Buku Pilemon

Pilemon ᯇᯪᯞᯩᯔᯉᯬ᯲ 1

1:1 Ahu surat ni si Paulus, na tarihot ala ni Kristus Jesus, nang Timoteus, dongan i, mandapothon si Pilemon na hinaholongan, dongannami saulaon, ᯀᯂᯮ ᯘᯮᯒᯖ᯲ ᯉᯪ ᯘᯪ ᯇᯥᯞᯘᯮ᯲ ᯉ ᯖᯒᯪᯂᯖᯬ᯲ ᯀᯞ ᯉᯪ ᯄ᯦᯲ᯒᯘᯪ᯲ᯖᯘᯮ᯲ ᯐᯩᯘᯘᯮ᯲ ᯉᯰ ᯖᯪᯔᯬᯖᯩᯀᯘᯮ᯲ ᯑᯬᯝᯉ᯲ ᯤ ᯔᯉ᯲ᯑᯇᯖᯬ᯲ᯂᯉᯬ᯲ ᯘᯪ ᯇᯪᯇᯩᯔᯉᯬ᯲ ᯉ ᯂᯪᯉᯂᯬᯞᯬᯝᯉ᯲ ᯑᯬᯝᯉ᯲ᯉᯔᯪ ᯘᯥᯞᯀᯉᯬ᯲

1:2 laos mandapothon si Appia, ibotonami, dohot si Arkippus, dongannami marungkil, ro di huria na marluhut di bagasmu: ᯞᯀᯘᯬ᯲ ᯔᯉ᯲ᯑᯇᯖᯬ᯲ᯂᯉᯬ᯲ ᯘᯪ ᯀᯇ᯲ᯇᯪᯀ ᯤᯅᯬᯖᯬᯉᯔᯪ ᯑᯬᯂᯖᯬ᯲ ᯘᯪ ᯀᯒ᯲ᯄ᯦᯲ᯒᯇᯪ᯲ᯇᯘᯮ᯲ ᯑᯬᯝᯉ᯲ᯉᯔᯪ ᯔᯒᯮᯰᯄ᯦ᯞᯪ᯲ ᯒᯬ ᯑᯪ ᯂᯮᯒᯪᯀ ᯉ ᯔᯒ᯲ᯞᯮᯂᯖᯮ᯲ ᯑᯪ ᯉᯎᯘ᯲ᯔᯮ

1:3 Asi ni roha ma di hamu dohot dame sian Debata Amanta dohot sian Tuhan Jesus Kristus! ᯀᯘᯪ ᯉᯪ ᯒᯬᯂ ᯔ ᯑᯪ ᯂᯔᯮ ᯑᯬᯂᯖᯬ᯲ ᯑᯔᯩ ᯘᯪᯀᯉ᯲ ᯑᯩᯅᯖ ᯀᯔᯉ᯲ᯖ ᯑᯬᯂᯖᯬ᯲ ᯘᯪᯀᯉ᯲ ᯖᯮᯂᯉ᯲ ᯐᯩᯘᯘᯮ᯲ ᯄ᯦᯲ᯒᯘᯪ᯲ᯖᯘᯮ᯲

1:4 Na mandok mauliate do ahu tu Debatangku tongtong, marningot ho di angka tangiangku. ᯉ ᯔᯉ᯲ᯑᯄ᯦ᯬ᯲ ᯔᯥᯞᯪᯀᯖᯩ ᯑᯬ ᯀᯂᯮ ᯖᯮ ᯑᯩᯅᯖᯰᯄ᯦ᯮ ᯖᯰᯬᯖᯰᯬ ᯔᯒ᯲ᯉᯪᯝᯖᯬ᯲ ᯂᯬ ᯑᯪ ᯀᯰᯄ᯦ ᯖᯝᯪᯀᯰᯄᯮ᯦

