Nainggolan

Nainggolan (Surat Batak: ᯉᯤᯰᯎᯬᯞᯉ᯲) i ma sada marga Batak Toba na tubu sian Luat Nainggolan, Samosir. Marga Nainggolan i ma marga ni angka pinompar ni anak sipaiopat huhut sipaitonga ni Si Raja Lontung, i ma Toga Nainggolan. Marserak do pinompar ni Toga Nainggolan di angka luat na marragam di Tano Batak, songon di Luat Nainggolan, Pusuk Parlilitan, Pahae Silindung, Pangururan, Negeri Sihotang, Uluan Toba, Parbuluan Dairi, dohot di piga-piga luat na asing di humaliang ni Tano Batak.

Tarombo Sian Siraja Batak

Ia Si Raja Batak, dua ma ianakhonna, i ma:

1. Guru Tatea Bulan huhut na margoar Naimarata manang Nalontungon
2. Raja Isumbaon

Ia Guru Tateabulan, tubu ma di ibana lima anak dohot lima boru, i ma:

1. Raja Biakbiak
2. Tuan Sariburaja
3. Limbongmulana
4. Sagalaraja
5. Silauraja
6. Siboru Biding Laut
7. Siboru Pareme
8. Pungga Haomasan
9. Anting Haomasan
10. Nan Tinjo

Tubu ma sada anak ni Tuan Sariburaja na pinompos ni ibotona Si Boru Pareme i ma na margoar si Raja Lontung. Hot dope Tuan Sariburaja marianakhon dua anak sian dongan saripena na asing, i ma na margoar si Raja Borbor dohot si Raja Galeman.

Raja Lontung mangalap inongna sandiri i ma Siboru Pareme jala tubu ma di ibana pitu anak dohot sada boru. Pitu anak i, i ma:

1. Toga Sinaga
2. Tuan Situmorang
3. Toga Pandiangan
4. Toga Nainggolan
5. Toga Simatupang
6. Toga Aritonang
7. Toga Siregar

Ia boru sasada ni si Raja Lontung dohot Siboru Pareme i ma na margoar Siboru Panggabean Br. Lontung, marripe ma i dohot Toga Sihombing jala tubu ma opat anak di nasida, i ma:

1. Borsak Jungjungan (Silaban)
2. Borsak Sirumonggur (Lumbantoruan)
3. Borsak Mangatasi (Nababan)
4. Borsak Bimbinan (Hutasoit)

Dungkon i, Siboru Panggabean Br. Lontung mangoli (singkat rere siala monding amang siadopanna, i ma si Toga Sihombing) muse tu angkang ni si Toga Sihombing, i ma Toga Simamora jala tubu ma tolu anak di nasida, i ma:

1. Toga Purba
2. Toga Manalu
3. Debataraja

Marhite on ma na gabe mullop sada pandohan na mandok "Lontung si Sia Marina (ualu anak (dohot ma Raja Lontung) jala sada boru), na pasiahon boruna Sihombing - Simamora"

Toga Nainggolan, dua ma anakna i ma:

1. Sibatu
2. Sihombar

Sibatu na mangalap Boru Limbong, tubu ma dua anak di ibana i ma:

1. Sibatuara
2. Parhusip

Adong do songon dua hatorangan taringot tu ise do na gabe anak siangkangan ni Sibatu. Ia dua hatorangan sian pomparan ni Si Batu i, i ma:

Hatorangan 1: Sibatuara ima anak siangkangan (On ma na somal diboto jala dihatindangkon sude pomparan ni Toga Nainggolan, tarlumobi sian pinompar ni Sihombar songon anggi ni pinompar ni Sibatu).

Hatorangan 2: Sian turiturian

Molo mangihuthon turiturian, Parhusip jala Sibatuara hot do nasida mangoli tu dua boru na marangkang-maranggi, i ma boru ni Raja Sijorat Panjaitan jala marhite sian i ma gabe rap marhulahula tu marga Panjaitan ma nasida. Pinompar ni Parhusip i ma na margoar Lindi Niaek mangoli ma tu boru siangkangan i ma na margoar Pintaomas Br. Panjaitan, jala pinompar ni Sibatuara i ma na margoar Panguluraja mangoli ma tu boru sianggian i ma na margoar Sampulu Br. Panjaitan. Panguluraja Sibatuara mangelek tu Lindi Niaek Parhusip asa jadi pangolionna ma anggiboruna i. I ma sidalian sian pomparan ni Sibatuara na gabe dasor pargonti ni panggoaran tu marga Parhusip.

