Buku Sakaria

Sakaria ᯘᯄ᯦ᯒᯪᯀ 1

1:1 Dibulan sipaha ualu, * paduataonhon hinarajahon ni si Darius ro ma hata ni Jahowa tu panurirang * Sakaria, anak ni si Berekia, tubu ni si Ido, songon on: ᯑᯪ ᯅᯮᯞᯉ᯲ ᯘᯪᯇᯂ ᯥᯀᯞᯮ ᯇᯑᯮᯀᯖᯀᯉᯬ᯲ᯂᯉᯬ᯲ ᯂᯪᯉᯒᯐᯂᯉᯬ᯲ ᯉᯪ ᯘᯪ ᯑᯒᯪᯀᯘᯮ᯲ ᯒᯬ ᯔ ᯂᯖ ᯉᯪ ᯐᯂᯬᯋ ᯖᯮ ᯇᯉᯮᯒᯪᯒᯰ ᯘᯄ᯦ᯒᯪᯀ ᯀᯉᯄ᯦᯲ ᯉᯪ ᯘᯪ ᯅᯩᯒᯩᯄᯪᯀ ᯖᯮᯅᯮ ᯉᯪ ᯘᯪ ᯤᯑᯬ ᯘᯬᯝᯉᯬ᯲ ᯀᯉᯬ᯲

1:2 Marronirimas situtu do Jahowa mida ompumuna.

1:3 Alai dok ma tu nasida: Songon on do hata ni Jahowa Zebaot * sai mulak ma hamu tu ahu, ninna Jahowa Zebaot, asa mulak ahu tu hamu, ninna Jahowa Zebaot.

1:4 Unang hamu songon ompumuna angka naung jinou ni angka panurirang parjolo i, ninna do: Songon on do hata ni Jahowa Zebaot: Ua * mulak ma hamu sian dalanmuna, angka na jahat dohot sian pambahenanmuna angka na roa i. Alai ndang ditangihon, jala ndang dipardulihon nasida ahu, ninna Jahowa.

1:5 Ia ompumuna, didia nasida nuaeng? Jala angka panurirang i, tung ro di salelenglelengna ma nasida mangolu?

1:6 Antong angka hatangki dohot patikki, angka na hutonahon tu na naposongku, angka panurirang i, nda nunga mangonai tu angka ompumuna? Gabe mulak nasida jala angka didok do: Songon na sinangkap ni Jahowa Zebaot naeng bahenonna tu hita, hombar tu angka dalanta dohot pambahenanta songon i do tongon dibahen tu hita.

1:7 Di ari duapulu opat di bulan Li, i ma bulan Sebat, paduataonhon hinarajahon ni si Darius, ro ma hata ni Jahowa tu panurirang Sakaria, anak ni si Berekia, tubu ni si Ido, songon on:

1:8 Maralatan ahu bornginna i, gabe ida ma sada halak marsihundul di atas sada hoda na rara, jala sulon ibana di holangholang ni dulang, angka na di rura, jala di pudina hoda angka na rara, sihuning dohot siapaspili.

1:9 Jadi ningku ma: Dia do lapatan ni angka on, ale tuangku? Jadi didok suruan donganku mangkatai ma tu ahu: Hupabotohon pe tu ho lapatan ni angka nasida i.

1:10 Dung i ninna baoa na sulon di holangholang ni angka dulang i mangalusi: I ma angka na sinuru ni Jahowa laho mangaliati tano on.

1:11 Dung i didok angka nasida ma mangalusi suruan ni Jahowa na sulon di holangholang ni angka dulang i: Nunga huliati hami tano on, jadi ida ma, sandok tano on mardemak jala sonang.

1:12 Jadi didok suruan ni Jahowa ma mangalusi: Ale Jahowa Zebaot, sadia leleng on * so marpangulahi roham mida Jerusalem dohot mida angka huta ni Juda, angka na nirimasanmu * na pitupulu taon on.

1:13 Jadi dialusi Jahowa ma suruan, donganku mangkatai, angka hata na denggan dohot hata apulapul didok.

1:14 Dung i didok suruan donganku mangkatai ma tu ahu: Martingting ma ho songon on: Boti hata ni Jahowa Zebaot: Nunga * marronirimas situtu ahu humongkop Jerusalem dohot Sion.

1:15 Alai tarrimas situtu ma ahu mida parbegu, angka na jungkat, ala tarrimas ahu otik, gabe manolongi tu hamagoan ianggo nasida.

1:16 Dibahen i songon on do hata ni Jahowa: * Nunga marpangulahi rohangku tu Jerusalem; ingkon paulion muse bagashu di bagasan huta i ninna Jahowa Zebaot, jala sintahan ma hotang panuhati humaliang Jerusalem.

1:17 Ulahi muse martingting mandok: Songon on do hata ni Jahowa Zebaot: Marrarahan dope angka hutangku bahenonku jala lobian dipasupasu, jala ulahan ni Jahowa * mangapuli Sion * ulahanna huhut mamillit Jerusalem.

Sakaria 2

2:1 Dung i manaili ma ahu dompak ginjang, gabe huida ma opat tanduk.

2:2 Dung i ningku ma tu suruan angkuphu mangkatai: Dia do lapatan ni angka on? Jadi didok ma tu ahu: I ma tanduk, angka naung paserak Juda, Israel dohot Jerusalem.

2:3 Dung i dipaidahon Jahowa ma tu ahu opat halak panopa.

2:4 Jadi ningku ma: Aha do huroha sibahenonnasida on umbahen na ro? Jadi didok ibana ma songon on: I ma tanduk, angka naung paserak Juda, pola ndang tarbahen manang ise padirgak uluna. Alai ro soluk angka nasida on laho manonggoti nasida, laho mangupokkon angka tanduk ni angka bangso parbegu, angka na paginjang tandukna dompak tano Juda laho paserakkonsa.

2:5 Dung i manaili ahu muse dompak ginjang, asa huida, jadi ida ma, sada halak na patioptiop * sada hotang pamalok di bagasan tanganna.

