata ni Tuhan Jahowa: Ahu ma paluahon habahaba di bagasan rimashu, jala masa udan tipotipo di bagasan murukku, dohot angka batu ambolas di bagasan parpiarpiar ni rimashu laho maniaphon.

13:14 Jala lohaonku ma dorpi naung sinampangmuna i, jala panepneponku dohot tano i, asa tedek ojahanna, jala marumpak huta i, jala siap hamu di tongatongana; asa tung ditanda hamu ahu do Jahowa.

13:15 Asa sun tolhas hubahen rimashu dompak dorpi i dohot dompak angka sibahen sampangna, jala dohononku ma tu hamu: Ndang adong be disi dorpi, jala ndang disi be angka sibahen sampangna!

13:16 Angka panurirang ni Israel tahe, angka na manurirangi tu Jerusalem, angka na mangulpuk taringot tu huta i ulpuhan * pardemahan, hape so adong pardemahan, ninna Tuhan Jahowa.

13:17 Ia ho ale anak ni jolma, tujuhon ma bohim dompak angka boru ni bangsom, angka na manurirangi sian tubutubu ni rohanasida sandiri, jala manurirangi ma ho dompak nasida!

13:18 Jala dohononmu ma: Songon on do hata ni Tuhan Jahowa: Marjea ma angka boruboru na manjarumi bantalbantal tu saluhut ruasruas ni tangan, dohot angka na mambahen tujungtujung marragamragam balgana bahenon tu ulu laho mamburu tondi ni halak. Ia tondi ni bangsongku naeng buruonmuna, ia tondimuna sandiri hape tung naeng pangoluonmuna.

13:19 Jala naeng do leaanmuna ahu maradophon bangsongku, binahen ni eme sanggim, manang binahen ni roti sanseat laho * mambunu tondi, angka na so jadi bunuon dohot pangoluhon tondi, angka na so jadi pangoluon, * marhitehite gabusmuna tu bangsongki, angka na girgir patangitangi gabus.

13:20 Dibahen i, songon on do hata ni Tuhan Jahowa: Ida ma, ahu ma alo ni bantalbantalmuna, angka na pinangkemuna umburu angka tondi laho mangela tu hamagoan; hape ahu mangarompas nasida sian abinganmuna, jala ahu paluahon tondi angka na binurumuna i, tondi angka na pinaelaelamuna i.

13:21 Jala ahu manansani angka tujungmuna, jala ahu paluahon bangsongku sian tanganmu, jala ndang be tagamon dapot tanganmuna nasida buruonmu, asa tung ditanda hamu ahu do Jahowa.

13:22 Ala naung marpangansi hamu mangarsahi roha ni partigor i, so manang ahu mangarsahi ibana, jala * lam dipargogoi hamu tangan ni parjahat, gabe sundat ibana mulak sian dalanna na roa i, asa mangolu nian ibana.

13:23 Dibahen i ndang be marulpuhan sipaotooto hamu, jala ndang be hamu mangarundingi, jala ahu paluahon bangsongki sian tanganmuna, asa tung ditanda hamu ahu do Jahowa.

Hesekiel 14

14:1 Dung i ro ma * angka baoa sian angka sintua ni Israel manopot ahu, laos hundul di jolongku.

14:2 Jadi ro ma hata ni Jahowa tu ahu songon on:

14:3 Ale anak ni jolma, angka baoa on marparsigantungan tu ganaganaannasida di bagasan rohanasida, jala dibahen do parbonsiran tu hajahatonnasida sonson tu jolonasida, tung olo ma ahu tagamon usousoannasida?

14:4 Dibahen i mangkatai ma ho dohot nasida, jala dohononmu ma tu nasida: Songon on do hata ni Tuhan Jahowa: Manang ise sian pinompar ni Israel na marparsigantungan tu ganaganaan na di bagasan rohana, jala dibahen parbonsiran tu hajahatonna sonson tu jolona, ro muse dope ibana manopot panurirang i, ahu, Jahowa sandiri ma mangalusi ibana, hombar tu hinadeak ni ganaganaanna.

14:5 Asa tung mangilala roha ni pinompar ni Israel di bagasan, angka na marbalik tumundalhon ahu, binahen ni ganaganaannasida saluhutna.

14:6 Dibahen i dohononmu ma tu pinompar ni Israel: Songon on do hata ni Tuhan Jahowa: * Mulak ma hamu, tundalhon hamu ma ganaganaanmuna, jala padao hamu ma bohimuna sian saluhut biasbias, angka na niulahonmuna.

14:7 Ai manang ise sian pinompar ni Israel manang sian halak ruar pe, na maisolat di tongatonga ni Israel, molo tung marbalik ibana sian ahu, jala marparsigantungan rohana di bagasan tu ganaganaanna, jala dibahen parbonsiran tu hajahatonna sonson tu jolona, ro muse dope ibana mandapothon panurirang, asa marhitehite ibana usousoanna ahu, apala ahu, Jahowa sandiri ma maralus tu ibana manojom.

14:8 Apala bohingku ma bahenonku gabe alo ni baoa i laho mangago ibana, bahen tanda dohot * pambuatan hulingkulingan, jala ahu maniaphon ibana sian tongatonga ni bangsongku, asa tung ditanda hamu ahu do Jahowa.

14:9 Jala tung sura olo panurirang i paotootoon gabe dihatahon hata sisandok, ahu, Jahowa sandiri ma * paoto panurirang sisongon i, jala patoltolonku ma tanganku dompak ibana, jala ripurhononku ibana sian tongatonga ni bangsongku Israel.

14:10 Ingkon manginona tu nasida be hajahatonnasida i, dos do hajahaton ni na usouso, songon hajahaton ni panurirang i.

14:11 Asa unang be lilu pinompar ni Israel mandao sian ahu, jala unang be diramuni dirinasida di bagasan saluhut hajahatonnasida i, asa sumuang nasida gabe bangsongku, jala ahu gabe Debatanasida, ninna Tuhan Jahowa.

14:12 Dung i ro muse ma hata ni Jahowa tu ahu songon on:

14:13 Ale anak ni jolma, tung sura mardosa sada luat dompak ahu mangoseosei: Jadi patoltolonku ma tanganku dompak luat i, jala ponggolhononku, sian i * tungkot parbohalan, jala tongoshononku tusi haraparon, jala pansingkononku sian i jolma nang pinahan.

14:14 Tung sura pe di tongatongana na tolu halak on: si Noak, si Daniel dohot si Job, hosanasida sandiri do paluaon nasida, alani hatigorannasida, ninna Tuhan Jahowa.

14:15 Manang tung sura ahu pamasa binatang na rahat di luat i, pola langa pangisina i dibahen, jala tarulang, gari mamolus sian i ndang tarbahen maradophon binatang i.

14:16 Songon sintongna mangolu ahu, ninna Tuhan Jahowa, di tongatongana pe na tolu halak i, molo tung adong paluaonnasida tagamon anak nang boru, so holan nasida sandiri malua, ia luat i gabe halongonan do.

14:17 Manang tung sura ahu parohon podang tu atas ni luat i, laos ningku do: Rasehon ma tano i, ho ale podang! Gabe ripas hubahen sian i jolma nang pinahan.

14:18 Songon sintongna mangolu ahu, ninna Tuhan Jahowa, di tongatongana pe na tolu halak i, ndang adong paluaonnasida anak manang boru, tung holan nasida sandiri do malua.

14:19 Manang tung sura ahu parohon begu masa tu luat i, jala huusehon rimashu tusi marhitehite durusdurus ni mudar laho mangaripashon sian i jolma nang pinahan.

14:20 Songon sintongna mangolu ahu, ninna Tuhan Jahowa, di tongatongana pe si Noak, si Daniel dohot si Job, molo tung adong anak manang boru paluaonnasida, so holan hosanasida paluaonnasida marhitehite hatigorannasida.

14:21 Ai songon on do hata ni Tuhan Jahowa: Lam beha ma molo rap hutongoshon tu Jerusalem * uhumhu ma opat i angka na rahat i, i ma podang, haraparon, binatang na rahat dohot begu antuk, laho maniaphon sian i jolma nang pinahan.

14:22 Ai ida ma, sai adong do tading di bagasan pasipasina na malua, angka na ruar tinogihon, anak nang boru angka nasida ma ruar sogot manopot hamu, jadi idaonmuna ma dalannasida dohot pambahenannasida, gabe tarapul rohamuna ala ni jea na huparo dompak Jerusalem, ala ni saluhut tahe na huparo tusi.

14:23 Jadi apulonnasida ma hamu, ai idaonmuna ma dalannasida dohot pambahenannasida, asa tung ditanda hamu, na marala do saluhut na hubahen i tu Jerusalem, ninna Tuhan Jahowa.

Hesekiel 15

15:1 Dung i ro muse ma hata ni Jahowa tu ahu, songon on:

15:2 Ale anak ni jolma, tung aha ma surung ni * hau anggur martimbangkon saluhut hau hian? Manang ranting ni hau anggur na di tongatonga ni hau tombak?

15:3 Tung tarbuat ma sian i bahen parhau mambahen ulaula sian i, manang tung tarbuat sian i nanggo labang sada manangkothon tusi ulaula manang aha?

15:4 Ida ma, sinubahon do i tu api, asa disudahon, nunga pola suda tampahanna na dua i dipangan api, gabe sipusipu ia tongatongana, tung tagamon marguna dope i bahen ulaula?

15:5 Ida ma, gari uju simpan dope, gari so tarpangke bahen ulaula, lam ia dung dipangan api ma, jala gabe sipusipu, tung tarpangke dope bahen ulaula?

15:6 Dibahen i songon on do hata ni Tuhan Jahowa: Songon pangalaho ni hau anggur di tongatonga ni hau tombak, naung hupasahat tu api sudahononna, suang songon i naung hupasahat isi ni Jerusalem.

15:7 Nunga apala bohingku hubahen gabe alonasida; malua pe nasida sian api na sada, ingkon suda nasida panganon ni api sadaan, asa tung ditanda hamu ahu do Jahowa, ia dung hubahen bohingku gabe alonasida.

15:8 Jala nunga hubahen tano i gabe halongonan, ala mangoseosei nasida, ninna Tuhan Jahowa.

Hesekiel 16

16:1 Dung i ro muse ma hata ni Jahowa tu ahu, songon on:

16:2 Ale anak ni jolma, pabotohon ma tu Jerusalem biasbias angka na niulana.

16:3 Jala dohononmu ma: Songon on do hata ni Tuhan Jahowa tu Jerusalem: Haroroanmu dohot hatubuanmu sian tano ni halak Kanaan do, marga Amori do amam, jala boru Het do inam.

16:4 Pangalaho ni hatutubum songon on do: Ndang diseat pusokmu di ari hatutubum, jala ndang dididi ho dohot aek laho paiashon; jala ndang diososhon sira tu ho, jala ndang diborhosi ho.

16:5 Ndang adong na asi roha mida ho nanggo sahalak, mambahen tu ho sada sian angka bongka ondeng, manundunhon ho nian; lam diambolongkon do ho tahe tu ladang, dibahen gigina mida hosam di ari hatutubum.

16:6 Jadi mamolus ma ahu sian lambungmu, gabe huida ho marguluguluhon mudarmu, gabe hudok tu ho: Ingkon mangolu ho di bagasan mudarmu! Songon hudok ma tu ho: Ingkon mangolu ho di bagasan mudarmu!

16:7 Marloksaloksa ho muse hubahen, songon tumburtumbur di ladang; gabe torop ho jala magodang, jala sungkot hinaulim, lam tu balgana do bagotmu, jala lam martumbur obukmu, alai salangsalang jala marsaemara do ho.

16:8 Dung i mamolus muse ahu sian lambungmu, jala huida ho, gabe ida ma, nunga jumpang tingkim, tingki partandangonmu. Jadi * hupaherbang ma habongku mangulosi ho, jala huhungkupi parsaemaraonmu, pola marmangmang ahu tu ho, jala * marpadan ahu tu ho, ninna Tuhan Jahowa, gabe ahu nampuna ho.

16:9 Dung i ahu mandidi ho dohot aek, jala huusa mudarmu sian ho, jala humiahi ho dohot miak.

ᯑᯮᯰ ᯤ ᯀᯂᯮ ᯔᯉ᯲ᯑᯪᯑᯪ ᯂᯬ ᯑᯬᯂᯖᯬ᯲ ᯀᯀᯂᯩ᯲, ᯐᯞ ᯂᯮᯥᯘ ᯔᯮᯑᯒ᯲ᯔᯮ ᯘᯪᯀᯉ᯲ ᯂᯬ, ᯐᯞ ᯂᯮᯔᯪᯀᯂᯪ ᯂᯬ ᯑᯬᯂᯖᯬ᯲ ᯔᯪᯀᯂ᯲.

16:10 Jala hubahen ho * marpangkean na niangit, dohot martapaktapak sian hulingkuling na arga sahali, jala hubahen ho marulos na halus, jala huhungkupi ulum dohot surta.

16:11 Jala hubahen ho marpangkean na jagar sahali, jala hubahen angka leang tu tanganmu dohot horunghorung tu rungkungmu.

16:12 Hubahen igungmu martintin, jala marantinganting ia pinggolmu, jala tumpal sada na arga situtu tu ulum.

16:13 Jadi marbujonggit ho sian sere dohot sian perak, jala dagangan na halus do parulosonmu, surta dohot hain na niangit. Sagusagu mardongan situak ni loba dohot miak panganonmu, jadi sungkot ma hinaulim, jala pampe tu ho harajaon.

16:14 Jadi pansar ma baritam tu tongatonga ni angka parbegu * dibahen hinaulim, ai tung na sun denggan do i, dibahen hamuliaonku na hupampe tu ho, ninna Tuhan Jahowa.

16:15 Hape marhaposan tu hinaulim do ho, jala * marmainan ho mangasahon baritam, jala didaishon ho do parmainanonmu tu ganup na mamolus mangalohoti ibana.

16:16 Dibuat ho do huhut sian pangkeanmu asa mambahen di ho angka langgatan siganding, marmainan ho di atasna, na so dung dumatangi, jala na so tagamon masa nang sogot.

16:17 Dibuat ho do huhut ulaula ni hajagaronmu sian serengku dohot sian perakku, na hulehon i tu ho, jala dibahen ho di ho angka sumansuman ni baoa, asa marmainan tusi.

16:18 Dibuat ho do huhut pangkeanmu na niangit, jala dihungkuphon ho tu nasida, dipatibal ho do huhut miakku dohot daupangku tu jolonasida.

16:19 Jala rotingku na hubasabasahon i tu ho, i ma sagusagu mardongan miak dohot situak ni loba na hulehon bahen panganonmu nian, hape dilehon ho do i tu jolonasida bahen uap na hushus, i ma tutu, ninna Tuhan Jahowa.

16:20 Angkup ni dibuat ho do * angka anakmu dohot borum, angka na tinubuhonmu di ahu nian, gabe dipelehon ho do i tu nasida asa sudahononna; tung numeang ma i sian angka parmainanonmu di roham?

16:21 Nunga dipotongi ho huhut angka anakku, jala diseahon ho nasida, asa pabolashon nasida sian api pasahathon tu debata sileban.

16:22 Jala di bagasan saluhut biasbias angka na niulam dohot parmainanonmu, ndang marningot ho di angka ari haposoonmu, * uju salangsalang ho jala marsaemara, tung marguluguluhon mudarmu ho.

16:23 Dung salpu saluhut hajahatonmu, jea, jea ma di ho, ninna Tuhan Jahowa!

16:24 Tung dipauli ho do di ho bagas na marpangalaho langkitang, jala dibahen ho do di ho tambak di saluhut alaman.

16:25 Di saluhut haroroan ni dalan dipauli ho angka tambakmu, jala dibahen ho do hinaulim gabe biasbias, jala dipahangkang ho do patmu di ganup na mamolus, asa paganda parmainanonmu.

16:26 Jala laho do ho marmainan tu angka anak ni Misir, hombar balokmu, angka sigodang sibuk, jala dipatamba ho do parmainanonmu, asa pahehe rimashu.

16:27 Jadi ida ma, ala ni hupatoltol tanganku tu atasmu, jala huorui partalianmu hian jala hupasahat ho gabe guru roharoha ni angka na mangkagigihon ho, i ma angka boru Palistim, angka na maila balik mida dalan ni harorangonmu.

16:28 Laho muse ho * marmainan tu angka anak ni Assur ala so olo mahap roham, marmainan ho tahe tu nasida, hape laos so olo mahap roham.

16:29 Lam digandai ho do parmainanonmu tu tano Kanaan, boti * tu luat Kasdim, laos so olo mahap dope roham disi.

16:30 Marasnai rohami marisuang, ninna Tuhan Jahowa, di na binahenmi saluhutna i, i ma pambahenan ni parompuan sibabijalang na tarboan rohana.

16:31 Di na binahenmi joromi di haroroan ni luhut dalan dohot na binahenmi tambakmu di saluhut alaman, jala ndada ho songon sibabijalang hian na mangigil upa.

16:32 Oe ale boru sibabijalang, na manjangkon halak sileban, singkat ni harajaanna hian!

16:33 Somalna nian di saluhut sibabijalang manjalo ugasan, alai muba do anggo ho, ho do balik mangalehon ugasanmu tu saluhut puangmu dohot mangalehon silua tu nasida, mangela ro manopot ho sian na humaliang marmainan dohot ho.

16:34 Asa na sumalin do ho diparmainanonmu martimbangkon parompuan angka na asing; ndada ho diihutihut naeng marmainan, ho do balik mangalehon ugasan, ndada tu ho dilehon ugasan, umbahen gabe sumalin ho.

16:35 Dibahen i ale sibabijalang, tangihon ma hata ni Jahowa!

16:36 Songon on do hata ni Tuhan Jahowa: Ala naung pinansuasaehonmi hepengmu, jala dipatedek ho hailaonmu, binahen ni parmainanonmu tu angka puangmu, dohot tu saluhut ganaganaan ni hasogiron angka na niulam, jala hombar tu mudar ni anakmu angka na sinombahonmu tu nasida.

16:37 Dibahen i, ida ma, ahu ma papunguhon saluhut puangmu angka na mangkasolohon ho, dohot saluhut angka na hinaholongan ni roham ro di saluhut angka hasomoran ni roham, ahu ma papunguhon nasida sian na humaliang dompak ho, asa hupatedek hailaonmu tu nasida, asa tung diida nasida sandok hailaonmu.

16:38 Jala ahu * mandabu tu ho uhum na tu angka sibabijalang hian dohot tu parompuan angka na mandurushon mudar, jala ahu pasahathon ho gabe mudar ni harimason dohot pangiburuan.

16:39 Jala ahu pasahathon ho tu bagasan tangannasida, asa lohaonnasida angka joromi, jala panepneponna angka tambakmu, jala tanggalannasida angka pangkeanmu, jala rampasonnasida angka mata intan jagarjagarmu, jala pasombuonna ho salangsalang dohot marsaemara.

16:40 Jala nangkok do togihononnasida dompak ho sada luhutan, jala dangguranna ho dohot batu, jala tampulanna ho dohot podangnasida.

16:41 Jala * purunanna angka bagasmu dohot api, jala bahenonna tu ho angka uhumi di adopan ni torop parompuan. Asa ahu pasohothon parmainanonmu, panuang pe ndang be lehononmu.

16:42 Asa tung * sombu rimashu mida ho, jala sumurut pangiburuonku sian ho, gabe sonang ahu, jala unang be tarsunggul rimashu.

16:43 Ala na so niingotmu angka ari haposoonmu, jala na ritoon i ho dompak ahu di saluhutna i. Ahu pe antong, ida ma, manginona tu ulum bahenonku dalanmu, ninna Tuhan Jahowa, jala ndang be tambaonmu harorangon dongan ni saluhut biasbias, angka na niulam.

16:44 Ida ma, saluhut halak na somal marumpama, dohononna ma hata umpama on dompak ho: Suman tu inana do boruna.

16:45 Boru ni inam do ho, naung mahilolong di baoa na dohot di anakkonna; jala anggi ni haham do ho angka na mahilolong mida baoa nasida dohot mambolongkon anaknasida; boru Het do * inamuna, jala marga Amori do amamuna.

16:46 Jala * hahami do Samaria, ibana dohot angka boruna na maringan tungkan sihambirangmu, jala anggim na maringan tungkan siamunmu, i ma * Sodom dohot angka boruna.

16:47 Alai ndang diihuthon ho angka dalannasida, jala ndang diulahon ho hombar tu biasbias angka na niulanasida, hira na maotikku, gabe jumahat ho di sude angka dalanmu, sian nasida.

16:48 Songon sintongna mangolu ahu, ninna Tuhan Jahowa, molo tung * tudos binahen ni Sodom anggim i, ibana dohot angka boruna, songon na binahenmi dohot angka borum!

16:49 Ida ma, on do hajahaton ni Sodom anggim i: Roha haginjangon, pargadombuson dohot hapedemon, i ma di ibana dohot di angka boruna; ianggo tangan ni na dangol dohot na parir, ndang dipargogoi nasida.

16:50 Lam jungkat tahe rohanasida jala diulahon do angka biasbias di jolongku, jadi hurendephon nasida, * disi huida.

16:51 Samaria i pe, nanggo satonga ni dosami ndang diulahon, andul do digandai do angka biasbiasmi martimbangkon nasida, tung hira * dipintori ho do hahami di saluhut biasbias angka na niulam.

16:52 Ho pe antong, ingkon usungonmu haurahonmu na niuhumhonmu tu hahami; marhitehite dosam angka na sumogir i binahenmu sian nasida, gabe umpintor nasida sian ho. Dibahen i tarurak ma nang ho, jala usungonmu haurahonmu marhitehite pamintorim di hahami.

16:53 Dung i * mulak ma togihononku angka na tarbuang sian nasida, angka na tarbuang sian Sodom dohot sian angka boruna, angka na tarbuang sian Samaria dohot sian angka boruna, nang angka na tarbuang ni habuanganmu nuaeng di tongatongana.

16:54 Asa usungonmu haurahonmu, gabe maila ho mida saluhut na binahenmi, di na niapulanmu nasida.

16:55 Jadi mulak ma Sodom anggim i, ro di angka boruna tu haroroanna hian; jala Samaria dohot angka boruna mulak tu haroroanna hian; hape dohot angka borum mulak tu haroroanmuna hian.

16:56 Jala Sodom anggim i, ndang be gabe barita sambing di bagasan pamanganmu, songon uju di ari haginjangon ni roham.

16:57 Tagan so patar dope hinajahatmu, songon di tingki pangareheon ni angka boru sian Ram dohot saluhut hombarna hundul humaliang ro di boru Palistim, angka na palea ho humaliang.

16:58 Harorangonmu tahe dohot biasbias angka na niulam, angka na manginsombut tu ho, ninna Jahowa.

16:59 Ai songon on do hata ni Tuhan Jahowa: Ahu mambahen tu ho suang songon na binahenmi, na tinoisanmi uari laho mangose padan.

16:60 Alai anggo ahu, sai * huingot do padan na hubahen i tu ho, ** uju di angka ari haposoonmu, jala huhajongjongkon tu ho * padan saleleng ni lelengna.

16:61 Jadi * ingotonmu ma angka dalanmu, laos hailahononmu do di na jinangkonmi haham dohot anggim, angka silehononku tu ho sogot bahen angka boru, alai ndada sian patik parpadanonmu.

16:62 Jala ahu mangkajongjongkon padanhu tu ho sogot, asa tung diboto ho ahu do Jahowa.

16:63 Asa tung * marningot ho jala maila, pola ndang be hum ho mangungkap pamangan binahen ni ilam, ia dung husalesehon tu ho taringot tu saluhut na binahenna i, ninna Tuhan Jahowa.

Hesekiel 17

17:1 Dung i ro muse ma hata ni Jahowa tu ahu, songon on:

17:2 Ale anak ni jolma, marhulingkulingan, jala marumpama ma ho tu pinompar ni Israel.

17:3 Jala dohononmu ma: Songon on do hata ni Tuhan Jahowa: * Sada pidong raja ualu na bolon, bidang habongna, jala ganjang hatirna, gok imbulu, angka na marrintik songgop tu Libanon, jala dibuat apala pusuk ni hau ares.

17:4 Digotap do ujung ni angka rantingna, laos diboan do i tu * tano parboniagaan, jala dibahen do i tu bagasan huta ni angka partigatiga.

17:5 Dibuat do huhut sian boni ni tano i, jala dibahen do i tu bagasan hauma sisaburon, dilopokkon muse tu lambung ni aek godang.

17:6 Jadi martumbur ma i gabe * hau anggur na manjarar, rodop partubuna, manjomba do ianggo angka rantingna tu ibana, angka uratna pe di toruna do. Jadi gabe hau anggur ibana, pola marranting jala marbulung.

17:7 Dung i adong ma sada pidong raja ualu na asing na bolon, bidang habongna, jala semet imputna. Jadi ida ma, hau anggur i parangkithon uratna tusi, jala rantingna manjarar tusi, asa dibornohi ibana sian baruran ni panuananna.

17:8 Tu tano bosar, di tobing do ibana tarsuan, asa martumbur ibana, jala marparbue nian, asa gabe hau anggur na marmulia situtu.

17:9 Dohononmu ma: Songon on do hata ni Tuhan Jahowa: Tung tagamon manjadi ma i? Nda runtunanna angka uratna jala seatonna parbuena, asa malos? Ingkon saluhut bulung ni tumburna tahe malos; jala ndada pola marhitehite tangan na gogo, manang marhitehite bangso na timbul eneton ibana sian uratna.

17:10 Tongon tahe, nunga nian tarsuan ibana, tung tagamon manjadi ma? Nda mamintor malos situtu ma tagamon, disi diullus alogo * sian purba ibana? Malos ma tutu ibana di atas baruran partumburanna i.

17:11 Dung i ro muse ma hata ni Jahowa tu ahu, songon on:

17:12 Ua paboa ma tu bangso panggunturi i: Ndang mamoto hamu manang dia lapatanna? Dohononmu ma: Ida ma, * nunga ro raja sian Babel tu Jerusalem, gabe ditangkup rajana dohot angka indukna, jala diboan nasida bahen donganna tu Babel.

17:13 Dibuat huhut sian * pinompar ni raja i, jala dibahen padanna tusi, pola dipatolon ibana, ianggo angka na sangap ni tano i diboan do.

17:14 Asa tung laos tarjepol harajaon i, unang be manggusar, asa diradoti padanna, laos hot dihajongjongkon nian.

17:15 Hape manggunturi do i dompak ibana, laos disuru angka suruanna tu Misir, mangido lehononna nian tu ibana angka hoda dohot na nirajaanna torop. Tung adong ma labana sian i? Tung tagamon malua ma halak na mambahen songon i? Tung tagamon malua ma * siose padan?

17:16 Songon sintongna mangolu ahu, ninna Tuhan Jahowa, molo so laos mate ibana di tongatonga ni Babel, di inganan ni raja na pabangkit ibana gabe raja, nampuna uari na tinoisanna, jala nampuna padan na ni oseanna.

17:17 Jala ndang tagamon donganan ni Firaun ibana marhitehite godang parangan, manang na torop i laho tole porang, laho * pajongjong hubu dohot pauli batarbatar, asa mangarendephon torop halak.

17:18 Tongon tahe, ala naung tinoisanna uari laho mangose padan, jala ida ma, pola dilehon tanganna, lam dibahen do saluhutna ondeng, ndang tagamon malua ibana.

17:19 Dibahen i songon on do hata ni Tuhan Jahowa: Songon sintongna mangolu ahu, molo so manginona tu uluna bahenonku uaringku naung tinoisanna i dohot padanhu naung niosena i.

17:20 Lingkuphononku ma rambangku tu atasna, asa tartangkup ibana di bagasan jaring parburuonki, jala ahu mamboan ibana tu Babel, jala disi do uhumonku ibana, ala na mangoseosei ibana dompak ahu.