Parhusip, tubu ma dua anak di ibana, i ma:

1. Tuan Marnaning
2. Manahan Laut

Ia Manahan Laut dirajahon ma i gabe anak ni Silali sian marga Siregar, jala boru ni Silali na margoar Sitatap Birong ma na gabe boru ni Parhusip. Sitatap Birong muli tu marga Sihotang Sorganimusu, anak ni Raja Sigodang Ulu. Marhite sian on ma gabe dibahen ma sada padan di adaran ni marga Nainggolan dohot marga Siregar, ia na so jadi rap masiolian pinomparnasida, diorai do nasida mangoli/muli manang dipangoli. Ia padan on hot do diulahon angka pinompar ni Toga Nainggolan dohot Toga Siregar sahat tu tingki on.

Sihombar tolu ma anakna, i ma:

1. Raja Nahor (marga Lumbannahor dohot Sirumahombar)

2. Tungkup Raja (marga Lumbantungkup dohot Lumbanraja)

3. Raja Padot (marga Lumbansiantar dohot Hutabalian)

Tarombo Sibatu, Anak Siangkangan ni Toga Nainggolan

Ia Toga Nainggolan, tubu ma dua anak di ibana, i ma:

1. Sibatu
2. Sihombar

Ia anak siangkangan ni Toga Nainggolan na margoar Sibatu, mangoli ma ibana tu Boru Limbong jala tubu ma dua anak di ibana, i ma:

1. Sibatuara
2. Parhusip

• Sibatuara

Ia Sibatuara, mangoli ma ibana tu Boru Malau, jala tubu ma sada anakna i ma na margoar Ompu Lopian. Ompu Lopian mangoli tu Boru Simbolon laos tubu ma ma sada anakna i ma na ginoaran Ama ni Lopian. Dung i Ama ni Lopian mangoli ma tu paribanna Boru Simbolon jala tubu ma sada anakna na margoar Lopian manang Ompu Humorna. Lopian (Ompu Humorna) mangoli tu Boru Lumbansiantar laos tubu ma sada ianakhonna na digoari Pangulu Raja. Pangulu Raja mangoli tu Sampulu Br. Panjaitan jala tubu ma dua ianakhonna, i ma Tuanamora dohot Siampapaga.

Ia Tua Namora mangoli tu Boru Tamba jala tubu ma dua ianakhonna, i ma Gaja Mauli dohot Tuan Jonar (TIntin Harungguan). Ia Gaja Mauli, tubu ma opat anak di ibana i ma: Ompu Pinondang, Ompu Balian, Ompu Raja Minu, dohot Ompu Gumora. Pinompar ni Gaja Mauli on ma na sahat tu Lumban Suhi-suhi Pangururan jala na mamomparhon marga Nainggolan Batuara disi. Ia Tuan Jonar (Tintin Harungguan), tubu ma dua anak di ibana i ma na margoar Ompu Binur dohot Ompu Raja Ongat (Ompu Raja Uhum). Pinompar ni Tuan Jonar on ma na sahat tu Luat Simanindo jala na mamboan marga Nainggolan Batuara disi.

Ia Siampapaga mangoli tu Boru Lumbannahor jala tubu ma opat ianakhonna, i ma Ompu Raja Mual, Ompu Luhutan, Ompu Ronggur, dohot Ompu Palia Raja. Ia Ompu Raja Mual, tubu ma tolu anak di ibana i ma: Ompu Raja Holong, Ompu Paronggit, dohot Ompu Balisan. Ia Ompu Luhutan, tolu ma ianakhonna i ma Raja Maralo (Ompu Sohalompoan), Ompu Panombal, dohot Raja Idaon. Pinompar ni Raja Maralo on ma na marserak di luat Siborongborong dohot humaliangna jala sahat do pinomparna tu Luat Pahae. Ia Ompu Ronggur, dua ma anakna i ma Ompu Togang dohot Ompu Adel jala Ompu Palia Raja tubu ma dua anak di ibana i ma na margoar Ompu Tuan Jujur dohot Ompu Soaloon. Pinompar ni Ompu Tuan Jujur on ma na sahat tu Luat Humbang jala marpinompari di Luat Humbang dohot Humaliangna.