2:6 Jadi ningku ma: Naeng tudia ho laho? Dung i ninna ibana ma tu ahu: Naeng manuhati Jerusalem, naeng marnida manang sadia bohangna, jala sadia unjurna.

2:7 Jadi ida ma, ruar ma suruan, angkuphu mangkatai hian; ruar muse sada suruan na asing manjumpangkon ibana.

2:8 Jala didok tu ibana: Marlojong ma ho dok ma tu dolidoli on songon on: * Gabe adaran manardas ma Jerusalem dibahen hinadeak ni jolma dohot pinahan di tongatongana.

2:9 Ai * ahu do, ninna Jahowa, gabe parik api humaliang huta i, jala ahu gabe * hamuliaon di tongatongana.

2:10 Beta hamu antong! * Lintun ma hamu sian tano tungkan utara, ninna Jahowa, ai nunga hupaserak hamu tu desa na opat ni langit i, ninna Jahowa.

2:11 Beta antong, ale Sion, palua dirim, ho ale na maisolat di tano Babel.

2:12 Ai songon on do hata ni Jahowa Zebaot: Naeng marmulia ibana umbahen disuru ahu tumopot bangso parbegu, angka na martaban hamu na jolo. Ai manang ise na manjama hamu, * anak ni matana jinamana disi.

2:13 Ai ida ma, laluhononku ma tanganku tu nasida, asa gabe tabantaban nasida di halak na pinarhatobannasida nasailaon, asa tung ditanda hamu Jahowa Zebaot naung marsuru ahu.

2:14 Marolopolop ma ho, jala marlas ni roha, ale boru Sion, ai ida ma, na ro ma ahu maringan di tongatongami, ninna Jahowa.

2:15 Jadi * torop angka bangso parbegu marsilohot tu Jahowa di ari na sasada i, gabe bangsongku nasida, alai maringan do ahu anggo di tongatongami, asa tung diboto ho Jahowa Zebaot naung marsuru ahu manopot ho.

2:16 Jadi ainon ni Jahowa muse Juda bahen partalianna di tano na badia i, jala * ulahanna mamillit Jerusalem.

2:17 Hohom ma nasa sibuk maradophon Jahowa, ai nunga tarsunggul ibana sian inganan ni habadiaonna.

Sakaria 3

3:1 Dung i dipataridahon ma tu ahu * si Josua, sintua ni malim i, tindang di jolo ni suruan ni Jahowa, jala * pangasung i tindang di lambung ni siamunna, mangasungi ibana.

3:2 Jadi ninna Jahowa ma tu pangasung i: * Toruan ni Jahowa ma ho, ale pangasung! Hona hata ma ho tutu bahenon ni Jahowa, na mamillit Jerusalem! Nda * sipusipu do ibana on, na tinait sian api?

3:3 Alai marulos angka na ramun do ianggo si Josua, songon i ibana tindang di jolo ni suruani.

3:4 Jadi didok ibana ma manonai angka na jongjong di jolona songon on: Tanggali hamu ma ulos angka na ramuni sian ibana! Alai anggo tu ibana didok do: * Ida ma nunga hubuat sian ho hageduhonmu, jala * solukkononku ma tu ho, angka ulos na marhadohoan.

3:5 Jadi ningku ma: Sapala dibahen nasida ma dohot * talitali na ias tu atas uluna. Jadi dibahen nasida ma talitali na ias tu atas uluna, jala disolukkon angka ulosi tu ibana, laos tindang anggo suruan ni Jahowa.

3:6 Dung i dihatindangkon suruan ni Jahowa ma tu si Josua songon on:

3:7 Boti hata ni Jahowa Zebaot: * Molo mardalan ho di angka dalanku, jala diradoti ho ** na hupasahat i tu ho, ingkon dohot ho manguhum jorongki ramotanmu dohot angka alamanku, * lehononku ma tu ho angka partogi sian nasida, angka na tindang dison.

3:8 Ua tangihon ma, ale Josua, sintua ni malim, ho dohot alealem angka na hundul di jolomi, ai angka baoa * tudosan do nasida, ai ida ma, paroonku ma naposongku * si Tumbur.

3:9 Ai ida ma, * batu naung hupeakhon i di jolo ni si Josua, * pitu mata di atas ni batu na sasada i; ida ma, laos ahu sandiri mangungkap ruangna, ninna Jahowa Zebaot, jala ahu mangunsat hajahaton ni tano on di ari na sasada i.

3:10 Laos di na sadari i, ninna Jahowa Zebaot, * pioonmuna, ma ganup alealemuna be marlinggom tu toru ni hau anggurna dohot tu toru ni hau antajauna.

Sakaria 4

4:1 Dung i mulak ma suruan, angkuphu mangkatai, jala disunggul ahu, songon baoa na sinunggul sian na modom.

4:2 Dung i didok ma tu ahu: * Aha do na niidam? Jadi ningku ma: Nunga maralatan ahu, jadi huida ma sada * parpalitoan sere mamolin, jala parmiahan na di atas uluna jala pitu palitona di atasna, pitu be dangka pangindingan tu palito, angka na di atas uluna.

4:3 Jala dua hau jetun di ginjangna, sada tungkan siamun ni parmiahan, jala sada tungkan hambirangna.

4:4 Dung i ningku ma usouso tu suruan, angkuphu mangkatai: Aha do lapatan ni angka on, ale tuangku?

4:5 Dung i ninna suruan, angkuphu mangkatai, mangalusi ahu: Ndang diboto ho lapatan ni angka on? Alai ningku ma: Ndang, ale tuangku.

4:6 Dung i ninna ibana ma mangalusi ahu; on ma hata ni Jahowa tu * si Serubabel, ndada marhitehite parangan jala ndada marhitehite gogo sian diri, ingkon * marhite sian Tondingku do saut ninna Jahowa Zebaot.