17:21 Jala saluhut angka na maporus sian paranganna marhoronhoron, ingkon marragean nasida bahenon ni podang, ianggo angka pasipasina paserahonku tu ganup desa, asa tung ditanda hamu ahu do Jahowa na mandok i.

17:22 Songon on do hata ni Tuhan Jahowa: Apala ahu ma mambuat sada ranting sian pusuk ni hau ares na timbo i, jala lopokhononku; sian punsu ni angka tumburna gotaponku * sada lunduna, jala ahu manuanhonsa di atas dolok na timbo, jala na timbul.

17:23 Di * atas dolok ni Israel na timbo i suanhononku ibana, asa laos mardangka jala marparbue, laos gabe hau ares na marmulia, asa * marasar di toruna saluhut pidong na marhabong, angka na balga dohot na metmet marlinggomlinggom nasida di toru ni dangkana.

17:24 Jadi tandaon ni saluhut hau di ladang ma, ahu Jahowa sandiri parodophon * hau na timbo i, dohot patimbohon hau na rodop i. Ahu mambahen malos hau na rata, jala ahu mambahen martumbur hau na malos, ahu Jahowa sandiri na mandok i dohot mambahensa.

Hesekiel 18

18:1 Dung i ro muse hata ni Jahowa tu ahu songon on:

18:2 Ala ni aha umbahen sai pangkeonmuna hata umpama on taringot tu tano Israel mandok: * Angka amaama manganhon parbue ni hau anggur na asom, gabe ngiluan ia angka ngingi ni anakna!

18:3 Songon sintongna mangolu ahu, ninna Tuhan Jahowa, tung na so jadi be pangkeonmuna hata umpama i di Israel.

18:4 Ida ma, ahu do nampuna saluhut tondi ni jolma, nang tondi ni amaama, nang tondi ni anakna, ahu do nampunasa. * Tondi ni manang ise na mardosa, ingkon i do mate.

18:5 Alai molo gabe partigor manang ise, jala diulahon uhum dohot hatigoran.

18:6 Ndang * mangan tibaltibal ibana di atas ni angka dolok, ndang manaili matana tu angka ganaganaan ni pinompar ni Israel, jala ndang * diramuni jolma ni donganna, jala ndang jumonok ibana tu parompuan jumpa diida hasomalanna.

18:7 Jala * ndang dirupa manang ise; ** gade jinalona i dipaulak do tu parutang, ndang olo ibana mangarampas ugasan na nirampas, * rotina dilehon do tu na male, jala diparulosi do na marsaemara.

18:8 Ndang * paurangkon hepeng ibana, jala ndang torbang pambuatna di laba, ditait do tanganna mulak sian hageduhon, uhum hasintongan do dibahen manguhum halak na marsalisi.

18:9 Diparangehon do angka patikki, jala diradoti angka uhumhu laho mangulahon hasintongan; i ma halak partigor, sai na mangolu do ibana, ninna Tuhan Jahowa.

18:10 Hape tung sura ditubuhon ibana sada anak siulahon roharoha, na mandurushon mudar, manang diulahon tu donganna nanggo sada sian angka bongka ondeng.

18:11 Jala ndang diulahon ibana agia aha sian angka parjolo i, tung mangan do ibana di atas ni angka dolok, jala diramuni jolma ni donganna.

18:12 Tung dirupa do na dangol dohot na parir, jala dirampas do ugasan naung nirampas, jala dipatehon gade ni parutang, jala manaili matana tu angka ganaganaan, huhut mangulahon biasbias ibana.

18:13 Dipaurangkon hepengna, jala matorbangku pambuatna di laba, tung tagamon mangolu ma ibana? Tung na so jadi mangolu ibana, ala na niulana saluhut biasbias ondeng, ingkon mate ibana! Ingkon manginona tu ibana sogot mudarna!

18:14 Jala ida ma, tung sura ditubuhon ibana sada anak, na marnida sandok dosa, angka na niula ni amana, diida pe, hape ndang diulahon sisongon i:

18:15 Ndang mangan tibaltibal ibana di atas ni angka dolok, jala ndang manaili matana tu angka ganaganaan ni pinompar ni Israel, ndang diramuni jolma ni donganna.

18:16 Ndang dirupa manang ise, jala ndang dipatehon gade jinalona i, jala ndang dirampas ugasan na nirampas, sipanganonna dilehon do tu na male, jala diparulosi do na marsaemara.

18:17 Dipasurut do tanganna sian na dangol, jala ndang matorbangku pambuatna di anak ni hepeng dohot di laba, diulahon do uhumhu, angka patikku diparangehon do: Ibana ma na so tagamon mate ala ni hajahaton ni amana, ingkon mangolu situtu ibana.

18:18 Alai anggo amana, ala mangulahon pangarupaon ibana, dirampas do ugasan ni donganna, jala diulahon do na so jadi di tongatonga ni bangsona, ida ma, ingkon mate do ibana di bagasan hajahatonna.

18:19 Hape anggo hamu mandok: Boasa so manginona tu anakna hajahaton ni amana? Ala na mangulahon uhum dohot hatigoran anak i, saluhut angka patikki diradoti do jala diulahon, tongon tahe ingkon mangolu ibana.

18:20 * Tondi ni manang ise na mardosa, ingkon i do mate! Ndang jadi manginona tu * anak hajahaton ni amana, tu ama, pe ndang jadi manginona hajahaton ni anakna. Ingkon songgop sogot hatigoran tu partigor, jala hajahaton tu parjahat.

18:21 Alai tung sura ditundalhon roha ni parjahat i saluhut dosana, angka na niulana na sai laon, jala diradoti saluhut angka patikki, jala diulahon uhum dohot hatigoran, tongon do ingkon mangolu ibana, ndang jadi mate.

18:22 Saluhut hajahaton angka na niulana na sai laon, * ndang jadi jujuran tu ibana, hatigoran na niulahonna i do hangoluhononna.

18:23 Tung tagamon * marlomo ni roha ma ahu mida hamatean ni parjahat i, ninna Tuhan Jahowa; nda tagonan nian, molo muba rohana i sian dalanna angka na sai laon, asa mangolu ibana.

18:24 Alai tung sura ditundalhon halak partigor i hatigoranna i, jala diulahon na so uhum paihutihuthon saluhut biasbias, angka na niula ni parjahat hian laos diula, tung patut ma mangolu ibana? Saluhut hatigoranna angka na niulana na sai laon, ndang be ingoton, ingkon di bagasan panundaliaonna na niulana do ibana mate dohot di bagasan dosana angka naung binahenna i.

18:25 Hape anggo hamu mandok: * Ndang sintong dalan ni Tuhan i! Ua tangihon hamu ma, ale pinompar ni Israel! Tung tarbahen ma so sintong dalanku? Dalanmuna do tahe na so sintong.

18:26 Ai molo ditundalhon partigor hatigoranna i, jala diulahon na so uhum, gabe mate ibana alani: Ingkon mate di bagasan hajahaton naung niulana do ibana.

18:27 Alai parjahat i pe, molo tung ditundalhon hajahaton na niulana na sai laon, jala diulahon uhum dohot hatigoran: Pangoluhon tondina ma ibana disi.

18:28 Laos mananda rohana, jala ditundalhon saluhut hajahaton angka na niulana na sai laon, tongon do ingkon mangolu ibana, ndang jadi mate.

18:29 Hape ro ma anggo pinompar ni Israel mandok: Ndang sintong dalan ni Tuhan i! Tung tarbahen ma so sintong angka dalanku ale pinompar ni Israel? Dalanmuna i do tahe na so sintong!

18:30 Dibahen i ale pinompar ni Israel, uhumonku ma hamu sogot, ganup hombar tu angka dalanna be, ninna Tuhan Jahowa. Sai * mulak ma hamu, jala tundalhon hamu ma saluhut hajahatonmuna, asa unang hajahaton i gabe partuktuhan di hamu!

18:31 Sai reongkon hamu ma sian hamu saluhut pangalaosionmuna, angka naung binahenmuna i, jala ulahon hamu ma di hamu * roha na imbaru dohot tondi na imbaru; boasa tung tagonan mate hamu, ale pinompar ni Israel?

18:32 Ai * ndang lomo rohangku mida hamatean ni na mate, ninna Tuhan Jahowa. Antong pauba hamu ma rohamuna, asa mangolu hamu!

Hesekiel 19

19:1 Alai anggo ho pungka ma sada ende andung taringot tu angka induk ni Israel.

19:2 Jala dohononmu ma: Aha do inangmu? Singa boruboru do ibana, na manggompang di tongatonga ni angka singa, laos di tongatonga ni angka anak ni singa dipagodanggodang anakna.

19:3 Jala dipatogitogi do sada sian angka anakna, asa gabe singa parsiajar, manoro sisoroon, manganhon jolma.

19:4 Jadi dung dibege angka bangso parbegu baritana, gabe tartangkup ibana di bagasan godungnasida, jala diharihiri manogu ibana tu tano Misir.

19:5 Jadi dung diida inangna i na maimaima na sai laon, naung pesan do hape aroparopna i, gabe dibuat muse sada sian angka anakna mambahen ibana gabe singa parsiajar.

19:6 Sai mardalani do ibana di tongatonga ni angka singa, gabe singa parsiajar, asa marsiajar manoro sisoroon, manganhon jolma.

19:7 Dung i digogoi ma angka parompuan na mabalu, jala hutanasida diulang do, gabe tarulang ma tano i, jala godoron pangisina i maradophon soara parauangna i.

19:8 Jadi marrongoman ma dompak ibana angka bangso parbegu humaliang sian luatna be, jala ditaon rambangnasida padapot ibana, gabe tartangkup ibana di bagasan godungnasida.

19:9 Dung i diharihiri nasida ibana mambahen tu bagasan huruhuruan, laos * ditogutogu ibana tu raja sian Babel, diboan ibana muse tu bagasan huta angka na gonting, asa unang be tarbege soarana di atas ni angka dolok Israel.

19:10 Tudoshon hau anggur do inangmu, suang songon ho, tarsuan di tobing; marparbue jala mardangkai ibana dibahen godang ni aek.

19:11 Jala adong di ibana ranting angka na marmulia, pola tarpangke bahen tungkot harajaon, jala timbo partubuna pola disalpui angka ombun, gabe tarida ibana binahen ni hinatimbulna dohot hinadeak ni angka rantingna.

19:12 Dung i tarbutbut ibana di bagasan harimason, laos tartimpal tu tano, ro muse * alogo sian purba mangarahar parbuena, angka suak ma rantingna na marmulia i jala * ranggason, api muse manganhon ibana.

19:13 Alai anggo nuaeng tarsuan do ibana di halongonan, di tano bakkalbakkal jala na so maraek.

19:14 Jala ruar do api sian ranting ni dangkana na sada na manganhon parbuena, gabe ndang adong be di ibana ranting na marmulia tau bahen tungkot harajaon. Ende andung ma i laos pangkeon bahen ende andung tu joloan on.

Hesekiel 20

20:1 Dung i papitutaonhon, di ari sampulu bulan sipaha lima, * ro deba baoa sian angka sintua ni Israel usouso tu Jahowa, jala hundul nasida di jolongku.

20:2 Jadi ro ma hata ni Jahowa tu ahu songon on:

20:3 Ale anak ni jolma, mangkatai ma ho dohot angka sintua ni Israel, jala dohononmu ma tu nasida: Songon on do hata ni Tuhan Jahowa: Tung usouso tu ahu ma tagamon hamu angka na ro i? Songon sintongna mangolu ahu, molo tung olo be ahu usousoanmuna, ninna Tuhan Jahowa.

20:4 Atehe ale anak ni jolma, * naeng toruanmu nasida? Naeng toruanmu tutu? Antong pabotohon ma tu nasida biasbias angka na niula ni angka ompunasida!

20:5 Jala dohononmu ma tu nasida: Songon on do hata ni Tuhan Jahowa: Di ari uju pamillithu di Israel, pola hupatoltol tanganku tu pinompar ni si Jakkob, jala hupapatar diringku tu nasida di tano Misir, jala * hupatoltol tanganku tu nasida, huhut mandok songon on: Ahu do Jahowa, Debatamuna.

20:6 Apala di ari na sasada i hupatoltol muse tanganku tu nasida, laho manogihon nasida ruar sian tano Misir tu tano naung hupillit di nasida, * tano habaoran ni susu dohot situak ni loba, tano na marmulia on sian saluhut angka luat.

20:7 Jala hudok hian tu nasida: * Ganup ma hamu mangambolongkon angka hasogiron ni matana, jala unang ramuni hamu dirimuna marhitehite angka ganaganaan ni Misir! Ahu do Jahowa, Debatamuna i!

20:8 Alai manggunturi do anggo nasida dompak ahu, jala ndang olo nasida tumangihon ahu, ndang saut ganup nasida mangambolongkon angka hasogiron ni matana be, jala ndang ditadingkon nasida angka ganaganaan ni Misir. Jadi diondam rohangku ma naeng mangusehon rimashu tu nasida, asa tung sun tolhas rimashu tu nasida di tongatonga ni tano Misir.

20:9 Alai tahe * hombar tu goarhu do hupasaut, asa unang marlea goarhu di adopan ni bangso parbegu, angka na humaliang nasida, nunga pola hupapatar diringku tu nasida, pola dipaidaida matanasida, laho manogihon nasida ruar sian tano Misir.

20:10 Jadi dung hutogihon nasida ruar sian tano Misir, jala hutogihon nasida tu halongonan.

20:11 Gabe hulehon tu nasida angka patikku, jala hupabotohon tu nasida angka uhumhu, * parhitean ni jolma tu hangoluan nian molo diulahon.

20:12 Hulehon muse tu nasida angka ari * Sabbathu bahen tanda paboa di tongatonganasida ahu, asa tung ditanda nasida ahu do Jahowa na pabadiahon nasida.

20:13 Alai manggunturi dompak ahu do pinompar ni Israel nang di halongonan, ndang diparangehon nasida angka patikku, jala diambolongkon do angka uhumhu, parhitean ni jolma tu hangoluan nian, molo diulahon, jala diramuni nasida situtu angka ari Sabbathu. Jadi diondam rohangku ma mangusehon rimashu tu nasida di halongonan, maniaphon nasida nian.

20:14 Alai tahe hombar tu goarhu do hupasaut, asa unang marlea goarhu di adopan ni bangso parbegu, angka na paidaidahon ahu manogihon nasida ruar.

20:15 Dung i * hupatoltol huhut tanganku dompak nasida, uju di halongonan, na so tupa boanonku nasida sahat tu tano naung hubasabasahon nian tu nasida, tano habaoran ni susu dohot situak ni loba, tano na marmuliaan sian saluhut angka luat.

20:16 Ala naung niambolongkonnasida angka uhumhu, jala na so pinarangehonnasida angka patikku, jala na niramunannasida angka ari Sabbathu, ai angka ganaganaannasida do dipaihutihut rohanasida.

20:17 Alai marpangulahi do rohangku mida nasida, umbahen so mago nasida, jala ndang sun siap nasida hubahen di halongonan.

20:18 Dung i ningku ma tu angka anaknasida di halongonan: Unang paihutihut hamu angka patik ni amamuna i, jala unang radoti hamu angka uhumnasida, jala unang ramuni hamu dirimuna marhitehite angka ganaganaannasida.

20:19 Ai ahu do Jahowa, Debatamuna i, angka patikki ma paihutihut hamu, jala angka uhumhu ma radoti hamu, jala ulahon hamu angka i.

20:20 Jala angka ari Sabbathu parbadiai hamu, bahen tanda paboa ahu di tongatongamuna, asa tung ditanda hamu ahu do Jahowa, Debatamuna i.

20:21 Hape manggunturi dompak ahu do nang angka anakna: Angka patikki ndang diparangehon nasida, jala angka uhumhu ndang diradoti nasida laho mangulahon nian, parhitean ni jolma tu hangoluan nian, molo diulahon, angka ari Sabbathu diramuni nasida do. Jadi huondam muse mangusehon rimashu tu nasida, asa sun tolhas rimashu tu nasida di halongonan.

20:22 Alai tahe hupasurut muse tanganku, jala hubahen hombar tu goarhu, asa unang marlea di adopan ni bangso parbegu, angka na paidaidahon naung hutogihon nasida ruar.

20:23 Nang di halongonan hupatoltol do tanganku dompak nasida, laho pamamparhon nasida tu tongatonga ni angka bangso parbegu dohot paserakkon nasida tu angka luat ni halak.

20:24 Ala na so niulahonnasida angka uhumhu, jala na niambolongkonnasida angka patikku, jala na niramunannasida angka ari Sabbathu, jala na pinaihutihut ni matanasida angka ganaganaan ni amanasida.

20:25 Ahu pe antong, * hulehon ma tu nasida patik, angka na so denggan dohot uhum angka na so tarhangoluhon nasida.

20:26 Jala huramuni nasida marhitehite angka peleannasida, ala * dipabolushon nasida sian api, sandok buhabajunasida, asa husiaphon nasida, asa tung ditanda nasida ahu do Jahowa!

20:27 Dibahen i ale anak ni jolma, hatahon ma tu pinompar ni Israel, jala dohononmu ma tu nasida: Songon on do hata ni Tuhan Jahowa: Lam didatdati ompumuna dope mangaleai ahu di na nioseoseannasida ahu.

20:28 Ai dung tolhas nasida huboan tu tano, naung pola humangmangkon lehononku do i tu nasida; gabe dipelehon nasida peleannasida i tu ganup dolokdolok na timbo dohot tu ganup hau na rugun angka na niidanasida i, jala disi do dibahen nasida pargasipan ni peleannasida, jala dipatindang disi daupanasida na hushus i, jala diusehon disi peleannasida siinumon i.

20:29 Jadi hudok ma tu nasida: Tu aha do tambak na tinopotmuna i? Laos dibahen ma goarna "tambak" rasirasa sadarion.

20:30 Dibahen i dohononmu ma tu pinompar ni Israel: Songon on do hata ni Tuhan Jahowa: Tung so mangaramuni dirimuna do hamu paihutihut dalan ni ompumuna i, jala tung so marmainan ma hamu mangihuthon angka hasogironnasida?

20:31 Jala di na sinombahonmuna silehonlehonmuna i di na * pinabolushonmuna sian api anakmuna i, diramuni hamu do dirimuna hombar tu saluhut ganaganaanmuna rasirasa sadarion; ia ahu tung olo ma ahu usousoanmuna, hamu ale pinompar ni Israel? Songon sintongna mangolu ahu, ninna Tuhan Jahowa, ndang olo ahu usousoanmuna.

20:32 Tubutubu ni rohamuna pe ndang tagamon saut, na nidokmuna i: Songon angka bangso parbegu do hita sogot, songon angka bangso ni angka luat na asing hita marsomba tu hau dohot tu batu.

20:33 Songon sintongna mangolu ahu, ninna Tuhan Jahowa: Molo so ahu sandiri mangarajai hamu sogot marhitehite tangan na gogo dohot marhitehite botohon na toltol dohot marhitehite rimas na use.

20:34 Jala ahu manogihon hamu ruar sian angka bangso parbegu jala ahu papunguhon hamu sian luat parserahanmuna na sai laon, marhitehite tangan na gogo dohot marhitehite botohon na toltol dohot marhitehite rimas na use.

20:35 Jala ahu manogihon hamu tu * halongonan ni angka bangso, asa hutorui hamu disi paadop bohi be.

20:36 Songon panoruingku di ompumuna uju di halongonan ni tano Misir, laon songon i toruanku hamu, ninna Tuhan Jahowa.

20:37 Jala ahu pabolushon hamu sian * toru ni tungkot harajaon, jala ahu mamboan hamu tu bagasan ihot ni parpadanan.

20:38 Jala ahu papurpurhon sian hamu angka panggunturi dohot angka na marbalik sian ahu, paruaronku ma nasida sian tano panangkarnangkaran nasida i; alai ndang tolhas nasida tu tano ni Israel, asa tung ditanda hamu ahu do Jahowa.

20:39 Antong hamu, ale pinompar ni Israel, songon on do hata ni Tuhan Jahowa: Laho ma hamu marsomba ganup tu ganaganaanna! Alai dungkon ni, molo so olo hamu tumangihon ahu, ianggo goar ni habadiaonku ndang be ramunanmuna marhitehite peleanmuna manang ganaganaanmuna.

20:40 Ai di atas ni dolok ni habadiaonku, * di atas dolok ni Israel na timbo i, ninna Tuhan Jahowa, disi ma sombaon ni sandok pinompar ni Israel ahu sogot, tung saluhut halak na di tano i do; disi ma marlomo ni roha ahu mida nasida, jala disi ma usousoanku peleanmuna dohot patumonaan ni silehonlehonmuna ro di saluhut habadiaonmuna i.

20:41 Mardongan uap na hushus ma ahu mangkalomohon hamu, di na hutogihon hamu ruar sian angka bangso, jala hupapungu hamu sian angka luat parserahanmuna na sai laon, asa tung badia ahu di bagasan hamu di adopan ni angka bangso parbegu.

20:42 Asa tung ditanda hamu ahu do Jahowa, molo dung huboan hamu tu tano Israel, tu tano naung pola huuarihon lehononku do i tu ompumuna i.

20:43 Jadi disi ma ingotonmuna angka dalanmuna dohot saluhut pambahenanmuna, angka na paramun hamu, gabe laos marbiasbias ma hamu mida dirimuna ala saluhut hajahaton, angka na binahenmu i.

20:44 Asa tung ditanda hamu, ahu do Jahowa, ia dung hubahen tu hamu hombar tu goarhu, ndada hombar tu dalanmuna, angka na jahat i, jala ndada hombar tu pambahenanmuna, angka na busuk i, hamu ale pinompar ni Israel, ninna Tuhan Jahowa.

Hesekiel 21

21:1 Dung i ro muse hata ni Jahowa tu ahu songon on:

21:2 Ale anak ni jolma, tujuhon ma bohim tu dalan tungkan dangsina, jala mangalumba ma ho dompak dangsina, jala manurirangi ma ho * dompak tombak ni ladang tungkan dangsina.

21:3 Jala dohononmu ma tu tombak tungkan dangsina: Tangihon ma hata ni Jahowa! Songon on do hata ni Tuhan Jahowa: Ida ma, ahu pagalakkon sada api di bagasan ho, gabe suda panganonna di bagasan ho, * saluhut hau na rata dohot saluhut hau na masak; tung na so haintopan manang ise jilamna, gabe mosok ma binahen ni saluhut bohi sian dangsina sahat ro di utara.

21:4 Jadi idaon ni nasa sibuk ma, ahu Jahowa do pagalakkon, ndang be haintopan.

21:5 Jadi ningku ma: Oe ale Tuhan Jahowa! Angka nasida mandok tu ahu: Nda marhulingkulingan do ibana mangkatai?

21:6 Dung i ro muse ma hata ni Jahowa tu ahu songon on:

21:7 Ale anak ni jolma, tujuhon ma bohim dompak Jerusalem, jala mangalumba ma ho dompak angka inganan na badia i, jala manurirangi ma ho dompak tano Israel!

21:8 Jala dohononmu ma tu tano Israel: Songon on do hata ni Tuhan Jahowa: Ida ma, marlulu ma ahu dompak ho, nunga pola huumpat podangku sian sarungna, asa husiaphon sian ho partigor dohot parjahat.

21:9 Ala na naeng ahu maniaphon sian ho partigor dohot parjahat, umbahen na ruar podangku sian sarungna marlulu dompak nasa jolma sian dangsina sahat ro di utara.

21:10 Asa tung ditanda nasa jolma ahu do Jahowa, naung mumpat podangku sian sarungna, ndang tagamon mulak boti tusi.

21:11 Ia ho ale anak ni jolma, ingkon marhoihoi ma ho maradu marponggolan gontingmu, jala manimbasnimbas ma ho di adopannasida.

21:12 Tung sura dohononnasida mandok ho: Ala ni aha umbahen sai marhoihoi ho? Gabe dohononmu ma: Ala barita naung ro, gabe malala ateate ni luhutna, jala mandate tangan ni sudena, jala godoron roha ni sudena, jala saluhut * ulu ni tot telluktelluk songon aek. Ida ma, nunga ro jala nunga masa, ninna Tuhan Jahowa.

21:13 Dung i ro muse ma hata ni Jahowa tu ahu songon on:

21:14 Ho ale anak ni jolma, manurirangi ma ho! Jala dohononmu ma, songon on do hata ni Jahowa: Dok ma: Nunga tung * ginarutan podang i, nunga niugam podang i huhut.

21:15 Asa marraserasehon hararage bolon umbahen ginarutan, asa sumiksaksiksak songon hilap umbahen na niugam! Manang tung tarbahen hami ma marlas ni roha? Tungkot harajaon ni anakki do i na mangarasehon saluhut hau.

21:16 Nunga tung dilehon podang i paugamhonsa laho pagolomhon tu bagasan tangan. Nunga tung ginarut podang i, jala na niugam laho mangalehon tu bagasan tangan ni sipamunu.

21:17 Mangangguhi jala mangandungi ma ho, ale anak ni jolma! Ai marlulu dompak bangsongki do podang i; dompak saluhut induk ni Israel do podang i, marragean do nasida rap dohot bangsongki dibahen podang i. Dibahen i tompuhi ma gontingmu!

21:18 Nunga nian ro pangunjunan, hape * ndang adong labana! Tung so marguna ulaning nang tungkot harajaon na marraserase? ninna Tuhan Jahowa.

21:19 Ia ho, ale anak ni jolma, manurirangi ma ho jala * topaktopak i tanganmu! Ingkon silompit dua podang i, silompit tolu, podang ni halak angka na mate tartiham do i, podang ni jolma na sangap na tartiham na manolpusi nasida.

21:20 Asa tung malala ateate ni angka jolma i, asa patorophon angka partuktuhan di lambung ni saluhut bahalnasida, umbahen tung hulehon parlisik ni podang i. Oe nunga gabe hilap hape laho mamotongi umbahen na niugam!

21:21 Pasada ma dirim, tondong ma dompak siamun, marsijongjong ma ho dompak hambirang, manang dompak dia pe babami humusor ingkon mangan do.

21:22 Ahu pe antong, ingkon martopaptopap tangan ahu, asa tung sombu rimashu! Ahu Jahowa sandiri na mandok i.

21:23 Dung i ro muse hata ni Jahowa tu ahu songon on:

21:24 Ia ho, ale anak ni jolma, gombar ma di ho * dua dalan haroroan ni podang ni raja sian Babel: Sada do tano haroroan ni dalan i duansa, gombar muse ma sada tangan, di haroroan ni dalan tu sada huta do i jadihononmu.

21:25 Bahenonmu huhut sada dalan haroroan ni podang tu Rabba ni halak Amon dohot tu Juda pola sahat tu bagasan Jerusalem na gonting i.

21:26 Ai jongjong do raja sian Babel di sirpang ni dalan, apala di haroroan ni dalan na dua i, asa pahundul pangarunding, maniori angka sumbia, manungkun angka * terapim, manilik ateate ni manuk.

21:27 Di tanganna siamun do pangarundingon "dompak Jerusalem" bahenon * angka salosap, ungkapon pamangan mandopurdopuri, pangiaron soara marsuraksurak, bahenon angka salosap tu lambung bahal, pungkaon hubu, paulion batarbatar.

21:28 Alai hira tondung sipaotooto do i di rohanasida, ala mardapotdapot angka uari di nasida, hape marningot ma anggo ibana di hajahaton laho patundukkon.

21:29 Dibahen i, songon on do hata ni Tuhan Jahowa: Ala naung dipasingothon hamu hajahatonmuna, di hapapatar ni pangalaosionmuna laho patandaphon dosamuna di saluhut pambahenanmuna, ala naung soro hamu tu parningotan, ingkon papatuon do hamu.

21:30 Ia ho parjahat na sumalin, induk ni Israel! Nunga ro ajalmu di tingki panimpulon ni hajahaton.

21:31 Songon on do hata ni Tuhan Jahowa: Paholang ma * talitali, jala buat ma tumpal, ai ingkon rap mago do! * Sipatimboon do na rodop, jala siparodopon do na timbo.