• Parhusip

Ia Parhusip, tubu ma sada anak di ibana na margoar Tuan Marnaning, Tuan Marnaning manubuhon sada anak na margoar Namora Jollung, Namora Jollung manubuhon sada anak na margoar Namora Sobiasan, Namora Sobiasan manubuhon sada anak na margoar Tuan Saribupasir, Tuan Saribupasir manubuhon sada anak na margoar Pasir Lando, jala Pasir Lando manubuhon sada anak na margoar Lindi Niaek. Ia Lindi Niaek mangoli ma ibana tu Pintaomas Br. Panjaitan jala tubu ma opat anak di ibana, i ma: Marsanti Ulubalang, Girsang Dori Angin, Pintu Jonggi Manaor, dohot Daon Sihol.

Ia Marsanti Ulubalang, mangoli ma ibana tu paribanna Boru Panjaitan jala tubu ma opat anakna, i ma: a). Ompu Tuan Nabolas na mangoli tu Boru Lumbanraja jala marhuta di Hutaraja Nainggolan; b). Ompu Ulubalang ni Bulan na mangoli tu Boru Panjaitan jala laho do pinomparna tu Luat Pansurnatolu Pangaribuan; c). Toga Panisir na mangoli tu Boru Pardede jala na laho tu Huta Bange di Luat Balige; d). Guru Tinandangan na mangoli tu Boru Manurung jala laho tu Luat Jangga Lumbanjulu.

Ia Girsang Dori Angin, mangoli ma ibana tu Boru Malau jala tubu ma dua anakna, i ma Porhas Baliga dohot Girsang Matabun. Ia Porhas Baliga mangoli tu paribanna Boru Malau jala tubu ma dua anakna i ma Ampanoga dohot Ompu Puhunan. Ia Ompu Puhunan, so binoto be sahat tu sadari on baritana manang didia do pinomparna di tingki on. Ia Ampanoga mangoli tu Boru Sihite dohot Boru Simarmata laos tubu ma dua anakna na margoar Ampangulahan, Ompu Hutabau na mangoli tu Boru Sinaga, dohot Ompu Soramangula na mangoli tu Boru Gultom. Ia Ampangulahan tubu ma sada anakna na margoar Ompu Jaholbung, jala Ompu Jaholbung tubu ma tolu anak di ibana na margoar Ompu Tuan Nagabosi, Ompu Soimbangon, dohot Ompu Jaisori na mangoli tu Boru Simarmata dohot Boru Hutabalian.

Ia Girsang Matabun anak siampudan ni Girsang Dori Angin, mangoli ma ibana tu Boru Manurung jala tubu ma opat anak di ibana, i ma: a). Ompu Tarubar na mangoli tu Boru Sitohang jala marhuta di Luat Urat; b). Ompu Tandangraja na mangoli tu Boru Sitinjak jala marhuta di Sipangko Harian Nainggolan; c). Guru Mombangdiaji na mangoli tu paribanna Boru Manurung jala marhuta di Hutapining; d). Toga Uluan na mangoli tu Boru Manurung jala laho marhuta tu Silamosik Lumbanjulu.

Ia Pintu Jonggi Manaor, so binoto be baritana sahat tu sadari on jala soadong na mamboto didia pinomparna sahat tu tingki on.

Ia Daon Sihol, mangoli ma ibana tu Boru Panjaitan jala tubu ma dua anakna, i ma Tuan Markajim dohot Ompu Puniogo (Raja Parulas). Tuan Markajim mangoli tu Boru Panjaitan jala tubu ma sada anakna na margoar Ompu Soungkiton, jala Ompu Puniogo (Raja Parulas) tubu ma opat anakna i ma: a). Ompu Sita, b). Ompu Sibele, c). Pujanggar, dohot d). Punsihol.

Ia Marga Siahaan Nainggolan, i ma pinompar ni Ompu Marolop na dirajahon gabe pinompar ni Parhusip. Anggo sasintongna Ompu Marolop pinompar ni Tuan Pangorian (Siahaan Lumbangorat) do, jala tubu ni Boru Parhusip do ibana. Hape, ala ni ndang tarjangkon dongan tubuna marga Siahaan Lumbangorat di Balige ibana ala ndang ditanda nasida Ompu Marolop, i do na umbahen gabe diparajahon tulangna ma ibana gabe anakna jala mulai sian tingki i, gabe pinompar ni Parhusip ma ibana dohot pinomparna, i ma gabe anak ni Tuan Saribupasir jala gabe marhahaanggi ma ibana dohot Pasir Lando. Ia Marulak Uhum (Ompu Marolop) sada do anakna i ma Ompu Sidomdom I. Ompu Sidomdom I mangoli ma ibana tu Boru Samosir jala tubu ma dua anakna i ma Ama ni Sidomdom na mangoli tu Boru Samosir dohot Ompu Marbuas na mangoli tu Boru Sitinjak.