4:7 Tung ise do ho, ale dolok na bolon? Ingkon gabe adaran ho, ianggo maradophon si Serubabel. Paruaronna ma batu parsuhi mardongan * suraksurak: Hinaulina i, hinaulina i!

4:8 Dung i ro muse ma hata ni Jahowa tu ahu songon on:

4:9 Tangan ni * si Serubabel mambahen ojahan ni joro on, ingkon laos tanganna pasunhon muse; * asa tung tandaonmu Jahowa Zebaot do marsuru ahu tu hamu.

4:10 Ai tung ise ma na lea roha di * angka ari hametmeton on? Hape naung marlas ni roha marnida batu dodododo di bagasan tangan ni si Serubabel * sipitupitui, i ma angka mata ni Jahowa, angka na mangaliati sandok tano on.

4:11 Dung i ningku ma mangalusi ibana: Dia do lapatan ni na dua hau jetun on tungkan siamun ni parpalitoan dohot tungkan sihambirangna.

4:12 Dung i ningku ma mangalusi ibana paduahalihon: Dia do lapatan ni na dua ranting ni hau jetun i, angka na masijaloan dohot na dua dangka sere, angka na mangusehon sian nasida miak sere i?

4:13 Dung i ninna ma mandok ahu: Tung na so diboto ho do lapatan ni angka on? Jadi ningku ma: Ndang ale tuangku!

4:14 Dung i ninna ibana ma: I ma na dua anak ni miak angka na tindang di adopan ni Tuhan sigomgom sandok tano on.

Sakaria 5

5:1 Dung i humusor ma ahu jala manaili dompak ginjang, asa maralatan, jadi huida ma habang pustaha sada na binalun.

5:2 Dung i ninna ibana ma tu ahu: Aha do na niidam? Jadi ningku ma: Huida habang sada pustaha na binalun, unjurna duapulu elak, jala bohangna sampulu elak.

5:3 Dung i ninna ibana ma tu ahu: I ma torutoru na ruar tumopot sandok atas ni tano on. Ai nasa panangko, hombar tusi siaphononhon ibana sian on; jala nasa sitolon na tutu, hombar tusi siaphononhon ibana sian on.

5:4 Nunga sapala huparuar torutoru i, ninna Jahowa Zebaot, ingkon bongotanna do bagas ni halak panangko dohot bagas ni halak na manolon na tutu tu goarhu, laos marborngin do di tongatonga ni jabuna, jala siaphononna parhauna ro di batuna.

5:5 Dung i ruar ma suruan, angkuphu mangkatai, jala didok mandok ahu: Ua manaili ma ho dompak ginjang, jala ida manang aha do i na ruar i nuaeng.

5:6 Jadi ningku ma: Aha do i antong? Dung i ninna ibana ma: * Ampang do i, na ruar i. Dung i ninna ibana muse: I do tudosan ni hajahatonnasida di tano on.

5:7 Dung i ida ma, hinsat do sada pingkul simbora, huhut adong disi sada parompuan, hundul di parsitongaan ni ampangi.

5:8 Dung i ninna ibana ma: I ma hajahaton i. Jadi direongkon ibana ma nasida tu tongatonga ni ampangi, jala ditipahon simbora na sangkimpal i tu babana.

5:9 Dung i manaili ma ahu dompak ginjang, asa maralatan, jadi huida ma ruar dua parompuan jala alogo di bagasan habongnasida, jala habongnasida, songon angka habong ni siboru tasik, jala diluahon ampangi tu holangkolang ni tano on dohot langit.

5:10 Dung i ningku ma tu suruan angkuphu mangkatai: Tudia boanonnasida ampangi.

5:11 Dung i ninna ibana ma tu ahu: Laho paulihon di ibana sada jabu di tano Sinear: Jala ia dung dipadiri, patindangonna ma disi di atas hajongjonganna.

Sakaria 6

6:1 Dung i humusor muse ahu manaili dompak ginjang, asa maralatan, jadi huida ma opat hureta, angka na ruar sian holangkolang ni na dua dolok i, jala sian tombaga do dolok i.

6:2 Di hureta parjolo hoda angka na rara, jala di hureta paduahon, hoda angka na birong.

6:3 Jala di hureta patoluhon, hoda angka na bontar, jala di hureta paopathon, hoda angka siganding.

6:4 Dung i ningku ma mandok suruan, angkuphu mangkatai: Dia do lapatan ni angka i, ale tuangku?

6:5 Jadi ninna suruani ma mangalusi ahu; i ma na opat tondi sian langit, angka na ruar olat ni dung tindang nasida di lambung ni Tuhan * sigomgom liat portibi on.

6:6 Hureta na tinait ni hoda, angka na birong; i ma na borhat dompak tano tungkan utara; jala hoda angka na bontar borhat do ihut tu nasida; angka siganding pe borhat do tu tano tungkan dangsina.

6:7 Borhat muse dohot angka na rara i, jala dilului rohanasida do mangaliati tano on. Dung i ninna ibana ma: Laho ma hamu * mangaliati tano on. Jadi diliati nasida ma tano on.

6:8 Dung i joujou ma ibana tu ahu, jala didok ma tu ahu, songon on: Ida ma angka naung borhat tu tano na tungkan utara, i ma na * paulon tondingku di tano tungkan utara.

6:9 Dung i ro ma hata ni Jahowa tu ahu, songon on:

6:10 Buat deba halak sian angka naung mulak sian habuangan, sian si Helda i, sian si Tobia dohot sian si Jedaia; laos di ari na sasada i ma ho ro tumopot bagas ni si Josia, anak ni si Sepania, tusi ro nasida sian Babel.

6:11 Buatonmu ma huhut perak dohot sere, jala bahenonmu sada tumpal, sibahenonmu tu ulu ni sintua ni malim Josua, anak ni si Josadak.

6:12 Jala dohononmu tu ibana: Songon on do: Hata ni Jahowa Zebaot: Ida ma, baoa sada, si Tumbur goarna, jala sian hametmetonna ibana martumbur, jala paulionna sogot joro ni Jahowa.