21:32 Siap, siap, siap do i bahenonku! Tongon ndang disi be, paima * ro ibana nampuna uhumi, jala tu ibana do i lehononku.

21:33 Ia ho ale anak ni jolma, manurirangi ma ho, jala dohononmu ma, songon on do hata ni Tuhan Jahowa taringot tu * halak Amon dohot taringot tu panenganengaonnasida, jala dohononmu ma: Nunga tung diumpat podang i laho mamotongi, nunga tung niugam laho maniaphon, asa sumiksaksiksak songon hilap.

21:34 Ala na nialatanna di ho sipaotooto, ala na tinondunganna di ho gabus laho mameakkon ho tu rungkung ni parjahat angka naung mate tartullang, naung ro arinasida di tingki panimpulon ni hajahaton.

21:35 Pasuang ma podang i tu bagasan sarungna! Apala di inganan panjadianmu, di tano parmulaanmu ahu manguhum ho.

21:36 Jala usehononku ma tu ho rimashu, ombusonku ma api parpiarpiar ni rimashu dompak ho, jala pasahatonku ma ho tu bagasan tangan ni baoa angka na garang, angka tungkang hamagoan.

21:37 Ingkon suda ho panganon ni api, ingkon durus di tongatonga ni tano i ia mudarmu, ndang be taringotan ni halak ho; ai ahu Jahowa sandiri na mandok i.

Hesekiel 22

22:1 Dung i ro muse hata ni Jahowa tu ahu songon on:

22:2 Ia ho ale anak ni jolma, nda naeng toruanmu? Nda naeng toruanmu * huta parsapataan mudar? Pabotohon ma tusi saluhut hasogiron angka na niulana.

22:3 Jala dohononmu ma: Songon on do hata ni Tuhan Jahowa: Ho ale huta na mandurushon mudar di tongatongana, asa parohon ajalmu, jala mambahen angka ganaganaan mangalo dirina, asa paramunhon!

22:4 Marhitehite mudar naung niusehonmu ho marutang, jala marhitehite ganaganaan angka naung binahenmi ramun ho, laos ho pajonokkon ariarim dohot parohon taonmu. Ala ni do hupasahat ho gabe haurahon di tongatonga ni angka bangso parbegu, jala sieleseleson di saluhut luat.

22:5 Tole halak angka na jonok dohot na dao mangelesi be mida ho ale parbarita na ramun, parhagunturon godang.

22:6 Ida ma, angka induk ni Israel mangasahon gostong ni botohonna be di bagasan ho, asa mandurushon mudar.

22:7 Ama dohot ina ditoisi nasida do di bagasan ho, mangulahon pangarupaon tu halak dagang do nasida di tongatongami, na tading di lampin pe dohot na mabalu dirupa nasida do di bagasan ho.

22:8 Nunga marlea dibahen ho angka habadiaonku, jala nunga diramuni ho angka ari Sabbathu.

22:9 Adong do di bagasan ho angka baoa parjehejehe, asa mandurushon mudar, jala di * atas ni angka dolok do nasida mangan di bagasan ho, harorangon di diulahon nasida di tongatongami.

22:10 Nunga dipatedek nasida hailaan ni ama di bagasan ho, parompuan na ramun binahen ni hasomalanna pe nunga digogoi nasida di bagasan ho.

22:11 Jala ganup mambahen hasogiron tu jolma ni donganna, jala ganup mangaramuni parumaenna marhitehite harorangon, jala ganup manggogoi di bagasan ho ibotona sandiri, na saama dohot ibana.

22:12 Manjaloi sisip do nasida di bagasan ho, asa mandurushon mudar, jala dibuat ho do * anak ni hepeng na matorbangku, jala diangati ho do donganmu marhitehite pangarupaon, jala dihalupahon ho do anggo ahu, ninna Tuhan Jahowa.

22:13 Jadi ida ma, nunga pola hupiupiu tanganku taringot tu parpihiton naung niulahonmi dohot taringot tu parsapataan mudar, angka na masa di tongatongami.

22:14 Tung tagamon manahan ma rohami? Manang tung margogo ma tanganmu di ari angka sibahenonku dompak ho? Ahu Jahowa sandiri do mandok hata i dohot na mambahensa.

22:15 Jala ahu paserakkon ho sogot tu tongatonga ni angka bangso parbegu dohot pamamparhon ho tu angka luat, asa tung husiaphon haramunonmu sian ho.

22:16 Asa manginona tu ho haramunonmu di adopan ni angka bangso parbegu, asa tung ditanda ho ahu do Jahowa.

22:17 Dung i ro muse hata ni Jahowa tu ahu songon on:

22:18 Ale anak ni jolma, nunga tung gabe tasik ianggo pinompar ni Israel di ahu! Tung saluhut nasida gabe haksa, tombaga, bosi dohot simbora di tongatonga ni liang pamurunan, gabe te ni perak do nasida.

22:19 Dibahen i, songon on do hata ni Tuhan Jahowa: Ala naung saluhut hamu gabe tasik, dibahen i, ida ma, ahu mangalaum hamu tu tongatonga ni Jerusalem.

22:20 Songon pangalaum ni halak di perak, haksa, bosi, simbora dohot tombaga tu tongatonga ni liang pamurunan, asa mangombus api di toruna laho mangalala; suang songon i laumonku hamu di bagasan rimashu dohot di bagasan parpiarpiar ni murukku, asa hutubahon jala hulala hamu.

22:21 Tongon tahe ahu mangalaum hamu dohot mangombushon dompak hamu api parpiarpiar ni rimashu, asa malala hamu di tongatongana.

22:22 Songon pangalalaon di perak di tongatonga ni liang pamurunan, ingkon songon i lalaon hamu di tongatongana, asa tung ditanda hamu ahu Jahowa sandiri naung mangusehon rimashu dompak hamu.

22:23 Dung i ro muse hata ni Jahowa tu ahu songon on:

22:24 Ale anak ni jolma, dok ma tu ibana: Ho do sada tano na so pinaias, na so tininggang ni udan di ari pangarimasan.

22:25 Marbulan do angka panurirangna di tongatongana; songon singa na marauang mandiori sisoroon do nasida * mamolgak tondi ni halak, * dilahangi nasida do ugasan angka na arga dohot patorophon angka na mabalu di tongatongana.

22:26 * Angka malimnasida pe manjahati dompak patikku, jala diramuni nasida angka inganan habadiaonku; ndang dibelok nasida na badia martimbangkon na ramun, jala ndang dipabotohon nasida belok ni na ramun martimbangkon * na ganjing, jala dipapitpit do matanasida manoisi angka ari Sabbathu gabe marlea ahu dibahen di tongatonganasida.

22:27 Angka induk na di tongatongana, hira sarigala do angka na manoro sisoroonna laho mandurushon mudar, laho mangago angka tondi ni jolma, asa mandiori pangomoan.

22:28 Angka * panurirangnasida pe mangaleaphon sampang tu nasida, maralatan sipaotooto dohot mangarundingkon gabus tu nasida, angka ninna do: Songon on do hata ni Tuhan Jahowa, hape so tutu Jahowa mandok.

22:29 Ia situan na torop isi ni tano i mangulahon pangarupaon, jala mamupusi, dirupa nasida huhut na dangol dohot na parir, jala mambahen gogo nasida tu halak dagang mangulahon na so uhum.

22:30 Jadi hulului nian sian nasida sahalak na mambahen talak batu, jala na * jongjong di haluapan manuhenuhe maradophon ahu humongkop tano i, asa unang huago nian, hape ndang adong jumpang ahu nanggo sahalak.

22:31 Dibahen i huusehon ma rimashu tu nasida, di bagasan parsigorgor ni murukku husiaphon nasida, manginona tu ulunasida hubahen dalannasida i, ninna Tuhan Jahowa.

Hesekiel 23

23:1 Dung i ro muse hata ni Jahowa tu ahu songon on:

23:2 Ale anak ni jolma, adong do na jolo dua parompuan, sisada ina do nasida.

23:3 Dung i marmainan nasida * di Misir, tagan di haposoonna tahe marmainan nasida; disi do dipajamajama bagotna, jala disi do diparmeammeam ulu ni susuna.

23:4 Ia goar ni parompuan na umbalga i: Si Ohola; jala anggina i si Oholiba; jadi ahu ma nampuna nasida duansa, gabe tubuan anak dohot boru; jala lapatan goarnasida: Samaria i ma si Ohola jala Jerusalem i ma si Oholiba.

23:5 Alai marmainan ma anggo si Ohola uju ahu mangangkupi ibana, sai mangkidophidopi ibana dompak puangna, tu Assur, angka na jonoki.

23:6 Angka na marpangkean surta, angka raja dohot partogi ni parangan, angka dolidoli hasoloan do nasida luhutna, angka parsihundul di hoda.

23:7 Sai dipuluti do marhite sian parmainanonna saluhut anak ni Assur angka na pinillit; jadi marhitehite saluhut halak angka na hinidophidopanna, marhitehite saluhut ganaganaannasida diramuni do dirina.

23:8 Parmainanonna tu halak Misir pe ndang dipasohot, ala naung niangkupanna modom tagan di haposoonna, jala nasida marmeammeamhon ulu ni susuna uju namarbaju dope, jala naung niusehonna i harorangonna tu nasida.

23:9 Dibahen i, laos ahu pasahathon nasida tu bagasan tangan ni angka puangna, tu bagasan tangan ni halak Assur, angka na hinidophidopanna i.

23:10 Angka nasida ma * patedekkon hailaanna, laos dipambuat nasida angka anakna dohot boruna, anggo inana i dibunu do marhitehite podang, gabe marbarita na roa tu angka parompuan, angka na mangalaluhon uhum tu nasida.

23:11 Jadi dung songon i diida si Oholiba, anggina i, gabe * jumahat muse ibana mambolongkon dirina, jala ganda parmainanonna sian angka parmainanon ni hahana.

23:12 Mangkidophidopi do ibana tu halak Assur, angka raja dohot partogi ni parangan angka na jonoki, angka parpahean na sun denggan, angka parsihundul di hoda, angka dolidoli hasoloan do nasida luhutna.

23:13 Jadi huida ma naung niramunanna i dirina, sisada dalan do nasida duansa.

23:14 Digandai nasida dope tahe angka parmainanonna i; molo diida baoa angka na niuhir tu dorpi, sumansuman ni halak Kasdim, angka na ginorga dohot salenggam.

23:15 Angka na marhohos di gontingna, angka na marjabajaba di uluna, saluhut nasida rupa panglima di hureta porang, sumansuman ni halak Babel, Kasdim do tano hatubuannasida.

23:16 Sai mangkidophidopi ibana dompak nasida disi pajumpang matanasida, pola disuru angka suruanna manopot nasida tu luat Kasdim.

23:17 Jadi ditopot halak Babel ma nasida, asa mangangkupi modom, gabe diramuni ma nasida marhitehite parmainanonna; jadi dung ramun nasida dibahen, gabe magigi ma rohana mida nasida.

23:18 Jadi dipapatar ma parmainanonna, jala dipatedek hailaonna, jadi magigi ma rohangku mida nasida, suang songon gigi ni rohangku mida hahana i.

23:19 Hape lam digandai dope parmainanonna i, diingot muse angka ari haposoonna, uju na marmainan ibana di tano Misir.

23:20 Jala mangkidophidopi ibana dompak puangna, angka na marsibuk songon halode, jala sabur ni boninasida, sabur ni boni ni hoda.

23:21 Diparhagiot roham muse dope hagatalon ni haposoonmu, uju na pinarmeammeam ni halak Misir ulu ni susum, ala ni bagot ni haposoonmu.

23:22 Dibahen i, ale Oholiba, songon on do hata ni Tuhan Jahowa: Ida ma, ahu pahehehon angka puangmu dompak ho, angka naung hinagigihon ni roham nian, jala ahu parohon nasida dompak ho sian na humaliang:

23:23 Tole halak Babel dohot saluhut halak Kasdim, halak Pekod dohot Soa dohot Koa, rap dohot saluhut halak Assur, angka dolidoli hasoloan, angka raja dohot partogi ni parangan do nasida saluhut, angka panglima di hureta porang dohot angka na hinara, angka parsihundul di hoda do nasida saluhutna.

23:24 Angka nasida i ro dompak ho, marparhohas hureta porang dohot galapang jala mardongan luhutan ni torop bangso, * angka na marlombulombu na bolon dohot na metmet dohot martahuluk, * nasida martungkum ho humaliang, jala ahu pasahathon uhumi tu nasida, asa nasida manguhum ho hombar tu uhumnasida i.

23:25 Jala ahu painonahon pangiburuonku tu ho, asa garang pambahennasida tu ho; igungmu dohot pinggolmu sapsapannasida, jala pasipasim marragean do bahenon ni podang; rampasonnasida ma angka anakmu dohot borum, jala pasipasim suda do panganon ni api.

23:26 Angkup ni tanggalannasida do angka pangkeanmi, jala rampasonna ulaulam angka na arga i.

23:27 Asa ahu pasadihon harorangonmu dohot parmainanonmu olat ni tano Misir, asa unang be manaili matam tu nasida, jala ndang be paingotingotonmu Misir.

23:28 Ai songon on do hata ni Tuhan Jahowa: Ida ma, ahu pasahathon ho tu bagasan tangan ni halak naung hinabiashonmu, tu bagasan tangan ni halak naung hinagigihon ni roham.

23:29 Jadi mardongan hasomoran ma pambahennasida tu ho, jala rampasonnasida sandok na hinangaluthonmu, jala tadingkononna ho salangsalang dohot marsaemara, asa tung patar hailaan ni parmainanonmu dohot harorangonmu dohot hagatalonmu.

23:30 Bahenonna do luhutna i tu ho ala ni parmainanonmu mangihuthon tu angka bangso parbegu, ala na niramunonmu dirim marhitehite angka ganaganaannasida.

23:31 Ala dalan ni hahami na niihuthonmi, laos lehononku ma * panginumanna tu bagasan tanganmu.

23:32 Songon on do hata ni Tuhan Jahowa: Ingkon inumonmu do isi ni panginuman ni hahami, na hobuk dohot na ruak, pola dielak jala dieleselesi halak do dibahen godang ni isina.

23:33 Jadi ingkon * gok parmabuhon dohot hangaluton ma ho, panginuman hasiapon dohot harendepon do panginuman ni Samaria hahami.

23:34 Ingkon inumonmu do i, pola siruponmu, maradu dilatanmu angka ngarngarna, jala garianganmu angka bagotmu; ai ahu do na mandok i, ninna Tuhan Jahowa.

23:35 Dibahen i, songon on do hata ni Tuhan Jahowa; ala naung hinalupahon ni roham ahu, jala dibolongkon ho ahu tu pudim, ho pe ingkon taononmu harorangonmu dohot angka parmainanonmu!

23:36 Dung i ninna Jahowa muse tu ahu: Atehe ale anak ni jolma, naeng do toruanmu si Ohola dohot si Oholiba? Antong patuduhon ma tu nasida biasbias angka na niulanasida i!

23:37 Ala naung marmainan i nasida, jala marsapu mudar tangannasida, jala na marmainan i nasida tu ganaganaannasida i, * pola dohot anaknasida, angka na tinubuhonna di ahu nian, dipabolushon nasida do sian api papanganhonsa marsomba tu ganaganaannasida i.

23:38 On dope angkupni dibahen nasida tu ahu: Laos di ari na sasada i diramuni nasida habadiaonku, jala marlea angka ari Sabbathu dibahen nasida.

23:39 Jala dung diseati nasida anaknasida i bahen somba di angka ganaganaannasida i, ro muse nasida tumopot habadiaonku sadarina i, laho paramunhon, jala ida ma, tung songon i do dibahen nasida di tongatonga ni jorongku.

23:40 Lam disuru nasida muse dope suruanna mangalapi baoa angka sian na dao; jala ida ma, dung ro nasida, maridi ma ho jala marpangir huhut mambahen sipajagarjagar pasangap nasida.

23:41 Laos juguk ma ho tu atas podoman apala na jagar, jala rade sada meja di adopanmu, jala diampehon ho tu atasna daupa dohot miak na hushus tu ahu.

23:42 Jadi tarbege ma di tongatongana soara hagunturon bolon, jala dongan ni angka baoa situan na torop i, tarboan dope halak Saba angka na sian halongonan, angka na mambahen leang tu tangannasida, jala tumpal hamuliaon tu atas ulunasida.

23:43 Jadi ninna rohangku ma taringot tu sibabijalang naung matua i: Tung datdatanna dope ulaning parmainanonna tusi?

23:44 Dung i ditopot halak ma nasida, songon na somal tinopot ni halak boruboru sibabijalang; suang songon i ditopot nasida si Ohola dohot si Oholiba, parompuan na gatal i.

23:45 Dibahen i ingkon baoa angka na bonar manguhum nasida, * hombar tu uhum sidabuon tu sibabijalang hian, hombar tu uhum sidabuon tu parompuan na mandurushon mudar, ai sibabijalang do nasida jala marsapu mudar do tangannasida.

23:46 Ai songon on do hata ni Tuhan Jahowa: Ahu ma manogihon nangkok marlulu dompak nasida sada luhutan bangso jala ahu pasahathon nasida pasipalsipalon dohot pupusan.

23:47 Jala dangguran ni luhutan bangso i nasida dohot batu, jala tampulanna nasida dohot podangnasida i; angka anaknasida dohot borunasida i bunuonna do, jala bagasnasida surbuonna do dohot api.

23:48 Asa ahu pasadihon harorangon sian tano i, anggiat tung jora saluhut parompuan, jala unang diulahon harorangon sisongon i.

23:49 Asa manginona tu hamu bahenonnasida harorangonmunai, jala manginsombut tu hamu dosa ni ganaganaanmunai, asa tung ditanda hamu, ahu do Tuhan Jahowa.

Hesekiel 24

24:1 Pasiataonhon di ari sampulu bulan sipaha sampulu, ro muse hata ni Jahowa tu ahu songon on:

24:2 Ale anak ni jolma surathon ma di ho goar ni ari on, apala sadarion; ai apala sadarion do ro raja sian Babel mandopang Jerusalem.

24:3 Jala bahen ma umpana sada dompak pinompar ni panggunturi i, jala dohononmu ma tu nasida: Songon on do hata ni Tuhan Jahowa: * Hodohon ma sada hudon, hodohon ma tutu, jala tahui huhut aek tu bagasanna.

24:4 Papungu ma tusi angka tanggotanggona, saluhut tanggotanggo angka na denggan, hae bona dohot hae tangan, holiholi angka na pinillit bahen panggohina.

24:5 Buat muse ma birubiru pamuean, jala haliangkon soban sian holiholi tu toruna, pagurgurhon situtu, asa tung masak dohot holiholi na di tongatongana.

24:6 Dibahen i, songon on do hata ni Tuhan Jahowa: Marjea ma * huta parsapataan mudar, i ma hudon na martasik di bagasan, jala na so halongkangan tasikna! Paruar ma sian i tanggotanggona sadasada, unang pola dabu rujiruji taringot tusi.

24:7 Ai di tongatongana do mudarna, tung di atas dolok batu manangkas do diusehon, ndada tu tano i didurushon, asa panguspanguson tu orbuk nian.

24:8 Laho pahehehon rimas, mandokkon martubolhon partubolan, umbahen hudurushon mudarna tu atas dolok batu manangkas, asa unang hapanguspangusan.

24:9 Dibahen i, songon on do hata ni Tuhan Jahowa: Marjea ma * huta parsapataan mudar! Ahu pe pabalgaonku ma pamurunan i.

24:10 Patamba ma soban i, opan ma api, asa disudahon juhut i, jala marsik huana, jala mosok ia holiholi.

24:11 Bahen muse hudon na rumar i tu atas garana, asa ginarahon, pola marrara tombagana, jala malala tasikna di tongatongana, jala disudahon nian.

24:12 Hape ngalutan boti do ahu, ai ndang olo lokkang tasikna na godang i, manahan do tahe tasikna i nang di bagasan api.

24:13 Apala di bagasan haramunonmu do harorangon; ala naeng ahu mangurasi ho, hape ndang olo ho paiason, ndang be tagamon paiason ho sian haramunonmu, paima * sombu rimashu mida ho.

24:14 Ahu Jahowa sandiri do na mandok i, sai na ro do ahu pasauthon, ndang tagamon pasurutonku, manang olanangku, manang tarsolsol bagi ahu; hombar tu angka dalanmu tahe, jala hombar tu pambahenanmu uhumonnasida ho, ninna Tuhan Jahowa.

24:15 Dung i ro muse hata ni Jahowa tu ahu songon on:

24:16 Ale anak ni jolma, ida ma, ahu mambuat sian ho * hasoloan ni matam marhitehite begu masa; alai ndang jadi andunganmu manang tatangisanmu, manang mabakbak iluilum.

24:17 Hohom boti ho marhoihoi, ianggo pangondason ndang jadi ulahononmu, alithon ma talitalim, jala bahen tapaktapakmu tu patmu, jala ndang jadi martujung janggutmu, jala ndang jadi * panganonmu sagusagu ni halak sileban.

24:18 Jadi dung mangkatai ahu manogotna i tu situan na torop i, gabe mate ma jolmangku bodarina i, gabe hubahen ma manogotna i, songon naung tinonahon hian tu ahu.

24:19 Jadi ninna situan na torop i ma tu ahu: Atehe, ndang paboaonmu tu hami manang aha lapatan ni na binahenmu?

24:20 Jadi ningku ma tu nasida: Hata ni Jahowa do i tu ahu songon on:

24:21 Dok ma tu pinompar ni Israel: Songon on do hata ni Tuhan Jahowa: Ida ma, ahu paramunhon habadiaonku, i ma hatimbulon ni gogomuna, hasudungan ni matamuna dohot hasoloan ni rohamuna, jala anakmuna dohot borumuna, angka na tinadingkonmuna i, ingkon marragean do bahenon ni podang.

24:22 Jadi ingkon bahenonmuna ma songon na hubahen i, ndang jadi martujung janggutmuna, jala ndang jadi panganonmuna sagusagu ni halak sileban.

24:23 Ingkon talitalimuna di atas ulumuna, jala tapaktapakmuna di patmuna, ndang jadi hamu mangandungi manang mananangisi, asa mandate hamu di * bagasan hajahatonmuna, jala marhoi be hamu ganup tu donganna.

24:24 Asa tung gabe * tanda halongangan si Hesekiel i di hamu; hombar tu saluhut naung binahenna, bahenonmuna di masana, asa tung ditanda hamu ahu do Tuhan Jahowa.

24:25 Ianggo ho, ale anak ni jolma, nda tongon do di ari pambuathu sian nasida partanobatoannasida i, halasan ni hamuliaonnasida, hasudungan ni matanasida dohot na hinalungunhon ni rohanasida ro di anaknasida dohot borunasida.

24:26 Nda ro ma di ari na sasada i * sahalak naung malua manopot ho pabotohon barita i tu pinggolmu?

24:27 Di ari na sasada i mungkap ma muse pamanganmu rap dohot halak na malua i, asa mangkatai ho, jala ndang be mangungu boti, asa tung gabe tanda halongangan ho di nasida, jala ditanda nasida ahu do Jahowa.

Hesekiel 25

25:1 Dung i ro muse hata ni Jahowa tu ahu songon on:

25:2 Ale anak ni jolma, tujuhon ma bohim dompak halak * Amon, jala manurirangi ma ho taringot tu nasida.

25:3 Jala dohononmu ma tu halak Amon: Tangihon hamu ma hata ni Tuhan Jahowa! Songon on do hata ni Tuhan Jahowa: Ala naung nidokmu: * Ha, ha, martillahon bagas habadiaonku, ala naung tarramun dohot tano ni Israel, ala naung tarulang dohot pinompar ni Juda, ala naung tarboan nasida tu habuangan!

25:4 Dibahen i, ida ma, ahu pasahathon ho tu angka anak sian habinsaran bahen teanteanan, asa dipajok nasida undungundungnasida di bagasan ho, jala dipajongjong inganannasida di bagasan ho, nasida manganhon parbue ni tanom, jala nasida manginum susu ni pinahanmu.

25:5 Jala ahu mambahen, Rabba gabe parudaman ni angka unto, jala angka anak ni Amon gabe pangulonan ni birubiru, asa tung ditanda hamu ahu do Jahowa.

25:6 Ai songon on do hata ni Tuhan Jahowa: Ala naung martopaptopap tangan ho jala marhajingjang jala martilla roham di saluhut panengaon ni roham taringot tu tano Israel:

25:7 Dibahen i, ida ma, ahu patoltolhon tanganku dompak ho jala ahu pasahathon ho pupusan ni angka bangso parbegu, jala ahu maniaphon ho sian tongatonga ni angka bangso, jala ahu mangarendephon ho sian angka luat, asa tung hupansingkon ho, asa ditanda ho ahu do Jahowa.

25:8 Songon on do hata ni Tuhan Jahowa: Ala na nidok ni * Moab dohot Seir: Ida ma, songon saluhut bangso parbegu do hape pinompar ni Juda!

25:9 Dibahen i, ida ma, ahu patalak dalan tu Moab sumola angka huta, angka hutana tutu sahat ro di partalpahanna tano bosar i, sahat ro di Betjesimot, Baal-Meon dohot Kiriataim.

25:10 Tu angka anak sian habinsaran do i lehononku rap dohot angka anak ni Amon bahen teanteanan, asa unang be taringotan halak Amon di tongatonga ni angka bangso parbegu.

25:11 Tu Moab pe dabuonku do angka uhum, asa tung ditanda nasida ahu do Jahowa.

25:12 Songon on do hata ni Tuhan Jahowa: Ala mangulahon partubolon Edom tu pinompar ni Juda, gabe marsala godang nasida, ala marsunisunian nasida tu Juda.

25:13 Dibahen i, songon on do hata ni Tuhan Jahowa: Ahu patoltolhon tanganku marlulu dompak Edom, asa mangaripashon sian i jolma nang pinahan, jala tarulang do i bahenonku sian Teman sahat ro di Dedan ingkon marragean nasida bahenon ni podang.

25:14 Jadi ahu mambahen partubolan tu Edom marhitehite tangan ni bangsongku Israel, asa dibahen nasida tu Edom hombar tu rimashu dohot hombar tu murukku, asa tung ditanda nasida pangaluluhonku, ninna Tuhan Jahowa.

25:15 Songon on do hata ni Tuhan Jahowa: Ala marsunisunian pambahen ni * halak Palistim, jala martilla rohanasida mangulahon partubolon, laho mangago, ala musu tihus sian na robi dope.

25:16 Dibahen i, songon on do hata ni Tuhan Jahowa: Ida ma, ahu patoltolhon tanganku marlulu dompak halak Palistim, asa husiaphon halak * Heret i, jala huago pasipasi ni halak partopi laut.

25:17 Jala hubahen tu nasida angka partubolan godang, asa tung ditanda nasida ahu do Jahowa, molo dung hulaluhon partubolan ni rimashu tu nasida.

Hesekiel 26

26:1 Pasampulu sada taonhon, di ari sada bulan sipaha sada, ro muse hata ni Jahowa tu ahu songon on:

26:2 Ale anak ni jolma, ala na nidok ni Tirus martillahonsa taringot tu Jerusalem: * Ha, ha! Nunga tung maloha pintu haroroan ni angka bangso, mangarongom ro tu ahu ma nuaeng; gok ma ia ahu, tarulang ma ianggo ibana!

26:3 Dibahen i songon on do hata ni Tuhan Jahowa: Ida ma, marlulu dompak ho ma ahu, ale * Tirus, jala ahu manogihon nangkok dompak ho torop angka bangso parbegu songon habibinsat ni laut binahen ni galumbangna.

26:4 Lohaonnasida ma angka parik ni Tirus jala marumpak bahenonna angka palaspalasna, jala sapuonku ma sian i orbukna, asa hubahen nasida gabe dolok batu manangkas.