Tarombo Sihombar, Anak Siampudan ni Toga Nainggolan

Ia Toga Nainggolan, tubu ma dua anak di ibana, i ma:

1. Sibatu
2. Sihombar

Ia anak siampudan ni Toga Nainggolan na margoar Sihombar, tubu ma tolu anak di ibana, i ma:

1. Raja Nahor
2. Tungkup Raja
3. Raja Padot

• Raja Nahor (Lumbannahor)

Ia Raja Nahor, mangoli ma ibana tu Boru Borbor jala pinomparna i ma angka na mamboan marga Lumbannahor jala adong sian pomparanna na mamboan marga Sirumahombar.

• Tungkup Raja (Lumbantungkup & Lumbanraja)

Ia Tungkup Raja, tubu ma sada anak di ibana na margoar Sindarniari, Sindarniari tubu ma anakna sada na margoar Sindarnihuta, Sindarnihuta tubu ma anakna sada na margoar Mogot Pinaungan. Mogot Pinaungan mangoli tu Boru Sitindaon jala tubu ma dua anakna na margoar Tanja Bau dohot Datu Parulas Parultop. Ia Tanja Bau, tubu ma tolu anakna jala pinompar ni Tanja Bau on na mamboan jala marmargahon marga Lumbantungkup. Tolu anak ni si Tanja Bau i i ma: Ompu Binggar, Tuan Sipongo, dohot Ompu Pugun. Ia Ompu Binggar dua ma ianakhonna i ma Ama ni Binggar dohot Ompu Dalokdak. Ia Ama ni Binggar, sada do anakna i ma Raja Ompu Paian na tarbarita jala na marhasaktion Parsangkalia Simataniari Tali Tumali. mangoli tu Boru Sihombing do ibana jala marserak ma pinomparna di Siborotan, Tomok, Nagasaribu, sahat tu Sarulla Pahae. Ia Tuan Sipongo tolu ma anakna i ma: Ompu Soginjangon, Ompu Babanihuta, dohot Ompu Lomaknihuta. Ia Ompu Pugun dua ma anakna i ma Ama ni Pugun dohot Guru Tumindi.

Ia Datu Parulas Parultop, datu na bolon jala na tarbarita do ibana jala sopar do pinomparna laos marragam do marga na binoan ni angka pinomparna. Alai ianggo marga parsadaan ni pinomparna i ma marga Lumbanraja. Onom do dongan ripe ni Datu Parulas Parultop jala sampulu opat do ianakhonna hombar tu na tarsurat di Tarombo Bolon keluarga Lumbanraja. On ma onom ripe dohot sampulu opat anak na i, i ma:

• Tubu ni Bintang Maria Br. Simbolon

1. Tuan Panalingan/ Sarmahata (Marga Pusuk)
2. Mogot Hualu/ Darmahasi (Marga Buaton)
3. Tuan Ampir/ Guru Panuju (Marga Mahulae)

• Tubu ni Boru Simbolon

1. Anak Gajut/ Tuan Rangga

• Tubu ni Br. Sagala

1. Siboro (Ndang sude marga Siboro pinompar ni Nainggolan, holan sabagian do)

• Tubu ni Siboru Parmudaan Br. Manurung

1. Sitalutuk
2. Toga Sahata
3. Sabungan Raja

• Tubu ni Siboru Pura Nienet Haomasan Br. Manurung

1. Guru Tinandangan
2. Guru Tinunjungan
3. Toga Dipasir
4. Tuan Dibaringin

• Tubu ni (?) (So binoto dope)