6:13 Paulionna ma tongon joro ni Jahowa, laos ibana jumujung hamuliaon, jala hundul, jala mangarajai ibana di atas ni habangsana, gabe * malim ibana di atas habangsana, jala sangkap hadameon di holangkolang ni na * dua i sogot.

6:14 Ia tumpal i baen parningotan di si Helda i, di si Tobia dohot di si Jedaia ro di hasortaon ni anak ni si Sepania di joro ni Jahowa.

6:15 Ro do huhut halak sian tano na dao naeng parsidohot pauli bagas joro ni Jahowa sogot, asa tung diboto hamu Jahowa Zebaot marsuru ahu tu hamu. I ma na masa sogot, molo tung tangkas ditangihon hamu suara ni Jahowa, Debatamuna i.

Sakaria 7

7:1 Dung i paopattaonhon hinarajahon ni raja Darius, ro ma hata ni Jahowa tu si Sakaria, di ari opat bulan sipahasia, i ma bulan Kislew.

7:2 Uju disuru isi ni huta Betel si Sareser dohot si Regem Melek, rap dohot angka donganna marsomba tu adopan ni Jahowa.

7:3 Huhut usouso tu malim, angka na di joro ni Jahowa Zebaot dohot tu angka panurirang songon on: Atehe ingkon sai datdatanku dope tumatangis * di bulan sipahalima, jala marpuasa songon na hubahen nasailaon nunga pola martaontaon?

7:4 Jadi ro ma hata ni Jahowa Zebaot tu ahu songon on:

7:5 Dok ma tu sandok bangso ni tano on dohot tu angka malim: * Marpuasa pe hamu, jala mangandungi di bulan sipaha lima dohot di bulan sipahapitu nunga pola pitupulu taon lelengna, tung pasangap ahu ma hamu marhite sian parpuasaonmuna i?

7:6 Alai molo mangan jala minum hamu, nda di hamu sandiri do hamu na mangan dohot na minumi?

7:7 Nda i hian do hata, angka na tiningtingkon ni Jahowa marhite sian pamangan ni angka panurirang na jolo, uju na niinganan dope Jerusalem jala sonang ro di angka hutana humaliang, jala marpangisi dope tano dangsina dohot tano pea?

7:8 Dung i ro ma hata ni Jahowa tu si Sakaria songon on:

7:9 Boti hata ni Jahowa Zebaot: * Uhum hasintongan ma paruhumhon hamu, jala denggan basa dohot asi ni roha ulahon hamu ganup tu donganna.

7:10 Jala unang * rupa hamu halak na mabalu dohot na sopot so marama so marina, nang halak na buro dohot na parir! Jala unang manang ise mamingkiri na roa dompak donganna di bagasan rohana.

7:11 Alai manjua do anggo nasida manangihon, jala dipabiding dagingna patangkang rohana, jala dipahapal pinggolna unang marbinege.

7:12 Jala * dipapir rohana, songon batu intan, asa unang dibege patik i dohot hata angka na tinongos ni Jahowa Zebaot marhite sian tondina, dohot marhite sian panurirang angka na jolo i. Dibahen i marpiarpiar ma rimas ni Jahowa Zebaot.

7:13 Jadi hira marsisolisoli: Ibana manjou nasida nasailaon, hape ndang ditangihon nasida, suang songon i nasida joujou, ahu pe ndang tangihononku, ninna Jahowa Zebaot.

7:14 Dibahen i nunga hupurpurhon nasida tu saluhut bangso ni parbegu, angka na so tinandanasida hian, jala tano tinadingkonna i gabe halongonan di pudinasida, ndang tarbahen manang ise marmeang muli, jala tano hasoloani gabe halongonan dibahen nasida.

Sakaria 8

8:1 Dung i ro ma hata ni Jahowa Zebaot, ninna ma:

8:2 Songon on do hata ni Jahowa Zebaot: * Mangiburu situtu do ahu humongkop Sion jala marpiarpiar situtu rimashu humongkop nasida.

8:3 Songon on do hata ni Jahowa: * Marpangulahi ma rohangku mida Sion, jala maringanan ahu di parsitongaan ni Jerusalem, jadi targoar ma Jerusalem huta hasintongan, jala dolok ni Jahowa Zebaot, dolok habadiaon.

8:4 Songon on do hata ni Jahowa Zebaot: Ingkon hundul dope sogot baoa angka na ubanon dohot boruboru di angka alaman ni Jerusalem, angka na patioptiop tungkotna be di bagasan tanganna dibahen tuana.

8:5 Jala angka alaman ni huta i gok dolidoli dohot na marbaju, angka na marmeammeam di angka alamanna.

8:6 Songon on do hata ni Jahowa Zebaot: Ala longang roha ni pasipasi ni bangso on disi di angka ari nasida, tung dohot ma * ahu huroha longang disi, ninna Jahowa Zebaot.

8:7 Songon on do hata ni Jahowa Zebaot: Ida ma, ahu ma paluahon bangsongku sian tano tungkan habinsaran dohot sian tano tungkan hasundutan ni mata ni ari.

8:8 Jala ahu mamboan nasida mulak, asa maringanan nasida di parsitongaan ni Jerusalem, jadi * bangsongku ma nasida, jala ahu Debatanasida di bagasan hasintongan dohot hatigoran.

8:9 Songon on do hata ni Jahowa Zebaot: * Pagomos hamu ma tanganmuna, hamu angka na umbege hata on na sian pamangan ni panurirang, angka na nidokna * di ari haoojak ni bagas ni Jahowa Zebaot laho paulihon joro i.

8:10 Ai di jolo ni angka ari on, * ndang taruli halak di gogona, hangoluan di pinahan pe soada, ndang marhasonangan sian na manosak na marmeang muli, jadi masisosahan nasida sama nasida hubahen.