26:5 Asa gabe paninaran ni angka jala do i di tongatonga laut; ai ahu do na mandok songon i, ninna Tuhan Jahowa; gabe sipupusan ni angka bangso parbegu huhut.

26:6 Jala pagaranna angka na di tano na bidang, ingkon marragean do bahenon ni podang, asa tung ditanda nasida ahu do Jahowa.

26:7 Ai songon on do hata ni Tuhan Jahowa: Ida ma, ahu parohon dompak Tirus si Nebukadnesar, raja sian Babel, sian utara * raja ni angka raja, mardongan hoda dohot hureta porang dohot angka jolma parsihundul dohot parangan mansai deak.

26:8 Bunuonna do marhitehite podang angka pagaranmu * di tano na bidang, alai bahenonna ma batarbatar anggo dompak ho, jala pungkaonna ma parik dompak ho, jala paheheonna dompak ho lombulombu.

26:9 Jala pasolhotonna ma salosap pangaloha tu angka parikmi, jala angka palaspalasmi robohononna ma i marhitehite parhohasna porang.

26:10 Binahen ni hinadeak ni angka hodana hungkupan ni orbuk ma ho, humuntal ma angka parikmu bahenon ni pardorom ni jolma parsihundul, galapang dohot hureta porang molo bongot ibana tu bagasan angka bahalmu, songon parbongotna tu huta naung matompas parikna.

26:11 Marhitehite tambirik ni angka hodana luntahanna saluhut alamanmu, bunuonna ma ia bangsom marhitehite podang jala angka tiang ni hagogoonmu ingkon tinggangkononna do tu tano.

26:12 Jadi pupusannasida ma sinamotmu, jala laumonna boniagam, jala lohaonnasida ma angka parikmu, jala angka bagas hasoloan ni roham rumpakkononna, ianggo angka batu parhaumi dohot turanggong reongkononna do tu tonga laut.

26:13 Jadi pasohotonku ma hariburon ni angka endemi, jala * soara ni parhinaloanmi ndang be tarbege.

26:14 Jala ahu manjadihon ho gabe dolok batu manangkas, gabe paninaran ni angka jala do ho, ndang be jadi ho paulion, ai ahu Jahowa do na mandok i, ninna Tuhan Jahowa.

26:15 Songon on do hata ni Tuhan Jahowa taringot tu Tirus: Tung so godoron situtu ma angka pulo umbege parlopuk ni hapapatum, di na morongorong angka na tartullang, di na mangangguhi angka na marragean di tongatongami?

26:16 Jadi mijur be ma sian habangsanasida sude angka induk partopi laut, jala diambolongkon be sampesampenasida, jala ditanggali be pangkeannasida angka na ni angit, gabe marulos hatotongon nasida, hundul be nasida di tano manangkas, jala tarsonggot ganup tongkin, jala tarhalomong nasida mida ho.

26:17 Jadi pungkaonnasida ma sada andung mida ho, jala dohononnasida ma tu ho: Inange, laho mago ho ale na rame binahen ni angka laut, ho huta na tarbarita na gogo di laut, huta i tahe ro di isina angka na mambahen tahuton saluhut pangisina i.

26:18 Ianggo nuaeng godoron ma angka pulo di ari hapapatum, tarhatotong ma tutu pulo angka na di bagasan laut mida ajalmu.

26:19 Ai songon on do hata ni Tuhan Jahowa: Molo hubahen ho gabe huta na tarulang, songon huta angka na so niinganan, molo hutogihon nangkok marlulu dompak ho pasang naek, gabe angka aek magodang manghungkupi ho.

26:20 Jala hureongkon do rap dohot angka na turun tu godung, tu bangso na robi, jala hupaian ho tu bagasan tano ni angka lung, tu halongonan sian mulamula sahali rap dohot angka na turun tu godung, asa unang be hainganan ho: Jadi bahenonku ma hamuliaon di bagasan tano ni halak na mangolu.

26:21 Alai gabe hasonggoton ma ianggo ho bahenonku, asa tung pidom ho; luluan ni halak do ho nian, hape ndang be jumpangsa ho salelenglelengna, ninna Tuhan Jahowa!

Hesekiel 27

27:1 Dung i ro muse hata ni Jahowa tu ahu songon on:

27:2 Ia ho ale anak ni jolma, pungka ma sada * ende andung taringot tu Tirus!

27:3 Jala dohononmu ma tu Tirus na maringanan mardonokkon angka labuan ni laut, parboniagaan ni angka bangso tu torop angka pulo: Songon on do hata ni Tuhan Jahowa: Ale Tirus, songon on do * hatam: Na sun denggan do hinaulingku!

27:4 Di tongatonga ni angka laut do parbalohanmu, angka pandem mambahen sun denggan hinaulim.

27:5 Hau jior sian * Senir do dipangke nasida pauli di ho sandok na lolo sadari, hau ares sian Libanon dibuat nasida laho mambahen tiang layar.

27:6 Hau jati sian Basan angka dayungmu dibahen nasida, papan juguhanmu gading do dibahen na nilampis dohot hau ares sian angka * pulo Kitim.

27:7 Hain lamot na ni angit sian Misir do manderam, asa bahen partonggol di ho, surta na rata dohot na rara sian angka * pulo Elisa do abit ni undungundungmu.

27:8 Halak isi ni Sidon dohot Arpad do angka jolma pandayung di ho; angka pandem, ale Tirus, angka na di bagasan ho, gabe angka partogim di laut.

27:9 Angka sintua * sian Gibel dohot pandena di bagasan ho, angka i do padimpos rihariham. Saluhut angka kopal di laut ro di halak parkopal tahe jumpang do di bagasan ho, asa marboniaga tu ho.

27:10 Halak Persia, halak Lud dohot Pud masuk paranganmu, gabe ulubalangmu, lombulombu dohot tahuluk disangkothon nasida di bagasan ho, nasida tahe mambahen ho marmulia.

27:11 Angka anak ni Arpad rap dohot paranganmu do marhaliang di atas parikmu, jala halak na begu di bagasan angka palaspalasmu; lombulombunasida digantungkon nasida di atas ni angka parikmu humaliang, nasida do apala padengganhon sun hamuliaonmu.

27:12 Tarsis do partigatigam dibahen hinagodang ni boniaga na marragam; perak, bosi, tombaga dohot simbora dilehon nasida ali ni boniagam.

27:13 Halak Jawan, * Tubal dohot Mesek do angka partigatigam, angka hosa ni jolma dohot ulaula haksa dilehon nasida ali ni boniagam.

27:14 Halak Togarma mangalehon hoda parhuli dohot hoda hundulan dohot hoda na marsahe ali ni boniagam.

27:15 Halak Dedan do partigatigam; torop angka pulo dapotan boniaga sian ho, gading dohot hau jior ditungkarhon nasida tu boniagam.

27:16 Halak Ram do parboniagam dibahen hinagodang ni pandeanmu; mata intan zamrud, surta na rara, hain na ni angit, hain lamot dohot simata borgok dilehon nasida ali ni boniagam.

27:17 Halak Juda dohot Israel pe partigatigam do nasida, eme sian Minit, juada, situak ni loba, miak dohot parmasak dilehon nasida ali ni boniagam.

27:18 Halak Damaskus do parboniagam dibahen hinagodang ni pandeanmu dohot boniaga na marragam ali ni anggur sian Helbon dohot imput ni birubiru na saksak.

27:19 Halak Wedan dohot Jawan pe sian Usal mangalehon bosi naung tinopa, tanggule dohot ulumanis singkat ni boniagam.

27:20 Halak Dedan partigatigam di angka pangkean tu hoda dohot tu hureta.

27:21 Halak Arab dohot saluhut induk ni * Kedar partigatiga ni tanganmu do nasida, angka birubiru boruboru dohot tunggal dohot hambing tunggal tigatiganasida tu ho.

27:22 Angka saudagar sian Saba dohot Raama pe angka parboniagam, situan ni saluhut parmasak na hushus dohot batu intan na arga marragamragam dohot sere dilehon nasida ali ni boniagam.

27:23 Tole halak Haran, Kanne dohot Eden, angka partigatiga sian Saba, Assur, Hilmad ro tu pasarmu.

27:24 Nasida martigatigahon tu ho angka pangkean na sun denggan, angka mandar bugis, hain na ni angit markodikodi dohot pangkean na arga sahali marpotipoti sian hau ares, jala simpan martali.

27:25 Marhoronhoron do angka kopal Tarsis siusung boniagam, jadi gok boniaga ho jala marmulia situtu di tongatonga ni angka laut.

27:26 Tu angka aek godang diboan angka pandayungmu ho, ro alogo sian purba mangkaromhon ho apala di tongatonga ni laut.

27:27 Jadi sinamotmu dohot boniagam, partigatigaonmu, angka pandayungmu dohot angka partogim di laut, angka na padimpos rihariham dohot angka partigatigam dohot saluhut ulubalangmu angka na di bagasan ho, ro di saluhut angka na marluhut di tongatongami, ingkon harom di tongatonga ni angka laut apala di ari hapapatum.

27:28 Umbege soara angguhangguk ni angka partogim, humuntal ma angka pagaran di tano bidang.

27:29 Jadi mijur ma sian angka kopalnasida saluhut halak sitiop dayung, angka halak parkopal saluhut partogi di laut, asa tardarat.

27:30 Jala pangiaronnasida ma soaranasida mida ho, jala marangguk badar, jala pirpirhononna orbuk tu atas ulunasida, huhut marguluguluhon sirabun.

27:31 Jala palpalannasida ma ulunasida ala ho, huhut marhohoshon ulos tangki, jala tatangisanna ho, dibahen ponjot ni rohana.

27:32 Pungkaonnasida ma huhut sada andung mida ho di pardangolannasida i, andungkononna ma: Tung ise ma songon Tirus marisuang? Songon siapna di tongatonga ni laut?

27:33 Uju na ro angka boniagam sian angka laut, butong ma torop bangso dibahen ho; binahen ni hinagodang ni sinamotmu dohot angka boniagam mamora do angka raja ni tano on dibahen ho.

27:34 Nunga jumpang tingki haharomanmu sian angka laut tu bagasan angka lung ni laut, gabe peut ambolong parboniagaonmu dohot sandok na marluhut di tongatongami.

27:35 Sude halak isi ni angka pulo tarhatotong be mida ho, jala manindang imbulu ni rajanasida, bolak be bohinasida.

27:36 Marngiuli be do angka partigatiga di tongatonga ni angka bangso mida ho, gabe * hatotongon bolon do ho, jala ndang adong be ho ro di salelenglelengna.

Hesekiel 28

28:1 Dung i ro muse hata ni Jahowa tu ahu songon on:

28:2 Ale anak ni jolma, dok ma tu induk sian Tirus: Songon on do hata ni Tuhan Jahowa: Ala * dipaginjang ho roham tung didok ho do: Ahu do Debata, habangsa ni Debata do na huhunduli di tongatonga ni angka laut! Hape jolma sambing do ho, ndada Debata, alai tudoshon bisuk ni Debata do bisukmu disura roham.

28:3 Ida ma, umbisuk do ho sian * si Daniel ninna roham, saluhut hahomion ndang buni sian ho.

28:4 Marhitehite habisukonmu dohot hapistaranmu dipatupa ho do hamoraonmu, ninna roham jala papungupungu sere dohot perak di bagasan jabu parpeopan ni artam.

28:5 Binahen ni hinagodang ni bisukmu dohot partigatigaonmu dipagodang ho sinamotmu, gabe di haginjangkon roham do sinamotmi.

28:6 Dibahen i, songon on do hata ni Tuhan Jahowa: Ala tudoshon bisuk ni Debata bisukmu dibahen ho.

28:7 Dibahen i, ida ma, ahu parohon halak sileban marlulu dompak ho, bangso parbegu angka na garang sahali, umpatonnasida ma angka podangnasida mangago hinauli ni habisukonmu dohot mangaramuni sondangmi.

28:8 Tung tu godung do onjarhononnasida ho, asa tung mate ho di tongatonga ni laut, songon hamamate ni halak na tartiham.

28:9 Tung tagamon dohononmu dope disi: * Ahu do Debata, di adopan ni na mambunu ho? Hape jolma do ho, ndada Debata, di bagasan tangan ni halak na maniham ho.

28:10 Ingkon mate do ho songon hamamate ni halak na marhulup di bagasan tangan ni halak sileban, ai ahu do na mandok i, ninna Tuhan Jahowa.

28:11 Dung i ro muse hata ni Jahowa tu ahu songon on:

28:12 Ale anak ni jolma, pungka ma sada * ende andung taringot tu raja sian Tirus, jala dohononmu ma tu ibana: Songon on do hata ni Tuhan Jahowa: Ho do nian na jolo tumiti parsuhatan, gok habisuhon, jala sun denggan hinaulim.

28:13 Maringan di * Eden, porlak ni Debata do ho na jolo; saluhut mata intan angka na arga manghungkupi ho, mata intan * sardis, topas, diaman, tarsis, onik, dohot jaspis, sapir, rubin, zamrud dohot sere; jadijadian ni arbabmu dohot sarunem di lambungmi; di ari hababangkitmu hian do i dipadiri di ho.

28:14 Ho do nian sada kerubim * na paherbang habongna manghungkupi, jala nunga hupaojak ho di atas * dolok habadiaon ni Debata, di tongatonga ni angka batu na marsinondang do ho mardalandalan.

28:15 Tung sun denggan do ho di bagasan angka dalanmu, olat ni ari hababangkitmu sahat ro di hamamasa ni hajungkaton di bagasan ho.

28:16 Binahen ni hinagodang ni partigatigaonmu gok pangarupaon tongatongami, gabe mardosa ho; dibahen i hutimpalhon ho ala ni haramunonmu paholangkon sian dolok ni Debata, asa huripashon ho ale kerubim na manghungkupi sian tongatonga ni batu angka na marsinondang.

28:17 Dipaginjang ho do roham binahen ni hinaulim, diago ho do habisukonmu ala ni hamuliaonmu: Dibahen i tu tano reongkononku ho, jala bahenonku do ho tu jolo ni angka raja bahen sitotonduron.

28:18 Binahen ni hinagodang ni hajahatonmu di bagasan hageduhon ni partigatigaonmu diramuni ho do angka habadiaonmu; dibahen i ahu paruarhon api sian tongatongami na pasudahon ho, jala ahu mambahen ho gabe sirabun di sisik ni tano on di adopan ni saluhut halak na manondurhon ho.

28:19 Saluhut halak na tumanda ho na jolo di tongatonga ni angka bangso, tarhatotong be mida ho, gabe * hasonggoton bolon do ho, jala ndang adong be ho ro di saleleng ni lelengna.

28:20 Dung i ro muse hata ni Jahowa tu ahu songon on:

28:21 Ale anak ni jolma, tujuhon ma bohim dompak * Sidon, jala manurirangi ma ho taringot tusi!

28:22 Jala dohononmu ma: Songon on do hata ni Tuhan Jahowa: Ida ma, ahu ro * marlulu dompak ho ale Sidon, jala marmulia ahu bahenonku di tongatongami, asa tung diboto nasida ahu do Jahowa, molo huputushon angka uhum di bagasanna, jala badia ahu hubahen di tongatongana.

28:23 Ai tongoshononku ma tu bagasan huta i begu masa dohot durusdurus di mudar di angka alamanna, ingkon marragean jolma na mate tartiham di tongatongana marhitehite podang sian na humaliang, asa tung ditanda nasida ahu do Jahowa.

28:24 Jala ndang adong be sogot di pinompar ni Israel tau suga na manura manang basir na mambugangi sian saluhut halak angka na humaliang nasida, angka na marhu ni roha mida nasida: Asa tung diboto nasida ahu do Tuhan Jahowa.

28:25 Songon on do hata ni Tuhan Jahowa: Molo ahu papungupunguhon sogot pinompar ni Israel sian angka bangso parserahannasida na sai laon, jadi badia ma ahu marhite sian nasida di adopan ni bangso parbegu, jadi maringan ma nasida di tanonasida i naung hubasabasahon hian tu si Jakkob naposongki.

28:26 Asa marsonangsonang nasida maringan disi huhut pauli angka bagas dohot manuan angka porlak anggur, asa tung marsonangsonang nasida maringan, molo huputushon angka uhum tu saluhut angka na marhu ni roha mida nasida sian angka na humaliang nasida; asa tung ditanda nasida ahu do Jahowa, Debatanasida i.

Hesekiel 29

29:1 Pasampulutaonhon, di ari sampulu dua bulan sipahasampulu ro muse hata ni Jahowa tu ahu songon on:

29:2 Ale anak ni jolma, tujuhon ma bohim dompak Firaun, raja sian Misir, jala manurirangi ma ho taringot tu ibana dohot taringot tu sandok Misir!

29:3 Jala dohononmu ma: Songon on do hata ni Tuhan Jahowa: Ida ma, na ro ma ahu marlulu dompak ho ale Firaun, raja sian Misir, * naga na bolon i, na manggompang di tongatonga ni angka sungena, na mandok: Ahu do nampuna sungengku jala ahu jumadihon ahu.

29:4 Dibahen i, ahu ma mambahen * angka haithait tu bagasan osangosangmu, jala lohothononku ma angka dengke ni sungemi tu sisiksisikmu, jala enetonku ho tu ginjang sian tongatonga ni angka sungemi, jala saluhut dengke ni angka sungemi lohot do di sisiksisikmu.

29:5 Jala reongkononku ho tu halongonan, ro di saluhut dengke ni angka sungemi, gabe tinggang ho tu sisik ni ladang, ndang tagamon adong na manjomput manang papunguhon ho; tu binatang di tano i dohot tu pidong na martongatonga langit lehononku ho panganonna!

29:6 Asa tung ditanda saluhut isi ni Misir, ahu do Jahowa ala na gabe * tungkot tolong nasida di pinompar ni Israel.

29:7 Molo dung ditangkup nasida ho di tanganna gabe maponggol ho, laos dibolahon ho do sandok abaranasida, jala molo dipartungkot nasida ho, gabe maponggol ho, laos ditura ho sandok gontingnasida.

29:8 Dibahen i songon on do hata ni Tuhan Jahowa: Ida ma, ahu parohon dompak ho podang, asa husiaphon sian ho jolma nang pinahan.

29:9 Jadi ingkon gabe halongonan tano Misir jala tarulang, asa tung ditanda nasida, ahu do Jahowa! Ala naung nidokna i: Ahu do nampuna sunge i, jala ahu do manjadihonsa.

29:10 Dibahen i, ida ma, na ro ma ahu marlulu dompak ho dohot dompak angka sungemu jala ahu mambahen tano Misir gabe halongonan situtu jala tarulang, olat ni Migdol sahat ro di Siene jala sahat ro di partalpahan tungkan Kus.

29:11 Ndang jadi mamolus sian i pat ni jolma nanggo sada manang pat ni pinahan, jala ndang jadi inganan opatpulu taon on.

29:12 Jala ahu mambahen tano Misir gabe halongonan di tongatonga ni luat angka na tarulang, jala angka hutana ingkon tarulang di tongatonga ni huta angka na tarulang opatpulu taon on lelengna! Jala ahu pamamparhon halak Misir tu tongatonga ni angka bangso parbegu dohot paserakkonnasida tu angka luat.

29:13 Ai songon on do hata ni Tuhan Jahowa: Molo dung marujung siopatpulu taon i papunguonku ma halak Misir sian angka bangso parserahannasida na sai laon!

29:14 Jala ahu manogihon mulak angka na tarbuang sian Misir, asa huboan nasida mulak tu tano Patros, tu tano haroroannasida i, asa gabe sada harajaon na metmet nasida disi.

29:15 Ingkon ummetmet tahe sian harajaon angka na asing, jala ndang be patimboonna dirina di atas ni angka bangso parbegu; ai ahu paotikkon nasida asa unang be dirajai angka bangso parbegu na asing.

29:16 Jala ndang be gabe pangunsandean haposan di pinompar ni Israel, * sipasingothon hajahaton, di na nidompahanna mangihuthon tu nasida, asa tung ditanda nasida, ahu do Tuhan Jahowa.

29:17 Dung i paduapulu pitutaonhon di ari sada bulan sipaha sada, ro muse hata ni Jahowa tu ahu, songon on:

29:18 Ale anak ni jolma, poran situtu ulaon, maradu magege paranganna dibahen si Nebukadnesar, raja sian Babel martungkum Tirus, pola mapalpal saluhut ulu, jala malaslas saluhut abara, hape ndang dapotan upa nang rajai, nang paranganna sian Tirus, ali ni ulaonna dompak huta i.

29:19 Dibahen i, songon on do hata ni Tuhan Jahowa: Ida ma, ahu pasahathon tano Misir tu si Nebukadnesar, raja sian Babel, asa rampasonna hinagodang ni sinamotna, jala maruli tabantaban dohot sintahan, asa dapotan upa paranganna i.

29:20 Hira upa ni ulaonna dompak Tirus, lehononku ma tu ibana tano Misir, jala * hasea di ahu do na binahennasida i, ninna Tuhan Jahowa.

29:21 Di ari na sasada i martumbur ma bahenonku sada tanduk di pinompar ni Israel, tu ho pe lehononku ma buhabuha ni pamangan di tongatonganasida, asa tung ditanda nasida, ahu do Jahowa.

Hesekiel 30

30:1 Dung i ro muse hata ni Jahowa tu ahu songon on:

30:2 Ale anak ni jolma, manurirangi ma ho, jala dohononmu ma: Songon on do hata ni Tuhan Jahowa: Andungkon hamu ma, oe ari i marisuang!

30:3 Ai nunga * jonok ari i, nunga jonok tongon ari ni Jahowa, ari na hobot, tingki partubolan tu angka bangso parbegu ma i.

30:4 Ingkon masuk ma podang i tu Misir gabe masa parsipalon di Kus di hararage ni halak na mate tartiham di Misir; jala buatonnasida hinagodang ni sinamotna, jala lohaonna angka ojahanna.

30:5 Tole halak Kus dohot Pud dohot Lud ro di sandok na hinarana dohot Kub ro di angka anak ni tano parjanjian, rap marragean do nasida marhitehite podang.

30:6 Songon on do hata ni Tuhan Jahowa: Ingkon marragean do halak situngkol Misir, jala ingkon mijur hinatimbul ni gogona; * olat ni Migdol sahat tu Siene marragean nasida di bagasan ibana marhitehite podang, ninna Tuhan Jahowa.

30:7 Jala ingkon tarulang nasida di tongatonga ni luat angka na tarulang, jala angka hutana ingkon di tongatonga ni huta angka na tarulang do.

30:8 Asa tung ditanda nasida, ahu do Jahowa, molo ahu pagalakkon api di Misir, jala tarjepol saluhut halak angka na hinarana.

30:9 Di ari na sasada i, ruar ma angka suruan sian jolongku di bagasan angka kopal, asa * manonggoti Kus na tarlalap i, jala masa parsipalon di nasida, suang songon di ari ni Misir, ai ida ma, nunga tung ro!

30:10 Songon on do hata ni Tuhan Jahowa: Ahu huhut pasadihon hariburon ni Misir marhitehite tangan ni si Nebukadnesar, raja sian Babel.

30:11 Ibana udur dohot bangsona rap dohot bangso * parbegu angka na gumarang, ro be laho umpansingkon tano i, jala umpatonnasida do podangnasida dompak Misir, jala gok jolma na mate tartiham tano i bahenonnasida.

30:12 Jala ahu mambahen marsik angka batang aek i, gadisonku do tano i tu tangan ni halak parjahat, jala tarulang bahenonku tano i ro di isina marhitehite tangan ni halak ruar; ahu Jahowa sandiri do na mandok i.

30:13 Songon on do hata ni Tuhan Jahowa: Pesan do huhut bahenonku angka ganaganaan, jala pasohotonku angka debata sileban sian Nop, jala ndang adong be induk sian tano Misir, jala lehononku do roha hatahuton di tano Misir.

30:14 Tarulang huhut bahenonku Patros, jala pagalahonku api sada di * Zoan, jala dabuonku angka uhum di * No.

30:15 Jala usehononku do rimashu tu Sin, huta na gonting di Misir, jala pindomhononku do hariburon di No.

30:16 Jala pagalahonku do sada api ni Misir, tarjimput situtu ma hilalaon ni Sin, jala tartaban ia No, jala hagogotan situtu ia Nop ariari.

30:17 Ianggo angka dolidoli sian * On dohot sian Babustis, ingkon marragean do marhitehite podang jala tarboan tu habuangan isi ni huta i.

30:18 Di * Tahpanhes pe mangkolom ari, molo huponggolhon disi angka auga ni Misir, jala pesan disi hinatimbul ni gogona; ombun do manghungkupisa, jala tarboan tu habuangan do angka boruna.

30:19 Jadi putus hubahen angka uhum di Misir, asa tung ditanda nasida, ahu do Jahowa.

30:20 Pasampulu sada taonhon, di ari pitu bulan sipaha sada, ro muse hata ni Jahowa tu ahu songon on:

30:21 Ale anak ni jolma, nunga huponggolhon botohon ni Firaun, raja sian Misir jala ida ma, ndang jadi hona pauli ibana manang taoaran manang hona lilit pe, asa margogo nian muse laho maniop podang.

30:22 Dibahen i songon on do hata ni Tuhan Jahowa: Ida ma, ahu ro marlulu dompak Firaun, raja sian Misir, jala ahu umponggolhon botohonna duansa, nang na gogo dope, nang naung maponggol hian, jala peuthononku ma podang i sian tanganna.

30:23 Jala ahu pamamparhon halak Misir tu tongatonga ni angka bangso parbegu, jala paserahonku nasida tu angka luat ni halak.

30:24 Pargogoanku ma anggo angka botohon ni raja sian Babel, jala lehononku * podangku tu bagasan tanganna; alai ponggolhononku ma anggo angka botohon ni Firaun, asa mangangguhi ibana songon halak na targisik bugangna, jomjam tu jolona.

30:25 Pargogoanku ma tutu angka botohon ni raja sian Babel, daoldaol ma anggo botohon ni Firaun, asa tung ditanda nasida, ahu do Jahowa, molo hulehon podangku tu bagasan tangan ni raja sian Babel, asa ditampulhon marlulu dompak tano Misir.

30:26 Asa ahu pamamparhon halak Misir tu tongatonga ni angka bangso parbegu dohot paserakkon nasida tu angka luat, asa tung ditanda nasida ahu do Jahowa.

Hesekiel 31

31:1 Dung i pasampulu sada taonhon, di ari parjolo bulan sipaha tolu, ro muse hata ni Jahowa tu ahu songon on:

31:2 Ale anak ni jolma, dok ma tu Firaun raja sian Misir dohot tu na nirajaanna na deaki: Tung tu ise ma ninna roham patudosonmu dirim di habalgaonmu?

31:3 Ida ma, songon hau ares di Libanon do Assur na jolo, uli dangkadangkana, rugun bulungna tau parlinggoman, jala timbo badanna, pola disalpui pusukna angka ombun.

31:4 Aek do pagodang ibana, jala aek mual patimbo ibana, angka aek halian mardalan humaliang panuananna, jala dangkadangkana manjarar tu saluhut hau di ladang.

31:5 Ala ni tumimbo do badanna sian saluhut hau di ladang, jala lam tamba ma dangkadangkana, jala lam ganjang rantingrantingna dibahen godang ni aek di panjangkonna i.

31:6 Ro muse saluhut pidong na martongatonga langit marasar di dangkadangkana, jala di toru ni rantingrantingna tubuan anak saluhut binatang di ladang, jala di linggomanna maringan saluhutna bangso parbegu angka na balga.

31:7 Dung i lam uli ibana binahen ni habalgaonna, binahen ni ganjang ni rantingrantingna, ai martopihon aek godang do uratna.

31:8 Gari angka hau ares di porlak ni Debata, ndang tarlinggom ibana dibahen, gari angka hariara ndang tarpatudos tu dangkadangkana, gari angka hau harangan ndang songon rantingrantingna; saluhut hau di porlak ni Debata tahe, ndang tarpatudos tu ibana di hinaulina.