1. Raja Tomuan
2. Raja Bonandolok

Ia angka na tinubuhon ni si Bintang Maria Br. Simbolon, di Pusuk Parlilitan do bona pasogitnasida jala mamboan tolu marga ma nasida i ma marga Pusuk, Buaton, dohot Mahulae. Anak siangkangan i ma Tuan Panalingan na mamboan marga Pusuk, anak sipaitonga i ma Mogot Hualu na mamboan marga Buaton jala tubu ma dua anakna i ma Ompu Tahan dohot Guru Tohuk, sian Ompu Tahan ma tubu pinompar ni marga Buaton nuaeng jala tubu ma anakna sada i ma na margoar Guru Tahan. Guru Tahan tubu ma dua anakna di ibana i ma Raja Buaton dohot Ompu Darondong. Raja Buaton sada ma anakna na margoar Ompu Lintong jala Ompu Lintong dua ma anakna i ma Ompu Ramin dohot Ompu Debata. Ia Ompu Darondong sada ma anakna na margoar Ompu Kutuk jala Ompu Kutuk dua ma anakna i ma Ompu Marsadar dohot Ompu Marsaitlipan. Ia anak sipaitolu i ma Tuan Ampir na mamboan marga Mahulae jala tubu ma tolu anakna i ma Ompu Sorba, Raja Suasa, dohot Raja Tiningkian. Ompu Sorba i ma ompu na hona toru gabe batu, jala batu i hot dope adong sahat tu sadari on, ia Raja Tiningkian, mangaranto do ibana tu luat Sipirok jala pomparanna marmargahon Nahulae. Marhite sian i, jadi holan Raja Suasa do na mamomparhon marga Mahulae jala pinompar ni Raja Suasa do sude marga Mahulae nuaeng. Ia Raja Suasa tubu ma sada anakna na margoar Ompu Dolombire jala Ompu Dolombire tubu ma dua anakna i ma Ompu Joling dohot Ompu Jombeng. Ia Ompu Joling tubu ma di ibana tolu anak i ma: Ompu Marbinbin, Ompu Panabungan, dohot Ompu Juhur. Ia ompu Jombeng dua ma anakna i ma: Ompu Pintor dohot Ompu Somuntul.

Ia Tuan Rangga diboan Datu Parulos Parultop do ibana tu Sibisa jala tinggal huhut marpinompari ma ibana disi. Ia Siboro marhuta jala marpinompar di Luat Sagala dohot Rianiate. Ia angka na tinubuhon ni Siboru Parmudaan Br. Manurung, hot do nasida maringanan di huta na pinungka ni Datu Parulas Parultop i ma di Harian Nainggolan jala nasida mamboan marga Lumbanraja. Ia anak siangkangan i ma Sitalutuk mangoli tu Boru Marbun Banjarnahor jala tubu ma dua anakna i ma Ompu Sohutihon dohot Ompu Pangauan, Ompu Sohutihon tubu ma pitu anak di ibana i ma: a). Ompu Jonggi, b). Guru Mangantar, c). Ompu Sabungan, d). Ompu Parjalaja, e). Ompu Rangin, f). Ompu Tumbol, dohot g). Ompu Pinggan Matio. Ia anak sipaitonga i ma Toga Sahata mangoli tu Siboru Marjulonggo Br. Hutapea Laguboti jala sada ma anakna i ma Sibalanga Bosi (Ompu Somanimbil). Ia Ompu Somanimbil mangoli tu Siboru Marjarojak Br. Tampubolon jala tubu ma opat anakna, i ma: 1). Ampa Maksa na mangoli tu Sirumontang Br. Sihotang jala maringanan di Buntu Nauli Harian; 2). Ama ni Parulas na mangoli tu Nan Sonting Halilingan Br. Siringoringo jala hot maringanan di Harian; 3). Ompu Ronggur na mangoli tu Nai Panguhalan Br. Hutapea Laguboti dohot Nai Mangasa Tua Br. Siringoringo Sipangpang jala hot maringanan di Harian. Ia anak siampudan ni Ompu Ronggur na pinompos ni Nai Mangasa Tua na margoar Ompu Sohaginjangon (Raja Mangosong), laho do ibana tu Luat Pusuk jala marharajaon disi, marserak do pinomparna tu Parbuluan Dairi, Pusuk, Pandumaan Doloksanggul, dohot angka luat na asing na adong di Tano Humbang; dohot 4). Raja Moba na mangoli tu Nai Ampa Nebur Br. Sinurat jala laho tu Hariara Tolu Pangururan huhut marpinompar disi. Ia anak siampudan i ma Sabungan Raja, hot do pinomparna tinggal di Harian.