8:11 Alai anggo nuaeng ndang be ahu songon di angka ari na jolo tu pasipasi ni bangso on, ninna Jahowa Zebaot.

8:12 Ingkon adong do boni hadameon. Lehonon ni hau anggur do parbuena jala tano on mangalehon gogona, jala langit i mangalehon namburna, asa ditean pasipasi ni bangso on saluhutna i hubahen.

8:13 Jadi masa ma sogot songon i hamu pinompar ni Juda dohot Israel gabe sipaburaburaan di tongatonga ni angka parbegu nasailaon, suang songon i ma ahu manumpak di hamu, asa * manjadi pasupasu hamu sogot; unang hamu mabiar, pagomos hamu ma tanganmuna.

8:14 Ai songon on do hata ni Jahowa Zebaot, songon sangkap ni rohangku na jolo naeng manorui hamu, uju marronirimas ahu mida ompumuna ninna Jahowa Zebaot, jala ndang marpangulahi rohangku.

8:15 Suang songon i sangkaphu di angka ari on naeng marpangulahi rohangku mambahen na denggan tu Jerusalem dohot tu pinompar ni Juda. Dibahen i unang hamu mabiar.

8:16 Alai on ma hata angka sibahenonmuna. * Ganup ma mandok hata hasintongan tu donganna, hasintongan dohot uhum! Hadameon ma panguhumonmuna di partungkoanmuna.

8:17 Jala * unang dipingkiri roha ni manang ise bahen hamagoan ni donganna, jala unang mangapian hamu di tolontolon sipaotooto, ai luhut angka sisongon i huhagigihon do, ninna Jahowa.

8:18 Dung i ro ma muse hata ni Jahowa Zebaot tu ahu:

8:19 Songon on do hata ni Jahowa Zebaot: Parpuasaon di bulan sipaha opat dohot parpuasaon di bulan sipahalima dohot parpuasaon di bulan sipaha pitu dohot parpuasaon di bulan sipaha sampulu ingkon manjadi las ni roha do i dohot hasonangan tu pinompar ni si Juda, dohot manjadi angka pararirayaon bolon; asal dihaholongi hamu hasintongan dohot hadameon.

8:20 Songon on do hata ni Jahowa Zebaot: Ro dope anggo sogot angka bangso dohot pangisi ni angka huta bolon.

8:21 Jala laho do sogot angka pangisi ni huta na sada tu na sada nari mandok: Beta hita rap marsomba tu bohi ni Jahowa, jala mangalului Jahowa Zebaot! Ahu pe naeng dohot do laho tusi!

8:22 Tongon tahe ro do sogot angka bangso bolon dohot parbegu angka na marhuaso mangalului Jahowa Zebaot di Jerusalem jala marsomba tu bohi ni Jahowa.

8:23 Songon on do hata ni Jahowa Zebaot: I ma angka ari parsigaungan ni sampulu halak sian saluhut dila ni bangso parbegu, asa marsigantung nasida tu suhisuhi ni ulos ni sada halak Jahudi mandok: Rap hita sauduran, ai nunga hubege hami: Debata do donganmuna.

Sakaria 9

9:1 On ma hata uhum ni Jahowa dompak tano Hadrak, jala * Damaskus do pansohotanna. Ai manatap do mata ni Jahowa tu sude jolma, alai gumodang tu sandok angka marga ni Israel.

9:2 Tole muse tu * Hamat balokna i, * Tirus dohot Sidon, ala sigodang habisuhon di rohana.

9:3 Jala dipauli Tirus do sada partanobatoanna, jala dipagukguk perak sobokkon orbuk, jala sere sobokkon gambo di alaman.

9:4 Ida ma, soluhon ni Tuhan i ma huta i, jala haromhononna ugasanna tu bagasan laut, ianggo huta i suda do panganon ni api.

9:5 Idaon ni * Askelon ma i, gabe manonditnondit, jala Gasa gabe raion situtu, nang Ekron ala naung murak hinaposanna i nasailaon, jala nunga mago raja sian Gasa, jala ndang be marpangisi ia Askelon.

9:6 Jadi anak gampangna ma maringan di Asdod jala siaphononku ma hajungkaton ni halak Palistim.

9:7 Jala paholangonku ma mudarna sian pamanganna, jala biasbias na niulana sian holangkolang ni iponna. Jadi marpasipasi dohot nasida di Debatanta i, jala sobokkon induk nasida sogot di Juda, jala halak Ekron sobokkon halak Jebusi.

9:8 Laos * ahu sandiri marsaro humongkop jorongku maralohon parangan angka na marmeang muli, jala ndang be boluson ni halak pangarupa nasida, ai nunga marpangulahi rohangku mida hamu anggo nuaeng.

9:9 * Mariaia situtu ma ho, ale boru Sion, marolopolop ma ho ale boru Jerusalem! Ida ma, na ro ma rajam tumopot ho, partigor ibana jala siparmonang; na serep do rohana jala marsihundul di halode dohot di anak ni halode inaina.

9:10 Jala ahu maniaphon angka hureta sian Epraim dohot angka hoda sian Jerusalem, siap dohot sior tu hamusuon. Dung i baritahononna ma hadameon tu angka bangso parbegu, jala masuk tu gomgomanna sian laut tu laut, jala sian batang aek Euprat sahat ro di angka ujung ni tano on.

9:11 Ho pe marhitehite * mudar ni parpadanonmu paluaonku angka na tarbuang sian ho, sian godung na so marisi aek.

9:12 Mulak ma hamu tu huta na gonting, hamu ale angka na tarrante na marpangkirimon dope! Gari sadarion ahu mamaritahon hian: * Silompit dua do pasuangonku tu ho.

9:13 Ai hira sior husintak Juda di ahu, jala huparade ia Epraim tu parporangan, jala husunggul angka anakmi, ale Sion, dompak angka anakmu, * ale tano Junani jala bahenonku ma ho hira podang ni ulubalang.