31:9 Nunga tung uli ibana hujadihon binahen ni hinatorop ni dangkana, pola mangiburu tu ibana saluhut hau di Eden, angka na di bagasan porlak ni Debata.

31:10 Dibahen i, songon on do hata ni Tuhan Jahowa: Ala songon i timbo ibana marbadan, pola sahat tu holangholang ni angka ombun pusukna, gabe * dipaginjang rohana binahen ni hinatimbona.

31:11 Jadi hupasahat ma ibana tu bagasan tangan ni bangso parbegu na gogo mambahen roharohana tu ibana; binahen ni hajahatonna tahe hupabali ibana.

31:12 Jadi ro halak ruar, bangso parbegu angka na garang martaba ibana, laos peak songon i di atas ni angka dolok ibana dipasombu, jala madabu tu bagasan saluhut rura dangkadangkana, jala marponggolan rantingrantingna di saluhut jarungjung ni tano i, jadi mapurpur sian linggomna saluhut bangso ni tano on laos dipasombu ibana.

31:13 Songgop ma tu badanna na marobo i saluhut pidong na martongatonga langit, jala modom tu dangkadangkana saluhut binatang di ladang.

31:14 Asa unang be dihaginjangkon nasa hau martopihon aek hinatimbona, jala unang be pusuknasida manalpui angka ombun, jala unang be mangasahon dirinasida nasa hau sionsop aek dibahen habalgaonna; ai saluhut nasida nunga pinasahat tu hamatean, tu tano apala partoru, tu tongatonga ni manisia angka na tuat tu godung.

31:15 Songon on do hata ni Tuhan Jahowa: Apala di ari hatutuatna tu parbeguan, ahu mambahen andung pabonsa roha, hulingkuphon lung i di atasna, jala hutambok angka sungena gabe monsong angka aek magodang, jala martujung Libanon mida ibana, jala mangkolom saluhut hau di ladang ala ibana.

31:16 Binahen ni pardobur ni harorobona raion hubahen angka bangso parbegu, uju na tuat ibana huonjarhon tu parbeguan rap dohot angka na tuat tu godung. Jadi tarapul ma di banua toru martilla ni roha saluhut hau di Eden, na pinillit dohot na denggan di Libanon, saluhut hau angka sionsop aek.

31:17 Nang nasida ingkon tuat do rap dohot ibana tu parbeguan, mandapothon jolma angka na mate tiniham ni podang ro di paranganna angka na marlinggom tu ibana di tongatonga ni angka bangso parbegu.

31:18 Tung tudos tu ise ma ho, disura roham, marhamuliaon dohot marhabalgaon di tongatonga ni angka hau di Eden? Hape onjarhononhon do ho tuat rap dohot angka hau di Eden tu banua toru, ingkon peak ho di tongatonga ni halak na marhulup rap dohot jolma angka na mate tiniham ni podang. I ma pangalaho ni Firaun dohot sandok na nirajaanna, ninna Tuhan Jahowa.

Hesekiel 32

32:1 Dung i pasampulu dua taonhon, di ari sada bulan hurung ro muse ma hata ni Jahowa tu ahu songon on:

32:2 Ale anak ni jolma, pungka ma sada * ende andung taringot tu Firaun, raja sian Misir, jala dohononmu ma tu ibana: Tudoshon singa na bajar do ho di tongatonga ni angka bangso parbegu, jala tudoshon * naga do ho di angka laut, jala mamuntas do ho di bagasan angka sungem jala dilitohi ho do aek marhitehite patmu, jala diluntak ho do angka sungena.

32:3 Songon on do hata ni Tuhan Jahowa: Ahu ma mangalungkuphon rambangku tu ho di luhutan ni torop bangso, jadi toltolonnasida ma ho tu ginjang di bagasan rambangku.

32:4 Jala saratonku ma ho tu darat, jala reongkononku ho tu ladang manangkas, asa hupaeat tu atasmu saluhut pidong na martongatonga langit, jala butong hubahen sian ho binatang ni sandok tano on.

32:5 Jala marambolongan hubahen sibukmu di atas ni angka dolok, jala gok bangkem na margugungugun hubahen angka rura.

32:6 Jala butong bahenonku tano habinsatanmu marhite sian mudarmu sahat ro di angka dolok, asa gok angka rura bahenonmu.

32:7 Apala di * hapipidommi hobot bahenonku angka langit, jala mangkolom angka bintangna, ia mata ni ari hungkupan ni ombun do, jala ndang be marsinondang ianggo bulan.

32:8 Saluhut panondang angka na lohot di langit mangkolom do bahenonku di atasmu, jala paroonku do haholomon tu tanom ninna Tuhan Jahowa.

32:9 Godoron do huhut bahenonku roha ni torop bangso, molo hupatolhas barita ni hapipidommi tu tongatonga ni angka bangso parbegu, tu luat angka na so tinandam.

32:10 Jadi tarhatotong bahenonku mida ho torop bangso, jala manindang imbulu ni angka rajanasida mida ho, molo marlisik hubahen podangku di adopannasida, gabe raion nasida gonop tongkin humolsohon hosana be di ari harorobom.

32:11 Ai songon on do hata ni Tuhan Jahowa: Ingkon ro podang ni raja sian Babel marlulu dompak ho.

32:12 Marhitehite podang ni angka ulubalang ragehononku angka paranganmu; bangso parbegu angka na garang do nasida luhutna, jala siaphononnasida do hatimbulon ni Misir, jala laumonna sandok hamoraonna.

32:13 Jala rendephononku do saluhut pinahanna sian tano martopihon aek godang, gabe ndang be litohan ni pat ni jolma manang tambirik ni pinahan angka aek i.

32:14 Dung i patioonku ma muse angka batang aek nasida, jala sungenasida mardalan songon miak bahenonku, ninna Tuhan Jahowa.

32:15 Ia dung gabe halongonan tano Misir hubahen, jala pesan hinagabe ni tano i, jala huragehon sandok pangisina i, gabe tandaonnasida ma, ahu do Jahowa.

32:16 I ma ende andungi, laos andungkonon ni halak, tole angka boru ni angka bangso parbegu mangandungkonsa taringot tu Misir dohot taringot tu sandok paranganna andungkononna do i, ninna Tuhan Jahowa.

32:17 Dung i pasampulu dua taonhon, di ari sampulu lima bulan hurung, ro muse hata ni Jahowa tu ahu songon on:

32:18 Ale anak ni jolma mangandung ma ho taringot tu hinadeak ni Misir, jala onjarhon ma i rap dohot boru ni bangso parbegu angka na marmulia * tuat tu banua toru, mandapothon angka naung tuat tu godung!

32:19 Tung ise ma na tinindim di haulion? Tuat ma ho asa peak ho di tongatonga ni halak na marhulup!

32:20 Ingkon marragean nasida di tongatonga ni halak na mate tiniham ni podang, nunga * pola pinasahat podang i, laos dilaum nasida Misir ro di saluhut ginomgomanna!

32:21 Jadi dohonon ni angka na umbegu sian angka ulubalang ma tu ibana sian tongatonga ni parbeguan ro di angka na hinarana: Nunga tuat nasida, nunga marpeahan hape halak na marhulup i, angka na mate tiniham ni podang!

32:22 Disi do hape Assur ro di sandok na nirajaanna, humaliang ibana angka hinamborna, saluhut do nasida angka na mate tartiham, angka na marragean binahen ni podang.

32:23 Apala di parsitongaan ni * godung i do hinamborna dibahen jala luhutan ni na nirajaanna humaliang hinamborna i, saluhut nasida angka na mate tartiham, angka na marragean binahen ni podang, nasida angka na mambahen hasonggoton na jolo uju di tano hangoluan on.

32:24 Disi do hape nang Elam ro di sandok na nirajaanna humaliang hinamborna, saluhut nasida angka na mate tartiham, marragean binahen ni podang, angka na tuat tu banua toru, songon halak na marhulup nasida angka na mambahen hasonggoton na jolo uju di tano hangoluan on, gabe ingkon usungonna haurahonna nuaeng rap dohot angka na tuat tu godung.

32:25 Di tongatonga ni halak angka na mate tartiham podomanna dibahen ro di saluhut na nirajaanna, humaliang ibana do hinambornasida, saluhut do nasida angka halak na marhulup, angka na mate tiniham ni podang, ala na binahenna hasonggoton uju di tano hangoluan on, gabe usungonnasida nuaeng haurahonnasida rap dohot angka na tuat tu godung, tung di tongatonga ni angka na mate tartiham do ibana dipeakkon.

32:26 Disi do hape nang * Mesek, Tubal ro di sandok na nirajaanna, humaliang ibana do hinambornasida, tung luhut do nasida halak na marhulup, angka na mate tiniham ni podang, ala na binahen nasida hasonggoton mida nasida uju di tano hangoluan on.

32:27 Tung so marpeahan nasida rap dohot halak na begu, angka na marragean songon halak na marhulup, angka na tuat tu parbeguan mardongan parhohas nasida tu hamusuon, pola halangulunasida podangnasida i dibahen halak, gabe laos hajahatonnasida manginona tu holiholinasida, ala hasonggoton ni angka ulubalangnasida uju di tano hangoluan on.

32:28 Ho pe ingkon bolahononna do ho di tongatonga ni halak na marhulup, ingkon peak ho rap dohot angka na mate tiniham ni podang.

32:29 Disi do hape nang * Edom, angka rajana ro di sude indukna, angka na pinasahat uju di habeguonnasida i bahen dongan ni angka na mata tiniham ni podang. Marpeahan do nasida nuaeng rap dohot halak parhulup, rap dohot halak naung tuat tu godung.

32:30 Disi do hape nang induk angka na sian * utara, luhut nasida ro di halak * Sidon, angka na tuat rap dohot angka na mate tartiham, gabe tarurak nasida di bagasan hasonggoton mida nasida binahen ni habeguonnasida na jolo, jala marpeahan nasida halak parhulup i rap dohot halak na mate tiniham ni podang, jala ingkon usungonnasida haurahonnasida rap dohot halak na tuat tu godung.

32:31 Angka nasida ma idaon ni Firaun, gabe * tarapul ma rohana taringot tu sandok na nirajaanna i; angka na mate tiniham ni podang do Firaun ro di sandok paranganna i, ninna Tuhan Jahowa.

32:32 Ai ahu do mambahen hasonggoton mida ibana uju di tano hangoluan on, hape anggo nuaeng marbustangan do Firaun ro di sandok na nirajaanna i, di tongatonga ni halak parhulup rap dohot angka na mate tiniham ni podang, ninna Tuhan Jahowa.

Hesekiel 33

33:1 Dung i ro muse hata ni Jahowa tu ahu songon on:

33:2 Ale anak ni jolma, pangkulingi ma angka anak ni bangsom, jala dohononmu ma tu nasida: Tung sura ahu parohon podang marlulu dompak sada luat, jadi buaton ni bangso isi ni luat i ma sahalak sian tongatonganasida jala pabangkitonna ibana bahen parjaga di nasida.

33:3 Ia dung diida ibana podang i ro marlulu dompak luat i, ingkon paluonna sangka asa palumba bangso i.

33:4 Jadi dibege na umbegesa soara ni sangka i, hape ndang olo ibana palumbaon, gabe ro ma tutu podang i, laos dirasiphon ibana, marbilangbilang tu ibana sandiri do mudarna.

33:5 Ai dibege do nian soara ni sangka i, hape ndang olo ibana palumbaon, marsapata tu ibana ma mudarna; alai tung sura olo ibana palumbaon, paluaonna ma hosana.

33:6 Alai tung sura naung diida parjaga i podang i ro, hape ndang dipalu sangka, ndang dipalumba nang bangso i, gabe ro podang i jala diago nanggo sahalak sian nasida, pidom di bagasan hajahatonna do nian ibana, alai anggo mudarna sian tangan ni parjaga i do tungguonku.

33:7 Ia ho ale anak ni jolma, nunga hupabangkit ho bahen * parjaga di pinompar ni Israel, ia adong hata nanggo sada dibege ho sian pamanganku, ingkon sipasingothononmu do i tu nasida sian ahu.

33:8 Molo ahu mandok tu halak parjahat: Ingkon mate do ho ale parjahat, hape ndang marboaboa ho palumba halak parjahat i tumundalhon dalanna i nian, mate do nian parjahat i di bagasan hajahatonna, alai anggo mudarna sian tanganmu do tungguonku.

33:9 Alai anggo dipalumba ho do halak parjahat i tumundalhon dalanna i nian, asa mulak sian i nian, hape ndang olo ibana mulak tumadingkon dalanna i, mate di bagasan hajahatonna ma ibana, alai anggo ho malua do hosam dibahen ho.

33:10 Dibahen i, ho ale anak ni jolma, dok ma tu pinompar ni Israel: Ia hatahatamuna songon on do: Molo naung manginona pangalaosionnami dohot dosanami tu hami, pola tung mandate hami binahen ni, beha ma pambahenna mangolu dope hami?

33:11 Dok ma tu nasida: Songon sintongna mangolu ahu, ninna Tuhan Jahowa, tung * na so lomo do rohangku mida hamatean ni halak parjahat i, so ingkon mida hamumulak ni parjahat i tumadingkon dalanna i nian, asa mangolu ibana. Antong sai * mulak ma hamu tumadingkon dalanmuna angka na jahat i! Boasa tung tagonan mate hamu, ala pinompar ni Israel?

33:12 Ia ho ale anak ni jolma, paboa ma tu angka anak ni bangsom: * Tung na so tarpalua hatigoran ni halak partigor ibana di ari pangalaosionnai; hajahaton ni halak parjahat pe ndang tagamon manginsombut tu ibana di ari hamumulakna tumadingkon hajahatonna i; jala ndang tarpangolu hatigoran ni halak partigor ibana di ari pardosaonna i.

33:13 Tung sura ahu marboaboa tu halak partigor i: Ingkon mangolu ibana! Gabe marhaposan tu hatigoranna ibana huhut mangulahon na so uhum, saluhut angka hatigoranna i ndang be ingoton, jala ingkon mate ibana di bagasan hajahaton ni binahenna i.

33:14 Tung sura ahu marlumba tu halak parjahat i: Ingkon mate do ho! Hape mulak rohana tumadingkon dosana, jala diulahon uhum dohot hatigoran.

33:15 Tung * dipaulak halak parjahat i singkoram jinalona i, tung * disingkat do na nirampasna, tung diparangehon do angka patik ni hangoluan, unang mambahen hageduhon, ingkon mangolu ibana, ndang jadi mate.

33:16 Saluhut dosa angka naung binahenna i, ndang be ingoton tu ibana, ala uhum dohot hatigoran na niulana i, ingkon mangolu ibana!

33:17 Hape lam ro do hata ni angka anak ni bangsom mandok: Ndang tingkos dalan ni Tuhan i, hape dalannasida sandiri tahe ndang tingkos!

33:18 Tung sura marbalik halak partigor i tumadingkon hatigoranna hian, jala mangulahon hageduhon, ingkon mate ibana binahen ni.

33:19 Jala tung sura mulak roha ni halak parjahat i tumadingkon hajahatonna i, jala diulahon uhum dohot hatigoran, ingkon mangolu ibana alani.

33:20 Hape anggo hamu mandok: Ndang tingkos dalan ni Tuhan i. Antong ganup hombar tu angka dalanna uhumonku hamu, ale pinompar ni Israel.

33:21 Dung i pasampulu dua taonhon, di ari lima bulan sipaha sampulu, dung tarbuang hami, * ro sada halak na malua sian Jerusalem manopot ahu, mandok songon on: Nunga patu huta i!

33:22 Alai nunga songgop hian tangan ni Jahowa tu ahu di bodari jumolo asa ro halak na malua i, jala dibungka pamanganku, paima ro ibana manopot ahu manogotna i, gabe buha pamanganku didapot, jadi ndang be mangungu ahu.

33:23 Dung i ro muse ma hata ni Jahowa tu ahu songon on:

33:24 Ale anak ni jolma, hatahata ni isi ni huta angka na tartaban i di tano Israel, songon on do: Sada sambing do anggo * si Abraham gabe ditean tano i, torop do anggo hita, nunga dibasabasahon tahe tano i tu hita bahen partalian.

33:25 Dibahen i, dohononmu ma tu nasida: Songon on do hata ni Tuhan Jahowa: * Dipangan hamu do na binontaran, jala matamuna manaili tu angka ganaganaanmuna, jala mandurushon mudar do hamu, hape naeng dope teanonmuna tano i!

33:26 Mangasahon podangmuna do hamu, diulahon hamu do hasogiron, jala ganup hamu mangaramuni jolma ni donganna, hape anggo tano i naeng do teanonmuna!

33:27 Dibahen i dohononmu ma tu nasida: Songon on do hata ni Tuhan Jahowa: Songon sintongna mangolu ahu, ingkon marragean bahenon ni podang jolma angka na maringan di huta naung tartaban i; jala manang ise na di ladang, lehononku do ibana panganon ni binatang; jala manang ise di bagasan huta angka na gonting, dohot di bagasan liang, ingkon mate nasida begu antukon!

33:28 Ai ahu mambahen tano i gabe halongonan jala tarulang, jala mansadi hamuliaon ni gogona, jala tarulang do angka dolok ni Israel, asa unang be mamolus sian i nanggo sahalak.

33:29 Asa tung ditanda nasida, ahu do Jahowa, ia dung gabe halongonan tano i hubahen, jala tarulang ala ni saluhut hasogiron angka na niulanasida i.

33:30 Ia ho ale anak ni jolma, angka anak ni bangsom pahatahata ho mardonokkon angka dorpi dohot di bagasan pintu ni angka jabu, jala masipandohan nasida ganup tu donganna songon on: Beta hita asa itabege manang hata dia na ruar sian Jahowa!

33:31 Jadi ro be ma nasida manopot ho marhoronhoron, laos hundul di jolomi bangsongki, asa mananginangi tu angka hatami, alai * ndang anggo ulahononna, ai marsipalensem do ia pamangannasida, alai mangihutihut pangomoanna be do ianggo rohanasida.

33:32 Jala ida ma, hira ende arur do ho di nasida, tiar marsuara jala na malo mamiltik parhinaloan, gabe ditangitangi nasida do nian angka hatam, hape nanggo sahalak ndang anggo mangulahon.

33:33 Alai anggo di haroro ni hata i, ida ma, sai na ro do, jadi botoonnasida ma naung adong * panurirang di tongatonganasida.

Hesekiel 34

34:1 Dung i ro muse hata ni Jahowa tu ahu songon on:

34:2 Ale anak ni jolma, ingkon manurirangi ma ho taringot tu halak siparmahan Israel! Jala dohononmu ma tu nasida, tu angka parmahan i: Songon on do hata ni Tuhan Jahowa: Marjea ma * halak siparmahan Israel, angka na marmahan dirina sambing! Nda ingkon angka birubiru nian parmahanon ni angka parmahan.

34:3 Nunga bosur hamu manganhon tabotabo i, jala imbuluna dibahen hamu pangkeanmuna, pamueanna nunga dipotongi hamu, alai anggo punguan birubiru i, ndang diparmahani hamu!

34:4 Angka na gale i ndang dipargogoi hamu, jala na marsahit i ndang didaoni hamu, jala na mabugang i ndang dililiti hamu, jala na tardempar i ndang mulak diboan hamu, jala na mago i ndang dilului hamu, horas do tahe jala posi pangarajaimu di nasida.

34:5 Jadi mampar ma nasida ala soada siparmahan gabe sipanganon ni saluhut binatang ni ladang i nasida, jala marserak.

34:6 Jadi lilu ma punguan birubirungku di atas ni saluhut dolok dohot di atas ni sandok robean na timbo, jala marserak punguan birubirungku di atas sandok sisik ni tano on, hape ndang adong nanggo sahalak na usouso manang na mangalului punguanki.

34:7 Dibahen i, hamu ale angka parmahan, tangihon hamu ma hata ni Jahowa.

34:8 Songon sintongna mangolu ahu, ninna Tuhan Jahowa, ala na gabe ripe pupusan punguan birubirungku, jala ripe panganon ni saluhut binatang di ladang punguan birubirungku ala soada siparmahan, jala ndang usouso angka parmahanku di punguan birubirungku, laos * dirinasida sambing tahe diparmahani angka parmahan i, ianggo punguan birubirungku ndang diparmahan nasida.

34:9 Dibahen i, hamu ale angka parmahan, tangihon hamu ma hata ni Jahowa!

34:10 Songon on do hata ni Tuhan Jahowa: Ida ma, ahu ma marlulu dompak angka parmahan i, jala ahu martunggu birubirungku sian tangannasida, jala ahu pasadihon nasida sian ulaon parmahanon birubiru, jala ndang be parmahanon ni angka parmahan i dirinasida sambing, jala ahu paluahon birubirungku sian pamangannasida, asa unang be ripe sipanganon di nasida.

34:11 Ai songon on do hata ni Tuhan Jahowa: Ida ma, ahu, apala ahu sandiri usouso sogot di birubirungku, jala luluanku nasida.

34:12 * Songon pangalului ni parmahan di punguanna di ari uju di tongatonga ni birubirunna angka na mampar i ibana, suang songon i ahu mangalului birubirungku sogot, jala paluaonku nasida sian saluhut inganan parserahannasida i, * uju di ari ombun dohot haholomon marimpotimpot.

34:13 Jala ahu manogihon nasida ruar sian angka bangso dohot papunguhon nasida sian angka luat, asa huboan nasida mulak tu tanonasida i, laos ahu marmahan nasida di atas ni angka dolok Israel, di bagasan angka rura dohot di bagasan saluhut parmianan di tano on.

34:14 Di * jampalan apala na lomak ahu marmahan nasida, jala di atas dolok angka na timbo di Israel parudamannasida, disi ma mangulon nasida di parudaman na denggan, jala jampalan apala na lomak jampalanna di atas ni angka dolok ni Israel.

34:15 Ahu sandiri ma marmahan birubirungku, jala ahu paulon nasida, ninna Tuhan Jahowa.

34:16 Luluanku ma na mago i, jala mulak boanonku na tardempar i, jala lilitanku do na mabugang i, jala pargogoanku do na marsahit i; alai anggo na mokmok i dohot na gogo i siaphononku do, ahu sandiri tahe marmahansa marhitehite uhum.

34:17 Alai anggo tu hamu ale birubirungku songon on do hata ni Tuhan Jahowa: Ida ma, ahu ma manguhum * di holangholang ni birubiru martimbangkon birubiru, tole birubiru tunggal martimbangkon hambing tunggal.

34:18 Maotikku dope huroha di rohamu naung jinampalmuna i jampalan na lomak i, dohot do ebaeba ni jampalanmuna i, ingkon popoanmuna marhitehite patmuna, jala aek na tio diinum hamu, alai anggo ebaebana i dilitohi hamu do marhitehite patmuna.

34:19 Tung patut ma birubirungku manjampal na pinopoan ni patmuna i, jala inumonna na nilitohan ni patmuna i?

34:20 Dibahen i, songon on do hata ni Tuhan Jahowa tu nasida: Ida ma, ahu sandiri mamutus uhum di holangkolang ni birubiru angka na mokmok martimbangkon birubiru na marniang:

34:21 Ala didorongi hamu marhitehite lambung dohot abara, jala ditambingi hamu marhitehite tandukmuna saluhut birubiru angka na gale i, paima pola marserak nasida tu balian dibahen hamu.

34:22 Dibahen i ahu ma manolongi birubirungku, asa unang be ripe pupusan, jala ahu mamutus uhum di holangholang ni birubiru martimbangkon birubiru.

34:23 Jala ahu * patindang di nasida sada parmahan, asa ibana marmahan nasida, i ma * naposongku si Daud. Ibana ma marmahan nasida, jala ibana gabe parmahan di nasida.

34:24 Jala ahu Jahowa sandiri tahe gabe Debatanasida, jala naposongku si Daud pangarajai di tongatonganasida. Ahu Jahowa do na mandok i.

34:25 Dung i bahenonku ma tu nasida * padan pardamean, jala pasadionku binatang na rahat sian tano i, asa halongonan, jala modom di angka tombak longolongo.

34:26 Dung i bahenonku ma nasida dohot angka na humaliang dolokdolokku gabe pasupasu, jala ahu parohon udan di tingki halehetanna, gabe angka udan parpasupasuan do i.

34:27 Jala lehonon ni hau di ladang do parbuena, jala lehonon ni tano i do gogona, jala marsonangsonang nasida di tanonasida i, asa tung ditanda nasida ahu do Jahowa, ia dung huponggolhon angka hau ni auganasida i, jala hupalua nasida sian tangan ni halak angka na marhatobanhon nasida.

34:28 Jadi ndang be ripe pupusan ni angka bangso parbegu nasida, jala ndang be ripe panganon ni binatang di tano i nasida, asa marsonangsonang nasida maringan, jala ndang adong be panonggoti nanggo sahalak.

34:29 Jala patindangonku di nasida panuanan sada bahen barita, jala * ndang be adong nasida angka na mate anturaparon di tano i, jala ndang be usungonnasida haurahon ni angka bangso parbegu.

34:30 Asa tung ditanda nasida ahu do Jahowa, * Debatanasida i, dongannasida, jala nasida pinompar ni Israel bangsongku, ninna Tuhan Jahowa.

34:31 Jala hamu do punguanku, birubiru angka na huparmahan, jolma do hamu; ahu ho Debatamuna i, ninna Tuhan Jahowa.

Hesekiel 35

35:1 Dung i ro muse hata ni Jahowa tu ahu songon on:

35:2 Ale anak ni jolma, tujuhon ma bohim dompak * dolok Seir, jala manurirangi ma ho taringot tusi!

35:3 Jala dohononmu ma tu ibana: Songon on do hata ni Tuhan Jahowa: Ida ma, ahu ro marlulu dompak ho, ale dolok Seir, jala patoltolonku tanganku dompak ho, jala bahenonku ho gabe halongonan jala tarulang.

35:4 Angka hutam pe tarulang do bahenonku, asa gabe halongonan ho, asa tung ditanda ho, ahu do Jahowa!

35:5 Ala na marmusu tihus ho sian na robi dope, jala dipasahat ho halak Israel tu baba ni podang, uju di tingki parsipalonnasida, uju di tingki panimpulan ni hajahaton.

35:6 Dibahen i, songon sintongna mangolu ahu, ninna Tuhan Jahowa, ingkon gabe mudar ho bahenonku, jala parsapataan mudar paburuburu ho, ala * so dihagigihon roham mudar, ingkon parsapataan mudar mangalotongi ho.

35:7 Jala bahenonku do dolok Seir gabe halongonan, jala tarulang, jala siaphononku do sian i halak na marmeang muli.

35:8 Jala gok bahenonku angka dolokna halak na mate tartiham sian ibana; marpeahan do huhut di dolokdolokmu, di angka ruram, dohot di saluhut angka sungemi, jolma angka na mate tiniham ni podang.

35:9 Ingkon gabe halongonan ho ro di salelenglelengna bahenonku, angka hutam pe ndang be inganan, asa tung ditanda hamu, ahu do Jahowa.

35:10 Ala naung nidokmi: Na dua bangso i dohot na dua luat i sai na sahat tu ahu do i, jala teanonnami do i, ndang disi Jahowa maringan.

35:11 Dibahen i, songon sintongna mangolu ahu, ninna Tuhan Jahowa, ingkon bahenonku hombar tu rimasmu dohot hombar tu pangiburuonmu, na binahenmi sian gigim mida nasida, asa tung hupatandahon ahu di tongatonganasida, ia dung hulaluhon uhum tu ho.

35:12 Asa tung ditanda ho, ahu do Jahowa, naung umbege saluhut elakelakmu, angka naung nidokmu taringot tu angka dolok Israel songon on: Nunga tung tarulang! Sahat tu hita ma sahalanta.

35:13 Gari dompak ahu nunga manenganenga pamanganmuna, jala dipadeakdeak hamu hatahatamuna mangalo ahu, pola ahu umbegesa.

35:14 Songon on do hata ni Tuhan Jahowa: Molo marlas ni roha be sogot sandok tano on, halongonan ma ianggo ho bahenonku.