1:5 Ai hubege do holong ni roham dohot haporseaonmu di Tuhan Jesus dohot maradophon saluhut angka na badia. ᯀᯤ ᯂᯮᯅᯩᯎᯩ ᯑᯬ ᯂᯬᯞᯰᯬ ᯉᯪ ᯒᯬᯂᯔ᯲ ᯑᯬᯂᯖᯬ᯲ ᯂᯇᯒᯬ᯲ᯘᯩᯀᯀᯉᯬ᯲ᯔᯮ ᯑᯪ ᯖᯮᯂᯉ᯲ ᯐᯩᯘᯘᯮ᯲ ᯑᯬᯂᯖᯬ᯲ ᯔᯒᯑᯇᯬ᯲ᯂᯉᯬ᯲ ᯘᯞᯮᯂᯖᯮ᯲ ᯀᯰᯄ᯦ ᯉ ᯅᯑᯪᯀ

1:6 Anggiat ma marpangkorhon hasaoron ni haporseaonmi, laho mananda nasa na denggan na di bagasan hamu, maradophon Kristus i. ᯀᯰᯎᯪᯀᯖ᯲ ᯔ ᯔᯒ᯲ᯇᯰᯄᯒᯬ᯲ᯂᯉᯬ᯲ ᯂᯘᯀᯬᯒᯉᯬ᯲ ᯉᯪ ᯂᯇᯒᯬ᯲ᯘᯩᯀᯀᯉᯬ᯲ᯔᯪ ᯞᯂᯬ ᯔᯉᯉ᯲ᯑ ᯉᯘ ᯉ ᯑᯰᯩᯎᯉ᯲ ᯉ ᯑᯪ ᯅᯎᯘᯉ᯲ ᯂᯔᯮ ᯔᯒᯑᯇᯬ᯲ᯂᯉᯬ᯲ ᯄ᯦᯲ᯒᯘᯪ᯲ᯖᯘᯮ᯲ ᯤ

1:7 Ai godang do di ahu halalas ni roha nang apulapul, dibahen holong ni roham, ai dipasabam ho do ateate ni angka na badia i, ale anggia. ᯀᯤ ᯎᯬᯑᯰ ᯑᯬ ᯑᯪ ᯀᯂᯮ ᯂᯞᯞᯘ᯲ ᯉᯪ ᯒᯬᯂ ᯉᯰ ᯀᯇᯞᯮ᯲ᯀᯇᯞᯮ᯲ ᯑᯪᯅᯂᯉᯩ᯲ ᯂᯬᯞᯰᯬ ᯉᯪ ᯒᯬᯂᯔ᯲ ᯀᯤ ᯑᯪᯇᯘᯅᯔ᯲ ᯂᯬ ᯑᯬ ᯀᯖᯩᯀᯖᯩ ᯉᯪ ᯀᯰᯄ᯦ ᯉ ᯅᯑᯪᯀ ᯀᯞᯩ ᯀᯰᯎᯪᯀ

1:8 Onpe, godang do nian hiras ni rohangku di bagasan Kristus, mangarodihon na tama tu ho. ᯀᯉᯬ᯲ ᯇᯩ ᯎᯬᯑᯰ ᯑᯬ ᯉᯪᯀᯉ᯲ ᯂᯪᯒᯘ᯲ ᯉᯪ ᯒᯬᯂᯰᯄ᯦ᯮ ᯑᯪ ᯅᯎᯘᯉ᯲ ᯄ᯦᯲ᯒᯘᯪ᯲ᯖᯘᯮ᯲ ᯔᯝᯒᯬᯑᯪᯂᯉᯬ᯲ ᯉ ᯖᯔ ᯖᯮ ᯂᯬ

1:9 Alai ala ni holong ni roha i, tagonan ma ahu mangelehelek. Nunga songon i ahu, Paulus, naung matua, jala tarihot nuaeng ala ni Kristus Jesus. ᯀᯞᯤ ᯀᯞ ᯉᯪ ᯂᯬᯞᯰᯬ ᯉᯪ ᯒᯬᯂ ᯤ ᯖᯎᯬᯉᯉ᯲ ᯔ ᯀᯂᯮ ᯔᯝᯩᯞᯩᯂᯩᯞᯄᯩ ᯉᯮᯝ ᯘᯬᯝᯉᯬ᯲ ᯤ ᯀᯂᯮ ᯇᯥᯞᯘᯮ᯲ ᯉᯀᯮᯰ ᯔᯖᯮᯀ ᯐᯞ ᯖᯒᯪᯂᯖᯬ᯲ ᯉᯮᯀᯀᯰᯩ ᯀᯞ ᯉᯪ ᯄ᯦᯲ᯒᯘᯪ᯲ᯖᯘᯮ᯲ ᯐᯩᯘᯘᯮ᯲