9:14 Jadi tarida ma Jahowa di atas nasida, jala * ruar sumbiana, songon hilap, jala * paluon ni Tuhan Jahowa ma sarune, jala marhitehon angka habahaba sian dangsina ibana mardalan.

9:15 Jahowa Zebaot mangondingi nasida, gabe suda panganonnasida jala luntakhononku angka batu ni ambalang; jala minum nasida jala marhariburon hira sian anggur, gabe gok nasida songon saoan pangurasan, songon angka suhi ni langgatan.

9:16 Jadi di ari na sasada i lehonon ni Jahowa, Debatanasida ma tua tu nasida, songon tu parduan birubiru ni bangsona, ai angka batu ni tumpal do nasida, angka na gabe partonggol di atas ni tanona.

9:17 Ai aha hinadengganna, jala aha hinaulina? * Dahanon pasimbur magodang angka dolidoli, jala anggur angka na marbaju.

Sakaria 10

10:1 Pangido hamu ma tu Jahowa udan di tingki ni ombahon! Jahowa do na mambahen porhas manoro, lehononna tu nasida dohot udan tu nasa suansuanan di ladang.

10:2 Ai * angka ganaganaan mangkatahon gapgap, jala angka pangarunding manondungi sipaotooto, jala nipi angka na so gabeak, dihatahon nasida, alogo sambing do apulapul sian nasida. Dibahen i * lilu do nasida, songon parduan birubiru, tarjepol nasida, ala so adong siparmahan.

10:3 Marsigorgor do rimashu * dompak angka parmahan, jala dompak angka hambing tunggal ahu marlulu; ai tingkiron ni Jahowa Zebaot ma punguanna, i ma pinompar ni Juda, jala bahenonna nasida songon hoda na pinajagarna tu tongtangan.

10:4 Sian ibana do batu parsuhi, sian ibana huhut pasi, sian ibana do sior tu hamusuon; sian ibana ruar nasa jolma ihutan.

10:5 Jadi doshon ulubalang nasida, angka na mangaluntak musuna di alaman uju di hamusuon; laos marporang nasida, ai Jahowa do dongannasida, gabe tarurak angka jolma parsihundul di hoda.

10:6 Jala margogo bahenonku pinompar ni Juda, jala pamonangonku ia pinompar ni si Josep, jala pasuangonku nasida tu ingananna hian, ai marpangulahi do rohangku tu nasida, jala songon na so dung nasida hubolongkon pangalahonasida sogot. Ai ahu Jahowa Debatanasida, jala alusanku do tangiangnasida.

10:7 Jadi doshon ulubalang Epraim, jala las rohanasida songon binahen ni anggur; idaon ni anaknasida ma i, gabe marlas ni roha. Marolopolop ma rohanasida mida Jahowa.

10:8 Elaongku ma nasida jala papunguonku nasida, ai nunga hutobus nasida, jala patoroponku nasida, songon toropnasida na jolo.

10:9 Jala saburhononku nasida tu tongatonga ni angka bangso, ingotonnasida ma ahu dohot di tano na holang, jadi mangolu nasida rap dohot anaknasida, jala mulak sogot.

10:10 Jala mulak nasida boanonku sian tano Misir, jala papunguonku nasida sian Assur, jala tu tano Gilead dohot tu Libanon togihononku nasida, gabe ndang hasiatan nasida disi.

10:11 Jala * tariparanna do laut hagogotan, jala lipatanna angka galumbang ni laut i jadi marsik ma nasa lung ni Nil, jala direongkon ma haginjangon ni Assur tu toru, jala munsat tungkot harajaon ni Misir.

10:12 Jadi ahu mangalehon gogo tu nasida marhite sian Jahowa, gabe marparange nasida di bagasan goarna, ninna Jahowa.

Sakaria 11

11:1 Ungkap ma bahalmu ale Libanon, asa suda dipangan api angka hau ares na di atasmu.

11:2 Mangangguhi ma ho ale hariara, ai nunga marobo hau ares, nunga tartaba nasida angka na tongam. Mangangguhi ma hamu angka hariara di Basan, ai nunga marobo tombak longolongo.

11:3 Tarbege do suara angguhangguk ni angka parmahan, ai nunga marobo hamuliaonnasida; tarbege do suara na marauang ni angka babiat na bajar, ai nunga mago hajagaron ni Jordan.

11:4 Songon on do hata ni Jahowa Debatangku: Parmahan i ma birubiru sipotongon hian!

11:5 Ai angka na manuhor nasida mamotongi nasida jala ndang pola sala di rohanasida jala angka na manggadis nasida muse mandok: Pinuji ma Jahowa, ai nunga mamora ahu. Sipormahan nasida pe ndang mangolani tu nasida.

11:6 Dibahen i ahu pe ndang be olanangku angka isi ni tano on, ninna Jahowa! Ida ma, ahu sandiri pasahathon jolma i sadasada tu bagasan tangan ni donganna dohot tu tangan ni rajana, asa dipansingkon nasida tano on, jala ndang ahu paluahon sian tangannasida.

11:7 Jadi ahu ma marmahan birubiru sipotongon hian, ala ni * birubiru angka na dangol i. Dung i hubuat ma di ahu dua batahi; na sada hugoar haholongan, na sada nari hugoar harosuon. Jadi laos ahu ma marmahan angka birubiru i.

11:8 Jadi husiaphon ma parmahan sitolutolu i di bagasan sabulan, ai biasan rohangku mida nasida, rohanasida pe antong biasan do mida ahu.

11:9 Jadi ningku ma: Ndang olo be ahu marmahan hamu: Mate tusi na mate! Siap tusi na siap i! Jala na teba i dipangan be tusi sibuk ni donganna.

11:10 Dung i hubuat ma batahingku haholongan, jala huponggolhon laho manait padanhu, na hubahen i tu saluhut angka bangso.

11:11 Jadi mose ma padani di na sadari i. Dung i mamoto ma * birubiru angka na dangol i, angka na mangaranap tu ahu, hata ni Jahowa do i hape.

