Buku Obaja

Obaja ᯀᯬᯅᯐ 1

1:1 Pangungkapon ni si Obaja, songon on do hata ni Tuhan Jahowa taringot tu Edom: Nunga hubege hami sada barita sian Jahowa, jala nunga disuru sada pangulu tumopot angka bangso parbegu: Tole antong, borhat ma hita marmusu dompak nasida. ᯇᯝᯮᯰᯄ᯦ᯇᯉᯬ᯲ ᯉᯪ ᯘᯪ ᯀᯬᯅᯐ ᯘᯬᯝᯉᯬ᯲ ᯀᯉᯬ᯲ ᯑᯬ ᯂᯖ ᯉᯪ ᯖᯮᯂᯉ᯲ ᯐᯂᯬᯋ ᯖᯒᯪᯝᯖᯬ᯲ ᯖᯮ ᯀᯩᯑᯔᯬ᯲ ᯉᯮᯝ ᯂᯮᯅᯩᯎᯩ ᯂᯔᯪ ᯘᯑ ᯅᯒᯪᯖ ᯘᯪᯀᯉ᯲ ᯐᯂᯬᯋ ᯐᯞ ᯉᯮᯝ ᯑᯪᯘᯮᯒᯮ ᯘᯑ ᯇᯝᯮᯞᯮ ᯖᯮᯔᯬᯇᯖᯬ᯲ ᯀᯰᯄ᯦ ᯅᯰᯘᯬ ᯇᯒ᯲ᯅᯩᯎᯮ ᯖᯬᯞᯩ ᯀᯉ᯲ᯖᯰᯬ ᯅᯒᯬ᯲ᯂᯖ᯲ ᯔ ᯂᯪᯖ ᯔᯔᯮᯘᯮ ᯑᯔᯬ᯲ᯇᯄ᯦᯲ ᯉᯘᯪᯑ

1:2 Ida ma, metmet do ho bahenonku di tongatonga ni angka bangso parbegu, asa lea situtu ho.

1:3 Panengaon ni roham do paotootohon ho, ala maringan ho di bagasan * angka liang ni dolok batu, buntul ingananna, gabe didok di bagasan rohana: Tung ise ma na tuk mangonjar ahu tu tano?

1:4 Nang pe timbo ho songon lali na mangareapreap, tung sura pe diholangkolang ni angka bintang dibahen ho asarmu, sai na onjaronku do ho sian i, ninna Jahowa.

1:5 Tung sura ro halak panangko tumopot ho, manang pangarut borngin, tung songon dia ma hasisiapmu bahenonna! Tung so tangkoonnasida, sae di nasida? Tung sura ro halak sitapu anggur tumopot ho, nda holan angka pisikpisik tadingkononnasida.

1:6 Alai beha do pandiori ni halak di si Esau, disungkapi angka parbonangan sitabunianna!

1:7 Sahat ro di partalpahan pataruon ni sude angka baoa parjanjianmu ho; na dipaotooto jala dipatunduk angka baoa donganmu sapartahian do ho; sagusagum do bahenonnasida gabe jorgong di torum, so botobotoanmu.

1:8 Nda songon on do masa di ari na sasada i, ninna Jahowa, siaphononku ma halak na bisuk sian Edom, jala parbinotoan sian dolok ni si Esau?

1:9 Jadi tarhatotong ma angka ulubalangmu, ale * Teman, asa tung sun siap nasa baoa sian dolok ni si Esau dibahen todostodos.

1:10 Ala ni hajungkaton tu anggim si Jakkob, ingkon hungkupan ni haurahon ma ho, jala ingkon siaphononhon ho ro di salelenglelengna.

1:11 Uju di ari pandopangmu dompak ibana, uju di ari pamuangkon ni halak sileban paranganna, jala dibongoti halak sileban bahalna, jala marruji nasida taringot tu Jerusalem, dohot do ho uju i songon sada sian nasida.

1:12 Hape nian, ndang jadi * martilla pamerengmu di ari ni anggim, di ari hinamagona, jala ndang jadi marlas ni roha ho mida angka anak ni Juda di ari hasisiapnasida i, jala ndang jadi teal pangkulingmu di ari hagogotanna.

1:13 Ndang jadi bongotanmu bahal ni bangsongku di ari hasisiapnasida, ndang jadi martilla dohot pamerengmu mida hinamagona, di ari hasisiapna i, jala ndang jadi paganjangonmu jarijarim mambuat ugasanna di ari hinamagona.

1:14 Jala ndang jadi nian jongjong ho di dalan panirpangan laho mangaragehon angka na maporus sian ibana; jala ndang jadi nian jehehononmu angka na malua sian ibana di ari hagogotan.

1:15 Ai jonok nama * ari ni Jahowa tu atas ni saluhut bangso parbegu: * Suang songon na binahenmi bahenonna sogot tu ho; pambahenanmi pasuangonna tu ulum.

1:16 Ai songon parsoburmuna di atas ni dolok habadiaonki, * marsobur sogot tongtong sude bangso parbegu; marsobur ma tongon nasida, jala siruponna, jadi disi pe nasida, hira na so dung disi.

1:17 Alai anggo * di atas dolok Sion adong do haluaon sogot, jala manjadi habadiaon, jala teanon ni pinompar ni si Jakkob do angka inganannasida.

1:18 Dung i * gabe api ma pinompar ni si Jakkob, jala jilam ni api ia pinompar ni si Josep, alai gabe durame ianggo pinompar ni si Esau: Jadi nahitanna ma nasida, laos suda nasida tutungonna, jadi ndang adong na malua nanggo sada sian pinompar ni si Esau, ai nunga Jahowa mandok i.

1:19 Dung i teanon ni isi ni dangsina ma dolok ni si Esau dohot tano pea ni halak Palistim; teanonnasida dohot ladang ni Epraim dohot ladang ni Samaria; alai anggo Gilead di Benjamin do i.

1:20 Jala angka na tarbuang sian parangan ni halak Israel manean sogot tano na di halak Kanaan hian sahat ro di Sarpat; jala halak na tarbuang sian Jerusalem, angka na di Sarpat manean sogot angka huta tungkan dangsina.

1:21 Jala nangkok sogot angka silehon tua tu dolok Sion laho manguhum dolok ni si Esau. Jadi di Jahowa ma harajaon i.