1:10 Asa huelehelek ma ho; ala ni anakkonku, si Onesimus, na hutubuhon, di na tarihot on ahu.ᯀᯘ ᯂᯮᯀᯩᯞᯩᯂᯩᯞᯄᯩ᯲ ᯔ ᯂᯬ ᯀᯞ ᯉᯪ ᯀᯉᯄ᯦᯲ᯄ᯦ᯉᯬ᯲ᯄ᯦ᯮ ᯘᯪ ᯀᯬᯉᯩᯘᯪᯔᯘᯮ᯲ ᯉ ᯂᯮᯖᯮᯅᯮᯂᯉᯬ᯲ ᯑᯪ ᯉ ᯖᯒᯪᯂᯖᯬ᯲ ᯀᯉᯬ᯲ ᯀᯂᯮ

1:11 Na so marguna do ibana najolo di ho; alai nuaeng marguna situtu do di ho, nang di ahu. ᯉ ᯘᯬ ᯔᯒ᯲ᯎᯮᯉ ᯑᯬ ᯤᯅᯉ ᯉᯐᯬᯞᯬ ᯑᯪ ᯂᯬ ᯀᯞᯤ ᯉᯮᯀᯀᯰᯩ ᯔᯒ᯲ᯎᯮᯉ ᯘᯪᯖᯮᯖᯮ ᯑᯬ ᯑᯪ ᯂᯬ ᯉᯰ ᯑᯪ ᯀᯂᯮ

1:12 Na husuru do ibana mulak tu ho; doshon rohangku do ibana huetong. ᯉ ᯂᯮᯘᯮᯒᯮ ᯑᯬ ᯤᯅᯉ ᯔᯮᯞᯄ᯦᯲ ᯖᯮ ᯂᯬ ᯑᯘᯬ᯲ᯂᯉᯬ᯲ ᯒᯬᯂᯰᯄ᯦ᯮ ᯑᯬ ᯤᯅᯉ ᯂᯮᯀᯩᯖᯰᯬ

1:13 Naeng do nian tioponku ibana, asa singkatmu ibana patureturehon ahu, di na tarrante on ahu ala ni barita na uli i. ᯉᯀᯰᯩ ᯑᯬ ᯉᯪᯀᯉ᯲ ᯖᯪᯀᯬᯇᯉᯬ᯲ᯄ᯦ᯮ ᯤᯅᯉ ᯀᯘ ᯘᯰᯪᯄ᯦ᯖ᯲ᯔᯮ ᯤᯅᯉ ᯇᯖᯮᯒᯩᯖᯮᯒᯩᯂᯉᯬ᯲ ᯀᯂᯮ ᯑᯪ ᯉ ᯖᯒ᯲ᯒᯉ᯲ᯖᯩ ᯀᯉᯬ᯲ ᯀᯂᯮ ᯀᯞ ᯉᯪ ᯅᯒᯪᯖ ᯉ ᯥᯞᯪ ᯤ

1:14 Alai ndang olo ahu mambahen agia aha, anggo so sian pamotoanmu, asa unang songon na so tarjua denggan basamu, naeng ma sian lomo ni roham. ᯀᯞᯤ ᯉ᯲ᯑᯰ ᯀᯬᯞᯬ ᯀᯂᯮ ᯔᯔ᯲ᯅᯂᯉᯩ᯲ ᯀᯎᯪᯀ ᯀᯂ ᯀᯰᯎᯬ ᯘᯬ ᯘᯪᯀᯉ᯲ ᯇᯔᯬᯖᯬᯀᯉ᯲ᯔᯮ ᯀᯘ ᯥᯉᯰ ᯘᯬᯝᯉᯔᯬ᯲ ᯉ ᯘᯬ ᯖᯒ᯲ᯐᯮᯀ ᯑᯰᯩᯎᯉ᯲ ᯅᯘᯔᯮ ᯉᯀᯰᯩ ᯔ ᯘᯪᯀᯉ᯲ ᯞᯬᯔᯬ ᯉᯪ ᯒᯬᯂᯔ᯲