11:12 Jadi ningku ma tu nasida: Molo denggan di rohamuna, lehon tu ahu upangku, alai molo ndang, ba jua hamu tusi. Jadi didasing nasida ma upangki * tolupulu rupia.

11:13 Dung i didok Jahowa ma tu ahu: Reongkon ma i tu sitopa hudon, jagar ma asami, na niasamnasida ahu. Jadi hubuat ma na * tolupulu rupia i, jala hutimpalhon ma i tu bagasan joro ni Jahowa lehonon tu sitopa hudon i.

11:14 Dung i huponggolhon ma batahingku na paduahon i ma harosuan i, laho manirang * pardongan saripeon sabutuhaon ni Juda tu Israel.

11:15 Dung i ninna Jahowa ma tu ahu: Buat sahalinari di ho ulaula ni sada parmahan na oto.

11:16 Ai ida ma, ahu ma patindang sogot sada parmahan di tano on, ndang tingkironna angka na mago, jala ndang luluanna na lilu, jala ndang daonanna na ginosagosa, jala ndang parmuduonna na hot jongjong; alai anggo sibuk ni na mokmok suda panganonna, jala hiskisonna ia sisilonnasida.

11:17 Marjea ma parmahan na so marguna, na olo manadingkon birubiru i! Manginona ma podang tu botohonna dohot tu matana siamun i! Malos situtu ma botohonna, jala lotop matana siamun i.

Sakaria 12

12:1 Songon on ma hata ni Jahowa, * na paherbang langit jala na paojak tano on, jala na jumadihon tondi ni jolma di bagasan dirina.

12:2 Ida ma ahu sandiri mambahen Jerusalem gabe * panginuman hamabuhon di saluhut angka bangso humaliang, sahat ibana huhut tu Juda di hatutungkum ni Jerusalem.

12:3 Dung i masa ma di ari na sasada i, ahu sandiri mambahen Jerusalem gabe * batu pangujian gogo di saluhut angka bangso; nasa na naeng mangkindat maraprap bahenonna, jala marpungupungu naeng mangalo huta i * nasa bangso parbegu di tano on.

12:4 Di ari na sasada i, ninna Jahowa: Jimbolangon ma bahenonku nasa hoda, jala jolma na mangkunduli lalaen ma. Alai anggo mida pinompar ni Juda mangaranap ma matangku; ianggo hoda ni angka bangso * papitungonku ma sudena.

12:5 Dung i dohonon ni angka induk ni Juda ma di bagasan rohanasida: Bahen hagogoon di ahu do angka isi ni Jerusalem marhitehite Jahowa Zebaot Debatanasida i.

12:6 Di ari na sasada i ahu sandiri mambahen angka induk ni Juda, songon hudon parapiapian di holangkolang ni soban, jala songon tulbu di holangkolang ni * tibalan, asa suda dipangan nasida saluhut angka bangso humaliang tungkan siamun dohot tungkan hambirang. Alai anggo Jerusalem hot do tongtong di ojahanna hian di Jerusalem.

12:7 Jadi jumolo lehonon ni Jahowa tua tu angka undungundung ni Juda, asa unang manenganenga hamuliaon ni bagas ni si Daud dohot hamuliaon ni isi ni Jerusalem mangasta Juda.

12:8 Di ari na sasada i Jahowa ma gabe partanobatoan humaliang isi ari na sasada i, sobokkon si Daud jala pinompar ni si Daud tudoshon Debata, songon suruan ni Jahowa di adopannasida.

12:9 Marlulu ma ahu di ari na sasada i mamansingkon saluhut bangso parbegu, angka na ro mamorang Jerusalem.

12:10 Jadi * usehononku ma tu pinompar ni si Daud dohot tu isi ni Jerusalem tondi parasian dohot partangiangon, gabe ** paberengberengon nasida ma ahu, naung tinullang nasida; jala andungannasida ibana, songon pangandungion di anak sasada, jala habot situtu rohanasida taringot tu ibana songon habot ni roha mida * anak buhabaju.

12:11 Di ari na sasada i masa ma pangandungion bolon di Jerusalem, songon pangandungion uju di Hadadrimmon * di rura Megiddo.

12:12 Mangandungi ma isi ni tano on: Marompuompu pulik be pinompar ni ompu ni si Daud pulik, jolma nasida pe pulik; pinompar ni ompu ni * si Natan pulik, jolmanasida pe pulik.

12:13 Pinompar ni ompu ni si Lepi pulik, jolmanasida pe pulik; pinompar ni ompu ni si Simei pulik, jolmanasida pe pulik.

12:14 Suang songon i sude pinompar ni ompu na asing, ganup ompu pulik be, jala jolmanasida pulik.

Sakaria 13

13:1 Di ari na sasada i sogot adong ma * sada mual na talak di pinompar ni si Daud dohot di angka isi ni Jerusalem mamburi sude dosa dohot haramunon.

13:2 Jala di ari na sasada i, masa ma, ninna Jahowa Zebaot: Ahu * mamansingkon nasa goargoar ni angka ganaganaan sian tano on, asa unang be dipaingotingot rohana; angka pangarunding pe dohot tondi haramunon pabalionku ma sian tano i.

13:3 Jadi tung sura mangarundingi dope manang ise, dohonon ni amana dohot inana na manubuhon ibana ma tu ibana: * Ndang jadi be ho mangolu, ai nunga dihatahon ho gapgap marhitehite goar ni Jahowa! Pola tullangon ni amana dohot inana na mangintubui ibana di pangarundingonna i.

13:4 Ai masa ma di ari na sasada i: Tarurak be ma angka panurirang marhite sian alatanna, dohot pangarundingonna i, gabe ndang be paruloshononna ulos parhadohoan sian * imput ni birubiru laho paotootohon.

13:5 Lam dohononna be ma: * Ndang panurirang ahu, jolma siula tano do ahu, ai nunga adong jolma na tumuhor ahu sian sietehetehonku dope.