Ia angka na tinubuhon ni Siboru Pura Nienet Haomasan Br. Manurung marserak do pinomparna jala sude mamboan marga Lumbanraja. Ia Guru Tinandangan laho do pinomparna tu Luat Pahae jala torop do pinomparna disi. Ia Guru Tinunjungan laho di ibana tu luat Negeri Sihotang laos marpinompar disi. Ia Toga Dipasir hot do ibana maringanan di Luat Nainggolan i ma di tano parbagian ni Datu Parulas Parultop nanilehon ni Mogot Pinaungan. Jala Tuan Dibaringin laho jala marhuta ibana tu Luat Pusuk. Ia angka na tinubuhon ni ripe paonomhon ni Datu Parulas Parultop, so binoto be baritana sahat tu sadari on, jala soadong na mamboto didia pinomparna di tingki on.

• Raja Padot (Lumbansiantar & Hutabalian)

Ia Raja Padot, i ma na mamomparhon marga Lumbansiantar dohot adong ma sian pinomparna na mamboan marga Hutabalian. Molo taringot tu tarombo ni pomparan ni Raja Padot, ndang adong dope tarombo na hot alana pomparanna masiboan tarombona be. Ala i, ni on ma tarombo na somal jala gumodang diboan angka pinomparna jala nunga dipatota pomparan ni Hutabalian songon tarombo parsatongkinan (sementara) andorang so tarpungu sude tarombo ni angka pinompar ni Raja Padot alana godang do angka pinompar ni Raja Padot na so tardapot dope. On ma tarombona:

Raja Padot sada ma anakna i ma na margoar Ompu Sotembalon, Ompu Sotembalon sada ma anakna i ma na ginoaran Ama ni Sotembalon. Ia Ama ni Sotembalon dua ma anakna i ma Datu Rajin na hot umpompar marga Lumbansiantar dohot Raja Mardungdung na mamboan marga Hutabalian. Ia Datu Rajin i ma ompu ni angka marga Lumbansiantar nuaeng jala adong ma dua halak sian pinomparna na hot dope adong pinomparna sahat tu sadari on, i ma Ompu Ulang Adian dohot Ompu Mingor.

Ia Raja Mardungdung, i ma ompu ni angka marga Hutabalian jala tubu ma dua anak di ibana, i ma Ompu Hutabalian dohot Ompu Siunong, Sian Ompu Hutabalian ma tubu pinompar ni Hutabalian. Ia Ompu Hutabalian sada ma anakna i ma na margoar Raja Panangkal jala Raja Panangkal tolu anak ma di ibana, i ma Ompu Saur Raja, Raja Parhoris, dohot Ompu Porhis Laga. Sian Ompu Saur Raja ma tubu pinompar ni Hutabalian nuaeng. Ia Ompu Saur Raja, sada ma anakna i ma na margoar Ompu Sidomdom jala Ompu Sidomdom sada ma anakna i ma na margoar Ompu Raja Ijolma. Ia Ompu Raja Ijolma, tubu ma tolu anakna, jala angka dakdanakna i ma na hot dope adong pinomparna sahat tu sadari on. Ia angka anakna i, i ma: 1). Ompu Guru Solindungon na manubuhon Raja Ulang Bahara, jala Raja Ulang Bahara mamomparhon opat anak i ma: Ompu Tinumpahan, Ompu Babiat, Ompu Parsuratan, dohot Raja Paniangan; 2). Ompu Balian manubuhon Raja Mangau (Guru Laut) dohot Ompu Bonaniaek; dohot 3). Ompu Marmeam na manubuhon Ama ni Marmeam dohot Ompu Sosuharon.

Turunan Marga

• Batuara
• Siampapaga
• Parhusip
• Siahaan Nainggolan
• Lumbannahor
• Lumbantungkup
• Pusuk
• Buaton
• Mahulae
• Lumbanraja
• Lumbansiantar
• Hutabalian

Pangituai

Adong piga-piga pangituai di halak batak na nampuna marga Nainggolan, ima:

• Azas Tigor Nainggolan
• Boyke Nainggolan
• Cassanova Alfonso Nainggolan
• Derby Romero Nainggolan
• Elfin Elyas Nainggolan
• Framly Nainggolan
• Jafar Nainggolan
• Marlon Renaldy Nainggolan
• Pantas Nainggolan
• Parman Nainggolan
• Radja Nainggolan
• Restika Pardamean Nainggolan
• Rony Parulian
• Rustam Effendy Nainggolan
• Suwondo Nainggolan
• Syahganda Nainggolan
• Yohanna Nainggolan