35:15 Hombar tu * las ni roham mida partalian ni pinompar ni Israel ala naung tarulang, suang songon i bahenonku tu ho: Ingkon gabe halongonan ho, ale dolok Seir, tung ro di sandok Edom, asa tung ditanda nasida, ahu do Jahowa!

Hesekiel 36

36:1 Ia ho, ale anak ni jolma, manurirangi ma ho taringot tu angka dolok Israel, jala dohononmu ma: Ale angka dolok Israel, tangihon hamu ma hata ni Jahowa!

36:2 Songon on do hata ni Tuhan Jahowa: Ala naung nidok ni musu i taringot tu hamu: * Ha, ha! Jala angka buntulbuntul salelenglelengna, nunga tung gabe partalianta!

36:3 Dibahen i manurirangi ma ho, jala dohononmu ma: Songon on do hata ni Tuhan Jahowa; ala naung tarulang, jala naung binondutan hamu sian na humaliang, pola gabe partalian ni pasipasi ni angka bangso parbegu hamu, jala dipampe hamu tu atas dilana bahen ende aling ni situan na torop.

36:4 Dibahen i, ale angka dolok Israel, tangihon hamu ma hata ni Tuhan Jahowa! Songon on do hata ni Tuhan Jahowa tu angka dolok dohot tu angka buntulbuntul, tu angka sunge dohot tu angka rura, tu angka turanggong na marambolongan dohot tu huta angka na tinadingkon, angka na gabe tabantaban dohot gabe ende aling di pasipasi ni bangso parbegu, angka na sian humaliang.

36:5 Dibahen i, songon on do hata ni Tuhan Jahowa: Molo so naung mangkatai ahu di bagasan api ni pangiburuonku taringot tu angka pasipasi ni angka bangso parbegu dohot taringot tu sandok * Edom, angka na mangalehon tanongku tu dirinasida bahen partalian marhitehite sandok las ni rohana, marhitehite eleseles ni ateate, ala naung gabe tabantaban jampalanna i.

36:6 Dibahen i, manurirangi ma ho taringot tu tano Israel, jala dohononmu ma tu angka dolok dohot tu angka buntulbuntul, tu angka sunge dohot tu angka rura: Songon on do hata ni Tuhan Jahowa: Ida ma, nunga pola marboaboa ahu di bagasan pangiburuonku dohot di bagasan rimashu, ala naung niusungmuna haurahon binahen ni angka bangso parbegu.

36:7 Dibahen i, songon on do hata ni Tuhan Jahowa: Nunga pola hupatoltol tanganku marmangmangkon: Molo so ingkon usungon ni bangso parbegu angka na humaliang hamu haurahonnasida sandiri.

36:8 Alai anggo hamu, ale angka dolok Israel, ingkon mangulahi martumbur hamu, jala marparbue hamu di bangsongku Israel, ai nunga pola jumonok nasida ro.

36:9 Ai ida ma, marpangulahi rohangku manatap hamu, asa paulion hamu muse jala saburon.

36:10 Jala patambaonku tu hamu jolma, saluhut nasida pinompar ni Israel; jala inganan muse angka huta, jala paulion muse angka turanggong.

36:11 Jala * patambaonku tu hamu jolma nang pinahan, asa matorop mabue nasida, jala marisi hamu bahenonku, suang songon di parmulaanmuna, jala bahenonku na denggan, ganda sian di tingkimuna angka na robi, asa tung ditanda hamu, ahu do Jahowa!

36:12 Jala bahenonku mardalani di atasmuna angka jolma, i ma bangsongku Israel, jala nasida manean ho, jala ho gabe partaliannasida, jala ndang be punu nasida bahenonmu.

36:13 Angkup ni songon on do hata ni Tuhan Jahowa: Ala dipandok halak tu hamu: Sipangan jolma do ho, jala sipapunu bangsom do ho.

36:14 Dibahen i, ndang be panganonmu jolma, jala ndang be papunuonmu bangsom, ninna Tuhan Jahowa.

36:15 Jala ndang be ahu patubegehon tu ho haurahon ni angka bangso parbegu, jala ndang be taononmu elakelak ni angka bangso, jala ndang be papunuonmu bangsom, ninna Tuhan Jahowa.

36:16 Dung i ro muse hata ni Jahowa tu ahu songon on:

36:17 Ale anak ni jolma, maringan do pinompar ni Israel na jolo di tanonasida i, hape * diramuni nasida do i marhitehite dalannasida dohot pambahenannasida; * songon hararamun ni parompuan di hasomalanna tahe dalannasida i maradophon ahu.

36:18 Jadi huusehon ma rimashu tu nasida, ala mudar na nidurushon nasida tu tano i, jala diramuni do i marhitehite ganaganaannasida.

36:19 Pola ahu paserakkon nasida tu tongatonga ni angka bangso parbegu, gabe mampar nasida tu angka luat; hombar tu dalannasida jala hombar tu pambahenannasida tahe ahu manguhum nasida.

36:20 Jadi dung sahat nasida tu tongatonga ni bangso parbegu, angka na tinopotnasida i, laos * diramuni nasida disi goarhu na badia i, pola didok halak taringot tu nasida: Angka nasida do hape bangso ni Jahowa, jala na bungkas sian tanona i!

36:21 Alai * marpangulahi do rohangku ala goarhu na badia i, na niramunan ni pinompar ni Israel di tongatonga ni bangso parbegu, angka hasahatannasida i.

36:22 Dibahen i dohononmu ma tu pinompar ni Israel: Songon on do hata ni Tuhan Jahowa: Ndada ala hamu ahu mambahen songon i, ale pinompar ni Israel, * ala ni goarhu na badia i do, na niramunanmuna di tongatonga ni bangso parbegu, angka hasahatanmuna i.

36:23 Jala ahu ma pabadiahon goarhu na timbul i, naung niramunan di tongatonga ni angka bangso parbegu, na niramunanmuna tahe di tongatonganasida, asa tung * ditanda angka bangso parbegu, ahu do Jahowa, ninna Tuhan Jahowa, ia dung huparbadiai diringku di bagasan hamu di adopanmuna.

36:24 Jala ahu mambuat hamu sian angka bangso parbegu, jala paluhutonku do hamu sian saluhut angka luat, jala boanonku do hamu mulak tu tanomuna i.

36:25 Dung i * urashononku ma tu hamu aek angka na tio, asa tung ias hamu; urasonku do hamu tahe sian saluhut haramunonmuna i dohot sian saluhut ganaganaanmunai.

36:26 Jala lehononku tu hamu * roha na imbaru dohot tondi na imbaru tu bagasan ateatemuna; jala unsatonku do roha batu sian dagingmuna, jala lehononku tu hamu roha sibuk.

36:27 Jala lehononku ma tondingku tu bagasan ateatemuna, jala ahu mambahensa, asa marparange hamu di bagasan angka patikku, angka uhumhu pe radotan jala patupaonmuna do.

36:28 Asa maringan hamu muse di tano, naung hubasabasahon tu ompumuna, jala sumuang * hamu gabe bangsongku, jala ahu gabe Debatamuna.

36:29 Jala ahu paluahon hamu sian saluhut haramunonmuna i, jala ahu martingting tu eme huhut pagodangkon, jala ndang be lehononku tu hamu haraparon.

36:30 Jala ahu pagodangkon parbue ni hau dohot gogo ni tano i, asa unang be taononmuna elakelak ni haraparon di tongatonga ni angka bangso parbegu.

36:31 Jadi ingotonmuna ma dalanmuna angka na roa i dohot pambahenanmuna angka na so turut i, balik marbiasbias hamu mida bohimuna, ala ni hajahatonmuna dohot ala ni hasogiron angka na niulamuna i.

36:32 Ndada * ala hamu ahu mambahen songon i, ninna Tuhan Jahowa, boto hamu ma i! Maila ma hamu jala marlangan mida dalanmuna i, hamu ale pinompar ni Israel.

36:33 Songon on do hata ni Tuhan Jahowa: Di ari pangurasanku sogot di hamu sian saluhut hajahatonmuna i, marisi muse bahenonku angka huta, jala pajongjongon muse angka turanggong.

36:34 Ulaon muse huhut tano na tarulang i na sai laon, na niida ni saluhut halak pamolus.

36:35 Jadi dohonon ni halak ma: Tano na tarulang i na jolo, gabe hira porlak Eden nuaeng, jala huta angka na tartaban jala tarulang jala maloha na jolo, gabe gonting jala ribur nuaeng.

36:36 Jadi tandaon ni bangso parbegu angka na teba i humaliang hamu, ahu do Jahowa, paulihon muse angka huta naung maloha, manuani muse naung tarulang i: * Ahu Jahowa do na mandok i, huhut mambahensa.

36:37 Songon on do hata ni Tuhan Jahowa: Taringot tusi olo do ahu usousoan ni pinompar ni Israel laho mambahensa tu nasida: Patoroponku do nasida, asa * songon punguan birubiru angka jolma i.

36:38 Songon punguan ni angka na badia tahe, songon luhutan di Jerusalem uju marari raya, suang songon i huta angka na tarulang i gok punguan jolma sogot, asa tung ditanda nasida ahu do Jahowa!

Hesekiel 37

37:1 Dung i songgop ma tu ahu * tangan ni Jahowa, jala ditogihon ahu haruar marhitehite Tondi ni Jahowa, jala dipaulon ahu di tongatonga ni rura, na gok holiholi ni jolma na mate.

37:2 Dung i ditogihon ibana ahu mamolus sian lambungnasida tuk humaliang, gabe ida ma, godang situtu marrarahan di atas sisik ni rura i, jala ida ma, masak situtu do luhutna i.

37:3 Jadi ninna ibana ma tu ahu: Ale anak ni jolma! Atehe tagamon tarpangolu dope angka holiholion? Gabe ningku ma: Ale Tuhan Jahowa, ho do umbotosa!

37:4 Jadi ninna ibana ma tu ahu: Manurirangi ma ho taringot tu angka holiholion, jala dohononmu ma tu nasida: Ale holiholi angka na masak i, tangihon hamu ma hata ni Jahowa!

37:5 Songon on do hata ni Tuhan Jahowa tu angka holiholion: Ida ma, ahu mangalehon * tondi tu bagasan hamu, asa mangolu hamu.

37:6 Jala ahu mangalehon tu atas hamu angka uraturat dohot patubuhon sibuk di atas hamu, jala ahu mambahen hamu marhulingkuling huhut mangalehon tondi tu bagasan hamu, asa mangolu hamu, asa tung ditanda hamu, ahu do Jahowa!

37:7 Jadi * manurirangi ma ahu songon naung tinonahon i tu ahu, jadi di na manurirangi i ahu ro ma sada soara, jala ida ma, masa soara na marngongos, gabe masitopotan angka holiholi ganup tu donganna.

37:8 Dung i hubereng ma, gabe ida ma, nunga maruraturat nasida, jala tubu sibuk, jala leap hulingkuling di atasnasida, alai ndang adong dope anggo tondi di bagasan nasida.

37:9 Dung i ninna ibana ma tu ahu: Manurirangi ma ho tu tondi i, manurirangi ma ho tutu ale anak ni jolma, jala dohononmu ma tu tondi i; songon on do hata ni Tuhan Jahowa: Ro ma ho ale tondi sian desa na opat i jala mangullus ma ho tu bagasan halak na binunu on, asa mangolu nasida!

37:10 Jadi manurirangi ma ahu, songon na tinonahonna i ahu, gabe ro ma tondi i tu bagasan nasida, jala mangolu nasida, laos diojakkon patnasida i, parduaan parangan apala na bolon sahali do i.

37:11 Dung i ninna ibana muse tu ahu: Ale anak ni jolma, angka holiholion sandok pinompar ni Israel do i; ida ma, angka nasida mandok: Nunga tung masak holiholinami, jala pesan aroparop ni rohanami, naung pidom do hami.

37:12 Dibahen i, manurirangi ma ho, jala dok ma tu nasida: Songon on do hata ni Tuhan Jahowa: Ida ma, ahu mangungkap tanomanmuna, jala ahu mamboan hamu nangkok sian tanomanmuna, hamu ale bangsongki jala ahu manogihon hamu mulak tu tano Israel!

37:13 Jadi tandaonmuna ma, ahu do Jahowa, ia dung huungkap tanomanmuna, jala huboan hamu nangkok ale bangsongki sian tanomanmuna.

37:14 Ahu huhut mangalehon Tondingku tu bagasan hamu, asa mangolu hamu, jala ahu mambahen hamu marhasonangan di tanomuna, asa tung ditanda hamu, ahu do Jahowa na mandok i, huhut mambahensa, ninna Tuhan Jahowa!

37:15 Dung i ro muse hata ni Jahowa tu ahu songon on:

37:16 Ia ho, ale anak ni jolma, buat ma di ho sada hau, jala surathon tusi: Di Juda dohot di angka anak ni Israel, angka donganna i! Dung i buat muse sada hau na asing, jala surathon tusi: Di si Josep, hau ni Epraim ro di sandok pinompar ni Israel, angka donganna i!

37:17 Jala pajonok be nasida, na sada tu donganna, bahen sada hau di ho, asa tung gabe sada nasida di bagasan tanganmu.

37:18 Dung i molo didok angka anak ni bangsom tu ho songon on: Atehe, ndang olo ho paboahon tu hami manang dia lapatan ni angka na tinonahonmu?

37:19 Jadi dohononmu ma tu nasida: Songon on do hata ni Tuhan Jahowa: Ida ma, ahu mambuat hau ni si Josep, na di bagasan tangan ni si Epraim dohot angka marga ni Israel, angka donganna i, jala ahu padomuhon nasida tu ibana, i ma hau ni Juda, jala ahu mambahen nasida gabe sada hau, asa tung sada nasida di bagasan tanganku.

37:20 Asa hau angka naung sinuratanmu, ingkon tioponmu do i di bagasan tanganmu di adopannasida.

37:21 Jala dohononmu ma tu nasida: Songon on do hata ni Tuhan Jahowa: Ida ma, * ahu mambuat angka anak ni Israel sian tongatonga ni bangso parbegu, angka naung tinopotnasida i, jala ahu papunguhon nasida sian na humaliang, jala ahu mamboan nasida mulak tu tanonasida.

37:22 Jala bahenonku nasida gabe * sisada bangso di tano i, di atas ni angka dolok Israel, jala sada sambing raja di nasida luhut, jala ndang be sidua bangso nasida, jala ndang be sidua harajaon nasida dibagi.

37:23 Jala ndang be ramunannasida dirinasida marhitehite ganaganaannasida, manang marhitehite hasogiron, angka na niulanasida i, manang marhitehite saluhut pangalaosionnasida i. Jala ahu paluahon nasida sian saluhut inganan angka pardosaannasida na sai loan, asa huurasi nasida, * gabe bangsongku nasida, jala ahu Debatanasida.

37:24 Jala naposongku * si Daud gabe raja gumomgom nasida, gabe sasadasa siparmahan di nasida luhut, jadi * marparange ma nasida di bagasan angka uhumhu, jala radotannasida ma angka patikku huhut ulahononna.

37:25 Jadi maringan nasida muse di tano, naung hubasabasahon tu naposongku si Jakkob, tano naung niinganan ni angka ompumuna, asa maringan nasida disi, nang angka anaknasida, nang angka pahompunasida ro di salelenglelengna, jala si Daud naposongki induknasida ro di salelenglelengna.

37:26 Bahenonku do huhut tu nasida sada * padan pardamean, padan salelenglelengna ma i tu nasida, jala ahu mardenggan basa tu nasida huhut patamba nasida, jala paojahonku do habadiaonki di tongatonganasida ro di salelenglelengna.

37:27 Jala ingananku sandiri di atas nasida, jala ahu gabe Debatanasida; jala nasida gabe bangsongku.

37:28 Asa tung ditanda angka * bangso parbegu, ahu do Jahowa, na pabadiahon Israel, ia dung di tongatonganasida habadiaonku ro di salelenglelengna.

Hesekiel 38

38:1 Dung i ro muse hata ni Jahowa tu ahu songon on:

38:2 Ale anak ni jolma, tujuhon ma bohim dompak * Gog di tano Magog, induk sian Ros, * Mesek dohot Tubal, jala manurirangi ma ho dompak ibana;

38:3 Jala dohononmu ma: Songon on do hata ni Tuhan Jahowa: Ida ma, magira ma ahu ro marlulu dompak ho ale Gog, induk sian Ros, Mesek dohot Tubal!

38:4 Jala paundaronku ma ho, jala bahenonku do * angka haithait tu bagasan osangosangmu, jala togihononku ho borhat rap dohot sandok paranganmu, angka hoda dohot jolma parsihundul, angka na simpan be marparhohas luhutna, sada luhutan apala na bolon, angka sitiop lombulombu na balga dohot na metmet, jala marpodang nasida luhut.

38:5 Halak Persia, Kus dohot Pud dongannasida, luhut nasida marlombulombu be jala martahuluk.

38:6 Tole Gomer dohot sandok parduaan ni paranganna, tole pinompar ni * Togarma angka na sian ujung ni utara sahali ro di sandok parduaan, ni paranganna, torop angka bangso donganmu!

38:7 Marhobas ma ho, jala padiri hian ho ro di sandok luhutanmu, angka na marluhut tu ho, jala ho ma gabe partoginasida.

38:8 Di laonlaon ni ari muse ingkon masa partubolan tu ho, di ujung ni angka taon sogot tahe sahat ho tu sada luat na malua sian podang pangisina i, angka na pinapungu sian torop angka bangso tu atas ni angka dolok Israel, angka naung leleng tarulang, gabe pinaruar do nasida sian angka bangso, laos marsonangsonang maringan nasida luhut.

38:9 Jala nangkok do ho, songon haroro ni ari, songon ombun do ho ro manghungkupi tano i, ho dohot sude parduaan ni paranganmu, jala torop bangso hinaram.

38:10 Songon on do hata ni Tuhan Jahowa: Di ari na sasada i padeakdeahonmu do tubutubu ni roham, jala na roa do sangkap ni roham.

38:11 Jala dohononmu ma: Borhat ma ahu nangkok sumola sada luat na manaletes mangarampok halak angka na nalom, jala na marsonangsonang maringan, saluhut nasida maringan di adaran, * so marparik manang marransangransang, pintu harbangan pe ndang adong di nasida.

38:12 Laho martabuni dohot mamupusi, laho mambahen tanganmu tu turanggong angka naung niinganan muse dohot tu sada bangso naung pinapungu muse sian angka bangso parbegu, naung umpungka pinahan jala marpangomoan, angka na maringan * di pogu ni tano.

38:13 Ro muse hata ni Saba dohot Dedan dohot angka parboniaga sian Tarsis rap dohot sude singana na bajar mandok tu ho: Atehe na ro martaban do ho? Naeng mamupusi do ho, umbahen dipaluhut ho luhutanmi? Naeng mangalaum perak dohot sere? Naeng mambuat pinahan dohot pangomoan laho martaban godang barangbarang?

38:14 Dibahen i, manurirangi ma ho, ale anak ni jolma, jala dohononmu ma tu Gog: Songon on do hata ni Tuhan Jahowa: Nda apala di ari na sasada i ma botoonmu na marsonangsonang i bangsongku Israel maringan?

38:15 Hape ro dope ho sian ingananmu, sian ujung ni utara sahali, ho jala torop bangso hinaram, angka na marsihundul di hoda nasida luhut, sada luhutan apala na bolon, parangan apala na torop sahali.

38:16 Jala nangkok do ho dompak bangsongku Israel, songon ombun laho manutup tano i; apala di ujung ni angka ari ma i masa, jala ahu parohon ho dompak tanongku, asa tung ditanda angka bangso parbegu i ahu, molo huparbadiai diringku marhite sian ho, ale Gog di adopan ni matanasida.

38:17 Songon on do hata ni Tuhan Jahowa: Ho do i naung hulumbahon hian di angka ari na robi marhitehite angka naposongku, angka panurirang ni Israel, angka na manurirangi di angka ari uju i pola martaontaon, paboa ahu naeng parohon ho marlulu dompak nasida.

38:18 Di ari na sasada i, di ari haroro ni Gog tahe sumola tano Israel, ninna Tuhan Jahowa, martimpul ma rimashu di bagasan igungku.

38:19 Jala di bagasan piripiringku, di bagasan api ni rimashu, ahu mandok hian: Ingkon di ari na sasada i masa lalo godang di tano Israel.

38:20 Jadi raion be maradophon ahu angka dengke di bagasan laut dohot pidong na martongatonga langit dohot binatang di harangan, ro di sandok na manggulmit di atas tano i, nang saluhut jolma angka na di sisik ni tano on, jala maloha angka dolok jala marumpahan angka buntulbuntul batu, jala angka tompas tu tano saluhut parik.

38:21 Huhut ahu umpanggil podang marlulu dompak ibana sian saluhut angka dolokku, ninna Tuhan Jahowa, asa masirasipan nasida sama nasida dohot podang.

38:22 Jala uhumonku ibana marhitehite begu antuk dohot durusdurus di mudar, tole * udan tipotipo na mangalantap dohot angka batu ambolas, dabuonku ma tahe udan api dohot barerang tu ibana dohot tu angka parduaan ni paranganna dohot tu torop bangso, angka na hinarana i.

38:23 Asa hupatimbul jala huparbadiai diringku, jala hupabotohon ahu di adopan ni torop bangso parbegu, asa tung * ditanda nasida, ahu do Jahowa.

Hesekiel 39

39:1 Ia ho ale anak ni jolma, manurirangi ma ho dompak * Gog jala dohononmu ma: Songon on do hata ni Tuhan Jahowa: Ida ma, na ro ma ahu marlulu dompak ho ale Gog, induk sian Ros, Mesek dohot Tubal!

39:2 Jala ahu paundarhon ho jala ahu mangela ho dohot panangkokkon ho sian ujung ni utara sahali, huhut parohon ho tu atas ni angka dolok Israel.

39:3 Jala ahu mameuthon siormu sian tanganmu hambirang ahu huhut mameuthon angka sumbiami sian tanganmu siamun.

39:4 Ingkon di atas ni angka dolok Israel ho marragean rap dohot sude parduaan ni paranganmu, ro di bangso angka na hinaram; * tu angka pidong panoro, parhabong na marragamragam dohot tu binatang di harangan lehononku ho sohalanna.

39:5 Ingkon di atas sisik ni ladang i ho marragean, ai ahu mangalumbahon songon i hian, ninna Tuhan Jahowa.

39:6 Jala ahu manongoshon sada api tu bagasan Magog dohot tu tongatonga ni halak na maringan marsonangsonang di angka pulo, asa tung ditanda nasida, ahu do Jahowa.

39:7 Jala ahu pabotohon goarhu na badia i di tongatonga ni bangsongku Israel, jala ndang be marlea bahenonku goarhu na badia i, asa tung ditanda angka bangso parbegu, ahu do Jahowa, na badia di tongatonga ni Israel!

39:8 Ida ma, nunga ro, jala nunga masa, ninna Tuhan Jahowa! I ma ari naung hulumbahon hian.

39:9 Dung i ruar ma halak isi ni angka huta di Israel, jala tutungonna jala * purunanna angka parhohas, tole lombulombu na metmet dohot na balga, tole sior dohot angka sumbia, tole ompongompong dohot hujur, jala suda purunanna dohot api pola pitu taon lelengna.

39:10 Asa ndang pola be alaponnasida soban sian harangan, jala ndang be tabaonnasida hau sian tombak, ai purunannasida do angka parhohas dohot api, jala tabanonnasida do halak na martaban nasida, jala pupusanna halak na mamupusi nasida na jolo, ninna Tuhan Jahowa.

39:11 Dung i di ari na sasada i, lehononku ma tu Gog sada inganan bahen parbandaanna di Israel, i ma rura ni halak pamolus tungkan habinsaran ni laut, jala pola polpolonna halak pamolus, jala tanomonnasida disi Gog ro di sandok paranganna, goaronnasida do i: "Rura hariburan ni Gog".

39:12 Dung i tanomon ni pinompar ni Israel ma nasida, asa mangurasi tano i, pola pitu bulan lelengna.

39:13 Tung sandok bangso ni tano i mananom nasida, pola dapotan barita nasida disi, di ari uju marmulia hubahen diringku, ninna Tuhan Jahowa.

39:14 Pola papulihonnasida baoa angka na mangaliati tano i, angka na mananom rap dohot halak pamolus i jolma angka na teba di sisik ni tano i, asa mangurasi tano i; dung salpu na pitu bulan i mandiori ma nasida.

39:15 Jadi mangaliati tano i ma halak pamolus i, gabe diida ma holiholi ni jolma, laos dipatindang di lambungna sada partinandaan, paima ditanom halak pananom i ibana tu rura hariburan ni Gog.

39:16 Nang goar ni sada huta laos Hariburan do, asa tung diurasi nasida tano i.

39:17 Ia ho ale anak ni jolma, songon on do hata ni Tuhan Jahowa: Dok ma tu angka pidong parhabong marragamragam, dohot tu sandok binatang di harangan: * Marluhut ma hamu jala ro! Tung marpungu ma hamu sian na humaliang mangarongom peleanki sipotongon, na hupotongi di hamu, pelean sipotongon na balga sahali do i di atas ni angka dolok Israel, jala sohali hamu sibukna, jala sopsop hamu mudarna.

39:18 Ingkon suda sibuk ni angka ulubalang panganonmuna, jala mudar ni angka induk ni tano on sopsoponmuna, angka birubiru tunggal, angka anak ni birubiru, angka hambing tunggal dohot lombu, pinahan pamuean sian Basan do nasida luhut!

39:19 Ingkon panganonmuna tabotabo maradu bosur, jala inumonmuna mudar maradu mabuk sian peleanku sipotongon, naung hupotongi di hamu.

39:20 Jadi bosur ma hamu mangan sian mejangku hoda dohot hureta, ulubalang dohot halak parmusu marragamragam, ninna Tuhan Jahowa.

39:21 Jadi marbarita ma hamuliaonku bahenonku di tongatonga ni angka bangso parbegu, asa luhut angka bangso parbegu marnida uhumhu na hubahen i dohot tanganku, na huampehon tu nasida.

39:22 Asa tung ditanda pinompar ni Israel, ahu do Jahowa, Debatanasida i, olat ni sadarina i dohot tu jolo.

39:23 Tandaon ni angka bangso parbegu luhut binahen ni hajahatonnasida do hape umbahen na tarbuang pinompar ni Israel, ala mangose nasida maradophon ahu, gabe * hutabunihon bohingku maradophon nasida, jala hupasahat nasida tu bagasan tangan ni angka musunasida, jala marragean nasida luhut marhitehite podang.

39:24 Hombar tu haramunonnasida dohot tu pangalaosionnasida tahe hubahen tu nasida, jala hutabunihon bohingku maradophon nasida.

39:25 Dibahen i, songon on do hata ni Tuhan Jahowa: Ianggo nuaeng mulak ma togihononku angka na tarbuang sian Jakkob, jala marpangulahi rohangku di sandok pinompar ni Israel, jala piripirion ahu humongkop goarhu na badia i.

39:26 Ia dung diusung nasida haurahonnasida i dohot sandok pangoseoseonnasida, na mangosei nasida dompak ahu, dung marsonangsonang nasida maringan di tanonasida i, jala ndang adong panonggoti nanggo sahalak.

39:27 Ia dung mulak nasida huboan sian angka bangso, jala hupapungu nasida sian angka luat ni musunasida i, jala ahu pabadiahon diringku marhite sian nasida di adopan ni torop bangso parbegu.

39:28 Jadi tandaonnasida ma, ahu do Jahowa, Debatanasida i, nang uju na hubuangkon nasida tu angka bangso parbegu, jala hupapungu nasida muse mulak tu tanonasida i, nanggo sahalak sian nasida tahe ndang tading disi hubahen.

39:29 Jadi ndang be tabunihononku bohingku maradophon nasida, ia dung * huusehon tondingku tu pinompar ni Israel, ninna Tuhan Jahowa!