13:6 Tung sura adong na mandok tu ibana: Bugang dia do i na di tanganmu? Gabe dohonon ma: Na dibugangi isi ni bagas haholonganku do ahu.

13:7 Ngot ma ho, ale podang dompak parmahanku dohot dompak baoa sihasolhotangku ninna Jahowa Zebaot; * lombuti ma parmahan i, asa marserak angka birubiru, dung i patoltolonku ma tanganku manogu angka na metmet.

13:8 Dung i masa ma di sandok tano on, ninna Jahowa ripashononhon do dua partolu isina, tung tos do hosana, alai tading do anggo na sapartolu isina i.

13:9 Na sapartolu i pe togihononku do tu bagasan api, jala papitaonku nasida, songon pamita ni halak di perak, jala ujionku nasida, songon panguji ni halak di sere. * I ma na pajoujou goarhu sogot, jala alusanku ibana; dohononku ma: ** Bangsongku do i, ibana pe dohononna ma: Jahowa Debatangku.

Sakaria 14

14:1 Ida ma, * ro do ari ni Jahowa sogot, parbagian ni tabantabanmu di parsitongaanmu.

14:2 Ai * papunguonku ma saluhut angka bangso parbegu dompak Jerusalem laho martongtang, gabe tartaban ma huta i, jala pupusanna angka jabu, jala ramunanna angka inaina, jala satonga huta i tarboan tu habuangan, alai anggo pasipasi ni bangso i, ndang siaphononna sian huta i.

14:3 Dung i borhat ma Jahowa, asa marmusu dompak angka bangso parbegu i, songon na somal ibana marporang, di ari tongtangan i.

14:4 Jadi ojakkononna ma patna di ari na sasada i di atas ni dolok Jetun, tondong ni Jerusalem tungkan habinsaran. Dung i bola dua ma dolok Jetuni sian habinsaran tungkan hasundutan, gabe tubu rura na lambas situtu, gabe morot na satonga ni dolok i tungkan utara, na satonganari tungkan dangsina.

14:5 Jadi maporus ma anggo hamu tu rura ni angka dolokku, ai sahat do rura ni angka dolok i ro di Asel. Maporus ma tutu hamu, songon hapoporusmuna * maradophon lalo uju di angka ari ni si Usia, raja sian Juda. Dung i ro ma Jahowa Debatangku, udur dohot ibana saluhut angka na badia.

14:6 Jala di ari na sasada i, ndang adong hatiuron, mangkolom ma angka panondang di langit.

14:7 Jala sada sambing do ari i, * sasada Jahowa umbotosa, so haru arian, so hara borngin. Alai marhira * bodari tiur ma muse.

14:8 Di ari na sasada i sogot, ruar ma angka aek hangoluan sian Jerusalem, satongana dompak laut tungkan habinsaran, jala na satonganari dompak laut tungkan hasundutan; manipat partaonan logo ni ari dohot rondo ni ari masa songon i.

14:9 Jadi Jahowa gabe * raja gumomgom liat portibi on; di ari na sasada i sada situtu Jahowa, goarna pe sada do.

14:10 Muba ma sandok tano i, songon adaran sian Geba tu Rimmon tungkan dangsina ni Jerusalem. Alai tarhinsat ma ianggo huta i, jala na niinganan di ingananna hian, olat ni harbangan Benjamin sahat ro di hajongjongan ni harbangan parjolo, pola sahat di harbangan parsuhi, jala sian tungkup Hananel sahat ro di pangilangan ni rajai.

14:11 Jadi maringanan ma halak disi jala ndang adong be * masa hamagoan, * gabe marsonangsonang halak mangingani Jerusalem.

14:12 Alai on do torutoru sipasonggopon ni Jahowa tu saluhut bangso, angka na marporang dompak Jerusalem: Merus bahenonna sibukna, andorang diojakkon dope patna, matana pe malala do di bagasan liangna, busuk dohot dilana di bagasan pamangannasida.

14:13 Dung i pamasaon ni Jahowa ma di ari na sasada i hagunturon bolon di nasida, ganup nasida manoro tangan ni donganna, jala diondamhon tanganna dompak tangan ni donganna.

14:14 Dohot do halak Juda marmusu di bagasan Jerusalem; jadi diboan halak ma tu bagasan huta i arta ni saluhut bangso parbegu humaliang, sere, perak dohot angka ulos mansai godang.

14:15 Laos songon i do pangonai ni torutoru i tu hoda, hoda na marsahe, halode, unto, lombu ro di nasa dorbia angka na di parsaroannasida, suman tu torutoru ondeng.

14:16 Dung i nasa na teba sian saluhut bangso parbegu angka na ro mangalo dompak Jerusalem, nangkok ma nasida * ganup taon * laho marsomba tu raja Jahowa Zebaot, jala marari raya parlapelapean.

14:17 Alai manang ise sian angka bangso ni tano on na so nangkok tu Jerusalem laho marsomba tu raja Jahowa Zebaot, ndang madabu udan tu nasida.

14:18 Tung sura bangso Misir na so nangkok, manang ro, tung so dohot ma tu nasida mangonai torutoru i, na hinonahon ni Jahowa tu bangso parbegu na asing, angka na so nangkok marari raya parlapelapean?

14:19 I ma torutoru ala ni dosa ni Misir dohot torutoru ala ni dosa ni saluhut bangso parbegu, angka na so nangkok marari raya parlapelapean.

14:20 Di ari na sasada i tarsurat do di angka giringgiring ni hoda: * Na badia di Jahowa! Jala angka saoan di joro ni Jahowa sobokkon angka saoan pangurasan di adopan ni langgatan.

14:21 Tongon, badia di Jahowa Zebaot do nasa saoan di Jerusalem dohot di Juda, jala ro be sude halak angka na mamelehon pelean, jala dipambuat sian i, jala dipangalompai, alai ndang adong be di ari na sasada i * halak Kanaan di bagasan joro ni Jahowa Zebaot.