1:15 Atik i alana, umbahen na sirang ibana sangombas sian ho, asa gabe salelengna ibana di ho! ᯀᯖᯄ᯦ᯪ᯲ ᯤ ᯀᯞᯉ ᯀᯔᯮ᯲ᯅᯂᯉᯩ᯲ ᯉ ᯘᯪᯒᯰ ᯤᯅᯉ ᯘᯝᯔᯬ᯲ᯅᯘ᯲ ᯘᯪᯀᯉ᯲ ᯂᯬ ᯀᯘ ᯎᯅᯩ ᯘᯞᯩᯞᯰᯩᯉ ᯤᯅᯉ ᯑᯪ ᯂᯬ

1:16 Ndada be naposom ibana, tung lobi sian naposo, songon dongan na hinaholongan; lumobi di ahu, lam beha ma di ho: Mangihuthon ruhut tano on, tole di bagasan Tuhan i. ᯉ᯲ᯑᯑ ᯅᯩ ᯉᯇᯬᯘᯔᯬ᯲ ᯤᯅᯉ ᯖᯮᯰ ᯞᯬᯅᯪ ᯘᯪᯀᯉ᯲ ᯉᯇᯬᯘᯬ ᯘᯬᯝᯉᯬ᯲ ᯑᯬᯝᯉ᯲ ᯉ ᯂᯪᯉᯂᯬᯞᯬᯝᯉ᯲ ᯞᯮᯔᯬᯅᯪ ᯑᯪ ᯀᯂᯮ ᯞᯔ᯲ ᯅᯩᯂ ᯔ ᯑᯪ ᯂᯬ ᯔᯝᯪᯂᯖᯮ᯲ᯂᯉᯬ᯲ ᯒᯮᯂᯖᯮ᯲ ᯖᯉᯬ ᯀᯉᯬ᯲ ᯖᯬᯞᯖᯬᯞᯩ ᯑᯪ ᯅᯎᯘᯉ᯲ ᯖᯮᯂᯉ᯲ ᯤ

1:17 Asa molo dietong ho ahu donganmu, jangkon ma ibana songon ahu! ᯀᯘ ᯔᯬᯞᯬ ᯑᯪᯀᯩᯖᯰᯬ ᯂᯬ ᯀᯂᯮ ᯑᯬᯝᯉ᯲ᯔᯮ ᯐᯰᯄ᯦ᯉᯬ᯲ ᯔ ᯤᯅᯉ ᯘᯬᯝᯉᯬ᯲ ᯀᯂᯮ

1:18 Alai molo tung adong salana manang utangna di ho, tu ahu ma i rajumi! ᯀᯞᯤ ᯔᯬᯞᯬ ᯖᯮᯰ ᯀᯝᯰᯬ ᯘᯞᯉ ᯔᯉᯰ ᯥᯖᯰᯉ ᯑᯪ ᯂᯬ ᯖᯮ ᯀᯂᯮ ᯔ ᯤ ᯒᯐᯮᯔᯪ

1:19 Ahu, Paulus, manurathonsa dohot tanganku, paboa ahu sigarar i; unang jolo hudok tu ho, na marutang diri do ho tu ahu. ᯀᯂᯮ ᯇᯥᯞᯘᯮ᯲ ᯔᯉᯮᯒᯖ᯲ᯂᯉᯬ᯲ᯘ ᯑᯬᯂᯖᯬ᯲ ᯖᯝᯉ᯲ᯄ᯦ᯮ ᯇᯅᯬᯀ ᯀᯂᯮ ᯘᯪᯎᯒᯒ᯲ ᯤ ᯥᯉᯰ ᯐᯬᯞᯬ ᯂᯮᯑᯄ᯦ᯬ᯲ ᯖᯮ ᯂᯬ ᯉ ᯔᯒᯮᯖᯰ ᯑᯪᯒᯪ ᯑᯬ ᯂᯬ ᯖᯮ ᯀᯂᯮ