Hesekiel 40

40:1 Paduapululimataonhon dung tarbuang hami, di mula ni taon i, di ari sampulu ni bulan i, i ma pasampuluopattaonhon dung na tartaban huta i, apala di ari na sasada i songgop ma tu ahu tangan ni Jahowa, laos diboan ahu tusi.

40:2 Di bagasan angka pangungkapon ni Debata tahe diboan ibana ahu tu tano Israel, jala dipaulon ahu tu atas ni sada dolok na timbo situtu, jala di atasna tarhinsat do songon sada huta na pinauli sambola tungkan dangsina.

40:3 Tusi ma ahu diboan ibana, gabe ida ma, adong disi sada baoa, rupana * songon rupa ni tombaga, jala tali hori sada di bagasan tanganna dohot * tolong pangungkur, jala jongjong do ibana di bagasan pintu harbangan.

40:4 Dung i ro ma hata ni baoa i tu ahu: Ale anak ni jolma, * ida ma marhitehite matam, jala tangihon ma marhitehite pinggolmu, jala parateatehon ma saluhut na naeng pataridahononku tu ho, ai ala naeng pataridahononhon tu ho umbahen tarboan ho tuson; baritahon ma saluhut na niidam tu pinompar ni Israel.

40:5 Jadi ida ma, adong sada parik sian ruar ni joro i tuk humaliang, jala di bagasan tangan ni baoa i do tolong pangungkur i, onom asta ganjangna, ganup saasta santopap, gabe disuhati ibana ma bohang ni parik ni joro i sada tolong pangungkur, timbona pe laos sada ungkuran do.

40:6 Dung i ditopot ibana ma pintu harbangan i na tungkan habinsaran, jala dipanaek angka tanggana, jala diungkur lobulobu ni pintu harbangan i satolong pangungkur bidangna be, di ginjang dohot di toru.

40:7 Jala ganup bilut parjagaan satolong pangungkur be unjurna dohot bohangna, jala holangholang ni angka bilut parjagaan i lima asta do, jala lobulobu ni pintu harbangan di lambung panisioan ni harbangan i niudut ro sian joro i satolong pangungkur do.

40:8 Dung i disuhati ma panisioan ni harbangan i niudut ro sian joro i satolong pangungkur do.

40:9 Disuhati muse dohot panisioan ni harbangan i ualu asta jala partungkoanna dua asta be, jala panisioan ni harbangan i niudut ro sian joro i.

40:10 Jala tolu do angka bilut parjagaan ni panisioan i tungkan habinsaran angkup be, sisada ungkur do tolunsa; sisada ungkur huhut angka partungkoan i angkup be.

40:11 Dung i disuhati ma ruak ni pintu harbangan i sampulu asta, jala timbo ni harbangan i sampulu tolu asta.

40:12 Jala dalan di jolo ni angka bilut saasta do angkupangkup be, jala angka bilut parjagaan i onom asta do angkupangkup be.

40:13 Disuhati muse harbangan i sian tarup ni bilut parjagaan na sada sahat tu tarup ni bilut na asing, duapulu lima asta ruakna, patondong be angka pintu i.

40:14 Dibahen do huhut angka partungkoan onompulu asta ganjangna, jala hombarhon partungkoan i do alaman ni harbangan i tuk humaliang.

40:15 Jala di jolo ni harbangan haroroan sahat rodi jolo ni panisioan ni harbangan parbagasan limapulu asta do.

40:16 Jala * marpandiloan na sompit do angka bilut parjagaan i, lohot di tiangna tungkan bagasan hombarhon harbangan i tuk humaliang, suang songon i di angka dorpi parholangan adong huhut angka pandiloan tuk humaliang tungkan bagasan, na niuhir do huhut tu tiang i gorgagorga ni hau harambir.

40:17 Dung i diboan ibana ma ahu tu alaman apala parduru, gabe ida ma, adong disi angka bilut dohot pantar batu, na binahen di alaman i tuk humaliang, tolupulu angka bilut i di atas ni pantar batu manangkas.

40:18 Jala pantar batu i di lambung ni angka harbangan mangihuthon unjur ni angka harbangan i, i ma pantar batu apala partoru.

40:19 Dung i disuhati muse ruakna sian jolo harbangan partoru i sahat ro di alaman parbagasan i, sian ruar saratus asta tungkan habinsaran dohot tungkan utara.

40:20 Alai anggo pintu harbangan na tungkan utara hombarhon alaman parduru i, unjurna dohot bohangna disuhati.

40:21 Tole bilutna parjagaan na tolu i angkupangkup be dohot partungkoanna ro di panisioanna, suang songon pangungkuron di harbangan parjolo i, limapulu asta unjurna jala duapulu lima asta bohangna.

40:22 Angka pandiloanna pe dohot panisioanna, partungkoanna ro di gorgagorgana harambir, suang songon pangungkuron di harbangan na tungkan habinsaran, jala pitu do anak ni tanggana laho tu ginjang, jala panisioanna di jolona.

40:23 Jala pintu harbangan ni alaman parbagasan tondong ni pintu harbangan tungkan utara dohot tungkan habinsaran, gabe manuhati ibana sian harbangan na sada sahat tu harbangan na sadanari saratus asta do.

40:24 Dung i ditogihon ibana ma ahu tu dalan tungkan dangsina, gabe ida ma, adong dope pintu harbangan sada tungkan dangsina, laos disuhati ibana ma angka tiangna dohot partungkoanna mangihuthon pangungkuron parjolo i.

40:25 Marpandiloan do nang i jala marpanisioan tuk humaliang mangihuthon angka pandiloan parjolo i, limapulu asta unjurna, jala duapulu lima asta bohangna.

40:26 Jala pitu anak ni tanggana laho tu ginjang, jala angka panisioanna di jolona, jala margorga harambir sada be sambariba di angka partungkoanna.

40:27 Adong do huhut pintu harbangan sada laho tu alaman parbagasan i tungkan dangsina, laos manuhati ibana sian harbangan na sada sahat tu harbangan na sadanari tungkan dangsina saratus asta.

40:28 Dung i ditogihon ibana muse ahu tu alaman parbagasan i mardalan sian harbangan pardangsina, jala disuhati harbangan pardangsina i mangihuthon ungkuran parjolo i.

40:29 Tole angka bilutna parjagaan, tole angka tiangna dohot angka partungkoanna mangihuthon ungkuran parjolo i. Adong do huhut disi angka pandiloan di panisioanna tuk humaliang, limapulu asta unjurna jala duapulu lima asta bohangna.

40:30 Jala angka panisioan tuk humaliang duapulu lima asta unjurna, jala lima asta bohangna.

40:31 Jala angka panisioanna hombarhon alaman parduru i, jala margorga harambir do angka tiangna, jala ualu anak ni tanggana laho tu ginjang.

40:32 Dung i ditogihon ibana muse ahu tu alaman parbagasan i tungkan habinsaran jala disuhati pintu harbangan i mangihuthon ungkuran parjolo i.

40:33 Tole angka bilutna parjagaan dohot angka tiangna dohot angka panisioanna mangihuthon ungkuran parjolo i. Marpandiloan huhut angka panisioanna tuk humaliang, limapulu asta unjurna jala duapulu lima asta bohangna.

40:34 Jala panisioanna hombarhon alaman parduru i, jala margorga harambir di angka partungkoanna angkupangkup be, jala ualu anak ni tanggana laho tu ginjang.

40:35 Dung i diboan ibana ahu tu pintu harbangan tungkan utara, laos disuhati mangihuthon ungkuran parjolo i.

40:36 Tole angka bilutna parjagaan ro di tiangna dohot angka panisioanna, jala marpandiloan do i tuk humaliang, limapulu asta unjurna jala duapulu lima asta bohangna.

40:37 Jala angka tiangna hombarhon alaman parduru i huhut margorga harambir di angka partungkoanna angkupangkup be, jala ualu anak ni tanggana laho tu ginjang.

40:38 Jala adong sada bilut ro di pintuna hombarhon angka tiang ni angka pintu harbangan i, disi do burionna sogot pelean situtungon.

40:39 Jala di panisioan ni pintu harbangan i adong dua meja angkupangkup be, disi do seaton sogot angka pelean situtungon dohot pardosaon dohot pelean parsalaan.

40:40 Dung i di na sambariba tungkan ruar laho nangkok tu pintu harbangan tungkan utara adong dua meja, jala di na sambariba nari hombarhon panisioan ni harbangan i adong muse dua meja.

40:41 Asa opat meja be di na sambariba hombarhon harbangan i, gabe ualu meja bahen paneatan ni pelean sogot.

40:42 Tole muse na opat meja di pelean situtungon sian batu na nidakdak do, tonga dua asta be unjurna dohot bidangna jala saasta timbona, tusi do peakkononhon sogot ulaula angka sipangkeon laho maneat pelean situtungon dohot pelean sipotongon.

40:43 Jala dua pasi, santopap be bidangna lohot di parik ni joro i tuk humaliang, jala di atas ni angka meja i do juhut pelean i.

40:44 Jala sian ruar hombarhon harbangan parbagasan i do angka bilut ni parende di alaman parbagasan i, sarinte hombarhon harbangan sambariba tungkan utara, adop dangsina do nasida, rinte na sadanari hombarhon harbangan sambariba tungkan habinsaran adop utara do nasida.

40:45 Dung i ro ma hatana tu ahu: Bilut on, na tungkan dangsina do di malim angka na mangaradoti ulaon di bagasan joro.

40:46 Ianggo bilut na tungkan utara di malim angka na mangaradoti ulaon di langgatan; i ma angka anak ni si Sadok angka na jumonok, sian halak Lepi, tu Jahowa, marhalado di ibana.

40:47 Dung i disuhati ibana ma alaman i: Saratus asta be unjurna dohot bohangna maropat suhi, jala * langgatan i sonson di jolo ni joro i.

40:48 Dung i diboan ibana ahu tu bagasan * emper ni joro i, jala disuhati tiang ni emper i lima asta be angkupangkup, jala bohang ni harbangan i tolu asta be angkupangkup.

40:49 Ianggo unjur ni emper i duapulu asta do, jala bohangna sampulu sada asta, jala martangga do laho tu ginjang, jala dua * tiang na bolon hombarhon angka tiang na asing, sada be di na sambariba.

Hesekiel 41

41:1 Dung i diboan ibana ma ahu tu joro i, laos disuhati ma angka tiang, onom asta be bidangna di na sambariba, mangihuthon bohang ni undungundung i.

41:2 Ia bohang ni pintu i sampulu asta do, jala lima asta be sambola di na sambariba, disuhati muse dohot unjur ni joro i opatpulu asta jala bohangna duapulu asta.

41:3 Dung i bongot ma ibana tu bagasan, laos disuhati ma tiang ni pintu i dua asta, ia pintu i onom asta jala bohang ni pintu i pitu asta do.

41:4 Dung i disuhati ibana ma unjurna duapulu asta, bohangna pe duapulu asta mangihuthon jolo ni joro i, jala didok ma tu ahu: * On ma bilut na songkal sahali.

41:5 Dung i disuhati ibana ma dorpi ni bagas i onom asta timbona jala bohang ni angka emper opat asta humaliang bagas i.

41:6 Ia angka bilut emper sai masijaloan do tolu lampis tolupulu hali be, jala sahat do angka tu dorpi ni joro i hombarhon angka bilut emper tuk humaliang, asa masirogangan, alai ndada hot anggo di bagasan dorpi ni joro i.

41:7 Jala lam tu ginjang lam tu lambasna do angka bilut emper humaliang, ai tarbahen do mardalan humaliang, joro i tu ginjang tung tuk humaliang joro i tu ginjang, dibahen i lumambas do joro i di ginjang gabe tarbahen manaek sian bilut partoru, boti tu partonga sahat tu parginjang.

41:8 Huida huhut di joro i na jukjuk tu ginjang tuk humaliang. Angka ojahan ni angka bilut emper gok do sada ungkuran, i ma onom asta sahat ro di sumban.

41:9 Ia bidang ni dorpi ni bilut emper tungkan ruar lima asta do jala na rumar pinasomba holangholang ni angka bilut emper na di joro i.

41:10 Tole bohang holangholang ni * angka bilut i duapulu asta do tuk humaliang joro i.

41:11 Jala pintu ni bilut emper i tondong ni na rumar pinasombu, sada pintu tungkan utara, jala sada pintu tungkan dangsina, jala bohang ni inganan na rumar pinasombu lima asta do tuk humaliang.

41:12 Ia bagas na tungkan inganan na pinapulik i di na sambariba tungkan laut, pitupulu asta do bohangna, jala parik ni bagas i lima asta bohangna tuk humaliang, jala unjurna siapulu asta do.

41:13 Disuhati ibana huhut joro i saratus asta unjurna ro di inganan na pinapulik i dohot bagas i dohot angka dorpina saratus asta do unjurna.

41:14 Jala bohang di jolo ni joro i ro di inganan na pinapulik i tungkan habinsaran saratus asta do.

41:15 Dung i disuhati ma unjur ni bagas i tungkan inganan na pinapulik i na di pudina ro di angka emper na angkupangkup be, saratus asta do ro di joro parbagasan i dohot angka panisioan ni alaman i.

41:16 Angka lobulobu dohot pandiloan angka na sompit i ro di angka emper humaliang di na tolu suhi tondong ni lobulobu i na nilampis dohot hau do i tuk humaliang, sian tano sahat ro di angka pandiloan, angka pandiloan pe tahe pola tarlampis do.

41:17 Tungkan ginjang ni pintu i jala sahat tu bagas parbagasan i boti tu ruar, boti mangoriori sandok dorpi tuk humaliang di bagasan dohot di ruar marungkur be do.

41:18 Jala nunga dijadihon hian angka kerubim dohot gorga harambir, sai sada harambir di holangholang ni dua kerubim, jala mardua bohi do kerubim i.

41:19 Bohi jolma tahe maradophon harambir sambariba on, jala bohi singa maradophon harambir sambariba i; tarjadi do songon i di sandok joro i tuk humaliang.

41:20 Olat ni tano sahat ro di atas ni pintu i do tarjadi angka kerubim dohot harambir, laos songon i di dorpi ni joro i.

41:21 Maropat suhi do angka tiang ni joro i jala adopan ni habadiaon i, sisada rupa do idaon.

41:22 Ia * langgatan hau tolu asta timbona, jala unjurna dua asta jala marsuhisuhi do ibana, jala unjurna dohot dorpina sian hau do; dung i ro ma hatana tu ahu: On ma meja na di adopan ni Jahowa.

41:23 Jala dua hinsuhinsu be di joro dohot di habadiaon i.

41:24 Jala dua hinsuhinsu di ganup pintu, dua hinsuhinsu na mordong humaliang, dua do di pintu na sada, laos dua hinsuhinsu di na sadanari.

41:25 Tarjadi do huhut di nasida, lohot di hinsuhinsu ni joro i angka kerubim dohot harambir, suang songon na tarjadi di angka dorpi, jala adong sada lobulobu hau tungkan emper i sian ruar.

41:26 Adong huhut pandiloan angka na sompit dohot harambir angkupangkup hombarhon lambung ni emper i dohot angka bilut emper ni bagas i ro di angka sumban.

Hesekiel 42

42:1 Dung i ditogihon ibana ahu tu alaman parduru i, dalan tungkan utara, jala diboan ahu tu bagasan angka bilut tondong ni inganan na pinapulik i, jala tondong ni bagas i tungkan utara.

42:2 Mangihuthon unjurna di jolo * saratus asta sahat ro di pintu tungkan utara, jala bohangna limapulu asta.

42:3 Tondong ni na * duapulu asta angka na masuk tu alaman parbagasan i, jala tondong ni * pantar batu na masuk tu alaman parduru i, adop be do emper tu emper tolu lampis.

42:4 Jala di jolo ni angka bilut adong sada dalan sampulu asta bidangna laho tu alaman parbagasan i, sisaasta be do dalan laho tu angka bilut, jala angka pintuna tungkan utara do.

42:5 Asa gumogot do angka bilut parginjang i, ai juruk do pangalaho ni angka emper mamuati sian angka bilut partoru dohot partonga di bagas i.

42:6 Ai tolu lampis do angka bilut i, jala ndang dos tiangna songon tiang ni angka alaman i, ala na binuatan do sian partoru dohot sian partonga mamungka sian patna.

42:7 Jala parik parholangan na tungkan ruar hombarhon angka bilut i, tondong ni alaman parduru i, gistang do di jolo ni angka bilut, limapulu asta unjurna.

42:8 Ai unjur ni angka bilut hombarhon alaman parduru i limapulu asta do; alai ida ma, anggo di jolo ni joro i saratus asta do.

42:9 Jala sian toru ni angka bilut i adong sada haroroan sian habinsaran, molo bongot iba tusi sian alaman parduru i.

42:10 Mangihuthon bohang ni parik parholangan ni alaman i tungkan habinsaran, di jolo ni inganan na pinapulik i, jala di jolo ni bagas i adong huhut angka bilut.

42:11 Di jolo ni angka i adong huhut sada dalan suman tu dalan ni bilut angka na tungkan utara, dos unjurna dohot bohangna, ro di sude dalan na laho ruar, mangihuthon rumangna dohot pintuna.

42:12 Suang songon i dohot hinsuhinsu ni angka bilut i, angka na tungkan dangsina, adong sada pintu di bona ni dalan, tondong ni parik na tigor i tungkan habinsaran laho bongot iba.

42:13 Dung i ninna ibana ma tu ahu: Angka bilut tungkan utara, angka bilut tungkan dangsina pe angka na di jolo ni inganan na pinapulik i, i ma angka bilut na badia, ingkon disi do * panganon ni malim, angka na jumonok tu Jahowa, pelean angka na badia sahali, disi huhut peakkononnasida pelean angka na badia sahali, angka pelean sipanganon, pelean pardosaon dohot pelean parsalaan, ai na badia do inganan i.

42:14 Ia dung masuk angka malim i, ndang jadi ruar nasida sian inganan na badia i laho tu alaman parduru i, ingkon jolo tanggalanna disi pangkeanna, angka na pinangkena marhalado, ai angka na badia do i, jala ulos angka na asing solukkononna, molo laho nasida mandapothon situan na torop i.

42:15 Jadi dung tolhas angka ungkuran ni joro i di bagasan, gabe ditogihon ibana ahu ruar mardalan sian harbangan na tungkan habinsaran, laos disuhati do i tuk humaliang.

42:16 Disuhati ma sambariba tungkan habinsaran marhitehite tolong ungkuran i, limaratus ungkuran i tuk humaliang.

42:17 Disuhati muse sambariba tungkan utara, suang limaratus ungkuran i tuk humaliang.

42:18 Disuhati muse sambariba tungkan dangsina, suang limaratus ungkuran i.

42:19 Marliat muse tu sambariba tungkan hasundutan disuhati suang muse limaratus ungkuran i.

42:20 Asa mangihuthon desa na opat i do joro i disuhati ibana; marparik do i tuk humaliang, unjurna limaratus ungkuran i, bohangna pe limaratus ungkuran laho mambahen parsirangan ni na badia sian na ramun.

Hesekiel 43

43:1 Dung i ditogihon ibana ahu tu harbangan i, i ma harbangan na tungkan habinsaran.

43:2 Jadi ida ma, ro do hamuliaon ni Debata ni Israel sian habinsaran, jala soarana songon parhasak ni aek magodang, jala marsinondang tano on binahen ni hamuliaonna.

43:3 Jala pangungkapon i suang songon pangungkapon na huida na jolo, * songon pangungkapon na huida uju na ro ahu laho mangago huta i, jala songon pangungkapon na huida uju * di topi ni batang aek Hebar, gabe manungkap ahu tu tano.

43:4 Dung i masuk ma * hamuliaon ni Jahowa tu bagasan joro i, mardalan sian * harbangan na tungkan habinsaran.

43:5 Dung i dihindat Tondi i ma ahu, laos diboan ahu tu alaman parbagasan i, gabe ida ma, * gok hamuliaon ni Jahowa do joro i.

43:6 Dung i hubege ro hata ni na sahalak tu ahu sian joro i, jala jongjong sada baoa di lambungku.

43:7 Jadi ninna ibana ma tu ahu: Ale anak ni jolma, * on do hajongjongan ni habangsangku, jala sidegedegean ni palak ni pathu, disi do ahu maringan di tongatonga ni halak Israel ro di salelenglelengna! Jala ndang be ramunan ni pinompar ni Israel goarhu na badia i, nang nasida, nang rajanasida marhitehite parmainanonnasida dohot marhitehite bangke ni angka rajanasida di hamamatenasida i.

43:8 Uju na binahennasida lobulobunasida hombarhon lobulobungku, jala tiang nasida di lambung ni tiangku, gabe dorpi sambing parholanganku sian nasida; asa diramuni nasida goarhu na badia i marhitehite hasogiron angka na niulahonnasida i, gabe suda nasida dipangan rimashu.

43:9 Ianggo nuaeng paholangonnasida ma parmainanonnasida i sian ahu ro di bangke ni angka rajanasida, asa maringan ahu di tongatonganasida ro di salelenglelengna.

43:10 On pe, ho ale anak ni jolma, patuduhon ma tu pinompar ni Israel joro on, * asa tung maila nasida ala ni hajahatonnasida i, ingkon suhatannasida ungkuran tiruan i.

43:11 Ia dung maila nasida ala saluhut na binahennasida i, pabotohononmu ma tu nasida rumang ni joro i dohot parpaulina angka dalanna laho ruar dohot laho masuk ro di sandok rumangna dohot angka patikna, angka panjadianna dohot angka patik ni uhumna, jala surathon di adopannasida, asa diramoti nasida sandok panjadianna dohot angka patikna laos diulahon nasida antong.

43:12 Jala on do aturan ni joro i: Di atas punsu ni dolok i do sandok parbolatanna tuk humaliang, i ma na songkal sahali. Ida ma, i ma aturan ni joro i.

43:13 Jala * ondo angka ungkuran ni langgatan marasta, sasaasta dohot santopap ganjangna. Ia patna saasta timbona jala saasta bohangna, jala bibirna di topina sanjongkal humaliang, i ma pat ni langgatan i.

43:14 Sian patna di tano i sahat ro di tanggana partoru dua asta do, jala bohangna saasta; jala sian tanggana na metmet i sahat ro di tanggana na balga, opat asta do, laos saasta do anggo bohangna.

43:15 Jala "dolok ni Debata" opat asta do; jala sian * "tataring ni Debata" tu ginjang * adong opat tanduk.

43:16 Ia "tataring ni Debata" sampulu dua asta be do unjurna dohot bohangna, maropat suhi mangihuthon lambungna na opat i.

43:17 Ia partanggana sampulu opat asta be do unjurna dohot bohangna, mangihuthon lambungna na opat i, jala bibirna humaliang ibana satonga asta timbona, jala patna saasta humaliang, jala tanggana tungkan habinsaran do.

43:18 Dung i ninna ibana muse tu ahu: Ale anak ni jolma, songon on do hata ni Tuhan Jahowa: On ma angka aturan taringot tu langgatan di ari panjadionna i sogot, ingkon pelehononhon di atasna angka pelean situtungon, jala pistikkononhon mudar i tusi.

43:19 Tu angka malim, halak Lepi, angka na sian pinompar ni * si Sadok, angka na jumonok tu ahu mangaradoti ulaonku, ninna Tuhan Jahowa, ingkon lehononmu do anak ni lombu sada bahen pelean pardosaon.

43:20 Jala ingkon buatonmu do sian mudarna, jala pistikkononmu do tu tandukna na opat i dohot tu na opat suhi ni partanggaon i dohot tu bibirna humaliang asa urasonmu do i jala mambahen pardenggananna.

43:21 Ingkon buatonmu huhut anak ni lombu pelean pardosaon i, asa tutungon ni halak di inganan ni joro naung pinatik hian, di balian ni inganan na badia i.

43:22 Tole paduaarihon ingkon pelehononmu ma hambing tunggal sada na so martihas bahen pelean pardosaon, asa diurasi nasida langgatan i, songon naung niurasanna i marhitehite anak ni lombu.

43:23 Ia dung tolhas pangurasionmi, pelehononmu ma anak ni lombu sada na so martihas dohot birubiru tunggal sada sian punguan i, na so martihas.

43:24 Jala ingkon pelehononmu duansa di adopan ni Jahowa jala pirpirhonon ni angka malim * sira tu atasna, asa pelehononna do i bahen pelean situtungon di Jahowa.

43:25 Ingkon pitu ari padodot hobasonmu hambing tunggal sada bahen pelean pardosaon gonop ari, angkup ni anak ni lombu sada dohot birubiru tunggal sada sian punguan i, angka na so martihas hobasonnasida.

43:26 Ingkon pitu ari padodot bahenonnasida pardengganan ni langgatan i jala urasanna, jala * gohanna tangan ni malim i.

43:27 Ia dung ditolhasi nasida angka ari i, tole paualuarihon dohot di pudi ni, ingkon hobason ni angka malim ma di atas ni langgatan i angka peleanmuna situtungon dohot angka peleanmuna hamauliateon, asa huhalomohon hamu, ninna Tuhan Jahowa.

Hesekiel 44

44:1 Dung i ditogihon ibana ahu mulak sian dalan laho tu pintu ruar ni inganan na badia i na tungkan habinsaran, hape hinsu do i nidapot.

44:2 Dung i ninna Jahowa ma tu ahu: Ingkon laos hinsu do anggo pintu on, ndang jadi ungkapon, sahalak pe ndang jadi masuk sian i * ala Jahowa, Debata ni Israel, naung masuk sian i; umbahen ingkon laos tarhinsu.

44:3 Taringot tu * induk i, induk do ibana tongon, umbahen ingkon hundul ibana di bagasanna laho manganhon roti di adopan ni Jahowa; ingkon mardalan sian panisioan ni harbangan i ibana laho bongot, laos sian dalan i muse ibana ruar.

44:4 Dung i diboan ibana ahu sian dalan tu harbangan na tungkan utara tu jolo ni joro i, gabe ida ma, * gok hamuliaon ni Jahowa do joro ni Jahowa huida, jadi manungkap ma ahu tu tano.

44:5 Dung i ninna Jahowa ma tu ahu: Ale anak ni jolma, parateatehon ma on jala ida marhitehite matam jala tangihon marhitehite pinggolmu saluhut sipaboaonku tu ho, taringot tu saluhut aturan ni joro ni Jahowa dohot taringot tu sandok patik ni uhumna, jala ingkon pampeonmu tu roham dalan laho bongot tu joro i ro di sude dalan laho ruar sian inganan na badia i!

44:6 Jala dohononmu ma tu pinompar ni Israel na tangkangi: Songon on do hata ni Tuhan Jahowa: Tung na torbang do hamu, ale pinompar ni Israel mangulahon luhut angka hasogiron marragamragam.

44:7 Tung ditogihon hamu do angka halak ruar, angka na so tarsunat rohana dohot dagingna, asa masuk tu ingananku na badia i laho paramunhon jorongki, di na pinelehonmuna rotingku, i ma tabotabo dohot mudar, tung diose nasida do padan na hubahen i marhite sian saluhut hasogiron angka na niulamuna i.

44:8 Jala ndang diradoti hamu ulaon ni habadiaonku, tung roharoha do dibahen hamu pabangkithon halak bahen siradoti ulaonku gantimuna di ingananku na badia i.

44:9 Songon on do hata ni Tuhan Jahowa: Sandok halak ruar angka na so tarsunat rohana dohot dagingna, ndang jadi masuk tu ingananku na badia i, sandok halak ruar tahe, angka na maisolat di tongatonga ni halak Israel.

44:10 Gari halak Lepi, angka na paholang dirina sian ahu, uju na lilu Israel, angka na lilu tumundalhon ahu mangihuthon tu angka ganaganaannasida, ingkon usungonna hajahatonnasida i:

44:11 Ingkon gabe parhalado nama nasida di ingananku badia i, gabe angka parjaga di lambung ni angka pintu ni joro i, gabe angka parhalado di bagasan joro i: Angka nasida do maneati sogot pelean situtungon dohot pelean sipotongon di situan na torop i, ingkon tindang nasida di adopannasida marhalado di nasida.

44:12 Ala na marhalado nasida na jolo di nasida di adopan ni angka ganaganaannasida, asa mambahen parbonsiran tu hajahaton di pinompar ni Israel, ala ni do hupatoltol tanganku dompak nasida, ninna Tuhan Jahowa, ingkon manginona tu nasida hajahatonnasida i:

44:13 Ndang jadi be nasida jumonok tu ahu mangaradoti tohonan malim di ahu, manang jumonok pe tu sandok habadiaonku, manang tu na songkal sahali, ingkon usungonnasida haurahonnasida i dohot hasogiron, angka na niulanasida i.

44:14 Jadi hubahen nasida angka siradoti parjagaon di joro i mangaradoti sandok ulaonna ro di sude sibahenon disi.

44:15 Alai anggo angka malim, halak Lepi, angka anak ni * si Sadok, angka na tongtong mangaradoti ulaon ni habadiaonku, uju na lilu halak Israel sian ahu, ianggo nasida ingkon jumonok tu ahu marhalado di ahu, ingkon tindang nasida di jolongku laho umpelehon tu ahu tabotabo dohot mudar, ninna Tuhan Jahowa!

44:16 Ingkon nasida bongot tu habadiaonku, jala nasida jumonok tu mejangku marhalado di jolongku, jala mangaradoti ulaonku.

44:17 Molo naeng bongotannasida angka pintu ni alaman parbagasan i, ingkon solukkononnasida * pangkean hori, ndang jadi alit tu nasida pangkean sian imput ni birubiru saleleng marhalado nasida di bagasan angka pintu ni alaman parbagasan i manang di bagasan joro i.

44:18 Ingkon martalitali hori nang ulunasida, jala saraoal hori di gontingnasida, ndang jadi marhohosnasida, pola hodokan dibahen.

44:19 Ia laho ruar nasida tu alaman parduru, tu alaman parduru sahali mandapothon halak situan na torop tahe, * ingkon tanggalannasida pangkeannasida, angka na pinangkena marhalado, jala pajoponna do i di bagasan angka bilut ni habadiaon i, jala solukkononna muse angka ulos hian, asa unang diparbadiai nasida situan na torop i marhitehite pangkeannasida i.

44:20 Ulunasida pe ndang jadi nabunganna manang pasombuonna obukna ganjang, asal simburanna do obuk ni ulunasida i.

44:21 Nasa malim, ndang jadi minum anggur laho bongot nasida tu alaman parbagasan i.

44:22 Ndang jadi buatonna * parompuan na mabalu manang na binolongkon bahen jolmanasida, ingkon namarbaju do sian pinompar ni bangso Israel, manang parompuan naung mangkabaluhon malim buatonna.

44:23 Ingkon podaannasida huhut bangsongku, asa diboto nasida parsirang ni na badia martimbangkon na ursam dohot * parsirang ni na ramun martimbangkon na pansing.

44:24 Molo * tubu parsalisian, ingkon tindang nasida laho manguhum, hombar tu angka uhumhu uhumonna; jala patik ni uhumhu dohot patikpatikku, ingkon radotannasida do di saluhut ari rayangku, jala angka ari Sabbathu parbadiaannasida.

44:25 Bangke ni jolma na mate pe ndang jadi tingkironnasida paramunhon dirina, dungkon ni ama manang ina, manang anak, manang boru, manang hahaanggi, manang iboto na so dung marharajaan, itenang diramuni nasida disi.

44:26 Ia dung muse diuras dirina ingkon jujuron dope pitu ari tu ibana.

44:27 Dung i di ari habobongotna muse tu habadiaon i, tu alaman parbagasan i, laho marhalado di bagasan habadiaon i, ingkon pelehononna pelean pardosaonna i, ninna Tuhan Jahowa!

44:28 Ingkon adong huhut partalian di nasida, ahu do tahe partaliannasida, asa ndang jadi lehononmuna partohapan tu nasida di tongatonga ni Israel, * ahu do tahe partohapannasida i.

44:29 Alai anggo pelean sipanganon dohot pelean pardosaon dohot pelean parsalaan, ingkon nasida do manganhon i, jala sandok na niontongkon di tongatonga ni Israel, nasida do nampunasa.

44:30 Angkup ni patumonaan ni sandok parjolo tubu, ro di sude pelean tatingan sian saluhut peleanmuna i, ingkon angka malim nampunasa, nang patumonaan ni na niudimuna, ingkon lehononmuna do tu malim, asa mian pasupasu di atas ni bagasmu.

44:31 Alai * nasa bangke manang juhut soroan binahen ni pidong manang binatang ndang jadi panganon ni angka malim.

Hesekiel 45

45:1 Dung i molo disagi hamu tano i marpartalian, ingkon papulihonmuna do pelean tatingan sada di Jahowa, sapartalian tano na badia, unjurna duapulu lima ribu asta, jala bohangna sampulu ribu asta, habadiaon do i di sandok parbolatanna humaliang.

45:2 Ingkon masuk sian i tu inganan na badia i limaratus asta be unjurna dohot bolangna maropatsuhi tuk humaliang; angkup ni ingkon limapulu asta alamanna di ruar tuk humaliang.

45:3 Jala mangihuthon ungkuran i suhatanmu muse duapulu lima ribu asta jala bohangna sampulu ribu asta, ingkon di parsitongaanna do inganan na badia i, i ma inganan na songkal sahali.

45:4 I ma apala habadiaon di tano i, ingkon i ma partalian ni angka malim, angka na marhalado di bagasan inganan na badia i, angka na jumonok marhalado di Jahowa, i ma bahen hajongjongan ni angka bagas di nasida; jala tano na badia do humaliang inganan na badia i.

45:5 Jala duapulu lima ribu asta unjur jala sampulu ribu asta bohang, ingkon lehonon tu halak Lepi angka parhalado di bagasan joro i bahen partalian di nasida, duapulu bilut.

45:6 Jala partalian ni huta ingkon lehononmuna do lima ribu asta bohangna jala duapulu lima ribu asta unjurna patampaktampak dohot pelean tatingan na badia i: I ma di sandok pinompar ni Israel.

45:7 Ianggo tu * induk i: Sian baribaon dohot sian bariba i ni pelean tatingan na badia i dohot sian partalian ni huta i di jolo ni pelean tatingan na badia i dohot di jolo ni partalian ni huta i tungkan hasundutan dohot tungkan habinsaran, jala unjurna patampaktampak sada sian angka partalian sian partalpahanna hasundutan sahat ro di partalpahan habinsaran.

45:8 Ingkon gabe tanona sandiri do i bahen partalian di tongatonga ni Israel, asa unang be rupaon ni angka indukhu bangsongki, ingkon lehononnasida do tano i tu pinompar ni Israel mangihuthon margana be.

45:9 Songon on do hata ni Tuhan Jahowa: Tung na torbang do hamu, ale angka induk ni Israel! Paholang hamu ma pangarupaon dohot hamagoan, jala ulahon hamu ma uhum dohot hatigoran! Pasohot hamu ma panosakmuna mangonjaronjar bangsongku sian partalianna, ninna Tuhan Jahowa!

45:10 Ingkon masa di hamu * timbangan na sintong dohot ampang na sintong dohot poting na sintong.

45:11 Ianggo ampang dohot poting, ingkon dos tu tulukna, asa saparsampulu ni sada tuhukan do sada poting, jala saparsampulu tuhukan do sada ampang ingkon tuhukan do panuluhanna.

45:12 Alai anggo sada mas, ingkon duapulu ringgit do. Duapulu mas dohot duapulu lima mas dohot sampulu lima mas ingkon sada tail di hamu.

45:13 On do pelean tatingan siguguanmuna i: Saparonom ni sada ampang sian sada tuhukan dahanon, jala saparonom ni sada ampang sian sada tuhukan eme.

45:14 Ia aturan ni miak, ingkon marpoting do boanonna, sada poting, pasampuluhon sian sada pingkul, asa sampulu poting gabe sada tuhukan, ai sampulu poting do tongon sada tuhukan.

45:15 Jala sada anak ni birubiru sian duaratus birubiru sian tano ni Israel na tangkas di aek bahen pelean sipanganon, pelean situtungon dohot pelean hamauliateon, bahen pardengganan di nasida, ninna Tuhan Jahowa.

45:16 Ingkon sandok bangso ni tano i margugu tu pelean tatingan i di induk ni Israel.

45:17 Ingkon radotan ni induk i do antong angka pelean situtungon, pelean sipanganon dohot pelean siinumon di angka ari raya, di angka poltak ni bulan, di angka ari Sabbat pe ro di sandok ari raya bolon di pinompar ni Israel; ingkon ibana patupahon pelean pardosaon, pelean sipanganon, pelean situtungon dohot angka pelean hamauliateon bahen pardengganan di pinompar ni Israel.

45:18 Songon on do hata ni Tuhan Jahowa: Di artia di bulan sipaha sada ingkon buatonmu ma anak ni lombu sada na sa martihas, asa urasonmu inganan na badia i.

45:19 Jala ingkon buaton ni malim do deba sian mudar ni pelean pardosaon i, jala pistikkononna tu angka tiang ni joro i dohot tu na opat suhi ni langgatan na martagahambing dohot tu tiang ni pintu ni alaman parbagasan i.

45:20 Suang songon i ingkon bahenonmu papituarihon di bulan i * manguras baoa na lilu manang na tarpaoto mambahen pardengganan di joro i.

45:21 Pasampuluopatarihon di bulan sipaha sada, ingkon masa di hamu Paska, ari raya sipitu ari padodot, ingkon sagusagu na so niasoman panganon disi.

45:22 Ingkon patupaon ni induk i di ari na sasada i anak ni lombu sada bahen pelean pardosaon humongkop ibana sandiri dohot humongkop bangso ni tano i.

45:23 Di na pitu ari raya i pe ingkon patupaonna ganup ari bahen pelean situtungon di Jahowa pitu anak ni lombu dohot pitu birubiru tunggal, angka na so martihas, huhut sada hambing tunggal bahen pelean pardosaon ganup ari.

45:24 Ingkon patupaonna huhut bahen pelean sipanganon, sada ampang dongan ni anak ni lombu sada, jala sada ampang dongan ni birubiru tunggal sada, jala miak sada bale dongan ni ampang sada.

45:25 Pasampululimaarihon di bulan sipaha pitu ingkon patupaonna suang songon i di ari raya pitu ari padodot, songon i pelean pardosaon, tole pelean situtungon, tole muse pelean sipanganon, songon i nang miahi.

Hesekiel 46

46:1 Songon on do hata ni Tuhan Jahowa: Pintu ni alaman parbagasan i na tungkan habinsaran, ingkon hinsuon do na onom ari siulahononhon, alai anggo di ari Sabbat dohot di ari poltak ni bulan, ingkon ungkapon do.

46:2 Dung i ingkon bongot * induk i mardalan sian panisioan ni pintu ruar, jala tindang ibana di lambung tiang ni pintu i; dung i hobason ni angka malim ma peleanna situtungon dohot peleanna hamauliateon, marsinggang ma ianggo induk i di atas lobulobu ni pintu i, dung i ruar ibana muse alai ndang jadi hinsuon ianggo pintu i sahat ro di bodari.

46:3 Ingkon marsinggang ma nang bangso ni tano i di baba pintu i di angka ari Sabbat dohot di poltak ni bulan di adopan ni Jahowa.

46:4 Alai anggo pelean situtungon sipelehonon ni induk i tu Jahowa di ari Sabbat, onom do anak ni birubiru angka na so martihas dohot sada birubiru tunggal do so martihas.

46:5 Ia pelean sipanganon suda do sada ampang dongan ni sada birubiru tunggal, jala dongan ni angka anak ni birubiru bahen pelean sipanganon marguru tu pangalehon ni tanganna do, jala miak sada bale dongan ni sada ampang.

46:6 Jala di ari poltak ni bulan ingkon pelehononna: Anak ni lombu sada na so martihas dohot onom anak ni birubiru dohot sada birubiru tunggal, angka na so martihas.

46:7 Jala sada ampang dongan ni anak ni lombu, jala sada ampang dongan ni birubiru tunggal patupaonna bahen pelean sipanganon, jala dongan ni angka anak ni birubiru marguru tu na dapot tanganna, jala miak sada bale dongan ni sada ampang.

46:8 Dung i molo bongot induk i, ingkon ro ibana sian dalan ni panisioan ni pintu i, laos sian dalanna i muse ruar.

46:9 Alai molo ro bangso isi ni tano i tu jolo ni Jahowa di angka ari raya bolon, ia bongot ibana sian dalan ni pintu tungkan utara laho marsomba, ingkon ruar ibana sian dalan ni pintu tungkan dangsina; ia bongot ibana sian dalan ni pintu tungkan dangsina, ingkon ruar ibana sian dalan ni pintu tungkan utara; ndang jadi mulak ibana sian dalan ni pintu habongotanna i, ingkon tu jolona tulusonna laho ruar.

46:10 Nang induk i di tongatonganasida, ingkon rap bongot jala rap ruar nasida.

46:11 Jala di angka ari raya hian dohot di angka ari raya bolon, ingkon on do pelean sipanganon: * Sada ampang dongan ni anak ni lombu sada, jala sada ampang dongan ni birubiru tunggal sada; alai anggo dongan ni angka anak ni birubiru, guru pangalehon ni tanganna do, jala miak sada bale dongan ni sada ampang.

46:12 Alai molo naeng patupaon ni induk i pelean situtungon sian lomona, manang angka pelean hamauliateon tu Jahowa sian lomona, ingkon ungkapon di ibana pintu na tungkan habinsaran, asa dipatupa peleanna situtungon dohot angka peleanna hamauliateon, suang songon na binahenna di ari Sabbat; ia laho ruar ibana muse, ingkon hinsuon ni halak do pintu i dung ruar ibana.

46:13 Jala ingkon patupaonmu anak ni birubiru sada sisataon, na so martihas bahen pelean situtungon * ariari tu Jahowa; ganup sogot do i patupaonmu.

46:14 Ingkon patupaonmu huhut pelean sipanganon donganna ganup sogot saparonom ampang dohot miak sapartolu bale laho pabornok itak bahen pelean sipanganon tu Jahowa. I ma angka aturan na hot ro di salelenglelengna.

46:15 Ingkon songon i patupaonnasida anak ni birubiru dohot pelean sipanganon i dohot miahi ganup sogot ro di salelenglelengna.

46:16 Songon on do hata ni Tuhan Jahowa: Molo naeng mardenggan basa induk i tu sada sian angka anakna, tung pargolatanna hian do, ingkon saut di angka anakna, laos partohapannasida ma i bahen pargolatan.

46:17 Alai molo naeng mardenggan basa ibana sian pargolatanna tu naposona sada halak, jadi saut ma di ibana sahat ro di * taon haluaon, dung i mulak tu induk i, holan di angka anakna do tama pargolatanna.

46:18 Jala ndang jadi buaton ni induk i sian pargolatan ni bangso i pahabangkon nasida sian partohapannasida; ingkon sian partohapanna sandiri lehononna bahen pargolatan ni angka anakna, asa unang purpur sian partohapanna manang ise sian bangsongku.

46:19 Dung i diboan ibana ahu tu dalan haroroan na di lambung pintu laho tu bilut angka na badia, angka siadop utara, tu angka malim, gabe ida ma, adong disi sada inganan di na dua suhi sambariba tungkan hasundutan.

46:20 Dung i ninna ibana ma tu ahu: On ma inganan ni angka malim mangalompa disi pelean parsalaan, pelean pardosaon, laos disi masahannasida pelean sipanganon, asa unang ruar boanonna tu alaman parduru i pabadiahon situan na torop i.

46:21 Dung i diboan ibana ahu ruar tu alaman parduru i, jala dipabolushon ahu sian na opat suhi ni alaman i, gabe ida ma, adong di ganup suhi ni alaman i sada alaman na metmet;

46:22 Di na opat suhi ni alaman i adong angka alaman na metmet mardongan partimusan, opatpulu asta unjurna, jala tolupulu asta bohangna, sisada ungkuran do na opat suhi ni alaman i.

46:23 Jala parik na metmet tuk humaliang, humaliang na opat suhi i jala pinauli angka tataring di toru ni angka parik na metmet i humaliang.

46:24 Dung i ninna ibana ma tu ahu: On ma bagas ni angka pande sipanganon, asa disi dilompa angka parhalado ni joro i pelean sipotongon ni bangso i.

Hesekiel 47

47:1 Dung i ditogihon ibana ahu mulak tu pintu ni joro i, gabe ida ma, * ruar angka aek sian toru ni lobulobu ni joro i tungkan purba, ai siadop habinsaran do joro i; mabaor huhut angka aek i sian toru ni sambariba ni joro i tungkan siamun, tungkan dangsina ni langgatan i.

47:2 Dung i ditogihon ibana ahu ruar tu dalan ni pintu tungkan utara, jala diiringiring ahu di dalan ruar sahat tu pintu ruar na tungkan habinsaran, gabe ida ma, marbullakbullak angka aek i sian sambariba tungkan siamun.

47:3 Di na ruar baoa i tungkan habinsaran, jala * tali ungkuran sada di bagasan tanganna, gabe disuhati ma saribu asta, jala ditogihon ahu taripar aek i, gabe sahat aek i ro di mata ni ari ni tot.

47:4 Dung i disuhati ibana muse saribu asta, jala ditogihon ahu taripar aek i, gabe sahat ae i ro di ulu ni tot; manuhati muse ibana saribu asta, jala ditogihon ahu taripar, gabe sahat aek i ro di gonting.

47:5 Manuhati muse ibana saribu asta, gabe batang aek sada na so hatariparan ahu ala bagas ni angka aek i, ingkon langean nama aek i, batang aek na so hatariparan do i.

47:6 Dung i ninna ibana ma tu ahu: Nunga tung diida ho ale anak ni jolma? Dung i ditogihon ibana ahu mulak tu topi ni batang aek i.

47:7 Jadi dung mulak ahu, gabe ida ma, tungkan pasir ni batang aek i adong hau mansai godang angkupangkup be.

47:8 Dung i ninna ibana ma tu ahu: Angka aek on ruar do tu parbolatan tungkan habinsaran, jala mabaor tu adaran jala tolhas tu * laut, dung tolhas tu laut aek angka na ruar i, gabe angka aek mata do.

47:9 Gari saluhut hosa na mangolu, na manggulmit, sai mangolu do manang tudia pe hasahatan ni batang aek na dua i, mansai deak huhut dengke disi, ala tusi angka aek i, jala hisar huhut mangolu saluhut hasahatan ni batang aek i.

47:10 Dung i jongjong angka pardengke di lambungna, olat ni En-Gedi sahat ro di En Eglaim bahen paninaran ni angka jala do i; marragam disi angka dengkena, songon dengke ni laut godang, mansai deak.

47:11 Alai anggo ombikna dohot ambarna, ndang tarinum, tong do ansim.

47:12 Jala di topi ni batang aek i tubu do angkupangkup be ragamragam ni hau sipanganon, ndang olo malos bulungna, jala ndang montok parbuena, manjujur bulanna marpatumonaan, ai ruar sian inganan na badia i do angka aekna; jala parbuena tau sipanganon, jala bulungna tau ubat.

47:13 Songon on do hata ni Tuhan Jahowa: On do parbolatan ni tano sibagionmuna bahen partalian di na sampulu dua marga ni Israel: * Di Josep dua bagian.

47:14 Ingkon hamu do manean tano i, dos pe partalianmuna, nunga pola hupatoltol tanganku maruari, ingkon lehononku do i tu ompumuna, ingkon gabe pargolatanmuna do tano i.

47:15 Jala on do parbolatan ni tano i, di na sambariba tungkan utara sian laut godang mardalan sian Hetlon sahat tu Jedad:

47:16 Hamat, Berota, Sibraim, na di holangholang ni parbolatan sian Damaskus tu parbolatan sian Hamat, Hasor partonga na marbalokkon Hauran.

47:17 Ia parbolatan olat ni laut sahat ro di Hasor-Enon, parbolatan ni Damaskus, jala tungkan utara Hamat do parbolatan; i ma sambariba tungkan utara.

47:18 Ia sambariba tungkan purba, sian holangholang ni Hauran, boti tu Damaskus, boti tu Gilead, boti tu tano Israel sahat ro di Jordan. Ingkon sian parbolatan i sahat ro di laut tungkan habinsaran suhatanmuna; i ma sambariba tungkan purba.

47:19 Ia sambariba tungkan dangsina, olat ni Tamar sahat ro di aek Meriba-Kades partalian i, sahat ro di laut godang; i ma sambariba tungkan dangsina.

47:20 Ia sambariba tungkan pastima laut na godang i do, olat ni parbolatan sahat ro di tondong ni Hamat; i ma sambariba tungkan pastima.

47:21 Ingkon bagionmu do tano on di hamu mangihuthon angka marga ni Israel.

47:22 Ingkon marpintu hamu laho martali tano i di hamu dohot * di halak paisolat, angka na maisolat di tongatongamuna, angka naung tubuan anak di tongatongamuna; ingkon songon raja huta nasida di tongatonga ni halak Israel, ingkon marpintu nasida rap dohot hamu maruli partalian di tongatonga ni angka marga ni Israel.

47:23 Ia di tongatonga ni marga dia maisolat paisolat i, laos disi do lehononmuna partalianna, ninna Tuhan Jahowa!

Hesekiel 48

48:1 Jala on do goargoar ni angka marga: Sian partalpahan utara mardonokkon dalan sian * Hetlon sahat ro di Hamat, Hasor-Enon parbolatan ni Damaskus tungkan utara mardonokkon Hamat, sambariba tungkan purba sahat ro di laut, sapartalian di si Dan.

48:2 Jala marbalokkon Dan sian sambariba purba sahat ro di pastima sapartalian di Aser.

48:3 Jala marbalokkon Aser sian sambariba purba ro di pastima sapartalian di Naptali.

48:4 Jala marbalokkon Naptali sian sambariba purba sahat ro di pastima sapartalian di Manasse.

48:5 Jala marbalokkon di Manasse sian sambariba purba sahat ro di pastima sapartalian di Epraim.

48:6 Jala marbalokkon Epraim sian sambariba purba sahat ro di pastima sapartalian di Ruben.

48:7 Jala marbalokkon Ruben sian sambariba purba sahat ro di pastima sapartalian di Juda.

48:8 Jala marbalokkon Juda sian sambariba purba sahat ro di pastima ingkon gabe pelean tatingan sipapulihonmuna, * duapulu lima ribu asta bohangna dohot unjurna suang songon sada partalian hian sian sambariba purba sahat ro di pastima, asa inganan na badia i di parsitongaanna.

48:9 Ia pelean tatingan sipapulihonmuna di Jahowa, ingkon duapulu lima ribu asta unjurna jala sampulu ribu asta bohangna.

48:10 Ingkon disi do pelean tatingan na badia i jambar ni angka malim: Tungkan utara duapulu lima ribu asta, jala tungkan pastima sampulu ribu asta bohangna, jala tungkan purba sampulu ribu asta bohangna, jala tungkan dangsina duapulu lima ribu asta unjurna; asa inganan na badia ni Jahowa di parsitongaanna.

48:11 I ma jambar ni malim angka na pinarbadiaan sian anak ni si Sadok, * angka na mangaradoti ulaonku, angka na so lilu, uju na lilu halak Israel, songon lilu ni halak Lepi na asing.

48:12 Jadi ingkon di nasida ma pelean tatingan i na pinapulik sian tano na badia sahali marbalokkon halak Lepi.

48:13 Halak Lepi pe ingkon maruli mardonokkon parbolatan ni angka malim duapulu lima ribu asta unjurna jala sampulu ribu asta bohangna; sandok unjurna ingkon duapulu lima ribu asta jala bohangna sampulu ribu.

48:14 Jala ndang jadi gadisonnasida sian i nanggo sada manang tungkaranna, manang pabalionna patumonaan ni tano i tu halak na leban, ai habadiaon ni Jahowa do i.

48:15 Ia na lima ribu asta bohang na lobi i hombarhon na duapulu lima ribu asta i riperipe ni huta do i bahenon inganan dohot partungkoan, asa huta i di parsitongaanna.

48:16 Jala angka on do ungkuranna: Sambariba utara opat ribu lima ratus, jala sambariba dangsina opat ribu lima ratus, jala sian sambariba purba opat ribu lima ratus, jala sambariba pastima opat ribu lima ratus.

48:17 Ingkon marpartungkoan huta i tungkan utara dua ratus lima pulu asta, jala tungkan dangsina dua ratus lima pulu, jala tungkan purba dua ratus lima pulu, jala tungkan pastima dua ratus lima pulu.

48:18 Jala lobilobi ni unjur hombarhon pelean tatingan na badia i, sampulu ribu tungkan purba jala sampulu ribu tungkan pastima, jala ingkon hombarhon pelean tatingan na badia i, jala parbuena bahen hangoluan ni angka pangula di huta i.

48:19 Jala taringot tu pangula di huta i, ingkon sian sandok marga ni Israel buaton mangula tano ni huta i.

48:20 Asa sandok pelean tatingan i ingkon duapulu lima ribu asta be unjurna dohot bohangna maropat suhi papulikonmuna pelean tatingan na badia i bahen partalian ni huta i.

48:21 Jala lobilobina ingkon di induk i angkupangkup be sian pelean tatingan na badia i dohot sian partalian ni huta i hombarhon na duapulu lima ribu asta ni pelean tatingan i sahat ro di parbolatan tungkan purba dohot pastima, hombarhon na duapulu lima ribu asta tungkan parbolatan pastima, tondong ni angka partalian marmargamarga * di induk i ma i, jala pelean tatingan na badia i dohot habadiaon ni joro i ingkon di parsitongaanna.

48:22 Sian partalian ni halak Lepi pe dohot sian partalian ni huta i, di tongatonga ni partalian na di induk i, di holangkolang ni parbolatan Juda dohot Benjamin, ingkon di induk i ma i.

48:23 Dung i taringot tu angka marga na asing sian sambariba purba sahat ro di pastima sapartalian di Benjamin.

48:24 Jala marbalokkon Benjamin sian sambariba purba sahat ro di pastima sapartalian di Simeon.

48:25 Jala marbalokkon Simeon sian sambariba purba sahat ro di pastima sapartalian di Isasar.

48:26 Jala marbalokkon Isasar sian sambariba purba sahat ro di pastima sapartalian di Zebulon.

48:27 Jala marbalokkon Zebulon sian sambariba purba sahat ro di pastima sapartalian di Gad.

48:28 Jala marbalokkon Gad tungkan sambariba dangsina sahali ingkon disi parbolatan i: Olat ni * Tamar sahat ro di aek Meriba Kades, mangihuthon batang aek i sahat ro di laut godang.

48:29 I ma tano i sibagionmuna marpintu bahen pargolatan di angka marga ni Israel, jala on do angka partaliannasida, ninna Tuhan Jahowa!

48:30 Jala on do angka haruaran ni huta i: Sian sambariba utara opat ribu limaratus asta.

48:31 Jala angka bahal ni huta i ingkon mangihuthon goargoar ni angka marga ni Israel; tolu bahal tungkan utara, bahal Ruben sada, bahal Juda sada, bahal Lepi sada.

48:32 Jala tungkan sambariba purba opat ribu limaratus asta, jala tolu bahalna: Bahal Josep sada, bahal Benjamin sada, bahal Dan sada.

48:33 Jala sambariba tungkan dangsina opat ribu limaratus asta, jala tolu bahalna, bahal Simeon sada, bahal Isasar sada, bahal Zebulon sada.

48:34 Ia sambariba pastima opatribu limaratus asta do, tolu bahalna: Bahal Gad sada, bahal Aser sada, bahal Naptali sada.

48:35 Asa tung humaliang sampulu ualu ribu asta do, jala goar ni huta i olat ni sadarina i: * Jahowa disi!