1:20 Olo tutu, anggia, naeng maruntung ahu sian ho di bagasan Tuhan i; pasabam ma ateatengku di bagasan Kristus i! ᯀᯬᯞᯬ ᯖᯮᯖᯮ ᯀᯰᯎᯪᯀ ᯉᯀᯰᯩ ᯔᯒᯉᯮ᯲ᯖᯮᯰ ᯀᯂᯮ ᯘᯪᯀᯉ᯲ ᯂᯬ ᯑᯪ ᯅᯎᯘᯉ᯲ ᯖᯮᯂᯉ᯲ ᯤ ᯇᯘᯅᯔ᯲ ᯔ ᯀᯖᯩᯀᯖᯰᯩᯄ᯦ᯮ ᯑᯪ ᯅᯎᯘᯉ᯲ ᯄ᯦᯲ᯒᯘᯪ᯲ᯖᯘᯮ᯲ ᯤ

1:21 Ala pos rohangku, oloanmu ahu, umbahen na manurat ahu tu ho; ai huboto, patupaonmu do lumobi sian na hudok i. ᯀᯞ ᯇᯘᯬ᯲ ᯒᯬᯂᯰᯄ᯦ᯮ ᯀᯬᯞᯬᯀᯉ᯲ᯔᯮ ᯀᯂᯮ ᯀᯔᯮ᯲ᯅᯂᯉᯩ᯲ ᯉ ᯔᯉᯮᯒᯖ᯲ ᯀᯂᯮ ᯖᯮ ᯂᯬ ᯀᯤ ᯂᯮᯅᯬᯖᯬ ᯇᯖᯮᯇᯀᯉᯬ᯲ᯔᯮ ᯑᯬ ᯞᯮᯔᯬᯅᯪ ᯘᯪᯀᯉ᯲ ᯉ ᯂᯮᯑᯄ᯦ᯬ᯲ ᯤ

1:22 Pature huhut inganan di ahu, ai dihirim rohangku, lehononna do ahu mulak tu hamu, dibahen angka tangiangmuna. ᯇᯖᯮᯒᯩ ᯂᯮᯂᯖᯮ᯲ ᯤᯝᯉᯉ᯲ ᯑᯪ ᯀᯂᯮ ᯀᯤ ᯑᯪᯂᯪᯒᯔᯪ᯲ ᯒᯬᯂᯰᯄ᯦ᯮ ᯞᯩᯂᯬᯉᯉᯬ᯲ᯉ ᯑᯬ ᯀᯂᯮ ᯔᯮᯞᯄ᯦᯲ ᯖᯮ ᯂᯔᯮ ᯑᯪᯅᯐᯉᯩ᯲ ᯀᯰᯄ᯦ ᯖᯝᯪᯀᯰᯔᯮᯉ

1:23 Manongos tabi tu ho: Si Epapras, donganku tarhurung di bagasan Kristus Jesus. ᯔᯉᯬᯝᯘᯬ᯲ ᯖᯅᯪ ᯖᯮ ᯂᯬ ᯘᯪ ᯀᯩᯇᯇ᯲ᯒᯘ᯲ ᯑᯬᯝᯉ᯲ᯄ᯦ᯮ ᯖᯒ᯲ᯂᯮᯒᯮᯰ ᯑᯪ ᯅᯎᯘᯉ᯲ ᯄ᯦᯲ᯒᯘᯪ᯲ᯖᯘᯮ᯲ ᯐᯩᯘᯘᯮ᯲

1:24 Songon i: Si Markus, Aristarkus, Demas, Lukas, angka donganku saulaon. ᯘᯬᯝᯉᯬ᯲ ᯤ ᯘᯪ ᯔᯒ᯲ᯄ᯦ᯘᯮ᯲ ᯀᯒᯘᯪ᯲ᯖᯒ᯲ᯄ᯦ᯘᯮ᯲ ᯑᯩᯔᯘ᯲ ᯞᯮᯄ᯦ᯘ᯲ ᯀᯰᯄ᯦ ᯑᯬᯝᯉ᯲ᯄ᯦ᯮ ᯘᯥᯞᯀᯉᯬ᯲

1:25 Didongani asi ni roha ni Tuhan Jesus Kristus ma tondimuna! ᯑᯪᯑᯬᯝᯉᯪ ᯀᯘᯪ ᯉᯪ ᯒᯬᯂ ᯉᯪ ᯖᯮᯂᯉ᯲ ᯐᯩᯘᯘᯮ᯲ ᯄ᯦᯲ᯒᯘᯪ᯲ᯖᯘᯮ᯲ ᯔ ᯖᯉᯬ᯲ᯑᯪᯔᯮᯉ